أي كلام

[Ahmed Mohsen]

10 صفحات ........

موضوعي حبيب قلبي ونور عيوني كبر وبقي عنده عشر صفحات بحالهم .....

يارب عقبال ميييييييييييييييييييييييت سنة ... قصدي ميتتتتتتتتتت صفحة

أنا ماكونتش متخيل أبدا إن الـ "أي كلام" ممكن يبقي كتير قوي كدة

متهيألي الموضوع ده بيدل علي أن المصريين بطبعهم مابيحبوش القيود ... بيحبوا يبقوا براحتهم ويتكلموا في أي حاجة وكل حاجة

علي العموم .... Go Ahead .... استمروا

عايز دووووووووووووووووووشة :angry: cr((: tot:: tot::

إعملوا هيصصصصصصصصصصصصة arg:: arg:: arg::

إرغغغغغغغغغغغغغغغغغغغغوا رغيا كثيرااااااا phn: phn: phn:

[Tafshan]

بس في فاكهة أموت وأجربها .. هي حاجة عامله زي المنجا بس كبيرة وشبة جوزة الهند وهي خضرا .. أعتقد إسمها الباباي أو الباباز ....

اسمها البابايا و دي فاكهة مفيده جداً و فيها فيتامين E , و ده مفيد جداً للجلد و الشعر و عشان كده اغلب الكريمات و الشمبوهات في منها بالبابايا و طعمها ظريفجداً بس نقيها مستويه قوي و هي لما بتستوي بتبقى صفراء من بره و برتقالي مِحمِر من جوه بس فعلاً ريحتها مش ظريفة .. كلها و ما تشمش !

[maksoof]

هى دى البابايا ؟

[فــيــروز]

مبروك عليكى عريسك الخفه يا عروسه ..

المحل الموجود اسفل البيت يدير الآن مسلسل تذاع به هذه الغنوه

ورغم انى سمعتها مئات المرات من خلال الراديو او التليفزيون اول مره اسأل نفسى ما المقصود بكلمة "خفه" هذه !! دمه خفيف مثلا؟ ام وزنه ام روحه ام ماذا بالظبط هو الذى جعله يتسم بالخفه !! :angry:

دى حتى كلمة خفه حاليا تعتبر شتيمه !! كما أن اخذ الامور بخفه يعنى عدم التعقل و الاتزان فى الامور !! ده اللى بناخده من المسلسلات .. وجع الدماغ على الفاضى cr((:

تم تعديل 30 أكتوبر 2004 بواسطة فــيــروز

[Tafshan]

هى دى البابايا ؟

بالظبط !

و ادي صورة للشهرة !!

[Ahmed Mohsen]

عاجبك كده يا عم طفشان ........

أهي الصورة اللي إنت حاططها للفاكهة اللي اسمها "بابايا" وقفت نمو موضوعي حبيب قلبي ونور عيوني

وعمالين تقولوا مليانة فيتامينات ومفيدة وحاجات كدة كتير .......

عاجبكم بقي ............ حد يعالجلي موضوعي ويرجعله نموه من تاني

أنا مستعد أسفره بره يتعالج علي حساب الإدارة

أيوة طبعا ... علي حساب الإدارة ... أهو يصرفوا فلوسهم علي علاج مواضيع المنتدي بدل الأكل والشيشة في جراند كافيه

[Salwa]

الصراحة انا مش عارفة ليه ساعات بفكر فى حاجات غريبة ....

يعنى بسأل نفسى .....

فى وسط كل اللى بيحصل فى العالم وفى بلدنا وفى بلاد جنب بلدنا ......واحنا مش قادرين نعمل حاجة ...لالالا.لا..الصراحة بنعمل .

بنحتج.....

نحتج هنا .....نحتج فى بيتنا ....

بنحتج فى سرنا .........جوة نفسنا ....

ايهما اكثر فاعلية ؟؟؟؟؟

الاحتجاج الصامت .....ام.......الاحتجاج الصاخب ؟؟؟؟

نحتج ضد القوانين المتعسفة ....عن طريق الانترنت فقط ؟؟

ازاى نقوم بحرب اعلامية ؟؟؟....

مثلا والا نعمل زى ما عملت fbi...التى تريد ان تتحد مع ال isp..للحصول على معلومات سياسية ؟؟؟؟

ونوظف اى شئ لصالحنا ؟

ولا نعمل زى الجرائد التى لا تخضع للحكومة ونعبر عن راينا بالكاريكاتير ؟؟؟؟؟؟

والا نعمل احتجاج بالاعتصام والجوع ؟؟؟؟؟؟

والا نخرج فى مظاهرات .......ونحمل لافتات !!!!!!

