أنباء قوية عن تغيير 13 وزير خلال هذا الأسبوع

[se_ Elsyed]

أقسم بالله أنا حزين جداً

حزين إن تقريباً 99 % من القرارات التي تم إتخاذها من بعد الثورة كانت عبارة عن ردود أفعال لغضب شعبي أو مليونيات أو تهديد بإعتصام

وكإن القائمين على إدارة أمور البلاد هم مجموعة كفتجية وما سمعوش عن حاجه إسمها نهضة أو ثورة أو تغيير أو مباردة أو إصلاح

فكل الدنيا أتصدمت بالتغيير الهزيل للمحافظين ..

وكل الدنيا إتصدمت بالتغيير الهلامي للوزراء واللي ما فرقش كتير عن عصر مبارك

الأن وبعد مرور 6 شهور على بداية الثورة ومع تزايد الغضب من الامور المُجمدة بل بالعكس يا ريتها كده دي بتتجه للأسوء حسب ولولة وزير المالية كل شويه اللي بيبشرنا بكوارث قادمة وبالظبط عامل زي الفلاح العبيط اللي غرق غيطه وبدل ما يتصرف بحكمه قعد يعيط وارضه بتغرق

فالأن هناك تسريبات قوية من داخل مجلس الوزراء على حسب ما جاء في برنامج الحياة اليوم عدة مرات بإن مبدئياً هناك 13 وزير سيتم تغييرهم

المفاجاة بقى إن التغيير سيطول أول واحد وزير الخارجية محد العرابي اللي لسه بقى له كام يوم في تخبط واضح ويوضح مدى الأرتباك اللي عليه عصام شرف ومن قبله المجلس العسكري اللي مش عارفين يرووا فين أو ييجوا منين

وأيضاً تغيير سمير رضوان وزير المالية

وأكيد وكنت متوقع محسن النعماني بتاع المحليات ... أقسم بالله العظيم شاهدته يُعلق على حكم المحكمة بحل المجالس المحلية وكإن أبوه مات وكان وشه إسود وزعلان جداً ويقول ليه كده ده مش كلهم فاسدين !!!!!!!!!!!!!

وحسن يونس بتاع الكهربا اللي بتقطع كل شوية

وسيد مشعل المزور واللي عامل المصانع الحربية في حلوان عزبة خاصة له

وفايزة ابو النجا اللي يحي الجمل بيقول عليها بـ 100 راجل .. وطالما قال كده تبقى فاشلة لإنه قال كده عن أحمد شفيق برضوا

وسامي الصياد وزير التجارة والصناعة .. مش عارف شغلته إيه بصراحة

ووزير الثقافة اللي مالحقش

وأيمن أبو حديد وزير الزراعة ... أنا ده بالذات توقعت خلعه لما ظهر مع عمرو خالد في برنامج بكره أحلى الأسبوع الماضي وشوفت واحد منجد أو كهربائي سيلسيون والإسم وزير زراعة

عمرو خالد بيسألة عن كارثة البناء على الأراضي الزراعية وكيفية تفاديها وكيفية علاجها يقوم البيه مجاوب وقايل : لازم منظمات المجتمع المدني تتدخل .. ولازم جيران الناس اللي جنب الأرض اللي إتبنى عليهم يتدخلوا ويرفعوا لافتات يستنكروا هذه الأفعال

لوووووووووووولي .... طب وإنت مش هاتنتشروا برضوا ولا جاي مع المشاريب ؟

وفوق ده كله وتقديراً لسنه وبدل ما يخلعوه .. قالوا إنهم قبلوا إستقالة يحي الجمل

وأحمد كمال أبو المجد الفقية الدستور رفض المنصب وعدة شخصيات أخرى رفضته .... ويُقال إن هناك شخصية حزبية كبيرة ستُرشح لهذا المنصب ... أوعى يكون أبويا السيد البدوي أزعل والله ؟

وإن كنت شايف إن نائبة الدكتور على السلمي أفضل منه من وجهة نظر شخصية ومن محب قديم لحزب الوفد بتاع فؤاد باشا سراج الدين ومصطفى شردي

[se_ Elsyed]

سوري .. نسيت الزغلول الكبير .. منصور العيسوي

تخيلوا يا جماعة إنه إمبارح يُعين مدير جديد لقطاع الأمن الوطني ( امن الدولة سابقاً ) ... خلفاً للمدير الجديد اللي تم تعيينه منذ أقل من شهرين

