أي كلام

[لولا]

اولا .. بشكرك يا عصام انك رفعت الموضوع بمشاركتك اللى بجد فى الصميم.

الحقيقة انا كمان عندى كلام .. بس مش عارفه هو ايه ؟؟!!

نفسي بس اتكلم ... حتى لو كنت حقول اى كلام !!

مفتكرش حلاقى مكان احسن من هنا ... مكان بيتقال فيه اى كلام ..

اى حاجه عايزين نقولها وملهاش عنوان .. ملهاش يمكن حتى بدايه

ملهاش لا اول ولا اخر .. مجرد كلام ..اى كلام .

ومحدش يقولى طب هو فين الكلام ..هو ايه الكلام ... لأنى بجد مش عارفه الكلام!!

انا بس مخنوقه اوى .. قلت ادخل اقول اى كلام .. ومستغربه اوى من نفسي انى حتى مش

لا قيه كلام ... ياااااااااه احيانا بيكون السكوت عن الكلام ... احسن بجد من الكلام..

حنستفاد ايه لما نقول اى كلام ؟؟ لا الكلام بيريح ... ولا ال اى كلام بيريح.!!!

لكن اهو ادينى عرفت السكه.. حبقى اجى تانى ... بس لما يبقى عندى ع الأقل...اى كلام!!

لولا.

[~Heba~]

كانت لنا أيام نخلو بها ويحمينا هوانا نعتصر شوقاً وتدفعنا قوانا ... كانت لنا أيام

نرسم قلبينا على جذع الشجر ندون ذكرانا ويحلو لنا السمر... نتحاور و نطلق الضحكات

كنا طفلين نحلم بالهناء وكبرنا فصارت أحلامنا كالندى وكبرنا أكثر فصارت آمالنا

كشذا التربة كباقات الزهر.. كنورس يحلق في الفضاء.. كقارب يبحر دون عناء.. إلى

شاطئ اللقاء والوفاء كانت لنا أيام وكان الفرح يهتف لنا بالعلا بالسمو

بالخلود وبحب جار كنهر دافئ وكزخات المطر

كانت لنا أيام..

كلمات اعجبتنى...لكنها مش اى كلام

wst::

تم تعديل 8 نوفمبر 2008 بواسطة ~Heba~

[~Heba~]

عود الفجر لسه بيبتسم بين دمعتين

عود الفرحة ممكن تتقسم على شفتين

عود

الوهم مات

والذكريات قالت لى حبك بالوجود

عود يا ريت تعود

البسمة ممكن تترسم..على شفتين

عود...ياريت تعود

يا ريت تعود

عود..ياريت تعود

ياريت تعود

احنا زمان كنا الزمان

كنا الهوى من غير هوان

كنا الامان من غير حدود

الوهم مات و الذكريات قالت لى حبك بالوجود

ياريت تعود

ياريت تعود

عمرى اللى راح سماح

يا حب اكبر م الجراح

رجعنى للوجود

عود ياريت تعود

أحمد الحجار

تم تعديل 11 نوفمبر 2008 بواسطة ~Heba~

[alaashabana]

زمان قبل ما اشترك فى الموقع هنا بنية الكتابة فكرت بدل المرة ألف

وبقيت باسأل نفسى أنا هاروح فين بين الناس دى

يمكن لو كتبت حاجة تطلع سطحية بالنسبة لهم ويبقى شكلى وحش

ولما بدأت اكتب بعد سنتين من القراءة فقط كنت حريص جدا ودقيق جدا عشان كلامى يبقى على المستوى الفكرى للناس الموجودة

دلوقتى باستغرب ازاى ان المحاورات فى الوقت اللى فيها عقول تتمتع بالعمق فى التحليل والثقافة الواسعة واتساع الاطلاع بتضم بين أجنابها أيضا عقول غاية فى السطحية والجهل وضيق الأفق

