رفع رسوم إستهلاك المياه -

[se_ Elsyed]

الأخبار 11/10/2004 م

محافظ القاهرة: تطبيق الزيادة في سعر المياه علي مرحلتين

50 % فقط هذا العام والتحصيل شهريا.. وعداد لكل شقة

كتب محمد درويش :

قرر د. عبدالعظيم وزير محافظ القاهرة تخفيض نسبة الزيادة التي قررتها اللجنة الوزارية للمرافق بمساواة سعر بيع المياه في القاهرة بباقي المحافظات.. قرر المحافظ تطبيق 50 % من الزيادة هذا الشهر والباقي يطبق في العام المالي 2005/2006 والذي يبدأ في اول يوليه القادم.. وبمقتضي قرار المحافظ أصبحت الزيادة خمسة قروش ونصف فقط علي سعر المتر حتي استهلاك 10 امتار وستة قروش ونصف حتي 30 مترا و9.5 قرش لأكثر من ذلك وتسري باقي الزيادة من العام القادم.. كما أصدر المحافظ توجيهات الي المهندس عمرو وحش رئيس مرفق مياه القاهرة الكبري بمعايرة العدادات القائمة وضبطها وتلبية رغبات المشتركين في تركيب عداد لكل وحدة سكنية، كما طلب من المرفق اتخاذ الاجراءات اللازمة لتقدير الاستهلاك والتحصيل شهرا بشهر.. وأعفي قرار المحافظ المخابز من الزيادة في سعر بيع المياه بشرط أن يكون للمخبز عداد استهلاك خاص.. وقال المحافظ ان الاستهلاك المنزلي يقدر بحوالي 60 % من انتاج المرفق الذي يصل الي 6 ملايين متر مكعب يوميا.

مش قولت لكم زبالة على الكهربا وزبالة على الميه وعلى التليفونات وعلى الكل كليلة ...

نفس الفكر التل أبيبي في التخطيط ...

إضرب ولاقي ..

واحد يعمل زيادة معينة على الخدمات ..

ييجي واحد تاني يتدخل ويقول لأ يا خوانا حرام عليكوا خلوا عندكوا رحمة .. خلينا نعمل للناس الطيبيين دول تخفيض 50 % .. والـ 50 % التانية السنة الجاية ..

تهلل الناس وتفرح هيـــــــــــــــــه ربنا يخلي الحكومة .. يحيا العدل .

خفض جمارك من هنا ولسوع الناس في فواتير التليفونات والكهربا اللي بقت خرافية من ناحية تانية....

إخترع أنظمة قروطة وخنسرة جديدة وبدل ما مصاريف الزبالة تبقى على حسب الإستهلاك .. لأ نعملها على عدد الغرف في كل شقة .. يعني لو واحد غلبان وساكن في شقة 3 غرف في مساكن إيواء منشية ناصر وممكن ما يكونش عنده حتى كنبة إسطنبولي .. نعامله نفس المعاملة زي واحد ساكن في شقة برضوا 3 غرف ولما يقف في بلكونته ممكن يدلدل رجله في مية النيل في شقته اللي هواها يرد الروح .

بعد ما فاتورة التليفون كانت كل سنة لأ خليها كل 6 شهور وبعدين كل شهرين وبعدين كل شهر .. ونفس الفلوس اللي كنت بتدفعها في السنة او الـ 6 شهور هاتدفعها يا جميل كل شهر دلوقت وقضي حياتك واقف في طوابير الدفع في السنترالات ...

وألغي المكالمات المجانية ... وأضرب أي مبالغ جزافية ... ما هي ناس طيبة ومستحملة ولا مؤخذه طيبيييييييييييييين وما بيقولش لأ .... مع إن خدمات التليفونات دي هي بالظبط زي اللي بيبيع الهوا في قزايز ..

إلا أخبار اللحمة الجملي السوداني إيه ...

