هل الستات و البنات بقت قليلة الذوق؟

[ViralMind]

السلام عليكم..

لاحظت فى السنوات الاخيرة, ان الستات و البنات فى مصر بقت تميل الى الكثير من قلة الذوق فى التعامل مع الاخرين.

طبعا الموضوع زاد مع الوقت, و مش عارف اذا كان الموضوع ده بيحصل لى انا بس, ولا بيحصل مع كل الناس. :closedeyes:

هتكلم عن موقف بيحصل بشكل شبه مستمر معايا..

عندنا فى العمارة, لما اكون مستنى الاسانسير, وارد جدا ان ست او بنت تيجى.. و انا فى الطبيعى مبحبش استخدم الاسانسير مع ست او بنت معرفهاش.. فكنت فى الاول, و كنوع من الذوق اخلى الست تستخدمه الاول, و بعدين استنى لما ينزل و استخدمه انا.

و لكن لاحظت و بشكل شبه دائم, ان الستات و البنات بيفتكروا ان ده حقهم انهم يستخدموا الاسانسير الاول, فبيدخلوا حتى من غير بعد اذنك و يرزعوا الباب وراهم.. مع انى ممكن اكون مستنى الاسانسير بقالى دقيقتين ولا حاجة. :protest:

فى الفترة الاخيرة, بدأت انفض و معملش فيها جنتل مان, و بستخدم الاسانسير على طول.. و مبديش فرصة او وقت للى مستنى, لانى مش هتلطع 5 دقايق مثلا, و كمان يكون فيه قلة ذوق.

طبعا موقف الاسانسير ده من ضمن عشرات المواقف.. و ده مجرد مثال حى للتغير اللى بقى موجود و ملحوظ فى تصرفات البنت و الست المصرية.

يعنى من ضمن المواقف التانية, ان بنت او ست تيجى تسألك او تطلب منك مساعدة فى حاجة فى الشارع, و تكون فى نفس الوقت بتتكلم بتكبر او بتبص من تحت لفوق.. طيب حضرتك جاية تطلبى منى مساعدة ليه اصلا؟ هههههههه طبعا انا بقيت برضه ماشى على نفس نهج التجاهل.

هل ملاحظاتى و تصرفاتى فى محلها ولا ايه؟

[عماد حمدي]

مش كلهم يا زعيم فيه منهم الذوق و الأخلاق ..

فيه مواقف بقابلها زي اللي بتحصلك كدا ، كتير أوي أقربها السكرتيرة اللذيذه اللي عندنا ..

اللي ملخص موضوعها أنك بتتعامل بذوق في ( مواقف كتير ) و هيا مفكرّة أن دا حقها الطبيعي و أنك مُجبر تعمل كدا ..

فالحل مع النوعيات دي و خدها من مجرّب ( التجاهل ) كبّر دماغك خالص .. هما بيموتوا من التجاهل ..

ياعني حسسها إنها أصلاً مش موجودة ، و لا فارق معاك هيا موجوده أو لا ..

و إتفرج عليها بقا هتيجي هيا اللي تعاملك بجنتلة مش أنته ،،

ع العكس فيه بنات بجد الواحد بيقابلهم أقسم بالله الواحد ما بيعرف هما جايبين كل الذوق دا منين دول تربيتهم كويسة و طالعين من بيت مُحترم

متركزش أنته بس ! و الحياه هتكون لذيذة :)

تم تعديل 14 أغسطس 2011 بواسطة omda2006

[م تيمور المراغي]

كن كالشمس تعط ولا تسال المقابل

مش لازم تبتسم لك عشان تكون جنتل معاها

[hOuSsAm]

لاحظت فى السنوات الاخيرة, ان الستات و البنات فى مصر بقت تميل الى الكثير من قلة الذوق فى التعامل مع الاخرين.

