ليه ميكونشي عندنا جورنان اسمه "محاورات المصريين"؟؟

[لماضة مصرية جدا]

السلام عليكم و رحمة الله و بركاته

أنا عارفة هتقولوا ايه

سمعاكم ع فكرة

هتقولولي يا بنتي الناس دلوقتي بتحول كل حاجة علي الفيس بوك و تويتر و انتي عايزة ترجعي بالعربة للخلف

الحقيقة الفكرة عندي من فترة

فكرة يكون فيه جورنان اسمه "محاورات المصريين"

و دي اسبابي:

1- الأفكار الثرية اللي بتنطرح هنا في المحاورات لو بشيء من التنقيح تنفع مقالات جامدة جدا و خصوصا انها مواكبة لكل الاحداث اللي بتحصل جوه مصر و براها و بتقدم طريقة نقدية تحليلية

2- شكل الجريدة الورقي جزء مهم جدا انك تخلق ارضية اكبر تقدر تتواصل بيها مع قطاع اعرض من الناس

3- دلوقتي ملاحظة ان كل واحد طالع و عامل حزب....و انا مؤمنة ان مهم انه يكون عندك حزب بقدر ما يكون عندك فكر تحرك بيه الحزب ده و الاهم تقنع بيه الناس اللي عايز تنضم ليك مثلا او تدعمك....و الفكر ده بلاقيه بيطرح بشكل راقي جدا من خلال المحاورات

5- انا مصدقة جدا ان الثورة الحقيقية هتكون في اعادة تشكيل الوعي...الثقافي السياسي...الفني...وعينا احنا المصريين في المشهد الحاصل دلوقتي في مصر...عايزين نحس ان احنا بنساهم في التغيير الحقيقي

6- حد هيرفع صباعه و يحطه في عيني و يقولي التمويل و الادارة و الذي منه يا ست هانم....الحقيقة دي جزئية انا لا ادعي اي معرفة بيها لان معنديش خبرة في العمل الصحفي او في المطبوعات بشكل عام بس اللي اعرفه ان الموضوع مش لازم يكون جريدة بمعني كل يوم و كدهوت بس ممكن يكون مجلة شهرية مثلا او جريدة اسبوعية يعني عدد تجريبي واحد كل فترة زمنية و تكون الية الموضوع ان احنا نلخص المشهد السياسي و الحراك المجتمعي اللي حصل طيلة الشهر او الاسبوع بس بشكل شامل من كافة الزوايا.

7- الميزة اللي انا شايفاها برضه ان الجورنان هيبقي امتداد للمحاروات يعني الجيل التاني ليها...و هنحافظ علي نفس التنوع و الاختلاف و الخناقات و الجدل...حتي اللغة المستخدمة ممكن تكون لغة عربية او عامية...بس المهم الفكر اللي بيطرح

دي فكرتي رايكم فيها ايه

قبل ما امشي

محدش اخد باله طبعا ان مافيش رقم (4) :P

و ده انا خليته للاخر علشان اخد الطماطم و البيض لوحدي

رقم 4 بقي

4- علشان انا شخص مجنون و بصدق ان الاحلام الكبيرة كانت افكار مجنونة في لحظة مابس فيه ناس صدقتها (ع الاقل اتنين علشان يبقوا في كتف بعض و كدهوت)...و لو حد صدق حلمه بجد راح يكبر و يكبر و ينسي في يوم انه كان مجرد حلم و يمكن ناس عدت عليه و ضحكت منه او من سذاجته او من فرط خياله

و دي وجهة نظر

ها قولتوا ايه؟؟؟

[طارق مصرى]

ممكن تكون فى شكل مجلة شهرية و ممكن التمويل يكون من المنتدى هنا من فتح المجال لوضع الاعلانات بالمنتدى حيث ان نسبة التصفح للمنتدى عالية و ممكن استقطاب اعلانات ذات عائد مش بطال و ممكن كمان مساهامات شخصية من الاعضاء (اللى يحب يساهم طبعا) لحد ما المجلة تقف على رجليها و تجيب ايرادات , لكن مش دى المشكلة....

هنا الاعضاء ينتمون لتيارات شتى .. مين اللى هيمسك رئاسة التحرير و الادارة ؟ سيكون فى مشكلة فى انتقاء المواضيع حيث ان الموضوع الذى اراه جيد يراه زميل اخر تشدد مثلا و الموضوع الذى يراه زميل جيد ربما اراه سخيفا :blush2:

عموما الامر مطروح للنقاش ... وشكرا...

[pink rose]

موافقة و انا امسك قسم الحلويات في الجرنان

قولتي ايه يا رورو؟؟؟

[لماضة مصرية جدا]

هنا الاعضاء ينتمون لتيارات شتى .. مين اللى هيمسك رئاسة التحرير و الادارة ؟ سيكون فى مشكلة فى انتقاء المواضيع حيث ان الموضوع الذى اراه جيد يراه زميل اخر تشدد مثلا و الموضوع الذى يراه زميل جيد ربما اراه سخيفا :blush2:

عموما الامر مطروح للنقاش ... وشكرا...

السلام عليكم و رحمة الله و بركاته

استاذي طارق

يعني افهم من كدهوت ان حضرتك موافق ع الفكرة في حد ذاتها

جميل جدا

احنا بنعمل برين ستورمنج

يعني بنحط كل افكرانا علي الترابيزة و بعدين نفلترها كده قدامنا

الجزئية اللي حضرتك حطيتها فوق دي انا هقدر اصنفها انها من التحديات...(انا بفكر في الفكرة من اتجاهات اربعة...نقاط قوة...نقاط ضعف...تحديات و مخاوف)

بالنسبة للنقطة بتاعت تحديتان الادارة و ازاي ننتقي الموضوعات

بقترح مثلا

ان يكون فيه اتسفتاء طيلة الشهر عن التوبيكات اللي ممكن تتفلتر او يتم ليها التحرير قبل ادراجها بالعدد الشهري

و بما ان احنا بنتكلم عن التحديات

جه في ذهني دلوقتي سؤال

طب ازاي هنضمن ان اللي هيقري الجريدة او المجلة ميستسهلشي و يجي يقراها هنا من ع المحاورات؟؟؟

اممممم طب هل ممكن نكهرب مثلا الموقع ضد الزوار....(حل شرير صح)

ده تساؤل و تحدي في نفس ذوات الوقت

شكرا لمرور حضرتك و مشاركتك

[لماضة مصرية جدا]

موافقة و انا امسك قسم الحلويات في الجرنان

قولتي ايه يا رورو؟؟؟

عارفة يابينكي الاقتراح ده هايل

مش علشان انتي هتضطري تدوقينا عملي و ميداني الحلويات قبل ما ننزلها في المجلة...(وش حد مني عينه اليمين انه يدوق بقي تورت الفودان بتاعتك ديت)

علشان انتي حطيتي ايديك علي حاجة مهمة

هتكتبي في الحتة اللي بتحبيها....و باختيارك و هتكوني مسئولة عنها

فهي مش وظيفة

هي جزء منك

و بكده نبقي كلفتناكي و ضمنا انك مش راح تطلبي مرتب....(وش حد شرير و نصاب)

شكرا علي تشجعيك

وكوني دايما قريبة

[pink rose]

ريهام متأكده انك من المنيا مش من كفر مصيلحة؟؟؟