كورنر التهييس السياسى مين ينضم لينا

[مغتربة]

من ساعه الثوره ما قامت و حتى اللحظه و الحراك السايسى فى مصر مهديش

باب الحريه اتفتح على مصرعيه و انطلق منه كل المحبوس فى الصدور سواء كان ايجابى او كان سلبى

المهم ان الكل اتنشق نسيم جديد و مش متعود عليه

هو نسيم الحريه

و علشان مش الكل متعود عليه

فحصل فى مصر كلها اعراض جانبيه ليه

بقى فى خلطبيته من تيارات على احزاب على وشوش قديمه عايزه تثبت نفسها و كمان قديمه بدور على دورها

و كله بقى بيدور فى نفس الدايره

و حتى على مستوى الناس العاديه بى الى له و الى ملوش فى السياسه مهتم بيها و منهم الى بيتكلم فيها

و كلام ليه قيمه و كلام ميساويش

و مؤتمرات و اعتصامات و جروبات على النت

و مجلس عسكرى و حكومه مؤقته

مولد و صاحبه غايب

و دا اكيد سبب حاله من المعضله فى امور كتيره

قرارات كتير بقى فيها تخبط

امور مش مفهومه

و تانيه مش مقبوله

و ازمات ملهاش حل

و تانيه عايزه عصا سحريه علشان تنفك

طيب فى وسط كل شده الاعصاب دى

متيوا نهيس شويه

مش شرط كل حاجه فى السياسه تتاخد افش

مش شرط كله نتنشن علشانه

علشان كدا انا افتتحت الكورنر دا

علشان كل واحد عايز يتكلم فى السياسه

بس من منطلق خفيف لطيف

عندك اقتراحات

حلول

تعليقات

تربيط بين احداث

نقد

اعتراض

تعالى و حطه معانا

بس بشرط

يكون بعيد عن الورقه و القلم

و كرفتات الافكار

ادى نفسك مساحه

و حط هنا اى فكره تخطر على بالك

حتى لو كانت مستحيله

او مش منطقيه

عايزين حلول غير تقليديه

عايزين افكار حتى و لو كانت لاسعه

مش مهم

:protest: :protest:

المهم ان دى مساحه غير تقليديه للحديث عن كل امورنا السياسيه

من منظور جديد

يمكن نطلع بفكره عبقريه

و حتى لو مطلعناش مش مهم

المهم اننا نكون نفسنا شويه

يالله منتظراكم و انا معاكم

:give_rose:

[مغتربة]

(1)

شكل الدوله

احم احم

الناس كلها لغايه دلوقتى مش عارفه تتفق على شكل الدوله الجديده عايزينه يبقى ازاى

ناس بتقول عايزينها جمهوريه دستوريه زى ما هى بس نقلص شويه صلاحيات الرئيس

و ناس بتقول لا عايزينها برلمانيه

اخ لو اتحولت لبرلمانيه

ييبقى كل الى بقالهم سبع شهور دول مصدعينا انهم هيرشحوا نفسهم لرئاسه مصر

هيخدوا بومبه

و ساعه الباب ما هيتفتح

مش هنلاقى اتنين على بعض مقدمين

و احتمال واحد بس الى يقدم

و ينافس نفسه

و فى الاخر ينجح

طيب ما انا عندى فكره احلى من دا كله

تحل لينا المعضله دي

لو رسيت على ان احنا نقلبهابرلمانيه

زى ما كانت قبل الثوره

و يرجع كدا لرئيس الوزرا هيبته

و يكون ليه شنه و رنه

يبقى نرجع كمان اسره محمد على تمسك المنصف الشرفى

بتاع راس الدوله

و كل ما هنالك ان احنا بس بدل ما نخليها جمهوريه برلمانيه

لا نرجع بقى على اديمه كله و نخليها ملكيه برلمانيه

زى ما كانت

ما هو سواء رئيس و لا ملك

مش فارقه

لانه كدا كدا منصب شرفى

يبقى نستدعى السيد احمدفؤاد

و نسلمه المنصب من تانى

و على الاقل هو الوريث الشرعى

و هى اسره محمد على موجوده

بدل بقى ما لسه نكون اسرعه ملكيه جديده

و ترجع مصر يبقى اسمها المملكه المصريه

و يرجع يكون دا علمنا و دا سلمنا

http://www.youtube.com/watch?v=Mhob6S1kwfA

و بكدا نكون رضينا كل الاطراف و رجعنا الحق لصحابه و الكل يبقى مرضى

ايه رايكم فى التهيسه دى :P smk:

ملحوظه صغيره ( هذا السيناريو حدث بالفعل فى اسبانيا عندما نصبوا الملك خوان كارلوس الاول عام 1975 بعد موت جنرال فرانسيسكوا فرانكو ) ;)