طبعا الموضوع زاد مع الوقت, و مش عارف اذا كان الموضوع ده بيحصل لى انا بس, ولا بيحصل مع كل الناس

طيب مين قالك انهم (الستات والبنات دول) مبيشتكوش من الشباب والرجال نفس الشكوى؟؟؟

من الاخر دى حاجة بتخص المجتمع كله ولا ينبغى تخصيصها فى جنس معين لاننا نعيش داخل شبكة اجتماعية واحدة نؤثر ونتاثر

مستوى الاخلاق والذوق انحدر كثيرا فى مجتمعنا ولا يمكن تاكيده على العموم ولكن نسبة الانحدار كثيرة وعلى معظم المستويات

والاعلام هو مراية المجتمع وخير دليل على ذلك ولو تابعت الاعلام كويس وقارنته بخمس سنوات مضت فقط (مش هقول عشرين سنة) هتلاقى اختلاف كبير فى الاخلاق والذوقيات

------------------------

كن كالشمس تعط ولا تسال المقابل

مش لازم تبتسم لك عشان تكون جنتل معاها

برنس يا تيمور

وهضيف جملة كمان

اللى بيحترم بيحترم نفسه

وتقديرا لذاتى اعلنت احترامى:)

[ViralMind]

كن كالشمس تعط ولا تسال المقابل

مش لازم تبتسم لك عشان تكون جنتل معاها

بصراحة مش هضحك عليك.. و لكنى افتقر للكثير من المثالية.

لا طبعا مش لازم تبتسم ولا يخصنى :closedeyes: و لكن فى نفس الوقت ميبقاش رد الفعل عنيف.. هى دى الفكرة بس.

[عبير يونس]

كن كالشمس تعط ولا تسال المقابل

مش لازم تبتسم لك عشان تكون جنتل معاها

بصراحة مش هضحك عليك.. و لكنى افتقر للكثير من المثالية.

لا طبعا مش لازم تبتسم ولا يخصنى :closedeyes: و لكن فى نفس الوقت ميبقاش رد الفعل عنيف.. هى دى الفكرة بس.

ليست مثالية

حضرتك تتصرف بذوق علشان ذوق و متربي

بغض النظر عن اللي قدامك هو كمان ذوق و متربي و الا لا

هي دي النقطة المهمة

لازم تستمر في التعامل بأخلاقك

مهما افتقر الآخرون لأخلاقيات التعامل

الغني هو الغني بأخلاقياته

و محروم حقا من يقابل الإحسان بالإساءة

[Simba]

مش معقول تخلي اسانسير يخليك تحكم علي بنات مصر بقلة الذوق

زي ما في بنات قليلة الذوق فيه شباب برضه كده والعكس صحيح

بس بيني وبينك وفي سرك فيه حاجات كتير تخليك تحكم علي المصريات بعيد اوي عن الاسانسير :happy:

الشرطة النسائية الصينية

الشرطة النسائية المصرية

مكدبش ابدا اللي سماهم الحكومة :P

تم تعديل 14 أغسطس 2011 بواسطة Simba

[ابراهيم عبد العزيز]

أكيد التعميم خطأ , وهناك الغث وهناك الثمين كما نحن معشر الرجال تماما

اذا تكلمنا عن النوع الذى تقصده يا اخ ViralMind

فاوافقك الرأى , فهناك من النساء من يعتقد أن تقديمهم عن الرجال هو شىء فرض واجبار وحقا لهم لا تستحق عليه شكرا ولا ثناء

فبجانب مثال المصعد الذي ضربته

فمثلا فى وسائل المواصلات العامة وفى وقت ازدحامها وانت كرجل جالس على المقعد , يسيئك أن ترى بنتنا وهى واقفة وسط الرجال , فانت يخيل إليك كما لو كانت اختك فى نفس الموقف , فتنادي عليها وتجلسها مكانك , فتجد بعض البنات تجلس دون توجيه كلمة شكر وذلك يرجع لشعورها أن هذا واجبا عليك وليس مكرمة منك , والحمد لله هذا النوع هم القلة ولكن الاكثرية غير ذلك

تم تعديل 14 أغسطس 2011 بواسطة ابراهيم عبد العزيز

[pocy]

اخى الفاضل

بادئ ذي بدئ أحب ان اقول لك حللت اهلا ونزلت سهلا على منتدانا المحترم موقع المحاورات وهذه المقدمه لانها اول موضوع اقرأه لك

