الإصلاح والتطوير .. بأستخدام أساليب الفن الجميل

[se_ Elsyed]

زمان وأنا صغير قرأت حكاية عن أحد عُمد مدينة نيويورك اللي بيقع فيها حي هارلم الشهير بإنه بؤرة إجرام .... الراجل لما تولى الأمر كانت هناك أحياء كثيرة بتعاني نفس المشاكل .. إجرام .. قبح .. عشوائية .. بطالة .. و و و و

فأول حاجه عملها إنها اعاد طلاء كثير من مباني الأحياء دي .. وابتدى يضع لمسات فنية وجمالية في المدينة ...

بالتأكيد فكرة زي دي مش هاتبقى مُكلفة ... وبالتأكيد هي فكرة حالمة ولن تقضي على المشاكل بين يوم وليلة .. لكن على الأقل هاتؤدي إلى إحساس الناس بقيمة مكانهم ... وإلى تغيير نفسية وسلوكيات الناس

ففرق كبير إني أعيش في مكان عشوائي وكل ما حولي قبيح ومنفر ... وبين إني أعيش في نفس المكان وعندي مشاكل أينعم .. لكن على الأقل في جانب واحد مُشرق ...

أرجو أن نقرأ ما جاء في جريدة المصري اليوم

إمبابة تتجمل: ٥٠ فناناً يرسمون «حكاية جدار» فى شارع الشهيد

كتب هبة عبدالحميد ١٩/ ٧/ ٢٠١١

أطفال المنطقة وأهلها يتابعون حملة التجميل التى غيرت من معالمها

لأن منطقتهم ارتبطت فى أذهان النظام السابق وقياداته بالعنف والعشوائية، قرر أهالى إمبابة، تحديداً فى منطقة عزبة الصعايدة، تجميل جدران شارع شهيد الثورة محمد نصر عبدالعظيم أو «سيد عبيد» سابقاً، برسوم الفن التشكيلى، لتغيير مفهوم العشوائية والطائفية المأخوذ عن المكان، وشارك فى المشروع الذى أطلقوا عليه «حكاية جدار» ١٤٠ بيتاً.

هنا فى المنطقة التى تحيطها الأسوار من ثلاثة اتجاهات عاش سكان المنطقة فى حالة نفسية سيئة، لشعورهم بأنهم محبوسون خلف أسوار المصانع والسكة الحديد، كما أنهم مطاردون من رجال الشرطة باعتبارهم سكان العشوائيات.. أسامة عبدالحق، أحد سكان المنطقة هو صاحب فكرة تجميل الشارع: «كانت البداية عقب أحداث حرق الكنيسة بإمبابة والتى استغلها الكثيرون لإشاعة الفتنة الطائفية والتحدث عن وجود تيارات دينية فى عشوائيات إمبابة لتشويه صورة مصر وعدم استقرارها».

وأضاف: «عملنا اجتماعا عاجلا فى الحارة وخرجنا منه بقرار عمل مشروع تكافل اجتماعى لسكان الشارع، عن طريق جمع جنيه واحد من كل شقة كل شهر، للمساهمة فى جمع رواتب شهرية لكبار السن وتزويج الفتيات غير القادرات، وسيتم إنشاء مشروع لتشغيل شباب الحارة، كما اشترينا سلالاً للقمامة ووضعناها أمام كل بيت ليس لسكان الشارع بل لإجبار المارين فى الشارع على عدم إلقاء القمامة على الأرض.

أما مشروع «حكاية جدار» أو الرسم على جدران الشارع فجاء نتيجة معرفة أسامة بأحد الفنانين التشكيليين الذى وجد فى المشروع منفعة عامة وسلاحا ذا حدين، الأول هو تجميل وتنظيف الشارع بالرسوم التشكيلية، والثانى هو أن معظم الفنانين التشكيليين يحلمون بخروج أعمالهم من المرسم إلى الواقع.

