برافو أسماء محفوظ ... عملتي اللي ما عملهوش رجالة كتير يا بنتي

[se_ Elsyed]

والله العظيم أنا مكسوف من نفسي .. لأني راجل طويل عريض .. مش عريض قوي لكن أهو راجل والسلام ... كل اللي عملته إني صورت بكاميرتي المخالفات والمهازل اللي شوفتها في أجازتي .. وأتكسفت أنشرها هنا لأني حسيت إني كنت هابقى زي اللي بينشر غسيلة القذر أمام الناس .. وإن هذا سيُسيئة هو أولاً

حوار مع لواء مخابرات سابق ... رئيس حي عين شمس حاليا

.by Asmaa Mahfouz on Saturday, September 3, 2011 at 6:56pm.انهاردة رحت لرئيس حي عين شمس اللواء السابق بالمخابرات محمد الجندي

في الاول بسال عليه قالولي ان انهاردة اجازة وخير عايزاه في ايه صممت اني اقابله من غير ما اقولهم ليه

جالي المساعد بتاعه بيقولي مين حضرتك قلتله انا اسمي اسماء محفوظ مواطنة بحي عين شمس ومن حقي اقابل رئيس الحي

فراح متكلم في اللاسلكي وقال لواحد اسماء محفوظ اللي اسمها في الجرايد دي وعاملة مشاكل عايزة تقابل الريس

فقالي هو معاه ناس قلتله هستناه

فقالي طيب البطاقة لو سمحتي قلتله اتفضل وسابني 5 دقايق ونده على الامن قاله خليها تتفضل ودخلت وملقتش ناس خالص في المكتب

لقيت رئيس الحي بيقولي خير؟

كلمته عن ان حي عين شمس مليان مشاكل ومفيش اي حاجة بتتحل واولهم الزبالة

قالي الكلام المعتاد ان مفيش ميزانية والشركة مبتنزلش والزبالة كتيير عليهم وان دي مشكلة دولة مش مشكلة حي

قلتله ليه هي الميزانية قد ايه؟ قالي مين حضرتك؟

قلتله انا اسماء محفوظ مواطنة بالحي .... قالي طيب يبقى تقولي مشكلتك ايه وملكيش دعوة بحاجات متخصكيش!!!!

قلتله لا من حقي طالما حضرتك بتقول ان مفيش ميزانية من حقي اعرف هي الميزانية دي قد ايه عشان انتو بتاخدو مننا فلوس لازم اعرف بتروح فين؟؟

قالي انتي بتشتغلي ايه قلتله انا ناشطة سياسية ومعدة في شركة انتاج افلام وثائقية ... قالي يعني ايه ناشطة سياسية؟؟؟

مش فاهم يعني ايه الكلام الجديد ده؟

قلتله ناشطة سياسية يعني واحدة بتهتم ببلدها ومش بهتم بامري بس بهتم بامر ناس كتيير حواليا وكلمة ناشطة سياسية مش جديدة دي قديمة جدااا

قالي انتي سنك قد ايه انتي لسة صغيرة متفهميش حاجة

قلتله الصغيرة اللي مش فاهمة حاجة دي عملت ثورة من ضمن شباب كتيييييييييييير جدااا في نفس سني واقل كمان

قالي ثورة؟؟؟؟؟؟؟ ثورة ايه؟ هو انتي فاكرة انك عملتي ثورة؟

قلتله الثورة اللي عملها الشعب ومات فيها كتيير

قالي ااااااااااااه بصي يا بنتي الثورة دي بيتخططلها وبيتحضرلها من زمان اوووي من ناس اكبر منك وفهموكو انكو عملتو الثورة

الشعب اللي نزل ده اصلا مش فاهم يعني ايه ثورة ومش فاهم هو نزل ليه

لكن في ناس بقالها فترة بتخطط وشالت مبارك سيبوهم بقى يشوفو شغلهم

قلتله اااه ده اللي هو المجلس؟؟؟ ابتسم وقالي انتي ليه بتتكلمي في حاجات ملكيش فيها؟

قلتله لا ليا فيها وانا بسال عن حق الشعب الغلبان ده وبتكلم عن حق حي عين شمس

قالي بصفتك ايه؟؟؟؟ انتي ملكيش انك تسالي عن ميزانيات او الفلوس دي بتروح فين انا اصلا معرفش الفلوس دي بتروح فين؟

قلتله بصفتي واحدة من الشعب وممكن اجيبلك الاهالي دلوقتي كلهم هنا وساعتها يبقى من حقنا ان حضرتك تقولنا فلوسنا بتروح فين

قاالي شكوتك ايه؟ في اي منطقة؟ قلتله في حي عين شمس كله

قالي روحي اتكلمي مع الشركة دي مش مسئوليتي

قلتله لا مسئوليتك ومسئوليت انك تتكلم مع الشركة وتشوف بنود العقد ايه وتحاسبهم على تقاعسهم

قالي هما مش شركة واحدة دول كذا شركة ودي مسئولية النظام القديم اللي اتعاقد معاهم انا مليش دعوة

قلتله خلاص الغي العقد قالي لو هنلغي العقد ندفع مليار جنيه شرط جزائي قلتله وطالما في شرط جزائي مفيش عليهم هما شرط جزائي عشان يلمو الزبالة؟

قالي روحي بقى لهيئة النظافة وقوليلهم الكلام ده

قلتله وحضرتك دورك ايه؟ قالي مش من اختصاصي

قلتله طيب ياريت تديني ورقة باختصاصات حضرتك عشان ابقى عارفة

قالي بصفتك ايه؟

قلتله من حق المواطنين انهم يطلعو على الاوراق دي .. دي مش اسرار دولة

وطول ما تكتمو في الميزانيات والادوار يبقى انتو كده بتتلاعبو في كل حاجة ومحدش يقدر يتكلم عشان ميعرفش

وفضلنا كده في حواااار طوووووويل عقيم بنفس الاسلوب وعمال يطلعني من موضوع يدخلني في موضوع تاني

وكل شوية يسالني انتي قولتيلي اسمك ايه؟ انتي عندك كام سنة

ولما اكلمه عن الدبش ومخلفات العمارات اللي بتترمي في الطريق

قالي مقدرش اعمل ده عشان الداخلية مش بتتعاون معانا ولما كلمنا المأمور قالنا معندناش تعليمات انزل معاكم

قلتله والادوار والمباني اللي بتتبني مخالفة؟؟

قالي كل ده لازم قوة وانا معنديش قوة ... قلتله كلمت الداخلية؟ قالي لا واكلمهم ليه؟ المحافظ يكلمهم

قلتله طيب ثانية واحدة

كلمت قدامه مقدم من مكتب وزير الداخلية وقلتله على اللي حصل قالي مين قال كده؟؟

ازاي معاه امر ازالة والقسم مش منزل معاه قوة؟ وهو ازاي ميكلمناش؟؟؟

طيب انا هكلم المأمور واخليه يكلمه

اللواء سكت كده قالي طيب وريني بقى هيعمل ايه

وقالي اخري معاكي عندك مشكلة معينة كلميني واشيلك الزبالة من الشارع اللي مضايقك اكتر من كده مش دوري

بكرة ان شاء الله هروح هيئة النظافة والمحافظة واطلب الميزانية اللي بتنزل للحي واشوف عقد الشركة ونشوف نقدر نعمل ايه

عشان مينفعش نبقى بندفع فلوس للحكومة ومنعرفش بتتصرف في ايه

مينفعش نبقى بعد الثورة نسمح لحد يسرقنا عيني عينك كده

الرباط الخاص بي

[se_ Elsyed]

عديت على حي عين شمس بالتحديد ييجي 100 مرة وكتبت لكم الشهر الماضي وفوجئت إن مبنى الحي مردوم ومختفي وراء جبال من الرتش أو اللي بيسموه الدبش والحجارة والتراب اللي ناتج عن هدم البيوت القديمة وبناء أبراج عملاقة مكانها في خلال ايام بسيطة وهي التي أعقبت ثورة 25 يناير مستغلين في ذلك إن ما فيش لا شرطة ولا حي ولا ميت حتى ... وفجأة المليارات خرجت وهاتك يا بُنا .. وبالمناسبة معظمها فلوس حرام .. يعني غسيل أموال وأعرف ناس بعينهم عملوا كده وخرجوا فلوس تجارة الأثار والمخدرات عشان ييغسلوها في أعمال زي دي .. والدليل إن عماير كتير جداً .. جداً .. ما باعوش فيها البدروم حتى لكن مش هاتخسر أهي متلقحه لا بتاكل ولا بتشرب ...

وطبعاً ما فيش مرافق أتوصلت لها ... وأكيد لا ترخيص ولا رسومات ولا يحزنون ... يعني حطوا الدنيا كلها أمام الأمر الواقع وخلي الدولة تجري وراهم بعد كده وتهد الاف الأبراج دي ....

أقسم بالله العظيم شوفت ناس بانية في وسط الشارع

أيوه ... زي ما بأقول لكم .. حس إن الشارع أعرض من اللازم فراح باني فيه .... المفاجأة إن ده ملاصق للحي نفسه هههههههه .. وكويس إن في ناس ما بنتش فوق مبنى الحي وباعوه تمليك ..

