التليفزيون و رمضان

[Tafshan]

رمضان على الابواب ، كل عام و انتم بخير ، رمضان للاسف بالنسبه للتليفزيون هو شهر المسلسلات و و الفوازير و الاعلانات ..

اما عن المسلسلات ، فتتنافس العجائز علي طرح قدر اكبر من لحمهن للجمهور المتقزز من الابتزال و رخص المضمون ، و الفوازير مكرره و مقرره علينا كل عام بلا اي داعي ..

اما المساحه الدينيه ... لا تعليق

[Cleo]

المساحه الدينيه ... لا تعليق

ايه علاقة شهر رمضان بالمساحة الدينية؟؟

شهر رمضان ده موسم كل سنة وانتم طيبين... عشان نيللى وشريهان وأسامة أنور عكاشة يسترزقوا....

وبعدين الناس بتكون صايمة وكللللل تفكيرها طول اليوم يا ترى هناكل ايه عالفطار.. فلازم تكون برامج الطبيخ لها وجود قوى على الساحة..

وعشان أمريكا ماتتهمش شهر رمضان التحريض على الإرهاب فلازم برضه كام فيلم أمريكانى عالماشى عشان نخزى بيهم العين..

وبعدين الدين يا أخى مكانه فى القلب مش عالتليفزيون..

ماقلتليش.... هايجيبوا الكاميرا الخفية؟؟؟ :angry:

[R.M.G.]

أم المصائب في تليفزيوننا الرمضاني الأعلانات وشوف بقى خد عندك اعلانات سمنة وزيت درة وزيت عباد شمس اشي بريحة الضاني واشي بريحة البلدي وآخر بطعم اللية -حاجة تقرف- وزيت بيوطي الكوليسترول وآخر بيمنعه وتالت مش عارف ماله وتخش بعد كده على اعلانات المياه الغازية ويليها السيراميك اللي مش بيزحلق واللي باعرفه من رنة كعب جزمتي ده غير مورستان اعلانات المحاميل وشركاتها يختتم الأمر بطوفان اعلانات الشاي ثم مسلسلات بالكوم لدرجة اني والله مابابقى عارف مين متجوز مين ومين خلعت مين والمسائل بتركب على بعضها ويادوب بافهم المواضيع يوم 28 أو 29 رمضان

حاجة شلل

[Sherief AbdelWahab]

كنت أنوي فتح موضوع عن تليفزيون رمضان وتثبيته من أجل متابعة التليفزيون في رمضان ونقده بشكل موضوعي..لكن العزيز طفشان سبقني هذه المرة..

خلص الكلام

[الصاوى]

يا ترى هل منا من لديه نيــة الصوم عن التليفزيون فى شهر الصيام ؟

[Bero]

السلام عليكم ورحمة الله وبركاته

والله يا جماعه فعلا موضوع التليفزيون في رمضان ده مشكلة كبيرة يعني انا من يومين كنت واقفه مع مجموعة وجات سيرة رمضان كل سنة وانتم طيبين وبعدين كل تعليق الناس شفت مسلسل الهام شاهين طيب هنتابع اي مسلسل هو ده اللي متعلق في ازهان كتير من الناس عن رمضان يعني المفروض انه شهر صيام وعبادة وفرصة اننا نتقرب من ربنا لكن العكس بيحصل الاعلانات البايته والمسلسلات اللي هيا عبارة عن عروض ازياء وتيجي بأه تشوف المسلسلات الدينية نلاقيها وش الفجر.

انا عن نفسي لغاية سنتين فاتوا كنت بعتبر ان شهر رمضان بتبقى المزاكرة ضايعه فيه لان ببساطه يومي كان بالنهار صيام وافكر ياترى مسلسل ايه هييجي امتى لغاية ميعاد الفطار ومن بعده الواحد ميقمش من قدام التليفزيون بس بعد كدا لما الواحد عقل وخد جرعه مناعة وحصانة ضد التليفزيون وبرامجه لقيت ان شهر رمضان ده اكتر شهر بدي فيه في السنة وبيكون عندي طاقة رهيبة واتفقت انا واصحابي ان احنا نعمل حملة لمقاطعة التليفزيون شهر رمضان

وكل عام وانتم بخير :angry:

[Lighthouse]

