انا و التفتيش فى المطارات حكايتنا طويله

[مغتربة]

الموضوع دا انبثق ( حلوه انبثق دى )

من موضوع الفاضله زهره الجبل

اكيد بما ان قسم كبير من اعضاء المحاورات هنا مغتربين

و لازم بنعدى على المطارات على الاقل مرتين فى السنه

اكيد كل واحد لينا ليه موقف على الاقل

مع اجراءات التفتيش الى فى المطارات

بس خلونا نوسع كلمنا شويه

يعنى سواء جهاز انذا المعادن

او جهاز تفتيش الشنط

او التفتيش الخاص بحجم السوائل الى هتاخدها معاك على الطياره

او اوزان الشنط

او حجم الهاند باج

يعنى سواء الخاص بالمتعلقات او البشر

خلونا نتبادل الحكايات عن الموضوع دا

[se_ Elsyed]

بسم الله الرحمن الرحيم ...

أغرب حالة تفتيش شوفتها بعيني في حياتي .. هي اللي حدثت من شهور قليلة شهرين تلاته كده

زوجة واحد قريبي جابت معاه قزازتين تلاته أربعة كبارررررررررررر .. مليانين سبرتو عشان السبرتايه بتاعت القهوة ... شغل بتوع المعاشات

وعدت بهم زي السكينة في المهلبية من مطار القاهرة ... ومن مطار الرياض ..

يعني نقول قنابل المولوتوف دي تطلع مع العفش .. حاجه مقبولة وعادي ... خدوني على قد عقلي

لكن تطلع بهم الطيارة في شنطة إيدها إزاي ؟

إزاي ؟

إزاي ؟

إزاي ؟

إزاي ؟

إزاي ؟

[se_ Elsyed]

الولا عُمر .. كان مسافر مصر مع مامته وهو مقروض صغير ... من كام سنة كده

وواخد الألعاب والحبشتكانات بتاعته معاه

وجينا في مطار الرياض وفي الشنط الكبيرة اللي طالعه مع العفش

وصاحبنا العسكور اللي بيفتش الشنط على جهاز الأشعة .. صمم أفتح شنطة كبيرة من دول

فتحتها وراح مشاور على الطبنجة الـ 9 مللي بتاعت عُمر واللي بيغرقني بها مياه طول اليوم ... وراسه والف شوز المسدس ده ما يطلعش مع العفش

يا عم ده مسدس ميه حتى بُص ... بخخخخ بخخخ .. وبخيت على وشه شويه

يابا ده بلاستك

يا عم ده طالع في العفش

والله العظيم أبداً .. والواد يعيط ويتشال ويتهبد

وخلاني أرجع بالطبنجة البيت .. وعُمر قضى أجازة زي النيلة لإنه ما بيفارقش سلاحه

[مغتربة]

هحكيلكم انا موقف صغير كدا على الماشى

لكن لسه فى حكايات كتير

فى مره من المرات و احنا مسافرين بيمرورا الشنط على جهاز الكشف

و بعدين فجاه الظابط الى قاعد وشه اتغير و قال افتح الشنطه بسرعه

احنا بصراحه اتكهربنا

هو فى ايه هى الشنطه ملها فيها ايه

المهم جوزى راح يفتح له الشنطه

قاله لا مش انت الى تفتحها و خلى الراجل الى واقف على الجهاز هو الى يفتحها

كل دا بعصبيه

و لونه متغير

خلى الدم جمد فى عروقنا

المهم فتح الشنطه و انا الشنطه بتعب قوى فى توضيبها

و قلب قلبها لانه عايز يوصل لحاجه محطوطه فى اخر الشنطه

كل دا و احنا مش فاهمين فى ايه

لغايه ما طلع علبه بلاستيك و فتحها الظابط و بعدين الاخ رجع عادى و طبيعى زى البشر مش متحول

فى جوزى ساله فى ايه ليه دا كله

العلبه احنا كنا حاطين فيها شرايط كاسيت

واخدينها معانا

لكن جوزى كان موقفها و مرصصها جنب بعضها علشان العلبه تاخد اكبر قدر من الشرايط

فى الظابط لما شاف الصوره على الجهاز بانت له كانه شريط الطلقات دا عارفينه بتاع المدفع الرشاش