يا اخوانا نفسي أشرب مرقة قبل ما أموت

ولا هو إنكتب علينا نعيش نباتيين غصباً عننا طول عمرنا

[شيكو المصري]

طبعا يا اخ سي السيد ... ماذا تتوقع عندنا في اسكندرية المية غلت من 12 الى 23 قرش في مرة واحدة ...... بس من ناحية تانية الناس حتبطل تستهين بالمية اللي بيرشوها في الشارع ......فية واحد كتب امبارح في بريد الا هرام ان واحد امريكي زار مصر و قال عليها اغنى دولة في العالم ... لية ؟؟؟؟؟ mf)

علشان المية اللي الناس بتشربها و متكلفة بتترش بيها الجناين و الزرع و تستخدم في الاستحمام ....... في حين امريكا مقسمة المية 3 درجات

حدائق استحمام شرب ومياة نقية تماما ..

تفتكر لية الامريكان كانوا بيستغربوا لما اشرب من خرطوم المياة في الحديقة هناك ؟؟؟ :blink:

[فــيــروز]

الصراحه المحاورات كان لها سبق اعلامنا بزيادة فواتير المياه

لدرجة انى حين قرات الخبر من كام يوم فى الصفحه الاولى للاهرام قلت .. قديمه

كنت قد تساءلت زماااااان جدا عن السر وراء عدم تسعير المياه فى مصر و ايجاد عداد للمياه فى كل شقه !! بدل من نظام التقدير الجزافى المتبع حاليا و الذى يقسم فاتورة العماره بالتساوى على كل الشقق !! بالرغم من وجود حالات صارخه للاستفاده الفرديه بالمياه .. عندكم مثلا ايام العيد .. يقوم اصحاب العماره بالاستعانه بالبواب و ابنائه بغسيل سجادهم بالكامل بكميات وهميه من المياه !! ده غير السفه المتبع فى طريقة تنظيف العماره اصلا !! طبعا ما هى الفاتوره فى الآخر مقسمه علينا جميعا :P اتمنى يصدقوا فى عمل عداد مستقل لكل شقه ده :lol:

تم تعديل 12 أكتوبر 2004 بواسطة فــيــروز

[se_ Elsyed]

إكذب ... إكذب ... إكذب ... ما هو شعب لا مؤخذه مهاود وطيب وبيصدق أي حاجة .. وما بيشتكيش .. وكبيره قوي يجعجع شوية - بينه وبين نفسه او على النت - لكن كله كلام وفعل ما فيش ....

والحكومة تتبع مع هؤلاء الناس الطيبيييييييييييييين المهاوديييييييييييييييين بالقوي مبدأ ... اللي تعرف ديته إقتله ... وإحنا ديتنا إيه ؟ ولا حاجة ..

الرسالة القادمة من بريد الاهرام اليوم

نعلم أبناءنا دائما ان يؤدوا ما عليهم من واجبات قبل ان يطالبوا بما لهم من حقوق‏,‏ وللأسف فان بعض المرافق الحكومية تتعامل مع الجمهور بعكس هذا المبدأ فعلي سبيل المثال رفع مرفق المياه أخيرا سعر المتر المكعب من‏12‏ الي‏23‏ قرشا‏.‏

والحقيقة انني احسد المسئولين عن المرافق علي الجرأة التي يتسمون بها الراجل ده مؤدب زيادة عن اللزوم ... فكان يقصد البجاحة والكذب حتى النخاع إذ لم تكن الزيادة بنسبة‏20%‏ او حتي‏50%‏ حتي يقال انه تم تحريك السعر بل جعلوا الزيادة‏100%‏ وإحقاقا للحق فإنها اقل من هذه النسبة بكسر قدره واحد في المائة‏ ... بصوا بقى من اعمالكم سُلط عليكم .. نفس اللي بيحصل من بياع الفاكهة او الخضار او لا مؤخذه محل الأحذية .. تلاقي كاتب يافطة كبيرة وعليه السعر 49.99 ج .. أو لو خضرواتي تلاقية كاتب كيلو الطماطم بـ 2 جنية وجنب الأتنين دايرة صغنونة لا تُرى بالعين المجردة وهي عبارة عن نص جنية ... كذلك الحكومة بتعمل معانا كده تعملك الزيادة 98 % عشان ما حدش ويقول حرام عليكم يا عالم زودتوا المية 100 % .. نرجع ونقول له بص كويس يا اخي على التسعيرة دي 98 % بس فقط لاغير .. إنت إيه أعمى القلب والنظر .. بطلوا إفترا بقى ...

بلد عايشه لا مؤخذه على النصب .. كله بينصب على كله ... إذا كنت بتتعامل مع حد ولقيته لقمه سائغة يبقى لا تتردد إنك تاكله قبل ما ياكلك ...

س س المقهور

والسؤال الذي يطرح نفسه‏:‏ هل قام المرفق بواجبه نحو تحسين الخدمة التي يقدمها للمستهلك قبل ان يقرر هذه الزيادة الهائلة؟ اننا نعلم جميعا ان مياه الشرب التي يتم بيعها للمواطنين تحتوي علي كمية لابأس بها من الشوائب الصلبة والرخوة التي يمكن فصل جزء منها عن المياه ببعض أنواع المرشحات فهل يملك مرفق المياه عدادات تستطيع خصم حجم هذه الشوائب عند احتساب التكلفة الفعلية علي المستهلك؟ وهل سيدفع المرفق تعويضات للافراد الذين يثبت انهم تعرضوا لمشكلات صحية بسبب ماتحتويه مياه الشرب من مكونات غير صحية؟ وهل سيتم تعويض المستهلك في حالة انقطاع المياه الذي يحدث في بعض المناطق بصورة متكررة أم ان المستهلك لايحق له مطالبة المصالح الحكومية بالتعويض‏,‏ وعليه ان يدفع صاغرا سواء حصل علي الخدمة‏,‏ او حصل علي جزء منها او لم يحصل عليها علي الاطلاق‏!‏

وبعد هذه الزيادة الكبيرة في سعر المياه ماذا سيفعل اعضاء اتحاد الملاك في الساكن الذي لايسدد ايصالات الصيانة المستحقة عليه‏,‏ والتي تشمل استهلاكه للمياه‏,‏ وذلك في غياب قانون اتحاد الشاغرين الذي يطفو علي السطح كلما انهارت احدي العمارات‏,‏ والجزء الاخير من هذا السؤال الطويل والذي لايحمل بين طياته اي نوع من الغمز او اللمز هل لهذه الزيادة علاقة بنقص موارد الدولة من جراء التعريفة الجمركية الجديدة؟‏!‏

كل الناس فاهمه وعارفة اللي بيحصل .... لكن ما هو رد الفعل ... برضوا ولا حاجة .

الدكتور‏.‏ عماد إسماعيل

[فــيــروز]

يا جماعه حاجه بالمنطق كده lo::

كى يتصرف الافراد فيما لا يعجبهم من تصرفات الحكومه ليس امامهم سوى ..

ان يرفعوا قضيه mc:

وكى يرفعوا قضيه مطلوب الواحد يسعى عليها من وهو فى مقتبل الشباب علشان على ما يتحكم فيها يقابل وجه كريم بضمير مرتاح !! mf( يعنى عمر ضايع .. ناهيكم عن التكاليف التى سيتحملها وربما الضغوط المعنويه و الاجتماعيه ممن حوله :P

ولهذا اعتقد ان الحل الامثل ان يكون هناك مجموعه ما على غرار منظمات حقوق الانسان تتولى مثل هذه القضايا طويلة الامد التى لا يستطيع سوى قليلون ان يتحملوا تبعاتها و مسئوليتها .. :D

[mnman]

كتير من الشعب المصري اتخذوا قراربعدم انتمائهم للتصنيف العالمي في الاكل!!