ليه يا عم ؟؟؟

أصله أمبارح وصل السن القانوني للمعاش وإُحيل للتقاعد

قمة المهزلة والمسخرة ... يعني سيادتك ما كنتش عارف من شهرين إن الراجل عنده ستين سنة .؟

ولا عاوز تجامله على قفانا وترقية على أخر أيامه في الخدمة وياخد معاش مدير أو رئيس قطاع ونهاية خدمة لرئيس قطاع ؟

وإزاي كنت بتضحك على الشعب المصري كله وتقول إن الراجل مهمته الاساسية هي تطوير القطاع لإزالة الصورة السيئة التي أنطبعت عند المصريين من فساد هذا القطاع وتجاوزاته في حين الراجل ما جلسش على الكرسي إلا لبضع ساعات

[se_ Elsyed]

أوشك الجدل الدائر حول أسماء الوزراء المتوقع رحيلهم، في التعديل الوزاري الوشيك، على الانتهاء، حيث من المقرر أن يعلن الدكتور عصام شرف رئيس مجلس الوزراء التشكيل الجديد للحكومة خلال أيام.

ووضعت التكهنات مجموعة من الأسماء المرشحة بقوة لترك الوزارة، حيث يأتي على رأس المرشحين للرحيل كل من محسن النعماني وزير التنمية المحلية، وسمير رضوان وزير المالية، وفايزة أبو النجا وزيرة التعاون الدولي، وسمير الصياد وزير التجارة والصناعة، وايمن فريد ابو حديد وزير الزراعة، وحسين العطفي وزير الري، وأشرف حاتم وزير الصحة، وحسن يونس وزير الكهرباء، وعاطف عبد الحميد وزير النقل، وابراهيم مناع وزير الطيران المدني، واللواء منصور العيسوي وزير الداخلية، محمد العرابي وزير الخارجية، عماد ابو غازي وزير الثقافة .

وتأكيدا لانفراد مصراوي، تقرر رحيل الدكتور يحيى الجمل، بعد قبول شرف للاستقالة التي تقدم بها الأول من منصبه كنائب لرئيس مجلس الوزراء.

وبحسب ما أوردته فضائية الحياة مساء الثلاثاء، اعتذر الدكتور أحمد كمال أبو المجد، عن تولي منصب نائب رئيس الوزراء بعد قبول استقالة الجمل، كما أفادت بان شرف التقى بمجموعة من المرشحين لتولي حقائب وزارية.

ومن جانبه قال السفير محمد حجازي المتحدث الرسمي باسم مجلس الوزراء، إن الدكتور عصام شرف رئيس مجلس الوزراء، بدأ اعتبارا من الثلاثاء مشاوراته السياسية من أجل البدء في التعديل الوزاري على حكومته والذى من المقرر الانتهاء منه خلال أسبوع طبقا لما ذكره في بيانه مساء أمس الاثنين .

ونفى السفير محمد حجازي المتحدث الرسمي لمجلس الوزراء علمه بأية معلومات حول عدد الحقائب أو الأسماء التي سيشملها التعديل.

[se_ Elsyed]

مصادر: "ضاحى" وزيراً للبترول بدلاً من غراب

الثلاثاء، 12 يوليو 2011 - 23:18

كتب محمد حجاج

أكدت مصادر مطلعة لـ"اليوم السابع"، أنه تم الاستقرار على المهندس هانى ضاحى رئيس الهيئة العامة للبترول وزيرا للبترول بدلاً من المهندس عبد الله غراب الوزير الحالى، وذلك فى التعديل الوزارى القادم الذى أعلن عنه الدكتور عصام شرف رئيس مجلس الوزراء أمس فى البيان الذى ألقاه.

وأضافت المصادر أنه تجرى حاليا مشاورات قوية مع ضاحى لقبول حقيبة الوزارة، وهو ما أكدته مصادر أخرى مقربة لرئيس الهيئة، وقالت المصادر أن ضاحى قبل بالفعل تولى الوزارة.

يذكر أنه تم إسناد وزارة البترول للمهندس هانى ضاحى عقب ثورة 25 يناير، ولكنه رفض المنصب بعد مفاوضات كبيرة ، قائلا إن مهام الهيئة أهم من تولى الوزارة بكثير

.

[se_ Elsyed]

هههههههههههه

والله المفروض أبقى صحفي ومحلل وحاجات من دي طالما الواحد كلامه بيتحقق بالحرف

أدي مقال جامد في اليوم السباع عن توقعات حركة المحافظين التي ستعقب التغيير الوزاري وفيها نفس كلامي بنفس الأسماء اللي كررتها من فترة طويلة

تضم محافظى القاهرة والسويس والإسكندرية والجيزة وقنا والمنيا والدقهلية..

