أخطاء تجنبها لإنجاح زواجك

[مغتربة]

اه فى نقطه كمان لازم نشدد عليها نسيت اذكرها فى المداخله الى فاتت

و هى ان البيت قبر اسراره

بمعنى ان البيت يكون القبر الى بيندفن فيه كل الى بيحصل فيه سواء حلو و لا مر

اكتر حاجه بتخرب البيوت نشر الاسرار و تدخيل اطراف اخرى ما بين الزوج و الزوجه

[Dreamwithme]

أيه الموضوع الجميل ده يا مصرية متغربة ....جزاك الله كل خير

بقالنا كتير مفتقدين المواضيع اللطيفة الانسانية اللي مفيهاش خلافات وفيها مساحة دفا حلوة ولذيذة

جريت الشلتة و جيت أهوه ولو أني ملقيتش اسمي في المدعوين زي لماضة كده بالضبط

لكن ماشي .....تسجيل متابعة واستمتاع شديد بكل المشاركات ....كل مشاركة فادتني فوق الوصف

وأكيد طبعا مش هأطيق أقعد ساكتة فلازم أقول كلام والكلام لازم يكون مفيد

بصوا يا جماعة أنا في رأيي الموضوع بيبدأ بدري بدري من الأول من النية ....كل واحد نيته أيه

يعني لازم كل واحد من الأول يحدد نيته بوضوح ويأخد قرار أن هدفه هو إنه يكون سعيد والطرف الآخر برضه يكون سعيد

لو الاثنين اتفقوا إن كل واحد هدفه اسعاد التاني أعتقد إن ربنا هيبارك في البيت وهيرزقهم السعادة فعلا

طبعا أنا عارفة إن ده كلام رومانسي ووارد جدا تقولوا عليه خايب لكن اعملكم أيه هو ده اللي عندي وهي دي أفكاري

لأني لسه مدخلتش أرض المعركة فطبيعي أبقي رومانسية :happy:

[عبير يونس]

خللوني أعلق على البنوتات الحلوات ريهام و دريم

يا جماعة مش لازم يكون في ايديكم دبل عشان تعطونا توقعاتكم

مغتربة حبيبتي

نقطة الاحتواء دي مهمة فعلا

بس للأسف فيها جزء مهارة

و الجزء الأكبر بيبقى توافق من عند ربنا

و التوافق يكون بنسب

في توافق جسدي

و توافق روحاني

و توافق عقلي

و نادرا ما يتحقق التوافق - إن وجد - على كل هذه الأصعدة بنفس القوة

و قد تتفاوت النسب

بينهم

فهناك من يهمهم التوافق الجسدي مثلا بالدرجة الأولى

فإن تحقق

فالزواج ناجح

و قد لا يكون هناك نفس نسبة النجاح في بقية الجوانب

الموضوع يخضع

لمتطلبات كل شخص من شريكه

و هذا يفسر

أن نفس الشخص قد يتوافق مع طرف آخر في علاقة جديدة

في جانب لم يتحقق له في العلاقة الأولى

و من المحبط جدا

أن يبحث الشخص عن مميزات الشريك القديم

في الشريك الجديد

و هو ما يسمى بالمقارنة

كمن يقارن زوجته الجديدة بالسابقة

و العكس

و تستقيم الحياة بوجود التوافق على كل الجوانب و لو بنسب صغيرة

أو متفاوتة

و بغياب أحدها تماما

قد تنهار العلاقة

[eslam elmasre]

في اعتقادي ان سر النجاح والاحتفاظ بالنجاح في أي علاقة زوجية هي عدم دخول طرف ثالث بين الزوجين عندما تواجههم مشكلة او خلاف

لان أي طرف ثالث سيتحيز لاحد الطرفين وسيشعل نار الخلاف وستزداد الهوة لكن عندما يتم علاج المشاكل بين الزوجين فاعتقد ان رصيدهما من العشرة الحسنة يسمح لهما بالتنازل والالتقاء في نقطة تلاقي يتنازل من خلالها الطرفان الي الوصول الي اتفاق علي انهاء الخلاف ( عن نفسي لا اسمح باي تدخل في حياتي العائلية حتي من حماتي او حمايا او امي او اختي حتي مجرد الاقتراح مرفوض وغير مقبول وزوجتي تعلم ان هذا الامر خط احمر لا يمكن تجاوزه باي صورة من الصور ومترسب في قناعاتها ان هذا الامر يغضبني جدا وسيمثل عائق امام تسوية أي خلاف )