[مغتربة]

(2)

من الفرز الى نتج بعد الثوره

ان الناس الاول انقسمت لقسمين كبار ( حتى لو مش بالتساوى يعنى )

اسلاميين و علمانيين و ليبراليين

و كل قسم فيهم نزل فى التانى دبح

فالناس زهقت فقالت لا يا جماعه

مش انتوا بس الموجودين

انت قله قليله قوى

لكن لو جيتم للحق فالاغلبيه فى مصر

لا دول و لا دول

الاغلبييه اغلبيه صامته

و فعلا اتعدلت الموازيين و اقتنع الناس بالكلام

و بقوا يقسموا الناس لثلاث اقسام

اليبراليين و الاسلامين و الاغلبيه الصامته

و الى البعض بقى يحلو ليه

انه يسميهم حزب الكنبه

كنايه عن انهم لا بيهشوا و لا كنوع من الاستفزاز ليهم علشان ينزلوا يشاركوا

و يكون ليهم دور فى صياغه مستقبل بلدهم

بانضمامهم سواء للمعسكر الشرقى او المعسكر الغربى

لغايه هنا تمام

تمام

بس انا عايزه بقى اضيف تصنيف رابع

هو مش شرط تصنيف مستقل يعنى ممكن تلاقيه فى اى من الجهات الثلاثه

و ممكن تلاقيه مستقل عنهم كلهم

الصنف الرابع دا بقى انا بسميه ( حزب حله المحشى )

معلش هى طالبه معايا اسميه كدا

( مع ان و الله مفطرتش محشى النهارده و لا حاجه )

النوع دا بقى السمات المميزه للمنتمين ليه ايه

السمات المميزه ببساطه

ان حضرته ( سواء ذكر او انثى )

كان قبل 25 يناير ميفهمش فى السياسه

و لا يعرف حاجه عنها

و ممكن برضه بعضهم كان يفتكرها كلمه مش الى هيه يعنى ( سورى يا جماعه )

لكن بعد الثوره فاق لقى كل الناس بتتكلم فى السياسه

راح قال لنفسه

الله هو انا يعنى ناقصنى ايد و لا رجل علشان اكون زى الناس دى

هما بيتكلموا فى السياسه يبقى لازمن انا كمان ادلو بدلوى فى الموضوع

و اهو الى عرفهم ازاى يتكلموا يعرفنى انا كمان

و اهو الى عنده عقل و لسان يرطن بكل الالوان

و راح هوب هو كمان بقى بيتكلم فى السياسه

و ياريته ما اتكلم bsh:)

دا مش بس بقى يتكلم دا بقى يفتى

و الموضوع بقى ياخده بالكتف امال مش لازم يثبت وجوده

ما هو كان اصعب نشاط عقلى كان بيمارسوا قبل كدا كان رص حله المحشى صوبع صوبع :)

و لان كل الى كان بيجيده قبل كدا هو عمل حله المحشى المعتبره و بعديها شرب الشاى المتين و الانتخه قدام مسلسل الساعه 8 بتاع القناه الاول smk:

فهو اصبح بيتكلم و يفتى فى السياسيه من نفس منطلق حله المحشى

اى حشو و خلاص

بس معلش بقى ساعات قوى بيبقى حشو مستفز و ساعات اكتر بيبقى حشو يجيب صداع نصفى

و بقينا نسمع اراء و تعليقات فى السياسه بيقولوها بثقه شديده

و هى لو سمعها اى عالم فى السياسيه هينتحر اكيد من غير هزار

و الادهى انهم بيقاتلوا بشده فى اى جدال علشان يثبتوا ان الحشو الى عايزين يحشو بيه دماغنا بالاكراه دا

كلام مهم و كلام مفيد و تحليل علمى معملى ميخرش الميه

و انه عقليه سياسيه معمليه فذه

بس مكنش الاوان جه علشان نكتشف مواهبه المدفونه دى كلها

معلش طولت فى النوتايه دى

بس من استفزازى من الناس دى

لكن النصيحه الاخيره

حزب حله المحشى بقوا منتشرين كتير سواء فى النت او فى الحياه الحقيقيه

لو صادفت حد منهم حاول تحافظ على مستويات الضغط و السكر بتوعك

لانهم لو فلتوا منك الاخ او الاخت مش هيعوضوك عنهم

و الاهم بقى متحاولش تتجادل معاهم حولين نظرياتهم السياسيه الفذه

و اراءهم العبقريه

لان دى بقى فيها شيلان المراره رسمى

ربنا يستر علينا جميعا

:P :P

[ابراهيم عبد العزيز]

بما اننا فى ركن التهييس السياسي

أشعر أن رئيس مصر القادم سيكون خارج التوقعات كلها

أشعر أن رئيس مصر القادم يعده الله سبحانه وتعالى ( ولتصنع على عيني )

أشعر ان رئيس القادم لن ياتي بالطرق التقليدية , وأشعر أنه سيولد من رحم الازمة

هذه الأيام أتذكر لقطة تاريخية فارقة فى تاريخ مصر عندما أرسل التتار رسلهم برسالة الى ملكة مصر شجرة الدر وماتت شجرة الدر والرسول فى الطريق

وعند وصوله وعلمه بالنبأ , اعتقد أن مصر الخالية من القيادة وانه لا يوجد ممثل لشعب مصر

وهنا ساقت الاقدار رجل من الرجال الشداد ليظهر فى الصورة وهو قطز

ليقوم الشعب المصري بتتويجه رغما عنه كممثل لمصر ( تكليف وليس تشريف )

اعتقد أن التاريخ سيعيد نفسه , ورئيس مصر القادم يتم اعداه فى مكان ما وبطريقة ما وبكيفية هو اعلم بها سبحانه حتى اذا جاء امره يسر وسهل له الأسباب ليأخذ دوره المعد له

وسيكون تتويجه عن طريق حزب الكنبة وحزب ( المحشي ) وهم من لا يحسب الكثيرون لهم حسابا ولكن هم من سيكون لهم كلمة الفصل فى الوقت المناسب

تم تعديل 18 أغسطس 2011 بواسطة ابراهيم عبد العزيز

[نورالعين]

بما اننا فى ركن التهييس السياسي

أشعر أن رئيس مصر القادم سيكون خارج التوقعات كلها

أشعر أن رئيس مصر القادم يعده الله سبحانه وتعالى ( ولتصنع على عيني )

أشعر ان رئيس القادم لن ياتي بالطرق التقليدية , وأشعر أنه سيولد من رحم الازمة

هذه الأيام أتذكر لقطة تاريخية فارقة فى تاريخ مصر عندما أرسل التتار رسلهم برسالة الى ملكة مصر شجرة الدر وماتت شجرة الدر والرسول فى الطريق

وعند وصوله وعلمه بالنبأ , اعتقد أن مصر الخالية من القيادة وانه لا يوجد ممثل لشعب مصر

وهنا ساقت الاقدار رجل من الرجال الشداد ليظهر فى الصورة وهو قطز

ليقوم الشعب المصري بتتويجه رغما عنه كممثل لمصر ( تكليف وليس تشريف )

اعتقد أن التاريخ سيعيد نفسه , ورئيس مصر القادم يتم اعداه فى مكان ما وبطريقة ما وبكيفية هو اعلم بها سبحانه حتى اذا جاء امره يسر وسهل له الأسباب ليأخذ دوره المعد له

وسيكون تتويجه عن طريق حزب الكنبة وحزب ( المحشي ) وهم من لا يحسب الكثيرون لهم حسابا ولكن هم من سيكون لهم كلمة الفصل فى الوقت المناسب

كنت ساكتب نفس الفكرة

يخرج لنا قائدا

نوافق عليه باجماع ونوليه

لكن من هو!!!

ومتى نجده!!!

الله اعلم

مغتربة احييك على مواضيعك الجميلة

[عادل أبوزيد]

بما اننا فى ركن التهييس السياسي

أشعر أن رئيس مصر القادم سيكون خارج التوقعات كلها

أشعر أن رئيس مصر القادم يعده الله سبحانه وتعالى ( ولتصنع على عيني )

------

اعتقد أن التاريخ سيعيد نفسه , ورئيس مصر القادم يتم اعداه فى مكان ما وبطريقة ما وبكيفية هو اعلم بها سبحانه حتى اذا جاء امره يسر وسهل له الأسباب ليأخذ دوره المعد له

وسيكون تتويجه عن طريق حزب الكنبة وحزب ( المحشي ) وهم من لا يحسب الكثيرون لهم حسابا ولكن هم من سيكون لهم كلمة الفصل فى الوقت المناسب

بدون تهييس أشعر أن العواصف و الرياح تدور و تدور و هناك شئ ما يتكون ........

من أيام فقط من كان يتصور أن يلتقى الفرقاء بل من كان يتصور أن فكرة مواد حاكمة للدستور يمكن أن تناقش بل يقترب الجميع من التوافق حولها .... فقط من عدة أيام كان الوضع مختلفا تماما

أعتقد الأمور تتبلور إلى صالح شعب مصر .... كيف ؟ حقا كل يوم أجد مفاجأة فى الطريق الصحيح