ننشر قائمة تطهير حكومة "شرف" من محافظى فلول مبارك

الأربعاء، 13 يوليو 2011 - 00:15

كتب علام عبد الغفار وأحمد حسن

ثلاثة سيناريوهات تتصدر مطالب الثوار لإقالة واستبعاد محافظى حكومة الدكتور عصام شرف، إما لأنهم محافظون تابعون لعهد نظام مبارك المخلوع، أو محافظون عاجزون عن تحقيق مطالب الثوار وأهالى الشهداء، وإما تعرض محافظاتهم لأزمات لم يتمكنوا من السيطرة عليها، الأمر الذى تسبب فى وضعهم على قائمة تطهير محافظى حكومة الثورة.

القائمة يأتى على رأسها، محافظ القاهرة الدكتور عبد القوى خليفة، الذى تنطبق عليه الثلاثة سيناريوهات، حيث كان يشغل منصب رئيس الشركة القابضة لمياه الشرب والصرف الصحى فى عهد حكومة النظام السابق الدكتور أحمد نظيف، كما أنه تعرض لعدد من الأزمات مؤخرا فور توليه المنصب، كان أشهرها أزمات سكان العشوائيات فى الدويقة ودار السلام، وأزمة القمامة مع الإعلامى محمود سعد، وكذلك عجزه عن تحقيق مطالب ثوار التحرير، الأمر الذى يجعله يتصدر قائمة محافظى التطهير.

كذلك اللواء محمد عبد المنعم هاشم، محافظ السويس، على قائمة مطالب ثوار وأهالى الشهداء بأرض القناة، نظرا لعدم قدرته على الاستجابة لمطالبهم والقصاص لأبنائهم، رغم قراره بصرف 5 آلاف جنيه لأسرة كل شهيد، إلا أن ذلك لم يمنعهم من قطع الطرق والتهديد بالعصيان المدنى.

وجاء اللواء محسن حفظى، محافظ الدقهلية، والذى كان أحد أتباع النظام السابق، حيث شغل منصب مدير أمن الجيزة الأسبق، وهو ما دفع العشرات من أبناء المحافظة من تدشين بيانات ومظاهرات ضد محافظهم لإقالتهم لتبعيته لنظام مبارك، وهو الأمر نفسه الذى يشمل الدكتور على عبد الرحمن محافظ الجيزة، رئيس جامعة القاهرة السابق فى عهد مبارك، والذى تعرض لأزمة الفتنة الطائفية فى إمبابة، كادت تعصف بأمن واستقرار مصر.

كما تضم قائمة محافظى الفلول كلا من، اللواء مصطفى السيد، محافظ أسوان، واللواء سمير سلام محافظ المنيا، والذى كان يشغل منصب محافظ الدقهلية فى عهد مبارك، واللواء أحمد زكى عابدين، محافظ كفر الشيخ، الذى لم يتم تغييره من منصبه قبل الثورة وبعدها.

من جهته، أكد مصدر بوزارة التنمية المحلية، أنه من المتوقع أن تشمل حركة المحافظين المقبلة المحافظين القدامى التى لم تشملهم الحركة السابقة، ومن أبرزهم اللواء أحمد زكى عابدين، محافظ كفر الشيخ، والذى يعانى من انتقادات حادة داخل محافظته، فضلاً عن بعض القضايا التى تقام ضده من قبل المواطنين بالمحافظة، لافتا إلى أن هناك الكثير من المواطنين طالبوا بإقالته أكثر من مرة لتبعيته للنظام السابق.

وأضاف المصدر، أن حركة المحافظين المقبلة ستتوقف على التغيير الوزارى المقبل، لافتا إلى أنه فى حال تغير اللواء محسن النعمانى وزير التنمية الحالى، فالوزير الجديد سيكون له رأى فى اختيار المحافظين الجدد، مؤكدا أنه يجب أن يكون الوزير الجديد للوزارة من داخل أبناء التنمية المحلية، وليس من خارجها، لكونه الوحيد الذى يكون على دراية كاملة بقضايا الوزارة ومشكلاتها.