فافتكر ان احنا حاطين فى الشنطه رصاص

على اساس ان حتى الى عايز يهرب معاه رصاص هيحطه فى الشنطه بالشكل دا :closedeyes:

يالله ربنا يسمحه نشف دمنا ساعتها على الفاضى

المهم الموقف عدى على خير لكن اتحسرت على الشنطه

الى معدش فيها حاجه واحده مرصوصه

كله بقى عجينه :closedeyes:

يالله اقابلكم فى موقف تانى

[مغتربة]

لا مش ممكن استاذ سى السيد

التوارد دا

يعنى انت كان عليكم المسدس و احنا علينا الذخيره

و نروح نسقط النظام بقى فى دول الخليج :P

[Alattar]

أنا بصراحة والله الحمد عمري ما اتفتشت في مطار قبل كده...مفيش غير مطار طرابلس و أنا خارج من ليبيا كان بيسألني معاك فلوس..لأن ليبيا ما بيرضوش وانت خارج انك تاخد فلوس معاك..مش عارف..أمال أنا شغال كل ده هناك ليه ان شاء الله...بغير جو مثلا؟

المهم..آخر مرة كنت مسافر طرابلس علي الخطوط المصرية..دخلت..وكان مكاني جنب الشباك..و ساعتها كنت لسه بتكسف أوي..المهم..لقيت واحد قاعد مكاني..بصراحة اتكسفت أقولله قوم..و قعدت في الصف اللي قدامه في الكرسي اللي في النص..اللي هو أكتر كرسي بكرهه..

المهم..شوية و لقيت مضيفة جاية و معاها واحد ماسك لاسلكي..ووراه كام واحد كمان..وبيقوللي..بعد اذنك..اتفضل معانا بالراحة..و من غير شوشرة و كده...قلتله..يالهوي..كل ده عشان ما قعدتش في الكرسي بتاعي؟...هو فيه ايه؟

قاللي..مش حضرتك تبقي الأستاذ حمزة طاهر؟..قلتله لا والله..قاللي طيب وريني باسبورك..قلتله اتفضل..قاللي يعني انت مش حمزة طاهر..؟

أتاريني قعدت في الكرسي يتاع واحد مطلوب القبض عليه...المهم قلتله لأ..أنا مكاني أصلا ده..وشاورتله علي الكرسي بتاعي...ان البني آدم اللي قاعد مكاني ده يحس علي دمه و يقوم....أبدا

و عمال أشاورله علي الكرسي و أقولله حضرتك أنا قاعد هنا بس جيت لقيت الأستاذ قاعد مكاني..أنا قلت يمكن البعيد يحس علي دمه...أبدا

في الآخر الراجل صدقني..و مشي..وبعدين لقيت المضيفة بتنده في المكيروفون علي المذكور..وبتقول

الأستاذ حمزة طاهر يتفضل لكابينة القيادة....الأستاذ حمزة طاهر

طب طاهر حمزة

:blink:

كنت عاوز أقوللها .. ايه الحلاوة دي..حمزة طاهر..أو طاهر حمزة....زي علي بريزة ..بريزة علي

ده احنا عندنا شوية مضيفات يا جدع..

تم تعديل 11 أغسطس 2011 بواسطة Alattar

[shawshank]

أتاريني قعدت في الكرسي يتاع واحد مطلوب القبض عليه...المهم قلتله لأ..أنا مكاني أصلا ده..وشاورتله علي الكرسي بتاعي...ان البني آدم اللي قاعد مكاني ده يحس علي دمه و يقوم....أبدا

و عمال أشاورله علي الكرسي و أقولله حضرتك أنا قاعد هنا بس جيت لقيت الأستاذ قاعد مكاني..أنا قلت يمكن البعيد يحس علي دمه...أبدا

في الآخر الراجل صدقني..و مشي..وبعدين لقيت المضيفة بتنده في المكيروفون علي المذكور..وبتقول

الأستاذ حمزة طاهر يتفضل لكابينة القيادة....الأستاذ حمزة طاهر

طب طاهر حمزة

:blink:

كنت عاوز أقوللها .. ايه الحلاوة دي..حمزة طاهر..أو طاهر حمزة....زي علي بريزة ..بريزة علي

ده احنا عندنا شوية مضيفات يا جدع..

