في جمعة 8 يوليو كنت هناك

[se_ Elsyed]

أنا لسه راجع من مصر أمبارح بالليل .... فهاغير هدومي وأطس وشي بشوية ميه وارتاح وأرجع أكتب إنطباعتي عن الزيارة دي اللي بصراحة كانت عاملة زي عملية شحن البطارية للواحد .... لإن أخر زيارة لمصر كانت قبل ثورة 25 يناير بأسبوع بالظبط ... وتأسفت إن فرصة التواجد في مصر فاتتني أثناء ذروة الأحداث ..

لكن أهو الواحد لو مالحقش الحج .. يبقى على الأقل يعمل عُمره :)

وكمان هاحكي عن الرعب اللي بيبدأ من السعودية لأي مسافر .. وأوعى هاتتمسك في المطار وهاتاخد تأشيرة نهائي لو شركتك أحمره وممكن يعلقوك من رجليك وأبو رجل مسلوخه هايطلع لك في المطار ... إلخ

هههههههههههههه

أخدت تاكسي من قدام البيت للمطار وطلع السواق فلبيني .. فسألني : إنت مسافر داخلي ؟

قلت له : لأ دولي

فعمل زي الفنان محمد شومان في فيلم سور الصين العظيم بالظبط

وقال لي : دولي ؟؟؟؟؟؟؟؟؟؟؟؟؟ وقاعد جنبي كده عادي

فقلت له : طب أعمل إيه ؟ أقعد في شنطة العربية مثلاً ؟

كان هاين عليه يقول لي طلع المصحف إقرا فيه وإتشاهد على عُمرك .... يا عم اي حد بيسافر دلوقت وشركته في النطاق الأحمر بياخد نهائي

كركب بطني الله يحرقه مع إني سافرت كذا مره خلال الأيام الماضية وعادي

فقلت له : ولا .. ما تهرتلش .. شوفت حد بعينك خد نهائي ؟

فقال لي كتيرررررررررررررررررر من صحابي .. وكتير من اللي بأوصلهم وقعدوا مكانك كده ( ده حانوتي مش سواق ده ) وكلهم كانوا مسافرين خروج وعودة وسايبين كمان أهاليهم هنا وحاجتهم ... وييجي عند ظابط الجوازات اللي بيبص بعين ونص ويشوف إن شركته حمرا وإن بقى له أكتر من 6 سنوات هنا يروح لاطع له تأشيرة نهائي ...

وعشان يزيد تأكيده قال لي : لأ واللي مش بياخد تاشيرة وهو خارج .. بياخدها بعد ما يرجع من اجازته .

فقلت له : طبعاً .. من انت بوز فقر لازم تقفلها زي الدومينو .. وما رضيتش أجادل معاه وقلت له : روح الله يحرقك يا بعيد

والحمد لله سافرت وروحت عادي ومافيش حاجه لأن من ابسط قواعد اللعبة إن إدارة الجوازات مالهاش دعوة بمكتب العمل اللي بيحدد نطاقات كل شركة وموقفها من نسبة الموظفين السعوديين لديها ... وزي ما قولت لكم قبل كده إن كل الناس عندها عربيات على اساميها وعلى الأقل لازم يبيع عربيته قبل ما ياخد تأشيرة نهائي والا هاتبقى هيصة وحاجه هاتعمل مشاكل أكنية كتيره خصوصاً إنه مش رايح خروج وعودة وما رجعش .. لأ .. ده وزارة الداخلية هي اللي هاتدي له التأشيرة وهي اللي بيظهر عندها إن فلان لديه سيارة على اسمه أم لا

ده أول موقف قولت أحكيلكم عليه عشان أطمن ولادنا اللي بيسافروا يعني

والله الموفق

ونكمل بعدين

[م تيمور المراغي]

حمد الله على السلامه يا بطل

كنا مفتقدينك والله

[عنبو]

حمد لله على السلامه يا ريس بس ياخى جالك قلب تركب مع سواق فليبينى لوحدك

[mustafagamiel]

وكمان هاحكي عن الرعب اللي بيبدأ من السعودية لأي مسافر .. وأوعى هاتتمسك في المطار وهاتاخد تأشيرة نهائي لو شركتك أحمره وممكن يعلقوك من رجليك وأبو رجل مسلوخه هايطلع لك في المطار ... إلخ

حبيبي يأبو السيد

حمدالله على سلامتك

انت فين ياراجل من ومااان

خد دي بسي اوعى وشك

للمسافرين للسعودية

[se_ Elsyed]

من ضمن الملاحظات اللي لفتت إنتباهي إن في زوار كتير جداً لمصر والمطار زحمه جداً .. مصريين مغتربين راجعين يقضوا أجازتهم في مصر .. وعرب .. وأجانب ...

والحركة تكاد تكون عادية بالنسبة للقادمين إلى مصر كل عام خصوصاً في الصيف ..

- خلال الفترة اللي قضيتها في مصر أكاد اجزم إن موضوع الأنفلات الأمني ده نابع من ناس عاوزه الثورة تفشل وبتهول الأحداث ...

أيوه في حوادث بتحصل ... لكن مش بسبب الثورة أو الأنفلات الأمني اللي صوروا لنا الموقف إن الناس بتقتل بعضها في الشارع ... وإن الكل حابس نفسه في بيته .. بالعكس .. الحياة عادية جداً كما تعودناها وفي محلات فاتحه 24 ساعة ... قد يكون هناك بعض الحوادث نتيجة إن إحنا مجتمع مزدحم ومتعدد الثقافات ... وقد يكون لسقوط هيبة الشرطة لدى كثير من المجرمين وقالوا يستغلوا الموقف ... لكن حتى من خلال تقاعس الشرطة عن أداء واجبها ... فتقريباً اقدر أقول إن الشارع المصري ماشي بقوة الدفع الذاتي وقادر يحمي نفسه بعيداً عن جهاز فاسد تم تكوينه من سنوات طويلة لحماية نظام فاسد وليس لحماية الشعب صاحب البلد ...

- أكثر أنفلات ضايقني كثيراً وكان لازم يكون له وقفة مع الحكومة هو الانفلات الأخلاقي والسلوكي في الشارع المصري ... يعني رجال المرور تقريباً يكادوا يكونوا نادرين في الشارع وبالتالي عاوز تمشي عكس الأتجاه .. شغال ... تركن صف رابع .. برضوا شغال .... مش بس كده ...

- حاجه بقى يتكتب عنها مُجلدات كاملة ... وتتمثل في وجود حركة بناء غير عادية ومش عارف الفلوس دي جت منين ... ده أنا بأتكلم عن مناطق كتيرة زورتها في القاهرة ما بالك بالمحافظات الأخرى ... عماير شاهقة طلعت في أقل من 3 أو 4 شهور بطريقة غير عادية مستغلين إن مافيش محليات ولا محافظة ولا تراخيص .. وإبني يا عم الحج .. بدون مبالغة ممكن تشوف شارع عرضه مترين مثلاُ .. ويطلع النهار تلاقي برج مكون من 13 طابق طلع فجأة كده ...