وأشار المصدر إلى أن القائمة ستضم كلا من محافظ قنا اللواء عماد ميخائيل، والذى لاقى قرار تعيينه اعتراضات حادة واعتصامات من قبل المواطنين بالمحافظة، والتى أدت تلك الاحتجاجات إلى تجميد نشاطه لمدة ثلاثة أشهر وتكليف السكرتير العام بالقيام بأعمال المحافظ، فضلا عن أنه من الممكن أن تشمل القائمة أيضا كلا من، اللواء مبروك هندى، محافظ البحيرة، والدكتور عصام سالم محافظ الإسكندرية، وعددا من المحافظين الجدد الذين عجزوا فى التصدى للمشكلات فى المحافظة، مشيرا إلى أن الحركة المقبلة ستكون استجابة كبيرة لمطالب الثوار، والتى من الممكن أن تتضمن الحركة الجديدة بعض الأسماء التى يرشحها هؤلاء الثوار للمجلس العسكرى، وطالب بضرورة استبعاد جنرالات الشرطة فى الحركة المقبلة

[se_ Elsyed]

اللي لحد دلوقت مش قادر أفهمه حتى في عهد مبارك

هو أنتوا بتغيروا وزير وتجيبوا وزير بناء على إيه ؟

1- دمه مش خفيف على قلب رئيس الحكومة ؟

2- فاشل ... طب لما هو فاشل إختاروته على أنهي أساس ؟

3- لم ينفذ برنامج الحكومة .. اللي هو إيه لا مؤخذه ؟ أيوه يعني لما وزير بيتعين بيقول أنا هاعمل كذا وكذا وكذا وبعد فترة بيفشل ؟ طب ده في ناس مع عصام شرف ما كملتش شهر زي وزير الخارجية .. يبقى لحق يفشل إمتى ؟ وهل أي وزير بيبقى عنده خطة مستقبلية بيقدمها لرئيس الحكومة وبيتحاسب عليها ؟ ولا هو مجرد واحد بينفذ خطة من ناس أعلى منه ولا هو في إيده قرار وبيعمل اللي شايفه صح ؟

[لماضة مصرية جدا]

السلام عليكم و رحمة الله و بركاته

ثانيا يعجبني دايما في حضرتك نفسك الطويل في التحليل

يا طولة بالك يا استاذي...(وش حد حئوووود الصراحة)

تغيير وزاري ايه و محافظين ايه؟؟

هو انا اول ما سمعت ان رد فعل الحكومة هو "تغيير" قولت يا بنت يا لمضمض هما شالوا نظيف امتي؟؟؟

شالو الدو و حطوا شاهين

ربنا يوفقهم..و خليهم لاعبين

بسجل اعتراضي للمرة الواحدة بعد المليون ان دي مش طريقة ادارة "حكومة ثورة"

مافيش معايير تقييم اداء و لا معايير للتغيير

و مجرد تغيير وشوش من غير اي خطة واضحة الملامح

استمروا بقي

اولا: حمد لله علي سلامتك استاذنا و يا رب تكون اجازة سعيدة

فوتكم بعافية

كان معكم لماضة

(عايزة اسرح بعربية كبدة ملوثة....طالما العلم اللي بندرسه طلع لا يكيل بالبتنجان)

[se_ Elsyed]

الله يسلمك يا لماضة

إنتي هاترمضني في مصر ولا هاتقضيها نواشف في أم ظبي ؟

--------

شوفي يا لماضه وأنا باكلمك دلوقت زي بنتي الصغيرة

أنا مش عارف أو فاهم الكراسي بتعمل إيه في الناس !!!!!!!!!!!

يعني ناخد مثالين

عصام شرف ... أ ودكتور هندسة طرق وتخطيط وراجل قلب الأمارات دي رأساً على عقب خصوصاً في أبو ظبي وعمل شغل جامد في السعودية كمان ... لكن تيجي لحد عندنا ويقعد على كرسي الوزارة في مصر وتلاقيه بقى زي حامل الإبتدائية القديمة ومافيش فرق بينه وبين أي موظف حكومة بيروح الشغل الساعة 8 ويرجع بيته شايل البطيخة الساعة 2 الضهر

كذلك سمير رضوان وزير المالية ... عالم من علماء الإقتصاد وحاجه ما حصلتش وقعد على كرسي وزارة المالية منه وتلاقيه كرف على محمد الرزاز أو يوسف بطرس غالي المجرم الهارب

على فكرة أنا ما رضيتش أسخنكم على الراجل ده أول ما مسك الوزارة وبعدها بشهر تقريباً وفي أحد المؤتمرات سمعته قال جُملة أنا شخصياً حسيت إنها إهانة لكل مصري وإهانة لكل واحد ضحى بحياته عشان هو يقعد ويآنتخ على الكرسي . فقال رداً على مطالب الناس يتعديل الأجور خصوصاً الحد الأقصى .. قال " الشعب يُريد لبن العصفور " .. شوفتي الأستهزاء بالناس ؟ ومن واحد ما شوفناش منه إلا كلام ووعود وولولوه ولابس لنا طرحة سودا ومسود الدنيا في عيشتنا طول اليوم ...