ثانيا اخى الفاضل :

أخطأت أخى الفاضل حينما اجمعت فانا اكره صفه التعميم فى اى شئ لان دائما لكل قاعده شواذ فاذا كان هناك ستات قليلين الذوق كما قلت فهناك الكثيرات منهم من يتمتعن بالذوق والاخلاق والاحترام فخطأ كبير ان نعمم واذا كان على حركه الاسانسير خليها فى ميزان حسناتك وكل سنه وانت طيب ورمضان كريم ده عمر اللى اسمه عمر وهو اصغر محاوراتى فى المحاورات بقي بيعرف يدوس ع الاسانسير ويقلي اتفضل يا ماما يعنى فى احترام اهه ربنا يحميه ويحمى كل اطفالنا يارب

ويحميكى يامصر قولوا امين

بوسي

[عماد حمدي]

أفتكرت موقف حصلي ..

أول ما جيت أبو ظبي هنا و أنا بالطيارة قعدت جنبي بنت .. و أنا من النوع بتكسف من ماما نفسها :wub: ههههـ

المهم الأكل جه و أنا عامل نفسي تعبان بقا و مش قادر و مغمض عيني نايم نايم ياعني bag): ، مش بحب اكل قدام حد خاصة لو بنت ..

المهم لقيتها بلطافة بتخبط عليا .. يا أستاذ مش هتاكل ولا إية ..

و أنا جبت زيت طيارات من الكلمتين دول مش عرق بس ، قولتها أه هاكل طبعاً ..

و كلت و رجعت نمت تاني bag): ، لقيتها بتخبط عليا تاني يا أستاذ ..

نعم ، مش هتاكل السلطة دي جميلة و بعدين أنته رفيع ( شكلي صعبت عليها ) هههههـ :D

و الله العظيم هيا اللي فتحتلي علبة السلطة و كلت السطلة و نمت تاني ..

لقيتها برده بتخبط عليا يا أستاذ هههههههههههههـ :lol:

نعم ، تشرب شاي ولا قهوه ؟؟

قولت بقا مبدهاش قهوه حضرتك و طلبت القهوه ..

و منمتش بقا بعديها رغي رغي رغي :gather: ، و لقيتها عرضت عليا بكل ذوق أن أخوها مستنيها في المطار في أبوظبي و علي أتم استعداد انها توصلني للمكان اللي أنا عايزة ..

و لما عرفت ان دي أول مرة ليا أجي الإمارات قعد بقا تنصحني و خلي بالك من كذا و كذا و كذا ..

و كانت بجد شايله همي أوي و حاسة أني مسؤل منها وفضلت تعرض عليا انها توصلني لحد آخر لحظة . لحد فعلاً ما فكرت لما أنزل أتصل بالمندوب و أقوله روّح انته ;) .

ياعني لو راجل اللي كان قاعد مكانها جنبي مكنش عمل كدة ..

عايز أقول ان فيه بنات كتير جداً عندهم كمية زوووووق لا أحد يتخيلها و هما بطبيعتهم كائنات رقيقة ..

و الراجل مُجبر أنه يتعامل معاهم بأسلوب مُختلف تماماً كونها أنثي لازم أكون لطيف في كلامي معاها ..

ع العكس فيه بنات تانية ( زي السكرتيرة عندنا ) تجيب الضغط و السكر و متعرفش اصلاً ياعني إية زوق ..

فبنقول زي ما بقيت الأعضاء تكرموا و تفضلوا اننا نعاملهم برده بزوق لأن أنته كويس و محترم و من بيت متربي فيه فبتتعامل بطبيعتك الهدوء و الرقة و اللطف في التعامل ..

لكن لما نفس الشخصية تكون قدامك طول النهار يوميا ً وإتفرضت عليك هنا بقا المشكلة ..

ان لو فضلت تتعامل بزوق بالرغم من كمية السخط اللي بتقابلها من الطرف التاني و التكبر و العلو و ان دا مفروض عليك هنا بيفكروا انك راجل مش راجل و مش ليك شخصية

فلازم بقا الوش التاني يبان ألا وهو ( التجاهل ) و الوش الخشب و المعاملة بالمثل ( في حدود اللياقة و الذوق ) ..