ايضا من اسباب النجاح اري انه الاحترام المتبادل بين الطرفين واقصد بداية في ذلك الامر هو الزوج الذي يستطيع ان يفرض الاحترام علي الجميع ويستطيع ان يجعل من نفسه مسخة او عبرة في البيت ولا احد يستجيب لانه قدم كافة ما في جعبته حتي سوء الادب قدمه فلا يوجد اساليب اكثر من تلك الا واستخدمها فهو بذلك فقد احترامه وجعل العلاقة الزوجية هي علاقة ندية بين متحاربين لا متعاونين ( عن نفسي وحتي وانا في قمة غضبي وثورتي لا اسب زوجتي مطلقا وهذا مبدأ عندي )

اهم شيء يفسد العلاقة الزوجية هي بخل الرجل في بيته وعلي اولاده وزوجته ولا تستطيع غالبية النساء الصمود امام هذا العيب الجوهري فقد تصبر علي طول لسانه او قلة ادبه لكنها لا تصمد امام بخله الذي يحول حياتها الي جحيم لا يطاق

ايضا هناك شيء يساعد علي سلامة الحياة الزوجية وهي وجود اولاد بينهما فهذا الامر يساعد بدرجة كبيرة علي تقديم التنازلات والتضحيات ويعطي مزيدا من وقود الاستمرار في تلك الرحلة

هناك مؤشرات نستطيع من خلالها الحكم علي نجاح العلاقة الزوجية وهي مدى تأثير كلا الطرفين علي تلك العلاقة ومدى تأثر كلاهما بالاخر فعندما تجد زوجة سعيدة في زواجها تجدها تتكلم بكلام زوجها وبفكر زوجها وتجد الزوج ايضا يتأثر بزوجته وله ردود افعال اقتبسها من زوجته من مواقف مشابهة حتي انك عندما تشاهدهما لاول وهلة تشعر انهما اخوان وليس زوجان من كثرة تأثرهما ببعضهما البعض

هذه خلاصة تجربتي الزوجية وأأمل ان اكون افدكم بها

[ابوهنا]

هو الزواج حلو كده؟

الاخوه الزملاء ولاخوات الزميلات عايشن هنا فى كوكب الارض؟

يعنى متزوجين بشر

انا اسجل متابعه

تم تعديل 14 يوليو 2011 بواسطة ابوهنا

[م تيمور المراغي]

اتغلب بمزاجك مره

ومره

ومره

ثم انتصر !

- لماضة ميرسي اوي على لطفك وزوقك وان شاء الله اني حكون عند حسن ظن الجميع ,,

[بركة]

ان لم تكن من عادتك الابتسام فتعلمه فانه داء معدي ...صدقوني

[بركة]

الانسان السمعي ...الانسان البصري ...الانسان السمعي والبصري معا

ايهم انت وايهم هي ..........بس اتحلت جل المشاكل

خاطبوا الناس على قدر عقولهم

لو سمعي يبقى الكلام مهم ........

لو بصري يبقى الابتسامة مهمة.......

لو الاتنين يبقى كلام مع ابتسام مهما كان الموضوع ..... اكرر مهما كان الموضوع.

