خبر و تساؤل حول الاداء الامنى

[الغريب]

طبعا مشكلة كبيرة أن ينفذ الأهالي أحكام على البلطجية وطمس دور الدولة والقانون

والمشكلة الأكبر أن نجد من يؤيد فعلهم ، لأن ببساطة لو تهاونا في هذا الأمر ممكن بكرة الناس تقتل في بعض بحجة أنهم بلطجية

ولا مانع أيضا من قتل الشباب الثوار مثلا بحجة أنهم بلطجية ... وهلمّ جر

لأن البلطجي بالتأكيد لا يحمل مهنة "بلطجي" في البطاقة ليتم فرزه من غيره

[MohamedAli]

انا اوافق ان البلطجي الحل الوحيد لاصلاحة هو قطع رأسه

لكن لا اوافق على ان يتم ذلك بيد الاهالي لسببين

1- لااضمن ان يكون هؤلاء اهالي فعلاً فقد يكونوا بلطجية مثله ويتشاجرون او مختلفين على مخدرات مثلاً

2- اليوم قتلوا بلطجي حقيقي غداً ممكن يقتلوا اي احد وتضيع هيبة الدولة ونعود لشريعة الغاب كل ينفذ مايراه القانون بيده

[ابراهيم عبد العزيز]

المفسد بيكون وصل لمرحلة اللاعودة ,,

جزاءه عند الله هو قطع اليد والارجل من خلاف

لو كان تاهيله حيجيب نتيجه كان ربنا حكم بكده

القصاص من مفسد واحد يحمي 1000 روح بريئة ويقضي ع الفساد في الارض

كلامك صحيح يا سيد أرك

والبلطجى الذي يرهب الناس فى الشارع حكم عليه الشارع الحكيم بحد الحرابة وهو قطع الايد والارجل من خلافا

ونحن لا نختلف على ذلك

ولكن من هو المخول بتطبيق حد الحرابة ؟؟

بالتاكيد المخول بذلك هى سلطات الدولة وليس الاهالي , لأن تطبيق هذا الحد بيد الاهالي سيفتح الباب لمفسدة عظيمة فى مصر لا يعلم مداها إلا الله سبحانه وتعالى

فسلطات الدولة قبل تطبيق هذا الحد ستقوم بالتحقيق والتدقيق فى الادلة , اما اذا تم ترك الامر للاهالي فتاكد أن هناك مظلومين كثر سيتم تطبيق الحد عليهم , وسيفتح الباب للاهواء الشخصية , فاى عصبة من الناس يكنون الكراهية لشخص ما بسبب خلافات مالية أو اجتماعية او ما شابه سيقومون بقتله والتنكيل به تطبيقا لحد الحرابة لانه بلطجى ( من وجهة نظرهم) .

تم تعديل 10 أغسطس 2011 بواسطة ابراهيم عبد العزيز

[raouf]

طيب انا عايز حد يناقشنى ويقنعنى فى الاتى :

- مسجل الخطر لا يمكن اصلاحه لانه مش سارق فقط مثلا او حرامى بس لكن المسجل خطر بيكون شايل عددة تهم ومعظمها خطير من سطو الى اختطاف وعادة ادمان ومخدرات

- كام مرة حد فيكم مسك حرامى وسلمه للشرطة واتحاكم ؟ كل مرة يا خد غلقة ويطلعه الظابط بعد تهدديده انه يشتغل مع الشرطة وينفذ اوامرهم والا يلبس اى قضية فاضية

- مين اللى كان بيضرب الناخبين ويروعهم ويحمى التزوير مش هم البلطحية دول ؟

- مش البلطحية دول هم اكثر من ينطبق عليهم اسم المفسدون فى الارض ؟ من اعدل نحن ام الله الا يجب ان يطبق شرع الله عليهم ؟

- من يوم 25 يناير متى كانت اكثر الاوقات التى كانت مصر امان بها ؟ اعتقد انها ايام اللجان الشعبية صح هل كان اى كلب منهم يقدر يفكر يعمل اى حاجة لا لانه خايف من العقاب الفورى الموجود

- اكرر انه لو علم البلطجية فى كل حى ان الناس هاتتفق عليهم وهيكون ده مصيرهم اتحدى انهم يفكروا فى اى موقف سلبى ولنا فى موقف والد اختنا بينك روز عبرة

[أسد]

أنا موافق على قتل البلطجية دون القبض عليهم

أي يتم قتلهم ..