نعمل ايه ؟؟؟؟؟؟؟

نرفع قضايا على المسئولين ؟؟؟؟

نطالب بمحاسبة كل مسئول ....ولو عن طريق ملصقات فى الشوارع ؟؟؟؟؟

كيف نحتج ...........؟؟؟؟؟؟

ازاى يوصل صوتنا ويكون فعال ؟؟؟؟؟؟؟

محتاجين لأحبال صوتية قوية !!!!!!!

بدلا من احبال الاتكال التى نعلق عليها كل مشاكلنا ...

.( الناشيونال والانترناشيونال ).....

انا مش عارفة بكتب الكلام ده ؟؟؟؟؟...يمكن علشان الموضوع ده اى كلام .....وانا نفسى اقول كلام كتير ...اعرف بدايته لكنى معرفش نهايته .......

وزى ما بيقولوا ........احنا بنتغير كل ثانية .....مش كل دقيقة .

كل حاجة فينا بتتغير على طول على طول وبطريقة منتظمة ومستمرة .....

مين عارف ؟؟؟؟؟؟

يمكن نلاقى طريقة فعالة للاحتجاج اللى ممكن يؤدى لنتيجة ايجابية ........

صباح الخير ........

[se_ Elsyed]

تحذير هام :

برجاء ابعاد زوجاتكم عن برامج الطبيخ في قناة دبي

السبب :

في يوم كنت فاضي بقلب في القنوات لاقيت برنامج طبيخ في دبي  الفضائيه :

 

طب وقناة دريم .. أخبارها إيه ؟

اول أمبارح بأتفرج على برنامج الكورة مع دريم وكان في على الناحية التانية من دريم برضوا برنامج طبيخ .. المهم سيبت الكوره ومسكت في الطبيخ لأن الأكلة عجبتني قوي .. وهي بسيطة ولذيذة ويُمكن للعزاب مثل Yasovinas أنهم يجربوها بدل التردد على المحلات لأكل مختلف المأكولات ..

- وهي خليط من المطعم الإيطالي والصيني .. ونسيت إسمها بس يمكن ماركوني أو حاجة زي كده .. بس أنا سميتها إسم خفيف وبسيط وهو " سين بيف "

المقادير :

- نصف كيلو لحمه متقطعة على هيئة بفتيك .

- خضار مشكل ( فلفل رومي ، بصل ، جزر ، ممكن أوراق كرنب )

- معلقتين زبدة وربع كوب زيت طعام

- كوب دقيق

- نصف ملعقة شاي ( توابل )

طريقة التحضير :

- تجيب البفتيك وتنقعه في بصل مبشور وتوابل وخل لمدة ساعة

- تقطع الخضروات دي شرايح صغيرة وتضع مقدار منها داخل البفتكاية وتلفها كأنك بتلف سيجارة في ورقة بفره .

- وبعدين تدبس البفتكاية وتقفلها بخلة أسنان .

- وتلغمطها بعد كده في الدقيق .

- توضع الزبدة مع الزيت في طاسة .. طب واحد يسألني ويقولي يا كابتن س س إيه فايدة الزبدة مع الزيت .. أقول له اولاً هاتديك طعم كويس .. ثايناً لو حطيت زبدة لوحدها هاتتحرق وتسود وتبقى مورته .. ولو حطيت زيت لوحده يبقى كأنك بتاكل طعمية والجيران هايقولوا عليك بخيل وبتطبخ بزيت .. ما علينا مالناش دعوة بالناس .

- وتقلب اللحمة في الطاسة لمدة 5 دقائق وبعد كده هدي النار عليها وتسيبها كمان 10 دقائق .. في نفس الوقت تقوم جايب شوية خلطة خضار من المتقطعين دول وحاططهم في الطاسة يستووا جنب اللحمة ..

- بعد كده تشييك على اللحمة بالشوكة وتشوفها أستوت ولا لأ هي والخضار .

بعد ما تستوي ما تنساش تدعي للشيف س س .. لأني لسه مجربها أمبارح بنفسي وبصراحة في منتهى اللذاذة خاصة لما تكون عمايل إيدك .. وأم العيال واقفه تتفرج عليك وانت راجع المطبخ بعد 15 سنة من الإعتزال .