- وحركة هدم لبيوت قديمة كانت دور أو دورين ... بيهبط عليهم أصحاب رؤوس الأموال يغروهم بالاموال عشان يبيعوا بيوتهم وهوووووووب .. يبنوا البرج التمام مكان البيت

- طب يا عم الأنقاض والرتش والحاجات دي الي ناتجه عن الهدم بتروح فين ؟

مكانها موجود .... أرمي يا عم في أقرب شارع ولو كان عمومي ... وجايب لكم صور مصورها بنفسي لشوارع عمومية في مناطق شهيرة .. تم غلقها بالكامل من الأنقاض دي ... الأعجب من ذلك ... كنت معدي على مزلقان قطار السويس في منطقة عين شمس .. واللي لحد دلوقت مش عارف القطار ده بيعمل إيه هناك .. المهم على المزلقان لازم يكون هناك مبنى للتحويلة ولمراقبة حركة القطار ولغلق المزلقان أمام السيارات لما القطار يقترب من المحطة ... المبنة أندفن تماماً تحت الأنقاض اللي إترمت أمامة

- ما أضحكني بقى .. وهانزل الصور ... إن لما بأقرب من شارع جسر السويس اللي بيوصل لطريق مصر الأسماعيلية لازم اعدي على محطة اتوبيسات الجراج القريبة من فندق السلام والكلية الحربية وطريق المطار ... ماشي كده ؟

هناك على شارع جسر السويس يقع مبنى حي عين شمس وهو بيدير منطقة كبيرة ومترامية الأطراف .... ومبانيه كبيرة جداً ... المبنى بتاع الحي واخدين بالكم اللي فيه مكتب رئيس الحي والمهندسين وبتوع النظافة ... أختفى كله تماماً خلف جبال من الأنقاض المرمية ....

عشان بس الناس اللي زعلانة على حل مجالس اللي قعدوا 6 شهور بعد الثوةر شكلهم كانوا مستخبيين ولا يحركون ساكناً ...

ووجدت مبنيين لحي عين شمس .. مبنى قديم سابق تم نهبه بالكامل حتى المكيفات .. حتى الشبابيك الألوميتال تم أقتلاعها من مكانها ... ونقلوا في مبنى بجانبة ويبعد أمتار فقط . ومبنى فخم بصراحة مش عارف كان مخصص لإيه قبل ذلك ... نفس الشيء أندفن خلف كسر البيوت المهدودة والأنقاض المرمية وده بيحصل يومياً

وأخر ما كنت أتوقعه إن مدينة العبور الهادئة والمنظمة بطبعها .. في مناطق كثيرة ومنها المساحة المخصصة لإقامة جامعة عين شمس هناك ... إتملت أنقاض من دي ... وكان زمان ما حدش يجرؤ إن يرمي حاجه زي دي وإلا تتسحب العربية منه ويتسجن ويدفع غرامة ..

لكن مقارنة بالأحياء الأخرى . فالعبور أفضل حالاً بمراحل ومافيش تجاوزات تُمثل مشكلة أو ظاهرة ....

- على شارع جسر السويس نفسه كان في شارع بأمشي فيه على طول عشان بيختصر المسافة .. الشارع ده فيه فلل على الجانبين .. يمكن 10 فلل أو حاجه ... وفي قرار ثوري شكل أصحاب الفلل إجتمعوا ... وأجمعوا على ضرورة غلق الشارع أمام مرور السيارات

هههههههههههههه أه والله .. جابوا حجارة من بتاعت الرصيف .. ورصوها على مدخل الطريق ... بلا سيارات بلا وجع دماغ

شاهدت برضوا في أحد الشوارع هناك على الرصيف ... شخص ظريف طقت في دماغه فكرة .. راح مستغل إن الرصيف عرضه حوالي 3 أمتار ... وراح باني أكشاك تجارية على الرصيف وكان بيبيع الكشك بـ 3000 ج ... بس ده بصراحة نزلت قوات الجيش طربقت الحاجات دي فوق دماغه

- حاجه بقى ولا في أفلام الخيال العلمي . .. أنتوا عارفين إن في مساكن كان بتبينها الحكومة زمان وبتبيعها بأسعار معقوله بتُسمى البلوكات ... ودي موجودة في اماكن كثيرة جداً في أحياء القاهرة ... بيبقى لها طابع وشكل مميز وموحد وكلها في نفس الأرتفاع ... إزاي ومين وإمتى وفين .. يتم بناء أدوار علويه لسه على الطوب الأحمر فوق تلك البلوكات المملوكة للحكومة ؟ أنا مش عارف ّ!!!!!!!!!

الاعجب والأغرب بقى ... كل واحد تطق في دماغه يروج جاي جنب المساحة الخالية من البلوك ويروح باني دورين تلاته .. أه والله

طب فين الدولة والدنيا والأحياء ومين هايدخل له مرافق ؟؟؟؟؟؟؟؟؟؟؟

سألت أخويا وهو بيسافر بلدنا كتير .. قولت له الوضع عامل إيه في الريف ؟

طبعاً تعديات على الأرض الزراعية بلا حدود ... وياريت على حدود الأرض .. لأ .. ده في نص الأرض فجأة تلاقي عمارة خرسانية طلعت ...

بالله عليكم ... الا يستحق ك هؤلاء إعدام علني أو الدفن تحت تلك المباني اللي عملوها وضيعوا بها ثروة بقى لها الاف السنين بتتكون من الأرض الزرعية الخصبة من أيام الفراعنة فجأة تضيع في لحظات .؟

وكلنا عارفين إن الأرض الزراعية طالما إتصب عليها خرسانة وأتبنت وأتهدمت .. فهاتتزرع تاني إزاي حتى لو تمت الأزالة ؟

نكمل بعدين

[أبو يمنى]

من ضمن الملاحظات اللي لفتت إنتباهي إن في زوار كتير جداً لمصر والمطار زحمه جداً .. مصريين مغتربين راجعين يقضوا أجازتهم في مصر .. وعرب .. وأجانب ...

والحركة تكاد تكون عادية بالنسبة للقادمين إلى مصر كل عام خصوصاً في الصيف ..

- خلال الفترة اللي قضيتها في مصر أكاد اجزم إن موضوع الأنفلات الأمني ده نابع من ناس عاوزه الثورة تفشل وبتهول الأحداث ...

أيوه في حوادث بتحصل ... لكن مش بسبب الثورة أو الأنفلات الأمني اللي صوروا لنا الموقف إن الناس بتقتل بعضها في الشارع ... وإن الكل حابس نفسه في بيته .. بالعكس .. الحياة عادية جداً كما تعودناها وفي محلات فاتحه 24 ساعة ... قد يكون هناك بعض الحوادث نتيجة إن إحنا مجتمع مزدحم ومتعدد الثقافات ... وقد يكون لسقوط هيبة الشرطة لدى كثير من المجرمين وقالوا يستغلوا الموقف ... لكن حتى من خلال تقاعس الشرطة عن أداء واجبها ... فتقريباً اقدر أقول إن الشارع المصري ماشي بقوة الدفع الذاتي وقادر يحمي نفسه بعيداً عن جهاز فاسد تم تكوينه من سنوات طويلة لحماية نظام فاسد وليس لحماية الشعب صاحب البلد ...