دا مسبب أزمة

الأزمة ان لما بيتم فتح موضوع جديد عميق ومحفز للأفكار ويدخله أحد هؤلاء يتحول فجأة إلى موضوع تافه وسطحى فيحجم هؤلاء الأولانيين عن استكماله ويتركوه لمصيره المحتوم اللى هو إما الإغلاق أو الردم تحت الموضوعات الجديدة

واهو فى الآخر

أى كلام

كلامك جميل اوى ...يمكن خلانى افكر فعلا انا كمان قبل ما اكتب اى كلمة بس حسيت امى عاوز ارد عليك مش عارف لية

اوقات كتير اوى لما بقرا مواضيع مش بيجيلى الشجاعه اكتب يمكن فعلا تكونى معلوماتى سطحية اوى موضوع مش مهم وفى الاخر بيتقفل او بيترمى فى الصفحة ال100

بس لما شوفت الموضوع دة انهاردة اول مرة ولاقيتة انه من زمان اوى استغربت فعلا ..

سألت نفسى ياترى اللى كتب الموضوع دةفين دلوقتى ..لسة موجود وبيقرا المنتدى ,,ولا الدنيا شغلتة بمشاكلها وافراحها اوحزانها..

ياترى لو جية وشاف ان الموضوع بتاعة اللى بدأة انه مش لاقى موضوع محدد يتكلم فية لسة لغاية دلوقتى الناس بتفتحة وتقرأة وبتكتب فية ..ويممكن استفادنا منه وضحكنا من قلبنا ..واتجمعت الافكار والمشاهد المختلفه اللى عند الناس.,, ياترى هيبقى احساسة اية ،،،فرحان ،، مبسوط ،،، حس انه بكلمة طلعت من قلبة وانه مجرد عاوز يفضفض وخلاص بنى موضوع كويس وناس كتر بدأ تقرا فية ...

اسألة كتير فى دماغى..

ساعات الواحد مننا لما بيفتكر مكان كان فية زمان وبيقول لو انا رجعت المكان دة ولاقيت ناس جديدة ياترى هيكونو عارفين انى كنت هنا فى يوم من الايام ...

ياترى هى دى الحياة ...اماكن نسيبها واماكن نروحها..ناس نتجمع معاهم وناس نفارقهم.. ساعات بسأل نفسى لية الناس مش بتسأل على بعض....دائما بيبقى الرد اننا مشغولين ..والحياة وخدانا حتى من اهلنا واصحابنا ..

ياترى لما هنموت الناس هتفضل فكرانا قد اية .. ولا بردو الدنيا هتنسينا اعز الناس اللى فرقونا وبقوا فى دنيا تانية..

نفسى لو ربنا راد وادانى طولة العمر وبقى عندى 80 سنة يكون معايا اصحابى اللى كانوا معايا فى الجامعه..او فى الشغل ..

لكن ياترى لما نكون عندنا 80 سنة هنبقى مع مين...مين هيكون جنبنا...مين اللى هيفكرنا بايام شبابنا وذكرايتنا..

وهل هنبقى لوحدنا...

شوف نهاية الطريق وباص لبعيد اوى..وتخيل حياتك... ساعات بخاف وساعات ببقى عاوز اكبر بسرعه يمكن ابقى وسط احفادى واولادى... ساعات بخاف هما كمان كل واحد الدنيا تلهية واكون لوحدى ..وهموت لوحدى..

تحياتى لكاتب الموضوع ..واتمنى بجد يكون لسة بيقرا ..لانه مش مجرد فتح موضوع نتكلم فية..لأ دة فتح قلوب ناس نفسها تتكلم فى اى حاجة وفى كل حاجة..تطلع اللى جواها...