أظن إن لبن العصفور دي تتقال على شعب مرفه عنده كل وسائل الراحة وبياكل مربى بالشقطة كل يوم ... ومع ذلك يطلب المزيد

لكن ناس طالع عين اللي جابوها لمدة 60 سنة وجت اللحظة اللي يتنفسوا فيها .. وييجي واحد يقول لهم كده ؟؟؟

هانقول العيب في المنظومة المحيطةت حتى بعد الثورة ... موافق ... طب لما هو كده قبلت على نفسك ليه تشتغل في منظومة زي دي ؟

هانقول إمكانيات ومشاكل متراكمة ... طب أومال إنت جاي المكان ده ليه مش عشان تصلح وتطور ولا عشان تقضي وقت ظريف وتحصل على لقب وزير إن شالله لو وزير سابق حتى ؟

[Simba]

كل ده واكتر وفيه ناس لسه بتقول الشباب بتعمل ايه في ميدان التحرير والسويس

كل ده وفيه ناس بتتهم الشباب بالتخوين والعمالة والبلطجة

وبيقولوا بيتاجروا بدم الشهداء وكانهم هياخدوا فلوس ويحطوها في جيبهم

للاسف حكومة الثورة لحد اللحظة لا تمثل الثورة

[الغريب]

كل ده واكتر وفيه ناس لسه بتقول الشباب بتعمل ايه في ميدان التحرير والسويس

كل ده وفيه ناس بتتهم الشباب بالتخوين والعمالة والبلطجة

وبيقولوا بيتاجروا بدم الشهداء وكانهم هياخدوا فلوس ويحطوها في جيبهم

للاسف حكومة الثورة لحد اللحظة لا تمثل الثورة

يا سيمبا الميدان ليس الثورة

الميدان الآن به سلبيات وسلبيات كثيرة ربما تؤثر على الثورة

الكلام كتر ممن هم داخل الميدان ، وممكن أكتبلك عشرات الأسطر حول هذه النقطة

[نورالعين]

فعلا حضرتك محلل رائع استاذ سي سيد

كلنا غير راضين

لكن مع كده لسه في ناس ضد الثوار!!!

لو اي حد خد باله من القنوات المصرية

سيلاحظ انها تنتقد الثوار فقط عندما تعلو الاصوات ضد الثوار فقط

وتكون معهم لما يكون هنااك تجمع على رأيهم

في العاشرة مساءا امس

استطاعت مكالمة تليفونية من لواء جيش

ان تربك منى االشاذلي

عندما انتقدها وقال كيف تقول هي وضيوفها ان العسكريين لا يفهموا بالسياسة وهم يدرسونها على أعلى مستوى بكلياتهم!!!

الظاهر انهم مش عايزين حروب ودفاع عن الوطن

والظاهر لعبة السياسة دخلت فعلا مزاجهم بجد

وربنا يستر

[سكر]

الا هو ايه مهنة المحافظ فى مصر

يعنى لما ابقى محافظ تبقى توصيفى للعمل ايه وايه مهامى

والله لحد دلوقتى معرفش الوظيفه دى بتعمل ايه فى مصر غير اصدار التراخيص

[hanzalah]

من أجمل ما قرات يا استاذ سين الاصيل

ويبعث على الملل والحزن أن نرى أقلام في منتدى رصين مثل المحاورات تكيل اتهامات عبيطه لكل ثائر

ياساده نحن امام ثورة لم تكتمل

لم تحصل على شيء حتى تاريخه

لم نقيم دعائم وأسس واضحة المعالم لأي شيء في حياتنا

اليوم مثل الامس تماما

نسخة بالكربون في كل شيء

الخطاب السياسي الاستعلائي

التعليم الهلامي الذي ينتج لنا مليون نصف امي سنويا

الصحة التي ادت الى وت احد الجرحي بحالة عفن سريري لشة الاهمال

الطرق ونزف الموت على الاسفلت كل صباح

الاعلام التافهة الذي يصرف ملايين جديدة من جيوبنا على مسلسلات رمضان القادم

القضاء الي لم يتطهر برغم ضغوط الاشراف من داخله وخارجه

لدرجة ان الطب الشرعي الخائن للأمانة لم يرحل الا بمليونية

كل شيء محتاج ضغط وضغط هائل من الشارع

هل الفمروض ان يظل الشعب المصري في حالة غليان وحرق دم وثورة لمدة سنتين تلاته

اين رؤية هؤلاء الذين يقودون دفة الامور في بلادنا طولا وعرضا

تشكيل وزاري مهتريء

ثم رفض تعديله مرتين من مجلس عسكري مهزوز ومتردد مثل عصام تمام

حركة محافظين كارثية لدرجة ان قنا لم يسأل احد عنها الا بعد خمسة ايام من الاعتصام وقطع الطريق وايقاف القطارات وحتى الان مشكلتها لم تحل

