"شتيبى" العبقرى المنكوش... و إختراع الفنكوش

[disappointed]

إستبشرت جماهير الزمالك خيراً فى بداية الموسم عند الإعلان عن التعاقد مع "شتيبى"

الرجل – والحق يقال- ذو طلعة مهيبة و وقورة تدل على العبقريّة :P بشعره الأبيض الكثيف المنكوش الذى أوحى لجماهير الزمالك بأن مجلس إدارته قد تعاقد مع "آينشتاين" لتدريب الفريق

ورغم البداية السيّئة و العرض السيّئ الذى لايصدّقه عقل و النتيجة الأسوأ و الهزيمة الثقيلة أمام المقاولون العرب فى كأس السوبر , ورغم حبسة الدم خلال شوط كامل أمام غزل المحلّة فى مباراة كان الفوز فيها بعدد وافر من الأهداف بمثابة تغطية على منظر الزمالك المفكك , ورغم فقدان الزمالك لهويّته بالكامل و تعادله مع أسمنت أسيوط فى مباراة جعلتنا نشعر أننا نشاهد فريقاً لا نعرفه....... رغم كل ذلك.....إستبشرت جماهير الزمالك خيراً بإيقاف الدورى و بمعسكر الإسماعيلية الذى من المفترض أنه قد جاء بمثابة فرصة لإلتقاط الأنفاس و ترتيب الأوراق المبعثرة و لملمة أوصال الفريق التى كادت أن تصبح أشلاءاً

ثم.....

وبعد 10 أيّام كاملة قضاها العبقرى "آينشتاين" (آسف...."شتيبى") فى معامل صومعة الإسماعيليّة...خرج "العبقرى" من الصومعة وهو منكوش الشعر وهو يصرخ: وجدتها.... وجدتها..... وهاهو يزيح الستار عن إختراعه الطليعى الغير مسبوق.......فلقد خرج العبقرى من صومعة الإسماعيليّة ليقدّم لجماهير الزمالك : الــفــنكـوش

و لأن "آينشتاين" ( يووووه.... آسف..."شتيبى") رجل عبقرى ذو عقلية معمليّة فذّة , فلقد كان "الفنكوش" الذى إخترعه ( بعد 10 أيّام كاملة من التجارب البيولوجية و الكيميائية و الفيزيائيّة ) فنكوشاً لم تشهده جماهير الزمالك عبر تاريخها......إذ خرج العبقرى "شتيبى" من باب صومعة الإسماعيلية وهو يصرخ : أيها الناااااااس...... المكنة (قصدى الفرقة) طلّعت قمااااااش

وقد تمت إزاحة الستار عن "الفنكوش" بالأمس فى مباراة "إنبى" بحضور لفيف من وزارة البحث العلمى و بضعة عشرات من جماهير الزمالك الفضوليّة

وبتحليل "الفنكوش" وُجِدَ أنه يتكوّن من :

1- وائل القبّانى فى الباك رايت

2- شيكابالا فى الهاف رايت

3- مدحت عبد الهادى فى مكان غير معلوم و جارى رصده و تحديده بمساعدة الــ"سى.آى.إيه" و "إف.بى.آى"

كما يدخل فى تركيب الفنكوش عدد مهول من البلالين فى صورة كرات عالية ضالّة ساذجة و عشوائيّة , و غياب كامل لصنع اللعب , و عدم وجود أى شكل أو قوام أو منظر أو أسلوب محدد للفريق , مع فقر مدقع فى الخطورة على مرمى الخصم ,بالإضافة إلى عدد من التغييرات اللولبيّة الإفتكاسيّة الشنكوتيّة التى تحتاج إلى كتالوج يتم تصفّحه قبل مناقشة معنى هذه التغييرات فى مؤتمر علمى موسّع يضم أشهر خبراء الطب الشرعى من أجل تشريح جثّة فريق الزمالك للتوصّل إلى باقى مكوّنات الفنكوش مع رفع البصمات عن جثّة الفريق لتحديد الأصابع التى "تعبث فى قاعدة الفريق الجماهيريّة