[الباشمهندس ياسر]

يا ترى ايه اللى بيحصل ....... انا مش عارف اتارى كل شىء قابل للتغييييير

تقريبا نبقاش فيه فناعات ثابتة ف الحياة ولا ايه

يعنى مثلا هل اصبح الشرف غريبا اوقااااات كتير بقيت بحس كده

و اوقاااااات تانية بحس ان الوضع بقى صعب اوى

و الناس ماشية ف الشارع ولا حاسة ..... دايرة وبتدور و ياترى على مين الدور

[~Heba~]

يقال ان الشر يكمن فى التفاصيل

ماذا تعنى هذه المقولة؟

[goodnewss]

كان في واحده ست عندها اتناشر بنت في يوم قالولها ياماما عايزين ناكل توت جابتلهم توت كل واحده أكلت توته توته توته فرغت الحدوته حلوه ولا ملتوته

[~Heba~]

يا نفس لا تقنطي من زلّــة عظمت ... إنّ الكبــــائر في الغفران كاللمم

لعلّ رحمة ربي حين يقسمـــها ... تأتي على حسب العصيان في القسم

يا رب واجعل رجـائي غير منعكس ... لديك واجعل حسابي غير منخرم

والطف بعبدك في الدارين إن له ... صبـراً متى تدعـه الأهـــوال ينهزم

وأذن لسحب صــــلاة منك دائمــــــــة ... على النبي بمنـــهل ومنسجم

:) :P

تم تعديل 18 مايو 2009 بواسطة ~Heba~

[لولا]

الباني طالع و الفاحت نازل ......... صدقت يا عم شهبور !!

--------------

لكن مهما كان

لسه كلام عمر طاهر بيقول

عمال اقع واقوم

انفض في الهدوم

وامشي خطوة كمان

القى الطريق يبان

مش زي ما كان زمان

بالعكس اسهل كتير..

[عصام]

بقالى فترة كل ما ادخل المنتدى أشعر انى فى أفغانستان ..

وقاعد حواليا شوية ناس لابسين عمم ..

وبيدونى دروس ..

عمال على بطال ..

لدرجة انى قرفت ..

واتخنقت لدرجة انهم أعطونى شعور بأنهم هما بس اللى هايدخلوا بالجنة .. وإنى وباقى الناس كفار وهانروح جهنم !!!

وكل دا رغم انى مجرد قاريء .. وأبلغ من العمر الأربعين .. وياما قريت كتب !!

سبحان الله ..

ربنا بقى يتوب علينا (أو عليا عشان ما حدش يزعل)

[أسد]

الصوت المرتفع هو الذي يظهر ويكون مسموع أكثر

زعق ..

الناس حتسمعك إنت ..

كل ما صوتك كان أعلى من غيرك .. الناس حتسمعك إنت ..

مش مهم بتقول إيه .. مش مهم كلامك حيودينا فين ..

مش مهم أي حاجة ..

المهم إن صوتك يكون عالي .. وتزعق ..

هو ده بقى حالنا ..!!!!!

[الباشمهندس ياسر]

صباحكو نادي بالصلاة ع النبي الهادي

النهارده يوم اكثر من رائع

رغم كل الظروف اللي مش ولابد .. الا ان اليوم رائع

امانة عليكم

محدش بنكد علينا

[لولا]

- علاقتك ايه بالمتهم ؟؟؟؟؟؟؟؟؟

- متهم !! هو متهم ؟؟؟؟؟؟؟ كل خير ,, جارى لا مؤخذه ,, اعرف عنه كل خير يعنى .

- امممم اتدخلت ليه طيب فى الخناقه بينه وبين المعلم برعى ؟؟!!

- مش فاهم قصدك ايه ؟؟

- انت هتستعبط !!!!!! مين قالك تتدخل اصلا !!

- هو التدخل جريمة حضرتك ؟؟ المعلم برعى سيد المعلمين وعلى راسى من فوق..

بس انا كنت مقتنع ان رأيه غلط ودخلت اقول كده بكل ادب بما يمليه عليا ضميرى

- يعنى عايز تفهمنى ان ده كان رأيك وان عندك ضمير ؟؟

- طبعا رأى يا فندم وضميرى مقبلش ان حد يشكك فيه .