- أكثر أنفلات ضايقني كثيراً وكان لازم يكون له وقفة مع الحكومة هو الانفلات الأخلاقي والسلوكي في الشارع المصري ... يعني رجال المرور تقريباً يكادوا يكونوا نادرين في الشارع وبالتالي عاوز تمشي عكس الأتجاه .. شغال ... تركن صف رابع .. برضوا شغال .... مش بس كده ...

- حاجه بقى يتكتب عنها مُجلدات كاملة ... وتتمثل في وجود حركة بناء غير عادية ومش عارف الفلوس دي جت منين ... ده أنا بأتكلم عن مناطق كتيرة زورتها في القاهرة ما بالك بالمحافظات الأخرى ... عماير شاهقة طلعت في أقل من 3 أو 4 شهور بطريقة غير عادية مستغلين إن مافيش محليات ولا محافظة ولا تراخيص .. وإبني يا عم الحج .. بدون مبالغة ممكن تشوف شارع عرضه مترين مثلاُ .. ويطلع النهار تلاقي برج مكون من 13 طابق طلع فجأة كده ...

- وحركة هدم لبيوت قديمة كانت دور أو دورين ... بيهبط عليهم أصحاب رؤوس الأموال يغروهم بالاموال عشان يبيعوا بيوتهم وهوووووووب .. يبنوا البرج التمام مكان البيت

- طب يا عم الأنقاض والرتش والحاجات دي الي ناتجه عن الهدم بتروح فين ؟

مكانها موجود .... أرمي يا عم في أقرب شارع ولو كان عمومي ... وجايب لكم صور مصورها بنفسي لشوارع عمومية في مناطق شهيرة .. تم غلقها بالكامل من الأنقاض دي ... الأعجب من ذلك ... كنت معدي على مزلقان قطار السويس في منطقة عين شمس .. واللي لحد دلوقت مش عارف القطار ده بيعمل إيه هناك .. المهم على المزلقان لازم يكون هناك مبنى للتحويلة ولمراقبة حركة القطار ولغلق المزلقان أمام السيارات لما القطار يقترب من المحطة ... المبنة أندفن تماماً تحت الأنقاض اللي إترمت أمامة

- ما أضحكني بقى .. وهانزل الصور ... إن لما بأقرب من شارع جسر السويس اللي بيوصل لطريق مصر الأسماعيلية لازم اعدي على محطة اتوبيسات الجراج القريبة من فندق السلام والكلية الحربية وطريق المطار ... ماشي كده ؟

هناك على شارع جسر السويس يقع مبنى حي عين شمس وهو بيدير منطقة كبيرة ومترامية الأطراف .... ومبانيه كبيرة جداً ... المبنى بتاع الحي واخدين بالكم اللي فيه مكتب رئيس الحي والمهندسين وبتوع النظافة ... أختفى كله تماماً خلف جبال من الأنقاض المرمية ....

عشان بس الناس اللي زعلانة على حل مجالس اللي قعدوا 6 شهور بعد الثوةر شكلهم كانوا مستخبيين ولا يحركون ساكناً ...

ووجدت مبنيين لحي عين شمس .. مبنى قديم سابق تم نهبه بالكامل حتى المكيفات .. حتى الشبابيك الألوميتال تم أقتلاعها من مكانها ... ونقلوا في مبنى بجانبة ويبعد أمتار فقط . ومبنى فخم بصراحة مش عارف كان مخصص لإيه قبل ذلك ... نفس الشيء أندفن خلف كسر البيوت المهدودة والأنقاض المرمية وده بيحصل يومياً

وأخر ما كنت أتوقعه إن مدينة العبور الهادئة والمنظمة بطبعها .. في مناطق كثيرة ومنها المساحة المخصصة لإقامة جامعة عين شمس هناك ... إتملت أنقاض من دي ... وكان زمان ما حدش يجرؤ إن يرمي حاجه زي دي وإلا تتسحب العربية منه ويتسجن ويدفع غرامة ..

لكن مقارنة بالأحياء الأخرى . فالعبور أفضل حالاً بمراحل ومافيش تجاوزات تُمثل مشكلة أو ظاهرة ....

- على شارع جسر السويس نفسه كان في شارع بأمشي فيه على طول عشان بيختصر المسافة .. الشارع ده فيه فلل على الجانبين .. يمكن 10 فلل أو حاجه ... وفي قرار ثوري شكل أصحاب الفلل إجتمعوا ... وأجمعوا على ضرورة غلق الشارع أمام مرور السيارات

هههههههههههههه أه والله .. جابوا حجارة من بتاعت الرصيف .. ورصوها على مدخل الطريق ... بلا سيارات بلا وجع دماغ

شاهدت برضوا في أحد الشوارع هناك على الرصيف ... شخص ظريف طقت في دماغه فكرة .. راح مستغل إن الرصيف عرضه حوالي 3 أمتار ... وراح باني أكشاك تجارية على الرصيف وكان بيبيع الكشك بـ 3000 ج ... بس ده بصراحة نزلت قوات الجيش طربقت الحاجات دي فوق دماغه

- حاجه بقى ولا في أفلام الخيال العلمي . .. أنتوا عارفين إن في مساكن كان بتبينها الحكومة زمان وبتبيعها بأسعار معقوله بتُسمى البلوكات ... ودي موجودة في اماكن كثيرة جداً في أحياء القاهرة ... بيبقى لها طابع وشكل مميز وموحد وكلها في نفس الأرتفاع ... إزاي ومين وإمتى وفين .. يتم بناء أدوار علويه لسه على الطوب الأحمر فوق تلك البلوكات المملوكة للحكومة ؟ أنا مش عارف ّ!!!!!!!!!

الاعجب والأغرب بقى ... كل واحد تطق في دماغه يروج جاي جنب المساحة الخالية من البلوك ويروح باني دورين تلاته .. أه والله

طب فين الدولة والدنيا والأحياء ومين هايدخل له مرافق ؟؟؟؟؟؟؟؟؟؟؟

سألت أخويا وهو بيسافر بلدنا كتير .. قولت له الوضع عامل إيه في الريف ؟

طبعاً تعديات على الأرض الزراعية بلا حدود ... وياريت على حدود الأرض .. لأ .. ده في نص الأرض فجأة تلاقي عمارة خرسانية طلعت ...

بالله عليكم ... الا يستحق ك هؤلاء إعدام علني أو الدفن تحت تلك المباني اللي عملوها وضيعوا بها ثروة بقى لها الاف السنين بتتكون من الأرض الزرعية الخصبة من أيام الفراعنة فجأة تضيع في لحظات .؟

وكلنا عارفين إن الأرض الزراعية طالما إتصب عليها خرسانة وأتبنت وأتهدمت .. فهاتتزرع تاني إزاي حتى لو تمت الأزالة ؟

نكمل بعدين

نعم أخي الكريم فإن ما يحدث من تجاوزات لاشتراطات البناء شئ مؤسف وسلوك مشين ، لما يحمله من استهتار مخيف بسلامة السكّان والمباني .

