الريان و السعد ينتويان العوده للواجهه مره اخرى

[مغتربة]

قال رجل الأعمال أحمد الريان، إنه سيعود لممارسة نشاطه التجارى فى السوق المصرى مرة أخرى، وأضاف: "خلال الفترة القادمة خاصة قبيل عيد الأضحى ستتحد شركتا الريان والسعد لوضع مشروع ضخم جدا لتوفير اللحوم البلدى للمصريين بأسعار مخفضة".

وأكد الريان، خلال حواره مع برنامج "القاهرة اليوم" الذى يقدمه الإعلامى عمرو أديب على قناة "أوربيت" مساء أمس الأربعاء، أن المشروع يقوم على تسمين العجول والمواشى وذبحها وضخها فى السوق المصرى بأسعار مخفضة لمواجهة الغلاء.

وحول تمويل المشروع، قال "الريان": إنه سيكون من اتحاد شركة "السعد" التى يتملكها رجل الأعمال المصرى أشرف السعد الموجود فى لندن، وشركة "الريان"، ومساهمة بعض رجال الأعمال العرب، نافيا أن يقوم المشروع على توظيف الأموال.

لغايه هنا و انتهى الخبر

عن نفسى لما حصلت مشكلات الريان و السعد كنت صغيره جدا

فبصراحه معنديش معلومات كافيه عن حقيقه الى حصل

يعنى هل هما فعلا كانوا نصابين زى الحكومه ما قالت عليهم

و لا الحكومه هى الى اضهطدتهم زى ما هما بيقولوا

للنقاش حولين الموضوع

و كمان عايزه اعرف رايكم حوالين تعتقدوا انهم هيرجعوا تانى زى الاول و الناس هتثق فيهم بعد كل الى حصل زمان و لا لا

هو الى انا شيفاه من التعليقات على الخبر انه اه الناس كلها مرحبه جدا جدا بالخبر و كانها كانت فى انتظاره

بس برضه خلينا نتناقش حوالين الموضوع

[م تيمور المراغي]

انا حضرت عصر الريان والسعد الذهبي واتقصينا والحمد لله ,,

الريان كان بياخد اموال المودعين وبيعمل مشروعات شكلها مشجع زي مزارع خضروات و تربية مواشي و مصانع بلاستيك ده كان الواجهه

لكن في الحقيقه كان بيضارب في بورصة لندن وهو كان شاطر في المضاربه وموهوب وده كان السبب انه اول مابدأ كان بيدي المودعين 2% شهريا على ما اتذكر

لو حيرجع بس تكون معاملاته الماليه خاضعه لرقابة الدولة بحيث تكون فعلا موجهه التوجيه السليم هو اقتصادي شاطر واكيد حيعمل حراك اكثر من رائع في السوق المصري واعتقد ايضا العربي

انا بقول رقابه مش توجيه لانه لو تم تدجينه حيجيبوه الارض ,,

ما ننساش خلفيته الدينيه فده حيقوي التيار المنتمي اليه بدون شك اجتماعيا وبالتالي سياسيا ودي حنحط سبوت عليها واحنا بنتناقش ,,

تحيتي ولي عوده والمعلومات اللي فوق دي مش من جوجل ,,

[dongol]

عن نفسي لي تجربة مع شركة الريان و شركة الشريف

فمدخرات أمي كانت تضعها في شركة الريان و لم تكن تواجة معهم اي مشكلة سواء في السحب او الايداع او حتي استرداد المبلغ في اي وقت

حتي صدر قرار من مباحث الاموال العامة بوقف نشاط الشركة و هنا بدأت المشاكل و ضاع عليها مبلغ غير قليل

نفس الامر حدث مع والدي في شركة الشريف فكان يضع تحويشة العمر في حساب في الشركة و لم تكن هناك اي مشاكل مع الشركة

احساسي ان الامر كان مدبر لان تقريبا البنوك كافة في هذه الفترة كانت متوقفة عن العمل بسبب ان شركات التوظيف استحوذت علي كامل المدخرات فالحكومة خشيت انهيار البنوك و خاصة الحكومية

الامر الثاني ان شركة الريان كانت تضارب في البورصة الامريكية علي ما اتذكر بمبالغ ضخمة وان كنت لا اري في ذلك عيبا

و لكن هذا الامر دفع بعض الجهات التي كانت مصر تنوي الاستدانه منها الي الرفض بحجة ان مصر لا تحتاج الاستدانه و عندها كل هذا الكم من الاموال في البورصات العالمية