وقال: «اشترك فى رسم حوائط الشارع أكثر من ٥٠ فناناً من ائتلاف شباب التشكيليين فى مدة حوالى شهر، رسموا أشكالاً مختلفة من واقع كل بيت، فالمسجد مثلاً كتبوا عليه لفظ الجلالة، والبيوت رسموا عليها حياة أهلها سواء صعايدة أو نوبيون، كما رسموا صورة الشهيد محمد نصر على جدار بيته، وهناك أيضاً «زريبة» فى الشارع رسموا على جدارنها جاموساً وأبقاراً، واستخدموا كل ما لديهم من رسومات تعبيرية وتجريدية لتحكى الرسوم عن الحارة، بعدها وقعوا جميعاً على حائط فى آخر الشارع».

وتابع: «كل بيت فى الحارة شارك فى العمل بالمياه والأكل والمساعدات، حتى الأطفال كان لهم دور كبير بدأ من حراسة الألوان والفرش وصرفها من المخازن، وتنظيف الحوائط من الأتربة، والرسم والتلوين، وهناك حائط خاص فى الشارع رسمه الأطفال بأيديهم الصغيرة».

محمود حمادة «١٢ عاماً» أحد الأطفال الذين شاركوا فى الرسم قال: «أنا فخور بأنى من شارع الشهيد من إمبابة وأول حاجة هعملها بعد ما أدخل المدرسة هرسم لوحة حائط فيها شارعنا بعد تجميله، وده لأننا اشتركنا مع الرسامين فى رسم حوائط الشارع، كانوا بيحطولنا الخطوط العريضة ويتركولنا التلوين، الحمد لله كان الرسم بعد الامتحانات، كنا بنرسم ٣ مرات فى الأسبوع ٦ ساعات فى اليوم، وكل ما نتعب كنا بنريح شوية وبعدين نشتغل تانى».

لم تكن تلك هى المحطة الأخيرة لـ«حكاية جدار»، حيث قرر أسامة وفريق العمل من الرسامين التشكيليين أن يسافروا إلى جميع محافظات ومناطق مصر العشوائية لتجميلها وتغيير صورة مصر أمام العالم كله.

[se_ Elsyed]

ودي حاجه من اللي بأستغرب لها وأرى أنه لا أمل في الإصلاح في ظل وجود عقلبات متحجرة - حتى بعد الثورة - زي اللي موجودة دلوقت دي ...

لأن في حاجه بسيطة تخلي الناس تشعر بالامل في بكره . وغير مُكلفة بالمرة .... لكنها العقول التي تحتاج ثورة أخرى

على سبيل المثال ...

بقى لي أكتر من 5 سنوات باكتب عن وزارة عندنا إسمها " وزارة البيئة " ويتولاها المهندس ماجد جورج . قولت قبل ذلك وعلى بلاطة إن مبارك عينه عشان مسيحي وعشان يرضي المسيحيين والدليل إن من أول الوزارة ما أستُحدثت وهما بيختاروا لها المسيحيين .. لإن قبله كانت الوزيرة النشيطة منى مكرم عبيد اللي فعلاً أخدت قرارات جريئة وكان من أهمها محاربتها ومطاردتها لأصحاب المصانع اللي بيرموا مخلفاتهم وخصوصاً الكيميائية في النيل .. عشان كده ركبت الطفطف بدري بدري وما كملتش في الوزراة لإنها بتعمل ضد مصلحة البلد ههههههه

.. وحاجه زي دي هي أصلاً إساءه للمسيحيين قبل أن تكون إسترضاء لهم .. لإن أي مسيحي وطني محترم مش هايقبل إن يكون الوزير اللي بينتمي إلى عقيدته عبارة عن كيس جوافه ومالوش لازمه .

وأي مسيحي لما يتخنق بالسحابة السودا اللي بتزورنا في نفس الميعاد كل سنة بشكل منتظم وتظبط عليها ساعتك .. مش هايقول : أنا هاستحمل عشان وزير البيئة مسيحي ..

