هو احنا بنحبها كل الحب دا ليه

[pink rose]

مهما نبعد مهما نقرب

مهما نشرق مهما نغرب

مهما اتخنقنا منها

مهما قولنا هانسيبنا منها

نرجع تاني غصب عنا نقول بنحبها

مش بس بكلام و لا اغاني لأ بتصرفات و افعال تقول بجد اننا

بنموت في ترابها مش بس بنحبها

دا مش شعر و لا زجل و لا نثر و لا اي شئ تعبيري

لا دا كلام خارج من القلب

احنا بنحب مصر كده ليه؟

ما الناس كلها بتحب بلادها

بس عمري ما شوفت حد بيغوص كده في بلده

مثال مثلا

من يوم ما بدأت الثورة و احنا ما بنتكلمش غير على مصر

حتى هنا في المنتدى اظن واضح للكل ان في ابواب و اقسام ما حدش بيعدى عليها الا على استحياء

الكل مشغول بحالهاو رايحة فين

في حين ان عندي قرايب سوريين الدنيا مقلوبة عندهم بجد زعلانين مش هاقول لأ

بس لما رحت عدهم لقيتهم بيشغلوا مسلسلات عادي و بيتابعوا القنوات المختلفة

اقسم بالله ايام الثورة التليفزيون ما كان بيتنقل من على الاخبار عندنا

شوفوا كده كم الاغاني الوطنية المعمولة على مدى التاريخ الحديث

عملنا كام اغنيه ليها في حبها

ما اعتقدش ان دا ناتج من الابداع يعني بس

لا ناتج من الحب

و الغريب ان كتير فنانين مش مصريين

بيغنوا اغاني مصرية وطنية

و الامثلة كتير

ليه تفتكروا ليه

ما اعتقدش ان دا نفاقا او لمجرد الظهور

اظن دا حب ليها

هاقولكم مثال تاني

بس كلام عام بدون تفاصيل

واحد مصري مركزه محترم و مش فقير المهم نصب على واحد من جنسية عربية فلوس بملايين

يقوم ناس تانية من اهلنا(المصريين يعني ) في الصعيد يرجعوا الحق لصحبه و يصرفوا من جيبهم الشخصي و هما لا علاقة لهم بالموضوع و لا هايعود عليهم باي منفعة خاصة نهائي

بس عشان سمعة مصر اكبر من ان فرد واحد يهزها

و ان مصر رجالة تصون الحق و تحفظ العهود

ايه دا

دا مش حب بس

دا عشق يا جماعة

[pink rose]

لو سمحتم خالونا في التوبيك دا نتوحد في حبها

اللي يدخل التوبيك دا يسيب حركته و لا جماعته و لا حزبه برة

التوبيك دا للي عاوز يدخل يتكلم عن مصر

ادخل و اكتب عبر عن احساسك بيها

ادخل و اكتب نفسك تبقى ايه بتحلملها بايه

ارجوكم

ارجوكم

انبذوا الفرقة و الخلاف

و ادخلوا هنا بقلوبكم

اللي اكيد مليانة حب لمصر

[pink rose]

عارفه يا مصر

هاقولك على حاجه بس ما تزعليش مني

انا ما عنديش بطاقة

ما كنتش عاوزة اعملها

لاني ما كنتش لاقية ليها قيمة

ما انا ماشية بجواز السفر و خلاص

المهم حاجه اثبات شخصية

عاوزة اقولك انا اسفة

كنت واخدة الموضوع اثبات لنفسي و بس

ما كنتش واخداه على انه بيرجعني و ينسبني ليكي

انا اسفة يا مصر

انا دلوقتي ندمانة اني ما عنديش بطاقة رقم قومي

و كل شوية اكلم السفارة عشان اعرف اللجنة هاتيجي امتى الي بتعمل البطايق

لان للاسف مش هاجيلك السنة دي

الله يخليكي يا مصر خاليهم يبعتوا اللجنة بقى

[شرف الدين]

http://www.youtube.com/watch?v=hb4py-PWyus

وبصوت هدى عمار

http://www.youtube.com/watch?v=q_bzpnl2KOk

[se_ Elsyed]

