متى نقدر العلماء

[عنبو]

السلام عليكم ورحمة الله وبركاته

تحيه طيبه وبعد

قرأت خبر فى جريدة الوفد ادى الى ارتفاع ضغطى والسكر وخلانى قول حسيى الله ونعم الوكيل

ادى رابط الخبر

افعص هنا

للاسف فيه الاف من الدكتوره بسنت فيه منهم اليى رضخ وفيه منهم اليى رفض الليله كلها وساب المجال كله وراح فتح له محل موبيلات واشترى دماغه

متى يكون للعلماء قيمه فى مجتمعنا !!!!!!!!!!!!!!!!!!!!!!!!!!!!

يعنى ايه معيد فى الكليه يروح الكليه متشعبط فى سيرفيس ولا مسطح فى قطر؟

يعنى ايه رئي قسم يطلب من معيد حاجات شخصيه له والا فلن يوافق له على الرساله ؟

يعنى ايه معيد فى الكليه سنه ممكن يعدى التلاتين ولسه مش قادر يتزوج ؟

بجد الوضع المادى والاجتماعى للمعيدين حاجه تدمع ليها العين

يعنى ايه يرفضوا ياخدوا الاول على الدفعه علشان السنه اليى بعدها ياخدوا ابن الدكتور فلان مع انه اساسا ممكن يكون حمار بمعنى الكلمه ؟

فيه كوارث بتحصل داخل الجامعات فى مصر الى متى سوف تظل هذه المهزله ؟ الى متى سوف تظل الجامعات صندوق مغلق ممنوع الاقتراب او التصوير ؟

وانا فى الكليه كان 60 فى الميه من المعيدين من ابناء الاستاذه بالجامعه ؟ وطبعا كل واحد واخد ابنه معاه فى نفس القسم معرفش ازاى ؟؟

كنت بعمل مشروع التخرج بتاعى مع عالم من علماء مصر بجد الراجل ده كان معاه برأة اختراع من اليابان فى تخصص نادر جدا المهم داخل له المكتب

علشان نتكلم والله العظيم لقيت مكتبه حاجه تكسف قولت ياه بقى ده مكتب الراجل اليى لسه اسم على مستوى العالم ؟ حسبى الله ونعم الوكيل ؟

متى سوف نعطى للعلم والعلماء حقوقهم فلن ننهص الا بالعلم

تحياتى

عنبو

[لماضة مصرية جدا]

السلام عليكم و رحمة الله و بركاته

يالله يا عنبو

مش عارفة ابتدي منين تحديدا من واقع التعليم في الجامعة

و لا من طبيعة المواد اللي بتنطلب علشان الواحد ياخد الماجستير و لا الدكتوراة

و لا ع المعاملة الغير آدمية لاي حد بيفكر انه بيعمل دراسات عليا...(ده علي اعتبار أذنب)

و لا علي لو اتحمل كل الحاجات دي و بعدين سافر بلاد الواق واق لقي واحد قاعد علي مكتب بثانوية عامة بيقولوا انتو بتضربوا الشهادات و عايزين نعمل معادلة لشهادة الدبلون....(ايون البيه نطقها كدهوت....مع انها special diploma and a master degree)

و لا اقولك لما تطلع عينك و عين اهلك في الماجستير و تضيع سنين عمرك...و بعدين برضه تروح بلاد الواق واق تلاقي واحد عيل واخد ماستر برضه اخو الماستر بتاعك بس عبارة عن كورسات لمدة سنة واحدة فقط

و لا اقولك عن ناس مكناش بنشوف شكلها خالص و بعدين اذ فجأتن لقيناها اخدت الماجستير و هووووووووووووووووب اخدت الدكتوراة

و اصلا اصلا قانون الجامعات المحترم يمنع ان الواحد ياخد دكتوراة غير بعد فترة زمنية محددة

و لا احكيلك عن الشباب اللي زي الورد اللي كانوا مصدقين في حكاية "ان تذاكر تنجح" و فهلا ذاكرنا و تفوقنا و مع اول شلطوت ااتبعتنا....و ادولنا حاجة كده عاملة زي مية المجاري اسمها "منحة دراسية" و ده كان واحد من دكارتة الجامعة المحترمين افتكسها في قعدة صفا علشان يفض المكان لبنته اللي هي خريجة ثانوية عامة لسه

و الشباب العبيط دوت كان مصدق و كان بياخد بالظبط بالظبط 168 جنيه المفروض يلبس بيهم و يشتري كتب و يسافر القاهرة علشان يشوف امهات الكتب و يصور رسايل و يطبع و يرمي و يرجع يشحت و يطبع تاني

و الشباب العبيط برضه اخد الماجستير و معظمهم اتقاله "الرسايل" اللي انتو عاملينها دي تحل كل مشكلات التعليم في مصر....بس الحمد لله اتركنت علي الرف و امين المكتبة بينفض التراب من عليه كل سنة علشان الطلاب العبيطين بتوع السنة اللي بعيدها يجوا يذاكروا منها

و لااقولك ان الشباب ده لما قامت الثورة كانوا في الميدن....مين هيتوجع ادهم....و لما راحوا لرئيس الجامعة علشان يبين ليهم موقفهم في التعيين و خصوصا مع وعود دكتور شرف بالتطوير و التحديث و الرخاء و يا مطرة رخي رخي.....راح قفل عليهم مبني الجامعة و قطع عنهم المية و النور

و سابهم 4 ايام لغاية ما المحافظ اتدخل و بعدين رفع عليهم دعوة "بلطجة"

شوف يا عنبو

احنا ممكن نقعد نفند بالورقة و القلم وضع التعليم الجامعي في مصر

و خصوصا "اعضاء هيئة التدريس" كيف يتم اختيارهم و كيف يتم اعدادهم و حجم الفساد وصل لغاية فين و بنتكلم عن فساد اخلاقي و اداري و اكاديمي

بس انا مؤمنة بحاجتين

1- حاجتين في مصر ليهم اهمية و اكتر من الجيش.....وزارة التعليم ووزارة التعليم العالي و البحث العلمي

اذا الجيش بتقولوا انه بيحمي مصر

التعليم هو اللي بيبني عقول البني آدمين

هو اللي بيحرر النفوس

هو اللي بيفتح ابوبا المعرفة

هو اللي بيخليك بني ادم قادر تميز بين الصواب و الخطأ بين الحق و الباطل مهما تعالي حواليك الصخب

و للاسف الاتنين اللي بقول عليهم وضعهم مخزي جدا

2- علي الرغم من كل ده.....اللي انا فعلا بستغربه.....و بسجد لله شكرا ليه....ان فعلا ما فيش حد "اتمرمط" في التعليم الا لما بقي حاجة حلوة اوي في المستقبل

متفهمشي يعني هو الواحد لازم ياخد جرعة "جراثيم" علشان يبقي عنده مناعة مثلا

بس اللي بيحز في نفسي ان فعلا الناس اللي بره مصر نفسها ترجع....نفسنا نرجع نبني جوه....نفسي ارجع تاني لمدرج فيه 200 طالب و احس اني قادرة اغير فيهم حاجة

مش ابقي قاعدة قدام 20 طالب في غرفة مكيفة و عربية مكيفة و حتي دماغه بقي فيها مراوح علي الاخر...(مع كامل احترامي لطلابي هنا) بس التعليم في مصر مختلف....مع كل تحدياته مع كل صعوباته بس الناس قادرة تعافر و تكمل و بالعكس تبدع

طب ما بالك لو اتحنا ليها الفرصة من البداية و عملنا مناخ يحترم آدمية طالب العلم و الله راح تفرق كتير

و مع كل ده الا ان برضه لسه فيه اساتذة في الجامعات ذكراها موجودة و بتحفر في الصخر علشان طلابها....بس دول دايما تلاقيهم من المغضوب عليهم من القيادات العليا

مع كل ده كلنا اتأسسنا علي ايد دكاترة انا بشوف ان كل واحد او واحدة منهم شخصيا هديه جايزة نوبل....لانهم فعلا كانوا بيتبنونا...(اينعم هما طلعوا عيني) بس انا ماشية في الخط بتاعهم لغاية دلوقتي.

و بسال نفسي

هي الناس عمالة تلوم ليه علي شباب 6 ابريل انهم تلقوا تدريبات من صربيا و من امريكا...(ده لو ثبتت الادعاءات اصلا) مع ان اصلا هو دور الجامعة المحترمة انها تقدم تدريبات للشباب في حقوق الانسان و في الديمقراطية و في المشاركة في الحياة السياسية

محدش يلوم علي منظمات المجتمع المدني انها بتقوم بالدور اللي المفروض تقوم بيه المؤسسات الحكومية و اهمهم الجامعة

محدش يقول دول خونة...من غير ما يحاسب نفسه هي الجامعة بتقدم اي نوع من التعليم لشباب في مرحلة تبني عشرين سنة قدام

محدش يقول دول ملعوب في دماغهم و احنا اصلا فكرة "الجامعة" في مصر فقاعة صابون سهل جدا ان الواحد يطلع دبوس و يلاقي جواها مافيش

الحركة الوحيدة اللي بتقوم بيها الجامعة هي حركة اساتذة 9 مارس اللي بيتعاملوا بتعسف شديد لان بايديهم يفضحوا حجم الفساد الموجود في الجامعة

بالرغم ده كله

متفائلة

علشان براهن علي البني ادم اللي هو ارض عفية و هيطرح خير

بس يجري ايه لو سهلنا الدنيا عليه شوية