وأي مسيحي محترم لا يرضى بأسلوب المحاصصة أو الكوته أو حاجات ضد الدولة المدنية اللي الكل فيها سواسية والكفاءة والعدل هما المعياران اللي بيحكما الناس

أيوه أعترف إن المنظومة كلها فاشلة ... لكن فشل عن فشل يفرق

يعني ... لو إتكلمنا عن وزارة الزراعة أو الصناعة .. هانقول إنها محتاجه موارد وروؤس أموال وأسواق وعمالة ومش عارف إيه

لكن نيجي على حاجه المفروض إنها بتخاطب الروح والنفس والجمال والقيم زي وزارة البيئة ... وزير يا جماعة بقى له أكتر من 5 سنين لا نسمع عن مهامة إيه أو إنجازاته إيه أو حتى مساهمته في علاج مشاكل البيئية اللي مخليه بلدنا متصدرة معدلات التلوث والضجيج على مستوى العالم كله

وزير بيشوف بيعنه وبيتخنق زينا من السحابة السودا الناتجة عن حرق قش الرز كل عام ... ومع ذلك لسه عايش في العصور الوسطى وإتمطع وأتنطط وعرق الرجولة نطر في قفاه والأسبوع اللي فات صرح وقال " غرامة 2000 ج على أي فلاح يحرق قش الرز في أرضه " ... يا واد يا جامد ...

متشكرين يا معالي الوزير .... صباح الوزير يا سعادة الخير

وزير بيمشي في الشوارع ... ده المفروض ... وبيشوف أكوام القمامة الملقاة في أعتى أحياء مصر .. ومع ذلك كإنه مش هنا ...

وزير تتغير الوزرات وتروح وتيجي وهو تحس إنه كرسي مرمي مثلاً ماحدش بيبص له ولا بيقول الجدع ده بيعمل إيه

بلد عجيبة ومسئولين عاوزين ثورة نركب لهم جزم قديمة بدل دماغتهم دي يمكن تتعدل بصراحة

[Diab]

ياأيّها الشّاكي وما بك داء كيف تغدو اذا غدوت عليلا؟

انّ شرّ الجناة في الأرض نفس تتوقّى، قبل الرّحيل ، الرّحيلا

وترى الشّوك في الورود ، وتعمى أن ترى فوقها النّدى إكليلا

هو عبء على الحياة ثقيل من يظنّ الحياة عبئا ثقيلا

والذي نفسه بغير جمال لا يرى في الوجود شيئا جميلا

شكرا يا أحمد علي التفاؤول ده

[se_ Elsyed]

يا دبدوب الحياة سهلة وبسيطة .. والأصلاح أسهل وابسط ... بس النفس والعجول اللي تفكر

إقرا الخبر ده كمان كده وقول لي رأيك

النيابة تحقق فى تلوث النيل وتبوير الأراضى الزراعية بقنا

الثلاثاء، 19 يوليو 2011 - 09:03

محافظ قنا السابق مجدى أيوب

كتب أحمد متولى

بدأت نيابة قوص الكلية تحقيقاتها فى اتهام محافظ قنا السابق مجدى أيوب، والدكتور محمود أبو زيد، وزير الرى والموارد المائية الأسبق، والدكتور محمد نصر الدين علام، وزير الرى السابق، ورئيس مجلس إدارة شركة قنا لصناعة الورق، بالتسبب فى تبوير أراض زراعة، وإصابة مواطنين بقنا بالفشل الكلوى والالتهاب الكبدى الوبائى عن طريق تلوث مياه نهر النيل.

مش ملاحظ حاجه ؟

إن ما حدش جاب سيرة وزارة البيئة اللي المفروض من مهامها الرقابة على تلك المصانع الي بلتوث النيل

إنت عارف إن من أكثر من 4000 سنة المصري القديم وضع زي دستور كده للدولة كان من ضمن المحرمات والكبائر اللي فيه هي جريمة " تلويث مياه النيل " وأهو كان كبيرهم قوي أيامها إنهم ياخدوا الشاور بتاع الصبح في الترعة أو يرموا فيه حيوان ميت .. يعني لا كان في مصانع كيماوية .. ولا منظر لن أنساه ما حييت ويا ريتني مشيت على الطريق الزراعي الأجازة دي عشان أصور لكم مصانع أسمدة منطقة أبوزعبل الملاصقة للسجين الشهير ...