اللي يدخل التوبيك دا يسيب حركته و لا جماعته و لا حزبه برة

ما ينفعش يا ريمو

بس أوعدك مش هاخرج عن الموضوع

أنا هاتكلم بإسم حركة الكتاكيت الشرسة المنبثقة عن حركة 7 ذو القعدة

بسم الله الرحمن الرحيم

س : هو احنا بنحبها كل الحب دا ليه ؟

ج : هو كده .. حب مصر قدر ... والمصري بطبعه ليس مهاجراً مهما طال سفره ... حتى اللي موجودين جواها لو إتخانقوا معاها وزعلوا منها .. فعمرهم ما بيبعدوا كتير عن حضنها

أنا عن نفسي بأحبها لإنها هي

ُأُمي الأولى

وزي ما عُمري ما بأزعل من أمي الثانية اللي إسمها متكوب في شهادة ميلادي مهما قست عليه .. فبالتالي عُمري ما هازعل من مصر مهما قست علينا ..

----------

انا دلوقتي ندمانة اني ما عنديش بطاقة رقم قومي

تصدقي بالله يا ريمو إني نازل مصر مخصوص لمدة يومين فقط عشان أجدد البطاقة اللي عُمري ما أستخدمتها من ساعة ما أستخرجتها لأني بأستخدم الباسبور وفوجئت إن لها مدة صلاحية ... وبالتالي عشان ما حدش يتلكك هانزل أقدم عليها وأفوض أخويا يستلمها ويبعتها لي ...

[م تيمور المراغي]

ما الناس كلها بتحب بلادها

بس عمري ما شوفت حد بيغوص كده في بلده

من يوم ما بدأت الثورة و احنا ما بنتكلمش غير على مصر

في حين ان عندي قرايب سوريين الدنيا مقلوبة عندهم

بس لما رحت عدهم لقيتهم بيشغلوا مسلسلات عادي

اقسم بالله ايام الثورة التليفزيون ما كان بيتنقل من على الاخبار عندنا

ليه تفتكروا ليه

عشان خير اجناد الارض !

[Alattar]

أنا بأه عندي حاجة غريبة جدا بتحصللي كل سنة أو سنة و نص كده...

أنا تقريبا من 2005 و أنا بره مصر..كنت شغال مدرس برمجة و شغال مبرمج برضه في طرابلس ..قبل ما آجي السعودية في 2007

الغريب في الموضوع...اني مافيش ولا مرة نزلت فيها أجازة و كنت ناوي أرجع تاني...كل مرة أنزل أجازة..قبل ما أنزل..أقول لنفسي,,مستحيل أتغرب تاني..أنا هعيش في البلد دي مهما يحصللي..بس للأف الظروف بتبقي أقوي مني كل مرة و بارجع ورجلي طبعا فوق رقبتي

لدرجة اني صفيت شقتين هنا لحد دلوقتي في الرياض..كل مرة أنزل أجازة..أقول مش هارجع تاني..و أصفي كل حاجتي قبل ما أنزل..و في الآخر ألاقي نفسي راجع تاني و بدور علي شقة تانية..وبحث في الوسيلة بأه و مكاتب العقارات..

آخر مرة جيت فيها من أجازتي..كانت في أكتوبر اللي فات ده..وكنت ناوي اني عمري ما هارجع مصر قبل سنتين علي الأقل لأني كنت خارج منها و أنا مخنوق منها جدا..لكن دلوقتي رجعت تاني لنفس الطبع اللي هيوديني في داهية..حاسس اني عاوز أرجع بأي طريقة..و أقعد فيها..ان شاء الله حتي أشتغل ب 500 جنيه في الشهر..بس أعيش هناك و خلاص..