ولكن بواسطة قوات أمنية مسلحة .. ويقومون بقتل من تسول له نفسه وممارسة البلطجة على الناس

حتى وإن كان في ذلك ظلم للبعض .. أو حتى لو كان هذا دون محاكمات

ولكن يجب أن يتم القضاء على الفوضى المنشرة في شوارع مصر

يجب أن يرتدع المجرمون .. وأن يقل عددهم

إن وضعهم في السجون لا يصلحهم .. على الإطلاق

أما .. القتل والتمثيل بالجثث بهذا الشكل ..

فهذا سيخلق في مصر جيل من الناس لديهم عنف لم نعتاده في مصر ..

تطبيق القانون يجب أن يكون بواسطة رجال الأمن .. ورجال الدولة ..

وليس أي أحد

بالتأكيد من قتل الرجل وشارك في التمثيل بجثته .. لم يكن شخصاً عادياً ..

وإنما شخص شديد القسوة أيضاً ..

أعيب على القائمين على إدارة البلد حالياً ... تراخيهم في مواجهة مثل هؤلاء ..

لا أستطيع أن أستوعب أن القوات المسلحة .. وقوات الشرطة الموجودة .. ليست لديهم القدرة على مواجهة هؤلاء ..

أنا متأكد أن لديهم القدرة .. ولكن لا يعتقدون أن لديهم الشرعية ..

ولا لديهم الشجاعة ..

ولا لديهم الإرادة في القضاء على هذا الأمر ومواجهته

[Om Zayd]

بالتأكيد من قتل الرجل وشارك في التمثيل بجثته .. لم يكن شخصاً عادياً ..

وإنما شخص شديد القسوة أيضاً ..

ليس بالضرورة

سلوك الفرد يتغير كثيرا عندما يصبح ضمن مجموعة متحدة الهدف

يضاف الى هذا "الثار البايت " مع البلطجي

[se_ Elsyed]

تلقيت إتصال تليفوني الأن من والدتي في مصر وهي مضطربة جداً وبتبكي ... وبتقول لي إن الجيش والشرطة نزلوا الشارع عندنا بعد الأفطار اليوم وهناك 4 مدرعات مرابطة في الشارع حتى الان !!!!!!!!!

يا نهار مش فايت .. ليه يا ستي ؟

بتقول لي إن الولا فلان والولا فلان إتخانقوا مع بعض بعد الفطار وضربوا بعض بالنار وطبعاً كل واحد جاب أتباع له وهات يا ضرب وكسروا عربيات كتيره راكنه في الشارع .. الحمد لله عربية اخويا وأختي وجوزها كانت في الجراج

وبصراحة الجيش نزل على طول ولمهم ...

الغريب بقى

- العيلين اللي إتخانقوا دول أنا اخر حاجه فاكره لهم إنهم كانوا بيحبوا ولسه بيلبسوا بامبرز

- شارعنا زي أي شارع مصري .. الناس طيبين جداً ومن جميع المستويات ونادراً ما تحدث مشاكل .. اللهم إلا مشاكل عادية مثل لعب الكورة او الإزعاج في فصل الصيف وأجازات المدارس والعيال اللي بتلعب في الشارع ورش ميه يا جدع

- أخويا بيقول لي إن الجيش فتش بيوت كتيرة الحمد لله بيتنا مش فيهم ... ولم كمية أسلحة ألية ونارية كتيرة جداً

يا نهار مش فايت ...

انا كنت لسه معاهم هناك من شهر بالتمام والكمال وما شوفتش حاجه غير عادية !!!!!!11

الحاجات دي جت منين ... وليه .. وإزاي .. ومين شايل سلاح من السكان .... ويا ترى شايل له ليه ؟

وإيه الفُجر ده ؟

ولماذا كل يوم سنسمع عن ردود أفعال وليس أفعال ؟

يعني متى ستكون المبادرة بإيد الشرطة والمجلس العسكري ويستتب الامن ونزرع المهابة مرة اخرى في نفوس الاوباش ؟

الحمد لله الناس العادية وهم الأغلبية ممكن يقضي حياته لا يقترب من قسم شرطة حتى ... لكن أنا أتكلم عن فئة هم زبالة المجتمع واللي ما صدقوا حدوث هذه الاحداث وولا همهم البلد ولا الامن ولا أي حاجه .. وأبتدوا يفرضوا سطوتهم وكل واحد رجليه شايلاه طلع له صوت ؟

ومتى سيتم تفعيل قانون حيازة الأسلحة غير المرخصة الذي لا يحتاج أكثر من ربع ساعة لإصدارة وسنصفق جميعاً لإعدام أي حيوان يحمل سلاحاً نارياً ويستخدمة تحت أي سبب .. حتى لو للدفاع عن النفس ؟...

