كيف نجعل المجلس العسكري فرعونا جديدا علينا؟؟

[abobakr]

حاولت اعرف اسباب ان مبارك استمر 30 سنة وبقى فرعون رغم انه سقط في 18 يوم بس ولاقيت نفس الاسباب بتتكرر مع المجلس العسكري

1- تعظيم اعماله لحد كبير

مع مبارك كانت الضربة الجوية مع المجلس العسكري الوقوف مع الثورة

مبارك حسسنا انه نزل في الضربة الجوية لوحده وخلص الحرب كلها لوحده والجيش نايم الصبح

والمجلس العسكري حسسنا انه اللي قام بالثورة من الاساس رغم اني بقول ان المجلس العسكري ايد الثورة رغما عنه

2- التصريحات الجوفاء

مبارك اول تصريح له طمحواتي المالية محدودة والكفن ملوش جيوب

المجلس العسكري سنقضي على الفساد ونحاكم الفاسدين

3- اكتساب اغلب طوائف الشعب بالجانب الديني

مبارك افرج عن المعتقلين من الجماعات الاسلامية

فيه ناس محسسانا ان المجلس العسكري حامي الحما للمادة التانية

4- الحفاظ على هيبة الدولة

الناس ايام الثورة لالا منظرنا ايه قدام العالم وعيب نشتم ريسنا ولازم نحترمه

دلوقتي المجلس العسكري هيبة الدولة ولو سقط هانسقط كلنا

5- الخط الاحمر

مبارك كان مدي الخط الاخضر اشتموا كل الوزراء براحتكم لكن انا والعائلة الكريمة اوعوا تقربوا

اما الان الصحفيين كانت الثورة وخداهم وكانت نتيجة اي حاجة يكتبوها يشربوا تاني يوم فنجان قهوة في المجلس العسكري وبرده مفيش مانع من قرصة ودن لاتنين من الصحفيين ويحاكموهم عشان الباقي يخاف

السؤال بقى هل المجلس العسكري هايكون فرعون مصر الجديد؟؟

ياترى لو حصل انتخابات رئاسية ودي اشك انها هاتحصل مين اللي هايحكم الرئيس المنتخب ولا المجلس العسكري؟؟

ياترى المجلس العسكري مش هايتدخل في نتيجة الانتخابات وهاتكون نزيهة؟؟

[التونسى]

مقارنة غير متكافئة بالمره .. بين المجلس العسكرى من جهة .. ومبارك من جهة أخرى .. المجلس العسكرى ..هم المسئولون والقائمون على قيادة الجيش... المنوط به حفظ وأمن وسلامة حدود وطن بحجم مصر .. من اى اخطار خارجيه (وما أكثرها))

أما مبارك فهو ((سياسى )) جاء لسدة الحكم فى ظروف عصيبه .. تأمل فيه الكثير الخير .. ولكنه تحول لفاسد وطاغية وديكتاتور على مر 30 عاما .. فاستحق الخلع والتجريس ومن ثم المحاكمة والعقاب

مبارك هو الذى عزل نفسه عن الشعب ووضع الخطوط الحمراء بيننا وبينه بنفسه رغما عن ارادتنا .. فلم يلتحم مع الشعب الا قليلا .. اما الجيش .. فالشعب بنفسه هو من وضع الخطوط الحمراء ضد من يسعى للهجوم عليه والانتقاص من قدره وهيبته.. امتنانا واعترافا بدوره فى انقاذ مصر من مصير مرعب

نعم هناك شهر عسل بين الجيش والشعب .. اتمنى الا ينتهى .. فاللجيش رصيد كبير فى قلوب المصريين .. ومن الصعب ان ينضب .. ان لم يزيد ويربو

[MohamedAli]

6- نخبة علمانية تربت تحت يد امن الدولة

الاسلام هو عدوها الاول وتسعى لاستفزاز المسلمين سواء بكاريكتور او فيلم او مقال

اى نخبة اما تنتج هي النظام او النظام هو من ينتجها

وفي الحالتين لكي تمنع مبارك اخر يجب ان تكنس النخبة العلمانية المسيطرة منذ 150 عام وتبدأ في الكنس من الاعلى الى اسفل

