شكراً دكتور شرف .. إتفضل أقعد في بيتكم

[se_ Elsyed]

للأسف .. الظاهر إننا أخدنا مقلب كبير في عصام شرف ... وكنا كلنا بدون إستثناء مندفعين إندفاع ثوري في مشاعرنا واستبشرنا بشرة خير برجل نزيه ومحترم ... لكن للأسف ضعفه وأهتزاز شخصيته وأخذ القرار ثم إلغاءة وأتخاذ عكسه قضى على تلك النزاهة والإحترام لإن أنا جدتي الله يرحمها كانت محترمة ونزيهة برضوا .. فهل معنى كده كانت تنفع تكون رئيسة وزارة في حكومة ثورة ؟ ... وأتضح للجميع إنتفاء دوره في عملية إختيار الوزراء ... وكانت الفضيحة الكبرى في إختيار المحافظين العساكر بعد أن وعدنا إن إختيار المحافظين هاتكون مفاجأة للثورة .. وهي فعلاً طلعت مفاجأة بس سودا ومهببة .. وذلك بحدوث شبه إنقلاب عسكري وأستيلاء العسكر على 18 محافظة ... وبعد أن قضى فترة تقريباً 5 شهور من اول إبريل في رئاستة للوزارة ما زالت الأمور محلك سر .. ما كناش منتظرين طفرة في كل المجالات .. لكن على الاقل حسسنا إن في تغيير

في المحليات ونظافة الدنيا

في القضاء على البناء العشوائي يا راجل

يا عم بل ريقنا بعقد مؤتمر إقتصادي وجيب الخبراء اللي بالكوم وموجودين عندنا متلقحين على القهاوي عشان تدونا أمل في بكرة وترسموا لنا خارطة طريق

في نقل شعور للناس إن إنتخابات مجلس الشعب القادمة اللي فاضل عليها شهرين هاتبقى تاريخية - حد سمع حاجه عن الإنتخابات دي يا جماعة ؟

في القضاء على فوضى المرور والأمن في الشارع

في عقد مؤتمر عن تطوير التعليم في مصر ... التعليم اللي جودته عندنا أقل من جميع الدول العربية وتقريباً قربنا نبقى زي موريتانيا كده ...

بلاش ده كله أنا مُفتري وأحمله ما لا طاقة له به ... حد من الزملاء يختار موضوع ويكلمنا عنه في عصر عصام شرف ... بلاش كده يكلمنا هو عن إنجازاته خلال 5 شهور

ايوه .. عارف عارف .. أصلها حكومة إنتقالية .. وحكومة تسيير أعمال ومش متوقع منها إنجازات

لأ ايها السادة .. الحكومة اللي متوقع تقعد أكتر من سنتين ما تعتبرش حكومة إنتقالية

لإن خلال الفترة الإنتقالية دي ولو كانت شهور حتى ممكن تعمل طفرات في مجالات كتيرة جداً ومنها مجال المحليات مثلاً ... وتعمل طفرات في مجالات كتيرة جداً جداً بدون تحميل الدولة مليم واحد .. بل بالعكس ده ممكن نفس الطفرات دي تجيب لك دخل وإيرادات ما تحلمش به

أعتقد إن أصبح عندنا إمتداد لعصر موظفي الحكومة ... الوزير أو المسئول اللي بييجي الساعة 8 الصبح ويمشي 2 الضهر

لا جديد

لا أفكار مختلفة ومبتكرة .. سيبك بقى من زويل وفاروق الباز . ومصطفى السيد و و و و و و والناس اللي شوفناها في بدايات الثورة وكانت متحمسة للبناء والمساهمة في النهضة ... وهوووووووووووب إتردم عليها كالمعتاد .. لإننا مش فاضيين للكلام الفاضي ده .. إحنا ندور على أنبوبة غاز .. شكارة رز ... كيلة قمح .. كده يعني

لا شعور على الإطلاق بإن هناك ثورة قامت لتحقيق ( عدالة ... حرية .. كرامة إجتماعية )

حتى ردة فعلة في قتل الجنود على الحدود كانت مخزية ومثيرة للإستغراب من كمية الضعف والوهن اللي في شخصيتة وإن لا حول له ولا قوة

