خطوات مكتب التوظيف السعودى ممكن تفيد أى حد

[asamee]

السلام عليكم

وصفة بسيطة للى عايز يسافر تبع مكتب التوظيف السعودى من الاطباء

الاول انت بتروح المكتب وتقدم app. ورقة الابليكاشن بتملاها من هناك بس تكون عارف تاريخ موافقة مجلس الجامعة على الشهادات الخاصة بالتخرج

وبعد كده هيقولولك هنتصل بيك

بس يا ريت تتابع انت لأنى عملت كده وفجأة لقيت واحد زميلى بيقولى تعالى بسرعة اخر يوم فى امتحان المقابلة الانترفيو

وهتروح للمقابلة هيسألك أسئلة سهلة حسب تخصصك وعادية خالص بس تكون واثق من نفسك بس زوق

وبعد كده لو ok فى المقابلة هيتصلوا بيك فى نفس اليوم أو تانى يوم ويقولك انت نجحت فى المقابلة وممكن يخيرك فى الاماكن

فيا ريت تعرف الاماكن اللى فى السعودية كنظرة عامة واعرف ان كل واحد بياخد نصيبه مش اكتر

بس يا ريت فى الفترة دى تكون جهزت شوية الاوراق الاول علشان متحتارش واهمهم جواز السفر

والاوراق المطلوبة : smk:

أصول الشهادات الامتياز والبكالوريوس والماجستير او الدبلومة وهكذا

شهادات الخبرة

الموقف من الجيش

تقريبا 3 صور خلفية بيضه ويا ريت تتصور كتيييييييييييييييييييييير وتصور اى ورق معاك برده كتيييييييييييير

بس اوعى تصور فى القاهرة صور فى المكتبة اللى قريبة من بيتك علشان فى القاهرة غالية على الفاضى :happy:

وبعد كده هيديك مياد تروح فيه المكتب بالاوراق اللى فاتت دى

هتروح المكتب هيتفق معاك على العقد وتقريبا الاساسى 4000 وبعد كده بيديلك 3 شهور بدل سكن و1/2 شهر تأثيث

وبدل انتقال 400 ريال و 20% لو بكالوريوس بس و 50% لو ماستر وشوية بدلات يعنى بدل ماتروح بدل مانت قاعد فاضى وهكذا هههههههه

لو انت واخد الماستر لسه مرتبك تقريبا 7600 وكل ما يكون خبرة كل مايكون احسن وبيدى 200 ريال على كل سنة خبرة

المهم بتمضى العقد المبدأى وبيديلك تقريبا اربع ورقات

ورقة العقد

وورقة الحاجات المطلوبة منك

ورقة المعامل

وورقة الكشف الطبى

وبعد كده هيقولك على الاماكن اللى هتروحها

المشوار الاول : هتروح المنطقة اللى ورا نقابة الاطباء (دار الحكمة) الشارع اللى وراها هتلاقى مكاتب توظيف العمالة بالخارج زى الرز هناك

ودى المكان اللى انت هتعمل فيه حاجة اسمها ورقة النت عنى بتدخل بياناتك على النت المهم الورقة تقريبا بـ 180 جنيه غاليه شوية بس تعمل ايه مجبر اخاك لا بطل :protest:

وممكن تاخد الورق فى نفس اليوم بس متأخر شوية ودى لازم تعملها الاول

وبعد ما تخدها هتروح مكان فى جاردن سيتى قريب برده من المكان اللى انت ملت الورقة فيه

المكان اسمه جامكا وهو ده اللى هيحدد ليك المكان اللى انت هتكشف فيه واوعى تركب تاكسى اللا اذا كان معاك فلوس كتير ومش عارف توديها فين

واسأل الناس حتى لو انت اول مرة تروح

وبعد ما تروح جامكا هتعرف المكان اللى هتعمل فيه التحاليل والكشف الطبى بس صور ورقة النت كتيييييير يعنى ممكن خمس ست نسخ

وفى نفس اليوم اطلع على وزارة الصحة المعامل المركزية فى شارع الفلكى جنب مجلس الشعب

هتلاقى هناك ناس بالكوم طبعا هتقول يا ربى دا انا شكلى هسافر السنة الجاية

أول ما تروح هناك هتلاقى رقم تقريبا زى كده 16082 هتتصل هيرد عليك واحد او واحدة هتاخد منك البيانات اللى فى ورقة النت

وهتديك معاد تيجى فيه هتقولك مثلا تعالى يوم 7/9 الساعة 12 هتروح قبلها بشوية ولو رحت بعدها مش مشكلة هتتدخل ومعاك صورتين خلفية بيضة

وورقة النت وجواز السفر و 120 جنيه

واوعى تنسى الورقة اللى انت خدتها من مكتب التوظيف بتاعة المعامل المركزية

وبعد كده هتطلع فوق هتدفع الــ 120 جنيه زى الباشا ومش هيكتفوا بكده هيخدوا منك عينة دم كمان ههههه :closedeyes:

وبعدين هيديلك ورقة وهيحددلك هتيجى امتى تستلم الظرف اللى فيه التحاليل وممكن تعرف النتيجة من ع النت بعد 48 ساعة

وبعد ما تعمل كده هتروح ع المستشفى اللى انتى هتعمل فيها الكشف الطبى وبردو محتاجين ورقة النت والورقة اللى انت اخدتها من المكتب والجواز

وهتكشف ف نفس اليوم وتقريبا هتدفع بردو حوالى 275 جنيه (وحسبى الله ونعم الوكيل)

وهيحددولك ميعاد تروح تستلم النتيجة فيه

ملحوظة: هتستلمها فى ظرف مقفول

وبعد ده كله هترجع الكتب تانى عشان هيطلب منك حاجات تانية

وان شاء الله هتابع معاكم لأن دى آخر حاجة أنا عملتها

وياريت تعرفوا تقروا خطى ههههه bsh:)