الغريب بقى إني سمعت كلام واحد هنا وأعتقد هو Yaso .. وقولت أجرب للمرة الأولى إني اعمل بنفسي الكنافة النابلسية .. طول عمري بأكلها جاهزة واول مره اغامر وأعملها بنفسي ... وروحت إشتريت كنافة نيه .. وحسب نصيحتك يا وش الخير جبت جبنة حلومي من ام 32 ريال الكيلو ( حسبنا الله ونعم الوكيل ) وإديها يا عم في الفرن .. وسقتها شربات وكله تمام التمام .. طبعاً الصبغة البرتقالي اللي بتترش على وشها دي ما عملتهاش لأني مش عارف هي إيه أساساً بس هي كماليات يعني.. المهم بقى جيت اكلها طلعت حاجة مسكرة على مملحة لأن الجبنة طلع طعمها مملح ... وكنت ناوي أخد حتتين وادوقهم لهاندي كرافت لكن الجدع صعب علي وقولت أحسن يحصل له حاجة .. وأدي أخرة اللي يسمع كلام عزاب يا سي Yaso >>>

[Salwa]

الأكلة دى بتتعمل هنا بس بالشرائح الرقيقة لصدر الدجاج...

اما اللحم الستيك .....فبيكون بشريحتين رقيقتين وبينهم جبنة موتزاريللا.او جبنة الترانشات الايمنتال ..وايضا تقفل بالخلة ....من الناحيتين او من اربع نواحى بالنسبة للمبتدئين فى موضوع المطبخ.

على فكرة بعد كذا مرة ......بتتعمل بدون ما تمسكها بالخلة ....

كنت قلت لكم على موضوع المطبخ المغربى ...

البرنامج ده بييجى الساعة خمسة الا ربع حسب توقيت مصر .

على القناة المغربية طبعا ..

[Tafshan]

عاجبك كده يا عم طفشان ........

أهي الصورة اللي إنت حاططها للفاكهة اللي اسمها "بابايا" وقفت نمو موضوعي حبيب قلبي ونور عيوني

mfb:

و الله ما كان قصدي !!

هي الصورة طلعن خليعة ولا حاجه ؟؟ على العموم انا اسف يا جماعة ...

.. وحسب نصيحتك يا وش الخير جبت جبنة حلومي من ام 32 ريال الكيلو ( حسبنا الله ونعم الوكيل ) وإديها يا عم في الفرن .. وسقتها شربات وكله تمام التمام ..

عزيزي س س ، واضح ان البطون عند بعضها !! و ان لنا اهتمامات مشتركة

انا عملت زيك تمام و طلعت الكنافة مش mfb: بس انا ما سكتش mc: روحت السوبر ماركت و جبت الراجل اللى بعها لي من دماغه .. قالي : هو انت ما نقعتهاش ؟ :blink:

قلتله : لأ

قال لي لازم تتنقع على شان الملح يروح ...

قلت له : والكنافة ؟؟؟

قال لي : يعوض عليك ربنا mf(

[Farida]

الأكله اسمها بوبييت بالخضار ....بس بجد يا سى السيد الأكله حلوة طب حطيت خضار ايه اصلى عايزه اجربها و اللحمه كانت بتلو ولا كندوز

[se_ Elsyed]

قال لي لازم تتنقع على شان الملح يروح

ما هو ده اللي عرفته ياخويا بعد ما خربت مالطه وخسرت الـ 32 ريال ..

عرفت إنك لازم تنقع الجبنه لمدة يوم او يومين .. وكل شويه تغير الميه - ده الواحد ولا كأنه بيعمل ترمس - وبعد ده كله شوف العج ببقى .. تغليها شويه في ميه سخنه عشان تتخلص من الملح المتبقى ..

مش لاعب يا عم ده الكيلو جاهز عندنا بـ 40 ريال وإنت زي الباشا وأخر راحه . يعني حشوة الجبنة اخلى من الكيلو الجاهز ... شوفت الحرفنه ؟

العجيب بقى إني مارضتش أرمي بقية الكنافة وقولت وجع البطن ولا رمي الطبيخ .. وخليتها لتاني يوم قولت يمكن الملوحة تضيع ... لكن إنسى يا عمرو جيت باخد حتة ألاقيها .. علجم والله علجم ... وبقت كنافة مخلله .

فريده كتبت

الأكله اسمها بوبييت بالخضار

بوبيت إيه ومابيت شو إيه .. يا ستي الإسم الجديد احلى .. إتأملي كده معايا وشوفي المزيكا .. " سين بيف " يكفي إللي هاييجي ياكل هايفتكرني .

حطيت خضار إيه

فضلت خيرك .. جزر ، فلفل رومي ، بصل ، طماطم ... واهم حاجة الخضار اللي بيستوي جنب اللحمة بيبقى طعمه جنان .