يا ترى هل منا من لديه نيــة الصوم عن التليفزيون فى شهر الصيام ؟

الحمد لله

انا اصلا مقاطعة التليفزيون وبرامجه السخيفة منذ وقت طويل واشعر ان عمري يطول بسبب امتناعي عن متابعة سخافات تليفزوننا المبجل

والعاقبة عندكم في المسرات

[Cleo]

يا ترى هل منا من لديه نيــة الصوم عن التليفزيون فى شهر الصيام ؟

أنا شخصيا طلقته طلاق بائن من حوالى عام ونصف... إلا القليل النادر من البرامج العلمية التى أصطدم بها صدفة ولكنى غير "متابعة" لأى برنامج أو عمل تليفزيونى

[فــيــروز]

كنت اظن ان اسهال المسلسلات و البرامج التافهه فى رمضان حكرا على التليفزيون المصرى فقط !! لكن مؤخرا ومن الاعلانات التى تذيعها بعض القنوات الفضائيه مثل mbc على سبيل المثال لا الحصر ظهر ان كلنا فى الهم عرب .. حتى هناك برنامج التنويه عنه غريب جدا حيث يظهر فيه بعض الرجال المتشبهين بالنساء و فواصل عديده من الرقص و الغناء !! أين رمضان mfb: :blink:

[Sherief AbdelWahab]

مرة أخرى..أدرس وبقوة فتح موضوع منفصل لما يختص بما يعرضه التليفزيون المصري في رمضان (من 15 أكتوبر -13 نوفمبر)..

ولي تعليق لن يعجب الكثيرين..

كنت أساند وبقوة ما يقوله كل الزملاء عن ضعف الجرعة الدينية في التليفزيون في رمضان..

ولكن..

ولكن موقفاً واحداً مما رأيته في "سوء" العمل جعلني أطرح بعض التساؤلات المهينة:

-هل نحتاج إلى جرعة دينية أكبر من ذلك؟ أكبر من الشرائط الدينية التي يشغلها الباتاوات في المكاتب والشركات..من خطب الجمعة التي لم يعد لها أي تأثير على الإطلاق..

-ماذا سيستفيد أي منا من دكتور أو مفقر يظهر في التليفزيون لمدة ساعة أو أكثر ليحدثنا في أي كلام؟..من صراع الحضارات للحوار مع الآخر للبتنجان الأسود..

-هل نحتاج لجرعة دينية تعلمنا ما نعلمه؟..معظم الناس أصبحوا خبراء في العبادات..صفر كبير في المعاملات..الكل يعلم أن الغش حرام و مع ذلك تجد من يغش وبكثرة ، الكل يعلم أن الرشوة حرام و أن الراشي والمرتشي والوسيط بينهما ملعونون بنص الحديث الشريف ومع ذلك تجد الرشوة على عينك يا تاجر، الكل يعلم قيمة الإنسان في الإسلام ومع ذلك فهو يحتقر آدمية أخيه الإنسان المسلم الذي يعلم أيضاً قيمة الإنسان في الإسلام..

الكلام عن الجرعة الدينية وإسهام الإعلام المرتشي الفاسد في تربية وتوجيه جرعة دينية للشباب ولغيرهم في ظروفنا تلك تشبه تماماً ما فعله مدرب قال للاعبيه: فيه حاجة جه الوقت إني أقولهالكم بعد عشر سنين لعب في المنتخب: الكورة لعبة جماعية بيلعبها فريقين والفريق اللي يجيب جون في الفريق التاني -غالباً-هو اللي بيكسب!

اعتبروا ما سبق خلاصة تفكير مستفيض، فشة خلق ، أو لحظة غيظ..

خلص الكلام

[فــيــروز]

-..معظم الناس أصبحوا خبراء في العبادات..صفر كبير في المعاملات..

خلاص

يبقى نغير الى ما نحتاجه .. جرعه مركزه فى المعاملات .. و تذكره بان الدين المعامله .. خصوصا ان الناس فى رمضان قد تكون اكثر استعدادا من الناحيه النفسيه لتغيير احوالها

[Sherief AbdelWahab]

بمناسبة الاستعداد لتغيير الطباع..كان عندي أمل في دة السنة اللي فاتت..أول خمس أيام كانوا زي الحلم بالضبط..الباقي معروف..شتايم وسباب بأقذع الألفاظ وتدهور سلوكي فاضح ، وطوابير المتسولين اللي بتجري ورانا ورانا في الرايحة والجاية..ليه باحس ان التغير في رمضان مسألة صعبة جداً للدرجة دي؟

خلص الكلام

[فــيــروز]

ليه باحس ان التغير في رمضان مسألة صعبة جداً للدرجة دي؟

أى تغيير؟ mfb:

هناك البعض رمضان بالنسبة لهم موسم استرزاق !!