غير كده

هتشيل الملك هيجيبوا عبد الناصر تشيل عبد الناصر يجيبوا السادات هتشيل السادات هيجيبوا مبارك وهنفضل في دائرة مغلقة كلما سقط فرعون صنعوا لك فرعون اسوأ

تم تعديل 6 أغسطس 2011 بواسطة MohamedAli

[ابراهيم عبد العزيز]

طريقة الشعب المصري فى التعامل مع الحاكم هى من تجعله فرعونا

وأذكر أن الكاتب الكبير فهمي هويدي تسأل فى احد مقالاته : هل البيئة المصرية هى بيئة صانعة للفرعون ؟؟

مبارك عندما تولى السلطة كان كل المصرين يستبشرون فيه الخير

واكاد اجزم انه لم يكن كاذبا عندما قال فى بداية توليه الحكم أنه لا ينوي البقاء فى السلطة وان الكفن ليس له جيوب

أقول أنني أكاد أجزم انه كان صادقا فى قوله

ثم بعد ذلك بدأت الحاشية المحيطة به وكثير من الشعب المصري فى احاطته بكلاما من نوعية :

(( بطل حرب اكتوبر واللى حررنا ونسبوا له الفضل كاملا متناسين ابطال امثال الشاذلي والجمصي ))

(( نسبوا له الفضل فى اعادة طابا مع ان ملف عودة طابا بدء العمل فيه من ايام السادات وينسب الفضل فيه للقانونين المصرين الذين أبلوابلاء حسنا أمثال نبيل العربي ومفيد شهاب وغيرهم ))

ثم بعد ذلك كلاما من نوعية :

حكمة السيد الرئيس

توجهيات السيد الرئيس

الرئيس الأب

الرئيس خط احمر ورمز للمصرين وممنوع انتقاده

مصر اتولدت يوم عيد ميلاد الريس

ثم انطلقت اغاني من نوعية ( اخترناه وبايعناه )

وخطوة خطوة حتى وصلت صناعة الفرعون لاوجها عندما خرج كاتب ليقول ( ان الريس مش قادر يستمتع بطشة ملوخية من كثر مشاغله !!)

هذه البيئة تجعل من اى انسان فرعونا بلا شك ولو كان احد الخلفاء الراشدين , فنحن نتكلم عن نفس انسانية وليس عن ملاك

وهذا النهج اذا تم اتباعه فى المستقبل فبالتاكيد سيتم خلق فرعون جديدا

[abobakr]

http://www.youm7.com/News.asp?NewsID=469040

الجيش ينقذ81 مصرياً من الغرق لمحاولتهم الهجرة غير الشرعية لإيطاليا

تمكنت القوات البحرية من إنقاذ 81 مواطنا مصرياً قبل تعرضهم للغرق على متن مركب للصيد، أمام سواحل الإسكندرية فى محاولة للهجرة غير الشرعية إلى إيطاليا.

وكانت عناصر حرس الحدود التابعة للمنطقة الشمالية العسكرية قد اشتبهت فى قيام أحد بلنصات الصيد، ويدعى "المهدى بالله"، بمحاولة تنفيذ هجرة غير شرعية أمام سواحل الإسكندرية، وتعرضه للغرق نتيجة تعطل المحرك.

وحفاظاً على أرواح المواطنين المصريين قامت القوات البحرية برفع درجات الاستعداد القتالى لعدد من الوحدات البحرية للتدخل السريع وتمشيط المنطقة والعثور على المركب وإنقاذ المصريين العالقين به، وتبين تعرض مركب الصيد للغرق نتيجة تعطله على بعد 5 ميل بحرى أمام مكتبة الاسكندرية وعلى متنه (81) مهاجراً مصرياً متجها إلى إيطاليا، وقامت إحدى الوحدات بقطر المركب إلى ميناء الإسكندرية والتحفظ عليه، وتقديم الخدمة الطبية والغذائية اللازمة لجميع الأفراد، وتسليمهم إلى السلطات المختصة لاتخاذ الإجراءات القانونية حيالهم.

