لو عجبنا الريس يبقى ايه الحل؟؟

[pink rose]

سؤال خطر على بالي

لو انتخبنا رئيس جديد

و طلع حد محترم و نفذ البرنامج بتاعه اللي انتخبناه عشانه

و خلصت الفترة الاولى و تم اعادة انتخابه تاني

و الراجل شغال تمام و مصر بقت فل على ايده و الاغلبية راضية عنه تماما

قوم جت خلصت فترة المدة التانية

و احنا عاوزينه تاني

في الوقت دا يحصل ايه؟؟؟؟؟

[لماضة مصرية جدا]

السلام عليكم و رحمة الله و بركاته

كنت لسه سامعة مصطلح عجبني اوي اسمه "الخيال السياسي"

و ان الحل للموقف و الازمة اللي بتمر بيها الثورة محتاج شخص يكون عنده مش بس حنكة سياسية بس كمان خيال سياسي لان وقت الثورة هو الوقت الانسب ان الناس تاخد كل خطوة جريئة...اومال يعني هتبقي شاي بلبن مش ثورة

المهم

سؤالك طبعا عملنا قفزة جبارة جدا و ينطبق عليه المصطلح اللي قولتلك عليه

شخصيا وجهة نظري بشوف فيها شقين

1:- معنديش مشكلة مع شخص اي رئيس لان المفروض اللي بيحكمني هو برنامج الرئاسي المعلن عنه في حملته الانتخابية و بالتالي مدي تحقيقيه لبرنامجه ده هو اللي بيضمن وجوده لعدد معين من الفترات الرئاسية

2- تواجد شخص ما في نفس المكان لفترة اكتر من (3 سنين....انا بقيسها علي نموي المهني و تطوري في مهنتي) بحس انه بيقتل جواه روح المغامرة و ملكة الابجاع و الرغبة في احداث تغيير و بيتحول لكونه مجرد موظف روتيني...ضيفي علي ده ان احنا في ثقافة بتقولك اللي نعرفه احسن من اللي منعرفوش...يبقي دايما هيبقي فيه تفضيل للوش المألوف اللي بناخد عليه...و انا شخصيا ضد ده تماما

3- بشوف ان مصر فيها من الثراء الانساني انها تقدر "تولد" ناس بافكار و رؤي و اتجاهات و خصوصا ان البلد دلوقتي في حالة بناء يبقي طالما اللي جاي هيبقي عندي رؤية تخدم البلد مش مصالحه الشخصية يبقي اي "وش" هيجي في المكان ده اكيد هيساعدنا ان احنا نزق العجلة اللي احنا مش عارفين كل شوية تفس مننا و تروح فين

عارفة يا بينكي انا اللي خايفة منه مش ان الريس يعجبنا

ان اللي خايفة منه ان الريس ميعجبناش وة نفضل طول الوقت متقسمين دول مع ...و دولم ضد و ننسي كوووولنا ان الريس ده مجرد شخص مش اله...مجرد ترس في عجلة كبيرة اوي اسمها مصر

و محتاجة اللي يبص عليها مش يبص ع الترس الصغير دوت

صباحك....خيال سياسي...محتاجينه اوي

[pink rose]

ان اللي خايفة منه ان الريس ميعجبناش وة نفضل طول الوقت متقسمين دول مع ...و دولم ضد و ننسي كوووولنا ان الريس ده مجرد شخص مش اله...مجرد ترس في عجلة كبيرة اوي اسمها مصر

لا الحتة دي انا مش خايفة منها يا ريهام خالص

ما حدش تاني في مصر هايقبل برئيس مش عاجبنا كولنا او اجتمعت الاغلبية على رفضه

خلاص خلصنا من دي و مش هانعيده تاني

و زي ما قولت ان الرئيس بينفذ برنامجه اللي اخترناه عشانه و مصر انقلت نقلة محترمة

يعني مثلا تركيا كل مدة برلمانية بيختاروا اردوغان ليه؟؟؟

لانهم شايفين البلد وصلت لايه ببرنامجه و مجهود حكومته

و هو دا اللي اقصده

تفتكري لو استمر اردوغان على نفس النهج الناس هناك في تركيا هاتختار حد غيره او غير حزبه

دا سؤالي هنا

لو الرئيس ببرنامجه دا نقلنا نقلة تانية و ممشي البلد زي الفل

و خلصت مدته التانية

و احنا مازلنا مقتنعين بيه و عاوزينه

ساعتها يكون ايه الحل

هل وقتها يتم انتخاب رئيس تاني كاسم بس و الرئيس اللي عاجبنا يبقى رئيس وزراء

و لا ننتخب حد تاني و بعد فترة قصيرة يتم عمل انتخابات استثنائية و نرجع ننتخب تاني الرئيس القديم

مش عارف بصراحة

[ابو محمود]

الرئيس اللي جاى مطلوب منة انة يكون امين وابن حلال وبيحب مصر مش نفسة ويحولنا الى دولة متقدمة دستوريآ او بمعنى ادق دولة مؤسسات صح ويكون هو والاحزاب بمجلس الشعب هيئة او ماشابة للامن القومى ورسم السياسات المستقبلية والتخطيط لمدد قادمة من السياسات تعيق اى رئيس قادم على الانحراف عن تنفيذها ويعاونة فيها كل الموثوق لهم بالبنان والفلاح من ابناء الشعب المخلصين وبكدة مش هنخاف على شيء ابدآ لان الرئيس هينفذ احلامنا القادمة وهيبقى كل من يعتلى المنصب وراة مشاغل يحققها وهما فترتين والباقى بقى على الشعب يأما يقولة برة ياما يقولة شكرآ جزاكم الله خيرآ استريح علشان الاحلام اللي هتتحقق عايزة دم جديد وراجل لسة عندة عافية وهمة وانا ارشح ان التغيير واجب علشان مهما اعطانا من جهدة ما يفتكرش اننا عبيد عندة ويقوم يتحكم فينا تانى

[Ahmed Anwer]

لو إنسان محترم هيكون مجهز كادر أو أكثر تحت أيديه و بنفس كفاءته

و ننتخبهم ثقة فيه و إحساسا بإنجازه و الرغبة في إستمرار خططه

بس بدم جديد و نشاط جديد و حماس جديد

زي ما عمل لولا دي سيلفا و مهاتير محمد

و عموما الإحتمال ده بعيد جدا

الرئيس القادم ( إن شاء الله ) لو شوفناه يعني

هيشتم و هيتهزق و هيطلع عينه و مش هيعجب حد و مش هيرضي حد

و مش هيعرف في أربع سنين بعد خراب 60 سنة يحقق إضافة ملحوظة

[ابراهيم عبد العزيز]

اذا أعجبنا الرئيس القادم وانتهت فترتي ولايته نقول له شكرا على ما قدمت ونخرجه مخرجا حسنا, ونبدأ فى الانتخابات لاختيار خليفته

فترسيخ المبدأ والنظام أهم من اى شخص مهما كان

[Simba]

لا طبعا معترض علي الفكرة دي جدا ومش هحترم اي رئيس يحاول يغير الدستور تحت اي ضغط سوي ضغط من اهوائه هو وشلته او ضغط شعبي اللي غالبا هيكون مصطنع ومش هحترم الناس اللي تنزل تنادي بكده

والا هنرجع تاني لتفكير العبيد ان ال 85 مليون ولا شكلهم هيبقي 95 مليون مش فيهم حد ينفع يحكم مصر غير جلالته

لو ده هيكون تفكير الناس بعد سنين يبقي بيعملوا ديكتاتور تاني وساعتها مش هيورثها لابنه ده هيورث البلد لابن خالته

[مغتربة]

اذا أعجبنا الرئيس القادم وانتهت فترتي ولايته نقول له شكرا على ما قدمت ونخرجه مخرجا حسنا, ونبدأ فى الانتخابات لاختيار خليفته

فترسيخ المبدأ والنظام أهم من اى شخص مهما كان

بالضبط كدا

احترام المبدا اهم

و مصر الى طلعت واحد كويس بالشكل دا اكيد قادره تطلع غيره الوف مش ميات بس

عايزين نبطل الناس تفكر بطريقه الى نعرفه احسن من الى منعرفهوش و متفرحش بالى رايح غير لما تشوف ال جى

الجى اكيد هيكون على نفس الدرجه من الجوده لو تم انتخابه بطريقه صح

ما دام قدرنا نختار ماحد كويس يبقى نقدر نكررها تانى

تجديد الدم و الفكر افضل من ركوده

لانه مهما كان كويس هيجى وقت و هيكون خلاص قدم كل الى عنده فكرا و جهدا و هيفضل باقى الوقتيا اما يعيد فى نفسه او يسحب من رصيده

و نرجع تانى للركود الفكرى الى هو سبب كل البلاوى الى فى مصر دلوقتى

عايزين نعود الحكام ان احنا اتغيرنا بجد و بطلنا عاده فرعنه الحاكم حتى يصدق نفسه

[فوس فوس]

.لو موظف في مكان ما، اداءه ممتاز ومحقق نتائج، لا يتم الاستغناء عنه إلا لاسباب تمنعه من القيام بماهمه. ولو كفىء، توكل له صلاحيات اضافية تسهل له انجاز تحقيق النتائج. عملية التغيير للتغيير لها سلبيتها اكثر من ايجابيتها.

ورأي ان اهتمامتنا وأولويتنا حول نهضة البلد، وليس ديكتاتورية الرئيس

وعشان نحمي نفسنا لازم الدستور يعطي الشعب الحق في خلع الرئيس وانتخاب غيره في اي من فترات ولايته...وأن يكون للرئيس فترات من الرئاسة قابلة للتجديد.