استفسارات خفيفة عن الكيتشن ماشين

[Alattar]

استفسارات صغيرة لربات البيوت اللي معانا هنا..و ممكن برضه للرجالة اللي غاوية مطبخ

من كام يوم الخلاط اللي عندنا باظ..و قلنا هنجيب واحد جديد..و بعدين المودام طقت في دماغها فكرة ألمعية..ومكلفة شوية..اننا نجيب كيتش ماشين..وأهه منه خلاط..و حاجات تانية كتير عمرنا ما هنستخدمها

المهم..حصل اللي حصل..ونزلنا امبارح لمول اسمه السيف غاليري في الرياض..واشترينا المذكور..و خدنا معاه هدية بتاع كده اسمه سلسلة الخلاط اليدوي..والاتنين نوعهم كينوود

الكيتشن ماشين زي ده بالظبط

و الخلاط اليدوي التاني..صورته زي ده بالظبط

طبعا بعد ما روحنا..و شفنا الحاجات اللي في العلب..حسيت كده اننا هنسخدم الخلاط و بس..لأننا ما نعرفش الحاجات التانية دي بيعملوا بيها ايه..فياريت تفيدونا بس عشان نحلل تمنه..مش معقول بعد ده كله أستخدم الخلاط بس

ثانيا..بالنسبة للخلاط اليدوي..حدش يعرف بنستخدم الحاجات الي فيه دي في ايه؟..يعني يسخدم كخلاط عادي..ولا ده له استخدام غير الخلاط العادي؟

و جزاكم الله خيرا..و ربنا يتقبل منا جميعا صالح الأعمال

[se_ Elsyed]

إنت ليه بتحط نفسك في المواقف الصعبة دي يا عطار ؟

يعني ما خلصناش من سواقة العربية ومشاكلها ... تقوم تروح ومدبس نفسك في ماكينة ما تعرفش مخاطرها ولا تعرف بتدور إزاي ؟

إستلم بقى

[مغتربة]

الف مبروك استاذ عطار

انا عايزه اقوللك ان الكيتش دا اخو بتاعى

و بقاله معايا اكتر من خمس سنين و الحمد لله مفيهوش مشاكل ابدا

كينود ماركه محترمه و الى بتدفعه فيها بتلاقيه هى و براون التوب

و اى ماركه تانيه بتيجى بعدهم

دى مداخله كدا على السريع و فى المداخله التانيه باذن الله هشرح لحضرتك كل قطعه استخدامها ايه

[Alattar]

إنت ليه بتحط نفسك في المواقف الصعبة دي يا عطار ؟

يعني ما خلصناش من سواقة العربية ومشاكلها ... تقوم تروح ومدبس نفسك في ماكينة ما تعرفش مخاطرها ولا تعرف بتدور إزاي ؟

إستلم بقى

مش بإيدي يا عمو سين..أنا كنت حاسس اني مغرر بيا..المدام خدتني امبارح علي سهوة و خليتني أشتري البتاع ده..

و أنا قلت..ياسيدي..خلاص العيشة ارتاحت..و هنعمل اللي ما اتعملش..و بعدين ألاقي حاجات ما أعرفش بنعمل بيها ايه دي..

آه صحيح..فيه بتاعة لقيتها بتقطع الخيار..شفت الرفاهية .. يعني أنا هقعد طول النهار بعد كده آكل خيار متقطع..أصلي بصراحة ما بحبش الخيار السليم..بحس انه طويل و أخضر كده..لكن لما يبقي متقطع أكيد بيبقي حاجة تانية

أهو أنا عمال أعشم نفسي بكلمتين زي اللي فوق دول كل شوية..عشان أحس اني ما انضحكش عليا..

ما تعرفش حد يا سين سين يخويا يشتريه من غير ما المدام تاخد بالها..و أنا هوصلهوله بنفسي..

[Alattar]

الف مبروك استاذ عطار

انا عايزه اقوللك ان الكيتش دا اخو بتاعى

و بقاله معايا اكتر من خمس سنين و الحمد لله مفيهوش مشاكل ابدا

كينود ماركه محترمه و الى بتدفعه فيها بتلاقيه هى و براون التوب

و اى ماركه تانيه بتيجى بعدهم

دى مداخله كدا على السريع و فى المداخله التانيه باذن الله هشرح لحضرتك كل قطعه استخدامها ايه

ربنا يكرمك يا مغتربة..ياريت والله..لأني حاسس اني محتاس..ده الكرتونة بتاعته لوحدها كبيرة جدا مش عارف أحطها فين..ده أنامتهيألي ممكن أخش أنام فيها شوية

[مغتربة]

اولا الماكينه نفسها او البادى نفسه بيركب عليه تلت قطه اساسيه

اما الخلاط و حضرتك زى ما قلت عارفه

او القطعه المتركبه عليه فى الصوره و دى تقريبا 90% من الشغل بيبقى فيها

او الكبه

القطعه المتركبه فى الصوره دى بيركب عليها سلاحين

السلاح السكينه و دا لو حضرتك عايز تستخدمها فى تقطيع اى حاجه

او السلاح التانى الى شبهه بس من غير سكينه

و دا لو عايز تستخدمها لخلط مواد من غير تقطيع زى مثلا البيوريه او البشاميل او كدا

و كمان ليها غطايين

غطاء زى الى فى الصوره ليه فتحه منفذه لتحت و دا علشان تستخدمه فى اضافه سوائل اثناء الخفق زى مثلا لو بتعمل مايونيز