الطرف التاني بالذات البنات ( لما تحسسها انك متجاهلها ) هتاكل في نفسها و ترجع هيا تكون مُجبرة انها تغير معاملتها معاك ..

يبقي كل ذلك و مع إختلاف الحالات ان الراجل المُحترم هوه اللي يحافظ علي شخصيتة و يتعامل مع الناس كلها بلا استثناء بذوق و أدب لان دا بينعكس عن التربية اللي اترباها في بيته ( و يكون في حدود الأدب و الإحترام ) ..

أفتكر مديري قالي في حكاية جميلة أوي ( ان كل الموظفين هنا من خلال تعاملنا معاهم ، إحنا بنعرف أهلهم هل هما كويسين و لا لا ) ياعني لو بتتعامل مع الموظفين بطريقة سوري تفتقد الأدب يبقي ع طول بيتاخد انطباع انك طالع من بيت ( ...... ) ، و العكس ..

و متنساش أنهم عقلهم صغنون ( إلا من رحم ربي ) .. إفتكر دي دايماً علشان الأمور و المركب تعدي ..

[Alrefaey]

و انا فى الطبيعى مبحبش استخدم الاسانسير مع ست او بنت معرفهاش..

اشمعنى ,اتخاف على نفسك من الفتنة :blush2:

لا بجد ايه المنطق انك ماتركبش الاسانسير مع ناس ماتعرفهمش ,وهتعمل ايه لو سافرت فى بلد اجنبى وكان شغلك بيحتم عليك الاختلاط

[مغتربة]

بخلاف نقطه التعميم الى حضرتك وضحتها

لكن فى بنات و ستات كتير مبيحبوش انهم يبتسموا لرجل او يقولوله شكرا

لانهم يعتبروا انه ممكن يفسرها غلط

و فى كمان الى بيعمل كدا من منطلق دينى او اتعودا من تربيتهم على كدا

متستغربش

فى اسر كتير بتقول لبناتها عيزاكى زى الشويش بره البيت

متركزش كتير

من تعامل مع حضرتك بذوق او بقله ذوق

فتاكد انه نابع منه و ليس لحضرتك دخل فيه

[نورالعين]

رفقاً بالقوارير

هكذا أوصى رسولنا الكريم الرجال

يعنى حضراتكم عايزين ربنا يفضلكم عننا درجة بحالها كده من غير اي ضريبة تدفعوها

بكل صراحة انا ارى ان الواجب ان يعامل الرجل المرأة باحترام ويرفق بها وان لم تبادله

هذا هو ديننا

وهو الاتيكيت كما يعرفه الغرب عرفناه نحن قبلهم بكثير وبكل اسف الكثير من رجالنا يظنه رضوخ لا تستحقه او يطلب له مقابل

ربما هو خجلها فقط او خوفها ان تبتسم فتأخذ فكرة خاطئة عنها

[لماضة مصرية جدا]

السلام عليكم و رحمة الله و بركاته

اولا عنوان حضرتك مستفز جدا و اقولهالك وش كده

و القصة اللي حضرتك ذكرتها مش مبرر علي الاطلاق للتعميم زي ما اللي قبل ذكر

هو حضرتك مش واخد بالك ان في حياتنا اليومية كلنا نفتقد للذوق

و لما بقول كووووولنا يبقي اقصد

سواق التاكسي اللي عنده استعداد انه يوقفلك في نص الطريق و انت يا تنط تركب يا تنط تنزل بس خلي بالك لحسن تسيب الباب مفتوح و العربية اللي وراك تزعقلك

اقصد لما تبقي واقف و عامل طابور في محل التصوير و تلاقي راجل شيك جدا دخل فيا كتف مع اني بنوتة يعني و اصلا مبحبش اللي بيخبط فيا

و بعد ما هبدني الكتف يا ريته قال سوري او اسف او معلشي...بالعكس حسسني ان الغلط مني لان وشي جه في كتفه؟؟؟