وتستحق هذه المخالفات من السلطات التعامل معها بيد من حديد (في زمان ارتفعت فيه أسعار الحديد) .

قصّ علي بعض المعارف في الاسكندرية نبأ ناطحات السحاب التي تقام بلا رقيب ولا حسيب ، ومسابقة الزمان في صب الخرسانات ، قبل أن تقوم الحكومة من كبوتها !

والله المستعان .

[عصام أبوالفتح]

حمد الله على السلامة يابو الاسياد وحشتنا جدا

ملاحظات قيمة وانتظر انطباعك عن التحرير

ما حدث ويحدث يجعلنى غير متفائل بالمرة

لم نتغير كما كنت اعتقد

[Alattar]

حمد الله علي السلامة يا عمنا..طب كنت قوللي و أنا آجي أوصلك المطار بنفسي يا راجل..أهو علي الأقل أطلع حق النزين..ولا القسط اللي بدفعه كل شهر للجميح

يلا يا عم..ظبط نفسك كده..واتغدي و تعالي قول ملت ايه في التحرير .. أحسن أنا حاسس ان التحرير اللي كنت أعرفه زمان ده بقي واحد تاني خالص..أنا حاسس اني هنزل مصر ان شاء الله مش هلاقيه أصلا

[se_ Elsyed]

قبل ما أكتب عن إنطباعاتي عن التحرير

أحب أسجل وأؤكد مرة أخرى موقفي من تصرفات وردود أفعال جهاز الشرطة ... والتي تجلت في تصريحات الأخ العيسوي في رفضة تنفيذ قرار رئيس مجلس الوزراء بفصل الضباط المتهمين بقتل الثوار ... بالرغم إني ضد القرار ده وشايف إنه لازم يبقى صادر من المحكمة بناء على قرار إدانة ...

وبالتالي عرفنا مين هما الفلول وليه مافيش أي حاجة إتغيرت في هذا الجهاز الفاسد ... وليه مش عاوزين يغيروا من نفسهم ويبقوا شرطة في خدمة الشعب مش في خدمة السُلطة أو خدمة أنفسهم ...

سؤال

هل حد فينا شعر خلال الـ 6 شهور إن الشرطة إتغيرت للأفضل ؟

لأ طبعاً

هاحكي مثال واضح على عقيدة الشرطة وتفكيرهم وتربيتهم وشوفته بعيني خلال اليومين الماضيين ...

في طريقي من مدينة العبور إلى القاهرة كنت إما أختار طريق مصر الإسماعيلية من مدخل العبور عشان أوصل الطريق الدائري .. والمسافة يمكن 3 كم .. كنت في العادة بأخدهم في حوالي ساعة أو ساعة وزيادة من الأزدحام لإن كل الدنيا بتبقى جايه من الأسماعيلية والعاشر من رمضان وبورسعيد أيضاً ..

أو باختصر الطريق بالعرض من داخل العبور إلى أن أوصل إلى طريق بلبيس الصحراوي في التقاطع مع مصر إسماعيلية .. والطريق ده بيستغرق 10 دقائق بالظبط ... شوفتوا الفرق ؟

في مدخل طريق مصر الأسماعيلية من طريق بلبيس توجد لجنة ثابتة للشرطة . لإن ده الطريق اللي بيوصل من الشرقية إلى القاهرة - الصحرواي طبعاً - أو اللي رايح الشرقية من الطريق ده لازم يعدي على الكمين

وده شيء جيداً جداً عشان لو عربية مسروقة أو حاجه يبقى ما تتسربش من هذا الطريق .. وكمان كان هناك لجنة حجر صحي بتمنع دخول الطيور الحية إلى القاهرة عشان أنفلونزا الطيور وما إلى ذلك ..

وكنت حكيت لكم الموقف ده من سنتين لما كان عندي شغل في شقتي وجبت إتنين عمال أعرفهم جيداً متأكد منهم ومن سوكهم لإني مش هادخل بيتي مشبوهين مثلاً .. وجينا بعد الظهر وواحد منهم تلقى إتصال من زوجته إن إبنه تعبان جداً ودخل المستشفى . الولد كان مولود بقى له إسبوع ... فقلت له هاوصلك المستشفى وهاكون معاك وسوقت بسرعة عشان اوصل الراجل ده وجينا في الكمين لا سألني بطاقتك ولا رخصك .. وأمر الناس دول ينزلوا وقال لي إتفضل إنت دول هايفضلوا معانا !!!!!!!!

رفضت واصريت إني أبقى معاهم واشوف هايعملوا إيه ... وأخدوا بطايقهم الشصخية .. وأتاري الناس الغلابة اللي زي دول بيمشوا ومعاهم أوراق كتير منها شهادة تأدية الخدمة العسكرية !!!!!!!

وأمروهم إن وشهم يبقى في الحيط وأنا كل ده مستغرب وأنا جابوا لي كرسي وحاجه ساقعه ورفضت أقعد أو اشر ب حاجه لإن ده مش موقف ضيافة ... والبيه الظابط قدامه حاجه زي السنترال بيتصل بمديرة الامن عشان تكشف على الصحيفة الجنائية للناس دي ... فأبلغوه على الطرف الثاني مديرية الأمن طبعاً إن جهاز الكمبيوتر عطلان ومش هايقدروا يردوا عليهم دلوقت وقالوا لي إمشي إنت هما هايفضلوا معانا شويه

فرفضت وثورت وأشتبكت مع الظابط المسئول وقولت له دي مشكلتكم إنتم إن الكمبيوتر عطلان ولا خربان وإن دي ناس محترمة وكل مشكلتهم إنهم عمال غلابة .. بالمناسبة واحد منهم معاه دبلوم تجارة ...

فلما لقوني كده وافقوا وسابوهم أخدتهم معايا ومشيت ولقيت ناس كتير هناك محجوزين بنفس الطريقة

المهم ... عديت كذا مرة خلال الأيام الماضية على نفس الكمين .. لقيت البهوات كلهم جايبين كراسي وقاعدين على جنب كل في فترة دوامه ... ورافعين الحواجز اللي كانت بتبقى محطوطة وهاتك لا موخذه يا مرقعه وضحك وتهريج وسايبين الدنيا وولا بيقولوا لحد كخ كده

فهي دي شرطتنا ... وقدامك حل من إتنين :

1- إما أن تقبلني إنساناً مغروراً متكبراً يظن نفسه فوق البشر ويهينهم ويقهرهم ويتسلى عليهم والباشا راح والباشا جه .

2- أو يقعد بجلابيته عند أمه بلا عمل ولا أمن ولا بطيخ ويسيب الدنيا تضرب تقلب لحد ما يخلينا نركع ونتوسل إليه إنه يرجع تاني لشغله وأكل عيشه عشان نحس بالأمن وبالتالي يعمل فينا ما بدا له ..

