ثمن الغربه

[coco®]

مساء الخير

انا عضو جديد ودي اول مشاركه ليا بصراحه انا ببعت هنا لاني بفكر اني اسافر للعمل في السعودية وانا بصراحه ضد فكرة السفر تماما طول عمري بس بصراحة اكيد انتو عارفيش لما يكون عندك طموح وتلاقي ان الفلوس هي اللي واقفه في سكتك ومش عارف تعمل اية ولا اية فجاه بتلاقي ان الغربة هي الحل بس انا مش عارف انا خايف جدا جدا خايف اني اكسب الفلوس واخسر جاجات تانية اخسر عيلتي اللي هتكون علاقتي بيها شهر واحد في السنه وخايف علي اولادي انهم يكونو في وحدة وغربه من صغرهم بجد مش عارف افكر انا قولت اتكلم معاكو يمكن حد يفيدني

شكرا

[yasovinas]

اخونا كوكو اهلا بيك صديق جديد وعزيز :unsure:

وكل سنة وانت طيب بمناسبة رمضان الكريم

اخي العزيز انا في الغربه منذ اكثر من 14 سنة

الغربة يا عزيزي حل لكتير من المشاكل

لكنها ايضا سبب لمشاكل اكتر تختلف من شخص لآخر ومن ظروف السخص نفسه

صدقني انا لو كان حد نصحنى هذه النصيحه قبل ما اسافر يمكن كنت كرهته لغاية دلوقت لكن

دلوقت بقول وبصراحه ياريت كان حد نصحنى

نصيحتي ليك يا اخي العزيز

اذا كنت عايش في مصر كويس وقادر تغطي احتياجات بيتك لا تسافر

الغربه يا صديقى مثل النار تدفي لكن تحرق

مجرد راي وربنا يوفقك لما فيه الخير

[se_ Elsyed]

بص يا عم كوكو ( إنت تقرب لفيليب كوكو لاعب منتخب هولندا ؟ أصله حبيبي )

من الاخر كده واللي بعد الاخر ... قعدت الواحد مع اولاده تسوى كنوز الدنيا .... ده مش عماد حمدي اللي بيقول الكلام ده .. وكلن دي حقيقة .

لو اولادك هايبقوا معاك يبقى اتغرب وسافر زي ما انت عايز إن شالله تروح بلاد الواق الواق ..

لو هما كبار وفي مدارس وجامعات وكده .. يبقى ضع لنفسك هدف إنك تتغرب سنتين تلاتة بالكتير قوي تعمل لك فيهم قرشين حلوين وترجع لهم تاني فُريرة ... ولو أتاخرت عن كده يبقى لا تلومن إلا نفسك .

في حاجة تاني ... أقعد كده مع نفسك وبعيد عن أي ضغوطات واعمل جدول كده من عمودين ...( حاجة كدة زي الميزانية )

وأحسب أرباحك وخسايرك من الرحلة اللي هاتتغرب فيها دي .. ولو حسيت إن ثمن غربتك هايكون في توفير حياة مريحة لأولادك وهايكلوا ويشربوا كويس وهاتبعت لهم مبلغ محترم كل اول شهر وكل سنة وإنت طيب على كده وممكن يفضل معاك فتات وحاجة بسيطة في الأخر ... يبقى أحسن لك تقعد وسطهم ولا تروح ولا تيجي ... لإن الغربة إذا كانت هاترسى على البطن بس يبقى قلتها احسن ... والعكس صحيح لو كانت العملية مجزية يبقى اتوكل عالله .. والكام سنة دول يعدوا بالطول ولا العرض ... بس خلي بالك ان الغربة دي زي الإدمان لازم يكون عندك إرادة حديدية عشان تتخلص منه ومن إغراءاته .