تم تعديل 15 يوليو 2011 بواسطة بركة

[م تيمور المراغي]

الزوجة بتتجنن لما بتكون بتحكي مشكله ما لزوجها وتلاقيه بيبتسم

بتحس انه مش متوحد معاها

معاك ان اغلب المشاكل بتبقى في منتهى الهبل

بس هي بتحس باطمئنان انك اخذت الموضوع على محمل الجد مع شوية تقطيب للحاجبين كمان بس متأفورش فيها عشان حتفقسك :happy:

[pink rose]

لقيت اختي بتكلمني بتقولي

ريمو احنا انضحك علينا في الجوازات دي

ليه يا بنتي في ايه كفا الله الشر

بتقولي زارتني واحدة صاحبتي و قالتلي ان لازم الزوج يوفر لزوجته واحدة تشتغل شغل البيت من مسح و طبخ و تنضيف و غسيل و الحاجات دي

و مهمة الزوجة الوحيدة الاهتمام بزوجها و تربية الاولاد بس

و لو هو ما جابلهاش اللي تشتغل دي يديها فلوس على المجهود الزيادة اللي بتعمله في البيت

عرفتي بقى اننا انضحك علينا؟؟؟

بس بقى و عنها مسكت ابو مريم قولتله الكلمتين دول

قالي و المطلوب يعني عاوزة شغالة ؟؟؟

قولتله ايون عاوزة شغالة

و عاوزة فلوس عن ال8 سنين اللي فاتوا

ههههههههههههههههه

يالا يا ريهام عيشي حياتك على هاذوها المبدأ

[عنبو]

اعتقد ان اهم شىء فى الزواج هو الجاذبيه بين الطرفين لابد ان يكون كل طرف عنده جاذبيه للطرف الاخر وكلما قلت الجاذبيه لابد لهما من اعادة شحنها والا فلن تنجح الحياه

اعرف ناس كتير قوى تزوجوا زواج تقليدى جدا زى اغلبنا يعنى ومع انهم سنهم صغير فى العشرينات ومع ذلك بدأوا يستعملوا مبدأ احنا عايشين مع بعض علشان خاطر العيال ( الحياه المميته ) فى وجهة نظرى فلماذا اعيش اذا كنت قد كتبت على حياتى النهايه

يتبع ....

عنبو

[م تيمور المراغي]

اعتقد ان اهم شىء فى الزواج هو الجاذبيه بين الطرفين لابد ان يكون كل طرف عنده جاذبيه للطرف الاخر وكلما قلت الجاذبيه لابد لهما من اعادة شحنها والا فلن تنجح الحياه

اعرف ناس كتير قوى تزوجوا زواج تقليدى جدا زى اغلبنا يعنى ومع انهم سنهم صغير فى العشرينات ومع ذلك بدأوا يستعملوا مبدأ احنا عايشين مع بعض علشان خاطر العيال ( الحياه المميته ) فى وجهة نظرى فلماذا اعيش اذا كنت قد كتبت على حياتى النهايه

يتبع ....

عنبو

وحياتك و لو اتجوزت هبه نور نفسها يا برنس

هما شهرين وحتبقى اختك وبنت حتتك وكفاءة :happy:

الرك ع الاصل والعشرة الطيبة

[عبير يونس]

مش عارفة ليه حسيت كل اللي علقوا

زي ما يكونوا كانوا مستنيين الفرصة عشان يطلعوا اللي جواهم

:P

ده يدل ان كلنا تعبانين على فكرة

أو معظمنا يعني

خلاص حأمشيها معظمنا

:closedeyes:

و اللي بنكتبه هنا هو اللي نفسنا يحصل

أو نفسنا نقوله للطرف الآخر

افتكرت غنوة نانسي عجرم

حاجات

حاجات تتحس

و ما بتتقالش

و لو جيت أطلبها

أنا ما أقدرش

و لو أنت عملتها بعد

أنا ما أطلبها

ما بينفعش

مقدرش أقول لك

شكل حياتنا اللي

أنا عايزاها

اعرف لوحدك

و المسكينة

بتتعذب و تتألم

و أخينا

و لا على باله

و عايش حياته

و مبتسم للحياة

:)

طب ايه حل المعضلة دي؟

في مثل جميل معبر جدا

" الحنية ما بتتشحتش"