حبيت أسجل الملاحظة دي بس

ملاحظة أخرى هامة

كلنا طبعاً في طريقنا للمطار وأمام الصالات ما كانش حد يجرؤ إنه يفضل بعربيته دقيقة واحده عشان التكدس وسيولة الطريق للي رايح واللي جاي .. وده شيء جيد

أمبارح أخويا بيوصلني العصر .. وإني ألمح خيال عسكري حتى يقول لنا إنتوا بتعملوا إيه .. ابداً

والراجل ركن عربيته ودخل معايا الصالة ... ويمكن شرب شاي .... وكل سنة وإنتي طيبة يا شرطة

مع العلم إن هاتلاقي عينهم قد كده في المرتب الشهري لإنه راجل بيتعب وقاعد عند الحاجه سنية والدته وما بيعملش حاجه لكن مرتبه شغال طبعاً

---------

تصدقوا بالله هذا الموقف حدث تماماً معي

على العكس ً .. واقف في إشارة عباس العقاد مع زاكر حسين والجو في مصر كان ولعه والعربية مكيفة والواحد مع ذلك مش طايق نفسه الضهر .. إلا والاقي واحد مندوب شرطة واقف في الأشارة وبيبتسم للي رايح واللي جاي فقربت منه وسلمت عليه وقولت له ربنا يعينك وأخبار الشغل والجو إيه ؟ الولد يحمد ربنا بطريقة غريبة وابتسامة لن أنساها وهو واقف تحت الشمس والعرق وبيموت ... فبدون رياء ولا مبالغة قولت له ممكن تقبل مني دول تجيب لك بهم قزازة ميه ساقعه في الجو النار ده ... فبنفس الأبتسامة رفض تماماً وقال لي " أنا حضرتك من الأشراف .. والأشراف ما بيقبلوش الصدقة .. وبعدين ده شغلي اللي باخد عليه مُرتب "

لا تعليق

[se_ Elsyed]

حمد الله على السلامه يا بطل

إنت يا جدع إنت أنا مش لسه ضاربك اول أمبارح ؟

بطل إيه يا عم وأنا روحت حررت القدس وجيت ؟

أنا إنسان بسيط وولا بطل ولا بصل حتى

---------

حمد لله على السلامه يا ريس بس ياخى جالك قلب تركب مع سواق فليبينى لوحدك

هههههههههه

ما تخافش عليه يا عنبو ... أنا أعرف أحافظ على نفسي كويس

---------

حبيبي يأبو السيد

حمدالله على سلامتك

انت فين ياراجل من ومااان

خد دي بسي اوعى وشك

يا مصطفى سيبك بقى من حزب " قالوا له " ما أنا قدامك أهور بأروح وأجي كل شويه والحمد لله

ربنا يجعل نطاقك أخضر يابني ويبعد عنك أي حمار ( بفتح الحاء )

----------

نعم أخي الكريم فإن ما يحدث من تجاوزات لاشتراطات البناء شئ مؤسف وسلوك مشين ، لما يحمله من استهتار مخيف بسلامة السكّان والمباني

الإستغلال موجود يا تامر في ناس كتير وما بينفعش معاهم إلا ردع القانون

--------

حمد الله على السلامة يابو الاسياد وحشتنا جدا

ملاحظات قيمة وانتظر انطباعك عن التحرير

ما حدث ويحدث يجعلنى غير متفائل بالمرة

لم نتغير كما كنت اعتقد

الله يسلمك يا عصام

خلي بالك إن الناس عشان تتغير فمحتاجه قيادة محترمة تكون مثال وقدوة .... لإن إحنا مش واحد ولا أتنين أو واحد متعلم والتاني نص ونص . ... إحنا كتير وثقافات مختلفة ومستويات مختلفة

---------

حمد الله علي السلامة يا عمنا..طب كنت قوللي و أنا آجي أوصلك المطار بنفسي يا راجل

لا يا عم يفتح الله .. الفلبيني أرحم ... العُمر مش بعزقه ....

ما أقصدش حاجه يا عطار صدقني

أصل طول ما أنت ماسك الدريكسيون وعمال تلفلف فيه زي أفلام زمان بتاعت الأبيض والأسود . بالتأكيد هاتتعب .. ومشوار المطار بعيد وممكن تنام وأنت سايق .. إرحم نفسك شويه وخد لك قسط من الراحه

[se_ Elsyed]

مش تشويق والله ... بس نفسي أقول حاجات كتير قبل إنطباعي عن التواجد في كرنفال ميدان التحرير

- بشكل عام ... الناس في مصر لم تشعر إطلاقاً إن هناك ثورة ... وأقصد بالناس هنا .. الناس العاديين الغلابة والموظفين والطلبة والعاطلين والفلاح و و و و بل بالعكس منهم من أتهم الثورة بإنها سبب المشاكل الموجودة حالياً واللي ببساطة سببها الأهمال وعدم القدرة على الإدارة أو إتخذا القرار بجرأة

لسبب بسيط جداً هو إن الشعب المصري تعرض لعملية تجريف متعمدة ومتراكمة ومتوالية لأي قيادة أو فكر محترم على مدار أكثر من 60 عاماً وزادت وتيرة التجريف في الثلاثون عاماً العجاف التي حكم فيهم مبارك

والحمد لله العبد لله كان بيكتب ذلك بدون خوف في عز جبروت مبارك وما كنتش بأخاف إلا من الي خالقني

وكان أي حد بتظهر عليه بوادر التفكير او الحكمة .. كان بيتجرف ويتحط في التلاجة والأمثلة كثيرة

وبالتالي وجدنا أنفسنا خلال 6 شهور من حكم ما يُسمى المجلس العكسري في حالة تخبط .. وناس كتيرررررررررر كلهم عسكر مش عارفين هما بيعلموا إيه أو رايحين على فين وبيكابروا وفاكرين إن الإدارة هي عبارة عن تصريحات وبيانات عسكرية كل شوية مش فاهمن منها حاجه .. إو إن الإدارة إني أقعد حوالين الترابيزة المستديرة وأعمل كل شوية مجلس وفاق وطني ونقاش حلزوني ومش عارف إيه من الأفتكاسات دي كل شوية

أه أنقذوا الثورة ... ماشي يا عم أنقذوها

أه بيحموا مصر ... موافق

هل هم فوق مستوى الشبهات .. هانفترض ذلك

لكن .. هل معنى ذلك كله إنهم يديروا الأمور بطريقة صحيحة ؟ .... هذا ما لا أوافق عليه ولا أرى له أي إنعكاسات

وشوفنا ده في قرارات كتير وتصرفات أكتر ....

وقولنا وعدنا إن عصام شرف إنسان محترم وممتاز ويتقي الله ... لكن هل هذا كله يدخل ضمن تعريف الإدارة والرؤية الصحيحة ؟

أبداً طبعاً .. فده وحده مش كفايه خالص

تخيلوا إن واحده ست من زمان قوي هي اللي لخصت كل ده في كلمتين وخُطت تلك الكلمات بحروف من ذهب في القرآن الكريم عندما قالت الفتاة لأبيها سيدنا شعيب عن سيدنا موسى " يا أبت استأجره ان خير من استأجرت القوي الأمين "

القوي ........ القوي الشخصية ... والقوي الشكيمة صاحب الشخصية المستقلة التي لا تقبل أن تكون تابعة لأحد وتأخذ قرارها بقوة وتفرض نفسها على المواقف ..