يأتى النجاح فى إجهاض تلك المحاولات إلى التنسيق المستمر بين كافة أجهزة وأفرع القوات المسلحة، والاستعداد الدائم للتدخل السريع فى حالات البحث والإنقاذ لحماية شباب مصر من خطر الموت نتيجة لعمليات الهجرة غير الشرعية.

زمان كانوا بيقولوا خفر السواحل او القوات النهرية

دلوقتي الجيش هوا اللي بينقذ كل حاجة

الحمد لله انهم ش قالوا ان الجلس العسكري هوا اللي راح انقذ بنفسه

دي حاجة من حاجات تضخيم الاعمال وعمل هالة

[سيدسعد]

مصر دولة "عسكرية" وستبقى كما هي، وسيمثل المجلس العسكري حسب الدستور الجديد - في تصوري - هو الفيصل الوحيد ومن يملك حق الفيتو في دولة المؤسسات حول السياسات التي تخص الامن القومي متضمنة تعديلات الدستور. وفي هذه الحالة لا اهمية لتزوير انتخابات نيابية ولا رئاسية. يعني فكرة الفرعون وابن الفرعون لا مكان له عندما يكون الحاكم بالامر مؤسسة. انما الوجه العام للدولة "مدنية".

[أثر الطائر]

حاولت اعرف اسباب ان مبارك استمر 30 سنة وبقى فرعون رغم انه سقط في 18 يوم بس ولاقيت نفس الاسباب بتتكرر مع المجلس العسكري

1- تعظيم اعماله لحد كبير

مع مبارك كانت الضربة الجوية مع المجلس العسكري الوقوف مع الثورة

مبارك حسسنا انه نزل في الضربة الجوية لوحده وخلص الحرب كلها لوحده والجيش نايم الصبح

والمجلس العسكري حسسنا انه اللي قام بالثورة من الاساس رغم اني بقول ان المجلس العسكري ايد الثورة رغما عنه

2- التصريحات الجوفاء

مبارك اول تصريح له طمحواتي المالية محدودة والكفن ملوش جيوب

المجلس العسكري سنقضي على الفساد ونحاكم الفاسدين

3- اكتساب اغلب طوائف الشعب بالجانب الديني

مبارك افرج عن المعتقلين من الجماعات الاسلامية

فيه ناس محسسانا ان المجلس العسكري حامي الحما للمادة التانية

4- الحفاظ على هيبة الدولة

الناس ايام الثورة لالا منظرنا ايه قدام العالم وعيب نشتم ريسنا ولازم نحترمه

دلوقتي المجلس العسكري هيبة الدولة ولو سقط هانسقط كلنا

5- الخط الاحمر

مبارك كان مدي الخط الاخضر اشتموا كل الوزراء براحتكم لكن انا والعائلة الكريمة اوعوا تقربوا

اما الان الصحفيين كانت الثورة وخداهم وكانت نتيجة اي حاجة يكتبوها يشربوا تاني يوم فنجان قهوة في المجلس العسكري وبرده مفيش مانع من قرصة ودن لاتنين من الصحفيين ويحاكموهم عشان الباقي يخاف

السؤال بقى هل المجلس العسكري هايكون فرعون مصر الجديد؟؟

ياترى لو حصل انتخابات رئاسية ودي اشك انها هاتحصل مين اللي هايحكم الرئيس المنتخب ولا المجلس العسكري؟؟

ياترى المجلس العسكري مش هايتدخل في نتيجة الانتخابات وهاتكون نزيهة؟؟

لو هيبقى فيه فرعون جديد في مصر يا صديقي..يبقى مش مهم هو مين :

فرعون عسكري..فرعون ديني..فرعون علماني..فرعون كبير القرية..