يا راجل دانا كل ده مستنيك تقول إن حمزة طاهر هو الراجل اللي قعد مكانك :P

[زهرة الجبل]

الموقف ده حصل لي من سنتين تقريبا

كنت مسافره من هنا لمصر أنا و الأولاد لوحدي

و طبعا معايا ماشاء الله ولادي ثلاثه و الثلاثه يعتبروا اطفال

فكانت الفكره ان نقلل عدد الشنط بقدر المستطاع علشان متبقاش لبخه زياده عليا لوحدي

فكان البديل الافضل هو شنطتين كبار و هاند باج افضل من ثلاثه صغيرين وهاند باج

مكنش عندنا فكره ان اصبح في اجراء جديد او قانون جديد بيقول الشنطه الواحده لا يزيد وزنها عن 40 كيلو

و طبعا في المطار طلعت شنطه 45 و شنطه 50 و كان لابد من تخفيض الوزن

و انا بصراحه مكنش عندي استعداد استغنى عن حاجه من اللي في الشنط و ارجعها تاني مع ابو كريم

الحمد لله كنا رايحين المطار قبل الوقت بمده معقوله و من حسن الحظ ان البيت هنا قريب من المطار

اللي حصل ان ابو كريم رجع البيت سريع سريع جاب الشنطه المطلوبه و رجع

اللي مش كويس بقى هو منظر الشنط بعد ما كانت متوضبه و متظبطه بقت مفتوحه قدامي عالأرض في المطار و طبعا شيل من هنا و ارمي هنا و كله فوق بعضه بهرجله علشان الوقت

و الحمد لله عدت على خير و من بعدها و بناخد بالنا من الموضوع ده

[pink rose]

نزلت مصر و انا حامل في مريم و انا في الشهر السابع

و كان المفروض اننا ناخد معانا تقرير طبي ان الحالة تسمح بركوب الطيارة

المهم الدكتورة اللي كنت متابعة معاها سافرت مصر و ما عملتش انا التقرير دا

و قولت عادي يعني و ربنا هايستر

و اتوكلنا على الله طلعنا على المطار

و احنا واقفين بنوزن الشنط الراجل اللي على الكاونتر شايفني واقفة بقى و بطني طبعا باينة

قام سأل جوزي قاله هي المدام حامل

جوزي بصلي كده كأنه بيشوفني يعني و بص للراجل تاني و قاله لأ

و جالي قالي ادراي بقى بدل ما نتفضح و يقولوا تقرير و ما تقريرش

حطيت شنطة ايدي على بطني و الحمدلله خلصنا

و دخلت بقى على الجوازات و من بعدها التفتيش النسائي

سبحان الله عديت من برة من غير ما ادخل و ما حدش قالي تعالي هنا للكشف زي ما بيحصل عادة

و فعلا ربنا سترها و ما حدش عملنا حاجه

بس بقيت مكسوفة اوي يعني ايه جوزي يقول للراجل مش حامل امال مالي يعني واكلة كرنب :blink:

[تقى الله]

الموضوع ده جامد جدااااااااا بصراحه بيبقا فى مواضيع كتيره فى المطارات لازمم الواحد ياخد بالو منها وده كويس اننا بنتشارك المعلومات دى عشان محدش يقع فيها تانى

اسمعوا دى بقا

بطبيعه شغلى كمهندس كنت مسافر مره طيران داخلى مرسى علم وكتم معايا جاكات من بتاعه الرسيفير دى المهم دخلت ع الاكس راى والاقى امين الشرطه بلهجه حاده:افتح الشنطه :sad: :sad: :sad:

وايده على سلاحه وكلام ع اللاسلكى وقصه

المهم صمم انو يفتح الشنطه ويشوف الحاجات عشان يصدق

بس فعلا لما شفتها ع الشاشه كانت عامله زى طلقات الرصاص

مره تانيه كانت طيارتى الساعه 3 العصر رحت فى المعاد اجى اعمل بوردنج مفيش اسال يقول لى الرحله بقت الساعه 11 باليل :Head: :Head:

المهم فضلت قاعد فى المسجد لحد 11 باليل وطلعت الاكل اللى معايا واديتها وظبطت المهم كان فى ناس حصل معاهم نفس القصه بس راحو ا عملوا ايه ؟؟؟؟

راحو قدموا شكوى فى مكتب خدمه العملا بتاع مصر للطيران وحجزوا لهم اوضه على حسابهم فى شيراتون المطار!!!!!!

