خسارة المنتخب 1/2

[mostafa]

هزيمةالمنتخب المصري امام المنتخب الليبي 2/1

وسلمولي علي كاس العالم:

[فــيــروز]

واشمعنى يعنى ليبيا هى وقعت من قعر القفه ولا كانت وقعت من قعر القفه :huh: من نفسهم يعنى يغلبونا و اهى مصر طول عمرها الشكيكه الكبرى :blink:

[Tamsite]

أنا اتخنقتتتتتتتتتتتتتتتتتتتتتتتت

:huh:

[Maverick]

الحمد للة

:huh: :blink: f((: :huh: :P

[فــيــروز]

الحمد للة

:blink:  f((:  :P  :P  :huh:

:P :P

ليه طيب؟ :huh:

[mohamed]

يااااااااه

هى الدوشة اللى كل شوية كنت اسمعها دى عشان الماتش

ايووه يا جدعان

وانا قاعد اقول هى الناس بتصوت ليه كده كل شوية ؟؟!!!!!!

افتركتهم بيصوتو عشان الغلا واحوال البلد

بس الحمد لله طلعت سليمة

احنا احسن لنا نحول المنتخب بتاعنا ده لاى مشروع تانى مفيد

نجيب لكل لعيب عربية من بتاعت شباب الخريجين كده يقف يبيع عليها اى حاجة بدل الفضايح اللى احنا فيها دى

[حشيش]

هزيمةالمنتخب المصري امام المنتخب الليبي  2/1

وسلمولي علي كاس العالم:

معنته إيه الكلام ده ياخال ؟؟؟.......يعنى كده بالسلامة احنا؟؟؟...يعنى طلعنا من تصفيات كأس العالم خلاص؟؟؟.....مترد ياشندويلى ساكت ليه :huh:

[Th!nk]

العيب مش على المنتخب

كلنا عارفين أننا منستاهلش نتأهل ، فماذا بعد التأهل؟؟؟

العيب فينا أحنا اللى لسا عندنا أمل ولسه بنتشنج لما نخسر.

الكورة عموما معمولة علشان نطلّع فيها غلّنا بدل منطلعه فى حاجة تانية وعلشان كده ورغم الفقر اللى البلد فيه لسه بنصرف على الكورة بالملايين.

أنا كنت عارف ميعاد الماتش ولم أتفرج عليه. النصر والهزيمة ليس مقياس لمن يسير مستواهم على مقولة حبة فوق وحبة تحت

يا جماعة عيب نتوقع الفوز فى ظل كوسة ووسطة مالية الوسط الرياضى. حرام والله أننا نكسب لأن ده نوع من السرقة سرقة حق المجتهد بصرف النظر عن أنه ليبيا ولا هولندا.

المسألة من أولها لآخرها عدل ألهى. ولكل مجتهد نصيب. وفى نفس الوقت لكل مخادع ...................

[Th!nk]

وفعلا الحمد لله أننا خسرنا

مستوانا الحقيقى لازم يبان.

يا فوق يا تحت. سياسة بين البينين والأمل الوهمى هى فشل فى الحقيقة

النظام المبنى على الكوسة والواسطة لازم ينهار هو ده العدل يا جدعان ولا أنا غلطان!

[سقراط المصري]

قاموس الزمخشري:

الصفر:

المرادف ................... مصر.

[Farida]

كورة ايه و بطيخ ايه ياترى حايحاكموا اللى جابولنا المدرب الغبى ده و لا لأ .....اللى فرحانه فيهم الأهلاويه اللى اشتروا كل لعبية المنتخب الوقيع دول بملايين حتى اللعيب الزملكاوى الوحيد و اللى فرق نزلوه أخر ربع ساعه

[ماجد]

يــــــــــــــــــــــــــــــــــــــــــــاه

انتوا لسه بتشوفوا كوره

:o :o :o

[mostafa]

للاسف بحب مصر وبرغم معرفتي مقدما بلهزيمة لكن بحب مصر هتعمل ايه مرض يا جدعان taz::

[se_ Elsyed]

الدكتور محبط بشرني وانا في دبي وقالي لي على الخبر السعيد .. اللي كان متوقع لأن الفساد أستشرى وضرب بجذورة في أوساط كرة القدم وغرقنا في المحلية وتشجيع الاهلي والزمالك وجمهورية شبين ومنتخب سرس الليان وأصبح كل فريق من هؤلاء له المدافعين عنه والمستعدين ان يضحوا بالغالي والرخيص من اجله ... أما منتخب مصر فلا يجد من يسأل عنه وتركنا الامور لأشخاص جهال فأسرفوا وتخبطوا وجاءوا لنا بهذا التارديللي الترا لالي الذي يدير المنتخب بالريموت كنترول وهو جالس على شواطيء إيطاليا وتعجرف وتعالى علينا وأصبحت كل مهمته هو ان يلهف ربع مليون جنية مطلع كل شهر هو ومشاعده الأيطالي أيضاً ..

