موقف ايجابي لبابا بس ربنا يستر

[pink rose]

طبعا في الهوجة اللي احنا فيها دي

بقى اللي يطق في دماغه حاجه بيعملها

و اللي عنده عمارة بيعليها

طبعا كلكم عارفين ان المحافظ اللي فات لاسكندرية كان موقف البناء

فا الناس ما صدقت الثورة قامت

و الطماعين نفسهم اتفتحت

الشارع الموزاي للبحر على طول شارع ضيق

يقوموا الناس معليين العماير مخالفة للقانون و توصل العمارة ل 14 دور و مكملين عادي

المهم بابا ليل نهار يتكلم معاهم لانهم طبعا مخالفين و غير دا ما بيحلاش الشغل غير بالليل

قدم شكاوي كتير بس طبعا وقت الثورة لا حياة لمن تنادي

المهم من كام اسبوع ارض فاضية لازقة في بيتنا اتنبت عمارة في لمح البصر

طبعا مباني مخالفة و الانكد من كده انهم ضموا الممر اللي بينا و بينهم

يعني ما بقاش في بلكونات في عمارتنا بقت بلكونة مشتركة بين العمارتين

فين حق الجار و المتنفس الطبيعي للناس

مش مهم يا عم كبر

قام بابا بقى اشتغل في تقديم الشكاوي و المحاضر في القسم التابع ليه بيتنا و كمان للجيش

من اسبوع بالظبط لقى واحد وقفه في الشارع معروف انه بلطجي المنطقة و هدده بان دا كده قطع لرزقه و ان الناس دي تبعه

و هاعمل و هاسوي فا ابعد احسنلك

كلنا اترعبنا على بابا بصراحة لانه لسا خارج من حادثة فظيعة و جسمه كله شرايح و مسامير

و اتكلمنا معاه يا بابا خلاص انت عملت اللي عليك و قدمت شكاوي في الجهات المسؤولة كتر خيرك على كده

المهم ما سمعش كلامنا و راح القسم يبلغ عن البلطجي

قوم ايه لقى المنيل على عينه البلطجي عامل محضر في بابا انه بيلم اتاوات من سكان المنطقة قصاد انه يعمل محاضر في اصحاب العمارات المخالفة

قال ما بدهاش بقى و طلع على النيابة هو و سكان عمارتنا

و قموا شكوى

و امبارح قررت النيابة ازالة العمارة

بس لا بتوع الحي ما جوش و بيقولوا خايفين من البطجية اللي اصحاب العمارات مأجرينهم

قوم بابا بقى قايل و احنا كان المنطقة هانحميهم

هابقى اقولكم اي تفاصيل تجد في الموضوع

رغم خوفي على بابا الا اني شايفاه اتصرف صح

ما ينفعش حد يسكت على الغلط و يقول انا مالي

انا مالي دي هي اللي جابتنا ورا ال 30 سنة اللي فاتت

ادعو ان ما فيش حاجه وحشة تحصله

و انا كمان هادعي و فخورة بيه اوي مع انه ضد الثورة اصلا بس يالا بابا بقى هاعمل ايه :closedeyes:

تم تعديل 26 يوليو 2011 بواسطة pink rose

[عادل أبوزيد]

بارك الله فى والدك و فى كل إنسان يتصدى للفساد

ما سبق كان إستهلالا لابد منه

منذ فترة - طويلة - حاولت وبدأت محاولة لإنشاء جمعية لتفعيل النزاهة و هى الإسم "الشيك" المقبول وقتها بدلا من إسم "محاربة الفساد" الذى يوحى بالتصادم مع النظام أو بمعنى أدق مع الفساد و صناع الفساد و المنتفعين بالفساد و كل الساكتين على الفساد و كانت دعوتى يجب أن نحمى المواطن المصرى من الفساد و نحميه أيضا م من الإفساد سواء راغبا أو مضغوطا عليه.

والدك يا سيدتى رجل حقيقى و هو يقاوم الفساد و الإفساد و عليكى و على كل من يعرف هذا الرجل أن يتضامن معه و يقف معه فى معركته ضد الفساد و الإفساد

و من موقعى هنا فى محاورات المصريين أدعو كل من يمكنه التواصل مع السيد الوالد أن يتواصل معه و يشد عضده لعله وحده و مع غيره يستطيع أن يضع بذرة "تفعيل النزاهة" كما حلمنا بها هنا فى محاورات المصريين.

[Howayda Ismail]

احى والدك جدا جدا على موقفه ده وربنا يسترها معاه ان شاء الله

والله ياريمو بقت حاجة تقرف بجد

انا لسة كنت عاوزة اتكلم عن حالة الصرع البنائى اللى حل على اسكندرية فجاة

تصدقينى لو قلت لك معرفناش قيمة عادل لبيب الا الايام دى بعد حالة الفوضى والعشوائية فى

الا ف المبانى الجديدة ومش مبالغة لو حصرتى عدد البيوت المزالة وطلع بدلها عمارات فى غمضة عين

انهاردة بس شفت من البيطاش لمنطقة المكس اكتر من 12 عمارة بتتبنى وكملت لحد المنشية من غير عد

عشان لاقيت اعصابى بدات تتعب وده كله على الشارع الرئيسى امال لو دخلنا الشوارع الجانبية

امامى مباشرة هدموا منزل قديم دور واحد من يومين وصبوا انهاردة وشكلهم طالع مش اقل من 10 ادوار

هدم ودق 24 ساعة

لكن المشكلة مش فى عرض الشارع لانه عريض جدا المشكلة تكمن فى عدم تحمل شبكات الكهربا والصرف

الصحى لهذا الكم الهائل من الشقق مما يسسب انهيار سريع لهذه الشبكات والبنية التحتية كلها

ومشكلة اكثر فظاعة ان بيوت اساسها لايتحمل ادوار زيادة اتبنى فوقها دورين وتلاتة نذور بكارثة

طمع الناس زاد بصورة فظيعة والانانية والاستعانة بالبلطجية لمثل هذه الامور افظع

اللى احزنى اكتر النهاردة غياب مسئولى اشغالات الطريق نهائى

الكافتريات والقهاوى والمحلات احتلوا الرصيف ووضعوا حواجز امامهم لمنع المارة واجبارهم على

النزول وسط السيارات عن نفسى بازق الحاجة واعدى

منتهى قلة الذوق والادب حتى حديقة الاتحاد الاشتراكى اللى فى المنشية امام اعرق محكمة مصرية

محكمة الحقانية الباعة استولوا على الجنينة واسسوا اكشاك بقواعد خرسانية ومواسير كهربا

منظر صراحة غير حضارى ولا انسانى بالمرة

سرقة اراضى عامة وسرقة كهربا وبلطجة واتاوات تحت سمع وبصر الحكومة والشرطة

الشرطة بتخاف تتصدى لاى حالة او شكوى تورد اليها بخصوص اى اشغالات او بلاغات زى ماتكون

ده تصريح رسمى للبطجة والعشوائية لان كتير من الناس بتخاف تتكلم او تعترض

معلش ياريمو طولت عليكى بس دمى اتحرق من اللى شفته انهاردة

للاسف اضطريت اقول لجوزى انهاردة والله احنا شعب ماينفعش فيه غير مبارك

[نوران]

ربنا يبارك لك في والدك يا ريم ويحفظه من كل مكروه

ويكفيه شر هؤلاء البلطجيه بما شاء وكيفما شاء انه علي كل شىء قدير

وربنا يجعل ما فعله في ميزان حسناته ويطمنك عليه . . . آمين

[Alshiekh]

السلام عليكم

أجمل تحية لوالدك على تمسكه بالحق وعلى إيجابيته.

عندما كنت في مصر فعلت مثلما فعل والدك من الحي للمحافظة للرقابة الإدارية لقسم البوليس.

بعض المحاولات نجحت وبعضها حطيت يداي في الشق كما يقولون.

بعد سفري أحاطت بنا الإرتفاعات من كل جانب واصبح منزلنا لايري الشمس إلا مصادفة أو ربما مرتين في العام

أرجوك أبلغي والدك التحية وقولي له ان هناك ناس يفخرون بك وبما تفعله ويدعون لك الله بأن يحفظك من كل مكروه او شر

[Simba]

احيي والدك بشدة

رغم انك بتقولي انه ضد الثورة لكنه ثائر حقيقي

ما اكتفاش بوعود ولا عجبته كلمة انا مالي

زي ثوار التحرير بالظبط :closedeyes:

[عصام أبوالفتح]

تحية حارة لوالدك وقليلون هم من فى شجاعته .. ربنا يكثر من امثاله

الشجاعة الفردية افضل بالطبع من الشجاعة الجماعية .. شجاعة القطيع .. والموقف الايجابى الفردى افضل الف مرة من موقف جماعى لانه يمثل المبادرة والايجابية والشجاعة الحقة والاستعداد للفداء والتضحية بأشياء كثيرة

والدك أفضل من الثورة يا بينك .. ولو واحد من كل عشرة من المصريين زيه لم نكن لنحتاج إليها

[عماد حمدي]

تحيـه خاصـــة جداً لوالد حضرتك ..

بارك الله فيه ، فعلاً هوه دا الصح ربنا يبارك في عمره و يديلة الصحه . و ينعمه براحه البال ..

آه لو كلنا عملنا كدا لو كل واحد فينا شاف حاجة غلط و صلحها أو حتي حاول انه يصلحها ..

بلدنا حالها هيتصلح ..

كل يوم بيزيد التفاؤل عندي أكتر و أكتر ..

أشكر والدك مرة تانية .. ودي إهداء مني لسعادته

[م تيمور المراغي]

ما ينفعش حد يسكت على الغلط و يقول انا مالي

انا مالي دي هي اللي جابتنا ورا ال 30 سنة اللي فاتت

ادعو ان ما فيش حاجه وحشة تحصله

و انا كمان هادعي و فخورة بيه اوي مع انه ضد الثورة اصلا بس يالا بابا بقى هاعمل ايه :closedeyes:

تحيتي لحضرتك ولبابا طبعا اللي ماسكتش على الظلم وتحرك بايجابيه

تسمحيلي اعمل اسقاط على القصة دي لتوضيح فكرتي

[Om Zayd]

السلام عليكم و رحمة الله و بركاته

ربنا يحميه و يثبته و ينصره و يبارك فيه

و بإذن الله إيجابيته تتنقل للسكان اللي حوليه و يقفوا سوا و قفة رجل واحد

طمنينا عليه دايما

و ياريت توصليله سلامي و زيد

[مهندس ابو يوسف]

تحية حاره لوالدك الشجاع

فهو لم يسكت عن الحق ( الساكت عن الحق شيطان اخرس )

وربنا يحميه من شرور البلطجيه

ويسترها معاه

تحياتي

[أبو محمد]

وقبلة منى على رأس الوالد الثائر الحق ..

هذا هو الطحن بلا ضجيج ..

بعد أن سئمنا وشبعنا ضجيجا بلا طحن

[ذهبية]

بتقولى ان والد حضرتك ضد الثورة دة اساس الثورة

دة بجد اللى فهم يعنى اية ثورة و نفذها بلا شعارات و لا تهليل و لا كلام دة رجل افعال

والد حضرتك ثورجى اصيل من تراب البلد دى و بيغير عليها وعلى حقها و على ترابها و شعبها

دة رجل رفض الظلم و رفض البلطجة و رفض التهديد

ووقف فى وشهم كلهم و ثبت على موقفة

يبقى مش بيشكع الثورة ازاى و هى بتجرى فى عروقة

والدك من حقك تفخرى بية و من حقنا هنا اننا نحية و نرفع لة القبعة تحية على شجاعتة و اصرارة و ثباتة

لك الفخر انك تقولى دة بابا وانا ابنتة اللى تفخر انها شاهدة على شجاعتة ربنا يحمية لكم و يطول

فى عمرة و يثبت اقدامة و يكون سبب فى ارجاع الحق لاصحابة

[hOuSsAm]

ماشاء الله

ربنا يبارك فى والد حضرتك

بصراحة انا فخور ان من جنسيتى واحد زى والدك ينهى عن المنكر ولا يخاف لومة لائم

----------

المهم فى الخطوة الجاية يلاقى دعم وتاييد من الجيران والاهالى

بالاضافة ان والدك يعمل فى قسم الشرطة محضر بعدم التعرض لاى حد مشتبه انه يتعرض ليه

وربنا يجزيه كل خير عاللى بيعمله

وكمان يحتسب الحجات دى عن ربنا وانه بيسعى لاعمار الارض واصلاحها

تحية اعزاز وتقدير لوالدك الكريم

[أبو يمنى]

نسأل الله أن يحفظ والدكم من كل سوء .

وأبلغوه منّا التحيّة والتقدير .

الدعاء لمن خاف قوماً :

"اللهم اكفنيهم بما شئت"

[pink rose]

بارك الله فى والدك و فى كل إنسان يتصدى للفساد

ما سبق كان إستهلالا لابد منه

منذ فترة - طويلة - حاولت وبدأت محاولة لإنشاء جمعية لتفعيل النزاهة و هى الإسم "الشيك" المقبول وقتها بدلا من إسم "محاربة الفساد" الذى يوحى بالتصادم مع النظام أو بمعنى أدق مع الفساد و صناع الفساد و المنتفعين بالفساد و كل الساكتين على الفساد و كانت دعوتى يجب أن نحمى المواطن المصرى من الفساد و نحميه أيضا م من الإفساد سواء راغبا أو مضغوطا عليه.

والدك يا سيدتى رجل حقيقى و هو يقاوم الفساد و الإفساد و عليكى و على كل من يعرف هذا الرجل أن يتضامن معه و يقف معه فى معركته ضد الفساد و الإفساد

و من موقعى هنا فى محاورات المصريين أدعو كل من يمكنه التواصل مع السيد الوالد أن يتواصل معه و يشد عضده لعله وحده و مع غيره يستطيع أن يضع بذرة "تفعيل النزاهة" كما حلمنا بها هنا فى محاورات المصريين.

ميرسي كتير يا استاذ عادل على كلام حضرتك

و فعلا احنا محتاجين لتفعيل النزاهة

لو كل واحد فينا فعل في نفسه القيم و الاخلاق و طبقها في حياته

لو كل واحد فينا شاف غلط و ما سكتش و واجه كان زي ما قال الفاضل عصام ابو الفتح ما كناش احتاجنا للثورة

مرة تانية باشكر حضرتك

و ان شاء الله هاحاول اتكلم مع اعضاء حزب الوسط في الاسكندرية للوقوف مع بابا و جيرانا اللي بيتصدوا لفساد اصحاب الاطماع

[pink rose]

تصدقينى لو قلت لك معرفناش قيمة عادل لبيب الا الايام دى بعد حالة الفوضى والعشوائية فى

الا ف المبانى الجديدة ومش مبالغة لو حصرتى عدد البيوت المزالة وطلع بدلها عمارات فى غمضة عين

مش عارفة يا مدام هند استوقفتني الجملة دي من مداخلة حضرتك

اصل انا بقالي 8 سنين برة اسكندرية و اخر عهدي بالمحافظين عبدالسلام المحجوب و اظن انه كان محبوب من الناس جدا لانه عمل اسكندرية من جديد

المهم كنت باسمع الناس بتشتكي من عادل لبيب و كنت واخدة انطباع عنه انه مش كويس

معقول هو كان كويس و الناس كانت شايفاه ايامها وحش؟؟

و لا هو كان وحش فعلا بس بعد اللي حاصل بقت النتيجة فين ايامه؟؟

[pink rose]

و شكر و تحية واجبة

لكل الاخوة و الاخوات ( سامحوني معلش انا عارفة الكلمة دي بتفكرنا بايام عاوزين ننساها بس مضطرة اقولها) اللي شاركوا في التوبيك دا

و اللي دعوا لبابا ربنا يحفظه

ميرسي كتير و الله كلامكم دا شجعني كتير بعد ما كنت خايفه اوي عليه

[se_ Elsyed]

ربنا سبحانه وتعالى هو الحق ...

وبالتالي هو دائماً بجانب الحق ..

ربنا يثبت والدك على قيمه ومبادءه دي ...

ويارب ما يكون واقف لوحده في وسط الغوغاء دول ... وموقفه بالرغم من ظروفه يخلي الناس اللي بصحتها يخلي عندهم دم ويقفوا جنبه ومش كل واحد يقول أنا مالي وسيبوه يحارب لوحده

وده كان من أسباب ثورتنا وغضبنا حتى قريب .. لما بنشوف المجلس العسكري وعصام شرف نايمين في الخط وسايبين جسم سرطاني بيننا إسمه المحليات سايبين الدنيا تضرب وتقلب ويقولوا ما ننفعش نحلهم إلا بقرار محكمة وقضاء ... منتهى التهريج

وكانت النتيجة إيه ؟

النتيجة إن ما تحكي عنه في الإسكندرية إنتي ومدام هند ... موجود أفظع منه في القاهرة .. اللهم احفظنا أنا ما روحتش الريف لإن الاجازة كانت قصيرة .. ومتوقع كوارث هناك لأنها مرتبطة بالتعدي على الارض الزراعية وتحويلها إلى كتل خرسانية قذرة ...

وصدقيني لو الجرائم دي بقت أمر واقع ولقينا المرافق إتوصلت لها وكله تمام ... يبقى نترحم على الثورة ..

فمهما كانت التضحيات .. ومهما كانت فظاعة المخالفات .. لابد أن تُزال وتكون عبرة لمن يعتبر وإلا يبقى ما عملناش حاجه ....

عارفين لو هانقول : ده واحد غلبان بنى دور مخالف عشان يجوز إبنه أو بنته .... هانقول ماشي ويا حرام ده فعلاً محتاج

لكن ما حدث هو كارثة ... كارثة و 6 شهور لا يوجد أحد سلط عليها الضوء ...

على فكرة كان عندنا في منطقة الزيتون فيلا فخمة قديمة ومساحتها كبيرة مملوكة للفنان محمود مُرسي .. وعارفين كلنا إن في قانون لمنع هدم الفلل وبناء عماير مكانها عشان الشكل المعماري ...

معماري مين ومحمود مرسي مين إيه جو أفلام الستينات اللي إنت عايش فيه ده ... هد يا عم .. وفي ثواني وفي الزحمة الثورية بقت شيء خيالي ... وغيرها وغيرها مئات العماير

اللي يغيظك بقى هو تساؤل : الفلوس دي جت منين ؟

وإزاي واحد يبني العماير أو المباني دي كلها من غير ما يعرف هو هايبيع لمين وفين وإمتى ؟

لكن ما أبصم عليه بالعشرة ومتأكد منه مليون الميه إن كل ده هو عملية غسيل أموال قذرة ... وأهو العماير متلقحه وولا بتاكل ولا تشرب ومصيرها تتباع

لكن زي ما قولت لكم .... لازم يكون هناك دور للمحليات ويمنعوا عنها المرافق ولو قعدت 100 سنة

[لماضة مصرية جدا]

السلام عليكم و رحمة الله و بركاته

انا داخلة اسأل سؤال واحد

هو والد حضرتك مرتبط :closedeyes: (معرفشي ليه اليومين دول معجبة جدا بمنتخب مصر للناشئين في سن الخمسين و ما فوق)

أينعم انا فاكرة موقف باباكي كويس ايام الثورة...(افكرك بقي بالهتافات و لا بلاش :P )

بس كلنا اهالينا كانوا كده

كانوا بيدوروا في قيود واحدة اسمها "الخوف"

خايفين

من بكرة

خايفين من اللي هيحصل

خايفين علينا و من تهورنا و من دماغنا اللي هتضيعنا

خوفهم

عمري ما هينفي حبهم

خوفهم عمري ما هينفي ان احنا اتعلمنا حاجات كتيرة اوي منهم

مش هقدر انسي انا ماما مع ان مبدأها هي و بابا ان احنا نمشي جنب الحيط و احيانا جواه

في يوم اتعاقبت في المدرسة عقاب مهين اوي...(رفعت الشنطة بايديا طول الحصة...طبعا انا اتحايلت ع العقوبة و قومت فضيت الشنطة من الكوتب قبل ما ارفعها...بس برضه اتعاقبت يعني)

انا فاكرة ساعتها انها قالتلي روحي للمديرة و اعترضي

قولتلها يا ماما احنا غلطنا

قالتلي روحي اعترضي ع العقوبة مش تدافعي عن الغلط

و سابتني اليوم اللي بعده

انا طبعا مروحتش...(مش هدعي شجاعة الكلام ده كان في تالتة ابتدائي و كانت المديرة بترعبنا باجة اسمها اوضة الفيران و انا لمضة اه بس مكنتش وقتها بحب الفيران و كدهوت)

اليوم اللي بعده عدت عليا في الفصل و اخدتني للمديرة و روحنا و كانت ليلة بقي

بابا يا بينكي

و ماما

و كل اهالينا

جواهم الفطرة الحقيقية

الفطرة اللي غطتها غبار السنين اللي فاتت

الفطرة اللي مبتقبلشي بالظلم و عمرها ما تشوف حاجة غلط و تسكت عليه

انتي بس شيلي الغبار اللي عليها وهتشوفي

المصري بجد

من غير خوف

و من غير خضوع

حتي من غير ثورة

مش محتاجين غير ان احنا نرجع لفطرتنا السليمة بجد

الحق حق

و الغلط غلط

جزاكي الله كل خير انك فتحتي طاقة نور لينا في وسط الالوان الرمادية دي اللي احنا عايشينها

متخفيش علي بابا

علشان ربنا هيكون معاه و هو اقوي و اعدل و ارحم مننا كلنا

و سلامي لبابا كتير لغاية ما نيجي نزروكم في الصالون و نطلب ايده رسمي :wub:

مساكي.....ثورة مصرية بحق و حقيق