لإن ما فيش حاجه بتقول إني أنزل أشتري رشاش ألي بخمسة الاف جنية مثلاً وأشيله معايا في الرايحة والجاية عشان أدافع عن نفسي ... وشويه شويه طبعاً الشيطان هايزين لي إني أستخدمه لو ذبابة عدت من أمام أنفي فقط .... لإني خلاص بقى أشعر بالقوة الأن .. وأنا شايل سلاح مش خلةأسنان ..

[pink rose]

ممكن سؤال معلش هو ممكن يكون غريب بس اسمعوني فيه و استحملوني

الكل حكم ان البلطجي دا لازم تتقطع رقبته و ان دا الحل الوحيد له

السؤال بقى هل الدولة جربت اي اصلاح للبلطجي دا و فشلت؟

هل السجن عندنا زي ما بيتقال تاديب و اصلاح و تهذيب؟

هل ادينا للناس دي فرصة انهم يبقوا كويسين و هما اصروا على جرايمهم

انا بصراحة شايفة اننا بنطالب بقتلهم بطريقة ظالمة

لما نبقى نطبق منهج و طريقة محترمة في اصلاحهم و نفشل ساعتها هابقى موافقة تتقطع رقبتهم و علنا في الميادين و تتعلق باب زويلة

حد يقولي المسجون عندنا في مصر عنده ابسط حقوق الانسان اللي تحفظ كرامته

عارفين كنت دايما باشوف في الافلام الله يعزكم جردل و هو دا التواليت في الحجز

ما كنتش مصدقة او مش قادرة استوعب ان دا ممكن يكون حقيقي الا لما شوفت تقرير عن الحجز في قسم باب شرق و فعلا الجردل دا موجود

يبقى ازاي عاوزين البلطجي يكون بنى آدم

مش باطالب بان سجونا تبقى زي سجون النرويج اللي جابها احمد الشقيري في خواطر

لا لا مش للدرجة دي

بس على الاقل يكون السجن فعلا فيه كرامه فيه تهذيب للنفس فيه تدريب لمهن تنفع

يعيش المسجون حياة محترمة عشان نفسه تتعود عليها و يبقى صعب يرجع لحاله الاول

ما اعتقدش حد عاقل ممكن يفضل حياة الاجرام على الحياة اللي يكون فيها محترم وسط الناس الا الناس المرضى او غير سوي الفطرة

اللي اسمعه عن السجون في السعودية مثلا

ان المكان نضيف و طبعا تكييف

عندهم شيوخ بتيجي تديهم دروس و تحفيظ قرآن

المتجوز بيحق له انه ينفرد بمراته

بنى آدم و لازم يعامل كا بنى آدم له حقوق

و متهيألي نسبة الجريمة في السعودية قليلة

ليه ما يكونش عندنا كده في مصر تطبيق الحد الادنى للكرامة الانسانية

نفسي يكون الهدف من السجن اعادة تأهيل او ترويض اكتر منها عقاب

ساعتها ممكن نقييم بقى مين اللي مالوش حل غير الموت

تم تعديل 10 أغسطس 2011 بواسطة pink rose

[م تيمور المراغي]

ده رأيك لو البلطجي االي في شارعكم ايياه - لاقدر الله - عمل مصيبه ( مش عاوز افسر ) لحد من العيله بنات بقى او ولاد او رجاله \ الله لا يكتب

[pink rose]

ده رأيك لو البلطجي االي في شارعكم ايياه - لاقدر الله - عمل مصيبه ( مش عاوز افسر ) لحد من العيله بنات بقى او ولاد او رجاله \ الله لا يكتب

ما هو اتعرض فعلا لبابا

و انا كتبت هنا من يومين ان بابا اتضرب في الشارع فعلا و ايده واجعاه جدا لانه كان لسا عامل فيها عملية ما فيش شهرين

و انا باكتب الكلام دا بعد كل اللي حصل

يا باشمهندس

احنا عندنا اخطاء لازم نواجهها

احنا نظامنا غلط في غلط

و بالتالي بما ان المدخلات غلط لازم تكون دي المخرجات

جرب كده حضرتك تجيب مجرم و تعمله برنامج اعادة تأهيل عامله كا بنى آدم واحترمه صدقني لازم غصب عنه هايبقى كويس

دي فطرة

ربنا بيقول و لقد كرمنا بنى آدم

اديله انت كرامة و شوف هايبقى عامل ازاي

تم تعديل 10 أغسطس 2011 بواسطة pink rose

[م تيمور المراغي]

ربنا يحمي بابا وحضرتك وكل الزملاء

انا مش حزود الكلام في النقطه دي احتراما لحضرتك وللجميع بس المضمون اكيد وصل للكل بدون ذكر امثله ,,