عاوز تعرف الثورة أتسرقت ولا لأ ؟ إدخل وجاوب على الأسئلة التالية بمنتهى التجرد

[se_ Elsyed]

وأرجو أن نتجرد جميعاً من إنتماءتنا ونتذكر مصر . ومصر فقط ونجيب على تلك الأسئلة عشان نعرف إحنا عاوزين إيه .. وليه لازم كلنا ننزل يوم الجمعة - أتمنى لو كنت أقدر أنزل تاني زي ما نزلت يوم 8/7 .. لكن للأسف عندي إمتحانات قريباً ومش هاقدر ...

جاوبوا معايا على الأسئلة والتساؤلات دي اللي وضعها شباب جروب كلنا خالد سعيد عشان تعرفوا إحنا وصلنا لإيه .. وعشان تعرفوا مين اللي بيخون شعب مصر كله دلوقت وأعلن إنه لن يشارك في مثل هذه المليونيات وعينه بس على الكرسي المتنجد بتاع البرلمان ...

وإبقوا قابلوني إن فرق عن برطمانات الحزب الوطني .. لإن برلمان حُر في ظل حكم ديكتاتوري مازال يتحلى برموز النظام الفاسد = أراجوزات وديكورات

والان مع الأسئلة .. وماحدش يستعين بصديق

نرجو الإجابة عن جميع الأسئلة التالية إلى الشعب المصرى فى أسرع وقت»،

المجموعة الاولى موجهة إلى المجلس العسكري .. وابقوا قابلوني لو لقيتوا إجابة

«أكمل الفراغات التالية»

1- «ميعاد فتح باب الترشح لانتخابات مجلس الشعب هو......،

2- ميعاد إجراء انتخابات مجلس الشعب هو.....،

3- ميعاد فتح باب الترشح لانتخابات الرئاسة هو......،

4- ميعاد إجراء انتخابات الرئاسة هو......،

5- ميعاد تشكيل لجنة صياغة الدستور الجديد هو.......،

6- ميعاد الاستفتاء على الدستور الجديد هو.....».

المجموعة الثانية :

للشعب المصري الغلبان اللي ساب الثورة في وسط الشارع لوحدها وروح بيته يستريح وياخد شاور فكان شوية عساكر ماشيين في الشارع فلقوها واقفة لوحدها راحوا واخدينها

«علل»

1- «انفراد المجلس الأعلى بوضع جميع القوانين والتشريعات دون استشارة القوى السياسية

2- استمرار محاكمة المدنيين عسكرياً رغم عودة الشرطة والقضاء والنيابة بكامل قوتها

3- عدم وضوح الرؤية فيما يتعلق بإدارة المرحلة وغياب جدول زمنى لتسليم السلطة

4- وجود بعض المسؤولين الموالين للنظام السابق من كارهى الثورة فى مناصبهم إلى الآن

5- عدم تفعيل قانون الغدر لمنع من سبق تزويرهم الانتخابات من المشاركة فيها

6- بطء التجاوب مع مطالب استقلال القضاء وعدم معرفة موقف المجلس منها

7- عدم حدوث أى إصلاحات جذرية بوزارة الداخلية

[abobakr]

الثورة مسروقة من زمان يا اخي العزيز

كنا لسه بنتكلم امبارح وواحد صاحبي بيقولي كان فيه ضرب نار ورشاشات الي في منطقة جنبهم وبيقولي خلاص الشرطة مش عارفة تسيطر زي الاول والبلد بتولع والكل بقى في السايب

كان جوابي الشرطة اللي مش عاوزة عشان احنا اللي نطلب منهم رجوع امن الدولة زي الاول

عشان يلغوا الحريات لازم يحسسك بالخوف عشان انت اللي تطلب بالغاء الحريات

[Alattar]

أولا حمد الله علي سلامتك يا ريس..كنت لسه والله هتصل بيك أشوفك مختفي فين

للأسف يا عم أحمد مفيش إجابات..المجلس العسكري فعلا أثبت انه متواطئ..وخائن لثقة الشعب اللي فرح وهلل له في بداية الأمر

و اطمئن..لو ان فيه حد كان بيؤيد المجلس العسكري قبل كده..مش هيؤيده بعد كده..لأن لعبتهم و أساليبهم انكشفت خلاص..و أكتر حاجة خايف منها اليومين دول هو حدوث انشقاقات من داخل الجيش..لأني متأكد ان فيه ناس كتير في الجيش مش عاجبها اللي بيحصل ده..و خوفي من الانشقاقات بسبب حدوث فوضي و الدخول في أحداث لا يعلم مداها الا الله..