كل مرة و أنا راجع أقول لنفسي..أنا عاوز أحبك يا مصر..بس من بعيد..لأني طول ما أنا بعيد و متغرب أكيد هبقي مشتاق لمصر جدا..لكن لما بنزل مصر..للأسف .. بكرهها جدا..عشان كده .. مش عاوز انزل أجازات تاني دلوقتي خالص..عاوز أفضل أحب فيها من بعيد كده..

لكن برضه ما بقدرش..كلها كام شهر و برجع لنفس الموال تاني..طب أعمل في نفسي ايه طيب؟.

تم تعديل 2 يوليو 2011 بواسطة Alattar

[طارق مصرى]

دى حاجة طبيعية لاننا نتميز بالعاطفية الشديدة و بالتلاحم الاسرى القوى , علشان كده المصرى اللى بيتغرب بره مش بس بيحن لاهله ومعارفه لا ده كمان بيحن كمان للشوارع و البيوت و الارض حتى و ان كان ساكن فى منطقة شعبية مش جميلة بالمعنى المعروف ومن طبعنا بنحب اللمه و الحميمية اللى فى الشوارع و بين البشر , قلبتى على المواجع السنادى احتمال كبير منزلش فى رمضان مش عارف حقضى رمضان هنا ازاى و لا العيد ... ربنا يصبرنى

[pink rose]

اللي يدخل التوبيك دا يسيب حركته و لا جماعته و لا حزبه برة

ما ينفعش يا ريمو

بس أوعدك مش هاخرج عن الموضوع

أنا هاتكلم بإسم حركة الكتاكيت الشرسة المنبثقة عن حركة 7 ذو القعدة

بسم الله الرحمن الرحيم

س : هو احنا بنحبها كل الحب دا ليه ؟

ج : هو كده .. حب مصر قدر ... والمصري بطبعه ليس مهاجراً مهما طال سفره ... حتى اللي موجودين جواها لو إتخانقوا معاها وزعلوا منها .. فعمرهم ما بيبعدوا كتير عن حضنها

أنا عن نفسي بأحبها لإنها هي

ُأُمي الأولى

وزي ما عُمري ما بأزعل من أمي الثانية اللي إسمها متكوب في شهادة ميلادي مهما قست عليه .. فبالتالي عُمري ما هازعل من مصر مهما قست علينا ..

----------

انا دلوقتي ندمانة اني ما عنديش بطاقة رقم قومي

تصدقي بالله يا ريمو إني نازل مصر مخصوص لمدة يومين فقط عشان أجدد البطاقة اللي عُمري ما أستخدمتها من ساعة ما أستخرجتها لأني بأستخدم الباسبور وفوجئت إن لها مدة صلاحية ... وبالتالي عشان ما حدش يتلكك هانزل أقدم عليها وأفوض أخويا يستلمها ويبعتها لي ...

س س لو سمحت

يا تلم كتاكيتك يا تنضف وراهم

مش معقول كده التوبيك اتبهدل خالص

و الكتاكيت سارحة في كل مكان

لو سمحت الاعضاء الافاضل اشتكوا

[لماضة مصرية جدا]

..أنا عاوز أحبك يا مصر..بس من بعيد..

السلام عليكم و رحمة الله و بركاته

قريت عنوان التوبيك و قولت لنفسي هخش اقول ايه انا فاكرة مرة كتبت حاجة هنا في المحاورات عن التوبيك ده

بس قريت عبارة استاذي العطار

انا عاوز احبك يا مصر من بعيد

لما حد بيتوجع من حد اوي.....يبقي معناه انه بيحبه اوي

لما حد يفضل انه يبص عليه من بعيد و ميقربش منه علشان الاقتراب معناه احتراق لصورة حلوة رسمتها في عقلي و قلبي....يبقي بيحبه اوي

لما حد يحبها...و بعدين يفضل يشتم فيها.... و بعدين يخاصمها..و بعدين يصالحها...و بعدين يغنيلها و بعدين يزعل من اي حد يقول عليها حاجة مش بتعجبه مع انها فيها العبر.....و بعدين يستغرب اصلا هو كان زعلان منها في ايه...و بعدين يرجع يحبها...و بعدين يرجع يبعد عنها...و بعدين يرجع يشتاق لها

