اللي مالوش كبير

[Dreamwithme]

السلام عليكم ورحمة الله وبركاته

هل فعلا المصري مقتنع إن اللي مالوش كبير لازم يشتريله كبير؟

طب مين ينفع يكون كبيرك يامصري؟ وياتري لما كبيرك يتكبر عليك هتسكت تاني؟!

نصيحة مخلصة كبير مصر هو اللي يكبرها

شوفوا الفيديو ده فكرته جميلة وبسيط

http://t.co/08vENC6

[elzahraa]

كبير مصر هو اللي يكبرها مش اللي يكبرلها

مميز شكرا لك

[ابراهيم عبد العزيز]

فيديو جميل جدا يا أخت دريم

(الكبير هو اللي يكبرنا مش اللي يكبر علينا)

[Dreamwithme]

شكرا أستاذ ابراهيم وأستاذة الزهراء علي مروركم الكريم

http://www.youtube.com/watch?v=ERWVZDhVI_Q&feature=share

[لماضة مصرية جدا]

السلام عليكم و رحمة الله و بركاته

انا لسه مشوفتش الكليب بس لفت نظري العبارة اللي انتي سالتيها

السلام عليكم ورحمة الله وبركاته

هل فعلا المصري مقتنع إن اللي مالوش كبير لازم يشتريله كبير؟

يا دريمي يا غالية

المصري....(اللي اعرفهم علشان محدش يحدفني بحاجة و يقولي انك بتعممي) مش بس مقتنع ده متسستم و متبرمج و مصبوب في قالب كدهوت اسمه الكبير

من اول الجملة الخالدة....اسمه كلام اخوك الكبير....(مع انه يعني ممكن يبقي اكبر منك بسنة و لا اتنين مش هما دولم اللي هيعملوا القفزة في الفكرة و الخبرة

و مرورا الكبير فاهم عنك يا عيل يا صغير....يا ابن امبارح...(و مبفهمشي يعني ايه ابن امبارح الحقيقة) طب ما هو الكبير واخد "الترقية" بتاعته فوقينا علشان هو كان ابن ابن ابن امبارح يعني

و نهاية لما يتقدملك حد و يكون مثلا ابوه و امه متوفيين (شاب ظروفه كدهوت نعمل ايه بقي) يوقلك لازمن و حتمن و لابد نحط ايدينا في ايدين اي "كبير" في العيلة و نقول كيلو بامية...(وش و انا متغاظة اخر سبع حاجات)

ايه نوع الحماية او الوصاية اللي بتمنحها ثقافة "الكبير"

ايه نوع الاختلاف في الخبرات اللي بتخول "الكبير" انه ينفرد بزاوية الرؤية و يبني قرار

الكبير مفهوم بيتغرس جوانا كدهوت مع كل جرعة تطعيم....حاجة كده لا هروب منها

و لا حاولت تهرب منها يبقي هيجيلك السعال التمردي

فكرة الكبير في حد ذاتها بشكلها كدهوت مش موافقة عليها و بخش في صدامات كتير بسببها

الرسول صلي الله عليه و سلم قال

"ليس منا من لم يرحم صغيرنا و يوقر كبيرنا"

الكبير مطلوب له الوقار....الاحترام....التقدير

و ليست الطاعة او الاذعان او تفويض الامر بالكامل حتي تحت اي مسمي و ان كان الحب في حد ذاته

الكبير ليس صنما يعبد....و يطاع و يأمر و ينهي

ربنا تفرد بالاسم ده لوحده في ذاته و صفاته...و مش من حق اي بشر انه يتوهم انه "كبير"

الوقت الحقيقي اللي انا بستخدم فيه صفة كبير لما بقول

احنا عندنا حلم كبير

الحلم ينفع يكون كبير علشان نمنحه اجنحة فوق حدود معطيات الواقع اللي بتخنقنا

الوطن ينفع يكون كبير علشان يضم كل اختلافاتنا بحنو

افكارنا تنفع تكون كبيرة و فوق حدود المتوقع

لكن الاشخاص

اسفة جدا

مافيش كبير

فيه احترام لفارق السن

فيه تقدير لاختلاف وجهات النظر

فيه استماع و انصات لخبرة سنين و ايام سبقونا فيها

لكن ما فيش عبودية لشخص.....حتي و لو من دافع الحب الشديد

مافيش اذعان لشخص....لان احنا مش ملايكة...كلنا بنخطيء و الخطاء مش بيقف عند سن معينة و ينهمر في سن مبكرة مثلا

الحلم ينفع يكون كبير

و اللي يبني الحلم ده

ممكن يبقي كل واحد فينا...بغض النظر هي بطاقته بتقول عنه...كبير و لا صغير

دي وجهة نظري

اروح اتفرج بي علي الكليب

تحياتي