بس عايزة أقول حاجة مهمة اوي برضه

هي مش عايزة تقول له

و عايزاه يعرف لوحده

و حاسة بالألم المستمر

فالنتيجة

إن اللي بيوصل له فعلا

هو الألم و بس

في حاجة اسمها قنوات للارسال و الاستقبال

عند كل واحد فينا

أحيانا بتبقى مشوشة

و مش مضبوطة على الموجة

و عشان الزوجين يحصل بينهم التوافق المنشود

لازم تكون القنوات مضبوطة على نفس الموجة

ده الهدف

لكن اللي الأخت نانسي بتحلم بيه

ده مجرد حُلم

و حيفضل حلم

و فرق كبير بين الحلم

و بين الهدف

و لأن قناة الإرسال عندها

مضبوطة على موجة الألم

و الشعور بالقهر

و الاهمال

فكل رسائلها الموجهة له

تحمل تلك المشاعر

فالنتيجة الطبيعية

مزيد

من الألم

و القهر

و الإهمال

المشكلة عندها هي كمان

مش عنده هو بس

هي رافضة تعلن احتياجها

حتى بينها و بين نفسها

و المفاجأة اللي يمكن هي متعرفهاش

إن الرفض من عندها أصلا

مش من عنده هو

سلوكه مجرد رد فعل

لرفضها إعلان احتياجها له

و احساسها انه هاملها

ليس إلا مبررات

لمزيد من الكبرياء

و النتيجة

مزيد من الرفض

و مزيد من رد الفعل الرافض

كل طرف عايز التاني هو اللي يحبه الأول

و بعدين يبقى هو يرد له الحب

و بكده

بيستنوا للأبد

[م تيمور المراغي]

رغم اطنان العقد اللي عندي والمساوئ التي تستحق ضرب السياط !

لكن حسنتي الوحيده اني بحط نفسي دايما مكان اللي بطلب منه اي حاجه ولو كوباية شاي من جرسون على قهوة بلدي !

[عنبو]

اعتقد ان اهم شىء فى الزواج هو الجاذبيه بين الطرفين لابد ان يكون كل طرف عنده جاذبيه للطرف الاخر وكلما قلت الجاذبيه لابد لهما من اعادة شحنها والا فلن تنجح الحياه

اعرف ناس كتير قوى تزوجوا زواج تقليدى جدا زى اغلبنا يعنى ومع انهم سنهم صغير فى العشرينات ومع ذلك بدأوا يستعملوا مبدأ احنا عايشين مع بعض علشان خاطر العيال ( الحياه المميته ) فى وجهة نظرى فلماذا اعيش اذا كنت قد كتبت على حياتى النهايه

يتبع ....

عنبو

وحياتك و لو اتجوزت هبه نور نفسها يا برنس

هما شهرين وحتبقى اختك وبنت حتتك وكفاءة :happy:

الرك ع الاصل والعشرة الطيبة

الجاذبيه اليى انا اقصدها يا تيمو ليست فى الجمال الجاذبيه فى الشخصيه عارف زى واحد صاحبك انت بتحب تقعد معاه وتتكلم معاه بدون ما تشعر بالملل مع ان ممكن صاحبك ميكنش جميل وممكن ميكنش غنى وممكن ميكنش متعلم اساسا بس فيه جاذبيه بينكم وبين بعض

نفس النظام بالنسبه للزوجه بعد الزواج بصير جمال المرأه شىء عادى بالنسبه للرجل او بمعنى اصح بيعتاد عليه وعلى رأى واحد خبره بيقول الجمال بصير للناس اليى بره مش ليك ولكن اليى ليك الشخصيه اليى هتعيش معها

انا لا اقصد الجمال يا تيمو انا اقصد جاذبية الشخصيه نفسها وطبعا الشكل له عامل ولكنه مش هو الاساس خالص

وعلى فكره كل واحد فينا بيتكلم عن شخصه لان كل واحد فينا له مدار بيدور فيه ممكن نتلاقى فى حزء معين ولكن اكيد هنختلف فى الباقى وهى دى طبيعة البشر الاختلاف يعنى فيه واحد الكلام اليى انا بقوله ده لا يعطيه اهتمام وهو بيبص للزواج على اساس ان واحده بتيجى تعيش معاه وتخدمه وتلبى احتياجته وخلاص وطالما لقى كده يبقى خلاص هو كده حقق اليى هو عاوزه وسعيد