فهل هذا رئيس وزراء تم تعيينة وأختيارة من الميدان ؟

أه هو كان ميدان فعلاً .. بس شكله كان ميدان رمسيس العشوائي

--------

بعد ده كله أيها السادة .. إليكم القشة التي ستقصم ظهر عصام بيه وستُرسلة جنب أخواته السابقين وتقعدة على قهوة المعاشات اللي لايقه عليه هو وكل وزراءة

"شرف" لرؤساء الجامعات: "العسكرى" لن يصدر مرسوماً بإقالتكمالثلاثاء، 23 أغسطس 2011 - 19:32

كتب محمد الجالى - تصوير سليمان العطيفى

أكد مصدر مطلع بمجلس الوزراء، أن الدكتور عصام شرف، رئيس الحكومة، طمأن رؤساء الجامعات الذين التقاهم اليوم الثلاثاء، بمكتبه، وقال لهم إن المجلس العسكرى لن يصدر مرسوماً بإقالة القيادات الجامعية الحالية.

وأشار المصدر لـ"اليوم السابع" إلى أن "شرف" أكد، خلال الاجتماع، على أنه من يريد أن يتقدم باستقالته له مطلق الحرية فى ذلك، وفى الوقت نفسه لن يتم الاقتراب من أى قيادة جامعية تريد الاستمرار فى موقعها.

وكان مجلس الوزراء أصدر مرسوماً بقانون لإقالة القيادات الجامعية منذ أسابيع، والتى كان قد تم تكليفها فى عهد النظام السابق، وأكد فى بيان له أن المرسوم يقضى بإقالة هذه القيادات أول أغسطس الجارى، بعد موافقة المجلس العسكرى، وهو ما أدى إلى تباين فى رد الفعل بين المؤيدين والمعارضين، إلا أن مجلس الوزراء لم يصدر قرارات بما تعهد به فى هذا الشأن.

وجاء كلام "شرف" لرؤساء الجامعات اليوم ليؤكد مسعى المجلس العسكرى والحكومة لإبقاء الوضع على ما هو عليه

خلو بالكم ده بعد إيه ؟

بعد أن تم إتخاذ قرار من أسابيع إن خلاص .. أغسطس اللي خلص ده هو أخر وجود لرؤساء جامعات وعمداء متعينين من أمن الدولة والرئيس المخلوع وأفسدوا العملية التعليمية وقضوا على كل نشاط بالجامعة وباعوا الجامعات لدولة الفساد ولجمعية المستقبل بتاعت جمال بيه

وفوق كل هذا ... قام البية الأيام الماضية من اسبوعين تقريباً بتوزيع إستبيان على كل الاستاف بتاع الجامعات لأخذ رأيهم في طريقة إختيار رؤساء وعمداء الجامعات والكليات

وكانت النتيجة مذهلة ... أكثر من 80 % وافقوا على التعيين بالإنتخاب الحُر المباشر

ومع هذا.. طلع لهم لسانه أو تلقى أوامر عُليا كالمعتاد .. وأجتمع برؤساء الفساد وطمنهم إنهم باقون في مناصبهم إلى أن يقضي الله أمراً كان مفعولاً ...

-----------

عاوزين رأيي الشخصي وتفسيري المحدود لما يحدث ؟

الدراسة الجامعية في مصر هاتبدأ في منتصف شهر سبتمبر

وهو نفس الشهر اللي المفروض مرشحي البرلمان يتقدموا بطلبات الترشح ... وتبدأ العملية الإنتخابية والدعاية حتى الإنتخابات في شهري نوفمبر وديسمبر

والمجلس العسكري شايف الدنيا هاديه دلوقت ... لا عاد في ميدان تحرير .. ولا ميدان سفنكس حتى

وقرار زي بتاع شرف بيه اللي نقله على لسان مجلس الاُنس ... كفيل بإنه يولع الجامعات باللي فيها ... لإن كده إحنا أتقرطسنا ... وكده بنرسخ مقولة إن مافيش ثورة قامت على الفساد اللي في جميع المجالات .. وإن كل شيء هايفضل على قديمة ... ونفس مبدأ المخلوع : الشعب عاوز يمين ... خلاص أنا رايح شمال .. ويخبطوا راسهم في الحيط

والإضطرابات الجامعية لن تكون بسيطة ... فالشباب من حقه يتنفس الحرية .. ومن حقه يلاقي في جامعته قيادات محترمة مستقلة ليست مُعينة لتنفيذ أجندة النظام أو ل مسئول جامعي لازم يبقى مخبر يبلغ عن الناس وييجي الامن يلمهم بالليل ... وطبعاً لازم يبقى في لجنة السياسات