و بعدين يفتكرها في غربة المشاعر انها الوطن....و تحلم بيها المرأة كوطن لحلم رجل...و يحلم بيها الرجل كامراة العمر

و يكبر الولاد يقولوا النشيد....مش عشان هو النشيد....عشان هو تفاصيل صغيرة بتكبر معانا....بتكبر فينا....بنتزرع جواها...و بترسم ملامحنا

عشان لما بنسافر....بنتوه...و لما بنتوه بنبقي عايزين خيط واحد حقيقي.....ايد تشدنا و تقولنا....احنا مش تايهين...احنا بس مسافرين...في رحلة تيه و رحلة كشف

احنا بس عايزين نبقي بني آدمين.....بنحس

خايفين لحاجة جوانا تنطفي في صقيع الغربة

قلقانين لنتوه في صخب الحياة الجديدة و جوه روحنا فيه سؤال.....احنا سافرنا ليه....و هنرجع امتي؟؟؟

احنا شايلين همها عشان ده "الحبل السري" اللي رابطنا بامنا....امنا مش بس اهالينا...مش بس ذكرياتنا...مش بس حياتنا اللي كانت هنا و بنحاول نكملها لما ترجع

ده بيربطنا بمساحة دفا

مساحة الدفا دي ممكن تبقي خطوط و تضاريس و جغرافية علي الارض

ممكن تكون قيم و مباديء و قناعات شايلينها جوانا و بنتحامي فيها لما تشد علينا الدنيا

ممكن تكون احنا....ملامحنا.....كلامنا....عينينا.....دموعنا....صخبنا...جنوننا.....هو احنا

مساحة الدفا....جوانا احنا

و الوطن....برضه جوانا احنا

و سافرنا....و حبيناها علي البعد احلي

و حلمنا بحب فيها يكبر...وعمر فيها يكمل...بس مش هيحصل غير لما نلاقي "احنا"

و نلاقي اجابة سؤالنا

فيه لسه مساحة دفا جوانا

فيه لسه مشاعر حلوة باقية

فيه لسه حنين....لحد...لوطن....لمكان....لملامحنا احنا...اللي كانت

بنبحها

و لا بنحبنا

بنشتاقلها

و لا بنشتاقلنا

زعلانين منها

و لا زعلانين مننا

عايزين نرجع لها

و لا روحنا تايهة مننا

مش عارفة ....مش قادر اقارن حد بحد...و يااااااه مقدرشي اقول شعب و شعب

انا اللي اعرفه.....او يتهيالي اني اعرفه....هو انا

و انا.......في غربة

مش عشان بعيدة عن مصر

عشان.....اخترت احبها علي البعد...و اخترت اعمل حاجات كتيرة تاني علي البعد....و اخترت اني اتوه عشان اهتدي

مهمومة بيها....عشان "الهم" ده مع انه وجعني...مع انه دابحني....بس لسه مخليني قادرة احس...اني قادرة احس

قادرة....اكون بني آدم...لسه قادر يحب....مش علي الورق و الكراريس

لا

قادر يزعق....و قادر يخاصم,..و قادر يصالح....و قادر يقلق...و قادر يغفر...و قادر....يحلم....باللي بيحبه...و بيحبها

بحبها بطريقتي...و بمفرداتي...و بمشاعري...و بملامحي انا

و مش عايزة تفسير

و لا عايزة الاقي سبب

انا بس عايزة افضل مسك في خيط واحد يربطني....اني لسه قادرة احس....بالوطن

و لو كان مجرد فكرة في خيالي.....و بحبه من علي البعد

ده أنا

مش حد تاني

بكلم نفسي

مش حد تاني

و دي كانت فضفضة.....و سؤال.....انا اللي اخترته علي البعد كان احلي....و لا انا غلطت!!!