اهم حاجه عاوز اقولها لكل شاب وكل فتاه اياك وحذارى تقدم على خطوبه ولا زواج الا لما تبقى واثق مليون بالميه ان هى دى الانسانه اليى انت بتدور عليها والا هتندم ندم كبير قووووووى

ما فائدة الحياه اذا كانت بلا روح لان اعيش عازب مدى الحياه خير لى ان اتزوج با مرأه لا اشعر معاه باى عاطفه

حاول تشوف الصوره كامله مش تبص للصوره من زاويه واحده بس وتحكم عليها فيه ناس بنشوفهم قدامنا ونظن انهم سعداء ويمكن نحسدهم على النعمه اليى هما فيها ولكن ما ان اقتربنا منهم حتى نجد ما يعصف بهذه الفكره من الاساس ويمكن نشفق عليهم كمان

لا تقدم على اى خطوة الزواج الا بعد التأكد من انك لقيت الانسان\ه اليى انت بتدور عليها

عنبو

[عنبو]

هى المواضيع الحلوه دى بتتفتح امتى و ازاى مبختش بالى منها

بس الحمد لله برضه لحقته

لانه لو فاتنى اكيد كنت هزعل

طيب نخش فى المفيد

بالنسبه ليا بشوف ان اهم حاجه و لكن للاسف كتير يهملوها و خلونى اتكلم هنا من وجهه نظر نسائيه يعنى نصايحى هتكون لبنات جنسى

هى فن احتواء الزوج

للاسف بنات كتير بتفتكر انها لما تكون نضيه قى بيتها و طباخه ماهره و بتراعى الاولاد يبقى خلاص هى كدا ادت الى عليها

صحيح كل دا مهم لكن فى الاهم فى دور الزوجه الاساسى

الاكل و التنضيف ممكن يستعيض فيهم عنها بالمطاعم و الخدامين الاولاد ممكن يوديهم دروس خصوصيه

كل الحاجات الى للاسف بتستغرق من الست المصريه جل وقتها و اغلب يومها فى ناس تانيه يقدر يعملوهالوا

لكن اهم دور و الى مش ممكن يلاقى حد تانى يدهوله كتير قوى بيتغفل عنه و بيتراجع فى قائمه اهتمام الستات ربما للاخر رغم انه لازم يكون فى المقدمه

و هو الاحتواء

اساس الزواج انم الزوجه تكون سكن زوجها الى بيرتاح فيه و تكون الملجا الامن الى بيلجا ليه علشان يخلص من كل تعبه و همه

انها تكون جنته البعيده الى اول ما يفكر يهرب من الدنيا يكون يهرب ليها

مش منها للاسف زى ما بنلاقى

البنات دلوقتى امهاتهم بتتفنن فى تعليمهم الطبخ و التنظيف و لكن مبيعلمهومش ابدا فن الاحتواء الزوجى

و الاحتواء برضه مش معناه فقط الاهتمام بالمظهر و القوام و العلاقه الخاصه و بس و ان كان دا جزء منه

لكن هو يعنى ببساطه ازاى اشبع عقل زوجى و روحه منى كما اشبع نظره و سمعه

اشباع العقول هو ما يحتاج لمهاره خاصه خصوصا مع مرور سنوات الزواج و تسرب الملل و الاعتياد

اخطر حاجه ان الزوج يتعود على زوجته فلا شيىء فيها يعود يدهشه

لازم تتعلمى ازاى تدهشيه و ازاى تملى عقله و قلبه طوال الوقت

الناس ساعات بتستغرب من واحد متزوج من زوجه دميمه او قبيحه و لكن طاير بيها و شايلها من على الارض شيل او ممكن تكون مهمله فى بيتها او طبيخها مش اد كدا لكن زوجها بيتمنلها الرضى ترضى و بيشوفوا برضه ازواج متزوجين ملكات جمال و بيخنوهم او متزوجين زوجات من النوع الى بيقولوا عليه قيداله صوابعها العشره شمع و بيتجوز عليها البعض بيكتفى بمصمصه شفيفه و يقول المثل الشهير حظ الخيابه قتايم و حظ العداله نايم