وبالتالي وبإختصار .. طول ما في قلق .. هاتبقى في حجه للمجلس إنه يطول .. ومش بعيد يلغي أو يأجل إنتخابات مجلس الشعب إلى أجل غير مُسمى

[ابراهيم عبد العزيز]

يجب ان نقر ونعترف أن إختيار الثوار للدكتور عصام شرف جانبه الصواب تماما

دكتور عصام شرف الكل يشهد له بالنزاهة ونظافة اليد واللسان , ولكن هذا غير كافي لرئيس وزارء حكومة ثورية

رئيس وزراء حكومة ثورية يجب أن يتميز بقوة الشخصية وبالقدرة على فرض مبادىء الثورة التي أتت به على كل مؤسسات الدولة

وأسوا شىء ملحوظ منذ تولي الدكتور عصام شرف المسئولية هو التردد فى التصرف ,كما نلاحظ عليه إتخاذ القرار ثم الرجوع فيه بين يوم وليلة وهذا شىء سلبي جدا فى أى رئيس حكومة , ويجعل الناس تفقد الثقة فيه , وعندما يسود مناخ من عدم الثقة من الشعب تجاه رئيس الوزراء فذلك يعني عدم الاستقرار

دكتور عصام شرف هو رجل أتى به الشعب المصري ,أى انه لا فضل لأحدا عليه , لذلك كان من المفترض ان يكون أقوي وأجرأ فى القرارات الاصلاحية وفى مواجهة فلول النظام مستمدا قوته من الشعب .

قد يقول قائل : الرجل يحاول ولكن الأمور أكبر منه أو انه يتعرض لضغوط ؟

نقول له فى هذه الحالة كان المفترض ان يتقدم باستقالة فورية يوجهها للشعب المصري يقول فيها أن هناك معوقات تمنعه من تحقيق اهداف الشعب المصري وطموحاته التي كلفه بها , وانه احتراما لهذا الشعب فإنه يستقيل , وقتها الكل سيرفع الدكتور عصام شرف فوق الاعناق .

والقشة التي قصمت ظهر البعير كانت احداث الحدود الاخيرة ورد فعل الحكومة تجاهها , فقد شعرنا أن مبارك مازال يدير مصر , فقد رأينا نفس الاسلوب في اللعب على عامل الوقت وأن الشعب سينسي , ونفس الاسلوب فى المهادنة مع الخارج بشكل عام واسرائيل بشكل خاص على حساب مصر وكرامتها وكرامة مواطنيها وذلك تحت مسمى ( الحكمة فى التصرف )

الله يتولانا برحمته

تم تعديل 24 أغسطس 2011 بواسطة ابراهيم عبد العزيز

[se_ Elsyed]

وزيادة على ذلك

بما إن الناس على دين ملوكهم

تلاقي الوزير الي كانت السي في بتاعته بتقول إنه عبقري في مجاله .. فجأة يتحول إلى شخص أبله لا يفقه شيء في أي شيء وليست لديه رؤية أو طموح

وجدنا ذلك في الدكتور سمير رضوان وزير المالية الأسبق اللي بيعتبر خير إقتصادي فذ

ثم ذهب وجاء حازم الببلاوي اللي لو عملت سيرش عنه وقرأت مقالاته العديدة زمان في جريدة المصري اليوم بالذات تحس إنك أمام أرشميدس أو إينشتين إقتصادي ...

وبمجرد جلوسه على الكرسي .. ما فيش أيام وشاف العك اللي بيحصل .. وشاف رئيسه في العمل اللي هو عصام شرف زي ست ابوها لا حول له ولا قوة إلا وتحول هو الأخر إلى عكاك وبيعجن

عُمركم شوفتوا خبير إقتصادي بدل ما يفكر في حلول إقتصادية قصيرة ومتوسطة وطويلة الأجل ... ينصب كل تفكيرة على إصدار أذون خزانة اللي تعتبر قروض على الدولة قصير الأجل واجبة السداد .. أو التفكير في فرض ضرائب جديدة والبلد حالتها طين .. أو رفع الدعم عن المواد البترولية ....

لا حول ولا قوة إلا بالله ..

هو كله ضرب ضرب .. ما فيش أي شتيمة

يعني عقلك ما بيحدفش بعد ما قعدت على كرسي الوزارة إنه يروح ناحية جذب إستثمارات خارجية أو داخلية ... فتح أسواق تصديرية جديدة .... ترشيد الإنفاق الحكومي ... تشجيع البنوك على الإستفادة من الأرصدة المتلتلة اللي عندها في تمويل المشروعات الإنتاجية وفتح مجالات عمل جديدة ...... وممكن أحكي لكم للصبح بخبرتي الإقتصادية المتواضعة جداً عن مليون حاجه

بُصوا أخر تصريح له اليوم وحاجه تخلي الواحد يولع في نفسه

«الببلاوى»: مصر فى «عنق الزجاجة» ١٨ شهراً

كتب محمد غريب ٢٤/ ٨/ ٢٠١١

الببلاوى

قال الدكتور حازم الببلاوى، نائب رئيس مجلس الوزراء، وزير المالية، إن مصر تمر الآن بمرحلة «عنق الزجاجة»، وهى فترة قصيرة لكنها غاية فى الصعوبة والقسوة، خاصة مع نضوب كثير من الموارد المالية، وزيادة عجز الموازنة، مؤكداً أن هذه المرحلة سوف تستغرق من سنة إلى ١٨ شهراً.

عاوز حد يقول لي على فرق واحد بين تصريحاته وتصريحات اللص يوسف بطرس غالي

أو أي إنجاز لسمير رضوان أو الأخ الببلاوي

يا راجل ده أنتوا خلتوني أكره القزاز كله وبقت أشوف أي قزازة دلوقت تجيلي حساسية وافضل أهرش وبقيت أشرب من الجردل على طول بلا زجاجة بلا قرف أحسن رقبتي تتحشر فيها وأفضل كده بقية حياتي

قد يقول قائل إنه بيقول الحقيقة ويتكلم عن واقع فعلي ...

ماشي .. ويعني إحنا جايبينه عشان يعدد ويصوت ويولول على الوضع الحالي .. ولا عشان يقدم حلول محترمة ومبتكرة ؟

[عنبو]

هو فيه سؤال بيلح عليا دلوقتى لما الدكتور عصام شرف راجل شريف ونزيهه ومش فارقه معاه مناصب وعاوز ينزل القبر نظيف يعنى ايه اليى مخليه قاعد فى منصبه لحد دلوقتى يعنى انا لو حسيت انى مش قادر اعمل حاجه ومافيش حد بيسمع كلامى يبقى اقدم استقالتى ومع السلامه علشان اخلى مسؤليتى امام الله لكن افضل مبرشط فيها كده ومبعملش حاجه يبقى اسمه ايه ؟

[hanzalah]

عصام شرف ليس الرجل المناسب لادارة دولة بحجم مصر

وليس مناسبا للمرحلة الدقيقة التي نعيشها

لانه ني ولانه طيب وهادي وغير مشاغب ولانه طوع المجلس السمكري ولانه حاجات كتير

لكن فقعني جدا ان يجتمع مجلس الوزراء لبحث رد مصر على قتل ولادها بدم بارد من الخنازير على الحدود

ثم يخرج علينا بتصريح يرفع الضغط ويقول

ننتظر بدء التحقيقات

حاجة تكسف وتؤكد ان مبارك يحكم بروحه ليس بجسده كما قال سليمان جودة في افتتاحية الوفد

ياعصام بيه استقيل بكرامتك احسن لو رصيدك خلص هتروح بيتكم زي البلوفر

مطرود

[se_ Elsyed]

الموقف الضبابي الهلامي اللي إحنا فيه ده يخلي الشيطان يلعب بدماغ الواحد ويخليه يشُك إن الغنتخابات القادمة سواء البرلمانية أو الرئاسية ..

هاتبقى تفصيل على مزاج المجلس

طالما مازال هناك إنفصال بين مني يحكم وبين الشعب صاحب البلد

بين من لا يشعر أن هناك ثورة قد قامت لتغيير كل شيء فاسد ...

وبين ناس طموحها وصل لعنان السماء ... لكن كل يوم بعد يوم بينزل ينزل ينزل .. لحد ما هانصطدم بالأرض

[mhfarag]

يا جماعة أنا عايز أقول حاجة

طريقة الحكم على الأمور فرع من تصورها

فأي حد بعيد عن المسئولية أفكاره أكيد هتكون مختلفة وهتختلف بعد دخوله المطبخ...المطبخ السياسي طبعا

وده تقدر تشوفه في أي سياسي حتى بره في أوروبا والدول المتقدمة

فالتنظير شئ والتطبيق شئ آخر

أنا لا أدافع عن أحد ولاكن يجب جميعا أن نعلم أن أي منصب سياسي في بلدنا المصون بالنسبة لأي شخص شريف ذو ضمير هو ورطة حقيقية الله يعينه عليها

وبعدين الشخصية القوبة الكاريزمية ليها ايجابيات أكيد ولاكن من سلبياتها الإستبداد بالرأي في الكثير من المواقف الذي قد يتحول إلى مشروع ديكتاتور آخر

[se_ Elsyed]

يا جماعة أنا عايز أقول حاجة

طريقة الحكم على الأمور فرع من تصورها

فأي حد بعيد عن المسئولية أفكاره أكيد هتكون مختلفة وهتختلف بعد دخوله المطبخ...المطبخ السياسي طبعا

وده تقدر تشوفه في أي سياسي حتى بره في أوروبا والدول المتقدمة

فالتنظير شئ والتطبيق شئ آخر

أنا لا أدافع عن أحد ولاكن يجب جميعا أن نعلم أن أي منصب سياسي في بلدنا المصون بالنسبة لأي شخص شريف ذو ضمير هو ورطة حقيقية الله يعينه عليها

وبعدين الشخصية القوبة الكاريزمية ليها ايجابيات أكيد ولاكن من سلبياتها الإستبداد بالرأي في الكثير من المواقف الذي قد يتحول إلى مشروع ديكتاتور آخر

ده أكيد يا عزيزي من غير جدال

لكن مش ملاحظ حاجه ؟

ده أحنا في الموال الإسود ده من ييجي 70 سنة

كل ما حد ييجي يتكلم ولو عن أفكار خيالية .. بنسمع نفس الجُمل المحبطة من عينة :

- أه ما هو اللي على البر عوام

- اللي إيده في المهلبية مش زي اللي إيده في النار

- ما تيجي تورينا نفسك وتحكم ... ما يحكمممممممممشي

وبعدين هو مش لو كنت أنا مجنون وباتكلم .. من حقي حد عاقل يفهمني ويرد عليه ... صح ؟

طب حد يقول لي : ليه المحليات تقعد 5 شهور في مراكزهم وكله تمام وبعدين يتشالوا وبرضوا ما نحسش بفرق ؟

أهو الحمد لله السنة الدراسية خلصت والنتيجة ظهرت .. والسنة الدراسية الجديدة هاتبدأ بعد بضعة ايام تقريباً 15/9 ... يبقى رؤساء الجامعات والعمداء بتوع المبايعات لمبارك ولإبنه يفضلوا ليه ؟

هو في إيه يا جماعة ؟

------

ولما بأتكلم عن مؤتمر إقتصادي ونسمع أراء غير تقليدية من ناس لا يسعون وراء مصالح ... هل ده مستحيل ؟

ولو كنا أستغلينا الفترة اللي فاتت دي كلها من 11 فبراير في تطبيق أفكار بسيطة تحسس الناس إنهم محترمين وإن عندهم كرامة وإن الثورة دي هاتغير حاجات كتيرة ... وغنفي ورة قامت من الأساس

يا راجل ده أنت عندك ملايين من الناس طالعين على المعاش وأفنوا عُمرهم في خدمة البلد ... لما أقول مثلاً إنتوا تقعدوا معززين مكرمين في بيوتكم وإحنا هانجيب لكم المعاشات لحد عندكم ونخصم 10 ج من المعاش شهرياً لخدمة التوصيل ... ونشغل الاف الشباب من الأستقطاعات دي ... وقس على ذلك توزيع الخبز والأنابيب والمواد التموينية ... بالله عليك الناس هاتقول لأ ؟

وإنت بتشوف منظر كبار السن أمام البنوك وأمام مكاتب البريد بيموتوا من طول الوقفة في الطوبير في الحر والشمس أو البرد القارس في الشتاء ؟

يا سيدي الكريم مهاتير محمد غير وجه المحليات في ماليزيا في 3 شهور

يا عم ما أحنا بيتعمل علينا فردة وبندفع رسوم نظافة شهرية بالفعل .. والدنيا بقت عبارة عن خرابة كبيرة

يا سيدي الفاضل بنشتكي من طوابير الخبز والدقيق المسروق ... ما تشغل أم مفتشين التموين ومباحث التموين والجيوش دي كلها في التواجد ليل نهار في الأفران

يا راجل شوف البنا اللي شغال ليل نهار وناس بتضرب بأبسط قواعد البناء عرض الحائط والدولة كلها واقفة تتفرج ...