منتهى التخبط والعشوائية التي يراها كل كفيف

لكن لايراها حزب ربات البيوت

حزب كفاية كده ياولاد تعبتوا قلبي

حزب ماذا يريد هؤلاء الثوار الاشرار

حزب قوقوا نعم تدخلوا جنة ربكم بأمان

وكل من قال لا علماني ليبرالي متسلق ملحد مأواه دجهنم وبئس المصير

كنا في ظلم وظلمات

فاستبدلناها بظلم وظلام أفدح

ظلم النخبة التي تتصارع على تورته غير موجودة اصلا

وظلام حزب مثل الجماعة الاسلامية وعبود الزمر الذي تلمعه الفضائيات ويالسخرية القدر ..

بالامس يفجرني في قهوة التحرير بالقنابل

واليوم يفسقني ويصفني بعيال التحرير المتطرفين

وفي الاخير يظل الشعب المصري العظيم قابض على الجمر حتى يتحقق له مايريد

وكل من يراهن أن عقارب الزمن ستعود إلى الوراء

انصحه بقراءة كتاب كليلة ودمنه

[شرف الدين]

هو بالظبط زي ما قالت لماضة

شالوا الدو حطوا شاهين

يا جماعة العيب مش في الحكومة

نحن شعب غير منتج بكل أسف

هي دي الحقيقة

الحقيقة اللي اكتشفتها بعد اسبوع واحد بس من رحيل مبارك

حد فيكم فاكر الرسالة دي

" "من النهاردة دي بلدك أنت، ما ترميش زبالة، ما تكسرش إشارة، ما تدفعش رشوة، ما تزورش ورقة، اشتكي أي جهة تقصر في شغلها، ما تسمحش لضابط يعذب مصري زيك، أوعى تصنع مبارك تاني، خلي بلدك أجمل بيك" "

وكل واحد في مصر يسأل نفسه ... هل في حد لسه فاكر الرسالة دي أو بيعمل بيها ...

هل حد فيكم فاكر حملات تنظيف الشوارع وتلميع الأرصفة ؟

نحن لا ننتج إلا تحت الضغط والإجبار ... هي دي الحالة الوحيدة بس اللي بنبدع فيها ... وبيكون تصميمنا عالي جدا وإرادتنا تكسر الصخر

غير كده لأ.

قارنوا بينا كده وبين شعب اليابان اللي حصلت عنده في نفس توقيت الثورة تقريبا كارثة تسوماني .. الكارثة دي لو حصلت عندنا كانت وقعتنا 20 سنة

شعب اليابان من نفسه وبدون طلب أو توجيه زود ساعات العمل بتاعته من نفسه ... وبدون أجر إضافي.

الدكتور شرف من حوالي اسبوعين تقريبا طلع بيان وقال فيه " إننا نجحنا في ايقاف النزيف الاقتصادي "

طب هايل يا دكتور ... لما انت وقفت النزيف ... ده معناه ان فريق الجراحين اللي عندك فريق شاطر ...

طب لما هو فريق شاطر ... جاي دلوقت تبدله ليه ...

على العموم .. أدي أول وزارة مؤقتة مشيت ...

فاكرين وزرات ما قبل ثورة 52.

في النهاية اقتبس هذا الجزء من مقال للأستاذ فراج إسماعيل

وأخيرا نسأل الدكتور عصام شرف: كيف يطلب عبر صفحته على فيسبوك ترشيح وزارء لحكومته؟..!

إنها المرة الأولى في حكومات العالم، نسمع أو نرى ذلك. المفروض أن هناك مؤهلات معينة يتم على أساسها اختيار الوزراء وليس العواطف والأهواء والخوف من ميدان التحرير!