الأمين ...... الأمانة الدينية والأخلاقية والسلوكية

الأمانة لقيناها في عصام بيه شرف بصراحة وهو رجل فوق مستوى الشبهات ..

لكن القوة ... عفواً ... لا يتمتع بها ولا توجد لديه ... وقبل على نفسه أن يكون مطيعاً للمجلس العسكري الذي يوجهه ويرفض طلبات الإصلاح كما يُسرب لنا ويقف في طريقة ويعيقه عن العمل

وبالتالي كان أحرى به وأولى أن يستقبل ويوضح ذلك أمام الجميع بدون تهييج أو إثارة للناس لكي لا ينقلبوا على المجلس العسكري في تلك المرحلة الحرجة .. وكان هايرفع عن نفسه الحرج ويحرج المجلس العسكري ذاته ..

سؤال

هل الناس حست إن في ثورة ؟

أبداً لم يحدث إلا في وجود شباب وقوى سياسية صوتها إتنبح في ميدان التحرير وهي بتدور على الثورة

1- لو إنت طالب جامعي مثلاً ... هل حسيت بالثورة وإنت شايف لمدة 6 شهور فترة بعد الثورة رؤساء الجامعات اللي إختارهم مبارك على الفرازة عشان يرقصوا ويهللوا ويسبحوا بحمده ويقرفونا ليل نهار بلافتات من عينة " شباب الجامعة يبايعون مبارك بكل حب "

ويسلطوا علينا كلاب الحراسة بتوع أمن الدولة عشان يراقبوا الناس ويكتبوا تقارير عن اي حد يفتح بؤه ..

حد حس إن دول إتغيروا ؟

2- لو إنت موظف في بنك أو شركة حكومية .... هل حسيت بالثورة وإنت شايف جميع القيادات كلها متعينة من علاء وجمال مبارك ويدينوا لهم بالولاء وهما اللي ساعدوا على نهب فلوس الشعب وتهريبها على هيئة قروض بدون ضمانات وبس بمجرد مكالمة تليفون من جمال بيه وطظ في فلوس البلد ...

6 شهور وهما هما نفس الوشوش الحرامية

3-لو إنت مزارع وفلاح .. هل حسيت بالثورة وإنت شايف الأسمدة بتزيد 100 % في خلال شهور قليلة . وبتشوف الأراضي الزراعية بتتاكل من حواليك وبتتحول إلى كتل اسمنت وبتشوف ناس لسه بتتاجر بإسمك وتتكلم عن 50 % عمال وفلاحين وما فيش حد فيهم مسك فاس قبل كده أو حاسس بمشاكلك ؟

4- ولو إنت موظف بسيط .. هل حسيت بالثورة وإنت شايف وزير مالية ومجلس وزراء بحاله قاعد ليل نهار عمال يحنتف ويقصقص ويفتكس حد أدنى للأجور ويتكلم عن 700 ج حد ادنى وسايب الوف من الناس بياخدوا مئات الألوف من شركات وقطاعات حكومية .. وفي نفس الوقت أسعار السلع الرئيسية تزيد وتكوي ضهرك وما بقتش عارف تروح فين وتيجي منين .؟

5- ولو إنت مغترب .. هل حسيت بالثورة ودول أقل مننا أعطت المغترب أقل حقوقه في إنه يشارك في الحياة السياسية عن طريق الإنتخاب . وبلده بقت هي اللي تروح له مش هو اللي يروح لها وشوفنا أمام أعيننا تجربة من فترة قليلة وبعد الثورة وما حدش في اللي موجودين إتكسف على دمه وقال إخص على كده لأ لازم أدي المغترب حقوقه قب لما أقول له شارك في نهضة بلدك والشعارات الفارغة دي .. وأقل مثل هاقوله يتمثل في إن دولة هي مش دولة بل شيء من القرون الوسطى تُسمى جنوب السودان قبل أن تكون دولة .. عملوا عدة مقار إنتخابية على مستوى العالم ومنها مصر لسكان الجنوب عشان يصوتوا بسهولة على إقتراح الأنفصال وإحنا ياللي خاربينها سفارات وقنصليات وأوعى السفير جه .. وحاسب يا عم القنصل ... وجيوش شغالة في القنصليات والسفارات ومآنتخين وبياخدوا مرتبات وهمية وهما في ابراجهم العاجية ... وجيوش من المبرمجين والمتخصصين في الحاسب الألي .. ومع ذلك لحد دلوقت مش عارفين راسنا من رجلينا وهانصوت في الأنتخابات ولا هانصوت من الحُزن ؟

6- ولو إنت من محافظة صغيرة وباسلة زي السويس وإبنك أو قريبك مات أو أتصاب كل ده عشان قال لأ للظلم .. والقتلة طلعوا براءة .. والقضية قيدت ضد مجهول ... وبعدين يطلع رئيس الوزراء يقول لكم : من فضلكم ساعدونا في البناء ... ويا مصري إبني إبني "

وقبل ما تطول لسانك عليه طبعاً مش هاتقول له بتلقائية ... أبني ؟؟؟؟ طب وإبني ودم إبني ؟

خلاص راح هدر وعاوزني أنسى وأبني وإنتي بتضيع حق إبني ؟

7- ولو إنت مصري أياً ما كنت مش من حقك تسأل ... هل محافظ دمياط وعضو الحزب الوطني اللي خلوه وزير إسكان ... وهل عضو لجنة السياسات اللي بقى محافظ الإسكندرية .. وهل عضو لجنة السياسات اللي بقى وزير مالية .. وهل عضو الحزب الوطني اللي كان محافظ سوهاج وبقى ووزير تنمية محلية .. وهل ظابط أمن دولة لمدة تزيد عن 20 عاماً وبقى محافظ الدقهلية .... و غيرهم وغيرهم ... هل كل دول رجال ثورة وهايحققوا أهداف الثورة ؟

8- ولو إنت من سكان القاهرة وسمعت تصريح عبيط لمحافظ القاهرة بيقول . إمبارح مش بعيد يعني " وضع النظافة في القاهرة غير مقبول " مش برضوا هاتطول عليه لسانك وتقول له " ياللي بتتدفعونا 5 ج نظافة على كل شقة . إضرب في ملايين ... و15 جنية على كل محل .. إضرب في ملايين .... ومع ذلك نعتبر من أقذر المدن الموجودة في العالم .... ومع ذلك لا مؤخذه لما كان زمان راجل بسيط معاه عربية بحمار بيعدي يلم الزبالة من البيوت والشقق كنا أفضل حالاً .. ومع ذلك كتبت ولله الحمد عن ده منذ سنوات إن ديمن أكبر عمليات النصب في تاريخ مصر إنك تلم مليارات شهرية وبأنتظام بحجة النظافة .. وتضربوها في جيوبكم وكروشكم ومش شايفين ورقة بتتشال من مكانها ... ده قبل الثور زي بعد الثورة .. بل بالعكس لقيت الوضع مُزري وما يرضيش كافر حتى .. هل ساعتها هاتقول يا سلام والله ده في ثورة في مصر ؟

