ناشط حقوقي وزيرا للداخلية

[لماضة مصرية جدا]

السلام عليكم و رحمة الله وبركاته

هل تقتدي مصر بتونس وتعين ناشطا حقوقيا وزيراً للداخلية؟

أجرت الحكومة الإنتقالية بتونس بعض التعديلات الوزارية أمس- الجمعة -كان أبرزها تعيين محامي وناشط حقوقي يدعي "الأزهر العكرمي "وزيرًا للداخلية، وذلك في إطار تغييرات تأتي من متخوفات قد تحدث قبل الانتخابات.

وكان "الأزهر العكرمي" يشغل منصب عضو الهيئة العليا لتحقيق أهداف الثورة، وكذلك عضو بهيئة الحوار الوطنية لتكوين المجلس التأسيسي.

كما شمل التعديل تغيير أربع وزراء أخرين، هم "سالم الميلادي "وزيراً للنقل، و"سليم شاكر" وزيراً للشباب والرياضة، و"صلاح الدين السلامي" وزيراً للصحة، و"محمد رضا فارس" وزيراً للتجهيز.

وقد رحب ناشطون شبان بوزير الشباب والرياضة الجديد على شبكة تويتر على الإنترنت باعتبار تعيينه ضخا لدماء جديدة في الوزارة.

قريت الخبر من الصبح و قاعدة اقلب فيه من يمين و من شمال

و عندي الستاؤلات التالية:

1- يا تري الناس فاهمة يعني ايه ناشط حقوقي؟

2- يا تري في مصرممكن يكون عندنا خطوة زي دي؟؟ و اذا مكنتشي زي دي ليه مبنفكرشي بره الصندوق في مشكلة جهاز الشرطة و طريقة ادارته...ليه بمنجربشي حاجة جديدة...و ندرسها و نشوف فاعليتها؟

3- مش احنا قولنا ثورة...طب ليه طريقة ادراة الثورة مش محسسانا ان فيه ثورة في الافكار؟

4- هي الاقتراحات اللي بنحطها لتطوير جهاز الشرطة مش بيتاخد بيها ليه؟؟؟

------------

لو فيه توبيك هنا عن تطوير جهاز الشرطة ممكن حضراتكم تضيفوا الاقتراح اللي فوق دوت ليه

و نفكر نبعته علي صفحة دكتور شرف

ادينا بنحاول

و ربنا كريم

[ابراهيم عبد العزيز]

السلام عليكم اخت لماضة

الخطوة الرائعة التى اتخذتها تونس هى خطوة تنم عن رغبة فعلية لاعادة هيكلة وزارة الداخلية عندهم

وتنم عن اتجاه تونس لأفكار غير تقليدية وافكار مبدعة تتناسب مع بلد تعيش فى ثورة

أما نحن فلم نرى قرار ثوريا وجريئا واحدا من حكومتنا تجاه اعادة هيكلة وتطوير وزارة الداخلية

نرى الامور تسير كما لو لم تكن هناك ثورة قامت أصلا ولا ادرى السبب !!

[طارق مصرى]

خلاص انا برشح وائل غنيم يكون وزير للداخلية (بس يربى شنبه الاول )

[لماضة مصرية جدا]

السلام عليكم و رحمة الله و بركاته

استاذ ابراهيم متفقة مع حضرتك جدا

استاذي طارق

متفقة مع حضرتك برضه

بس وائل غنيم كان نفسي يمسك وزارة الاتصالات و تكنولوجيا المعلومات...(مش عشان مش عايزة شنب و كدهوت...لا علشان حرام الدماغ دي تقعد في دبي الصراحة...مصر اولي بيه)

[م تيمور المراغي]

حصل ان احدى القوى اللي قامت بالثورة اجتمعت الشهر اللي فات مع اللواء العيسوي وعرض عليها تقديم اطروحاتها لتطوير اداء جهاز الشرطة وتقديم آلية متكاملة للتنسيق بين قوات الامن وشباب الثورة وهو ماكان معدا وجاهزا للعرض على سيادته في اللقاء

لكن بعد اللقاء اكتشفنا ان كل ماقدم اصبح حبيس الادراج وان امورا خفية ما تحدث في وزارة الداخلية المصرية !

ده الرابط لمن يهتم ,,

الاهرام \\ اللواء العيسوى يتفق مع "6 أبريل" على مراقبة منظمات المجتمع المدني لأداء الشرطة \\ اضغط هنا !

[لماضة مصرية جدا]

حصل ان احدى القوى اللي قامت بالثورة اجتمعت الشهر اللي فات مع اللواء العيسوي وعرض عليها تقديم اطروحاتها لتطوير اداء جهاز الشرطة وتقديم آلية متكاملة للتنسيق بين قوات الامن وشباب الثورة وهو ماكان معدا وجاهزا للعرض على سيادته في اللقاء

لكن بعد اللقاء اكتشفنا ان كل ماقدم اصبح حبيس الادراج وان امورا خفية ما تحدث في وزارة الداخلية المصرية !

متوقع جدا استاذي علشان الجملة اللي ظللتها بالخط الاحمر

لما هو اصلا اللي بتطرح عليه الافكار "اتربي" سياسيا بطريقة معينة و "مهنيا" بطريقة أداء معين يبقي متوقع اي نوع تغيير يحصل

مش بتكلم بس عن اللواء العيسوي لكن بتكلم عن طريقة الادارة و اللي جزء منها محدش بياخد باله منها و هو "ادارة التغيير"

يعني ازاي افكر بره الصندوق بشكل اني اتوقع التغيير و اصنعه و اسعي ليه حتي لو كان هيختلف مع قناعاتي انا الشخصية او اللي بيسمي اني ارتكن للحل الامن اللي اتعودت عليه

ازاي اخد مخاطرة....بس مخاطرة محسوبة

و دي وجهة نظري و اللي اتعلمناه الصراحة...(يمكن يكون نظري مش عملي...بس اتشجعت لما لقيت بلاد تانية اخدت خطوة زي كده...قولت ليه لا)

[Dreamwithme]

بصراحة بالعقل مش عارفة إذا كانت خطوة تونس صح ولا لأ ...بس السؤال ليه لأ؟ ليه مانجربش

أنا شخصيا مقتنعة إن حل مشكلة الداخلية إن اللي يمسكها يكون شخص قانوني يفهم في القانون كويس ويكون من خارج الوزارة

لكن المشكلة إن اللي ماسك البلد غير مقتنع بفكر الثورة ومقتنع بفكر الاصلاح وشتان

وإلي الآن كل اللي ماسكين المناصب القيادية بيفكروا بنفس الطريقة ...داخل الصندوق وأعتقد كمان أنهم بيتحركوا في جزء محدد من الصندوق وخانقين نفسهم وخانقينا

وأعتقد إن من أحد أهم الأسباب إن معظم اللي في مناصب قيادية سنهم كبير جدا ومع الاحترام الكامل لهم ولتجربتهم لكن صعب عليهم تقبل الأفكار الجديدة المختلفة

[se_ Elsyed]

صلي عالنبي في قلبك

إذا كان منصور العيسوي نفسه لما بيتقال قدامه - وحصل كتير - إقتراح تعيين دفعات من خريجي الحقوق في الداخلية وشه بيجيب ألوان ..

طبعاً لإنهم مش عاوزين حد يدخل بناتهم

هازيدك من الشعر بيت

أول أمس الجزيرة مباشر سجلت لقاء مع مدير أمن مرسى مطروح عن الحال الأمنية هناك وعن تأمين السياح .. فالمذيع بيسأله ويقول له : على خلفية أحداث مسرح البالون وأستمرار أستخدام القوة المفرطة مع الناس حتى العاديين منهم .. الا تعتقد إن الشرطة محتاجة جهات قضائة وحقوقية يكون لها الحق مراقبة أعمال وزارة الداخلية خصوصاً الأقسام والسجون ؟

فالراجل طبعاً بكل حدة أجاب : لأ طبعاً ... إحنا الحمد الحمد لله تمام التمام ومش محتاجين أي مراقبة من أي حد لإننا إحنا بنراقب نفسنا .. !!!!!!!!!!!!

هازيدك من الشعر بيت يا لماضه عشان إنتي أختي الصغيرة بس ...

إن من أول إنشاء وزارة الداخلية سنة 1878 ووزارء الداخلية الأغلبية العُظمى كانوا مدنيين عاديين ولم يكونوا ضباط شرطة ..

لحد ما قامت ثورة 52 وتولى وزارة الداخلية المعلم عبد الناصر بنفسه سنة 53 .. ومن بعده جاء ضباط جيش وهم أعضاء من الضباط الأحرار يمكن لحد أواخر عهد السادات وعندها فقط بدأ تولي ضباط شرطة ..

ولأن المخلوع كان بيحب يأمن نفسه ضد شعبه فعمل تقليد جديد بإسناد وزارة الداخلية إما لوزراء كانوا محافظين في الصعيد حيث الجفاء والقسوة المفرطة . أو لضباط أمن دولة وهم أضل سبيلاً

وبالتالي لقينا إننا بعدنا كل البعد عن أبسط مباديء الإدارة اللي بتركز على الكفاءة وليس الولاء

[Alshiekh]

قلت رأيي في مداخلة سابقة لي بهذا الشأن حول تعيين وزير مدني أو عسكري لوزارة الداخلية:

[عادل أبو عمر]

احنا كنا في بلد بتعين وزير التعليم طبيب أطفال

و بعد الثورة تم تعيين رئيس وزارء من ميدان التحرير ..

بس للأسف لما اتحط في المكان طلع المكان واسع عليه مش لضعف منه و هو الخبير بالوزارة و لكن لصعوبة المرحلة مع شعب به تيارات شديدة من التغيرات الفكرية و جبال من الفساد و عصابات من الفاسدين

أي منصب وزاري من الوزارت مثل الداخلية و الخارجية و الدفاع و التعليم و الصحة محتاج شخصية فريدة من نوعها مش مجرد حد كان معارض شهير

[Hisham]

كل الوزارات العسكريه جيش او شرطه او دفاع لازم تحت قياده مدنيه هو ده الهدف الاساسي من الثوره من عسكر لمدني