إيه هانفضل في الهم ده لحد إمتى ؟

[زهرة الجبل]

كل الكلام ده صحيح

و أعتقد لو قعدنا نتكلم هنتكلم للصبح لأنه فعلاً الوضع أصبح خارج السيطره

لكن كلامنا طول ما هو مجرد إنتقاد لن يغير من الأمر شئ

السؤال بقى :

إيه الحل ؟

نعمل إيه طيب .. أو مفروض نعمل إيه علشان منرجعش ورا أكتر

أنا عندي ( صفارة ) بتزن في دماغي عماله تقول إنتبه .. الثوره ترجع إلى الخلف

مهو إحنا لو عاوزين حال البلد يتغير بعد الثوره يبقى لازم إحنا كمان نتغير عن قبل الثوره

إحنا كنا قبل الثوره كنا بنشوف و بنعلق عاللي حوالينا و ننتقد و ننتقد و ننتقد و بس

لو هيفضل هو ده نفس رد الفعل يبقى ايه بقى ؟ هنتغير ازاي ؟

أكيد احنا علينا جزء من المسؤوليه .

طيب علشان ناخد خطوه ايجابيه .. يبقى نعمل ايه ؟

ايه هي الخطوه الايجابيه اللي المفروض ناخدها دلوقت ؟

حل .. مخرج من الأزمه .. نقطه في آخر سطر الرجوع و سطر بدايه جديد .

خصوصاً إن تدهور الثوره مش انهرضه و لا امس و لا اول امس

إحنا بقالنا فتره شايفين و فاهمين و منتقدين و كافيين خيرنا شرنا

مين اللي يقدر يغير حاجه دلوقت و يقدر يغيرها ازاي ؟

هو ده السؤال اللي بجد نفسي الاقي له اجابه

[زهرة الجبل]

هي معجزه إني أشوف بلدي ماشيه في الطريق الصح ؟

معجزه إني أشوف كل حاجه فيها أو حتى أغلب ما فيها بيتطور ؟

معجزه إني بكل المميزات اللي في مصر و بكل المميزات اللي في المصريين أشوفها قربت توصل أو ماشيه في طريق يوصلها لمكانة تركيا مثلاً ؟

و حتى لو مطلوب معجزه .. هي الثوره اللي الشعب عملها دي أقل من المعجزه ؟

يبقى في حاجه غلط .. مادام عملت المعجزه و ماشوفتش إعجاز يبقى في حاجه غلط

حاجه لازم أعرفها علشان اقدر اتعامل معاها و لااااازم اتعامل معاها علشان اوصل للهدف

أو بقى في حل تاني و هو اني اتنازل عن الهدف ده و انساه و اريح دماغي

يا أتعامل .. يا أتنازل

أنا طبعاً عارفه إن فكرة التنازل عن الهدف دي مش وارده .. حتى لو حبينا نعملها مش هنقدر .. و لو قدرنا دم الأف شهيد شهداء الثوره هيمنعنا

طيب يبقى فاضل خيار واحد .. نتعامل إزاي ؟ مطلوب نعمل إيه ؟نلحق الثوره قبل ما تضيع من إيدنا إزاي ؟

[Khiber]

المصيبة الكبرى رجوع الداخلية رويدا رويدا إلى عهدها السابق فبالأمس تم منع حزب الوسط من إقامة حفل سحور على قهوة بمنطقة شعبية مع الجماهير لم أتذكر إسمها بدون أى أسباب وقام مأمر المركز بتهديدهم بالإعتقال إذا أصروا على إقامة السحور

وتحدث د عصام سلطان القيادى بالحزب على قناة الناس ببرنامج مصر الجديدة على التليفون بأن السبب هو أنه فى هذه المنطقة يوجد بها كوادر الحزب الوطنى سابقا والذين سيترشحون فى الإنتخابات البرلمانية القادمة وأوضح بأن مركز القسم بالمنطقة تعود على مساعدة هذه الكوادر بتزوير الإنتخابات نظير بشرقتهم والذى منه

هذه الحادثة مصيبة أصابتنى بالإحباط

وأخبر د عصام بأنه تقدم ببلاغ للنائب العام والله أعلم هيوصل لفين

كذلك تم ضرب المعتصمين أمام منزل السفير الإسرائيلى بملازم أول بالهروات والعصى مع شتائم بالأم والأب والذى منه ومع إصرار المعتصميين تم إنزال العلم الإسرائيلى من على المنزل وتم كذلك التقدم ببلاغ للنائب العام بقضية سب وقذف من هذا الملازم

الوضع هذا ليس مريحا

حقيقة بالأمس حسدت الليبيين على ثورتهم حيث أنهم كنسوا النظام القديم وسيبدأون إن شاء الله على نظافة

[pink rose]

المصيبة الكبرى رجوع الداخلية رويدا رويدا إلى عهدها السابق فبالأمس تم منع حزب الوسط من إقامة حفل سحور على قهوة بمنطقة شعبية مع الجماهير لم أتذكر إسمها بدون أى أسباب وقام مأمر المركز بتهديدهم بالإعتقال إذا أصروا على إقامة السحور

وتحدث د عصام سلطان القيادى بالحزب على قناة الناس ببرنامج مصر الجديدة على التليفون بأن السبب هو أنه فى هذه المنطقة يوجد بها كوادر الحزب الوطنى سابقا والذين سيترشحون فى الإنتخابات البرلمانية القادمة وأوضح بأن مركز القسم بالمنطقة تعود على مساعدة هذه الكوادر بتزوير الإنتخابات نظير بشرقتهم والذى منه

هذه الحادثة مصيبة أصابتنى بالإحباط

وأخبر د عصام بأنه تقدم ببلاغ للنائب العام والله أعلم هيوصل لفين

سحور الوسط بالمطرية

بعد مضايقات من أحد أعضاء جهاز الشرطة والمعروف بولائة للنظام السابق أقيم سحور الوسط فى ميدان المطرية بحضور عدد كبير من أبناء المطرية ورئيس الحزب المهندس أبو العلا ماضى ونائب رئيس الحزب المحامى عصام سلطان وأعضاء الهيئة العليا ... والوسط يشكر كل من شرفه بالحضور أو بالتضامن لإقامة هذا السحور بعد أن هب اهالى المطرية للوقوف بجانب الوسط ضد تعسف هذا الضابط و بالأخص أئتلاف شباب المطرية وكل الشرفاء الذين حضروا للتضامن مع الوسط

ما تقلقش يا استاذي المصريين اتغيروا و مش هايسمحوا للممارسات القديمة انها ترجع تاني

[hanzalah]

بالتأكيد ماحدث هو نجاح لثورة عظيمة انها قدرت تغير من واقع سلوك البشر

تحية تقدير واحترام لرجال المطرية الافاضل

لكن يحضرني هنا أمر هام

كيف يهدد الأمن باعتقال مواطن مصري بعد ثورة عظيمة كثورتنا

http://www.dostor.org/politics/egypt/11/august/24/52120

عنوان الدستور قال ان الامن منع السحور وهدد منسق الحزب بالاعتقال

هل يظن هؤلاء اللاهثين خلف جزمة نظام بائد ان عقارب الزمن ستعود الى الوراء

ثم اين عم العيسوي بياع السميط من التحقيق مع مثل هذا الضابط الغير شريف ليكون عبرة لمن تسول له نفسه تهديد مواطن شريف

هل نحن امام حكومة ثورة تؤمن بمباديء الثورة ام حكومة تعمل مع المجلس السمكري لاستعادة ماضي لن يعود باذن الله تعالى

[Simba]

ياا استاذ سين سين

في رحلة البحث عن نيمو او رحلة البحث عن شرف

اتضح انه قاعد في بيتهم فعلا

[Abu Reem]

فعلا صدق الأخ ( ابراهيم عبد العزيز ) لما قال ان ثورة ليبيا وتونس افضل من ثورتنا...