تصدقوا بالله وقولتها لكم قبل كده ؟

نفسي كنت اشوف ووزير تنمية محلية أو محافظ محترم يقول الشهر ده أنا هاخلي الشوارع تبرق من النظافة ومش هاخلي حد من الحيتان دول بتوع الملحيات أو موظفي الحكومة بتوع النظافة يقعد في مكانه لو هاضطر أستأجر سيارات نقل خاصة لإزالة الزبالة من الشوارع

سلامات يا ثورة

[الغريب]

كفاية بقى وندخل على الشغل :)

منتظر رأيك بالتفصيل عن الأحداث الحالية لأني أثق في حكمك

[Howayda Ismail]

حمد لله على السلامه يا ريس بس ياخى جالك قلب تركب مع سواق فليبينى لوحدك

طبعا حمد لله على السلامة الاول

لكن السؤال هو حضرتك كلمته بالفلبينى برضه هههههههه

اه خلاص فهمت كلمته عنجليزى

معلش مش باقدر امسك نفسى من الضحك من اسلوب حضرتك فى سرد الاحداث

[se_ Elsyed]

ماشي يا عم غريب

بالتأكيد إن اليأس اللي أصاب كثير من المصريين خلال الفترة اللي عدت زي الهوا وهي 6 شهور وهي فترة غير قليلة بالمرة .. دفعهم إلى التفكير في أعادة شحن البطارية الثورية .. وزي ما أنت عارف إننا شعب يتمتع بخفة ظل منقطعة النظير .. ومهارة تأليف مش موجودة حتى عند شكسبير والناس كلها قالت بإختصار " أنا نازل عالتحرير عشان مش حاسس بالتغيير "

وبالتالي أي تجاوزات تحدث من فصائل القوى الثورية والسياسية الموجودة هايبقى سببها المجلس العسكري والحكومة برئاسة عصام شرف اللي تقاعست عن أداء دور فعال خلال الفترة الماضية ..

عشان كده شوفت في التحرير كل الوجوه والأشكال إسلاميين وليبراليين وأشتراكيين وأعضاء احزاب مختلفة وناس عادية جداً وناس ممكن تشوفها تقول دل بلطجية لكن هما شكلهم كده ومنصات مختلفة كل واحد بيقول كلام يعبر عن فكرة ومعتقداته وفلسفته وسياساته .. بل في معتصمين في الخيام هناك كاتبين على الخيم هو تبع مين ...

ويوم الجمعة كان الجميع متفق على مصلحة مصر أولاً ... وكلنا عارفين إن في ناس فضلت الأنصراف يوم الجمعه وفي ناس واصلت إلاعتصام

أنا شخصيً كنت مع مواصلة الإعتصام

لإن بيانات عصام شرف اللي بتبقى عبارة عن ردود أفعال كلها هزيلة ولا ترتقي إلى مستوى القرارات الجادة

وروحت الميدان بعد يوم الجمعة وأنا لا أنتمي إلى أي فصيل أو فكر لكنني أنتمي لمصر فقط ...

ولكنني على طول الخط ضد أي إعتصام أو مظاهرة تضر بمصلحة اي حد مهما كان ... وضد غلق مجمع التحرير أو غلق شارع حتى .... لكن الميدان يعتبر إستثناء عشان الجزيرة الوسطى أو الحديقة لا تستوعب كل تلك الأعداد

وبالتالي تجربة التواجد في الميدان بشكل عام .. حاجه كده لا توصف .... وخليط من البشر غريب ... وتجربة تُكسبك خبرات وطاقة غير عادية

نكمل بعدين

[hanzalah]

وبالتالي تجربة التواجد في الميدان بشكل عام .. حاجه كده لا توصف .... وخليط من البشر غريب ... وتجربة تُكسبك خبرات وطاقة غير عادية

أولاً حمداً لله على سلامتك

ثانيا اتفق تماما على وصفك لتجربة التواجد بالميدان

ياريت كل الناس تتواجد بالميدان ولو لمرة واحدة في حياتها لتشعر بذلك

ان تشعر انك تصنع الحدث بملء ارادة وحرية

[abdulmuttaleb]

والله يا عم سيد أولا طبعا تسجيل متابعة، ثانيا أنا كانت لي وجهة نظر بعنوان لماذا لم أنزل للتحرير في مليونية جمعة 8 يوليو

من اللا منطقي أن نتحدث عن المجلس الأعلى للقوات المسلحة، أو عن ثوار التحرير بمقياس أو بمعيار واحد. كلنا بشر وكلنا إيجابيات وسلبيات، ولولا هذا الكوكتيل لما كنا بشرا أو بني آدمين. الشخص الذكي هو الذي يستخدم ذكاءه في توظيف إيجابيات الآخرين، وتلافي سلبياتهم للوصول لأهداف مشتركة أو شخصية.

الغباء هو التنديد ببطء المحاكمات ومماطلة إجراءات التقاضي، في حين أن قضية مصمم الأزياء محمد داغر الذي قتل أول إبريل 2011م بشقته في المهندسين، لم تبدأ أولى جلسات التقاضي أمام محكمة الجنايات إلا في نهاية الأسبوع الأول من شهر يوليو 2011م الجاري. وهذا رغم أن المتهم قبض عليه خلال النصف الأول من شهر إبريل 2011م.

هذه يا سادة يا كرام قضية قتل عادية وربما يعتبرها ضباط المباحث قضية روتينية أوراقها وتفاصيلها ليست معقدة وليست متشابكة، ورغم ذلك هنالك فارق زمني أكثر من ثلاثة أشهر بين وقوع الجريمة وإحالتها للمحكمة من جهة، وبين عقد أولى جلسات المحاكمة فعليا. وبالمناسبة ففي أولى جلسات المحاكمة انتقد رئيس المحكمة ميدان التحرير وأجل الجلسة للنطق بالحكم في سبتمبر2011م.

الغباء المستحكم هو إغفال قرار المجلس العسكري بخفض عجز الموازنة ورفض الاقتراض من الخارج، وهو القرار الذي رفع مستوى تصنيف الائتماني للاقتصاد المصري طبقا لمؤسسة فيتش الدولية. رفع التصنيف الائتماني يؤثر إيجابا على مستوى الأسعار، ومرونة الاستيراد والتصدير، ويعكس ثقة أكبر في مؤسسات الاقتصاد وهياكله الإجرائية.

الغباء الأعمى هو الهجوم على السلطات الأمنية بما فيها الشرطة العسكرية ووزارة الداخلية، رغم أن مليونيات التحرير كانت تمر بسلام، ولولا جهود الأمن (رغم ما لاقاه من همجية وبلطجية) بشقيه السري والعلني لما مرت المليونيات والتجمعات الكبيرة للمواطنين بسلام. فقط تخيلوا لو أن شخصا مجنونا رفع مسدسا وأطلق رصاصتين وسط جموع البشر الهادرة، سيلقى العشرات حتفهم فقط من الصدمة العصبية ومن التجمهر والتزاحم. عدم حصول هذا هو أولا وأخيرا بفضل الله سبحانه، ثم بفضل جهود غير منظورة لمنظومة الأمن المصرية من الجيش والمخابرات والداخلية.