[coco®]

مبدأيا الف شكر علي الرد انا هوضح الموضوع بصورة اكبر انا ان شاء الله هتجوز كمان شهرين و مراتي موجودة بتشتغل في المملكة المفروض انها ترجع نتجوز زنفضل هنا علي طول ونكمل حياتنا وانا هنا في كصر شغال في مكان كويس بس انا مش ده طموحي انا نفسي يكون عندي مشروع بتاعي انا ليا و لاولادي مش مجد كل اول شهر مبلغ وخلاص ففكرت بدل ما هي تستقيل من شغلها اللي بيدخلها فلوس كويسة ممكن انا كمان اسافر علي عكس مبادئي طول عمري انا اروح 5 سنين انا وهي ونشتغل ونعمل حاجة وارجع اعمل المشروع اللي انا نفسي فية بس انا فعلا جايف لان فعلا الغربة زي الادمان

[nashwa]

الأخ coco

واضح ان حكايتك بسيطه ... من الأول فهمتنا أن عندك أولاد وخايف عليهم .. وكلام يوجع القلب .. والعزيز س س راح مديك الكلام المفيد من الآخر

بس واضح أنك على البر خالص .. أتوكل على الله وأتجوز .. وعيش مع زوجتك فى السعوديه .. وأستفيد من الوضع المالى المتاح حاليا ... وحسب ماقولت همه 5 سنوات .. يكون عندك أولاد .. أول مايوصلوا سن المدرسه .. أجرى فوريره على مصر .. وبالخير اللى وهبك الله فى خلال الكام سنه (ماتحولش تقعد كتير .. أسمع نصيحه س س) أفتح مشروعك .. وأبقى سيد نفسك ... وربنا يبارك و يخلى ويرزق كمان وكمان

:P

[فــيــروز]

لان فعلا الغربة زي الادمان

أعتقد ان المشكله تكمن فى هذه الجمله

ينبغى ان تضع لك هدفا قبل ان تسافر و تحاول الا تحيد عنه

بمعنى تتصور المشروع الذى تنوى اقامته وكم يحتاج من اموال وتحاول ان تكون راس المال اللازم خلال فترة سفرك .. الاهم من هذا ان تقاوم اغراء "لسه شويه" الذى يقع تحت طائله الكثيرون ..

لسه شويه عشان اشترى شقه اكبر فى مصر .. لسه شويه اما نشترى شقة تصييف .. لسه شويه نجيب عربيه احسن .. لسه شويه العيال كبرت ومحتاجين نشترى لكل واحد شقه وهكذا فى دوامه لا تنتهى .. وربنا يوفقكم و رمضان كريم :P :rolleyes:

[se_ Elsyed]

أنا مختلف معاكم يا جماعة في إن اللي معاه اولاده خارج مصر لا ينطبق عليه مصطلح " غربه " حتى لو وصل الاولاد سن الدراسة .. فالتعليم هنا ممتاز إلى أقصى درجة .. أنا هنا اتحدث عن التعليم الخاص او مدارس اللغات العالمية ، ويكفي ان تعلموا بإن غالبية الزوجات تعارض النزول إلى مصر بشكل نهائي .. حيث إن العيشة هنا أكثر هدوءً وأرقى مستوى ... وأقصد برضوا الشخص اللي عمل معادلة ولقى إن بعد مصاريفه هنا ومصاريف مدارس أولاده اللي بتبقى مولعه ... وبعد ده كله يلاقي معاه قرش كويس يساوي ثمن غربته .. يبقى يكمل إلى أن يقضي الله أمراً كان مفعولاً .

اما عكس ذلك .. يعني لو واحد عايش عشان ياكل ويشرب كويس ويدخ ولاده مدارس كويسه وييجي في الأخر يلاقي نفسه على الحميد المجيد .. يبقى أحسن له ينزل بلده ..

لإنه بالبلدي كده هايبقى بيرقص على السلالم .. لا منه إتغرب ورجع معاه ثمن غربته .. ولا منه قعد في مصر وتدرج في وظيفة أو عمل معين حتى كبر فيه .

