شنطة رمضان

[لماضة مصرية جدا]

السلام عليكم و رحمة الله و بركاته

الحقيقة في كل سنة في نفس التوقيت كان اتجاه عام في معظم الجمعيات الأهلية في مصر انهم يبتدوا يستعدوا لشنطة رمضان

و السنة دي لأن كل منا غرقان في الحوارات عن الثورة

حبيت ان يكون التوبيك هنا تذكرة بموضوع "شنطة رمضان"

1- لو تعرفوا اي جمعيات أهلية بيكون ليها تواصل مباشر مع الاسر في امصر يا ريت تحطوا ارقام تليفوناتها

2- حطوا ميزانية محددة للموضوع لاني بلاحظ ان الشنط بتبقي كتيرة اوي في اول اسبوعين من رمضان و بعد كده ممكن تقل...ممكن نقسم الميزانية انها تبقي شنط رمضان في ال 3 اسابيع الاولي و بعدين "عيدية" مناسبة باقتراب العيد و خصوصا لو الاسرة فيها اطفال.

3- ممكن كل حد فينا في اطار اسرته يتولي اسرة "إفطار صائم" اسرة واحدة فقط او كل علي سعته طوال الشهر و تكون من الاقربين او تكون من اللي فعلا محتاجين بس عمرهم ما بيسألوا الناس.

4- متنسوش في وسط الزحمة اللي احنا فيها دي....ناس كتير ممكن تتنسي....لسه هتفكروا ها مين هيبتدي

5- ممكن لو حد مش نازل مصر من المغتربين يكلف اسرته في مصر هي تتولي الموضوع دوت...(و ان كنت بحب ان اللي يعمل حاجة يعملها بنفسه و يروح بنفسه لغاية الاسر و يتعرف عليهم...بس كل علي سعته).

6- لو عندكم اطفال خلوهم يشاركوا معاكم...الحمد لله عملناها السنة اللي فاتت و كانت جميلة جدا بفضل الله ...اطفال العيلة هما اللي راحوا و حطوا الحاجات في شنطة رمضان...و كل واحد عمل شنطة باسمه....السنة دي بفكر انهم يبتدوا يحوشوا من دلوقتي علشان كل واحد فيهم يبقي فعلا عنده شنطة و يحس بقيمتها

مش عارفة معنديش افكرا تاني دلوقتي

لو جت افكار هاجي و اكتبها

يالا قاعدين

ابتدوا فكروا....كل اللي "غرقان" في حوارات عن الثورةو الاعتصامات...عايزين فعلا "العجلة" تلف

علي الهامش

اصل الفكرة من كلمات قريتها النهاردة لعمر طاهر و ده نص الكلمات

النهاردة قريت الجملة دي

انشغلنا جميعا في الثورة (سواء انشغلنا في تأييدها أو معارضتها أو الشكوى منها)، سننسى جموعا كثيرة من المصريين تنتظر رمضان من العام للعام، أملا في نفحات تخفف قسوة الأيام والظروف، شنطة رمضان أو كرتونة رمضان، أيا كان اسمها، إذا كانت واجبا في السنوات السابقة، أعتقد أنها أصبحت فرضا على كل المقتدرين هذا العام، الظروف التي نعيشها كانت أقسى على البعض أكثر منك يا صديقي، وأنت تعلم ذلك جيدا، ولذلك أحاول أن ألفت نظرك لشيئين، الأول أن هذه النفحة الموسمية التي كنت تراها من حق الفقراء المعدمين، اتسعت دائرة استحقاقها، وشملت نتيجة الظروف الراهنة من يمكن اعتبارهم «نصف فقراء نصف موسرين»، بما يعني أنك ملزم بتقديمها لمن تعتقد أنهم لا ينتظرونها.. فقط تحتاج إلى تقييم حالة كل من حولك، ولا تبحث عن الثواب بعيدا، فربما يكون موجودا بالقرب منك.. ربما على بعد خطوات من باب شقتك، والثاني أن هذا أول رمضان بعد الثورة والثورة تعني أفكارا جديدة.. أحسن الظن بك، وأعرف أنك ستوزع على المحتاجين شنطة رمضان مع بداية الشهر بعد عدة أسابيع.. لكن -وحتى هذا الوقت- هل فكرت في أن توزع عليهم هذه الأيام شنطة شعبان؟

عمر طاهر- جريدة التحرير

[أبو يمنى]

موضوع رائع ويدخل البهجة والانشراح على القلب ، في خضم صراعات وتقلبات الأوضاع السياسية المقلقة .

نسأل الله أن يبلغنا رمضان ولي عودة إن قدّر الرحمن .

[Howayda Ismail]

250 ألف كرتونة رمضانية من القوات المسلحة لمحدودي الدخل

التوزيع بدأ أمس ويغطي المحتاجين في 6 محافظات

قامت القوات المسلحة بتوزيع 250 الف شنطة رمضانية تحتوي علي سلع رمضان لاعانة الاسر المصرية طوال الشهر.قامت مجموعة من القوات المسلحة امس بالتوجه الي مركز شباب الجزيرة لتوزيع هدية القوات المسلحة وتقرر مضاعفة عدد الشنط من 80 الف شنطة الي 250 الف شنطة.وقال مصدر عسكري »للاخبار« اننا حريصون علي مساندة المواطنين في ظل تدهور الاوضاع الاقتصادية فدورنا لا يقتصر فقط علي الاعمال والمهام العسكرية المكلفين بها من قبل المجلس العسكري ولكن يمتد ليصل الي الشارع المصري وتخفيف آلام المواطنين خاصة عند قدوم شهر رمضان وقد صدرت توجيهات من المجلس الاعلي بالقوات المسلحة بتوزيع شنطة شهر رمضان وزيادة اعدادها عن الاعوام السابقة لتصل الي 250 الف كرتونة موزعة علي 6 محافظات هي القاهرة والجيزة والقليوبية والمنيا وبني سويف والفيوم.

واضاف انه تم التنسيق مع وزارة التضامن الاجتماعي لمعرفة الاعداد التي تستحق الحصول علي شنطة شهر رمضان وقد ابغلتنا بالاعداد وبالتالي قمنا بتجهيز اعداد اكثر من التي بلغنا بها وذلك لكي تغطي جميع المحتاجين.

ويؤكد محمد عبدالعزيز اخصائي اول رقابة ومتابعة مديرية التضامن والعدالة الاجتماعية بالقاهرة انه يتم توزيع شنطة رمضان بالتعاون والتنسيق مع القوات المسلحة