هو حضرتك مش عايش معانا مثلا لما بتبقي في حوار في العيلة و تفضل تشدد علي الولاد الصغيرين من فضلكم قولوا بليز او لوسمحت....و فين بعد طلوع الروح تلاقي العيل اللي قد البلية راجع من النادي و بيقولك انتي غريبة اوي يا عمتو...محدش بيقول كده غيري

هتكلم مع حضرتك و هشارك معاك في حالة واحدة

لما نحط ايدينا في ايد بعض و نعمل ثورة

للاسف بديهيات التعامل الانساني المحترم...الف باء تعامل بقت مفتقدة

و للاسف الاكتر اللي بيتعامل بيها بقي عامل زي الكائن الفضائي اللي لابس قناعة اوكسجين و لافف عقله في ورقة سوليفان

الثورة دي مش هنستورد ناس تانية من بره علشان يعملوها لينا و لا لولادنا

ده حضرتك و انا و اسرتي و كل فرد...مش علشان عايزين نبقي مختلفين و خلاص

لا علشان هي دي الفطرة السليمة

مينفعشي نبقي بندوس علي كل حاجة حلوة و انسانية

اومال الخيرو الجمال و التعامل الانساني ينقرض و لا ايه

بالنسبة لموضوع الاسانسير

ع فكرة انا في الخليج لاحظت ان السيدات بشكل عامل مبيفضلوش يركبوا مع رجل غريب

انا بالنسبة ليا مكنشي فيه مشكلة لاني مفهمتش اصلا السبب اللي بيخليهم يعملوا كده....بس قولت دي ثقافة و انا احترمها لكن مش هطبقها علي نفسي

و بالنسبة لموضوع الابتسامة بين الرجل و المرأة

فيه حاجة اسمها لغة الجسد

يعني ممكن ما تراه حضرتك ابتسامة تعني اللياقة او حدود الذوق البعض الاخر قد يراها تعديا او لا داعي لها

و ع فكرة ده حتي في الاجانب علشان قبل ما حد يقولك العالم الشرقي المتخلف

الستات البريطانيات من هما صغيرين بيتعلموا يمشوا في الشارع زي العسكري اللي لابس الطرطور دوت اللي اخره ريشة و بيثبتوه في مناخيرهم باين

ببساطة لان الابتامة في اللغة الجسدية عند الفتاة معناها اني بشجع اللي قدامي و خصوصا لو رجل انه يبدأ الحوار و اني معنديش مانع في فتح الحوار

قد نتشابة في العالم الاسلامي

و قد نختلف

لكن الاهم تصرفاتي الشخصية تحكمها قناعاتي ان ده بديهيات الذوق و التعامل الانساني

و صدقني عندي يقين

مع ان احيانا بتبدو زي الكائن الديناصوري المنقرض

بس ع الاقل بتعمل السلوك اللي يشبهك انت و اخلاقك

و يمكن تكون زي قطرة المية اللي بتفتت الصخر و في يوم هتلاقي الناس بتتغير

كل واحد فينا هو زعيم ثورة داخلية.....تيجي من جواه...من قناعاته و مبادءه و رؤيته للحياة

و يمكن الدايرة توسع و تلاقي الناس بتعمل زيك من غير ما انت تحس

تقبل مروري

و كن دائما صاحب نظرة اعم في ثورة "الذوق"

[لماضة مصرية جدا]

و متنساش أنهم عقلهم صغنون ( إلا من رحم ربي ) .. إفتكر دي دايماً علشان الأمور و المركب تعدي ..