وانا نايم فى الجامع

[Mr MAGED]

موقف لسة يا دوب طازة من شهرين تقريبا

كنت لسة واصل من مصر لجدة .. الطيارة وصلت بالليل

وكان عندي مييتنج مهم جدا تاني يوم العصر في الدمام

المييتنج ده هيحضروا 3 رؤساء شركات كبيرة من الكويت والبحرين والسعودية

طيارتي للدمام من جدة كانت الساعة 9 الصبح .. أخونا العزيز مكاوي هو اللي كان عملي الحجز لاني كنت في مصر

المهم طبعا صحيت من بدري والمدام موضبه الشنطة وطبعا رايح كاجوال لاني مابحبش اسافر في بدل .. ولما اوصل اغير في الفندق

السواق جالي بدري كالعادة .. ووصلت المطار ودخلت علي البوردنج ... ووانا باعمل البوردينج فجأة اكتشف اني نسيت البدلة

يا نهار مش فايت .. يعني اروح اقابل الناس دي كلها .. ببنطلون جينز وتي شيرت !!!

الحمد لله ربنا ستر .. اتصلت بالسواق وكان لسة راجع في الطريق .. قولتله يروح البيت يجيبلي البدلة ويرجعلي تاني

ولحقني الحمد لله قبل ما اطلع الطيارة

كل واحد ياخد باله من بدلته بعد كده

[Simba]

انا الحمدلله مفيش اي حاجة حصلت معايا في التفتيش قبل كده

كل الحكاية اني عندي حزام من سنة 88 مش بغيره وعايش لحد لحد دلوقتي كأني لسه شاريه امبارح

كل مرة علي البوابة لازم اقلع الحزام ده ودي حاجة بتضايقني اوي بصراحة

[hanzalah]

عمري ماقعلت الحزام

لكن حصلت معايا حاجة غريبة

كل مرة ادخل السعودية ياخدوني تحري لان اسمي شبيه باسم واحد تاني مطلوب عندهم

لما رجعت مصر لقيت ضابط الجوازات بيبص لي من فوق لتحت

ومش زوجتي وعيالي وبعدين قال لي استنى شويه .. وبعد دقيقتين ختم الجواز

انا قلت اسأله . ليك قرايب ف السعودية .. وبعدين قلت بلاش لحسن ميفهمش النكته و ينكد عليا

لكن افكس موقف حصل فعلا

إني كنت مسافر بعد احداث سبتمبر لاول مرة في حياتي الى اتجه غربا الى كندا بمفردي

زوجتي تولت ترتيب الشنطة

و بعد السلامات والدموع والابتسامات

وصلت المطار بمفردي لاني لا احب التوصيلات وافضل السلام ف البيت وكل واحد يعيط براحته

رحت المطار ودخلت ع الجهاز

لقيت الضابط بيقول لي مين رتب لك شنطتك دي

قلت له انا

قال لي ممكن نفتحها

فتحت الشنطة فعلا بكل هدوء

لقيت على وش الهدوم سكينة مطبخ كبيرة

تخيلوا

وشي جاب الوان الطيف ومبقتش عارف اضحك والا اعيط

قلت له يا باشا انا مراتي هي اللي رتبت الشنطة وهتلاقوا بصماتها ع السكينة وتقدر تعتبرني طلقتها خلاص

قعد يضحك وقال طبعا انت عارف انه مستحيل تطلع بيها ع الطياره

قلت له بالنسبة لمراتي مستحيل اسمح لها تخرج من اوضتها بعد اللي عملته

لكن لو تقصد السكينة .. تقدر تعتبرها سوفينير

[Salwa]

الله يسامحكم......قلبى وجعنى من كتر الضحك.

مابين ريمو اللى واكلة كرمب وباينة كأنها حامل ( وهى حامل ف سبع شهور ) وبين ..حنظلة اللى قال للظابط .دى مراتى اللى عملت كدة والسكينة عليها بصماتها واعتبرنى خلاص طلقتها...!!