و البعض الاخر بيفهم ان اكيد هذه الزوجه رغم ان فيها عيوب لكن قدرت بذكائها تستميل قلب و عقل زوجها بحيث انه اصبح لا يوجد فيه مكان لاى شخص اخر فلا يرى غيرها و لا يستعذب الا صوتها و لا يانس الا بحديثها

دا محتاج مهاره خاصه و تدريب كبير على فقه الالولويات فى الحياه الزوجيه

لكن بالتصميم و الاراده اكيد هننجح فقط لو شعرنا باهميه الامر

الموضوع طويل و متشعب و ممكن يكون ليا عوده تانى علشان اتكلم باستفاضه اكتر

تسلم ايدك يا مدام مغتربه عن جد كلام من ذهب ولا يقدر بثمن

انا الشعار اليى رافعه الان لاختيار شريكة عمرى هو انا ابحث عن زوجه لا عن خادمه

تحياتى

عنبو

[عادل أبو عمر]

كماأنه لا توجد المدينة الفاضلة

لاأؤمن بوجود زواج مثالي ..

ولايوجد كتالوج للسعادة الزوجية

ولا يوجد زواج بدون أخطاء ... مش هكون مبالغ لو اقول إنها أخطاء يومية

و الشي بالشي يذكر فأعجب حاجة الواحد اكتشفها في تربية أولاده أنه عاوزهم صح مية في المية

مع إنه هو نفسه مش صح مية في المية في حياته مع أهله أو في شغله ولا حتى في عبادته للي خلقه

فإذا كان الانسان كتير بيبقى تعبان من نفسه من معصية أومن خطأ أو من تقصير في عمل..

يبقى إزاي نفس الانسان يفترض تكون الزوجة / الزوج هي الانسان الوحيد اللي مفروض يكون ملاك طول الوقت ...

بداية الحل ... الاعتراف بأن شريك حياتي مش ملاك .. ... هذه رقم 1

نحن بشر

و ربنا لما جمع أولي العزم عد لينا خمسة رسل عليهم أفضل الصلاة و السلام

و لما ذكر سيدنا آدم .. أبو البشر .. قال عنه .. و لم نجد له عزما ...

بمعنى أنه أخطأ ... الخطأ أنه عصى ربه .. و هو من هو .. من علمه الله عز و جل الأسماء كلها و أسجد له الملائكة

وفي الحديث . كل ابن آدم خطاء

بداية الحل ... الاعتراف بأن وقوع الخطأ طبيعي ... و لست مقصودا به لشخصك .. و لكن الخطأ سيحدث سيحدث ... هذه رقم 2

الرجل يحب بعينه .... المرأة تحب بأذنها ...

يبقى كل واحد يفهم التاني عاوز إيه منه يعملهوله عشان يحبه ... هذه رقم 3

من أروع ما سمعت عن الحياة الزوجية و طبائع الأزواج ... في حديث أم زرع .. رواه البخاري في (باب حسن المعاشرة مع الأهل).

من لم يسمعه لم يتعرف كيف كان الرسول صلى الله عليه و سلم كما قال ( خيركم خيركم لأهله و أنا خيركم لأهلي ) ...

ترى أعظم مثال عملي عرفته الدنيا في الانصات للسيدة عائشة تحكي له عن احدى عشرة إمرأة ...

الحديث رائع ولكن من المستحيل على حد فينا يفهمه بدون شرح لأنه من أعقد و أغرب الأحاديث في السنة ... لكن من فضل الله كان شرح الحديث هو أول ما استمعت و استمتعت به من فضيلة الشيخ أبو اسحاق الحويني ..

الدرس كان على شريطين و كانوا معايا في العربية كل ما أسافر أسمعهم ...