[المهندس]

يحكى أنه ....

وكان ياما كان فى سالف العصر والأوان ...

ولا يحلى الكلام إلا بذكر النبى عليه الصلاة والسلام

- يقال ان احد الملوك وهو يتفقد الحاشية سمع صوت رجل يغني‏....‏

إقترب منه فوجده يكنس الأرض سعيدا‏,‏ ظل واقفا والرجل لم يتوقف عن الغناء‏,‏..... سأل الملك .... هو سعيد وبيغنى ليه ؟؟؟....إيه ‏المناسبة؟؟؟

قالوا للملك ‏:‏ إنه دائما هكذا‏..وده الطبيعى بتاعه

‏ سأل الملك بإندهاش ‏:‏ هل هو متزوج؟

قالوا‏:‏ نعم وعنده خمسة من الاولاد (فى عين العدو)‏...‏

وسأل الملك ‏:‏ وماذا يأكل؟

قالوا له‏:‏ ما تبقي من فتات جلالتك‏..‏ وأحيانا ينسونه فلا يأكل‏.‏ ومع ذلك (ويالا الدهشة) يغني‏..‏

وسأل الملك‏:‏ إن كانت زوجته هي أيضا تغني وفي صحة جيدة‏..‏ وإن كان أولاده أيضا كذلك

‏ فأكدوا للملك‏:‏ أنهم جميعا في غاية السعادة‏!‏

فلم يسترح الملك المريض ......

الذي لا يأكل إلا قليلا ولا ينام إلا أقل القليل‏..‏ رغم انه يستطيع أن يأتي بلبن العصفور من أي مكان .....

وأن يذبح الخراف والدواجن والبنى أدمين أيضا من كل حجم ولون‏..‏ ولكنه عندما يفعل ينظر إلى الطعام ويضع يده علي بطنه‏:‏ وآآآآآآآآآآه هاتوا لي الطبيب!!!‏

وتعالى ياطبيب ..... يجي الطبيب وما يقوله الطبيب اليوم قد قاله العام الماضي والعام الذى قبله والذى قبله ‏!!

‏ وهو أن مرض جلالته لا علاج له والحمد لله علي كده‏ وعلى الملك أن يرضى بنصيبه!!!!‏

وطلب الملك من أحد وزرائه أن يدرس حالة هذا الرجل وأن يتأكد بنفسه من كل المعلومات التي تجمعت لدي الملك‏.

غاب الوزير وعاد ليؤكد للملك ان كل المعلومات صحيحة.

‏ واندهش الملك‏.

‏ ولكن الوزير قال له‏:‏ يامولانا لن يستمر الرجل علي هذه الحال أبدا اذا انضم الي حزب‏..(..‏ إلا خمسة‏)..‏ !!!!

وسأله الملك عن هذا الحزب....

فأجاب الوزير‏:‏ إنه يامولاي حزب معظم الناس ولكنهم لا يدرون‏..‏!!!

وسوف تري غدا‏!‏

وذهب الوزير وأتي بكيس فيه‏95‏ قطعة من الذهب‏,‏ ووضعها أمام باب هذا الخادم‏.‏

ولم يكد هذا الرجل يراها حتي تواري في البيت‏..‏ وفتح الكيس

فيصاب بذهول ويغلق الابواب والنوافذ ويقوم بعدها مرة واثنتين‏..‏ ويندهش كيف إنها ناقصة خمس قطع‏..‏ ولا يعرف أين ذهبت‏..‏ هل سرقوها من رزقه‏! ..... اللصوص ... الكلاب .... الحاقدين ... كيف يسرقوا رزقى .....

لابد أن أكملها المائة لا بد......