و أرجو من الجميع اننا نبص علي اللي بيحصل اليومين دول بنظرة محايدة..و ما حدش يمدح أو يدافع عن المجلس العسكري نكاية في تيارات مخالف ليا بيهاجم المجلس العسكري..لأن الضرر للأسف واقع علي الجميع..و المجلس مش هينفع حد..لأن الفترة اللي فاتت علمتنا ان اللي يقف أمام ارادة الشعب..يبقي بإذن الله هزيمته حتمية و أكيدة..و ان طال الوقت..

[abobakr]

كان ليا سؤال

في موضوع ل سي السيد قبل كده

كان بيوضح معاناة اهالي الشهداء انهم ياخدوا تصاريح للدخول للمحاكمة رغم احقيتهم ومعاناة المحاميين انهم ياخدوا تصاريح رغم ان معاهم توكيلات من الاهالي

لفت نظري امبارح ان كان في مؤيدين داخل قاعة المحكمة ياترى جابوا تصاريح ودخلوا بأي صفة؟؟

انا اعرف ان اطراف القضية والمحامين هما بس اللي يدخلوا :closedeyes:

[wahed_masry]

السلام عليكم أظن والله أعلم أن هناك لعبة كبيرة جداً أنظروا يشكل مختلف علل -عدم رغبة مبارك "المعلنة" فى الهرب -عدم سماح الجيش بتهريبه (لا إلى السعودية أو غيرها) -حجب اليث التيليفزيونى للمحاكمة - وأشياء أخرى كثيرة تحتاج لتفسير و فى النهاية ماذا نفعل؟؟ تحياتي

تم تعديل 6 سبتمبر 2011 بواسطة wahed_masry

[se_ Elsyed]

إوعوا تفتكروا إني متشائم .. أو هاسلم إن الثورة إتسرقت ..

أبداً ..

لأني واثق من نصر الله

لأن ربنا قال ( يا أيها الذين آمنوا إن تنصروا الله ينصركم ويثبت أقدامكم )

وكمان

( إن الله لا يغير ما بقومٍ ، حتي يغيروا ما بأنفسهم )

وعشان كل الشعب المصري مسلم ومسيحي أتبع الأيتين دول ووثق في نصر ربنا الاله الواحد الأحد .. وغيرنا ملابس الذل والنوم والخضوع .... ولبسنا الملابس المصرية الأصيلة الموحدة ... اللي عاوزه بكره أحلى .... جاء نصر الله ووعده في الحال وفي 18 يوم

لكن لما أتفرقنا ورجعنا للطبيعة البشرية الطماعة .. والكل بقى يدور على السبوبة اللي ممكن يطلع منها من الثورة .. كرسي برلمان .. منصب رئاسي ... أغلبية وسطوة وصوت عالي في الشارع ... إلخ

رجعنا أنتكسنا تاني ... ورجعت ريمه لعادتها القديمة .. وبقينا كلنا نشوف الفساد دلوقت رجع يهاجم زي مرض السرطان وأكثر ضراوةً .. بقينا نقول يا عم وأنا مالي .

وبقينا نشوف الناس بتحط إيدها في جيبونا عشان تسرقنا ... بس المرة دي بتسرق حلمنا وثورتنا ومستقبلنا ... ونقول ... أصبر يا عم بكره تحلو لما مجلس الشعب ييجي .( إبقى قابلني )

ولما بقينا نخون بعضنا البعض ... بل ونكفر بعضنا البعض .. بل ويدعي بعضنا على بعض في المساجد وعلى المنابر وعلى الفضائيات .....

كل ده كانت نتيجتة إن ناس كتير كفرت بالثورة

وناس كتير بدل ما تلعن الفُرقة والتشرذم والخلافات الهايفة .... بقت تلعن الثورة وتلزق فيها كل الخطايا بتاعتنا الي بنرتكبها ... على اساس يعني إننا زي الفل وإننا عملنا اللي علينا وإن الثورة المفروض كانت تكمل نفسها .. على اساس إنها غسالة بالكهربا بنحط لها المسحوق ونشغل الكهربا تغسل وتشطف وتنشر الغسيل وتكويه بعد ما ينشف ...

وفوق كل ذك ... سلمنا دقوننا لناس إحنا عارفين إن مكانهم مش كرسي الحكم ..

وإنهم لا يؤمنون بالديمقراطية ... بل كل تربيتهم بيبقى على إطاعة الأوامر العُليا وقول " تمام يا فندم " ولو إتكلمت يقوم حاطط صابعه في عينك على طول ....

وسلمنا دقننا لواحد متسهوك طلع يعيط في الميدان ويقول حاسبوني لو ما حققتش أهداف الثورة وأخد فرصته وزيادة وطلع اضعف من خالتي أم مجدي اللي بتبيع جرجير على ناصية الشارع .. وما قدرش في 5 شهور بالتمام والكمال إنه يحقق أهداف نفسه حتى ...