شيء لن ترى مثله في حياتك

منطقة كاملة يعيش فيها الاف السكان ده غير اللي شغالين في المصانع .. والمزراع وهي مشهورة بزراعة التين الشوكي .. المنطقة كلها صفرررررررررررررررررررا وغباررررررررررررر وفي عز الضهر ما تشوفش صوابعك وده من الكيماويات اللي في الجو وخصوصاً الكبريت

دي صور لقيتها على النت لكن مش زي الحقيقة بصراحة لكن بأقرب لكم المنظر والواقع المر هناك

شوف المياه بتاعت الري كويس شكلها ولونها إزاي

كل المزروعات اللي هناك شوفتها مكسوه بالاتربة والغبار الكيميائي زي دي كده

خُد المفاجأة بقى .. عارف المصانع اللي هناك دي واللي كانت ملك للدولة .. مين اللي وقعها وأشتراها برخص التراب ؟

ههههههههههههههههههههههههههه وزير الصحة السابق المجرم حاتم الجبلي وأخوه شريف الجبلي

[se_ Elsyed]

صباح البيئة يا وزير يا بيئة

ده شوفته هناك بقى وماحدش قال لي

تخيلوا الخبر ده من 2007... عشان ماحدش يتهم الثورة وحالة الغليان والتجاوزات من قطع الطرق اللي بيقوم بها بعض الناس

أهالي أبوزعبل يهددون بقطع طريق «القاهرة ـ الإسماعيلية» احتجاجًا علي مخالفات مصنع للأسمدة

محمد محمود خليل ٧/ ٩/ ٢٠٠٧

هدد المئات من أهالي قرية «أبوزعبل» في القليوبية أمس بالاعتصام وقطع طريق «القاهرة ـ الإسماعيلية» الزراعي، احتجاجا علي إصابة بعضهم بأمراض صدرية، وتدمير نحو ٣ آلاف فدان من الأراضي الزراعية في عزبة «إبراهيم باشا شكري» ونفوق المئات من الماشية، بسبب مخلفات مصنع الأسمدة الملوثة للبيئة.

إبراهيم شُكري ده هو رئيس حزب العمل السابق الله يرحمه ... واللي إتنازل عن ممتلكاته للدولة وكان رجلاً بحق

[الغريب]

جزاك الله خير يا سي السيد

بصراحة موضوعك عن علامة تقدم الدول ورقي شعوبها

تلمس هذا الإهتمام في الدول المحترمة فتجد أن بريطانيا والولايات المتحدة يشترطان في مناقصات تاكسي مدينة لندن ونيويورك أن يكون صديق للبيئة ولا يسبب مزيد من العوادم والتلوث

نجد أن المستشارة الألمانية وعدت بالتخلص من آخر مفاعل نووي بألمانيا بحلول 2022

أستشعر أن قضية البيئة والجمال أصبحت أساسيات في دول محترمة وأصبحت مجرد مظهر ترف تنفيذي في دول أخرى

يعني أنا متوقع أن وزير البيئة المصري مثلا لا يستشعر مكانة وزارته وأهميتها في الدولة ويعتبر أن مجهودات وزارته محمودة للغاية في الوضع الحالي للبلد

ربما كنا نتقبل هذا الهراء قبل الثورة ، ولكن بعدها فعلا نحن نحتاج لمثل هذه المجهودات وأن تعمل هذه الوزارة بجد وتنظر لأهمية دورها بجدية

لازم يكون للوزارة سيادة على المحافظات وأشكال القمامة بها والمصانع المخالفة والمواصلات العامة الملوثة للبيئة

[se_ Elsyed]

أصبت كبد الحقيقة يا غريب عندما قلت

وأصبحت مجرد مظهر ترف تنفيذي في دول أخرى

دي كارثة

لما نتربى وإحنا صغيرين على مفاهيم مثل " يا عم دي ناس معدتها تهضم الزلط " ثم نفاجأ بإننا نحتل المركز الأول في الإصابات بالكبد الوبائي .. والفشل الكلوي والسرطان و و و و

وتكتظ المستشفيات بالمرضى حتى الأطفال الرُضع منهم ونرصد ميزانيات ضخمه عشان نلاحق على ده كله في حين إننا بأبسط الإمكانيات ممكن نمنع ده من البداية بفضل الله

وده ليه ... لإن لا عندنا وعي بيئي ولا ناس قلبها على الشعب وسايبه الدنيا تضرب تقلب وكل واحد بيعمل اللي هو عاوزه

وشوف لن أقتنع أبداً إن الفرق بيننا وبين الدول المتقدمة هي الإمكانيات وحدها ..