نقول كمان ... مرتبه ربع أرنب كل أول شهر ..

وبالفعل كانت العملية هاتكون مثمرة لما يكون عندنا مدرب محترم ويحقق نتائج جيدة .. لكن ما يحدث الآن هو إن عندنا لاعبين لا بأس بهم ومنهم الجيد ولكن للأسف لا يوجد لدينا مدرب محترم لإن إتحاد الكرة مش محترم ..

الغريب بقى إن الدكتور محبط ينادي برجوع الجوهري ... وكان مبدأ إحتفاظنا بالتراث بقى متأصل ومزروع جوانا ... وكان أيضاً حرام يبقى فيه دم جديد وافكار جديدة ... :o :o

س س لاعب كوره قديم ومدرب أشبال ومدرب فريق اول وبالم كور من ورا الاجوان ومستعد أدرب الفريق الأول واعمل نفس النتايج بـ 1000 ج في الشهر ... يا بلاش يالا قبل ما يعقل يا جدعان

[se_ Elsyed]

عايز أقول حاجة مهمة قوي ...

بصوا مش إحنا صيفنا بدري بدري في تصفيات كأس العالم 2006 بعد ما خسرنا 8 نقاط من أصل 15 ... looooool يعني حتى ما حصلناش التلميذ الخايب اللي بيجيب 50 % في الثانوية العامية وممكن يدخل كلية خاصة بفلوسه ...

نتيجة التصفيات ..... المنتخب المصري لكوره الحوكشه .. أفنننننننننننننندم.... 7 من 15 ... يعني لم ينجح احد ...

- فاللي عايز أقوله إن 1000 % هاتلاقي الأصوات تعالت والصحف خرجت بمانشيتاتها الشهيرة .. بإننا لازم نبدأ بداية صحيحة ونعمل ثورة في كورة القدم .. ونشتغل على ميه بيضا .. ونجيب مدرب عالمي ( قصدهم على الجوهري ... أصل مصر ما خلفتش غيره ... .. ونخطط .. ونهنكر .....إلخ

وبعد يومين تلاتة ... تعيش إنت يا حاج والناس هاتنسى .. وكل سنة وإنتم طيبين ..

لأن ده حدث في مثل هذا اليوم بعد بطولة أفريقيا 2000 ، 2002 ، 2004 وخدنا على قفانا وقولنا نفس الكلام .

وحصل أيضاً في تصفيات كأس العالم 94 ، 98 ، 2002 ، 2006 وكنا بنخرج بشكل مُذل كل مرة .

وهايحصل إلى ما لانهاية وربنا يدينا ويديكم طولة العمر ... وعايز أثبت الموضوع ده لأن نفس الكلام هايتكرر بعد كل صفر نحصل عليه .

تعرفوا ان السودان إمبارح كانت متقدمة على منتخب أسود الكاميرون 1/0 لحد الدقيقة 93 من عمر المبارة وتعادلت الكاميرون معاها 1/ 1 قبل ان يُطلق الحكم صفارة النهاية بثواني ..

كل الدنيا بتتقدم وبلاش الدنيا عشان ما تبقاش واسعه علينا حبتين .. كل أفريقيا والدول العربي سبقتنا وبقى عندهم كوره قدم حقيقية وبيصرفوا عليها أقل مئات المرات مما نقوم بصرفه هباءً منثوراً بدون أي مردود .. اللهم إلا مردود عبيط يتمثل في شوية الحبشتكانات اللي بيعملوها لما الزمالك يكسب الدوري أو الاهلي لما يخسر الكاس ...