السلام عليكم و رحمة الله و بركاته

استاذي عماد

مداخلة حضرتك قيمة جدا و خصوصا بالامثلة الحياتية اللي حضرتك اوردتها

بس العبارة اللي كتبتها فوق ديت خلتني اسال نفسي

هو يعني ايه صغنون؟؟؟

يعني كام كيلو مثلا؟؟؟

طب مين قال ان عقل فولان صغنون و عقل فولان التاني دوت عملقون...(ايون علي وزن صغنون) ايه معيارك يعني؟؟؟

حضرتك كنت بنت قبل كده....اصل اكيد علشان الواحد يبقي عقله صغنون او عملقون يبقي اكيد عايش الفكرة للاعماق مثلا

ع فكرة اسئلتي دي اقدر اصنفها انها مستفزة عارف ليه

علشان عبارة حضرتك فكرتني بجدي و هو قاعد علي الكنبة في ليلة صيف و قاعد يحكيلنا عن خبرة الحياة

الله يرحمه جدي

و يحسن اليه

بس كان بيتفرج علي الدنيا

بس مداش لنفسه فرصة انه يطلع بره "صندوقه" و يعيشها بحقيقتها

بقولك كده لاني بتضايق جدا من اللي بيقول كده و كمان لما بسمع كتير من البنات بتتكلم عن الاولاد و تقول....يا بنتي دي الاولاد عقلهم زي الاطفال

مش عارفة ايه العلاقات الطفولية ذات التفسيرات الطفولية الصغنونة جدا لاعظم نعمة ربنا ميز بيها البني آدمين كلهم و هي العقل

و سبحان الله ربنا في وصفه للعقل كان العقل العارف بالله و مكنشي من ضمن قياساته خالص انه صغنون و لا عملقون

دي وجهة نظري

مش هتعجبك

و مش هتعجب اي حد

بس قولتها و امري لله

دم باجمل نعمة "العقل"

تحياتي

[ViralMind]

لماضة هانم...

مداخلة فى الجون, و فى الحقيقة هو ده اللى انا عايز اقوله..

يعنى لما الفاضلة عبير ردت عليا, كنت عايز اوضح نقطة انعدام الذوق كاتجاه عام..

انا مع البعد عن التعميم, و لم اقصده... و لكن قلة الذوق فى مصر اصبحت ظاهرة لا يمكن غض الطرف عنها.

و ده بيدخلنا فى نقطة جديدة الحقيقة... طيب انا لغاية امتى هعامل الناس بالاخلاق و الذوق و انا عمال اخد على دماغى؟ طيب ما انا كده عمال بتفهم غلط طول الوقت؟!!

[عماد حمدي]

و متنساش أنهم عقلهم صغنون ( إلا من رحم ربي ) .. إفتكر دي دايماً علشان الأمور و المركب تعدي ..

السلام عليكم و رحمة الله و بركاته

استاذي عماد

مداخلة حضرتك قيمة جدا و خصوصا بالامثلة الحياتية اللي حضرتك اوردتها

بس العبارة اللي كتبتها فوق ديت خلتني اسال نفسي

هو يعني ايه صغنون؟؟؟

يعني كام كيلو مثلا؟؟؟

طب مين قال ان عقل فولان صغنون و عقل فولان التاني دوت عملقون...(ايون علي وزن صغنون) ايه معيارك يعني؟؟؟

حضرتك كنت بنت قبل كده....اصل اكيد علشان الواحد يبقي عقله صغنون او عملقون يبقي اكيد عايش الفكرة للاعماق مثلا

ع فكرة اسئلتي دي اقدر اصنفها انها مستفزة عارف ليه

علشان عبارة حضرتك فكرتني بجدي و هو قاعد علي الكنبة في ليلة صيف و قاعد يحكيلنا عن خبرة الحياة

الله يرحمه جدي

و يحسن اليه

بس كان بيتفرج علي الدنيا

بس مداش لنفسه فرصة انه يطلع بره "صندوقه" و يعيشها بحقيقتها

بقولك كده لاني بتضايق جدا من اللي بيقول كده و كمان لما بسمع كتير من البنات بتتكلم عن الاولاد و تقول....يا بنتي دي الاولاد عقلهم زي الاطفال

مش عارفة ايه العلاقات الطفولية ذات التفسيرات الطفولية الصغنونة جدا لاعظم نعمة ربنا ميز بيها البني آدمين كلهم و هي العقل

و سبحان الله ربنا في وصفه للعقل كان العقل العارف بالله و مكنشي من ضمن قياساته خالص انه صغنون و لا عملقون

دي وجهة نظري

مش هتعجبك

و مش هتعجب اي حد

بس قولتها و امري لله

دم باجمل نعمة "العقل"

تحياتي

يقول رسول الله صلي الله عليه و سلم ( يا مَعشرَ النساءِ تَصَدَّقْنَ، فإني أُرِيتكُنَّ أكثرَ أهلِ النارِ. فقُلنَ: وبمَ يا رسولَ اللَّهِ؟ قال: تُكثرْنَ اللَّعْنَ، وَتَكفُرْنَ العَشيرَ، ما رأيتُ من ناقِصاتِ عَقلٍ ودِينٍ أَذْهَبَ لِلُبِّ الرَّجُلِ الحازِم مِن إِحداكنَّ. قلنَ وما نُقصانُ دِينِنا وعَقلِنا يا رسولَ اللَّهِ؟ قال: أَلَيسَ شَهادةُ المرأةِ مِثلُ نِصفِ شَهادةِ الرجُل؟ قلن: بَلى. قال: فذلِكَ من نُقصان عَقلِها. أليسَ إِذا حاضَتْ لم تُصَلِّ ولم تَصُمْ؟ قلن: بَلى. قال: فذلِك من نُقصانِ دِينِها». )

العقل هوه مركز عرض الأراء و المقترحات و التصرفات في نفس الوقت هوه اللي بيختار القرار و التصرف الأفضل ..

المرأه عاماً عاطفيه و تتميز بالعاطفة لذلك الحُحكم علي كثير من الأمور بيكون بالعاطفة ..

أنا لا أقصد التجريح للأخوات ، بالعكس أنا قصدت بكلامي بالبلدي كدة أكبر دماغي و أعدي مقفش علي كل حاجة هيا هتقولها و أعمل منها مشكلة ..

تحيــــاتي لحضرتك ،،

[ViralMind]

و انا فى الطبيعى مبحبش استخدم الاسانسير مع ست او بنت معرفهاش..

اشمعنى ,اتخاف على نفسك من الفتنة :blush2:

لا بجد ايه المنطق انك ماتركبش الاسانسير مع ناس ماتعرفهمش ,وهتعمل ايه لو سافرت فى بلد اجنبى وكان شغلك بيحتم عليك الاختلاط

دكتورنا الفاضل

هو الاسانسير مفهوش مجال للفتنة الحقيقة :lol: يعنى هما كلهم دقيقتين.. و لكن هو طبع او عادة.

بس عموما انا شخص سريع التأقلم.. يعنى بعمل scale up and down لطباعى حسب البلد اللى انا فيه :closedeyes:

زرت اوروبا مرتين و الامور عادى, و مفيش اى مشكلة فى الاختلاط طالما فى حدود.. و مهاجر كندا ان شاء الله, يعنى فى المجمل عندى استعداد لتفهم عادات الغير دون الانخراط فيها.

[عماد حمدي]

طيب انا لغاية امتى هعامل الناس بالاخلاق و الذوق و انا عمال اخد على دماغى؟ طيب ما انا كده عمال بتفهم غلط طول الوقت؟!!

حطيت إيدك ع المشكلة و خلينا نوسع دائرة النقاش و مش نحصرها علي البنات بس ..

أن تستمر بتعاملك زوق و أخلاق و لياقة و أدب حتي لوو اللي قدامك كان بيرد بطريقة غير كدة ..

هنا فيه معادلة مع الشخصيات دي ، و بتكون معادلة حساسة جداً أنك إزاي توصله أنك قادر تعاملة بنفس معاملتة بس مش هتعمل كدة لانك متربي و ابن ناس .

لذلك الحل الأمثل التجاهل ، واحد بعاملة بزوق و هوه مُصر يعاملني بقلة زوق ..

يا إما أكون قليل الأدب زيه ( ودا أنا أرفضة ) يا إما أتجاهل التعامل معاه ..

و صلي الله و بارك ، المهم تحافظ علي شخصيتك كراجل ..

تحيـــــاتي لحضرتك ،،

[ViralMind]

كن كالشمس تعط ولا تسال المقابل

مش لازم تبتسم لك عشان تكون جنتل معاها

بصراحة مش هضحك عليك.. و لكنى افتقر للكثير من المثالية.