ليس معنى كلامي أعلاه أن المجلس العسكري أو قادته أو ضباطه هم ملائكة، بالعكس: هم بشر مثلنا لهم ما لهم وعليهم ما عليهم.

غياب الموازنة بين الحسنات والسيئات هي معضلة تواجه المجتمع المصري وخصوصا طبقة الثوار والنخبة، وهم الذين لم يتفقوا حتى على منصات ميدان التحرير اليوم الجمعة (جمعة الإصرار)، رغم الإعلان عن توحيد المنصات سابقا.

اليوم في جمعة الثورة أولا هنالك خمس أو ست منصات ما بين منصة للمجلس الوطني وأخرى لجماعة الإخوان المسلمين والجمعية الوطنية للتغيير، وثالثة لحزب الجبهة الديمقراطية ورابعة لحركة السادس من إبريل وهكذا. بل تم توزيع منشورات للدستور أولا (ودعايات للإخوان المسلمين) على عكس ما أعلن عن توافق القوى السياسية على عدم الترويج لا للأحزاب، ولا الجماعات ولا للانتخابات أولا ولا للدستور أولا.

حتى حمدي قنديل بعد إعجابه بالدكتور محمد البرادعي انقلب إلى النقيض وهجا الرجل وتحدث عن مصلحة المجاري في القاهرة الكبرى، بل حتى وزراء الحكومة أنفسهم يصرحون في جلساتهم الخاصة بالغضب من ميدان التحرير وابتزاز ثواره لمشاعر العامة والبسطاء والعهدة على عماد الدين حسين في الشروق.

لست أدري لماذا يرتبط الحديث أحيانا عن ثوار ميدان التحرير بالغباء (وأحيانا البلطجةأو الهمجية). لقد تحدثت أعلاه عن الغباء، والغباء المستحكم، والغباء الأعمى.

أما الغباء الذي يجعلني لا أنزل للتحرير وراء النازلين، فهو غباء الثوار أنفسهم الذين يهتفون ليل نهار: يا ليتنا لم نترك التحرير، لقد خدعنا في عصام شرف (وهم الذين رفعوه على الأعناق)، مش حاسين بتغيير، يجب تطهير وزارة الداخلية، إلى آخر الشعارات والنداءات الزاعقة.

فإذا كان هؤلاء الثوار وخلفهم الجماعات والأحزاب والتيارات والنخبة والكنبة، إذا كانوا جميعا لم يستطيعوا إدارة الأمر في موضوع متعلق بجمهورية مصر العربية، فكيف أئتمنهم على مستقبل وطن، أو إدارة حكومة، أو حتى توزيع أنابيب بوتاجاز مدعم؟!

وعلى رأي الدكتور المعتز بالله عبد الفتاح المستشار السياسي لرئيس الوزراء د.عصام شرف في نقله لمقولة رنا من المنصورة: لو لم نكن نحن، لما كان مبارك.

تم تعديل 12 يوليو 2011 بواسطة abdulmuttaleb

[عصام أبوالفتح]

الشرطة يابو السيد عندها تعليمات متحتكش بالناس . . التعاملات المباشرة ومنها الكماين والتفتيش مش اولوية . . خصوصا بعد حادثة سواق ميكروباص المعادى وممكن يدخلوا ملكى يراقبوا الوضع من بعيد لبعيد بدون مايشعر الناس بيهم لان العلاقة لسه لم تتحسن للدرجة. . الاخ عبد المطلب أشار للنقطة دى قبلى مشكورا لما اشار للجهود الغير منظورة لجهاز الامن . . علشان كده التواجد مش محسوس لهم.

وبعدين هو انت تتفتش مش عاجبك . . يسيبوك تعدى من غير ما حد يبصلك . . مش عاجبك

وبعدين معاك

على فكرة انا بسافر الدمام والاحساء بالعربية كتير بقالى سنتين عمر ماحد شاف رخصى او فتش العربية . . هل ده معناه تقصير ? . . لا طبعا

لما بيكون حد مشبوه او شكله بلطجى :) او متبلغ على نمره او عيل صغير هو ده اللى بيوقفوه

تم تعديل 12 يوليو 2011 بواسطة عصام أبوالفتح

[se_ Elsyed]

8- ولو إنت من سكان القاهرة وسمعت تصريح عبيط لمحافظ القاهرة بيقول . إمبارح مش بعيد يعني " وضع النظافة في القاهرة غير مقبول " مش برضوا هاتطول عليه لسانك وتقول له " ياللي بتتدفعونا 5 ج نظافة على كل شقة . إضرب في ملايين ... و15 جنية على كل محل .. إضرب في ملايين .... ومع ذلك نعتبر من أقذر المدن الموجودة في العالم .... ومع ذلك لا مؤخذه لما كان زمان راجل بسيط معاه عربية بحمار بيعدي يلم الزبالة من البيوت والشقق كنا أفضل حالاً .. ومع ذلك كتبت ولله الحمد عن ده منذ سنوات إن ديمن أكبر عمليات النصب في تاريخ مصر إنك تلم مليارات شهرية وبأنتظام بحجة النظافة .. وتضربوها في جيوبكم وكروشكم ومش شايفين ورقة بتتشال من مكانها ... ده قبل الثور زي بعد الثورة .. بل بالعكس لقيت الوضع مُزري وما يرضيش كافر حتى .. هل ساعتها هاتقول يا سلام والله ده في ثورة في مصر ؟

ده كان كلامي أمبارح

بصوا الكلام بتاع وزير المالية المستفز

رضوان:رسوم النظافة بإيصالات الكهرباء لحين تطبيق الضريبة العقارية

الثلاثاء، 12 يوليو 2011 - 23:28

الدكتور سمير رضوان وزير المالية

(أ.ش.أ)

طالب الدكتور سمير رضوان وزير المالية المواطنين بضرورة الالتزام فى الوقت الراهن بدفع رسوم النظافة المدرجة بإيصالات الكهرباء، إلى أن يتسنى تطبيق الضريبة العقارية.

وأكد رضوان فى تصريحات خاصة لوكالة أنباء الشرق الأوسط، رغبته فى أن تكون الضريبة العقارية هى التى تخدم المجتمع، موضحا أن حصيلة الضريبة العقارية هى التى ستقوم بتوفير الخدمات من نظافة وطرق وإنارة وخلافه.

واستنكر رضوان عدم العدالة فى توزيع أعباء رسوم النظافة على المواطنين، قائلا: "لا يصح أن تكون رسوم النظافة فى منطقة شعبية أعلى منها فى منطقة أخرى راقية

[صافى]

طب الحمد للة الواحد كدة ينزل مصر وهو مطمئن وحمدلله على السلامة وعقبال المرة الجاية

تم تعديل 16 يوليو 2011 بواسطة صافى