اول يوم رمضان

[pink rose]

السلام عليكم و رحمة الله و بركاته

كل سنة و انتم طيبين

رمضان خلاص على الابواب

اللهم بارك لنا في شعبان و بلغنا رمضان

سيبكم بقى من السياسة و وجع القلب دا شوية

و خالونا نعيش اجواء رمضان شوية

يمكن ربنا يكرمنا و ننسى التشاحن و الاختلافات اللي احنا فيها دي

و نتوحد بقى

صايمين قائمين قانتين

ربنا يتقبل ان شاء الله

يالا نتكلم عن اول يوم رمضان

شعوركم ايه من ليلة الرؤية و حتى افطار اول يوم

بتقضوا اليوم ازاي

اول يوم رمضان السنة دي ايه مخططكم ليه

من كل حاجه عاوزة تفاصيل لو سمحتم

ما حدش يقولي باقعد مستنى المغرب عشان اكل

لا اسفة مش مقبول الكلام دا

يعني مثلا القرآن بتقروه امتى و اد ايه وقت و اد ايه كم يعني جزء في اليوم و لا اتنين و لا ربع

التراويح في البيت و لا في المسجد بتحبوا التراويح بجزء و لا ما تيسر من القرآن

اول يوم بقى عازمين و لا معزومين

هل اول يوم يفضل يكون الاسرة الصغيرة و لا مع الاهل و لا في الغربة مع الاسرة الصغيرة بس و لا الاصدقاء ان امكن

الستات بدأتوا تحضروا في دماغكم هاتعملوا ايه اكل اول يوم

يالا نرغي بقى ف حاجه تقربنا من بعض

كل سنة و انتم طيبين

و يجي رمضان و احنا فيه مبسوطين

[م تيمور المراغي]

ينفع اشارك معاكم !

[ابوهنا]

والله يامدام الله يسامحك لانك ضغطى على الجرح بشده

انا الان فى الغربه لوحدى

هنا وام هنا ولاسناذ احمد النونو الجديد فى مصر

ده تانى مره اقضى رمضان فى الغربه لوحدى

طبعا بافطر والدموع بتنزل منى حتى انهى فطارى

ربنا يبلغنا رمضان ويجمعنا باهلنا وحبايبنا

[عماد حمدي]

كل عام و حضرتك بخير .. و رمضان كريم ،،

رمضان العام دا مُختلف تماماً .. يعتبر رابع رمضان أقضيه بعيد عن أهلي ..

رمضان اللي فات كنت هنا في الإمارات

رمضان اللي قبله السعودية

رمضان اللي قبلة في شرم الشيخ

رمضان دا بقا هنا برده في الإمارات cr((:

طبعاً تعبت نفسياً و نسيت أجواء رمضان الجميلة اللي كلنا اتعودنا عليها و اللمه بتاعت العيلة وقت السحور و الفطار المغربية

و لما نقعد نستني المدفع يضرب و أنا في البلكونة بفرقع صواريخ وقت الفطار ..

و الجيران تطلع تزعق و تشتم هههههه

و بعد الفطار أقعد مع بابا و ماما و أخواتي ( وحشووووني اوي اوي :wub: )

و نروح نصلي التراويح و نقعد نتسابق ختمت القرآن كام مرة ؟؟ أنته في الجزء الكام ؟؟

شد حيلك ياعم أخوك الأصغر منك خلص 10 أجزاء في 3 أيام . ما أجمل المنافسة ع طاعة الله أيام جميلة جداً

رمضان السنه دي بقا قررت أني أخد أول أسبوع أجازة من الشغل و الحمد لله اتوافق عليها و اقضيه هنا في الإمارات برده :rolleyes: ..

هيكون ليه طقوس خاصة بالنسبة ليا ..

أختم فيه القرآن إن شاء الله دا أهم شيء ، أقوم أطبخ بقا بإيدي و لو مرة واحدة من يوم ما جيت .. et:(

الصلاه في وقتها في المسجد ..

أقعد مع نفسي و أحاسبها po:: بزهن صافي جداً بدون ضغوط الشغل و وجع الدماغ ..

إحساس رائع لما أكون صايم كدا و متفرغ تماماً لعبادة رب العالمين .. ومش عندي أي إلتزامات مفصول تماماً عن العالم الخارجي و الناس

اللهم بلغنا رمضان ..