ولما الأثنين الأشاوس بيطلعوا بره عربياً او أفريقياً .. بياكلوا ضرب ما كلهوش حرامي إتمسك بيسرق جزم في جامع ... وده ليه لأن اللاعب المصري مازال يتعامل مع الدول الصغيرة - أو التي كانت صغيرة - أفريقياً وعربياً على أنه أعلى منهم وإنه لسه لحد إول امبارح كان بيكسب ليبيا 10 /0 وبنين بالخمسة والستة وبروندي بالعشرة هي كمان ... وفجاة يجد نفسه اليوم أمام مارد عملاق يزنقه في الكورنر ويشبعه ضرباً حتى يغشى عليه .. ولكن مع ذلك لا يفيق من صدمته ويخطط ماذا سيفعل غداً .. وكل ما يفعله هؤلاء الأقزام - اللي هو احنا - الجعجعة واللجان الرئيسية التي ينبثق عنها لجان فرعية والمؤتمرات وصرف الملايين .. وكله في النهاية نفخ بلالين او كما قولت من قبل هي عملية تسمين لعجول كبيرة في السن لا يوجد أمل ان تأخذ منها حليب او لحمة أو حتى كوارع تعمل عليها شوربة أو فتة بالخل والثوم .

طب نرجع ونقول إيه الحل هي عم الجزار ياللي شغال في المدبح وبتتكلم عن الكوارع ولحمة الراس ...

بمنتهى البساطة وبالصلاة عالنبي - بلغة المعلمين - الحل في ان يكون عندنا ناس إدارجية صح بيخططوا لبكره ومنكرين لذاتهم ويعملوا بإخلاص لوجه الله .. ويوم ما يحس انه فشل يسيب الكرسي لغيره يكمل مش يهد ... ساعتها نقدر نقول عندنا رياضه وكوره وملفات كأس عالم ..

اما لو حصل غير كده ... يبقى عليه العوض ... والحقيقة المُره هي فعلاً عليه العوض ... مش تشاؤم على قدر ما هي واقعية ...

أصلي من 3 أو أربع أيام قرأت خبر بيقول .. إنه تم تعيين د / احمد نظيف رئيساً للجنة التي ستقوم بالإشراف على تنظيم كأس الأمم الأفريقية في مصر سنة 2006 ...

زغرطي يا محمد ... صقفي يا أم أبراهيم

وزي ما هو واضح ... هيصة وألقاب بتتفرق عشان البدلات والمرتبات ... وكأن الراجل خلص كل مشاكل البلد من أول اللحمه السوداني الخفية اللي مش هاندوقها إلى فواتير الزبالة اللي دخلت على الكهرباء .. وإحنا البلد الوحيدة اللي الزبالة عندنا بقت بتنور :o

وكأن العميان اللي عندنا ما شافوش رئيسة اللجنة المنظمة لأوليمبياد أثينا واللي كانت ست يونانية وزنها ما يجيش 50 كيلو - قايم - ولكنها بمية راجل واهي لا رئيسة وزارة ولا دياولو ولكن ست إدارجية وعندها مخ بتلو صغير مش كندوز إذا إتاكل ما يتمضغش وإذا إتمضغش ما يتبلعش وإذا أتبلع يعمل إمساك وتلبك معوي زي لحوم المكندزة اللي عندنا .

س س جزار ومتخصص في العكاوي .

[lالمطحون]

جائنا الاخ عصام عبد المنعم بالمدعو تاردلى ليه ............لان اهم حاجه لما نتنيل نمسك مركز اننا ندمر اى حد قبلينا وكان هناك فى اتحاد حرب السابقعملوا لجنه ورشحوا احسن الممكن وكان الاختيار للاخ عصام قوم ايه قام ماسح كل اللى فى المعبد وقام كاتب تاريخ جديد باسمه واتى بالاختراع الاعظم وهو السيد تراللى الهمام وفهمه انه المنقذ وان مستوى مصر لايزيد عن مستوى كفر ابو تشت وانه هو المصلح وذلل له كل شىء من ينتقده يبقى خاين ويقتل فى ميدان عام ومشيا على مبدأ السبوبه واللقمه الطريه جانا المدعو تاراللى بتوجيهات الزعيم الاكبر عصام الهمام مصلح البشريه ومغيث الصبايا الاحرار وعمنا لقى اللقمه هنيه فقعد فى بيتهم ودرب من البيت فهى مش مستهله اكثر من كده ......... حقيقى ربنا يخدهم كلهم واللى جايبنهم واللى جايبين اللى جايبنهم لاخر السلسله اللى انتم عارفينها

[se_ Elsyed]

بيقولك من الأسباب اللي مخلياهم خايفين يشيلوا تارديللي إن في شرط جزائي ان عند فسخ العقد لازم ندفع 3 شهور للمعلم يعني 105 ألف دولار ...