بمعني انهم لا حيواني ولا نباتي!!! اصبحوا شعب مائي!! يعني عايش علي المياة و الحمد لله!!! بس الحكومة الرشيدة استخسرت حتي المياة فيهم!!!

وبدل ما كان السؤال : انتي نباتي ولا حيواني

والاجابة: مائي

اصبح السؤال : انتي نباتي ولا حيواني ولا مائي

والاجابة: مصري

ورمضان كريم!!

منمان صايم وبيخرف!!!

[Tafshan]

علشان المية اللي الناس بتشربها و متكلفة بتترش بيها الجناين و الزرع و تستخدم في الاستحمام ....... في حين امريكا مقسمة المية 3 درجات

حدائق استحمام شرب ومياة نقية تماما ..

عزيزي ، احنا في مصر الميه اللي بنشربها هي الميه اللي بتترمي في البحر بعد ما يطلعوا ال 3 درجات mf(

و للتجربه العمليه : كل المصرين العائدين من الخارج في الاجازه تنتابهم موجه من المغص و الاسهال و الدكتور دائما يقول : بسبب الميه !! mc:

مع الوقت طبعاً المعده يتتعود على معدل التلوث اللي في الميه و ما بنحسش بالمواضيع دي ، لكن دي حقيقه : الميه فيها حيوانات مش جراثيم !! و عادي ، علي قد فلوسكم ..

سؤال : بالنسبه لعددات المياه الجديده : في عدد متري مجاني - زي المكالمات المجانيه كده - و لا لأ ؟؟

عموماً انا كل يوم بأقتنع اني ما ارجعش تاني !!!

[mwefy]

العواف عليكو

انا قاريت كل كلمة كاتابتوها صحيح والله الطرطرنت ديه بيفتح دماغ الواحد علي حاجات كتيرة اوي بقي انتو متضقين ان الحكومة بتاعتنا رفعت الفلوس علي المية يا سلااام طب ما دة شيء طبيعي من بعد ما البيه الجديد نظيف مسيكها لان لميه هيي اللي بتنضف وهي اللي خليتو نظيف فلازم يرفع سعر المية عشان صوابعك مش زي بعضيها انتو عايزيت تربطو حماركو جمب حمار العمدة ولا اية وبعدين كفاية افترا بقي عل يالناس زيكو زي الواد ابن ابو سليم داير عمال يلسن بالكلام دة في البلد ياا نااس المية الي انتو بتقولو فيها شوائب صلبه و حشرات قي المدن مافيش طب بازمة دة مش احن من عندنا في البلد احنا بنشرب علي طول من الترعة وانت بتشرب كدة تلاقي جته الحمار الميت عايمة جنب خشمك وانا حكيت لكل البهوات اللي جم من اول البيه عاطف احد ابو النظافة والشياكة البيه نظيف ان في ناس كتير بتتلوي من كليتها فرد عليا وقالي ان ربنا خلقلنا كليتين عشان لما يكون عندنا ظروف اقتصاديه زي اللي عندنا في بلدنا ممكن واحده تبوظ قولتلو دي مش بايظة بس دي خلاص بقت عاملة زي المصفة ااام قالي خليهوم يشغلو التاني لحد ما مجلس الشعب يحدد مدي صلاحية الميه للاتخدام الادمي وكمان حاكيتلو ان الحمار الحصاوي بتاعي مش بيرضة يشرب من المية اللي من الحنفية وبينهق كاينو شاف شيطان واول ما يشم ريحة المية اللي من الطنبة يزقطط ويقعد يرفص بس الغريب في الموضوع ان الحمار مش بيرضه يشرب من الميه وبيقعد يرفس ويزعق لحد ما المية الي بيحبها تيجيلو مش عارف احنا مش بنعمل كدة لية يبقي مين الحماااااااارر فينا

ويجعله عااااامر