و حشني أكل ماما أوي أوي أوي ، cr((: cr((: ( هانت يا ست الكل فات الكتير ما بقي إلا القليل )

تسلمي ع الموضوع الجميل دا .. و كل عام و حضرتك بخير ..

[Howayda Ismail]

كل سنة وانت طيبة ياريمو

وكل سنة وانتم طيبين وعلى راى ريمو سبونا من السياسة شوية

دماغنا قفلت قفلة سودا

من هنا حبة والتلفزيون حبتين وكل الاخبار بتدل على سكة واحدة

المجلس العسكرى حيعمل اللى هو عاوزه واضربوا دماغكم فى الحيط

والله حاسة مبارك قاعد يطلع لنا لسانه دلوقتى يغيظ فينا

[لماضة مصرية جدا]

السلام عليكم و رحمة الله و بركاته

بينكي...هاتي كفك....(يعني كده و كده قال)

علشان انا لسه النهاردة كنت ناوية افتح توبيك اسميه وحوي يا وحوي و كدهوت و نقول هنعمل ايه اول يوم رمضان

هاتي كفك بقي.....بصرة

بس هو سؤال

هو التوبيك قلب شحتفة و كدهوت ليه

طب هتشحتف معاكم حبة قليلين

بس مش واخدي بالكم ان الغربة كلها علي بعض بتخلي جزمة الواحد ضيقة....قصدي خوقله ضيق

طب ما تيجو نوسعها علي بعض شوية

طبعا بعد البوقين اللي هتحدف بيهم بايد الهون دولم

احب اقول

اني اول مرة اقضي رمضان بعيد عن اهلي

و بعيد عن مصر كلها

انا فاكرة في مثل هذا التوقيت كنت فاتحة توبيك بغيظكم فيه لاني كنت نازلة مصر اول رمضان

و طبعا تدور الايام.....آن آن تش

و اللي عملناه في الناس هيطلع علي حواجبنا

بص ياي ستي

انا خايفة اقعد اشيل هم "اول يوم رمضان" و الذكريات و كدهوت

و علشان اسهل الدنيا علي نفسي

اول عزومة اتعزمت عليها.....(اينعم يعني هي الناس متبتتشي اوي....) بس انا زي ما تقولي اتشعبطت فيها اوي

معزومة اول يوم رمضان عند اسرة مصرية قررت تتبناني :closedeyes:

انا مش مهم عندي اني هأكل حمام و لا محشي....(طبعا اتطمنت علي المينيو....طول عمري ناصحة)

بس المهم عندي اني آكل في بيت مصر....مش في مطعم.....و اني اتلم مع ونس مصري مافيهوش حد بيرطن اي لغة تانية

و ناوية بقي تكون ليلة مصرية بكل ما فيها

يعني اخش عليهم بقزازتين شربات.....قصدي قمر الدين

و نشغل صوت لشيخ محمد رفعت في الاذان

و نتفرج علي قنوات مصرية علي الفطار و غالبا قناة القاهرة و الناس بحبها

و بعد كده نصلي التراويح جماعة في اي جامع

و بعدين نروح بقي نكمل اكل تاني و قزقزة علي اي مسلسل...(مع ان ماليش في ليلة المسلسلات) بس بحب اللمة ذات نفسيها

دي خطتي باذن الله لاول يوم رمضان

تفتكري لو العيلة دي رفضت طلب التبني انا اعمل ايه....(يا ربي......ده انا كده يجيلي استبحس في معنوياتي جدا)

علي هامشي الاستبحس

استاذ عماد حضرتك عندنا في ابو ظبي ليه متحاولشي تكون علاقات مع الجالية المصرية

هشوف لحضرتك لو عاملين فطار جماعي(لا متخافشي مش مائدة الرحمن :) هبلغ حضرتك بيها

اللي عارفاه انهم عاملين حاجة كده زي الدوري الرمضاني

لو حضرتك يعني لعيب بقي و ابو تريكة الساحة الشعبيةيبقي اتوكل علي الله و اشترك معاهم