وقولت لكم إني شوفت شارع عرضة متر بالظبط .. أو متر ونصف ... والله شوفته بعيني ... وشارع سد كمان .. يعني مالوش منفذ .. وكان فيه بيوت قديمة جداً دور أو إتنين .. فجأة البيوت دي إتهدت بعد ما راضوا أصحابها بقرشين وهوووووووووووو طلع فيه عماير 13 دور .... صورته برضوا

ولما سألت هو مبنى الميت .. قصدي الحي راح فين ؟

قالوا لي إنهم جريوا وسابوه أثناء الأنفلات الأمني .. وإن الأوباش او الرعاع اللي يستاهلوا الإعدام سرقوا كل حاجه فيه حتى الشبابيك الخشب وبقى خراب

ومبني الحي إتنقل لمبنى تاني على بُعد 20 متر ...

فقولت هايبقى حاله أفضل ومبنى نظيف بقى وكده ..

فوجئت برضوا إن أمامه جبال من الزبالة والرتش . والناس كمان بتولع في الزبالة دي بالليل بالذات .. فالصورة بتتناغم وبتكتمل

كل ده والسيد اللواء رئيس الحي موجود بالداخل ولا الله أعلم بييجي مكتبه ولا لأ

وكل ده بالمناسبة هو إستمرار لسياسة " عسكر فوق وعسكر تحت "

أرشق وأردم الدنيا عساكر يا عم لضمان السيطرة على البلد بقبضة من حديد - أصل زميلنا عبد المطلب مش عاجبه الكلام وبيقول لي : مش يمكن أكفاء وناس عندها رؤية ؟ - أه فعلاً .. بدليل الرؤية اللي إحنا فيها من سنة 52

ممكن ناس تكذب البنت وتقول دي عاوزه تعمل شو وتعمل لنفسها منظر

طب أتحدى إن ما كنا كلنا شوفنا ده بعنينا كل يوم وفي كل حته وكله سكت ... وقال مافيش فايدة .. أو بكره ييجي رئيس يعمل كل حاجه

وهانرجع لنفس نغمة " هاتوا لي حبيبي " وأنا قاعد مستني

الموضوع أيها السادة محتاج إيجابية وثورة أخرى

الموضوع محتاج عدم السكوت والرضوخ للذل والبلطجة ...

أقصد هنا بلطجة الدولة

أيوه .. النظام البلطجي لم يسقط .. طالما لسه بيحصلوا جبايه شهرية مننا مقابل النظافة .. ومع ذلك الدنيا من أقذر ما يكون .... ومع ذلك القذارة زحفت لحد ما وصلت لعتبة بيتنا

ومع ذلك العشوائيات اللي كلنا إتبرعنا للقضاء عليها لسه بتنمو وتزداد يوم بعد يوم والكل عمال يبني ويعلي بدون ضوابط وبكره تطربق على دماغ ضحايا ابرياء ممكن نكون إحنا منهم

أهي بنت أهي في العشرينات راحت وواجهت إنسان كل مؤهلاته إنه ظالم وديكتاتور غاشم عينه ديكتاتور أظلم منه .. ويتمنع بالعنجهية والكِبر ولم يأخذ عبرة من الموجودين في السجون وبيتحكاموا دلوقت

لازم كلنا نشترك في حملة " إرمي زبالتك قدام الحي " بل أرميها في وش رئيس الحي اللي زي ده بداية من يوم 14/9

لازم كلنا نصرخ ونعمل ثورة تانية على الفوضى والعشوائية ... وأظن إنها مش هاتبقى زي ثورة يناير اللي راح فيها ضحايا وفدونا بدمهم

مرة أخرى ... أنا مكسوف من نفسي .. ولا أملك إلا إني اقول لك ربنا يحميكي يا أسماء حتى لو أختلفنا معكي في بعض أراءك

لأن أختلافنا معكي بيكون من باب التنظير .. والجلوس في الغرف المكيفة وأمام القهوة والشاي ونحن ننتقد ونعبر عن أراء في الفضاء ..

وناش أخرى مشغولة بتقطيع التورتة والإجهاز على كراسي البرلمان

وأخرون مصدعيننا ليل نهار عن إنتخابات الرئاسة وأنا هاعمل واسوي

والأكثرية ماسكين ورقة وقلم عشان يكتبوا قدام كل إسم واحد هو علماني ولا إسلامي ولا كائن فضائي ...

[hOuSsAm]

بصراحة بنت بمليون راجل

ربنا يحميها ويوفقها

انا زيك بالظبط مكسوف من نفسى اوى

[pink rose]

يا بخت من كان اسمه بيطلع في الجرايد و التليفزيون

في حين ان في ناس تانية بتعمل نفس الشئ من سكااااااااااااات

مش اسماء محفوظ بس يا استاذ احمد اللي بتعمل كده

مجموعة من شباب اسكندرية شغالين في مشروعات بالاتفاق مع المحافظ الجديد دكتور الفولي

منهم حوار الزبالة

كمان في مشروع لمراقبة الافران و توصيل العيش للبيوت عشان ما يكونش في تكدس خصوصا ايام المدارس

مهتمين بالتشجير كمان

اسماء محفوظ راحت غتت على الباشا رئيس الحي و معاها حق في كلامها بس و بعدين ايه اتغير و لا حاجه

الشباب اللي باقولك عليهم شغالين اجتماعات مع المسؤولين و الحمدلله في شغل بيحصل

امبارح مثلا تم ازالة الباعة الجائلين في شارع المعهد الديني في العصافرة و الدور جي على المنشية و محطة مصر

الحمدلله شباب كتير محترم و بدأ يظهر ايجابيته بشكل عملي

[mustafagamiel]

قالي ثورة؟؟؟؟؟؟؟ ثورة ايه؟ هو انتي فاكرة انك عملتي ثورة؟

قلتله الثورة اللي عملها الشعب ومات فيها كتيير

قالي ااااااااااااه بصي يا بنتي الثورة دي بيتخططلها وبيتحضرلها من زمان اوووي من ناس اكبر منك وفهموكو انكو عملتو الثورة

الشعب اللي نزل ده اصلا مش فاهم يعني ايه ثورة ومش فاهم هو نزل ليه

لكن في ناس بقالها فترة بتخطط وشالت مبارك سيبوهم بقى يشوفو شغلهم

من وجهة نظري هذا ابشع مافي الموضوع

للاسف هؤلاء الكلاب مش عارف ازاي لسه موجودين

وانا متأكد ان هذا الكلام هو مايقتنع به المجلس العسكري وشغال الله ينور في تفريغ هذه الثورة من محتواها

ياخسارة الثورة ولعنة الله على من ضيعها

[ابراهيم عبد العزيز]

هذه هي اسماء محفوظ التي أرادو محاكمتها

فلها كل التحية

واما بالنسبة لهذه الواقعة فإنه يجب على الجميع أن يعلم :

لن ينصلح الحال طالما نفس هذه العقول مازالت قابعة فى اماكنها

هذه العقول هى السبب فيما وصلت مصر اليه

فمن الساذج الذي يعتقد أن الخير سياتي منهم ؟؟

ألا يعلم من يعتقد هذا الإعتقاد انه من شب على شيئا شاب عليه ؟؟

تم تعديل 5 سبتمبر 2011 بواسطة ابراهيم عبد العزيز

[مصري أصيل]

محافظ القاهره يلغي عقود شركات النظافه

الخبر غير موجود على النت و لكن تم ذكره في برنامج هاله سرحان ناس بوك

[م تيمور المراغي]

محافظ القاهره يلغي عقود شركات النظافه

الخبر غير موجود على النت و لكن تم ذكره في برنامج هاله سرحان ناس بوك

والله جدعه يا اسماء

لما بتحطي دماغك في حاجه :happy:

[pink rose]

محافظ القاهره يلغي عقود شركات النظافه

الخبر غير موجود على النت و لكن تم ذكره في برنامج هاله سرحان ناس بوك

والله جدعه يا اسماء

لما بتحطي دماغك في حاجه :happy:

اهي دي اجمد نكتة قريتها

بقالي كتير ما ضحكتش كده

ميرسي كتير يا باشمهندس و الله بقالي فترة مخنوقة و تعليق حضرتك دا خرجني من مود وحش اوي

[moamana]

معلش يا بينك روز لى تعليق هو دلوقتى الشباب يا عينى اللى شغالين مع محافظ الاسكندرية دول بياخدوا فلوس و لا متطوعين و لما هم بيعملوا كده امال البهوات بتوع الحى بيعملوا ايه و بياخدوا فلوسنا يودوها فين

اسماء محفوظ راحت لرئيس الحى لان هو المسئول و مرحتش للجان الشعبية لانها مش مسئوله تسيب بيتها و شغلها و مستقبلها و تقف تعمل شغل البلدية و الحى و النظافة

البنت ديه اسمها ظهر فى الجرايد بعد ما دعت ل25 يناير و للثورة و قالت انا هنزل قبل الثورة ما قوم و اسمها ظهر فى الجرايد لما اتقبض عليها و اترمت فى السجن عشان قالت رايها بصراحة فى تصرفات المجلس العسكرى اللى افتكر ان البلد بتاعته و بدا يطبق نفس نظام الديكتاتورى

\

اعتقد ان اسمها منزلش فى الجرايد فى صفحة الفن و لا الادب و لا الاراء الاجتماعية لا ده ظهر فى الحوادث بعد ما ضحت كتير عشان تشوف مصر احسن