بعد كدة كنت بحب أسافر عشان أسمعهم

[hOuSsAm]

بمناسبة خطوبة زميلنا العزيز جدا حسام عبد الفتاح

ربنا يتمم له بألف خير يارب

حبيت نتناقش حوالين الحياة الزوجية

جزاكى الله كل خير مدام مصرية

وكل حد شارك فى الموضوع

ايوة كدة انزلوا بالموضوعات المهمة فى وقتها :)

قبل معلق عالموضوع عجبتنى اوى كلام استاذة مغتربة فى الحتة دى

الاحتواء برضه مش معناه فقط الاهتمام بالمظهر و القوام و العلاقه الخاصه و بس و ان كان دا جزء منه

لكن هو يعنى ببساطه ازاى اشبع عقل زوجى و روحه منى كما اشبع نظره و سمعه

اشباع العقول هو ما يحتاج لمهاره خاصه خصوصا مع مرور سنوات الزواج و تسرب الملل و الاعتياد

اخطر حاجه ان الزوج يتعود على زوجته فلا شيىء فيها يعود يدهشه

لازم تتعلمى ازاى تدهشيه و ازاى تملى عقله و قلبه طوال الوقت

النوع ده من الاشباع مهم جدا وللاسف ناس كتيرة فى مجتمعنا مش فاهماه ومش فاهمة اهميته وعن نفسى باعتقد انه مهم كاهمية الاكل والشرب

----------------

بالنسبة لى ارى ان نجاح مشروع الزواج يبدا من احترام الانسان لذاته ومعرفته جيدا لمقوماته الشخصية (يعنى بالبلدى يعرف هو ايه وعايز ايه) سواء البنت او الولد

لو كل واحد حدد لنفسه هو عايز ايه بالظبط واختار بناء على هذا الاساس مش مجرد حد بيتقدملى او فتاة اشوفها اعجب بيها

ولكن الاختيار بناء على مبدا التكافؤ

ده عامل مهم جدا جدا من عوامل النجاح

من وجهة نظرى ايضا ان كل الناس خير وبركة وكلهم كويسين ولكن هذا لا يعنى ان كل الناس يناسب بعضهم بعض فقد ما يعجب تيمور لا يعجبنى او لا يناسبنى بالرغم من مناسبته لتيمور وهذا ليس تقيلا او تكبيرا منى او من تيمور ولكن لكل واحد شخصيته المستقلة والمختلفة عن الاخر

------------------

الشئ الاخر وهو توفيق ربنا وبالنسبة لى ياتى فى المرتبة الاولى

(الطيبون للطيبات والخبيثون للخبيثات)

ومقتنع جدا بالمثل ده الطيور على اشكالها تقع ....... ماشاء الله كتير اوى بشوف زوجات وازواج شكل بعض كهيئة وكتصرفات وكلام وافعال

-----------------

ياتى بعد دعاء ربنا وتحديد ملامح او صفات الانسان الذى قد يتفق معى او لا يتفق معى - معرفة حاجة مهمة جدا الا وهى ان مفيش حد كامل على وجه الارض ولا حتى انت وبالتالى فلابد من وضع اولويات وترتيب عند اختيار شريك او شريكة الحياة

من الاخر محدش هيلاقى ملاك او هيلاقى كل الصفات المتميزة فى شخص واحد ولكن قد نرى كل الصفات التى اريدها والتى تهمنى كضروريات فى نفس الشخص وقد اجد عيوبا ولكنى لا انزعج منهااو لا تهمنى فى حياتى - (وممكن متلقيش عيوب عالاطلاق وده يبقى رزق بنا وحسن نيتك :) )

------------------

ياتى بعد ذلك صلاة الاستخارة واللى تكمن اهميتها ايضا فى تيسير الامور واتمام المواضيع على خير

------------------

وبعد ذلك ياتى وضع الدستور والمبادئ الاساسية التى سوف يتم التعامل بناء عليها..........

هقف عند الشوية دول وهكمل باذن الله فى مداخلة اخرى فى وقت لاحق

تحياتى للجميع

[لماضة مصرية جدا]

السلام عليكم و رحمة الله و بركاته

عارفني انا اول ما دخلت التوبيك هنا

كان نفسي اسمع من كابلز

يعني خطيب و خطيبته...(و لو اني مش بصدق كلام الخطوبة اوي يعني)

او مثلا راجل و مراته مر علي جوازهم 15 سنة مثلا و لسه كل ما بتشوفه عينيها بتلمع او لسه هو بيصر يمسك ايديها و يعديها الشارع(ده غير حنفي و فوزية طبعا في مسرحية سك علي بناتك)