- يعنى مكنتش مندفع بحكم الجيره ولا بتجامل ولا طمعان فى طبق فته عزومة عند جارك !!!!!!!!!!!!!!!!!!!!!

- ايه ده ..ايه ده .. هى الحياة كلها عندكم بقت كده !! الناس كلهم فى نظركم كده !!

الحقيقه معنديش تعليق .. كل يرى الناس بعين طبعه ودماغه واخلاقه !!

والجرجرة والشده دى يا فندم مش هتخلينى اخرس مستقبلا وابقى خايف ان اتدخل فى اى موقف احسن اتهم بانى بتاع مصلحة

ولا ماشي اطبل ورا فلان .. خصوصا لو بالصدفه كان جارى !!

مجرد مسرحيه مكررة من مسرحيات الحياة ... لا اظن فصولها تؤثر الا فى شخوص الضعفاء لتخرس اصواتهم بما يواجهوه من تشكيك هو سلاح الضعفاء.

-----------

لولا

[حسام يوسف]

مش اى كلام

صديقي العزيز زوهيري

اعتذر لك بشدة

غلطتك فى الحوار الغير مجدي

وبعد ما قلتلك ما تطلعش الشجرة

طلعتها أنا

حقك عليه يا زوهيري

وحقك عليه يا حسام

[لولا]

ربما نهذى.. تنبت الكلمات فوق رؤسنا

لا ندرى عن اى معنى تجلت !!

لا .. لا .. لا

ربما ندرى ولكن من المفيد ان نتظاهر اننا لا ندرى !!

او ..

ربما هى قفزة انتحار جلبها حرف "شائك "

ليست كل الأيام بحالة جيدة .. امممم من المفيد ان نعى ذلك

بعض الأيام مصابة بالصداااااااااااااع !

لا ترمى بثقلك يا زمن على ، يكفينى من التعب ما تحمله اكتافى !

لولا

[president]

تعودت فى خلافاتى أن أعاتب من أحترمه وأقدره ... وأن أهاجم من يتجاوز معى ...

هناك خيط رفيع بين العتاب والهجوم ... فى بعض الأحيان قد لا ألتمس هذا الخيط ... أو تخوننى مفرداتى فى التعبير ...

فى جميع الأحوال أهتم بان يفهم من أحترمه اننى أعاتبه ولا اريد ان أضمر له شئ من الضغينه ...

لذلك تخرج كلماتى معبره عن انزعاجى ...بدلا من أن تظل حبيسة فى صدرى فيتبدل الأحترام الى حقد وضغينه ...

اتمنى ان يفهم جميع الأعضاء بلا استثناء ان انزعاجاتى هى نوع من العتاب ....

[إيزيس]

ليه الناس كلها متربصة و مستعدة للهجوم :ninja:

ليه بيقول كده؟

ليه ماقالش كذا؟

ليه عمل وليه ماعملش؟

و بعدين نقول دع الخلق للخالق

تقريبا مش فاهمين معناها

آآآآآآه لو نفهما

[إيزيس]

بقالى فترة كل ما ادخل المنتدى أشعر انى فى أفغانستان ..

وقاعد حواليا شوية ناس لابسين عمم ..

:ninja:

تورا بورا ترحب بكم

و تقدم لكم قائمة الأعمال الانتحارية شعارنا

اختار لك موتة و الكفن مجاناً

[Scorpion]

رب قومآ ذهبوا الي قوم

فلما القوم الأولانيين راحوا للقوم التانيين

ما لقهوموش

فخدوا بعض و روحوا ...

:ninja:

[عصام]

رب قومآ ذهبوا الي قوم

فلما القوم الأولانيين راحوا للقوم التانيين

ما لقهوموش

فخدوا بعض و روحوا ...

:ninja:

تعرف يا كيمو؟

دى الميزة الكبيرة جدا فى الموضوع دا .. wst::

إنك تقدر تقول أى كلام فارغ من غير ما حد يحاسبك :blink: