تغريدات على هامش محاكمة مبارك

[احمد رضوان]

الموضوع ده غير متعلق بالمحاكمة لذلك لم أكتبه كرد هناك ، وأيضا حتى لا يضيع وسط الأخبار المتلاحقة

هنا قراءة لرتوش صغيرة ممكن تعدي علينا في زحمة الأحداث وخلينا نبدأ تهييس

------------------------

نبدأ بالشهادات اللي تم تغييرها ... ونتصور التالي

لواء أوعقيد او عميد .... هل يمكن النيابة تجبره أو تملي عليه أقواله ... وبعد كده يقوم يغيرها أمام القاضي

إيه هي الإحتمالات الموجودة

الشهادة الأولى زور

الشهادة التانية زور

الشهادتين زور

القراءة

قادة من الشرطة يقومون بالشهاددة الزور في جميع الإحتمالات ... طبعا تم إستبعاد إحتمال أن الشهادتين الحق بسبب التعارض ... المهم قائد شرطة تحت أي ظرف يقوم بالشهادة الزور وإحنا هنا بنتكلم على 7 من 9 يعنى بنسبة حوالي 65% من رجال الشرطة الشهود لو أخدنا دي عينة لمجتمع قادة الشرطة ... حنعرف أد إيه حجم الفساد الموجود حاليا في قمة الهرم ...

ثانيا قائد شرطة يقوم بتغيير أقواله ... هل هو كده قائد وهل هو شرطي ... لو افترضنا حسن النية تم إجباره عليا يبقى لا ده شرطي ولا عنده إيمان بعمل الشرطى ولا عنده إستعداد إنه يموت في سبيل الحق ... يبقى حيوقف قدام اباطرة الشر في مصر إزاي ... طبعا حنلاقيه موالس مع تجار المخدرات والرقيق وتجار الإنتخابات ...

ثالثا طيب حيشتغل إزاى ويمسك قضايا مهمة ويمنع جرائم ... ما هو قلبه قلب خساية ، يبقى أكيد يعاونه ناس قلبها وحش وعندها إستعداد تموت في سبيل القضية ... زي البلطجية والحرامية وقطاع الطرق ... قضيتهم الفلوس والسطوة

----------------

الإستنتاج

لم يتم تطهير الشرطة ومصر غير جاهزة للحصول على جهاز شرطة محترم بعد ..... وبمعنى حيفضل الالتراس يزفوهم ويغنولهم مش ناسيين التحرير ياولاد ال.. يعنى الإنهيار قريب قوى لأن الجهاز الفاسد كان عايش على عضلاته وبعد الثورة أتضح إنه كان زي التور عضلاته لوحدها مش كفاية علشان يعيش كبني آدم... وماعتقدش إن فيه حد بعد يناير عنده إستعداد إنه يعيش مع تور عقله في عضلاته

رأيكم ايه وهل كده الشرطة دي نقدر نقابل بيها بكره اللى بنحلم بيه

وللحديث بقية

تم تعديل 9 سبتمبر 2011 بواسطة Salwa

[احمد رضوان]

أعتذر عن التأخير بس الأيام الماضية كانت مرعبة وحترسم شكل مستقبل مصر بالتأكيد.

---------------------------

كنت أحب اليوم أهتش في موضوع تغيير الشاهدات من زاوية تانية بس المره دي حنروح لهتشاية تانية خالص

ليه المشير مش حابب يشهد الأول وكمان رئيس الأركان ، هل معنى كده إنهم حيشوفوا شهادة عمر سليمان والعيسوي ووجدي الأول وهلى هي كفاية علشان تقفل القضية وفي الحالة دي يبقى ممكن المحكمة تصرف نظر عن شهادتهم أو يشهدوا مجرد تأكيد لأقوال اللى قبلهم.

طيب ليه اتحدد في الأول تاريخ إستدعائهم للشاهدة ولم يتم الإعتذار ، وهل ده ليه علاقة بشهادة الشهود رقم 7 ورقم 9 واللى قلبوا الترابيزة وعلى فكرة العادلى اتصل بالشاهد رقم 9 (لواء) بعد الجلسة يعني فيه تليفونات وموبايلات أهوه جوه السجن يا كاذبين، وهل 7, 9 خلوا شهادة المشير ورئيس الأركان أبيض أو إسود وده مش اللى تم الإتفاق عليه.