مش ممكن بجدددد

انا حصللى موقف مماثل لسا مفيش كام شهر ...

سافرت مصر ف ظروف يعنى ...كام يوم فقط.

ومحدش يسألنى..امانة عليكم ماحد يسألنى..

انا بسافر من سنة 76 ...

ومش محتاجة لا اشيل حاجات كتير لارايح ولا جاى ...يعنى عيشتى مستتبة بدون شيل ونقلان ..

محدش يسألنى ....ليييييييييييييه حطيت المقص الجديد اللى كنت شارياه ف مصر وعلشان مصر.....كنت عايزاه للسمك وف الآخر مفتحتهوش ومعملتش سمك.

بس...

المهم ....كان موجود

برضه...على الوش ..ف شنطتى وانا راجعة هنا..

ههههههههههه

كل ما افتكر ......

طبعااااااااااا.....ده حصل ف مطار اسكندرية .....برضه الظابط بص لى بكل احترام الصراحة ....احترام وتوجس..

وقاللى ..

ممكن ياحاجة لو سمحتى تفتحى لنا الشنطة دى ؟؟؟

قلت له طبعاااااااا ده حقك...ليه هو فيه حاجة ؟؟؟

قاللى ..لالالالا..بس حضرتك افتحى لنا الشنطة ....وبدأ يلاغى زميله بالنظرات .

وفتحت الشنطة ...

وانا بقى اللى جت لى هستيريا الضحك...بس هستيريا يعنى هستيريا بجددددد.

قلت له طبعااا حضرتك واثق انى مش متخلفة علشان اشيل مقص بيورو واحد...من هنا لهناك؟؟؟؟؟؟؟؟؟؟؟

واااااضحك..

ومش قادرة اسكت...

الراجل بقى مش عارف يكتم الضحك وانا بقول له ...باين عليا بعمل دعاية لفتح الله...

اصل الكيس كان فيه المقص .وانا بحضر حاجتى ف الشنطة ومستعجلة ف آخر وقت رحت جمعت كل الأكياس اللى لقيتها موجودة جنب الشنطة وحطيتها ف الشنطة .ماهو اصل انا بحب يعنى اضع كل حاجة لوحدها ف كيس ...داء وحش يعنى ..مش بحب احضر الشنطة كدة يعنى يبان اى شئ ...كل حاجة من ملابسى ف كيس وحاجاتى الشخصية وكله..

كل ما افتكر .....

فضلت اقول له وانا بقفل الشنطة ...

.امانة عليك اوعى تظن اى ظن سئ ..يعنى كنت حاعمل ايه بمقص ف شنطة حاتتشحن؟؟؟

بقى يضحك...

بس الصراحة يعنى كنت مكسوفة جداااااااااا..

ده انا ليا نوادر مع التفتيش ف المطار ...

عايزة مجلدات يعنى .

مساء الرضا... :clappingrose:

[Simba]

نزلت مصر و انا حامل في مريم و انا في الشهر السابع

و كان المفروض اننا ناخد معانا تقرير طبي ان الحالة تسمح بركوب الطيارة

المهم الدكتورة اللي كنت متابعة معاها سافرت مصر و ما عملتش انا التقرير دا

و قولت عادي يعني و ربنا هايستر

و اتوكلنا على الله طلعنا على المطار

و احنا واقفين بنوزن الشنط الراجل اللي على الكاونتر شايفني واقفة بقى و بطني طبعا باينة

قام سأل جوزي قاله هي المدام حامل

جوزي بصلي كده كأنه بيشوفني يعني و بص للراجل تاني و قاله لأ

و جالي قالي ادراي بقى بدل ما نتفضح و يقولوا تقرير و ما تقريرش

حطيت شنطة ايدي على بطني و الحمدلله خلصنا

و دخلت بقى على الجوازات و من بعدها التفتيش النسائي

سبحان الله عديت من برة من غير ما ادخل و ما حدش قالي تعالي هنا للكشف زي ما بيحصل عادة

و فعلا ربنا سترها و ما حدش عملنا حاجه

بس بقيت مكسوفة اوي يعني ايه جوزي يقول للراجل مش حامل امال مالي يعني واكلة كرنب :blink:

ضحكتيني كتير يا ريمو

وفكرتيني باول مرة اسافر فيها من الكويت لمصر علي المصرية للطيران اول ما جيت اقعد علي الكرسي بتاعي جنب الشباك لقيت واحدة لابسة عباية سودا بتقولي ممكن اقعد مكانك قولت لها اوك وقعدت انا علي الكرسي اللي جنبها

ولقيتها بتقولي معلش انا اسفة اصل انا حامل في الشهر التاسع ونازلة اولد في مصر عند اهلي وما كنتش اعرف ان ممنوع ان الحامل تسافر في الشهر التاسع اللي لما هي قالتلي ومكانش باين عليها حاجة غير بس انها مسكت كيس وفضلت طول الرحلة ترجع

يجي الاكل تقولي ممكن اخد الزيتون بتاعك

تاكله وترجع

ايه ده

بقي دي رحلة طيران اومال فين الحاجات اللي واحد بيشوفها علي ام بي سي 2

اهي ارزاق ونيات بقي

[pink rose]

لا استنو افتكرت موقف كمان في المطار بس مسخرة

كنت مسافرة من مصر للرياض

و جت حماتي زارتني قبل ما اسافر و قامت رزعاني برطمانين سمنة بلدي

و الا لازم اخدهم معايا

و انا اقولها يا ماما مش هاينفع هايبوظوا الدنيا تقولي امسكيهم في ايدك

و قول ما اقولها حجة تطلعلي حل

المهم عشان ما تزعلش و الست كتر خيرها شاتلهم من القاهرة لاسكندرية اخدتهم و فعلا حطيتهم في شنطة و شيلتها في ايدي

و داخلة زي الهانم بقى على الاكس راي

و لقيت الباشمهندس الظابط قالي اركني على جنب شوية يا مدام الله يكرمك

ليه يا عم بس في ايه

قالي ايه المتفجرات اللي انتي ناوية تاخديها على الطيارة دي

وشي جاب الوان من الكسوف

قولتله دي سمنة بلدي و الله حماتي دبستني فيها

قالي ممنوع تطلع ع الطيارة اتصرفي و رجعيهم لاهلك برة

قولتله كل سنة و انت طيب روحوا خلاص

اقولك خدهم انت ايه رأيك و الله ما هم راجعين و بالهنا و الشفا

الظابط قعد يضحك و يقولي كده حماتك هاتدعي عليا

لا يا ستي خديهم بس بعد كده انسي الحوار دا

شيلتهم بقى و طلعت ع الطيارة و انا عمالة اقول في نفسي مش كان خدهم و ريحني

[abobakr]

بجد مواقف جميلة ومش قادر من الضحك

كنت بره مصر في رحلة كانت وقابلت قريب ليا من امريكا في الرحلة دي كنا متفقين اننا نتقابل عشانه مش بيعرف ينزل مصر بسبب الجيش بتاعه

المهم بعد ما خلصنا بقى وشكان البلد قالولنا بيتك بيتك

إز الاقي قريبي مطلع ليا علبة متوسطة الحجم كده وبيقولي اديها لفلان في القاهرة

فتحت العلبة عشان اشوف فيها ايه لاقيت فيها امبولات صغيرة كده زي الشامبوهات الصغيرة اللي بتكون في الفنادق

يهني بعد حوارات وسالته ايه ده وكده فهمني من تحت لتحت انها منشطات جنسية :blush:

المهم اروح المطار بقى انا عمري اصلا ما اتفتشت ولا فتحت شنطة لحد

الباشا فتح الشنطة وكانت العلبة على الوش عشان فلان كان هيقابلني في المار واديهاله

والراجل عمال يتكلم وانا مش فاهمه وينادي اصحابه وانا وشي جاب الوان واقوله حد هناك يتكلم انجليزي

وهما ولا هنا وعمالين يقلبوا في العلبة فوق وتحت ويكلمني وانا استنتج انه بيسالني ايه ده

تخيلوا انا لغتي الانجليزي ضعيفة وهوا مش فاهم انجليزي اساسا ازاي افهمه ان دي منشطات جنسية :blush:

انا اللي كان نازل عليا ساعتها عمال اقول **this is for s

المهم عدى الموضوع وخلاني امشي شكله قال طول ما هوا خارج بره البلد يبقى في داهية :Laie:

انزل القاهرة واطلع العلبة لصديقنا فلان بيفتحها يلاقيها ناقصة واحدة :o

شكل الظابط يتاع المطار اخدها في وسط الزحمة مش عارف بقى عشان يحللها ولا يجربها

طيب ما كان يقول من الاول وانا كنت هاديله اتنين بدل ما كان يسيب ركبي :P

تم تعديل 11 سبتمبر 2011 بواسطة bakarbeko

[abobakr]

الموقف التاني حصل لاختي وزوجها كان في الفندق مش المطار ومعاهم الجنسية الامريكية

كان بعد ايام تفجيرات دهب وطابا

كانوا نازلين بقى وعاملين حسابهم يتفسحوا وشرم ودهب وكده لاقوا التفجيرات

قضوها في القاهرة وإز في ليلة حبوا ينزلوا يتعشوا بره ويسهروا

داخلين فندق ورايحين على جهاز كشف المعادن وكان ايامها مشددين جداا يعني اللي قاعد على جهاز فحص المعادن مش فرد امن لالا ده كان ظابط بكام نجمة كده ومش بعيد كانوا ايامها يقعدوا لواء كمان

المهم داخلين على جهاز الفحص طبعوا اللي في جيبهم وحطوه على الترابيزة والظابط يعديه ليهم لما يعدوا من الجهاز

وإز الجهاز يصفر بيقولوا إز فجأة طلع ليهم عسكري اربعة متر في اربعة متر وسد الطريق قدامهم وجوز اختي خاف وقال خلاص هاكل حتة علقة لحد ما اعترف الجهاز صفر ليه

الظاب اللي كان قاعد على الجهاز بيبص في الحاجت اللي على الترابيزة عنده شاف الجواز الازرق stnd::

قام بسرعة من على الكرسي بتاعه وزعق في العسكري وقعد يتاسف لجوز اختي احنا اسفين يا باشا ومش عارف ايه وخلاه يدخل من غير ما يرجع للفحص تاني :angry2:

صحيح بلد بتاعة باسبورات زرقة :protest:

[ViralMind]

السلام عليكم..

الحمدلله انا محصليش ولا موقف وحش.. مقارنة بان سفرى قليل جدا..

بس احنا عندنا سمعة وحشة ان التفتيش فى الغرب مش كويس.. و اعتقد ده بيخلى الواحد يخاف مسبقا, و دى الحالة اللى كنت فيها فى اول مرة اسافر.. بس طلع الموضوع بسيط..

من المواقف العجيبة فى موضوع التفتيش.. كنت داخل القصر الملكى فى مدريد.. و بيبقى فيه طابور طويل جدا علشان التفتيش جامد حبتين.. المهم انهم فتشوا كل الاوروبيين اللى داخلين.. و انا اول ما دخلت... عديت زى الشعرة من العجينة :closedeyes: و عدونى على طول.

اسوأ موقف تفتيش اتعرضت له, و لغاية دلوقتى بتضايق جدا لما بفتكره, كان فى 2008 فى السفارة الامريكية, و كان رد فعلى بشع الحقيقة, لانى بحط كرامتى فوق اى اعتبار.. و من ساعتها اتغيرت من حب و انبهار شديد بأمريكا لكراهية بغيضة.. و من ساعتها طبعا مقدمتش تانى و لا هقدم.. و كان برضه فى وقتها بداية قرارى بالهجرة بشكل نهائى, بسبب الاهانة المتعمدة اللى بنشوفها و محدش بيعبرنا.

[سكر]

فى مطار القاهرة

كنت مع الزوجة والاولاد وبنعدى عادى من ضابط الجوازات راح موقفنى وبصلى وقالى

زياد مطلوب امنيا اركن على جنب

بصتله كدة وقلتله ايه عشان ايه قالى والله ما اعرف بس الواد زياد مطلوب امنيا

الظابط سالنى فين زياد

زياد كان عمرة ساعتها سنتين قلته اهو على كتف امة

الظابط من كثرة الضحك والكسوف من السستم الغبى قالى تعالى شوف اهو على الجهاز

المهم شفتها فعلا وقالى خلاص انا هصلحها وعددينا وخلاص