ونظراً لأن اليوم كان اليوم العالمى للفنكوش , وحيث أن الجميع كان على موعد مع "الفنكشة" , فقد قرّر حكم المباراة المشاركة بفنكوشه الخاص الذى تمثل فى الكارت الأصفر الــ"فنكوشى" الذى أعطاه لعبد الحليم على فى الوقت الضائع بعد أن خرج عبد الحليم من الملعب لعلاج رأسه المفتوحة ثم رأينا جميعاً كيف أشار الحكم (محمد السيد) له بيده للدخول إلى أرض الملعب , وما أن دخل عبد الحليم إلى أرض الملعب حتى فتح الحكم سبرينت تجاهه مشهراً فى وجهه البطاقة الصفراء كالسيف البتـّار بدعوى أنه دخل الملعب دون إستئذان و من غير ما يتنحنح :rolleyes: مما أصاب اللاعب بحالة من الذهول وعبثاً أخذ يشير للحكم بما معناه أنه هو الذى طلب منه الدخول و أشار إليه بذلك :D ( إشمعنى "شتيبى" يفنكش يعنى والحكم لأ؟؟؟ والاّ محمّد السيّد مالوش نفس فى الفنكشه؟؟)

وبمناسبة إزاحة الستار مبكّرا عن الفنكوش , فإن جماهير الزمالك تذكّر إدارة النادى بأن العاقل من إتعظ بغيره و الأحمق من إتعظ بنفسه , ولهذا فإن على إدارة الزمالك أخذ العبرة والعظة ممّا حدث مع النادى الأهلى فى الموسم الماضى على يد "تونى أوليفييرا" والذى لم يتم إقالته إلاّ بعد أن توحّش الفنكوش الذى إخترعه الرجل و إلتهم قوام الفريق :D .... وعليه....فإن جماهير الزمالك ترجو من إدارة النادى التخلّص من "الفنكوش" فى أسرع وقت قبل أن تكتمل الفنكشة فى مباراة الأهلى القادمة ( من باب إن الفنكوش بانت لبـّتـه)

ويا جماهير الزمالك.........كل فنكوش و أنتم بخير

ys): ys):

تم تعديل 14 أكتوبر 2004 بواسطة disappointed

[lالمطحون]

انها العبقريه ياصديقى وواضح ان الراجل ده محدش فاهمه وغالبا هيبان اثر الكلام ده كمان 7000 سنه مع الحضاره اللى محدش يعرفها ولايفهمها فعلا حاجه جميله وقاعد طوال المباراه يكتب ايه مش عارف وانكان احتمال انه يلاعب وائل زنجا وينج وعبد المنصف راس حربه اوحتى راس فجل مش مهم المهم العبقريه ومرحب بعباقره بتاخد فلوس الشعب الغلبان زىه وعمه تاردللى وتسلم لنا العبقريه

[se_ Elsyed]

إيه يا محبط يا اخي ما تعملش في نفسك كده !!! المنتدى محتاجك .

- بس إيه رأيك مش س س قال لكم إمبارح إن إنبي هايولع في فريق الزمالك ؟ :rolleyes:

- وكمان عايز أسمع رأيك في فريق دريم تيم الجديد ( الاهلي سابقاً ) أقصد يعني الأداء وطريقة اللعب .

- لو جينا بقى للزمالك يا حاج محبط ويا كل زملكاوي هانلاقي مصيبته وخيبته ما وردتش على حد ( ولا سبت كمان ) ، فهو الفريق الوحيد اللي عندما يكسب يعُم الحزن أرجاء النادي ويلطموا الخدود ويشقوا الجيوب وينزلوا يلموا الكراسي اللي في السوق كلها عشان يهدوا الفرح ويكسروا الكلوبات ... ويطردوا المدرب الكسبان العميل اللي عمل العمله السودا دي شر طرده .. ولنا في اتوفيستر وفينجادا خير مثال ...

- ففي الوقت اللي كان كابرال ( إبن المحظوظة ) عامل شغل نار وعمال يكسب بطولات يمين وشمال .. يقوموا طاردينه ورازعينه شلوت محترم ويحاولوا ياكلوا عليه بقية عرقه .. وعشان جورج سعد ( الراجل المحترم ) ينقذ الموقف يقوم مطلع مبلغ من جيبه ومطبقه وعاطيهوا له ... ننقل الكاميرا بقى لمعسكر الاعداء في الجزيرة في مشهد داخلي والأحداث تدور في قاعة إحتفالات النادي الاهلي ...

- ونلاقي زيطة وزومباليطة وضرب نار وناس بترقص وتغني ... إيه ياخوانا مين اللي بيتجوز عندكوا .. يقولك لأ ما فيش جواز ولا حاجة ده عقبال اولادكم إحنا عاملين حفلة تكريم لتوني أوليفيرا اللي قعد في الاهلي 6 شهور جاب النادي فيهم الأرض أفريقياً وعربياً ومحلياً وكان أحمر مدرب في تاريخ الكورة منذ ان اخترعها الفراعين الاوائل .. ومع ذلك الراجل إتراضى وخد اللي فيه النصيب وكرموه وإتعشى ومشي ... ومن قبله الجحلوف الأعظم " جو بونفرير "

- نشيل نفس الكاميرا ونروح جري نصور إيه اللي عمله الزمالك مع فينجادا فبعد ان عمل احلى شغل في البطولة العربية وأخد الدوري لثاني عام على التوالي ... برضوا الراجل ماشي في حاله لقى الشلوت طلع له من الضلمه وبعدها لقى شنطة هدومه محصلاه .

- وبعد ان قضى حسام حسن وأبراهيم حسن احلى أيام حياتهم ودخلوا الزمالك على الحصان الأبيض ولا الفاتحين وحصدوا البطولات مع الزمالك وذلك للروح اللي بثوها في نفوس اللاعبين ... نجد إدارة الزمالك تستغنى عنهم في نهاية الموسم الماضي بطريقة غريبة عجيبة ... وانا لو نادي محترم كنت أجيب حسام وإبراهيم على كراسي متحركة وأخليهم بركة وحظاظة في النادي .... وقد كان فبمجرد ما مشيوا الأتنين وجدنا الزمالك فريق مهلهل ومالوش كبير وكل لاعب في وادي ..

- فهذا حازم إمام من ساعة ما اتجوز قدرية خريجة الجامعة الامريكية وهو بيفكرني بعادل إمام في فيلم الهلفوت لما اتجوز إلهام شاهين وما بقاش نافع نفسه ورجليه مش شايلاه ... شويه وعدى مرحلة الصدمة الزواجية .. لقينا ولكن إرادة الله شاءت بان المولود يتوفى بعد ساعات من ولادته ... دخل حازم في متاهة حزن تاني ... يا دوب ما لحقش يعدي الصدمة وهوب لقى الثعلب الكبير حماده أمام دخل في دور مرض - ربنا يشفيه - وقعد حازم جنبه ومابقالوش في الكورة .. وشكله هايقضي بقيت حياته في الإجتماعيات .

- نيجي للعندليب المحلي عبد الحليم علي اللي لم يتألق ولن يتألق إلا في وجود العميد متقاعد حسام حسن وكأن حسام كان هو الحافز للعندليب وهو اللي بيحسسه إنه لو مالعبش بذمه هايترمي بره ... وكان من الطبيعي إن لما يمشي حسام نلاقي الاحبال الصوتية عند العندليب بقت حبال غسيل وبقى صوته عامل زي صوت المطربة العالمية "جمالات كفته " او على الأقل مثل البلبل الصداح فريد شوقي في أغنية " والله زمان .. زمان والله " .

- ولابد ان نعترف إن الزمالك من احسن الفرق اللي بتعلم المدافعين بتوعها أصول لعبة كرة القدم .. فعلى سبيل المثال هشام يكن داخل مجال الكورة فرد دراع وعشان خاطر أبوه البركة يكن الكبير .. ومع ذلك واحده واحده إتعلم وبقى لاعب ممتاز بصراحة ... وكذلك نبيل محمود اللي كان المفروض يبقى لاعب باسكيت وكبيره يلم كور من تحت السلة ... وأخيراً بيشو ( بشير التابعي ) فبعد ما كان جاي من دمياط بالجلابية والبلغه لقينى الزمالك حماه وقيفه وأصبح له شأن كبير وبقى أحسن قلب دفاع فيكي يا جمهورية مصر العالمية ... يقوم الزمالك عشان شوية دراهم يبيعه لتركيا بتراب الفلوس لفريق سكرته مش عارف إسمه ترابزين إسبورت باين .. والواد هناك ضايع ومش لاقي نفسه ... مع إن الزمالك مش محتاج ... فكانت النتيجة إن دفاع الزمالك بقى سداح مداح وأي عيل صغير معدي جنب الإستاد يحدف طوبه بقت تدخل جون والدفاع واقف يتفرج عليها .

- واخيراً خرج علينا الزمالك بفلتة عصره واوانه .. شتيبي ( جراف ) ولقينا الراجل عمال يخترع ويعجن في حاجات غريبة ويكفي ان نعرف بإنه لعب بـ 23 لاعب في 4 مباريات ..!!!!!! يا محمدي ...

- وإذا كان المدرب لحد دلوقت شكله نص كوم .. فلا يجب ان نُلقي عليه كل اللوم .. لإن مجلس إدارة الزمالك واخُص بالذكر السيد عضو مجلس الشعب المستثار مرتضى منصور .. فده لواحد يعكر مية النيل ويجيب أي نادي عاليه سافله من أسلوبة السوقي البعيد عن كل إحترام لأي شخص كائناً ما كان ...

وكفاية كده عشان ما نقراش بكره إن شوية زملكاوية عملوا زي الحيتان وراحو إنتحروا إنتحار جماعي .

تم تعديل 16 أكتوبر 2004 بواسطة se_ Elsyed

[Modest]

تحليل رائع يا كابتن محبط لماتش امبارح (قصدي مصيبة امبارح) و الماتشات القادمة على إيد أينشتاين.

معقولة مفيش و لا كورة واحدة سليمة ؟ و لا هجمة واحدة منظمة؟ ماتش كامل مافيهوش غير هجمة عنترية لشيكوبون و انتهت زي اخواتها.

شيكابالا الأعسر في اليمين و وراه وائل القباني :unsure: مدحت صانع ألعاب :angry: عبد الحليم و جمال حمزة مفيش بينهم سابق معرفة pp: و متخاصمين مع بتوع خط الوسط اللي متهيألي كانوا بيتفرجوا على الماتش زينا بالضبط rs: ... يطلع تامر عبد الحميد رمانة ميزان خط الوسط و ينزل بداله باك يمين .. يعني كان بييتكلم في ماتش تاني خااااااالص غير اللي قدامه .... فاكر نفسه لسه في المعسكر بيجرب في اللعيبة :D

الراجل أبيض يا ورد و بالكتير يدرب أي فرقة من بتوع الدورات الرمضانية... ده الزمالك هايشوف على إيده سنة سووووووووووووووده :rolleyes:

[kotoz9]

خلاص ياجماعة الزمالك فى الطراوة :rolleyes:

بس برضه ياجماعة شتيبى معذور فين اللعيبة الكويسة اللى يلعب بهم ماتش حلو.الفرق كلها كانت بدعم صفوفها باحسن اللعيبة الا الزمالك كان بيتخلص مما لديه من لاعيبة. بصراحة المسؤلية هى مسؤلية مجلس الادارة مش حد تانى

[yasovinas]

- بس إيه رأيك مش س س قال لكم إمبارح إن إنبي هايولع في فريق الزمالك ؟  :rolleyes:

- وكمان عايز أسمع رأيك في فريق دريم تيم الجديد ( الاهلي سابقاً ) أقصد يعني الأداء وطريقة اللعب .

وحظاظة في النادي .... وقد كان فبمجرد ما مشيوا الأتنين وجدنا الزمالك فريق مهلهل ومالوش كبير وكل لاعب في وادي ..

دخل حازم في متاهة حزن  وشكله هايقضي بقيت حياته في الإجتماعيات .

- نيجي للعندليب المحلي عبد الحليم علي اللي لم يتألق ولن يتألق إلا في وجود العميد متقاعد حسام حسن

لإن مجلس إدارة الزمالك واخُص بالذكر السيد عضو مجلس الشعب المستثار مرتضى منصور .. فده لواحد يعكر مية النيل

وكفاية كده عشان ما نقراش بكره إن شوية زملكاوية عملوا زي الحيتان وراحو إنتحروا إنتحار جماعي .

س س كلامك كبييير قوي وموزون والله كويس ان في فمصر ناس بتفهم وبتعرف تحلل كده امال الوكسة اللي احنا فيها دي من ايه يا جدعان

انا لو مسؤول عن الرياضه كنت خليتك تمسك المنتخب ولا تمسك الزمالك

بس عيبك الوحيد انك اهلاوي

[kfaya]

عشان مرتضى منصور يزيح كمال درويش من سكته ويركب مجلس الأدارة ..... لازم فريق الزمالك يتبهدل الموسم ده

يقوم الجمهور يصب غضبه على مجلس الأدارة الحالى و يطالب بالتغيير .....

مرتضى منصور هو السبب فى رحيل التوأم ( وش السعد على ازمالك حتى بدون لعب ) ..... وطنش و لم يعترض على احتراف بشير التابعى فى تركيا .... و هو رئيس لجنة التعاقدات و لم يقم بشراء اى لاعب جديد ( لاعب عراقى يمكن فى الطريق ) .....

للأسف سيتحقق هذا السيناريو بعد أول هزيمة للزمالك .... و سيبرز مرتضى منصور فى صورة المنقذ و يفسخ عقد المدرب و مش بعيد يجيب فاروق جعفر من بورسعيد , و يكسب بيه الأنتخابات ...

و اللى مش مصدق , هيشوفه مع منى الحسينى بعد كام يوم فى برنامج .. حوار صريح جدا ....

[R.M.G.]

الحقيقة ان الزمالك هو الزمالك من ايام محمد حسن حلمي دائما يعج بالمشاكل والمؤامرات والمتآمرين

كان في واحد اسمه ماكاي عمل معاهم شغل كبير وعلمهم يكسبوا الدوري ولأن صبيه كان فاروق جعفر أكبر متآمر كروي عرفته مصر فالصبي حب يزيحه من سكته فكانت مؤامرة ماتش الأهلي بتاعة 4/1 أو 4/2 المهم قلشوا الراجل

وبعدها مات الزمالك تقريبا لحد ماجاء عم اوتو وعمل للزمالك شكل ومنظر لحد ما ضرب حد ضربته وجت هزيمة الستة الشهيرة (ومع احترامي للأهلي العظيم فمن المستحيل للأهلي ان يفوز حتى على فريق السعيدية الثانوية بهذه النتيجة في الأحوال العادية)ولكن بسبب القذارة الزمالكاوية الشهيرة حدثت!!

ثم كابرال الذي لن يعوضه الزمالك والنهاية الحزينة لجهده مع الزمالك وبدلا من ان يمسكوا به بأيديهم واسنانهم طرقعوه وكلوا فلوسه وكانت المسائل في طريقها للفيفا لولا الستر وقام الجهبز مرتضى بطرده من النادي!!

ثم فينجادا العالمي والذي عومل اسوأ معاملة اثناء تلميع روقه

ولاعتبارت انتخابية لا رسيت على روقة ولا فينجادا وجابو شتيبي واعتذار للأخ محبط فهو مخترع الفركوش لا الفنكوش فقد استطاع في فترة وجيزة فركشة الزمالك ونكشه ولم يكن الأهلي بحاجة لكل هذه التعاقدات ويكيفة فقط شتيبي وكأن الزمالك يقو للأهلى : بوظنالك كل اللي انت عملته احنا بنتغلب من أي حد وماكانش له لزمة الفريق الذهبي اللي انت عامله ده

وياخسارة فلوسك يا حمدي!

[Contra Mundum]

يااااااه .... دى الكورة طلعت صعبة قوى يا جدعان ....

بغض النظر عن الانتماء الكروى...

نفسى قبل لما اموت اشوف مدرب اجنبى او محلى فى مصر بيلعب اللعيبة فى مراكزهم من غير سياسة توزيع المراكز باليانصيب ...صدقونى مش عيب ان ده يحصل ....

[se_ Elsyed]

س س كلامك كبييير قوي وموزون والله كويس ان في فمصر ناس بتفهم وبتعرف تحلل كده امال الوكسة اللي احنا فيها دي من ايه يا جدعان

انا لو مسؤول عن الرياضه كنت خليتك تمسك المنتخب ولا تمسك الزمالك

بس عيبك الوحيد انك اهلاوي

يا عم ياسو هي لا كيميا ولا فكاكة ... أي مشجع كوره قاعد على قهوة المعلمة جمالات اللي في السيدة زينب بيفهم أحسن مننا وبيقول نفس الكلام ..

لكن مين يسمع ومين ينفذ ومين يشتغل بضمير للصالح العام مش لمصلحته الشخصية بس ؟