لا طبعا مش لازم تبتسم ولا يخصنى :closedeyes: و لكن فى نفس الوقت ميبقاش رد الفعل عنيف.. هى دى الفكرة بس.

ليست مثالية

حضرتك تتصرف بذوق علشان ذوق و متربي

بغض النظر عن اللي قدامك هو كمان ذوق و متربي و الا لا

هي دي النقطة المهمة

لازم تستمر في التعامل بأخلاقك

مهما افتقر الآخرون لأخلاقيات التعامل

الغني هو الغني بأخلاقياته

و محروم حقا من يقابل الإحسان بالإساءة

شكرا لرد حضرتك.

فى الحقيقة هو كده فيه مجال آخر للمناقشة اتفتح.. و يتكتب فيه مجلدات..

هل نعامل الناس بأخلاقنا ولا بأخلاقهم؟ مش عارف بس الموضوع كبير و يستحق الكثير من التفصيل.

اخى الفاضل

بادئ ذي بدئ أحب ان اقول لك حللت اهلا ونزلت سهلا على منتدانا المحترم موقع المحاورات وهذه المقدمه لانها اول موضوع اقرأه لك

ثانيا اخى الفاضل :

أخطأت أخى الفاضل حينما اجمعت فانا اكره صفه التعميم فى اى شئ لان دائما لكل قاعده شواذ فاذا كان هناك ستات قليلين الذوق كما قلت فهناك الكثيرات منهم من يتمتعن بالذوق والاخلاق والاحترام فخطأ كبير ان نعمم واذا كان على حركه الاسانسير خليها فى ميزان حسناتك وكل سنه وانت طيب ورمضان كريم ده عمر اللى اسمه عمر وهو اصغر محاوراتى فى المحاورات بقي بيعرف يدوس ع الاسانسير ويقلي اتفضل يا ماما يعنى فى احترام اهه ربنا يحميه ويحمى كل اطفالنا يارب

ويحميكى يامصر قولوا امين

بوسي

آمين يا رب العالمين..

ربنا يخلى لك عمر و تشوفيه راجل قد الدنيا..

هى ظاهرة تستحق الدراسة.. بعيدا عن التعميم.

بخلاف نقطه التعميم الى حضرتك وضحتها

لكن فى بنات و ستات كتير مبيحبوش انهم يبتسموا لرجل او يقولوله شكرا

لانهم يعتبروا انه ممكن يفسرها غلط

و فى كمان الى بيعمل كدا من منطلق دينى او اتعودا من تربيتهم على كدا

متستغربش

فى اسر كتير بتقول لبناتها عيزاكى زى الشويش بره البيت

متركزش كتير

من تعامل مع حضرتك بذوق او بقله ذوق

فتاكد انه نابع منه و ليس لحضرتك دخل فيه

فى الحقيقة حضرتك ذكرتى نقطة بعيدة عن تفكيرى حبتين.. يعنى ماكنتش واخد بالى منها.

شكرا عالايضاح يا افندم.

رفقاً بالقوارير

هكذا أوصى رسولنا الكريم الرجال

يعنى حضراتكم عايزين ربنا يفضلكم عننا درجة بحالها كده من غير اي ضريبة تدفعوها

بكل صراحة انا ارى ان الواجب ان يعامل الرجل المرأة باحترام ويرفق بها وان لم تبادله

هذا هو ديننا

وهو الاتيكيت كما يعرفه الغرب عرفناه نحن قبلهم بكثير وبكل اسف الكثير من رجالنا يظنه رضوخ لا تستحقه او يطلب له مقابل

ربما هو خجلها فقط او خوفها ان تبتسم فتأخذ فكرة خاطئة عنها

مش عارف.. بس هما القوارير اللى كانوا على ايام النبى نفس القوارير اللى موجودين دلوقتى؟

اعتقد ان طبيعة المرأة عموما تغيرت مع مرور الزمان, و خصوصا مع نزول المرأة مجال العمل و المنافسة و تطورات كتيرة قوى غيرت حاجات كتيييير جدا.