فالدول المتقدمة لا تفرض ضرائب أو إتاوات على الشعب عشان النظافة ... ومع ذلك الشوارع والدنيا بتبرق عندهم

وكما قلت إن عندنا طوفان فلوس وإتاوات شهرية ... ومع ذلك الشوارع من اقذر ما يكون ...

العجيب بقى عندنا فرص مازالت قائمة إننا نكسب ونبقى دولة متقدمة .. تخيل من إيه ؟

من موضوع تلوث البيئة ... شوفت المصيبة

يعني أوروبا كلها دلوت حظرت وجود مصانع أسمنت أو أسمدة أو حتى تخيل مزارع دواجن على القارة الأوروبية كلها ... لإنا صناعت ملوثة للبيئة .. بالإضافة إلى إنه الأسمنت والأسمدة تعتبر مصانع مستهلكة للطاقة بشكل كبير

أما أحنا فعندنا الصحرا واسعة ...

طب يا أصحاب العقول ... بدل ما نصدر الغاز لإسرائيل وأهو ببلاش عندنا .. ما تعمل مناقصات عالمية وترمي أم المصانع دي في الصحرا وتجيب العالم كله يستثمر عندنا ونبقى مصدر تصدير لصناعات العالم والقارات كلها لا يُمكن أن تستغنى عنها ... فأعمل مناطق صناعية عندك على الورق فقط وهما يبنوا ويستثمروا وتعمل كيانات ومناطق صناعية وسكانية و و و و و و ... ووفر لهم الغاز والطاقة أنت بس ... وكله على قفا الزبون

يبقى هانشغل ملايين الناس .. ونعمر الصحرا كلها ... ونصدر ونجيب عُملة صعبة

بدل ما تروح حلوان تلاقي كمية تلوث عندنا مالهاش حل وشم يا عم

حلوان اللي شخص واحد سبق عصره وأختارها كأنظف وأنقى مكان في مصر وهو سيدنا عمر إبن عبد العزيز عشان تكون عاصمة للحكم بمصر

دلوقت أحلى مصانع أسمنت وحديد وحاجه أخر زفت

وعندك شبرا نفسها اللي في قلب القاهرة الكبرى .... مش ممكن على كمية المصانع دي

ده يا راجل بتلاقي حارة صغيرة مليانة سكان ومع ذلك تلاقي كمية ورش وقلة أدب وتلوث مالهمش حل ...

لكن أرجع واقول إننا محتاجين تغيير شامل في عقولنا والعقول الحاكمة بالذات

وأهم تغيير لازم يبقى في غرس فكرة " العمل الجماعي والتحرك ككتلة واحدة نحو تحقيق الأهداف "

يعني وزارة البيئة دي مثلاً لازم تعمل ضمن منظرمة " وزارة الثقافة .. وزارة الأعلام ... ومعاهد وكليات الفنون الجميلة ... والمحليات .. والمحافظات . ووزارة الداخلية "

عشان تبقى قرارتها ملزمة ... ومش قرارات بطش .. لأ لأ .. دي قرارات في مصلحة الناس ونخليهم يلمسوها بأنفسهم

قول لي بالله عليك ... اللي راح محافظة الأسكندرية خلال فترة عبد السلام المحجوب اللي كانت نقطة تُحسب له .. وشاف معظم الشارع والميادين والجدران والأسوار . كلها عبارة عن أعمال فنية ونحت ورسم ولوح فنية وحاجه تشرح القلب وخلى بتوع الفنون الجميلة هناك يشتغلوا ويرسموا وينطلقوا عشان يخلوا كل حاجه جميلة وبتنطق ... إيه كلفنا كام ده كله وهل كان له ميزانية بالمليارات أم أنها مساهمات من ناس عندها حس فني عاوزه توصله للناس عشان يغيروا حياتهم ؟

وليه بنشكتي ليل نهار من العشوائيات وإحنا حاطين إيدنا على خدنا وبنولول ؟ أنا مشفق والله على عمرو خالد ومشورعه تطوير العشوائيات .. لإن اللي بتطوره النهاردة بيطلع بداله مئات يومياً .. يبقى هاتلاحق على إيه ولا إيه ؟

[ابراهيم عبد العزيز]

وزير بيشوف بيعنه وبيتخنق زينا من السحابة السودا الناتجة عن حرق قش الرز كل عام ... ومع ذلك لسه عايش في العصور الوسطى وإتمطع وأتنطط وعرق الرجولة نطر في قفاه والأسبوع اللي فات صرح وقال " غرامة 2000 ج على أي فلاح يحرق قش الرز في أرضه " ... يا واد يا جامد ...

كيف يستطيع وزير البيئة حل المشكلة وهو لا يعرف حتى الان الاسباب المؤدية لها !!

فمنذ خمس سنوات ونحن كل فترة نستمع لتحليل مختلف لاسبابها

مرة تقول وزارة البيئة أن السبب حرق قش الارز

ومرة تقول أن السبب حرق القمامة

الخ

وكما تفضلت وقلت يا اخ سي السيد بالفعل مصر تحتاج لأفكار مبدعة وخلاقة لان مشكلاتها غير تقليدية

مصر تحتاج لرجال ذوي علم وعقل وابداع ولا تحتاج لموظفين !!

[se_ Elsyed]

كيف يستطيع وزير البيئة حل المشكلة وهو لا يعرف حتى الان الاسباب المؤدية لها !!

فمنذ خمس سنوات ونحن كل فترة نستمع لتحليل مختلف لاسبابها

لأ لأ دي بالذات معروف سببها مليون الميه

بدليل إنها بتحصل في نفس الموعد كل عام بأنتظام وهو موعد جني محصور الأرز .. وبالتالي الفلاح بيبقى عنده مصيبة في أرضة وهو القش الناتج عن جني الأرز ... فبدل ما يصرف وينقل ومش بيعرف يودية فين .. فبيجمعه على راس الأرض وبيحرقة

في حين إن دي ثروة ممكن تدر عليه ربح عن طريق الريسايكلنج ... أو إعادة التدوير ... رغم إني مش متخصص لكن اقدر أقول لك إن القش ممكن يتعمل منه :

1- أعلاف للحيوانات

2- خشب ( الفرومايكه والابلاكاش وما إلى ذلك )

3- الورق

4- أسمدة للأرض عن طريق خلطة بالنشادر والعسل وما إلى ذلك

5- يُعاد إستخدامه في زراعات مختلفة زي عش الغراب أو ما يُسمى بزراعة الأسطح

6- دخولة في البناء بالطين وهو بناء صحي على فكرة

لكن الفلاح مش هايفكر في ده كله وهو اللي حيلته فدان أو إتنين

لكن ده محتاج عقول مبتكرة غير تقليدية تشجعه وتحفزه على عدم حرق قش الرز وتروح هي وتاخد الكنز ده منه

وعلى فكرة الموضوع بسيط برضوا مش زي ما أنتوا متخيلين .. لإن حسب دورة الري فإن مش كل المحافظات مسموح لها تزرع ارز لإنها بيحتاج مياه كتيرة وبالتالي الأمور المفروض تبقى تحت السيطرة ومعروف بالتحديد مين اللي بيزرع أرز ...

بمناسبة الأرز ... مازلت متذكر في اليومين تلاته اللي كنت بأزور فيهم الريف وأنا صغير .. كنت بأشوفهم أول ما يزرعوا الأرز ويغمروه بالمياة طوال فترة زراعته .. بيشتروا أسماك صغيرة قوي بيسموها " زريعة " ويرموها في الغيط ... وعلى ما الأرز يكبر ويقترب وقت حصادة ... كُل أحلى سمك يا معلم وتلاقي السمك كبر .. وبقى أحلى صيادية هههههههههه

[se_ Elsyed]

من ساعة ما عملوا مترو الأنفاق كنت دايماً أسأل نفسي

بدل ما أحنا بنشوف الناس طول اليوم اللي بيجري عشان يلحق المترو .. واللي بيخبط في التاني عشان يتزاحم - وأنا في الجامعة وكنا في شهر رمضان ونازل على سلم المحطة .. إذ بي أجد نفسي طاير في الهوا واحلق بجناحي في الهواء مرتفعاً لأعلى لألمس النجوم .. ومضى قطار العمر يا ولدي ... وبأخد السلالم كلها كر وبأتكعور .. أتاري واحد جاي جري من فوق عشان يلحق المترو وأتزحلق وراح واخدني في وشه هههههههه .. الحمد لله جت سليمة وأهو الواحد عاش في دور عباس إبن فرناس وخاض تجربة الطيران -

وتلاقي التكشيرة على وش الناس من الحر والزحمة وضغوط الحياة وكل واحد بيبقى عاوز يدي التاني في وشه من الزهق ..

ليه بقى ما نستغلش المساحات اللي مش على المحطة أمام المترو عشان الزحام .. ولكن المساحات الخارجية أمام شبابيك التذاكر وفي الطرقات وهي كثيرة جداً يكفي إننا نشوف محطة الشهداء ( المخلوع سابقاً ) أو محطة التحرير وجميع المحطات اللي في الأنفاق تحت الأرض

ليه ما نستغلش ده كله ونشجع الفنانين الشبان إنهم يعرضوا اعمالهم الفنية من لوحات فنية أو نحت .. أو حتى عروض موسيقية أو فنية بسيطة لعدة دقائق .... وليه ما نستغلش ده برضوا وننمي هواية الاعمال اليدوية البسيطة عند الشباب ونعمل لهم معارض في محطات المترو لبيع المنتجات دي ... وكل ده ما يبقاش سبهلله لكن يبقى تحت إشراف وزارة الثقافة بإجراءات إدارية مبسطة بالتنسيق مع إدارة المترو ؟

وليه مانستغلش أسوار المترو اللي بتمتد لعدة كيلو مترات في القاهرة وهي زي مأ احنا بنشوفها مساحات مقسمة يمكن 5 امتار بين كل عامود وعامود ... ونخلي المواهب دي تتفجر عند الشباب ونخليهم يرسموا على الأسوار دي اللي هما عاوزينه بعد ما تكون هناك لجان فنيه تشوف الرسم المصغر الأول وبعدين تمدهم بالادوات والألوان وتسيبهم يشتغلوا

بدل مناظر القبح اللي بنشوفها من إعلانات عن دروس خصوصية وصاروخ الكيميا وأمبراطور الكفته وجبرتي التاريخ والكلام الفاضي ده ؟

حتى على اسوار المدارس والجامعات .. ليه برضوا ما بنشوفش أعمال فنية بدل ما سيبينها مرتع لكل واحد يضع إعلان مجاني أو يكتب أي كلام فاضي

وكله كوم ومنظر ملصقات الإنتخابات كوم تاني .. إلطع يا عم في أي حته وتفضل سنين بالمنظر الزبالة ده

هل الحاجات اللي بأقولها دي يا جماعة صعبة أو محتاجة تمويل ضخم ؟

وهل الأفكار دي مش موجودة في دول كثيرة ومسموح بها عادي من غير تعقيدات ؟

[أمل حياتي]

عزيزي سي السيد .... قبل ان تكتب عن تجميل الأماكن والشوارع

وغيرها .... اعتقد ان مصر وساتحدث بصفى زائره مستديمه لها ....

اعتقد ان الأولوية قبل ذلك يجب ان تكون للنظافة وتحسين شكل اي

شي ليس بالضرورة ان اجمله وازخرف به فقد ادخل مكانا فخما ولا ارتاح

لأنه تنقصه النظافه والترتيب فكم من بيوت فقيره وبسيطه ترتاح العين لدى رؤيتها

فإنك تفتقد هذا الشيء بالدرجة الأولى ومن بعده يمكنك استخدام الفن الجميل