بس أنا شايف فعلا إنه مصر خلاص..ما عادش ينفع معاها الفراعنة..

مش عارف نوايا المجلس العسكري لأنه القاصي والداني دلوقتي بقى بيشك في نواياه..

بس أيا كانت النوايا والخطوات الجايه..

بيتهيألي خلاص..ماعادش فراعنة..

والثورة اللي فاتت ممكن تبقى ثورة يناير الأولى..زي ثورة القاهرة الأولى أيام الفرنسيس..

وهتكون فيه ثورة يناير التانيه والتالته والرابعة..وإلى رحيل آخر الفراعنة من مصر..

[ibnimos]

لااعتقد اخى لتصورك عن المجلس العسكرى واعتقد انها هواجس لافكار عنصريه فليس من المنطق ان احدا لايعرف دور القوات المسلحه لثورة 25 يناير 2011 - عن قرب فقط انظر لما يحدث الآن فى سوريا اعتقد ان الوضع مختلف وجدا

تم تعديل 8 أغسطس 2011 بواسطة ibnimos

[se_ Elsyed]

عفواً قرأت بعض الردود الغريية التي تبتعد عن صٌلب الموضوع تماماً

وعشان ألخص الدنيا كلها في سطر ... أرجو البُعد عن الشعارات اللي حفظناها من أيام مبارك زي ما كتب الزميل بكر .. والإجابة على سؤال واحد ك

- مصدقينكم مصدقينكم ... بس تقدر تسيب الشعارت شويه وتقول لنا الجيش هايسلم الحكم لسُلطة مدنية إمتى ؟

----------

6- نخبة علمانية تربت تحت يد امن الدولة

الاسلام هو عدوها الاول وتسعى لاستفزاز المسلمين سواء بكاريكتور او فيلم او مقال

اى نخبة اما تنتج هي النظام او النظام هو من ينتجها

وفي الحالتين لكي تمنع مبارك اخر يجب ان تكنس النخبة العلمانية المسيطرة منذ 150 عام وتبدأ في الكنس من الاعلى الى اسفل

يا أخ محمد مصر لكل المصريين ولكل الإتجاهات ...

وما أبسط يا أخي الكريم إنك تجد رد من عينة

( مصر هاتتخلص من الفرعونية وتأليه الحاكم وفتاوى تحريم الخروج عليه عمال على بطال حتى لو كان ظالم وسفاح ... عندما تُكنس مصر من السلفيين وأصحاب الأراء المتشددة اللي بيطبلوا للحاكم )

صح ولا أنا غلطان ؟

يعني إعكس كلامك كده وأستبدل العلميانية ولا مش عارف إيه بكلامك ... هاتلاقينا دخلنا في حروب عقائدية وطائفية وخلي اللي يكب بنزين على النار يكب ....

ما فيش حاجه في الدنيا يا أخ محمد إسمها كنس فصيل سياسي أو معتقد أو ما إلى ذلك من المجتمع ...

لإن بمنتهى البساطة .. اللي بيُنكس النهاردة ... بكره ممكن يتكنس

وبعدين مش هي ديمقراطية ؟

طب خلي التيارات الليبرالية تفوز في الإنتخابات النزيهة اللي لا يشوبها شائبه .... يا ترى السلفيين هايسيبوا البلد ويهاجروا ... ولا هايستنوا مصيرهم في الكنس بالمقشات ولا إيه بالظبط ؟

نصيحة يا أخ محمد : لا تحسبن نفسك المسلم الوحيد على وجه الأرض .... ولا تحسبن إنت إنت اللي صح والباقي لازم يتكنس ... والأفضل من ذلك كله إنك تركز في الموضوع وفكرته ...

فأنا شخصياً لا أجد علاقة بين تعليقك وبين فكرة الموضوع .. وكأن العلمانيين ولا الليبراليين هما العقبة الوحيدة الأن أمام تسليم الجيش السلطة للسلفيين . .. قصدي للسُلطة المدنية ...

قليلٌ من الموضوعية والمرونة لن تضُر