اللحمه كانت بتلو ولا كندوز

بتلو عقبال عندك .

بس بجد جربيها .. طعمه لذيذ جداً .

[فــيــروز]

فاكرين فيلم الكيف؟ :)

اما جميل راتب كان بيقول ليحيى الفخرانى انه بدا حياته تاجر تموين .. وكان بيغش الشاى و يضيف عليه نشارة خشب و الناس اقبلت عليه بشده !! وبعدين اما النشاره غليت بقى ارخص له يبيع الشاى صافى حتى لا يخسر !! قاموا الناس ظنوا انه بدا يغش الشاى و بارت تجارته و افلست !! :o

يحيى الفخرانى رد عليه رد بليغ اوى وقال : من كثرة افساد فطرة الناس السليمه بالاشياء الفاسده لم يعودوا قادرين على التمييز بين الجيد و الردئ mfb:

هذه الجمله اتذكرها كل رمضان :) لانى لا آكل زبادى سوى خلال هذا الشهر .. زمان اما كنا بنشترى الزبادى من البقال كان بيكون فضل عنده كام يوم .. فكان بيبقى طعمه فيه حموضه شويه .. وانا كان بيعجبنى كده و ترسخ لدى اعتقاد ان هذا هو الطعم الصح للزبادى

وبعدين ماما قررت تعمل الزبادى فى البيت عشان يبقى طازج !! طبعا اصبح بدون حموضه !! :rolleyes: واصبحت لا اطيق تذوقه وارى انه ليس له اى طعم !! رغم محاولات امى المخلصه لاقناعى ان طعم الزبادى كده اصلا وان اللى كنت باكله زمان ده لا يعبر عن جموع الزبادى الطازجه .. واهى ايام :blink:

[se_ Elsyed]

وبعدين ماما قررت تعمل الزبادى فى البيت عشان يبقى طازج !! طبعا اصبح بدون حموضه !!  :rolleyes:

تحية طيبة للخالة أم فيروز ..

أدي ستات البيوت المنتجين .. مش اللي بيعتمدوا في اكلهم وشربهم على المعونات الخارجية ...

النهاردة زبادي .. بكره نجيب فرن صاج صغير ونعمل عيش وفطير مشلتت وداخل علينا العيد فنديها كحك وبسكوت وغُريبه .. ربنا يكرمنا قدام بقفص فراخ نربيهم وندبح كل أسبوع .. ومع حوافز اخر السنة ممكن نجيب خروف صغير لزوم عيد الأضحى... بعد كده مش عايزين حاجة من الحكومة ولا نظيف ولا مش نظيف .

طب والله أنا بأتكلم جد .. يعني لو في مكان ووقت للحاجات دي ليه ستات البيوت ما تعملش كده ؟.. أهي تخفف شوية عن الدولة وفي نفس الوقت تظبط ميزانية بيتها .

فيروز في هنا جهاز كده عامل زي الميكرويف بيتباع بـ 100 ريال ويستخدم لعمل الزبادي .. عايزك تعمل لي دراسة جدوى وتقارني بين سعر الزبادي الجاهز أبو ريال وبين عمايل الزبادي في البيت .. بليز ..

يمكن ربنا يكرمني والمشروع ده ينجح وأجيب بسكلته واهم حاجة تكون بزمارة وصندوق ورا وأبقى موزع الزبادي البيتي الأول في الرياض .

وهايبقى شعاري ساعتها ... حليييييييييييييييييييب وقششششششششطه ...

[فــيــروز]

لا طبعا يا س.س. من غير دراسة جدوى ولا صندوء اجتماعى "على راى عاطف عبيد" :o

خالتك ام فيروز اقرت و اعترفت منذ زمن بعيد ان الزبادى البيتى ارخص كثيرا من المستورد من البقال .. خصوصا ان فى رمضان مش بنعرف نعمل ايه باللبن وبيكون الزبادى مناسب جدا لحالة قلة الاكل اللى بنعيشها

وعلى فكره الامر لا يحتاج الى مجهود شاق ولا تكلفه كبيره يعنى دى حله فيها لمبه وبيحطوا فيها كوبايات اللبن وعليه الخميره من ناحيه يطلع زبادى من الناحيه التانيه :) .. وطبعا فرق وهمى فى السعر .. وكمان وصلنا لاتفاق تفاهم بانها تجيب الخميره من علبة زبادى مش طازجه اوى يقوم الزبادى يطلع طعمه فيه حموضه وكله ييجى مبسوط ..