هجيب لحضرتك التفاصيل و اقولك عليها

و متخافشي مش هتبقي لوحدك ابدا

كل سنة و احنا كلنا بروح رمضان و بلمة رمضان و بعزومة اول يوم رمضان

كل سنة و كل دعوة محوشيناها طول الحداشر شه ريا رب تتحقق في الشهر المفترج ده

كل سنة و رمضان هو "يناير" العمر بتاعي

كل سنة و احنا كلنا أأٌقرب و أطهر و أنقي و لكل خطوة تقربنا لربنا نتسابق عليها من غير تفكير

بقولكم ايه ما تيجوا ندعي لبعض

بكلماتنا البسيطة

بس دعوة من قلبنا اوي

مش يمكن حد فينا يكون محتاجاها اوي

كل سنةو احنا رمضان بيصحي احلي ما فينا

مساكم.....وحوي....يا وحوي (كنت عايزة ايقونة حد ماسك فانوس مش لقيت حطيت البتاعة دي ام وردة اتخيلوا انها فانوس كده و كده يعني)

[pink rose]

ينفع اشارك معاكم !

طبعا يا باشمهندس ينفع

التوبيك مفتوح لكل اعضاء محاورات المصريين

اللي بيقولوا الفاظ و اللي ما بيقولوش

هههههههههههههههههههههههههه

كل سنة و حضرتك طيب

رمضان كريم

[pink rose]

والله يامدام الله يسامحك لانك ضغطى على الجرح بشده

انا الان فى الغربه لوحدى

هنا وام هنا ولاسناذ احمد النونو الجديد فى مصر

ده تانى مره اقضى رمضان فى الغربه لوحدى

طبعا بافطر والدموع بتنزل منى حتى انهى فطارى

ربنا يبلغنا رمضان ويجمعنا باهلنا وحبايبنا

ربنا يجمعك بيهم على خير يا دكتور

و كل سنة و حضرتك طيب

بس ممكن اول يوم تجتمع على الفطار مع الاصدقاء و دا ممكن يقلل شوية من ألم الغربة

رمضان كريم

[pink rose]

استاذ عماد

فكرة زي الفل اللي قالتها لماضة هانم عوج الهوا طربوشه

انت في الامارات عيش حياتك مع الجالية

او شوفلك حد يتبناك انت كمان

شوفلك عائلة لطيفة كده و اتشعبط فيهم

كل سنة و حضرتك طيب

و بجد باحييك على فكرة الاجازة اول اسبوع دا

ربنا يقدرك و يتقبل منك الصيام و القيام

رمضان كريم

[pink rose]

كل سنة وانت طيبة ياريمو

وكل سنة وانتم طيبين وعلى راى ريمو سبونا من السياسة شوية

دماغنا قفلت قفلة سودا

من هنا حبة والتلفزيون حبتين وكل الاخبار بتدل على سكة واحدة

المجلس العسكرى حيعمل اللى هو عاوزه واضربوا دماغكم فى الحيط

والله حاسة مبارك قاعد يطلع لنا لسانه دلوقتى يغيظ فينا

مدام هند

انا كده هاضطر اقول الفاظ ههههههههههههههه

بقى يا شيخة اول رمضان و باقول انسوا السياسة

و انتي داخلة تقوليلي في وشي يا ريت في ضهري كنت عملت نفسي مش واخدة بالي

تقولي و تضربي التوبيك و يتنحس باسم مبارك

ربنا يسامحك

عموما انا هاعديها عشان بلديات

و انتي عارفة الاسكندرانية اجدع ناس

و اقروا الفاتحة لابو العباس و كدهوت

نورتي التوبيك يا قمرة بس عاوزينك ما تهربيش من السؤال

هاتعملي اكل ايه اول يوم

كل سنة و انتي و اسرتك طيبة

و رمضان كريم

[pink rose]

بنتي يا لماضة

لماضة يا بنتي

كل سنة و انتي طيبة

عارفة يا ريهام بيعجبني فيكي

الشجاعة

ما شاء الله يعني الناس كانوا بيعزموا عزومة مراكبية شكلهم

و انتي ما صدقتي

يا بنتي يا حبيبتي

كنتي خطفتي رجلك لحد الرياض و انا مستعدة اتبناكي و اكسب فيكي ثواب

و اهو يبقى ربنا رزقنا باخت لمريم

فكري و ردي عليا

و هاروقك صدقيني

كل سنة و انتي طيبة يا قمر

رمضان كريم

[نوران]

كل سنه وانت طيبه يا بنك وكل اعضاء المحاورات والمشرفين والزوار وكل المصريين وكل حبايبنا اللي في مصر والامه الاسلاميه كلها بخير

ده تاني رمضان ليه في الغربه

اول يوم ده كان لازم ماما وبابا يعزموا كل الاقارب ونتجمع علي مائده عامره بما لد وطاب

الحمد لله علي كل حال

ان شاء الله هعمل صينية مكرونه بالبشاميل

وربنا يعيني علي قراءة ما تيسر

وزوجي بيصلي التراويح في مسجد قريب لكن انا بصلي في البيت

اللهم اغفر لنا وفرج كربنا وبلغنا رمضان . . . آمين

[arkan]

كل عام وانت الى الله أقرب يا بينك وكل الناس اللى بعزهم

ربنا يبلغنا رمضان ويجعلنا فيه من المقبولين

[عماد حمدي]

ميرسي يا لماضة هانم .. ربنا يوقفلك ولاد الحلال في سكتك ، ربنا يطولنا في عمر حضرتك ، ( وش واحد متبهدل آخر بهدلة وواقف عند جامع بيشحت ) :old:

الغربة فعلاً صعبــــة جداً و الواحد بيحس بمرارتها في الأوقات اللي زي دي ،،

شاكر إهتمامك حضرتك مرة تانية وفي إنتظار التفاصيل ( الوردة دي فانوس :P )

بالمناسبة :-

إنتظري موضوع قنبلة أول يوم رمضان في منتدي المغتربين ( هديه مني لمحاورات المصريين ) ، يخص ( مغتربي الإمارات من كتابات العبد لله :closedeyes: )

كنت كاتبة في منتدي تاني .. و هنقله هنا لتعم الفائدة ( و طبعاً هنحتاج رآي سيادتك اللي أكيد هيكون إيجابي كما تعودنا منك ) ..

[عماد حمدي]

استاذ عماد

فكرة زي الفل اللي قالتها لماضة هانم عوج الهوا طربوشه

انت في الامارات عيش حياتك مع الجالية

او شوفلك حد يتبناك انت كمان

شوفلك عائلة لطيفة كده و اتشعبط فيهم

كل سنة و حضرتك طيب

و بجد باحييك على فكرة الاجازة اول اسبوع دا

ربنا يقدرك و يتقبل منك الصيام و القيام

رمضان كريم

جزاكي الله خيرااً يا فندم ، و تقبل الله منا و منكم ..

[Howayda Ismail]

مدام هند

انا كده هاضطر اقول الفاظ ههههههههههههههه

بقى يا شيخة اول رمضان و باقول انسوا السياسة

و انتي داخلة تقوليلي في وشي يا ريت في ضهري كنت عملت نفسي مش واخدة بالي

تقولي و تضربي التوبيك و يتنحس باسم مبارك

ربنا يسامحك

عموما انا هاعديها عشان بلديات

و انتي عارفة الاسكندرانية اجدع ناس

و اقروا الفاتحة لابو العباس و كدهوت

نورتي التوبيك يا قمرة بس عاوزينك ما تهربيش من السؤال

هاتعملي اكل ايه اول يوم

كل سنة و انتي و اسرتك طيبة

و رمضان كريم

معلش ياريمو ياختى

مكنش اصح اجيب اسمه بس سيرته دايما تهف على هههههههه

خلاص بعد كده اقول البعيد اللى ميتسماش والناس تفهم

لا انا مش باهرب دا انا عندى كلام كتير بس باسخن ههههههههه

وكمان الواحد لازم يراعى شعور الاخوة المغتربين زى ابو هنا كدا وعماد بس لماضة شطورة بتعرف تتصرف

وتعمل احلى اكل غير الرجالة خالص ( بس عشان يعرفوا قيمة زواجتهم وامهاتهم )

خدى تصبيرة كده

لازم وحتما ولابد اول يوم بط محشى فريك وملوخية خضرا خدى بالك خضرا واختك اسطى بريمو فيها

ولازم طبق شوربة خضار تليين للمعدة كده على الماشى

ممكن معاهم صينية بطاطس صغننة او كوسة حسب الطلب

بس لازم واكيد طبق البامية توأم الملوخية اساسى

انا مش باحب الاكل كتير لكن انا وعمك محمد بنعمل كده

http://www.youtube.com/watch?v=1kymS-CL-7o&feature=related

العزومات بقى بعدين اقولك ناوية افرش لهم حصيرة على البحر وبالمرة اغسل المواعين هناك ههههههه