[الدكتورة أم أحمد]

حب الأوطان فطري قهري مثل حب الوالدين والأبناء

ولذلك نجد الرسول صلى الله عليه وسلم دعا الله أن يحبب الله إليه المدينة كما حبب إليه المكة ولم يدعه إن يحبب إليه مكة بل عبر عنها بأنها أحب أرض الله إليه

لكن معاك حق إننا مزودينها شوية

وبنتغني لكل حاجة فيها شوية الهوا ،والميه ،والنيل، والتراب،والحضارة ،وخفة الدم ،وإننا عشريين بنحب الناس وغير ذلك

ولما نكون بعيد عنها يوحشنا فيها كل شيء حتى ما نضيق به ونحن فيها

ومصر ترمومتر لحال للعالمين الأسلامي والعربي

عزتها وقوتها غزة وقوة لهما

وما بها من خير أو شر تكتسبه هذه الشعوب منها

ربنا يحفظها عزيزة حرة قوية

وشكرا على الموضوع الجميل

[Hisham]

بنحبها لانها ام الدنيا

[الدكتورة أم أحمد]

توقيع الفاضلة روشة عجبني جدا

عذرا "فيثاغوريس" :مصر هي المعادلة الأصعب

عذرا "نيوتن" : القاهره هي التي تجذبنا

عذرا "ديكارت" : أنا مصري إذاً أنا موجود

عذراً" أديسون": مصر هي مصباح العالم

عذراً "أفلاطون"القاهره هي المدينة الفاضلة

[pink rose]

مساء الخير يا مصر

من شوية مريم كانت عمالة تغني

بلادي بلادي بلادي لكي حبي و فؤادي

لوحدها كده بتدندن

عارفه يا مصر

مش انا اللي حفظتهولها

انا فؤجئت بيها حافظاه

عرفت اننا بنتولد بنحبك

تم تعديل 2 يوليو 2011 بواسطة pink rose

[عادل أبو عمر]

ممكن تتخيلي احساس ولاد يتامى أقنعوهم طول عمرهم إن أمهم ماتت لكن لما راحوا ميدان التحرير لقيوها مستنياهم و عارفاهم واحد واحد ...

معلش ده كلام مكرر كتبته في مداخلة في موضوع تاني بس لأن رأيي مختلف شوية هو إني عن نفسي لم أشعر أبدا بأني أحب مصر ... و الحمد لله الكورة ماليش فيها فكانت مشاعري تقريبا ثابتة مش بتتحرك مع انتصارات المنتخب .

يمكن بحب المكان اللي اتولدت فيه و اتربيت فيه و الحي بتاعي و جيراني و مدرستي لأني عاشرتهم سنين و ذكرياتي معاهم ما تتنسيش ..

لكن مصر أنا مشفتش من مصر حاجة غير إني مصري الجنسية ...

خدمت في الجيش و مكنتش شايف له أي تأثير على مشاعري تجاه مصر .

حتى لما كنت باسافر برة مصر في شغل و أرجع أحس بصدمة أول مادخل المطار

موقف مصر من حرب غزة موقف مشين .. رغم إنه موقف قيادة سياسية فاشلة لكن للأسف كانت هذه هي الصورة عند اخواننا من العرب و المسلمين و لا نملك إلا العجز

الثورة قلبت كل المفاهيم عندنا احنا كمصريين قبل كل العالم

واللي راح ميدان التحرير عاش احساس عمره ما ينساه ..

سمعت أغنية طول عمرنا كنا بنسمعها بس كنا بنتريق عليها زي بقية الأغاني الوطنية ..

أغنية شادية يا حبيبتي يا مصر ..

مكنتش أتخيل إن الواحد ممكن جسمه يقشعر و هو بيسمع الأغنية دي

احنا فعلا كنا محرومين من إننا نحب مصر ... و مصر أكتر مننا كانت كمان محرومة من حب ولادها .. الحب اللي يبنيها

أنا عرفت أد إيه إن مصر دي غالية و إن حبها متأصل جوانا بس كان فيه ناس عاوزين يكرهونا فيها ...

لكن... و يمكرون و يمكر الله و الله خير الماكرين