وراح الرجل الذى كان سعيدا راضيا يعمل ليلا ونهارا لا ينام ولا يأكل ولا يغني‏..‏

فوراءه واجب مقدس .... وهو كالثور فى الساقية مشغول بتنمية هذه الثروة وجعلها مائة قطعة ذهبية ـ

وهو ليس سعيدا أبدا بأنها جاءت له من السماء‏... وهو حتى لا يذكر ذلك.....!

وجاء الملك ولم ير الخادم ولا سمع صوته‏..‏ فسأل الوزير عنه

فأجاب الوزيرمبتسما ‏:‏ مولاي لقد أصبح الآن عضوا عاملا في الحزب حزب ‏(....‏ إلا خمسة‏)!

زملائى وزميلاتى فى الحزب

أسعد الله مسائكم....!

[بنت شعنونة]

استاذ كوكو

انا قعدت في الغربة 19 سنة كاملة

وكنت مع والدي

بما انك لسا عريس ان شاء الله

توكل على الله وسافر

وبعد سنتين فكر في كلمتين اتنين

عاوز ترجع؟؟ امتى؟ و الأهم عاوز ترجع ليييييييييييييييييييييييه؟؟ باقي على ايه في مصر خايف عليه عشان كدا عاوز ترجعله؟ طب لو كان كدا طب سافرت ليه اصلا؟

الكلمة التانية

دي معلومة عن ناس كتيييييييييير رجعت من الغربة وانا واحدا منهم

كل يوووووووووم حد مننا يتمنى ليلة واحدا من ليالي الغربة

وحاليا جميعنا " انا واخوتي " نسعى بجد للعودة للغربه بلا رجعه ونحاول اقناع والدنا بذلك لآنه هوا الوحيد الذي نبقى عليه بمصر

غير كدا

نحن غير اسفين على الغربة

واهلا ومرحبا بها مدام هيا اللي هاتديني راحة البال...

بس

hg)::

[Tafshan]

عزيزي كوكو ،

قبل ما اسافر من مصر كان عندي قرشين وحاولت اعمل بيهم مشروع و النتيجه كالتالي :

1- مصر سوق احتكاريه لا يمكن ان يبدأ فيها اي احد من الصفر - علي رأي المسلسلات : لا تسألني عن اول مليون

2- لا يمكن ان تعمل بالتجاره بصوره نزيهه في مصر ، لازم ح تتعلم الاونطه و مسح الجوخ و ...

3- لا يمكن ان تعمل دراسة جدوى في مصر : القوانين تتغير كل يوم بصوره عشوائيه بعيده عن المنطق

النتيجه اني خرجت مفلس من مصر mc: و بصراحه لا يوجد لديا اي خطط .. اعمل كي اعيش انا و زوجتي و بنتي ، و - الحمد لله - اوفر بعض دخلي للمستقبل المبهم ..

لو وجدت فرصه حقيقيه في المملكه سافر دون تردد على الاقل حتى نعرف الي اين ستصل مصر .. انا مؤمن جداً ان مصر خلال السنوات الخمس القادمه سوف تصبح شئ مختلف .. ما هو .. لا اعرف .. لكن بالتأكيد ... غير مطمئن

[yasovinas]

اخونا النهندس صباح الخير ورمضان كريم

والله حكايتك صح مليون الميه

فعلا اللي لا ياكل العسل يهنا بطعم الملح

اذا كنت عايش في مصر مبسوط وراضي بحالك فلا تفتح على نفسك ابواب المال او العسل (المر)

الغربة كربة

شعنونة انت جربتي الغربه وذقتى حلاوتها فقط لانك يا آنستي كنت في كنف ابوكي ومع اهلك وطلباتك مجابة ليس عندك مشاكل ولا التزامات

ما كنت فيه مع الزالد العزيز ربنا يخليه لكم ليست غربة صدقيني

انا قضيت في السعوديه 5سنوات مع والدي زماااان والان لي 15 سنة هنا في الامارات هناك فرق كبير بين هذه وتلك

الغربه كربه