محدش ضامن الكهربا كمان السنة بقالهم يومين بيعملوا علينا بروفة مسلسل قطع الكهربا

اهو اوفر عليهم طلوع السلم 9 ادوار ويلاقوا مية يغسلوا ايديهم

[عماد حمدي]

مرحبا بطلعة الوليد الوسيم

بشير الخير العميم، شهر رمضان ، وتنزيل أنوار القرآن، وشذا نفحات الجنان، وواحة الاسترواح في صحراء العام، وراحة الأرواح بالصلاة والصيام والقيام.

[عادل أبو عمر]

و الله كويس إني حضرتك فتحتي التوبيك ده لسببين

الأول إني أقول كل سنة و إنتوا طيبين و ربنا يبلغنا رمضان و يوفقنا فيه لحس الصيام و القيام و أن يبلغنا ليلة القدر

والثاني إني كنت مستني أي حد يفتح الموضوع ده عشان تكون آخر مشاركة لي و تبقى حسن الختام .

كل عام و أنتم بخير

وأستودعكم الله

تحياتي و احترامي للجميع

وأسألكم الدعاء

[pink rose]

كل سنه وانت طيبه يا بنك وكل اعضاء المحاورات والمشرفين والزوار وكل المصريين وكل حبايبنا اللي في مصر والامه الاسلاميه كلها بخير

ده تاني رمضان ليه في الغربه

اول يوم ده كان لازم ماما وبابا يعزموا كل الاقارب ونتجمع علي مائده عامره بما لد وطاب

الحمد لله علي كل حال

ان شاء الله هعمل صينية مكرونه بالبشاميل

وربنا يعيني علي قراءة ما تيسر

وزوجي بيصلي التراويح في مسجد قريب لكن انا بصلي في البيت

اللهم اغفر لنا وفرج كربنا وبلغنا رمضان . . . آمين

كل سنة و انتي طيبة يا نور

و ربنا يتقبل الصيام و القيام ان شاء الله

احنا كده كمان اول يوم دا كان لازم العيلة و عيل العيلة تتجمع عندنا

و بيبقى في كذا سفرة عليها ما لذ و طاب من الطعام

و بعد السفرة بيكون في كنااااااااااافة بالقشطة

اااااااااه وحشتني اوي

مع اني ممكن اعملها او اكلها في اي وقت غير رمضان

الا انها في رمضان مع الاخت الفظيعة القطايف بيكون ليهم احساس تاني خالص

احساس التجمع دا احلى حاجه في الدنيا

ربنا يجمعنا باللي بنحبهم على خير

كل سنة و انتي طيبة

رمضان كريم

[عماد حمدي]

معلومة مهمة جداً و جميلة جداً جداً

طبعاً رمضان قرب و هنلاقي الناس بتقول لبعضها كل سنة وأنت طيب ، و ناس تانية ( زي أنا ياعني :closedeyes: ) بتقول كل عام و أنت طيب

طيب إية الفرق ياعم الفيلسوف .. ( شايفك و عارفك )

أنا هقولكم ..

الفرق بين كلمة ( سنة ) و كلمة ( عام ) ..

الفرق بين كلمة "سنة" و "عام"

(ولقد أرسلنا نوحا إلى قومه فلبث فيهم ألف سنة إلا خمسين عاما )

سورة العنكبوت آية 14

كان من الممكن أن يقول رب العزة : أنهم تسعمائة وخمسون سنه فلماذا ألف سنه إلا خمسين عاما؟

أن لفظ سنه تطلق على الأيام الشديدة الصعبة عندما قال

(تزرعون سبع سنين)

سورة يوسف ايه47

ولفظ عام يطلق على الأيام السهلة أيام الرخاء والنعيم

قال تعالى

"ثم يأتي من بعد ذلك عام فيه يغاث الناس"

سورة يوسف أية 49

وبذلك يكون سيدنا نوح قد لبث ألف سنه شقاء إلا خمسين عاما

لذا من الأفضل أن نقول .

" كل عام وانتم بخير " و ربنا يجعل أيامنا كلها رخاء و نعيم