و هناك امر اخر ان الريان كان ينتوي شراء احد البنوك الامريكية في نفس الوقت الذي كان جمال مبارك يريد شراء نفس البنك و طبعا الباقي معروف في دولة مبارك البوليسية

رايي ان عودة هذه الشركات الي الواجهه سيكون في مصلحة البلد ولكن مع البعد عن توظيف الاموال

فالمؤمن لا يلدغ من حجر مرتين

[se_ Elsyed]

فبصراحه معنديش معلومات كافيه عن حقيقه الى حصل

يعنى هل هما فعلا كانوا نصابين زى الحكومه ما قالت عليهم

هما بصراحة كانوا الإتنين

يعني نصابين ... وفي نفس الوقت الدولة أضطهدتهم في المرحلة الاخيرة

وإنتي واحده بتفهمي في الأقتصاد يا مغتربة ... فلما شركة او بنك تعطي فوائد على الفلوس تتعدى 20 و 30 % سنوياً

معنى كده بنوك بلدك كلها ستنهار وتفلس

وبكده نبقى نجحبنا شركة <<<< وخرنبا أقتصاد بلد بأكملة

فأعتماد هؤلاء كان بيبقى على تلبي طاقية ده لده

يعني سين سين حط فلوسة أمبارح ... ويستحق فوايد بعد شهر ..

ومغتربة حط فلوسها بعد شهر ...

يبقى بياخد من فلوس مغتربة ويدي سين سين فوايده

وفي نفس الوقت بيعمل شوية نشاط كغطاء زي حضانات ومحلات دهب ومعارض تجارة سيارات

وفي نفس الوقت بيعمل بتجارة العملة اللي كانت ممنوعة ومحرمة ... والنشاط الاساسي كان المضاربة في بورصات العالم

وده شيء أشبه بالقمار بفلوس الناس

[raouf]

سؤال مجنون شوية

بصراحة انا عارف ان الراجل فاهم وعاقل وتاجر ممتاز

وعقلية اقتصادية قوية

ايه المانع انه يمسك وزير اقتصاد

مش عايز ضرب عايز مناقشة موضوعية احنا زهقنا من ان الوزير الاستاذ الدكتور الاقتصادى .. هلم جره اللى رجعونا لورا

[se_ Elsyed]

الموضوع مش تجارة بس يا رؤوف

أو موضوع مكسب وبس

طب ما أنا ممكن أبقى وزير إقتصاد او مالية .. واكسب البلد مليارات

لكن

إيه الألية ؟

المضاربة في البورصة وأكسب مرة وإتنين وعشرة وبعدين تيجي ضربة تأكل الأخضر واليابس وتخلي البلد على الحديدة ؟

قارن بقى الريان بمحمد العربي بتاع توشيبا وشارب و و و

قارنه بالمرحوم عصفور بتاع كريستال عصفور

وغيرهم وغيرهم من مئات التجار اللي عقلهم يوزن دهب وبيشتغلوا في صمت

[الباشمهندس ياسر]

معليش يا شباب

توضيح بسيط

الصناعة سكة و التجارة سكة تانية

لان معظم الصناع بيدخلوا تحت بتد التجار

بس مش كل التجار اصحاب صناعة و ان كانت التجارة في حد ذاتها صنعة

[raouf]

الموضوع مش تجارة بس يا رؤوف

أو موضوع مكسب وبس

طب ما أنا ممكن أبقى وزير إقتصاد او مالية .. واكسب البلد مليارات

لكن

إيه الألية ؟

المضاربة في البورصة وأكسب مرة وإتنين وعشرة وبعدين تيجي ضربة تأكل الأخضر واليابس وتخلي البلد على الحديدة ؟

قارن بقى الريان بمحمد العربي بتاع توشيبا وشارب و و و

قارنه بالمرحوم عصفور بتاع كريستال عصفور

وغيرهم وغيرهم من مئات التجار اللي عقلهم يوزن دهب وبيشتغلوا في صمت

ما انا عارف يا حج سين سين

بس فعلا وحقيقى مما قراته او سمعته ممن كان يعرف الريان ان عقليته التجارية والاستثمارية رائعة مش مسالة بوصة وكلام من ده

الناس دى بتفكر و بتعمل للمصلحة العامة

وهاديك مثال فيه كام تاجر كبير فى عصر مبارك ومعظمهم حرامية وواكلين اموال الدولة كمان