أول مرة اشوف ثورة تحدث ثم يقوم رئيسها المخلوع بتحديد من يتولى الحكم من بعده...المجلس العسكري وعلى رأسه المشير..هو من يقوم بالحكم الان وهو اساسا من تعيين المخلوع

- باختصار نفس السياسات ونفس الوجوه ...كيف تكون ثورة ثم يحكمنا من كان من رجال...الرئيس المخلوع

لقد..أفرطنا في الثقة...وفرحنا بالتنحي..ولكنه مازال مبارك يعمل وما زال يخطط ومازال يحيك المؤمرات التي رأينها كلها الفترة الماضية وتعاون فيها مع اصدقائه..من اسرائيل

- وياريت حد يقول لي اين حقوق الشهداء....( بعد عمر طويل ) وأين الانتخابات ..( بعد عمر طويل ) واين الإنضباط والنظافة في الشارع المصري..الذي يسقط بقوة

- يظهر ان احنا غلطنا اننا لم نطالب يتسليم مبارك وحاشيته لمحكمة الثورة او لمحاكمة استثنائية...وللاسف مرة اخرى أفرطنا في الثقة في مسألة المحاكمات الحالية التي..لن تنتهي الى شيء..

نريد ان نجني ثمار ثورتنا....حرام ...هل سنتسطيع ان نقوم بثورة اخرى ..لكي نتسلم بلدنا التي سرقها منا هذا اللامبارك

- ما نجيلكمش في حاجة وحشة

ولا عزاء....لثورة 25 يناير

تم تعديل 24 أغسطس 2011 بواسطة Abu Reem

[elrasy]

مرعوب من فكرة ان تكون كل دى تمثلية والمخلوع لسة بيحكم

وشواهد كتير بتدل على كدة

امن الدولة

ولا ظابط قتل مواطن اتحكم علية

محافظين من الجيش

محاكمات عسكرية

قتل مصريين من اسرائيل ومفيش اى مشكلة

التليفزيون المصرى زى ما هوة

وحاجات تانية كتير

[capitshino]

أنباء عن تقديم حكومة "شرف" استقالتها اليوم

قال مصدر مطلع "لبوابة الأهرام" إن رئيس الوزراء عصام شرف يترأس اجتماعا للجنة إدارة الأزمات صباح اليوم، وإن هناك نية مؤكدة على تقديم استقالة الحكومة، بعد فشلها فى احتواء تداعيات جمعة تصحيح المسار.

الرباط الخاص بي

[ابراهيم عبد العزيز]

مرعوب من فكرة ان تكون كل دى تمثلية والمخلوع لسة بيحكم

وشواهد كتير بتدل على كدة

امن الدولة

ولا ظابط قتل مواطن اتحكم علية

محافظين من الجيش

محاكمات عسكرية

قتل مصريين من اسرائيل ومفيش اى مشكلة

التليفزيون المصرى زى ما هوة

وحاجات تانية كتير

عندك حق ياأخ / الراسي

كل شىء كما هو ولا نشعر أن ثورة قامت وان هناك عقول جديدة تولت حكم مصر

يا أخي الشركة الصغيرة عندما تقوم بتغير مديرها وتعين مدير جديد فان الموظفين فيها يشعرون بأثار هذا التغير سواء من حيث قرارات جديدة او ( سيستم عمل ) جديد أو اختلاف فى اسلوب معالجة الأزمات وغيرها من الامور

أما فى مصر تشعر أن نفس العقول هى من تدير سواء بعد ثورة 25 يناير او قبلها , وانظر الى اسلوب معالجة أزمة الشهداء من جنودنا على الحدود الاسرائيلية , فترى فقط محاولات لامتصاص غضب الشعب دون الاقدام على خطوة واحدة على الأرض

تم تعديل 10 سبتمبر 2011 بواسطة ابراهيم عبد العزيز

[se_ Elsyed]

فترى فقط محاولات لامتصاص غضب الشعب دون الاقدام على خطوة واحدة على الأرض

غير صحيح يا ابراهيم

اللي حصل هو زيادة غضب الشعب مش حتى إمتصاص غضبة والضحك على عقله

فكانت النتيجة كما شاهدنا وشاهد العالم

[ام سلمي]

العربية: المجلس العسكرى يرفض استقالة حكومة د.عصام شرف

بوابة الأهرام

10-9-2011 | 14:20

ذكرت محطة العربية الفضائية اليوم السبت أن المجلس الأعلى للقوات المسلحة رفض استقالة حكومة د.عصام شرف رئيس مجلس الوزراء، خلال الاجتماع الذي عقد بين شرف وبعض وزرائه وبين المجلس العسكري اليوم

تم تعديل 10 سبتمبر 2011 بواسطة ام سلمي