تم تعديل 13 يوليو 2011 بواسطة شرف الدين

[ابراهيم عبد العزيز]

اتفق مع الاخ سي السيد

فالقرارات من حكومة الثورة تأتي كرد فعل وتاتي نتيجة للضغط

وهو شىء لا يبشر بالخير ابدا

فالشىء الذي كان يعيبه الناس على نظام مبارك هو التحرك بدافع رد الفعل

وكنا نعيب عليه عدم وجود خطة عمل يتم التحرك على أساسها وهدف واضح ومحدد مطلوب الوصول اليه وبناء على هذه الخطة وهذا الهدف يتم تقويم الاداء أول بأولا واستبعاد العناصر التى لا تساير التطور وغير مندمجة مع الخطة الموضوعة ( سواء اكان ذلك بتعمد أو لضعف ومحدودية القدرات ) وهذه هى طريقة العمل الاداري المحترف الذى يؤدي الى النجاح لا محالة وهكذا تدار الدول الناجحة

وكنت ساكون فى قمة السعادة لو أن قرار التغير لبعض الوزاراء والمحافظين قد صدر قبل بدء الاضرابات والاعتصامات الاخيرة , كنت ساكون سعيد لو خرج رئيس الوزراء وقتها ليفاجىء الشعب ويقول ( قررت عزل فلان وفلان بعد تقيم الاداء الفترة الماضية ووجدتهم غير مسايرين لاهداف الثورة )

تم تعديل 13 يوليو 2011 بواسطة ابراهيم عبد العزيز

[hanzalah]

عززي الاستاذ شرف الدين

هو حضرتك تعيش داخل مصر أم خارجها

لان جلد الذات الواضح في نبرتك أعطاني فكرة انك خارج مصر

الحقيقة التي تراها عيني ان الناس من شعب مصر العظيم على نوعين

نوع خفيف

سريع الجذع والشكوى والتبرم

وسبحان الله في خلقه

هذا النوع لايمكن تغيير سلكوه ونظرته للأمور حتى لو بالطبل البلدي

وفيه نوع تاني - ونحمد الله انه الغالب - يغلب عليه المرونة

يمكنن التأثير فيه وتغيير قناعاته نحو الافضل

وبالتالي لا استطيع ان اكذب ماتراه عيني من تغيير حقيقي في سلوك - الكثير - من سكان مدينتي

وقوافل الرعاية الطبية و لجان التوظيف و الاطباء المتبرعين وشباب الجمعيات الذين ينظفون الشوارع وغير ذلك من الامثلة

هي مجرد نذر يسير من الايجابيات التي ارصدها يوميا

فهل تراني ابالغ

مش عارف

لكن بمناسبة اليابان لإاحب أقول لحضرتك ان اليابان بعد الحرب العاليمة كان بها 200 حزب

تغيير الشعوب وتبنيها قناعات ايجابية لايأتي بين ليلة وضحاها

ولم يكن مكوث نبي الله الخاتم ثلى الله عليه وسلم في مكة ثلاثة عشرة سنة يبني في العقول والارواح

من قبيل المصادفة

تحياتي

[شرف الدين]

هو بخصوص السؤال .. أنا فعلا خارج مصر دلوقت .. وده اللي خلاني أشوف الفرق الرهيب بين انتاج المصري في الخارج وانتاجه في الداخل .. واسأل حضرتك كده أي واحد شغال بره مصر تحت الضغط ... شوف انتاجه وعدد ساعات العمل بتاعته بتكون كام.. وقارنها بنفس الانتاج وعدد ساعات العمل جوه مصر.

تغيير الشعوب وتبنيها قناعات ايجابية لايأتي بين ليلة وضحاها

ولم يكن مكوث نبي الله الخاتم ثلى الله عليه وسلم في مكة ثلاثة عشرة سنة يبني في العقول والارواح

من قبيل المصادفة

تحياتي

وأما كلامك ده فهو إثبات لوجهة نظري ... إن العيب مش في الحكومة ... لأنه للأسف

تغير النظام ولم يتغير الشعب

الرسول مكث في مكة 13 سنة يبني في العقول والأرواح كما تقول أنت ..

حسنا ... فهل تغيرت عقول وأرواح المصريين بعد الثورة ؟ حتى يطالبوا بتغيير حكومة ما بعد الثورة ؟

[MZohairy]

إلى دعاة الإستقرار المستكينين .. إليكم ما أنجزناه فى خمسة أيام:

1. تطبيق علانية المحاكمات

2. تعديل وزارى لإقصاء الوزراء المغضوب عليهم من الشعب

3. إجراء حركة محافظين لإقصاء أعضاء لجنة السياسات ولواءات الشرطه

4.إقالة 750 قياده أمنية متورطه فى قتل الثوار

5. تعجيل محاكمات النظام الفاسد عن طريق تفريغ الدوائر التى ينظر فيها قضاياهم

ليست النهاية ....ولا محطة للوقوف ...بل هي البداية....والبقيه تأتى.............

منقول عن احمد سيف

[ابراهيم عبد العزيز]

الرسول مكث في مكة 13 سنة يبني في العقول والأرواح كما تقول أنت ..

حسنا ... فهل تغيرت عقول وأرواح المصريين بعد الثورة ؟ حتى يطالبوا بتغيير حكومة ما بعد الثورة ؟

استاذ شرف الدين

الأخ حنظلة يتكلم معك ان الرسول مكث 13 عاما ينبي العقول والاوراح وانت مصمم أن تقول ان الشعب المصري لم يتغير ( علما بان الثورة لم يمر عليها غير خمس أشهر !! ) ؟

يا أخي الرجل يتكلم معك فى سنوات وانت تتكلم معه فى أشهر ؟؟

العيب بالطبع ليس فى الشعب المصري فنفس هذا الشعب هو من صنع منجزات كثيرة عبر تاريخه , ولكن العيب فى ادارة البلد السابقة التى تعلم منها المواطن السلبية واللامبالاه والتواكل وتعلم السكوت ودفن الرأس فى الرمال عند رؤية الخطأ لانه لو تحدث فلن يغير شيئا بل ومن الممكن ان يندم على أنه حاول اصلاح الخطأ !!

[شرف الدين]

الرسول مكث في مكة 13 سنة يبني في العقول والأرواح كما تقول أنت ..

حسنا ... فهل تغيرت عقول وأرواح المصريين بعد الثورة ؟ حتى يطالبوا بتغيير حكومة ما بعد الثورة ؟

استاذ شرف الدين

الأخ حنظلة يتكلم معك ان الرسول مكث 13 عاما ينبي العقول والاوراح وانت مصمم أن تقول ان الشعب المصري لم يتغير ( علما بان الثورة لم يمر عليها غير خمس أشهر !! ) ؟

يا أخي الرجل يتكلم معك فى سنوات وانت تتكلم معه فى أشهر ؟؟

العيب بالطبع ليس فى الشعب المصري فنفس هذا الشعب هو من صنع منجزات كثيرة عبر تاريخه , ولكن العيب فى ادارة البلد السابقة التى تعلم منها المواطن السلبية واللامبالاه والتواكل وتعلم السكوت ودفن الرأس فى الرمال عند رؤية الخطأ لانه لو تحدث فلن يغير شيئا بل ومن الممكن ان يندم على أنه حاول اصلاح الخطأ !!

حسنا عزيزي ابراهيم ... أي أنك تقر بأنه لم يمر على الثورة إلا 5 أشهر فقط وهي غير كافية لتغيير الشعب ...

فلماذا إذن استكثرت هذه الفترة على الحكومة وقلت أنها لم تفعل شيئا وقلت أنها حكومة فاشلة ويجب أن ترحل ...

ألم يكن الشعار هذه المرة ( أنا لسه محستش بالتغيير، وعشان كده نازل التحرير ) .. سبحان الله .. لماذا لم تشعر بالتغيير إلا في جانب الحكومة فقط ؟ لماذا طلبت التغيير من العقل الذي يعطي إشارة العمل .. ولم تطلب التغيير من الذراع المتكاسل الذي ينفذ هذه الإشارة ويحولها لإنتاج.

شعب لم يغير من طباعه شيئا في 5 أشهر يطالب بتغيير حكومة ووزراء لم يمر عليهم أكثر من 4 أشهر.

وقد ضربت لك مثلا برسالة المحمول التي بعثت للملايين في مصر .. وقلت لك من يتذكرها حتى الآن .. ويعمل بها ؟

كالعادة سنحمل الإدارة السابقة العيب لأنها علمت المواطن كذا وكذا ... سبحان الله يا أخي ..

هل كان السارقون في عهد رسول الله ( وقد اضطررت لضرب المثل بالرسول صلى الله عليه وسلم الذي لا ينطق عن الهوى حتى لا نجد أي اعتراض ) .. هل كان هؤلاء السارقون أو الزناة أو غيرهم من المخطئين الذين كانت تطبق عليهم الحدود سواء في عهد الرسول أو في عهد خلفائه الراشدين .. هل تعلموا هذه الصفات من إداراتهم ؟

وعلى العموم .. ها هي ذي تغيرت الحكومة .. وتغير المحافظون .. وتغيرت قيادات الداخلية ..

فلننتظر ونرى كم سيكون عمر الحكومة الجديدة ..

والله من داخلي وبإخلاص أتمنى أن تكون أسعد حظا من سابقتها ..

وإنا لمنتظرون

تم تعديل 13 يوليو 2011 بواسطة شرف الدين