حد فيهم قدر يوصل للى كان عند الريان ؟

حد فيهم عمل مشاريع ربع اللى عملهم هو السعد ؟

حد فكر فى مشروع يفيد البلد ويفيد نفسه ؟

التجارة كما تفضل المهندس ياسر صنعة وفن

وبعدين بلاش وزير اقتصاد حطه ومشيها وزير تجارة بدل اللى عمالين يجيبوهم ومش عارفين بيعكوا فى ايه

[مغتربة]

فبصراحه معنديش معلومات كافيه عن حقيقه الى حصل

يعنى هل هما فعلا كانوا نصابين زى الحكومه ما قالت عليهم

هما بصراحة كانوا الإتنين

يعني نصابين ... وفي نفس الوقت الدولة أضطهدتهم في المرحلة الاخيرة

وإنتي واحده بتفهمي في الأقتصاد يا مغتربة ... فلما شركة او بنك تعطي فوائد على الفلوس تتعدى 20 و 30 % سنوياً

معنى كده بنوك بلدك كلها ستنهار وتفلس

وبكده نبقى نجحبنا شركة <<<< وخرنبا أقتصاد بلد بأكملة

فأعتماد هؤلاء كان بيبقى على تلبي طاقية ده لده

يعني سين سين حط فلوسة أمبارح ... ويستحق فوايد بعد شهر ..

ومغتربة حط فلوسها بعد شهر ...

يبقى بياخد من فلوس مغتربة ويدي سين سين فوايده

وفي نفس الوقت بيعمل شوية نشاط كغطاء زي حضانات ومحلات دهب ومعارض تجارة سيارات

وفي نفس الوقت بيعمل بتجارة العملة اللي كانت ممنوعة ومحرمة ... والنشاط الاساسي كان المضاربة في بورصات العالم

وده شيء أشبه بالقمار بفلوس الناس

طيب و فين الدوله من كل دا

يعنى مش هى الى اصدرت فانون توظيف الاموال و اعطت الامر الغطاء الشرعى اللازم ليه

ليه الرقابه على الشركات دى كانت بهذا الضعف

ليه شركات توظيف الاموال لم تتبع للبنك المركزى و لم يكن له دور رقابى عليها

ليه شددت جدا فى الاجراءات الملزمه للبنوك و فتحتها على البحرى للشركات دى

ما الى حصل نتيجه طبيعيه

يعنى البنك يكون عليه مليون جهه رقابه و اعماله تحكمه تشريعات صارمه

و من ناحيه تانيه ترخص لشركه انها تقوم بنفس الاعمال الى بيقوم بيها البنك من غير ما تنزلها تحت نفس الغطاء التشريعى

بالعكس تكون القوانين المنظمه لعملها متساهله جدا

و بعدين بعد ما تكبر لهذا الحد تيجى و تقول دا غلط

و ليه اساسا القضاء عليها تماما بدل من تلافى الاخطاء دى باصدار حزمه قوانين منظمه لعملها

يكون الحل الاسهل الشطب من اصله

و مين اصلا الى سمحله بتجاره العمله و المضاربه و يا ريت منقولش ان الحكومه ماكنتش تعرف

الحكومه ذات نفسها كانت بتلجا ليهم لتوفير العمله الى هى محتاجاها

مش دى الطريقه المثلى لو هما فعلا كان الى يهمهم اقتصاد البلد

علشان كدا بقول ان انا مش قادره احكم

لان حتى لو هما عندهم تجاوزات فالحكومه هى الى سمحت ليهم بيها فى فتره

و بعدين قلبت عليهم مره واحده و قلبت الترابيزه على الكل

تم تعديل 27 أغسطس 2011 بواسطة مغتربة

[احمد رضوان]

يا ريت تقروا كتاب الملعوب للمرحوم فرج فودة وفيه شرح لظاهرة بيوت توظيف الأموال بشكل اكثر من رائع ولغز الحالة صفر وكيف يتم الدفع للمودعين والفرق بين فوائد البنوك والربا.... وعلى فكرة مكن الكتاب ده يكون من أسباب مقتل الدكتور فرج فودة

[احمد رضوان]

جبتلك كتاب الملعوب فى المرفقات اهوه يلا عيشوا

الملعوب - فرج فودة.pdf

[مغتربة]

جبتلك كتاب الملعوب فى المرفقات اهوه يلا عيشوا

اشكرك

تم التحميل

و باذن الله القراءه بعد العيد

كل سنه و حضرتك طيب