طب يا شوية متخلفين يا بتوع اتحاد الكوره .. ما تارالالي أساساً ما بيقعدش في مصر يومين على بعضهم في الشهر .... وخدوا عندكوا دي .. أول مبارة رسمية لمنتخب مصر ستكون في شهر مارس يعني عندك 6 شهور الراجل هايقعدهم في إيطاليا مُعزز مكرم وبيهيص مع مراته الجديدة - أصله اول ما أشتغل في مصر والبليه لعبت معاه راح طلق القديمة وإتجوز حته إيطالي جديدة لزوم الوجاهة - وطبعاً هايلف في الـ 6 شهور دول 210 ألف دولار أمريكاوي . ( 210 * 6.3 ج = مليون و 323 ألف جنيه .... اللهم صلي عالنبي .. اللهم زد وبارك ... انا ما باحسدش أنا بأقر بص ... وحار ونار في جتته ... ) ده غير التذاكر ليه وللمساعد جينانيني الجنايني بتاعه وإيجار الجناح اللي في الفندق الخمس نجوم وإيجار العربية والضرايب .... يعني بنتكلم في أرنبين ( فينك يا أرنوب حسين )

يبقى أنهو احسن ياللي عقولكم لا تفرق كثيراً عن أحذيتكم ان نحتفظ ببني ادم لا يفهم الفرق بين كرة القدم والبطيخة القرعة وأدفع له 210 ألف دولار .. ولا نرمي له دلوقت الـ 105 الف ونكسر وراه زير وبالمره نجيب مع الزير قله نخبطها على نفوخ عصام عبد المنعم اللي مقاس اتحاد الكوره طلع كبير عليه ويبقى نص العمى ولا العمى كله .

لكن نرجع ونقول العمولات تروح فين ... واليغمه تروح فين ... ومين أساساً إتعاقد معاه وحط الشروط دي .. ولما أتحاد الكوره بتاع عصام باشا عبد المنعم متعين لمدة 6 شهور يبقى ليه متعاقدين مع الراجل لمدة سنتين ...

لك الله يا مصر

[se_ Elsyed]

ورحل التارديللي غير مأسوفاً عليه

قرر مجلس إتحاد الحوكشه بالأمس إقالة المدرب الإيطالي ماركو تارديللي بعد ان خرجنا بفضيحة بجلاجل - كالمعتاد .. مش جديدة - من تصفيات أفريقيا المؤهلة لكأس العالم 2006 بألمانيا .. وبصراحه كنا من الفرق اللي نجمها خفيف ودمها زي العسل فخرجنا من الراوند الاولاني .. بدري بدري .... وقبل ان تنتهي التصفيات المقرر لها الإنتهاء في اكتوبر 2005 ... ولكن الظاهر إن بتوع إحتاد الكوره عندنا بصمجية فقرأوا التاريخ غلط وخرجنا في اكتوبر 2004 ... واهي كلها اكتوبرات وما فيش اكتوبر أحسن من اكتوبر ...

والعجيب بقى يا شباب ويا محبي كرة الحوكشة إن وعليكوا خير وربنا يطرح البركة في أولادكم .. هانفضل نتفرج وقاعدين كده زي إسمهم إيه دول لحــــــــــــــــــــــــــــــــــــــــــــــــــــــــــــــــــــــــــــــ

د سنة 2008 على ما ندخل تصفيات 2010 التي ستقام في جنوب أفريقيا ( فاكرين الصفر ) ولحد الوقت ده هانقعد نشتم في بعض والزمالك يخطف عامل غرفة ملابس من الاهلي .. والاهلي يروح خاطف الجنايني اللي بيسقى نجيلة الزمالك ... في إطار لعبة القط والفار التي يجيدوها تماماً ولا يجيدوا غيرها .....

وإستمراراً لإهدار المال العام السايب اللي مالوش أصحاب يكفي ان نعرف إن هذا التارديللي قعد عندنا 5 شهور هو وواحد مساعد جايبه معاه من أيطاليا بالسلوفانة بتاعته ولإسمه جيانيني وكانوا بيلهفوا حوالي 45 ألف دولار شهرياً وإحنا كنا بنتحمل الضرايب وتذاكر الطيران وجناح في الفندق وسيارة خاصة وخلافه .. يعني بالصلاتو عالنبي الراجل لهف حوالي 225 ألف دولا خالصة مخلصة + لا يقل عن 100 باكو قيمة الشرط الجزائي لفسخ العقد ...

وخلال الـ 5 شهور دول الراجل قعد في مصر 56 يوم فقط والباقي كان بيفلسع على إيطاليا لأن جو مصر تقيل على قلبه ...

طب يا عم س س الراجل عمل إيه خلال الخمسة وخميسة شهور دول .... الراجل يا جماعة لعب 5 مباريات فقط غلبنا السودان الغلبان 3/0 وإتعادلنا مع بنين اللي مش موجوده على الخريطة 3/3 بشق الأنفس وبعدين جت ساحل العاج عندنا وعلى أرضنا راحوا حلقين لنا وغلبونا 2/0 وراحوا ماشيين وبعيدن هزمنا الكاميرون اللي مخلص بنزين 3/2 بالعافية في مشهد دراماتيكي ... وروحنا ليبيا وإحنا في عز النشوى وفاكري إنهم لسه زي زمان وممكن نسكهم 5 او 6 .. وراحوا مظبطنا وهزمونا 2/1 .... وخرجنا مذلولين قبل انتهاء التصفيات بعام وقبل 5 مباريات آخرى وراحت فلوسك يا صابر .. ورجعنا نلطم الخدود في مشهد يتكرر بعد كل هزيمة ...

طب يا بتوع الكوره يا حوش مش من المفروض إن الملايين اللي بتتبعزق دي نصرفها على مراكز الشباب الصغيرة وساحات ممارسة الرياضة على الأقل نحتوي الشباب ونحميه من الضياع على القهاوي والنواصي وعلى الأقل أيضاً يبقى عندنا قاعدة عريضة لممارسي لعبة كرة القدم ....

انا ما بأطلبش المستحيل .. لكن نصرف 10 % من الاموال المنهوبة دي سواء على ملف الصفر او على المدربين الفاشلين الارزقجية اللي بنجيب الواحد منهم من على قهوة السواقين في بلدهم عشان يدرب منتخب الهنود الحمر في بلدنا ونقول عليه خبير أجنبي وgive me bakshesh ya khoagah وناس تلم من وراه عمولات ويقسموا معاه مرتبه - زي روود كرول الهولندي وجيرار جيلي الفرنساوي - والأتنين دول إعترفوا بإنهم كانوا يحصلوا تقريباً على نصف راتبهم والنص التاني طبعاً عارفين كان بيروح لمين وفين .

تقول لمين وتعيد لمين دي دولة مالهاش ريس ولا لها كبير وفلوسنا كتيرة وتبريراتنا اكثر وكل شبر في مصر بقى سبوبة وفيه ناس بتعرف تحلب النملة وتعمل احلى فلوس بس تعرف المداخل والمخارج وما حدش بيحاسب حد فمبدأنا هو " الحساب يوم الحساب " .

[أسد]

السؤال الملح ...

هل يمكننا الحصول على رئيس وزراء محترف من أي دولة في العالم براتب شهري 45 ألف دورلار ؟؟؟؟

الجواب ..

طبعاً نلاقي ... ويعطونا رئيس جمهورية هدية عليه كمان ...

صحيح ...

ما الذي يمنع ... أن نحصل على خبير إقتصادي .. أو مستشار لرئيس الوزراء أو رئيس الجمهورية من الأجانب ... بدلاً من هؤلاء المنافقون الأفاقون الكذابون ...

وحتى وإن فشل ... نبحث عن غيره .. مثلما سيبحثون عن واحد غير تارديلي ....

[Contra Mundum]

هل يمكننا الحصول على رئيس وزراء محترف من أي دولة في العالم براتب شهري 45 ألف دورلار ؟؟؟؟

انت ممكن تجيب رئيس امريكا ( بس بعد لما ربنا يفرجها فى نوفمبر) ...الlink الموضوع ادناه يحدد راتب رئيس الUSA ب400,000 دولار سنويا...يعنى مرتب تاردللى يعتبر مغرى لسيادته.

http://assembler.law.cornell.edu/uscode/ht...02----000-.html

طب تاردللى عمل 45 يوم بمصر و اخد ربع مليون دولار وخسر التاهل لكاس العالم. انا مستعد اقبض 50 باكو محلى فى نفس المدة و برضه اوعدكم انى اخسر التاهل.

مش صعبة و ديتها العب الهاف رايت فى الشمال و العب ظهيرى جنب احتياطى اصلا مع فرقهم و اركن احسن باك يمين فى مصر و لا اضم احسن رؤوس الحربة بمصر و بالخارج و استبعد احسن لاعب خط وسط مدافع و اقرفه فى عيشته وبعدين اتهمه بالعمالة و العب بباك غشيم و من غير صانع لعب.......

ماله بوكير ? رخيص ونتائجه ممتازة مع كل الفرق اللى مسكها و قاعد فى مصر وباين دى اصبحت ميزة ....