لو معاك 5 مليار هتعيش إزاي؟

[Dreamwithme]

قرأت موضوع لطيف عن أصحاب المليارات وهو التالي:

يقودون سيارات قديمة بأنفسهم ويسكنون منازل بسيطة

5 من أصحاب المليارات في العالم يعتزلون الكماليات ويعيشون حياة متواضعة

قد تكون حلمت على الأقل مرة واحدة في حياتك، وربما مرة في اليوم أو الأسبوع، باقتناء الكثير من الأموال، ولكن السؤال هو: ماذا كنت ستفعل بتلك الأموال لو كانت تُقدَّر بالملايين أو حتى بالمليارات؟ فهناك بعض أثرياء العالم يعيشون حياتهم بشكل طبيعي جداً، ليظهروا طرق عيشهم ونظرتهم إلى الحياة.

وقد كشفت موسوعة الاستثمار الإلكترونية "إنفستوبيديا" الكندية وكذلك عدة مواقع أخرى، ثروات خمس من أغنى الشخصيات في العالم، وكيف يعيشون حياة متواضعة رغم ثرائهم الواسع.

فمن جهته قال رجل الأعمال وأشهر مستثمر أمريكي في البورصة الأمريكية رئيس مجلس إدارة شركة "بيركشير هاثاواي"، وارين بافيث، والذي تبلغ ثروته 50 مليار دولار أمريكي حسب مجلة "فوربس" لعام 2011، إنه يتجنب تملّك المنازل الفاخرة والبحث عن الكماليات، فهو لايزال يعيش في منزله المتواضع الذي اشتراه قبل 50 عاماً بـ31,500 دولار في مدينة أوماها بولاية نبراسكا الأمريكية.

ويقود بافيت سيارته بنفسه، ويقصّ شعره في صالون حلاقة بـ12 دولاراً، ويشتري الجرائد من متجر محلي صغير بنفسه.

أما رجل الأعمال المكسيكي من أصل لبناني كارلوس سليم، والذي يعمل في مجال الاتصالات واحتل المرتبة الأولى حسب مجلة "فوربس 2011" بثروة قيمتها 74 مليار دولار، فهو كنظيره بافيت لا يبحث عن الكماليات ولا يمتلك طائرة خاصة أو يختاً، وعاش في نفس المنزل أكثر من 40 عاماً ويقود سيارة مرسيدس بنز قديمة بنفسه.

وبلغ إنجفار كامبراد وهو المؤسس السويدي لشركة "إيكيا" للأثاث، النجاح بأسعار معقولة، وبحسب كامبراد فمعرفة كيفية توفير المال ليست فقط لزبائنه بل هي قيمة شخصية عالية، وتم نقل حكمة عنه قائلاً: "إن الناس الذين يشترون من إيكيا لا يقودون السيارات الفارهة أو يقيمون في الفنادق الفاخرة، وهذا ينطبق على مؤسسها كذلك".

وبيَّن أيضاً أنه يسافر على الدرجة السياحية عند ذهابه لرحلة عمل، وإذا أراد شيئاً من المدينة فيأخذ الحافلة أو يقود سيارته من طراز "فولفو 240 جي إل" التي يبلغ عمرها 15 عاماً.

أما الملياردير الأمريكي الأيرلندي تشاك فيني فله شعار شخصي يتبعه وهو: "مهمتي أن أعمل بجهد، وليس الثراء"، وهو المؤسس المشارك لشركة "السوق الحرة للمتسوقين" ووضع معظم أمواله في مؤسسة "أتلانتيك" الخيرية الخاصة به، بالإضافة إلى إعطاء أكثر من 600 مليون دولار لجامعة كورنيل التي درس فيها.

وفيني من مستخدم وسائل النقل العام بمدينة إليزابيث بولاية نيو جيرسي الأمريكية، ومن مسافري الدرجة السياحية ويشتري ملابسه من محال غير فاخرة، ولا يسرف ماله في شراء أحذية كثيرة، وقال معلقاً: "يمكنك فقط ارتداء زوج واحد من الأحذية في وقت واحد"، وقد ربى فيني أولاده بنفس الطريقة حيث جعلهم يعملون في الصيف كمعظم المراهقين في أمريكا.