وعلى فكره مره جربنا نعمل عيش فى البيت .. بسبب الكائنات الحيه اللى موجوده فى العيش mfb: فانا اعلنت العصيان على العيش البلدى وقلت هاعيش على الفينو و غاندى مش احسن منى !! :blink: بس لم اكن ادرك ان العيش البلدى مهم لهذه الدرجه لان بعد اربعة ايام بقيت احس بهزال غير طبيعى "اتاريهم بينصحوا الستات اللى عاوزه تخس انها ماتاكلش عيش" :rolleyes: .. فماما جربت تعمل لى عيش فى البيت بس للاسف فشلت التجربه فى الغالب لانه محتاج فرن مخصوص :)

[Tafshan]

أدي ستات البيوت المنتجين .. مش اللي بيعتمدوا في اكلهم وشربهم على المعونات الخارجية ...

النهاردة زبادي .. بكره نجيب فرن صاج صغير ونعمل عيش وفطير مشلتت وداخل علينا العيد فنديها كحك وبسكوت وغُريبه .. ربنا يكرمنا قدام بقفص فراخ نربيهم وندبح كل أسبوع .. ومع حوافز اخر السنة ممكن نجيب خروف صغير لزوم عيد الأضحى... بعد كده مش عايزين حاجة من الحكومة ولا نظيف ولا مش نظيف .

و الله ميه ميه، هسة دي اخلاق القرية صحيح :rolleyes: .. بلا حكومة بلا وجع قلب

[kfaya]

س س كتب :

سعر الزبادي الجاهز أبو ريال وبين عمايل الزبادي في البيت

صباح الفل يا عرب .... كوباية الزبادى اللى يا دوبك تلات معالق ب 90 قرش .. يعنى أسرة من كام نفر ممكن تدفع 150 جنية فى الشهر الكريم بند زبادى بس !!! :blink:

نفس الكوباية لو أتعملت فى البيت تتكلف 15 قرش .... fsh::

بقت سرقة عينى عينك ... يعنى ست البيت اللى مش متوتكة تخلص مرتب جوزها من أول أسبوع .. :P

[se_ Elsyed]

صباح الفل يا عرب ....

يا كفاءه أنا أسف حصل لبس في الموضوع .. انا قصدي ريال سعودي مش ريال 20ساغ .. حيث إنه أقل عمُله هنا .. وعندنا علبة الزبادي بريال أياً كان نوعه .. جُهينة ..نستلة ... المراعي .. أم عبدو .. كله بريال وقرب قرب ..

بس تعرف شركات الألبان بتدبح بعض في شهر رمضان .. وغير رمضان بصراحة من حيث عروض الأسعار وتحسين وتنويع المنتجات .. وكله في صالح المُستهلك.

[Lighthouse]

بس تعرف شركات الألبان بتدبح بعض في شهر رمضان .. وغير رمضان بصراحة من حيث عروض الأسعار وتحسين وتنويع المنتجات .. وكله في صالح المُستهلك.

احنا بقى عندنا شركات الالبان وغيرها من الشركات الاخرى تنتهز فرصة رمضان حتى ينزل التخفيض على العبوات

فتجد عبوة الزبادي اصبح اطارها السفلي اكبر للداخل واصبحت العبوة اكثر رشاقة حتى تأخذ كمية زبادي اقل ويكون طولها ثابت dct::

حركات غريبة من دي

غير طبعا ان السوبر ماركتات تقوم بعملية غش سمجة فتخفي الزبادي الطازج بتاريخ اليوم مثلا في آخر ثلاجة العرض وترص الزبادي الاقدم امامه واللى عارف الحركة دي ح يقلب لغاية مايوصل للطازج واللى مش عارف يايشتري البايت ياروح بيتهم وخلاص :angry:

احنا بقالنا كذا سنة بنعمل الزبادي في البيت

وحتى الفول بندمسه في البيت اصلا

يعني لانشتري من الخارج الا المواد الخام فقط

مضمون النضافة بخلاف التوفير طبعا stnd::

[فــيــروز]

غير طبعا ان السوبر ماركتات تقوم بعملية غش سمجة فتخفي الزبادي الطازج بتاريخ اليوم مثلا في آخر ثلاجة العرض وترص الزبادي الاقدم امامه واللى عارف الحركة دي ح يقلب لغاية مايوصل للطازج واللى مش عارف يايشتري البايت ياروح بيتهم وخلاص  :angry:

وطبعا تنمو اجيال مخدوعه وهى متخيله ان ده الطعم الاصلى للزبادى stnd:: كلهم خونه cbyb: