حمدي قنديل يستقيل من الجمعية الوطنية للتغيير..ويهاجم البرادعي

[Alattar]

بصراحة أول ما شفت الموضوع ده في عدد من المواقع ما صدقتش..ورحت دورت عليه..ولقيته فعلا في جريدة الوفد و في أكثر من جريدة

من الوفد

شن الإعلامى حمدى قنديل عضو مجلس اتحاد الإذاعة والتليفزيون، هجوماً حاداً على د.محمد البرادعى المرشح المحتمل لرئاسة الجمهورية، وأرجع استقالته من الجمعية الوطنية للتغيير إلى طريقة ادارة البرادعي لها والتي تشبه أسلوب العمل في مصلحة المجاري، على حد قوله، معتبراً انه شارك في تضليل المصريين بإعلانه تأييده للبرادعي. ونقلت صحيفة "المصري اليوم" الاثنين عن حمدي قنديل قوله "أعترف بأننى شاركت فى تضليل المصريين عندما أعلنت تأييدى للبرادعى ووقوفى بجواره"، وواصل هجومه على "البرادعى" قائلاً: "أشك فى كل من يتولى منصباً فى منظمة دولية أو عربية لأنهم تعودوا ألا يقول لهم أحد كلمة لا أو يعارضهم، وهى مشكلة البرادعى ومن الصعب النقاش معهم، لأنهم تعودوا على إصدار الأوامر، لكن فى الوقت نفسه علينا ألا ننكر أنه رمز من رموز التغيير فى مصر".

وأرجع قنديل سبب استقالته من الجمعية الوطنية للتغيير، إلى واقعة القبض على عدد من أعضاء الجمعية فى الكويت، "أصدرت بياناً باسم الجمعية، لاتخاذ موقف حاسم للوقوف بجوار شبابنا، لكنى فوجئت برفض البرادعى وطريقته التى تشبه أسلوب العمل فى مصلحة المجارى، وليس فى إدارة حركة ثورية، وبسببه تركت الجمعية ومعى عدد من القيادات، منهم الدكاترة حسن نافعة ومحمد أبوالغار وعلاء الأسوانى، والمستشار محمود الخضيرى، والدكتور محمد غنيم وعدد كبير من القيادات، وكان مأخذنا عليه أنه لا يجلس فى مصر كثيراً بعكس سفره للخارج".

ورفض الاعلامي المصري جميع مرشحى الرئاسة المحتملين، قائلاً:"أتعجب من حملات الرئاسة التى يطلقها عدد من الأشخاص، والتى لا أؤيد أياً منها ولن أنتخب أياً منهم، ولو بذلوا مجهوداً أكبر فى بناء مصر سيكون أفضل لنا من برامجهم التى لا تزيد على شعارات ثورة ٢٥ يناير فقط"، إلا أنه أثنى على عمرو موسى، مؤكداً أنه يمتلك "كاريزما" قوية.

وكشف عن عرض تلقاه لتولى رئاسة اتحاد الإذاعة والتليفزيون منذ أسبوعين، إلا أنه أكد رفضه للمنصب لأنه "غير مؤهل لإدارة المكان ولا يملك الخبرة الكافية لذلك" - على حد قوله - لكنه أكد أنه سيكون مسئولاً عن جريدة ستصدر قريباً.

وحمّل "قنديل" مسئولية أحداث ميدان التحرير الأخيرة لمن وصفهم بـ"البلطجية"، الذين تم تجميعهم من أمام ماسبيرو ثم إلى ميدان التحرير حاملين الاسلحة البيضاء، منتقداً استمرار المظاهرات المليونية دون جدوى

حاولت أبحث عن موضوع القبض علي عدد من أعضاء جميعة التغيير في الكويت فلم أجد أي نتيجة..و مع احترامي للدكتور البرادعي..لو كان فعلا لم يهتم بأمرهم..يبقي فعلا كأننا معملناش ثورة ولا حاجة..لما تبقي كرامة المواطن مالهاش قيمة بالطريقة دي..

[طارق مصرى]

خيرا فعل حمدى قنديل

[م تيمور المراغي]

اختلاف اسلوب حمدي قنديل الصدامي مع نهج دكتور برادعي المسالم جعل من الانفصال امرا حتميا لابد منه

لكن اعتب على حمدي قنديل استخدام مفردات قاسية في حق رفيقه السابق

عندما اسعى لصلح بين صديقين متخاصمين

كنت اعرف الاصيل من قليل الاصل من طريقة حديث كل منهما عن الآخر ,,

[م تيمور المراغي]

خيرا فعل حمدى قنديل

ايه السبب ؟

[م تيمور المراغي]

حاولت أبحث عن موضوع القبض علي عدد من أعضاء جميعة التغيير في الكويت فلم أجد أي نتيجة..و مع احترامي للدكتور البرادعي..لو كان فعلا لم يهتم بأمرهم..يبقي فعلا كأننا معملناش ثورة ولا حاجة..لما تبقي كرامة المواطن مالهاش قيمة بالطريقة دي..

لا بالنسبه للنقطه دي انا حتكلم عن المعلومات اللي عندي ,,

اول انسان بنتصل بيه عند تعرض اي مواطن مصري لاي تحرش من قبل الشرطة العسكرية او الامن الوطني هو دكتور برادعي

والرجل رغم مسئوليته بينزل بنفسه ويروح يتابع الموقف ويستخدم اتصالاته للتدخل في صالح المظلوم بشرط ان الحق يكون فعلا واضح لا لبس فيه ,,

مش كل مواقف الدكتور الانسانية او الحقوقية بتنشر للاسف

من النقطه دي خذ كلامي ثقة يا عطار الراجل محترم وشهم ,,

[mustafagamiel]

حاولت أبحث عن موضوع القبض علي عدد من أعضاء جميعة التغيير في الكويت فلم أجد أي نتيجة..

حصل فعلا يادرش

ترحيل 17 مصريا من الكويت

لاشك أن حمدي قنديل لديه مصداقية كبيرة لدى الشعب المصري فالرجللم يهتز أما جبروت النظام البائد ومعروف بمواقفه الواضحة والصريحة

مؤكد أن مافعله قنديل يعتبر ضربة كبيرة للبرادعي

[ابراهيم عبد العزيز]

الخبر مفاجىء طبعا

لكن ما أدهشني بالفعل جملة قرأتها فى الخبر وهى :

إلا أنه أثنى على عمرو موسى، مؤكداً أنه يمتلك "كاريزما" قوية

اندهشت أن اعلامي قدير مثل حمدي قنديل وقع فى نفس المقولة العجيبة التى يرددها البعض عن عمرو موسى ( عنده كاريزما !!!) كما لو كانت الكاريزما هى شىء مرجح له لرئاسة الجمهورية

لا أندهش عندما أسمع هذه الجملة من مواطنين بسطاء من الذين تأثروا بأغنية المطرب الشعبي شعبان عبد الرحيم ( بحب عمرو موسى )

لكن من حمدي قنديل !!!

أنا بالنسبة لى لن أرشح عمرو موسى فهو وجه من وجوه النظام القديم وهو ليس وجه فقط بل هو أحد اعمدة النظام القديم ونحن نريد تغيرا ودماء جديدة

تم تعديل 4 يوليو 2011 بواسطة ابراهيم عبد العزيز

[م تيمور المراغي]

حاولت أبحث عن موضوع القبض علي عدد من أعضاء جميعة التغيير في الكويت فلم أجد أي نتيجة..

حصل فعلا يادرش

ترحيل 17 مصريا من الكويت

لاشك أن حمدي قنديل لديه مصداقية كبيرة لدى الشعب المصري فالرجللم يهتز أما جبروت النظام البائد ومعروف بمواقفه الواضحة والصريحة

مؤكد أن مافعله قنديل يعتبر ضربة كبيرة للبرادعي

الخبر ده من 15 شهر يا مصطفى

تحديدا بتاريخ 11 ابريل 2010

معقول رد فعل حمدي قنديل لسه صادر امبارح بس !

بعدين من امتى الشعر ده كله والنثر كمان في حمدي قنديل !

يعني لو اعلن بكره انه حيعطي صوته للبرادعي في الانتخابات حيبقى كلامك عنه نفس الكلام !

تحيتي ,,

[mustafagamiel]

حاولت أبحث عن موضوع القبض علي عدد من أعضاء جميعة التغيير في الكويت فلم أجد أي نتيجة..

حصل فعلا يادرش

ترحيل 17 مصريا من الكويت

لاشك أن حمدي قنديل لديه مصداقية كبيرة لدى الشعب المصري فالرجللم يهتز أما جبروت النظام البائد ومعروف بمواقفه الواضحة والصريحة

مؤكد أن مافعله قنديل يعتبر ضربة كبيرة للبرادعي

الخبر ده من 15 شهر يا مصطفى

تحديدا بتاريخ 11 ابريل 2010

معقول رد فعل حمدي قنديل لسه صادر امبارح بس !

بعدين من امتى الشعر ده كله والنثر كمان في حمدي قنديل !

يعني لو اعلن بكره انه حيعطي صوته للبرادعي في الانتخابات حيبقى كلامك عنه نفس الكلام !

تحيتي ,,

أكيد ياباشمهندس تيمور احترمه زي مابحترمك وانت عارف رغم اختلافي التام

اكيد لازم تحترم من يختلف معك والا هتكون مش أمين

البرادعي أنا بحترمه بسي هذا لايمنع اني لن انتخبه ولكن احترم وجوده زي ما حمدي قنديل لما كنا بنستناه

اعتقد بموقف حمدي قنديل ده تم دق مسمار كبير في نعش نجاح البرادعي في الانتخابات

[Salwa]

بسم الله ..

كلمة حق لوجه الله.

كل ما يحدث تهريج فعلا و(( سوف احاول اختيار لفظ ملائم ..لكنى لاأجد سوى .دونية ))....دونية وتدنى وانحطاط اخلاقى على كل المستويات.

محدش فيهم بيخدم مصر ....بس فاضيين يظهروا عورات بعض ويفضحوا بعض ....والادهى ؟؟ بيعترفوا انهم لما يحبوا يطلعوا السما بحد..بيطلعوا ...ولما يحبوا يخسفوا الأرض بحد..بيخسفوا ..

هو فيه كدة ؟؟؟

لاحول ولاقوة الا بالله العلى العظيم .

خلاص؟؟

البلد كلها مفيهاش اى حد نقدر نثق فيه؟؟

الى هذا الدرك انحدر من كنا نظنهم شرفاء .؟؟

لست من انصار البرادعى ولا عمرو موسى ولا غيرهم..

سبق لى وقلت سوف احكم على من يرشح نفسه لرئاسة (( جمهورية مصر العربية ....العظيمة رغم الجرح ))...من خلال برنامجه الانتخابى .

سبق لى واثنيت على عمرو موسى (( كشخصية لها ثقل فى المحيط الدولى وقلت لى تحفظ كبيررر على ترشيحه..))

طيب...

نيجى بقى لحمدى قنديل...

حمدى قنديل بيقول انه ....يعتذر لأنه بموافقته السابقة على البرادعى ...(( ضلل الشعب ))..

و...

انه لايفضل اى مرشح سبق له انه كان مسئول عن اى جهة اجنبية او عربية ..

جميل جداااااااااا الكلام ده واحنا ياسيد حمدى ياقنديل حانحلل كلامك نفسه.

بما انك بتعترف انك ضللت الشعب ...وفقت واعتذرت..

احنا كمان بنعتذر ...لأننا لن نثق بك مرة اخرى والعمر مش مستحمل تجارب تانية ...واللى يغلط ف الحكم على شخص مرشح نفسه...ممكن يغلط تانى على شخص تانى مرشح نفسه برضه..

اذن...

متحاولش تقنعنا ان عمرو موسى عنده كاريزما ...واحنا نصدقك..

وحتى لو صدقناك مؤقتا...(( الكاريزما مش بتحل المشاكل ومش بتلغى الماضى ..ولا الصداقات ...ولا النصايح اللى كانت للاسرائيليين بالموافقة على السلام علشان انتوا حاتكسبوا حتى خيرات مصر ...!!..من غاز وخلافه..))

ايضا...

السيد عمرو موسى برضه كان الامين العام للجامعة العربية ...لم يتخذ اى موقف لصالح اى دولة ( عربية فقيرة ) وكل فترة خدمته كانت..مجاملات واجندات وبلح امهات والتعلب فات فات ...

والقذافى يردح ويقول ...هو فاكر نفسه مين؟؟ده احنا اللى بندفع له مرتبه وبالدولار ....لابد يسمع كلامنا ..

ايه كمان؟؟

بقى بذمتكم وانا راضية ضميركم ......

الشعب الطيب بتاعنا اللى مولود بذكاء فطرى .(( بس كانوا حاكمينه بالحديد والنار ..,دلوقت كسر قيوده ))

ميقدرش يفرق بين الصالح والطالح؟؟؟

ميقدرش يفهم ان حمدى قنديل....خلاص...كبر

كبر مع الشلة اللى كبرت....بحلوها ومرها .

خلاص بقى ...

الشعب ياسيد حمدى انت وكل المجموعة الجميلة اللى معاك....بيقول لكم ..

خلاص الشعب اتفطم.

وانتوا شايفين انه لسا بيحبى ...بس المفاجأة انه خلاص ..

اتعلم المشى ...وبيمشى لوحده.

فيه مرشحين كتيرررررررررررر.

عندهم اقل من 75 سنة ....!!

مش عايزين حكومات مترهلة فى كل شئ .

خللوا الشباب يقطف الورد اللى زرعه وبلاش تحرقوا الأخضر واليابس اكتر من كدة .

آل يعنى ...مارتن لوثر كينج سيادتك بقى ..!!

روحوا ارتاحوا...وريحوا .

وسلام..سلام على مصر وعلى ولادها الشرفاء.

لن نيأس ...وسيستمر الحلم ....واحنا ف الطريق لتحقيقه ان شاء الله بدون اى وصاية . :clappingrose: :egyflag:

[Alshiekh]

السلام عليكم

مش عايز أقول صح النوم علشان انا عارف ان الدنيا نهار

حمدي قنديل إستقال من الجمعية الوطنية للتغيير فى اول شهر يونيو 2010

والمصريين الذين تم القبض عليهم في الكويت كان في 9 ابريل 2010

وسبق أن أعلن حمدي قنديل في لقاء له على العاشرة مساءا ( حسب ما اذكر ) فقد ذكر انه لن ينتخب البرادعي لو ترشح للرئاسة حيث يعيب عليه ديكتاتوريته عند إتخاذ القرار حيث لايحبون ان يقال لهم " لا " ( كنهج كل الموظفين الدوليين ) وليس انهم لايعرفون ان يقولوا " لا " كما ورد بالخبر.

وعموما فهو قرر في ذلك اللقاء انه لن ينتخب احدا من الذين ظهرت اسماؤهم وانه سيفضل " حمدين صباحي " لو ترشح لانه " ناصري " حسب قول حمدي قنديل ، وإن كان قد أثنى على كاريزما عمرو موسى متناسيا أن الكاريزما وحدها لاتكفي.

ربما يكون هناك شوية فلفل وبهارات في الخبر.

ورأيي أن الدكتور محمد البرادعي يكفيه رؤيته الصائبة وفكره المحترم حتى يتم إختياره رئيسا لمصر في المرحلة الحالية ؛ ولم لم يقدر الناخبون ذلك له ؛ فسيكونون كمن استبدل الذي هو أدنى بالذي هو خير.

[Simba]

الجمعية ومعى عدد من القيادات، منهم الدكاترة حسن نافعة ومحمد أبوالغار وعلاء الأسوانى،

غريبة مع ان علاء الاسواني من اشد المتحمسين للبرادعي حتي اللحظة

[Om Zayd]

؛ ولم لم يقدر الناخبون ذلك له ؛ فسيكونون كمن استبدل الذي هو أدنى بالذي هو خير.

و عليكم السلام و رحمة الله و بركاته

متفقة مع مداخلة حضرتك كلها عدا هذا الجزء

من حق حضرتك تختار من تشاء لانك تراه الانسب لقيادة مصر

لكن اطلاق الاحكام على من يخالفك الرأي.. هذا ما اختلف معه

دمتم بخير

[Alshiekh]

؛ ولم لم يقدر الناخبون ذلك له ؛ فسيكونون كمن استبدل الذي هو أدنى بالذي هو خير.

و عليكم السلام و رحمة الله و بركاته

متفقة مع مداخلة حضرتك كلها عدا هذا الجزء

من حق حضرتك تختار من تشاء لانك تراه الانسب لقيادة مصر

لكن اطلاق الاحكام على من يخالفك الرأي.. هذا ما اختلف معه

دمتم بخير

لو عدتي لبداية الفقرة لوجدتي أنني بدأت الفقرة بـ " ورأيي "

[Om Zayd]

أنا عارفة انه راي حضرتك.. لكنني اختلف مع الانتقاص ممن يخالفني الرأي

كلنا في النهاية مفترض بنستخدم عقلنا و نختار ما نرى فيه الخير لبلدنا

و كلنا يظن ما يختاره الخير

و للاسف ليست الامور قطعية تماما معلومة النتائج حتى يجزم اي منا ان رايه هو الصواب

أعتذر ان كنت غير قادرة على ايصال مقصدي او فهم مقصدك الصحيح

[ابو محمود]

المرشح الذى سيختارة الشعب المصرى الذى يقولون علية شعب ناقص فهم او لم يدرك معنى الديمقراطية بعد او يحتاج الى وقت كى يتم تعليمة وتثقيفة ,,,,

سيكون مفاجأة كبرى مثل مفاجئة التصويت على الدستور واكاد ارى الحسرة على وجوة من يريدون ان يركبو على اكتاف الشعب كما ركب السابقون الفاسدون

يا جماعة شعب مصر كبر وطلع لة سنان وبلغ والفرح قرب والعروسة جميلة واسمها حرية ولا يمكن يرجع فى كلامة ويتجوز غيرها انتهى عصر التضليل والتدليل مهما اخترعو من عراقيل ووقفات وكلام مجعلص من بتاع.. مثقفين ولكن ..انتهى الدرس يامن تريدون مصر معصوبة العينين