ولما بعد 100 يوم خرج الناس يوم 8/7 يدوروا على ثورتهم بجنون ... ثبتونا تاني بوعود بتغيير وزاري ثوري وحاجه ما حصلتش وخبراء مالهمش حل .. والمفاجأة كانت على لسان عصام شرف لما قال اوعدكم كمان بحركة محافظين ما حصلتش .. إبسط يا عم ...وقول عاشت الثورة ... وطلعت فعلاًً ما حصلتش ولا في عز ايام الفرعون مبارك .. وترسخت أقدام العسكر بتعيين 18 لواء شرطة وجيش كمحافظين .... ورجعنا لورا سنين طويلة ... والبلد تسير من سيء إلى اسوء ... وأتحدى حد يشاور على اي محافظة ويقول لي : إنت كذاب أن حسيت فعلاً بتغيير ثوري مع سيادة المحافظ اللواء الوزير فلان الفلاني

إلى أن وصلنا .. هاتكلم في نقطة واحده فقط إقتصادية مأساوية .. إلى أن وصلنا إلى تصريحات من السادة الخبراء الماليين في وزارة المالية الأسبوع الماضي بيقولوا : هانضطر نستلف 87 مليار جنية من المدخرات العائلية في البنوك .. يعني الوادائع والقرشين اللي حيلة الناس بحححححححححححح

يا نهار إسود !!!!!!!!!!!!!!!!!!!!!!!

وأتحدى إن كان حد خلال 7 شهور منذ سقوط الصنم . سمع من حد خطة تنمية قصيرة أو متوسطة أو طويلة الأجل أو بأي طول حتى

أتحدى إن كان في مؤتمر إقتصادي إتعمل عشان يعشم الناس ببكره أجمل أو يقول هانزود الموارد إزاي

أتحدى إنك تعمل إستطلاع وتشوف أراء الناس في أحوالهم بعد الثورة وإن كان حس بـ 1 % تغيير

أنا مش بأطلب 100 % تغيير

أنا عاوز أشوف ولو شارع حتى نضف بعد الثورة ..عن منطقة عشوائية تمت معالجتها .. عن وزارة حصل فيها تغيير للأفضل

تخيلوا قمة المسخرة إن يبقى عندنا جدار عازل زي بتاع إسرائيل .. بس ده على كوبري الجامعة لحماية السفارة الإسرائيلية ... هههههههههههه والقوات المسلحة هي الي تبنيه

تخيلوا إن أعضاء المجلس العسكري .. عبد الرحمن شاهين .. وعنان .. والرويني .. وابو أصبع الفنجري ... وعتمان ... و و و و و كانوا قارفين اللي جابونا ليل نهاء تصريحات وبيانات عسكرية وصوابع بتندب في عنينا وكلام حلو عن الكرامة العسكرية .. وعن جيش مصر الحلو اللي بيحمي الثورة وبيعيد كرامة البلد .. بلاب بلاب بلاب بلاب

ماحدش فيهم طلع ولو حتى في تسجيل وهو قاعد على قهوة بلدي قال حاجه عن قتل جنودنا على الحدود ...

طب منظر .. أعمل أي حاجه .. قول بؤين حمضانين وإنكم متضايقين وكدهوت وثبت البشر . يا عم أنا موافق إنك تضحك علينا ..

حتى دي ما عملوهاش !!!!!!!!!!!!!

وكانت النتيجة أيها السادة .. إن الشرطة عشان يرجعوا رجالة من تاني .. بعد ما لبسوا طُرح سودا من بتاعت الحريم - مع إحترامي للحريم طبعاً فهما عنينا وأرواحنا وقلوبنا ( كلمتين حب حلوين أهم عشان ما حدش يزعل ) ... لما حبوا يعملوا رجالة .. عملوا رجالة على أهالي الشهداء في محاكمات مبارك وسحلوهم ..... و شوفت بعيني منظر زي بتاع العباسية ... بلطجية إحنا اسفين يا بابا مبارك مرميين في حضنهم وبيحدفوا الناس بالطوب وهما واقفين في صف الشرطة ... وطبعاً كانوا مميزين لأنهم لابسين تي شيرتات عليها شعارات التأييد لمبارك

تصدقوا بالله أنا حاسس بإيه ؟

حاسس إن بكره أو بعده هايتقال لأهل كل واحد فقد إبنهأو عزيز عنده في الثورة ... أو أصيب حد عنده بعاهة مستديمة ... حاسس إن هايتقال له : إنت مش خدت قرين تعويض .... عاوز إيه تاني ؟

أصلها أتقالت لأهالي شهداء العبارة اللي غرقت ايام المجحوم مبارك ...

وكانت النتيجة هي إن المجلس بقى يعمل أي حاجه هو عاوزها منفرداً وطظ في الشعب كله ... وكان أخرها قانون الإنتخابات وتقسيم الدوائر الخزعبلي اللي ماحدش فاهمه ولا هما فاهمينه .... وأتحدى مرة أخرى إن كان فرق عما كان أحمد عز بيعمله من تقسيم الدواير على مزاجه ولأغراض خاصة لديه ...