أما مؤسس سلسلة "ماير" لمحال السوبر ماركت فريدريك ماير، الذي يبلغ عدد متاجره 197 فرعاً ويعمل فيها 72 ألف موظف، فيشتري السيارات بأسعار معقولة ويسكن في فنادق بأسعار متوسطة عند السفر للعمل.

وتبلغ ثروة ماير - بحسب فوربس - لهذا العام حوالي 5 مليارات دولار، وقد ركّز على صرف أمواله في التبرعات.

فسرحت كده وفكرت ياتري يا هل تري يابنت يادريم لو معاك 5 مليار حياتك هتختلف إزاي؟

حابة أسمع أفكاركم قبل ما أقولكم رأيي....ماتبخلوش عليا يا أصحاب المليارات :P

[الدكتور ياسر]

5 مليار ايه يا أخت دريم .. الطمع وحش .. كفاية اوي 5 مليون .. عشان بس الحسد , و من اين لك هذا؟؟ يدوب نبنى كام عمارة و نعيش على الايجار

[احمد رضوان]

لو معايا المبلغ ده حاديه لجماعة 6 إبريل وأبلغ عنهم واعيش زي ما انا على فيض الكريم

[ViralMind]

مش هنكر انى بحلم فى يوم من الايام اسمى يتصدر فوربس كمؤسس لشركة زى الناس دى.. :closedeyes:

و لكن الحلم مش علشان الفلوس.. فيه كلمة جميلة مكتوبة فى المقال:

أما الملياردير الأمريكي الأيرلندي تشاك فيني فله شعار شخصي يتبعه وهو: "مهمتي أن أعمل بجهد، وليس الثراء"

الجملة دى تتاقل بالدهب و الالماس.. دول الناس اللى بيقولوا عليهم workaholic

الفلوس موجودة لمهمة محددة.. و هى تحقيق الاهداف بتاعتنا... زى بيت ملك و يكون واسع و كويس.. عربية معقولة.. تعليم افضل لاولادنا.. حياة كريمة... لكن لما تكتر عن كده, بتفقد قيمتها الحقيقية, و ده السبب ان فيه ناس كتير فى امريكا فهموا الحكاية دى و علشان كده بيتبرعوا بجزء من دخلهم السنوى.

تم تعديل 13 سبتمبر 2011 بواسطة ViralMind

[mamdowh]

أول حاجه هاقول الحمد لله, ثم ابدأ بأه أعيش وأعمل اللى عايزه والخير أول حاجه طبعاً علشان ربنا يبارك فيهم

[Simba]

هتجوز اربعة ... بس خلاص

[Ahmed Anwer]

طيب أيه رأيكم في الشيخ حمد بن حمدان أحد أفراد العائلة الحاكمة لإمارة أبو ظبي

يمكن مشاهدتها من الفضاء الخارجي: ملياردير يكتب اسمه بحروف عملاقة على جزيرته الخاصة

راجل جميل جدا ،،، ينطبق عليه المثل اللي معاه قرش محيره يجيب حمام و يطيره

[نوران]

هتبرع ب 4,5 للصومال

وهشيل ال500 مليون في الدولاب واعيش بقي

أصرف بقي وادلع العيال

واسيبلهم الباقي بعد عمر طويل ان شاء الله

إيييييه

الله يجازيكي يا دريم

خليتي الواحد يحلم

[Salwa]

تعرفى يادريم ..

موضوعك ده يعنى فعلا صدفة غريبة جدااااا

لنا يومين ابنتى الكبرى وانا نتحدث عن هذا الموضوع ..والسبب؟؟

هى ذهبت كالعادة لقضاء اسبوعين فى احدى القرى القريبة .

هى قرية بها عائلات محدودة ........كلهم بدون اى استثناء من اصحاب الملايين فعلا .......اقل واحد عنده ميتين وخمسين الف يورو سيولة غير منزله واراضيه.

الشئ الغريب جداااا.....ان كلهم يزرعون اراضيهم بنفسهم .