طيب سؤال خبيث طالما الجلسات اللى جاية سرية وممنوع نشرها هل الشهود بما فيهم المشير ورئيس الأركان حيعرفوا اللى حصل فيها علشان يقدروا يصيغوا شهادتهم

طيب سؤال تاني ليه التأجيل لمدة أسبوعين ومش أسبوع واحد واللى هو فيه شهادة عمر سليمان والعيسوي ووجدي بمعنى هل في خلال أسبوعين حيحصل حاجة كبيرة تغيير الموقف الحالى على جميع المستويات وهي ممكن تكون إيه وهل تأثيرها على محاكمة مبارك وأذنابهحيكون مباشر ولمصلحة مين

سؤال تاني هل ده متعلق بإشاعة تعيين رئيس وزراء عسكري بعد الخلاف ما وصل مع د شرف لمستوى خطير بعد أحداث السفارة وخاصة بعد نشر مقاطع بتصور الناس بتدخل السفارة في وجود عساكر الجيش

طيب سؤال تاني هل فيه علاقى بين ده بين تفعيل قانون الطوارئ اللى أصلا متفعل بس المره دي داخل فيه بث الفتنة ونشر الشائعات يعنى من الآخر اللى يفتح بقه حنعلقه

سؤال أخير بقى هلى يجوز لشاهد في قضية جنائية الإعتذار عن الحضور ، طيب القاضي اللى رفض طلب تقديم شهادة مكتوبة حيعمل إيه ولا حيعديها.

تابعونا بعد الفاصل

[احمد رضوان]

رجعنالكم بهتشاية صغيرة سريعة كده تخليكوا تفكروا شوية

فاكرين الراجل اللى كان واقف ورا عمر سليمان ... ايوه صح يوم بيان التنحي

.

.

إستعدوا للصدمة

.

الراجل ده كان قاعد ورا عمر سليمان وهو بيدلي باقواله في المحكمة ... الكلام ده حقيقى وحصل ومصدره د. حازم عبد العظيم اللى كان حيتعين وزير إتصالات وبعدين أعتذروله وهو على السلم

طيب يا ترى هل هو لسه حارس لعمر سليمان ... وده معناه إن عمر سليمان لسه موظف رسمي وفي موقع مهم ... طيب سؤال تاني هو عمر سليمان وظيفته إيه دلوقتي ؟؟ بلاش دي هل صدر إي قرار بعزلة عن وظيفته كنائب لرئيس الجمهورية بعد تنحي مبارك

على فكرة تفتكروا لما الراجل التاني بعد مبارك في الدولة، هو مدير المخابرات ، .... يطلع ميعرفش اللى بيحصل في البلد زي ما شهد فى المحكمة وده كلام آسفين يا ريس ولعلمكم هم كمان بعتوا ليه رسالة شكر على شهادته، تفتكروا مين حيعرف لو هو ميعرفش ولم يصل إلى علمه ولم يتم إبلاغه.

على فكرة عمر سليمان غير كلامه اللى قاله في النيابة ... الظاهر مفيش راجل في محيط مبارك عنده كلمة واحدة مبتتغيرش وده بيدي مرونة مدهشة في الحركة اكثر من أي افعى

تم تعديل 15 سبتمبر 2011 بواسطة Radws

[مهندس ابو يوسف]

للعظه والعبرة

[احمد رضوان]

أنا أهيس إذا أنا موجود

المشير في خطاب مذاع فى حفل تخريج ضباط شرطة طلب منا ورفضنا

اليوم في اليوم السابع منشور ما يؤكد ان شهادته في صالح مبارك

http://www.youm7.com/News.asp?NewsID=498768

طيب كده شكلها واضحة .... 18 يوم من الضغط لم تكن كافية لخلع مبارك ، 850 شهيد لم يكونوا كذلك ، 6000 مصاب لم يؤثروا ، 1150 مفقود لم يتضح أثر لهم.

اليوم يشهد على سابقه ... الأمر يتأكد وكأنه إنقلاب عسكري على حكم مبارك وطلب منه التنازل عن العرش ، وفي مقابل ذلك لا يدان وتم أخذ التعهذات على ذلك ومن الواضح أن أطرافاً خارجية قد تدخلت للوصول لهذا الإتفاق.

هل لذلك علاقة بما نشر على لسان المرشحة بثينة كامل ... أن المجلس العسكري هو من يدير الثورة المضادة

طيب هل كل ده كنا عايشين فى عالم إفتراضى وبنلعب لعبة بلاي ستيشن عن قيام ثورة في مصر وحيطلع اللى ماتوا ما ماتوش واللى اتصابوا ما اتصابوش .... وأنا مش أنا ويطلع واحد غيري ....

لسان الشعب يلهج بقولة أضاعوني وأي فتى أضاعوا ... ليوم كريهة وسداد ثغر

[ابراهيم عبد العزيز]

أحيك على تحليلاتك القيمة يا اخ رادوس

منذ قليل طالعنا فى صحيفة اليوم السابع ان شهادة المشير جاءت لصالح مبارك وان المشير بذلك تحول من شاهد إثبات الى شاهد نفي , ومجريات الامور توحي بالفعل بماتفضلت وقلته أن هناك عهدا ما تم منحه لمبارك بتنحيه عن منصبه مقابل عدم اثبات التهم عليه باى طريقة كانت

عموما يا اخي الفاضل مهما كانت مجريات الامور خلف الكواليس لكن الشعب المصري لم ولن يقبل بأى اعوجاج فى سير المحاكمة لمبارك ورموز الفساد , ولو كان القائمين على مصر يعتقدون انه من الممكن أن يتم منح البراءة لمبارك وان الشعب سيقبل بذلك فهم للأسف على خطأ كبير , ولو حدث هذا فستكون هى الشرارة للثورة الثانية والتي وقتها ستكون ثورة لا تبقي ولا تذر , فالشعب المصري أصدر حكمه على مبارك يوم 25 يناير وانتهى الامر وهو ليس فى حاجة لحكم من القضاء حتى يثبت التهمة على رئيسه السابق , والشعب المصري ترك الامر للقضاء حتى يثبت انه شعب راقي ومتحضر لا أكثر ولا أقل

تم تعديل 24 سبتمبر 2011 بواسطة ابراهيم عبد العزيز

[احمد رضوان]

ورجعنا لكم بسؤال وهتشاية

السؤال

------

علل : بعد إتهام جماعة 6 إبريل بالعمالة والتمويل الخارجي وعمل فحص لممتلكات 5 من أعضاءها .... يتم القبض على جماعة آسفين ياريس وتجميد أرصدتهم والتي إتضح أنها في حدود 3 ملايين جنيه؟

الهتشاية

--------

الشباب اللى في الميدان ده ... مش هو الشباب الراقي المؤدب بتاع يوم 25 يناير ، الشباب ده .... ده بشتم وبيعمل حركات بالصوابع مش ممكن أبدا يكونوا ثوار حقيقين لأن الثائر الحقيقي مؤدب ... دول بلطجية ... وندعو الشعب للتصدي لهم ... ونحيي رجال وسيدات العباسية الأبطال لإنتصارهم على هؤلاء البلطجية اللى عايزين يخربوا البلد

اللى الكلام اللى فوق ده بياكل معاه .... إيه رأيكم إن جمال مبارك عمل حركات ... ياي ياي .... قليلة الأدب بصباعه للمحامين في الجلسة الأخيرة بعد رفض القاضي لمحامين الدفاع المدني توجيه أسئلة للمشير ... على فكرة دول المحامين اللى عرفوا يدخلوا ما هو الباقيين كانوا بيدلعوهم بره لحد سيادة المشير ما يخلص

الرابط

http://www.dostor.org/politics/egypt/11/september/24/55589

واخدين بالكم إن لغة الصوابع بقت لغة مشتركة بدءاً من صباع الفنجري لصوابع الثوار لصباع جمال ... تفتكروا لو مبارك خلال ال 30 سنة اللى فاتوا كان إهتم بالتربية والتعليم مش كنا لقينا لغة تانية نتفاهم بيها غير اللغة دي.

وعلى العموم اللى قالوا الشباب ده مش هم الثوار ... واضح كده إنه مغيب لأنهم أولاد الأرض وإستخدموا نفس اللغة المتعارف عليها في المجتمع من قمته إلى قاعه واللى اتحفرت خلال سنين حكم مبارك وأصبحت علامة من علامات الشارع المصري ... علشان الرسالة توصل للطرف الآخر

تم تعديل 25 سبتمبر 2011 بواسطة Radws

[شرف الدين]

ومجريات الامور توحي بالفعل بماتفضلت وقلته أن هناك عهدا ما تم منحه لمبارك بتنحيه عن منصبه مقابل عدم اثبات التهم عليه باى طريقة كانت

---------------------------------------------------

فالشعب المصري أصدر حكمه على مبارك يوم 25 يناير وانتهى الامر وهو ليس فى حاجة لحكم من القضاء حتى يثبت التهمة على رئيسه السابق , والشعب المصري ترك الامر للقضاء حتى يثبت انه شعب راقي ومتحضر لا أكثر ولا أقل

ويا ترى يا عزيزي إبراهيم هما كانوا عارفين ايه التهم اللي النائب العام هيوجهها لمبارك بعد نهاية الثورة بحوالي شهرين ... عشان يضمنوا له إنه هيخرج منها قبل التنحي ؟

بمعنى آخر ... إزاي يضمنوا البراءة من تهم هما لسه ميعرفوش هيا ايه ؟

بل إن الكلام عن المحاكمة والحديث عن المحاكمة لم يبدأ إلا بعد جمعة التطهير ... فاكرها يا أخ إبراهيم ؟ اللي الإخوان ما اشتركوش فيها في الأول .. واشتركوا فيها الجمعة التانية .. عشان يبينوا إنه من غيرهم مفيش مليونية.

وأما الجملة التانية فهي جملة معبرة في الشق الأول فقط .. واعتقد أنك قد اقتبستها من مكان ما .. ولكن الجملة الثانية ما معناها ؟ الشعب المصري ترك الأمر للقضاء لأنه شعب راقي ومتحضر .. ولكن القضاء إذا أصدر حكما ليس على هوى الشعب ( أو بمعنى أدق على هوى الثوار ) فإنهم سيقومون بثورة لا تبقي ولا تذر .. دليلا على تحضرهم ورقيهم ... شوف إزاي ؟

يا أيها الشعب المصري .. كم من المصائب تقال باسمك

[احمد رضوان]

هاتشاية على السريع

بوم السبت

شهادة المشير اللى إتسربت وكانت في صالح مبارك ... واللى اتضح إن معظمها لا أعلم ... اعتصام المحامين وطلب رد هيئة المحكمة ... الجولدن فينجر بتاع جمال مبارك

واحد خبيث وشوشني وقال تفتكر لو المشير ما يعرفش مين اللى أمر الطيارات الحربية بالتحليق فوق رأس المتظاهرين في التحرير ، تفتكر مين يعرف ... طبعا كان ردي إذا كان المشيييير بجلالة قدرة وزير الدفاع في مصر المحروووثثة ميعرفش يبقى العبد الفقير حيعرف

يوم الإثنين

المشير في وسط البلد ... بدون حراسة .... بلبس مدني ... على فجأة ... والتلفزيون كان هناك بالصدفة وصوره

تفتكروا الدعم اللى خسره الجيش بسبب الشهادة أمام المحكمة - مهما كان دوافعها - يمكن إسترداده بحركة مسرحية الشعب عارفها وفاقسها كويس وعدت عليه كتير قبل كده ولا هما بيراهنوا على جهل الشارع

هل هناك علاقة بين النزول للشارع والشهادة والضمير الغير مستريح

[لماضة مصرية جدا]

السلام عليكم ور حمة الله و بركاته

توبيك كتير حلو bv:-

بس انا افتكرته "تغريدات" يعني خواطر ادبية و كدهوت

طب ممكن اقترح علي حضرتك نسميه

تويترات...المحاورات

او تويترات....مصرية

يعني اي حاجة كدهوت فيها تويترات علشان نعرف ان حضرتك بتغرد علي تويتر من هنا هوت :)

شكرا لمجهود حضرتك

و تقبل تواجدي

[احمد رضوان]

توبيك كتير حلو bv:-

ربنا يكرمك ده من ذوقك

بس انا افتكرته "تغريدات" يعني خواطر ادبية و كدهوت

هو فعلا خواطر تحليلية لحاجات صغيرة بتعدي علينا في المحاكمة ... شايف انها مهمة لإنها بتوضح رتوش الصورة

و تقبل تواجدي

أشكر لك مرورك الكريم وأهلا بك باستمرار

----------------------------------------------------------------

الجابري مااااااااااااااااااااااااااااااااااااااااااااااااااااات

الظاهر جمال مبارك كان بيقرأ الغيب لما شاور للمحامين بعلامة الجولدن فينجر ... ده يا جماعه شيخ وتبقى العلامة دي اللى عملاه بإيده من حركات الولي جمال مبارك ..... حي مددددددددددد يا شيخ جمال يا بركة

تم تعديل 29 سبتمبر 2011 بواسطة Radws