استاذة مصرية متغربة لفتت نظري و استاذ أبو هنا

ان احنا زي ما نكون بنكلم يا نفسنا يا حد تاني....(اللي هو لسه هيتجوز مثلا)

بس فيه حد مهم اوي في المعادلة لازم نتكلم معاه

هو شريك....شريكة حياتك

اقتراح

ليه مش بتكتبوا لبعض قصاقيص ورق

كلمات بسيطة مش حب و كده

لا كلمات "انا عايزة منك.....كذا.....غير طلبات البيت طبعا)

و انا عاوز منك كذا

اعملوا صندقو بوسطة في بيوتكم....(اي كرتونة صغنتتة و زوقها بورق ملون)

و سموه بوسطة بيتنا

ابعتوا لبعض رسايل

منها اللي ممكن يكون حاجة لذيذة

حاجة شقية

اسف

عتاب

دعوة علي العشا في الفرندة و نفرش حصرية في البلكونة و نقعد عليها

حاجة صغنتتة اوي

ليه مش بنحاول نكتشف الطرف التاني بطريقة جديدة

بنمل

بنبقي فاهمين ان احنا خلاص فهمنا بعض

بالعكس

مش يمكن ده ادعي ان احنا نكسر الملل ده ان نعيد اكشتاف كؤوس الكريستال المتشالة في اقرب الناس لينا

مثال علش الهامش

انا بحب بابا جدا

بس اكتشفت بطريق الصدفة انه بيحب الكتابة و الشعر...(علي عمري ده...مكنتش اعرف...علي عمري ده كنت فاكرة اني عارفة بابا حبيبي زي كف ايدي...علي عمري ده كنت بحبه كده و خلاص)

و اكتشفت ان دايما فيه حاجة لسه مستخبية جوه اقرب الناس لينا

بس احنا مش بنحاول نكشتفها

اتواصلوا

اعملوا بوسطة....لاقرب الناس

عودوا ولادكم انهم يحسوا ان البيت فيه دفا...بتاع بابا و ماما

هيفرق كتير

مساكم.....بوسطة....بوسطة.....بوسطة

حقوق ملكية الفكرة

للماضة و (فولان)....بس كنا عملناها مرة علي شكل صندوق المصالحة...اللي يزعل التاني يحط جنيه و اخر الاسبوع ناخد كل الفلوس و نتصدق بيها...و طبعا مش عايزة اقولكم اد ايه الصندوق ده استنزف مني كل مواريد يالمالية مع اني كائن مسالم جدا... :closedeyes:

و دي كانت نهاية فرقة عوكاشة المسرحية

هو راح في حال سبيله ربنا يسعده

و انا اخدت الفكرة و ناوية اكمل بيها في حياتي

مساكم

سعاااااااااادة التفاصيل

[لماضة مصرية جدا]

و البعض الاخر بيفهم ان اكيد هذه الزوجه رغم ان فيها عيوب لكن قدرت بذكائها تستميل قلب و عقل زوجها بحيث انه اصبح لا يوجد فيه مكان لاى شخص اخر فلا يرى غيرها و لا يستعذب الا صوتها و لا يانس الا بحديثها

دا محتاج مهاره خاصه و تدريب كبير على فقه الالولويات فى الحياه الزوجيه

لكن بالتصميم و الاراده اكيد هننجح فقط لو شعرنا باهميه الامر

الموضوع طويل و متشعب و ممكن يكون ليا عوده تانى علشان اتكلم باستفاضه اكتر

الله يسعدك يا رب يا مغتربة

ده لازم يبقي ليكي عودةو عودة و عودة...يا اما هنبعت اتنين خفر من الصعيد يجبوكي ظبط و احضار....(و انتي عارفاهم عندك في قطر كويس :)

مستنية اتعلم معاكي حاجات كتير زي ما دايما بتفتحيلي نوافذ في الدماغ مكنتش فكرت فيها من قبل

مستنياكي

و ربنا يملي حياتك سعادة تليق بقلبك و عقلك

تم تعديل 15 يوليو 2011 بواسطة لماضة مصرية جدا