تقول لى ...ياماما نفسى تشوفى الملياردير اللى ماشى بالقميص برة البنطلون من ناحية والناحية التانية جوة البنطلون وكأنه مجرد اجير ......وف ايده شوية حاجات واخدها من الأرض والا شايل ف سبت شوية خضار ..حاجات عجيبة ....وزوجته بتعمل مربات ومخللات وكل ده من مزروعاتهم...اشجار عندهم ونخيل وكل شئ ..

ابنتى رأيها ........دى ناس خلاص متعرفش تعيش عيشة الأغنياء او ( ينزهوا نفسهم ) ليه مش بيروحوا يسافروا ويشوفوا الدنيا؟؟

مغيروش العربية لهم عشرين سنة وتشوفيها تقولى جديدة ..

وأرد عليها.......لكنهم مش بخلاء ........وبيوزعوا كتير من كل اللى عندهم...هما مش محتاجين ينزهوا نفسهم بطريقة تانية .مش محتاجين يسافروا او يتفرجوا على بلاد تانية ..

هما حاسين بالقناعة ..

شوفى يادريم...

جميل ان يبقى عندك مليار( مش خمسة ؟؟؟) ....بس الأجمل انك تفكرى ان حد يشاركك الاستمتاع بالفلوس دى ..

يعنى مش عايزة تانى اقول ..(( اخواننا....اللى عندهم ملايين جت لهم فجأة ...فلوس من تحت الأرض محدش تعب فيها ...هههه )) شوفى بيصرفوا فلوسهم ازاى ؟؟؟؟

ياعلى المغنيين ياعلى تملك كراسى دهب واعمدة فضة او سيارات فارهة تتحط ف جراجات مقفولة ..وتتفرجى على العجب.

يعنى اللى عنده مليارات ...وعنده ضمير......لازم يساعد غيره ويعمل حاجة مفيدة للناس بالفلوس دى ...ومش شرط يحرم نفسه وف نفس لوقت يتصرف بسفه.

احلى حاجة انى اكون عايشة بدون اى قلق .....واكون راضية عن نفسى

لو معايا مليار ؟؟؟....مش خمسة ؟؟؟

اكييييد حاعيش بطريقة احسن حسب مفهومى انا ...

حاعمل مستشفى مجانى او معهد تأهيل مهنى او اى شئ يرضينى واحس بيه انى اسعدت غيرى .

طبعاااااااا.............اول شئ اكتب لولادى ربع مليار ..

بس.

مش جدعنة انى ادى لولادى فلوس كتير متعبوش فيها ...

وده بقى موضوع كبير لوحده.....هههههههههههه

المفروض نسيب لولادنا جزء بسيط وهم يعتمدوا على نفسهم ويكبروه بقى بطريقتهم..

الخلاصة يعنى .......

الأغنياء جدااا وعندهم اخلاق ..بتبقى عنيهم مليانة زى ما بيقولوا ..وبيعيشوا بكل بساطة وهدوء .

لكن؟؟

الأغنياء جدااا ومش بيشبعوا وهما اساسا كانوا محرومين....مفيش منهم فايدة ...وبس تلاقيهم بيحاولوا يظهروا بمظاهر خادعة ...على طول يهمهم المظهر مش الجوهر .

مساء الرضا ... :clappingrose: :clappingrose:

[Salwa]

لو معايا المبلغ ده حاديه لجماعة 6 إبريل وأبلغ عنهم واعيش زي ما انا على فيض الكريم

ههههههههههههه

حلوة قوى ... :clappingrose: :clappingrose:

[عماد حمدي]

أووووووووووبس 5 مليار !!

أول حاجة نصهم كدا ( 2.5 مليار ) متوزعين علي الدول المسلمة الفقيرة و طبعاً فلسطين المحتله ..

النص الثاني بقا ..

الثلاث أرباع أستثمار عقاري ( هبني برجين بالظبط ) هخصص نصهم إيجار و النص التاني تمليك ..

و الربع الأخير هفتح شركة استيراد مودا غذائية و فواكه أي حاجة فيها أكل و شرب ..

و نبدأ نشتغل بقا مممم !

طبعاً كل دا في الإمارات مش في مصر ، دا لو عايز أنجح ياعني و محدش يضايقني من أين لك هذا و الباقي انتوا عارفينه

[نورالعين]

أنا شخصيا حسافر كل بلاد العالم

يعنى مش حسيب بلد

مش بس للفسحة وان كانت سبب

بس كمان لخدمة البشرية

يعنى ممكن اكون في الصومال او جنوب افريقيا او اي بلد تحتاج مساعدة

مش عارفة ليه بيجذبني الاجانب اللى بيقدروا يقدموا خدمات من هذا النوع في هذه البلاد

احساس جميل انك تقدر تعمل شيئ له معنى

انك تقرب منهم وتجعلهم يثقوا بك

وكمان للاستجمام والفسحة ورؤية معالم وثقافات البلاد المختلفة

بس فين الفانوس السحري

ميرسي دريمي على حلم للحظة

[عماد حمدي]

سوري نسيت إضافة مهمة جداً ..

المال فتنه كما قال الله تعالى ( واعلموا أنما أموالكم وأولادكم فتنة وأن الله عنده أجر عظيم ) ..

أخاف أن تصيبني فتنه المال ، و أرجع أقول يارتني ، ما أنا كنت عايش كويس ..

المال لا يعني السعادة .. يارب إجعل المال في يدي و ليس في قلبي ..

ممكن تدخلوا علي جوجل تقروا شوية عن ( فتنه المال ) ،،

تم تعديل 13 سبتمبر 2011 بواسطة omda2006

[pink rose]

لو معايا خمسة مليار

صلوا على النبي

هاشتري ارض 100 فدان في الصحرا

هادخلها المرافق و الذي منه

هاخصص ربعها زراعة هاجيب مهندسين زراعيين اوائل زراعة و دكاترة زراعة اللي عاملين ابحاث مرمية في معهد البحوث و اجيب فلاحين بجد مش الافنديات اللي لابسين بناطيل لا فلاحين من اللي لسا محافظين علي هويتهم

و يقعدوا مع بعض بقي يبظبطولي ال 25 فدان دول بحيث الارض دي تطلع محصول يعملي اكتفاء ذاتي في المدينة اللي هابنيها على 25 فدان

اهم ما في الموضوع ان الزراعة تكون بسماد عضوي متاخد من مزرعة العجول اللي جيالكم في الكلام عنها

كمان هاجيب الاخوة بتوع الانتاج الحيواني و نعمل مزرعة تسمين عجول و نفس المطلوب اكتفاء ذاتي من الثروة الحيوانية

مزرعة على مستوي عالي و اجهزة حلب متطورة عشان تغطي متطلبات مصنع منتجات الالبان اللي هافتحه في المدينة

نيجي بقى للمشروع السكني مجموعة عماير كلها نفس التصميم العمارة 6 ادوار علي 3 شقق

بين كل مجموعة عماير حديقة فيها قعدات حلوة و العاب للاطفال

نادي محترم فيه كل الرياضات اللي تتخيلوها و مدربين علي اعلي مستوي لان دا هايخدم على مجموعة المدارس و الجامعة اللي ناوية افتحهم

مدارس من اول كي جي لحد ثانوي مش مدارس عادية نووو

هاجيب اكبر دكاترة في مجال التعليم و الاجتماع و علم النفس يحطولي برنامج و مناهج لخلق جيل عنده قيم و اخلاق متزن و متدين محب للعمل

نيجي بقي للمدرسين هاجيب شباب الخريجين من كليات التربية الحاصلين علي امتياز في الكلية و معاهم علي الاقل ماجستير في تخصصهم و كمان هاعملهم اختبارات نفسية و تربوية اللي هاينجح فيها هو اللي هايتعين

و دول سكنهم في المدينة هايكون جنب المدرسة و عليا انا كادو المهم يطلعولي المنتج اللي عاوزاه زي ما حددته فوق

الجامعة نفس الشئ بالنسبة للدكاترة و المعيدين عشان عاوزة المنتج يكون انسان مؤهل لسوق العمل و الابداع في مجاله

هاتقولولي الجامعة دي هاتتكلف كتير هاقولكم هانعوضها في بيع الشقق ما تقلقوش هههههههههه

هاتفق مع الحكومة اني اوفرلها مكان زي مجمع التحرير كده بس مصغر فيه مكاتب لكل ما يحتاجه المواطن من اوراق و طبعا يكون موظفينه من ساكني المدينة عشان لا الموظف يتعب و لا المواطن اللي عاوز ورق حكومي يتمرمط في المشاوير

طبعا مسجد و كنيسة دا شئ مفروغ منه في المدينة

الفقراء و اعمال الخير ليها نصيب طبعا لاني هاقتطع مبلغ اعمله زي وقف يعني مشروع دخله بالكامل للفقراء بس مش مجرد فلوس تتوزع لأ مشاريع يشتغلوا فيها دا افيدلهم

الا صحيح هما 5 مليار جنيه و لا دولار يا دريمي؟؟؟؟؟؟

خير اللهم اجعله خير زي ما اكون كنت باحلم

[ابو محمد بن مصطفي]

هجيب 5 كيلو مانجة فص واقعد امزمز فيهم وانا بفكر اعمل ايه بالخمسة مليار

وطبعا قبل ما اخلص المانجة اكون صحيت من النوم

[عصام أبوالفتح]

هتبرع ب 4,5 للصومال

وهشيل ال500 مليون في الدولاب واعيش بقي

دولاب ايه ده اللى هايشيل 500 مليون !!!!

اذا كان بوتجاز قضية طلعت مصطفى بجلالة قدره واكيد 6 شعله مش اى حاجة كان طاقته الاستيعابية 2 مليون دولار يعنى 12 مليون جنيه

فاكرين سؤال زمااااااااااااااااان عن هاتعمل ايه بمليون جنيه كان بيسهرنا ازاى ؟ ونقعد نحكى ونتحاكى واحلااااااااام ومسلسل رحلة المليون وكنبة سنبل دى اللى ملاها فى الاخر وذل لطفى ... هههههه

كلنا اكيد حلمنا بالكنبة ... وفى بيوت كتير اعرفها اشتروا الكنبة السحارة مخصوص استعدادا للضيف السعيد اللى هايجى ان شاء الله فى يوم من الايام ...

ومن سنتين فى قضية طلعت مصطفى صدمنى موضوع ان 12 مليون بقوا ممكن يخلوا بوتجاز ... فأول حاجة عملتها اشتريت بوتجاز جديد وقعدت احلم بيه مليان :wub:

من غير قتل طبعا .. هههههههههه

تقوموا دلوقتى تقولولى 5 مليار ... ده كلام برضو ... bsh:)

أحطهم فين دول ؟ !!! ... ده ولا خزنة عم دهب

[Dreamwithme]

ياااااااااااااااه ده أنتم يا جماعة ماصدقتم حد يقولكوا أحلموا وبدأتوا :blink:

بس بجد بجد كلام رائع وأحلام خلتني مبسوطة وحسيت إن الدنيا بخير لأنكم كلكم مانستوش اللي حواليكم

كان نفسي بجد أدي كل واحد فيكم

أيه مستنيين ال5 مليار :P

لأ :protest:

أنا كان نفسي أدي كل واحد فيكم نقطة خضراء بس للأسف العين بصيرة والأيد قصيرة

لكن فرحت بيكم كلكم والله ولكل واحد فيكم

5 مليار ايه يا أخت دريم .. الطمع وحش .. كفاية اوي 5 مليون .. عشان بس الحسد , و من اين لك هذا؟؟ يدوب نبنى كام عمارة و نعيش على الايجار

لاااااااااااااااااااااااا لاااااااااااايادكتور ياسر مش مصدقاك خالص

يعني ياسيدي مستكتتر علينا 5 مليار حتي في الحلم

احلم ياراجل الحلم معليهوش جمرك

[شرف الدين]

شوفي ا أخت دريم

لو معايا المبلغ ده ... باختصار شديد .. هخلي 5 مليون منه ليا .. اشطب بيهم البيت بتاعي في القاهرة الجديدة وأكمله .. وابني كمان بيت كويس في القرية اللي أنا اتولدت واتربيت فيها .... واحط عليه يافطة رخام اكتب عليها ... ( منزل الحاج فلان ) .. اللي هو والدي ( الله يرحمه )... وبعدين أظبط مصدر كويس للدخل ( مشروع بسيط يعني في مجال عملي ) .. يدخل لي دخل كويس يعيشني أنا وأسرتي حياة كريمة.

وأما الباقي ... هبتدي أشوف ايه المشاريع اللي قريتي واللي القرى اللي جنبها واللي المدينة عاصمة المحافظة بتاعتي محتاجاها .. واللي المحافظة بتاعتي ككل محتاجاها .. وهجيب شركات عالمية كبرى هي اللي تتولى عمل المشاريع دي وأقدمها للدولة مجانا ... بس.

[Dreamwithme]

لو معايا المبلغ ده حاديه لجماعة 6 إبريل وأبلغ عنهم واعيش زي ما انا على فيض الكريم

يا سلام علي القلب الأبيض يا أستاذRadws

خد دي بس حاسب عشان مسمومة ;)

مش هنكر انى بحلم فى يوم من الايام اسمى يتصدر فوربس كمؤسس لشركة زى الناس دى.. :closedeyes:

و لكن الحلم مش علشان الفلوس.. فيه كلمة جميلة مكتوبة فى المقال:

أما الملياردير الأمريكي الأيرلندي تشاك فيني فله شعار شخصي يتبعه وهو: "مهمتي أن أعمل بجهد، وليس الثراء"

الجملة دى تتاقل بالدهب و الالماس.. دول الناس اللى بيقولوا عليهم workaholic

الفلوس موجودة لمهمة محددة.. و هى تحقيق الاهداف بتاعتنا... زى بيت ملك و يكون واسع و كويس.. عربية معقولة.. تعليم افضل لاولادنا.. حياة كريمة... لكن لما تكتر عن كده, بتفقد قيمتها الحقيقية, و ده السبب ان فيه ناس كتير فى امريكا فهموا الحكاية دى و علشان كده بيتبرعوا بجزء من دخلهم السنوى.

كلامك جميل ياأستاذ فيرالميند والجملة اللي اقتبستها من كلام تشك فيني فعلا معبرة

ربنا يحققلك كل اللي بتتمناه بس ساعتها ما تنساش أصحابك وحبايبك في المحاورات

بس هأختلف معاك في موضوع workaholic

الحياة مش كلها شغل ....والنجاح إنك تحافظ علي حياتك كلها متوازنة

ربنا يكتبلك كل خير

هتجوز اربعة ... بس خلاص

أنت بالذات يا أستاذ سمبا بالرغم من إنك صديقي لكن مش هأديك ولا مليم

ياعم أنوي نية خير مالها أم العيال هو أنت قادر علي واحدة لما هاتجيب لك 4 يعملولك صداع bsh:)

أنا خايفة علي مصلحتك

ربنا يرزقك السعادة فين ماتكون

طيب أيه رأيكم في الشيخ حمد بن حمدان أحد أفراد العائلة الحاكمة لإمارة أبو ظبي

يمكن مشاهدتها من الفضاء الخارجي: ملياردير يكتب اسمه بحروف عملاقة على جزيرته الخاصة

راجل جميل جدا ،،، ينطبق عليه المثل اللي معاه قرش محيره يجيب حمام و يطيره

بصراحة واو فكرة غير تقليدية بالمرة هو طبعا فلوسه وهو حر فيها بس ياتري أعماله في خدمة المجتمع أخبارها أيه؟

أنا ما أعرفش بصراحة بس أتمني يكون له يد في عمل الخير

تم تعديل 13 سبتمبر 2011 بواسطة Dreamwithme

[Dreamwithme]

أول حاجه هاقول الحمد لله, ثم ابدأ بأه أعيش وأعمل اللى عايزه والخير أول حاجه طبعاً علشان ربنا يبارك فيهم

ربنا يارب يقدرك علي فعل الخير ويسعدك يارب

هتبرع ب 4,5 للصومال

وهشيل ال500 مليون في الدولاب واعيش بقي

أصرف بقي وادلع العيال

واسيبلهم الباقي بعد عمر طويل ان شاء الله

إيييييه

الله يجازيكي يا دريم

خليتي الواحد يحلم

جدعة يانور حسبتيها صح ربنا يكرمك يارب

تفكيرك قريب من تفكيري جدا