بالمناسبة ... متوقع كده برضوا في قوانين إنتخاب رئيس الجمهورية .. وبأقولها لكم وافتكروا الكلام ده كويس ... عشان تقولوا الراجل ده دماغه لاسعه

اتحدى العالم كله لو سمح المجلس العسكري بوصول أي مرشح رئاسي إسلامي لكرسي الحكم ...... مستحيل ومن رابع المستحيلات

مع إن من أبسط قواعد الديمقراطية إن لو الإنتخابات تمت في ظل شفافية ونزاهة وأحترام إننا نتقبل أي واحد يوصل بهذه الطريقة ولكنا نبقى وراه لو بنحب بلدنا ولو عندنا نظام سياسي محترم وأنا شخصياً هأعطي صوتي أي مرشح مهما كان يُقنعني ببرنامجه الإنتخابي .... وسأكون خلف اي مرشح يفوز وما أكونش مرشحه أو أكون حتى بأقبله طالما فاز بالعدل والنزاهة

فالمجلس العسكري أيها السادة عشان ما نضحكش على نفسنا منذ أن وصل إلى كرسي الحكم .. مش هايسيبه ولو بالطبل البلدي .. ولو سابه ظاهريا .. فمش هايسيب حقه في السبوبة . ولن يرضى بالرجوع إلى وزارة الدفاع مرة أخرى كمحكوم ومرؤوس .... وهايعمل المستحيل عشان يضمن حقوقة وسبوبته في الدستور الجديد .... وحقه في إختيار مرشح يرضى عنه هو

--------

الخلاصة واسف إن طولت عليكم

عشان ده ما يحصلش أيها السادة ... وعشان ما تتكررش ملهاة الأستفتاء على الدستور اللي عملوه

لازم كلنا نرجع المصريين بتوع أيام 25 يناير لحد 11/2

لازم كلنا نرجع بدون إنتماءات

لازم كلنا نتخطى إختلافاتنا .. لوما تحقق الثورة أهدافها وتترستق الأمور يبى كل واحد يدور على مكاسب ...

أما تقسيم الميراث على حياة عين الأب أو الأم .. فهي أمور لا تُعقل ... وأساساً مافيش ميراث يتفرق .. لأن بلدنا مش تِركة أو سبوبة أو نهيبة أو يصح إننا نتعامل معاها على المثل القذر اللي بيقول " إن خرب بيت أبوك .. خد لك منه قالب "

عشان كده كلنا لازم نعلي صوتنا ونقول للي فوق وفاكرين نفسهم حكام بحق وحقيق ... حقنا فين .. ثورتنا فين .... مستقبلنا فين .... ؟

[ابراهيم عبد العزيز]

كل ما حدث منذ تنحي الرئيس السابق هو عبارة عن ترويض للثورة لا أكثر

كلما تم رصد أرتفاع فى مؤشر الثورة لدى الشعب المصري يتم إصدار قرار شكليا لإمتصاص الغضب و لضبط المؤشر والحيلولة دون الدخول فى المنطقة الحمراء

لا نشعر ان هناك قرارات تصدر بدافع قناعة الحقيقية بالثورة وأهدافها

وكل القرارات التي يمكن تصنيفها أنها ثورية ( مثل علانية المحاكمات ومحاكمة الرئيس السابق وإبعاد قيادات فى الداخلية ) إذا قمتم باستعادة شريط الذكريات ستجدوا انها تم اتخاذها بعد الضغوط التي مارسها الشعب وبالتحديد يتم إصدارها فى ليلة يوم إختاره الثوار للنزول للشارع للمطالبة بمطالب معينة

لذلك ستجدون كثير من هذه القرارات صدرت يوم الخميس ليلا او الجمعة صباحا للحيلولة دون نزول الجماهير ومشاركتها فى أى دعوة فى يوم الجمعة

تم تعديل 6 سبتمبر 2011 بواسطة ابراهيم عبد العزيز

[Ahmed Anwer]

بس لازم تعترفوا لو المجلس العسكري متواطئ

فهو ذكي جدا جدا جدا لأقصي درجة

بيعرف إزاي يقدم تنازلات بعضها كبير و بعضها صغير في الوقت المناسب بالمللي

بيعرف إزاي يلعب علي كل الحبال و يوقع الكل في بعضه

بيعرف إزاي يسرح البلطجية و يغلي الأسعار و يملي البلد زبالة و يوقف الإقتصاد

من غير مجازر و لا مجاعات

بيعرف يحرك كل الأمور من خلف الستار و ميبانشي هو

غريبة أووي إن لواءات مبارك يطلعوا أذكي منه بسنوات ضوئية