مثل المتسولين و مسئولى ماسبيرو و القنوات الفضائيه فى معظمها !! لكن ليس هؤلاء هم من يكونوا على استعداد للتغيير .. هيتغيروا ليه ده اكل عيش mf) لكن اقصد السواد الاعظم من الناس حتى لو كان اداؤهم خلال السنه يشوبه التقصير الاحساس فى رمضان يختلف :blink:

[se_ Elsyed]

والله العظيم يا جماعة لو تخيلنا الموقف كده إننا أسندنا إلى آرييل شارون او حتى شاؤل موفاز مسئولية وزارة الإعلام لدينا وقولنا له عايزينك بقى تحط لنا خريطة برامج تليفزيونية هلسية إلهائية شيطانية صهيونية على مزاجك عشان نشغل الناس في رمضان وننسيهم هو رمضان أساساً المفروض نعمل في إيه ..

هل شارون أو موفاز كانوا سيتفوقوا على السادة المسئولين لدينا ؟

الإجابة : طبعاً لأ ....

لأن إذا كان شارون وموفاز شياطين ... فاللهم لا حسد الإعلاميين عندنا هما اللي معلمين الشيطنة للشياطين نفسها .

عشرات المسلسلات ... مئات البرامج الهلس ما بين كاميرا خفية وبرامج حوارية عن اللي جوزها طلقها واللي مش عارف الرقاصة مين عملت إيه ... وجرايد يومية تفتحها دلوقت تلاقي صفحات كاملة للتنويه عن مسلسل معين اللي قناة معينة محتكرة إذاعته .. ويقولك إستوديو مش عارف مين يسابق الزمن للإنتهاء من تصوير المسلسل الفلاني لعرضه في رمضان ... وأخبار عن الفنانة الإستعراضية فلانة الفلانية اللي جابت سرير ومرتبة وبقت تنام في الإستدويو يا كبد امها عشان تلحق تخلص الفوازير بتاعت رمضان ...

ولو حد له تعامل مع تلك الإستدويوهات هايتأكد بنفسه إن معظم العاملين فيها سواء من ممثلين او فنيين ما يعرفوش يعني إيه رمضان وبيمارسوا حياتهم عادي جداص في الشهر الكريم وبياكلوا ويشربوا جهاراً نهاراً في رمضان عشان عليهم ضغط جامد وعايزين يخلصوا البرنامج ...

هو في إيه ومين بيخطط للحاجات دي ... ومين بيتفنن في إلهاء الناس بتلك الطريقة ..

ما يجربوا في مره كده يخلوا التليفزيون في إجازة في هذا الشهر .. أو بلاش كده عشان هايقولك ده رزق ناس ..

طب ما يخلوا التليفزيون 4 أو خمس ساعات في اليوم .

وبعدين إللي عمري في حياتي ما سمعت رجل دين من اللي عندنا طلع ومسك الميكرفون وفكر الناس إن رمضان يا جماعة شهر عبادة وفرصة لتنمية الحسنات وان اوله رحمة واوسطه مغفرة وآخره عتق من النار .. وقال لبتوع الإعلام إختشوا على دمكوا ده ربنا بيقيد الشياطين في رمضان .. لكن للأسف كله بيقولك وأنا مالي وياكش تولع .. هو أنا اللي هاقف في وش القطر لوحدي واظن المفتي بتاعنا - هو إسمه على جمعه باين - تلاقيه مستني يوم الأربعاء ده على أحر من الجمر وعمال يكوي الكاكولا والعمه والقفطان بتوعه عشان يطلع في القناة الأولى يقول رمضان بكره ولا لأ ... وجهز يا عم إسطوانتين عبد المطلب رمضان جانا وفرحنا به أهلاً رمضان .. وحتة عبد العزيز محمود مرحب شهر الصوم مرحب ليالك عادت بأمان .