او مثلا عايز تضيف بيضه على الخليط و هو بيتخفق من غير ما توقف الخفق

الكبه هتلاقى ليها ماتور غير و بيجى معاها وعائين مقاسين مختلفين

الطريقه بتاعه استخدامها انك بتحط التوابل الى عايز تطحنها فى وعاء منهم حسب الحجم و بعدين تربط عليه الماتور ( بالشقلوب ) و بعدين تركب الماتور على البادى الاساسى

بحيث يكون الشكل كان الوعاء مقلوب على الماتور على البادى

و بعدين فى غطاء لكل وعاء و فيه فتحات علشان لو حبيت متفضيش البهارات من الوعاء و تستخدمها على طول منها

العلبه المدور الى جنب الخلاط فى الصوره

دى لعصر الجزر و التقاح

هايله جدا

بس متعبه شويه علشان لازم تزق شويه

بتقطع الجزر او التفاح و تحطهم من الفتحه و بعدين تزقهم بالاداه البلاستيك الطويله دى

اول حاجه على الشمال دى عصاره البرتقال

دى بقى تحفه

كل يوم هتشرب عصير برتقال فريش

الثلاث دوائر المعدن دول سنون مختلفه لتقطيع الخيار و البصل و الجزر للسلطه و كدا

كل واحده فيهم بتدى شكل تقطيع مختلف

القطعه الى زى المضرب الكهربائى هى فعلا مضرب كهربائى للكيكات و الحاجات الى بتحتاج ضرب بمضرب كهربائى و بتتركب على القطعه البيضه المدوره الى ورا سن السكينه فى الصوره

مش عارفه نسيت حاجه و لا لا

بس لو نسيت فكرنى و انا اقولك

بالنسبه للمضرب اليدوى القطعه الى على اليمين دى للهرس

فى شوربات بتحتاج هرس زى مثلا العدس و كدا فدى بتستخدم فى الهرس

و الى على الشمال مضرب سلك عادى لكل الحاجات الى بيستخدم فيها مضرب السلك

و اى استفسار انا فى الخدمه

[مغتربة]

الف مبروك استاذ عطار

انا عايزه اقوللك ان الكيتش دا اخو بتاعى

و بقاله معايا اكتر من خمس سنين و الحمد لله مفيهوش مشاكل ابدا

كينود ماركه محترمه و الى بتدفعه فيها بتلاقيه هى و براون التوب

و اى ماركه تانيه بتيجى بعدهم

دى مداخله كدا على السريع و فى المداخله التانيه باذن الله هشرح لحضرتك كل قطعه استخدامها ايه

ربنا يكرمك يا مغتربة..ياريت والله..لأني حاسس اني محتاس..ده الكرتونة بتاعته لوحدها كبيرة جدا مش عارف أحطها فين..ده أنامتهيألي ممكن أخش أنام فيها شوية

لا لا

انتو بس محتاجين تتعودا عليه شويه

بس اول ما المدام تجربه مش هتقدر تستغنى عنه

هيبقى اديها و رجليها فى المطبخ

[نوران]

الحمد لله احنا جبناها وباستخدم الخلاط بس

يمكن بعد التوبيك ده يبقي فيه امل

[raouf]

جبتها بكام من باريس غاليرى يا عطار ؟

مراتى نزلت اللى عندنا مصر وبتدبسنى فى واحدة ثانية

موضوع الهدية المضرب ده حلو والدتى عاوزة ةاحد يبقى ضربت عصفورين بحجر واحد

[Alattar]

جبتها بكام من باريس غاليرى يا عطار ؟

مراتى نزلت اللى عندنا مصر وبتدبسنى فى واحدة ثانية

موضوع الهدية المضرب ده حلو والدتى عاوزة ةاحد يبقى ضربت عصفورين بحجر واحد

معلش يا رؤوف ياخويا..احنا دايما بنتدبس..و بينضحك علينا..بس بمزاجنا طبعا..أمال انت فاكر ايه؟

بص يا ريس..السيف جاليري أساسا كان عامل تخفيضات عشان رمضان..عشان كده ياريت تلحق بقي قبل رمضان ما يخلص

لو دورت علي السيف غاليري علي النت هيجيبلك الموقع بتاعه..وهتلاقي ملف فيه عروض رمضان..و هتلاقي الأسعار و كل حاجة

اللي أنا جبته ده أساسا كان معاه هدية قلاية بطاطس..بس تقريبا خلصت..فاستبدلوا الهدية بالمضرب اليدوي ده..

ولو احتجت أي حاجة ابعتلي

[Samar fathi]

انا نفسي ادبس جوزي انا كمان فيه ونشتريه ممتاز جداجدا