الأهلي هوه هوه بيكسب بره وجوه

[se_ Elsyed]

واصل فريق الأحلام ( الاهلي سابقاً f((: ) سلسلة إنتصاراته في الدوري العام المصري وحصد النقطة رقم 12 من 4 مباريات حسمها جميعها لصالحه ..

فبعد ان أفتتح الدوري بالفوز على أسمنت السويس على ارضه 3-0 ثم اتبعها بالفوز على الترسانة 2-0 ثم المنصورة 1-0 على أرض الاخير .. ها هو ذا يفوز بالامس على نادي الإتحاد السكندري 3-2 في مبارة دراماتيكية ..

- فبعد ما كتبته الصحف وقالته وسائل الإعلام عن لاعبي النادي الاهلي والعروض الجيدة التي يقدمونها .. وكعادة اللاعب المصري اعتلاهم الغرور وبدأوا مبارة الأمس بمنتهى الإستهتار بالخصم المترنح والذي يتذيل جدول الدوري بدون نقاط وبثلاثة هزائم .. وإذ به يُفاجيء الأهلي بأداء جيد وإن عابه الدفاع المستميت ولكن أستطاع لاعبو نادي الأتحاد الصمود أمام هجمات لاعبي الاهلي وتقدموا عليهم في الشوط الأول بهدف دون رد .. ثم اتبعوه بأخر في الدقيقة الرابعة من الشوط الثاني مما أصاب جماهير الاهلي بالصدمة والدهشة ولكن كانت هناك ثقة في ان الاهلي يستطيع التعويض في أي وقت ، وفي الشوط الثاني فاجئنا المديرالفني للأهلي بتشكيل مجنون ... فقد أفرغ خط الوسط والدفاع وأستبدلهم بمهاجمين .. حتى أصبح الفريق يلعب بسبعة مهاجمين دفعة واحدة في مغامرة جريئة ... ولكنه حقق ما كان يصبو إليه فتاولت الهجمات من كل الجهات وامطر لاعبو الاهلي مرمى الإتحاد بثلاثة أهادف متتالية ... لتتنفس جماهير الأهلي الصعداء ويحصل الفريق على 3 نقاط غالية يتصدر بها الدوري بلا منازع .

في إنتظار مبارة الاهلي امام المصري البورسعيدي يوم الجمعة القادم في تمام الساعة التاسعة بتوقيت القاهرة ... والتي اتوقع أن تكون موقعة حربية نظراً للعداء الذي تحمله جماهير بور سعيد للأهلي وجمهوره - دون مبرر - وإن كان فريق الاهلي سيلاعب فريقاً أخر من لاعبيه .. لأن هناك أكثر من لاعب سابق بالاهلي يلعبون في صفوفه ومنهم حسام وإبراهيم حسن وسمير كمونه ومحمد عماره وعلاء إبراهيم .

[yasovinas]

واصل فريق الأحلام ( الاهلي سابقاً  f((:  )

والله يا سي سي كنت بتفرج على المباراه امس وجيت على بالي قلت لو انتهت بهزيمه الاهلي هبعت لك انقلب الفريق الى فريق الكوابيس

بس يا خسارة معلش مبروك عليكم ولعبو حلوا

على فكرة انا اتحاداوي قديم ومتعصب

الاتحاد مشكلته الروح

اللعيبة العام الماضي محمد عمر زرع فيهم الروح فصالوا وجالوا وعملوا اللي عملوه في الاهلي

النهارده مش عارفين

بيقولوا هيرجعو محمد عمر على الله

[hamo90]

واصل فريق الأحلام ( الاهلي سابقاً  bngn::  )

بالله عليك بلاش حكاية فريق الاحلام دي عشان بخاف منها من ساعة فريق الاوهام 1و2 بتوع الزمالك اما خدنا منهم الدوري 7 سنين متتالية رغم اصابتهم حاليا بفقدان الذاكرة عند ذكر الموضوع ده

في إنتظار مبارة الاهلي امام المصري البورسعيدي يوم الجمعة القادم في تمام الساعة التاسعة بتوقيت القاهرة ... والتي اتوقع أن تكون موقعة حربية نظراً للعداء الذي تحمله جماهير بور سعيد للأهلي وجمهوره - دون مبرر - وإن كان فريق الاهلي سيلاعب فريقاً أخر من لاعبيه .. لأن هناك أكثر من لاعب سابق بالاهلي يلعبون في صفوفه ومنهم حسام وإبراهيم حسن وسمير كمونه ومحمد عماره وعلاء إبراهيم .

ربنا يستر من المرتزق فاروق جعفر وحركاته الي مش ولابد معانا بس أن شاء نغلبهم زي غيرهم ونسن أسنانا لحبيبا نا الحلوين الي غلبوا الجيش انهارده بالعافيه بعد ما اتبهدلوا في الشوط الاول بس للاسف الجيش معندوش لياقة بدنية خالص

حمو

تم تعديل 18 أكتوبر 2004 بواسطة hamo90

[linux]

و أن شاء الله الأهلي يفضل يكسب من غير ضربات جزاء وهمية و في أوقات قاتله ... الحمد لله، بنكسب بمجهودنا :rolleyes:

[afiona]

و أن شاء الله الأهلي يفضل يكسب من غير ضربات جزاء وهمية و في أوقات قاتله ... الحمد لله، بنكسب بمجهودنا  fr1::

ابعد عن التحكيم :rolleyes: ....اخر حاجة اصحاب الفانلة الحمراء يتكلموا فيها هى التحكيم ...

[linux]

و أن شاء الله الأهلي يفضل يكسب من غير ضربات جزاء وهمية و في أوقات قاتله ... الحمد لله، بنكسب بمجهودنا  <_<

ابعد عن التحكيم :P ....اخر حاجة اصحاب الفانلة الحمراء يتكلموا فيها هى التحكيم ...

طب عيني ف عينك كده :blink:

[kotoz9]

و أن شاء الله الأهلي يفضل يكسب من غير ضربات جزاء وهمية و في أوقات قاتله ... الحمد لله، بنكسب بمجهودنا  ;)

ابعد عن التحكيم :blink: ....اخر حاجة اصحاب الفانلة الحمراء يتكلموا فيها هى التحكيم ...

يا راجل حرام عليك بقى دى ضربة جزاء :huh:

[linux]

قصدك "ضربتين" جزاء :angry: :angry:

[se_ Elsyed]

نداء إلى أفراد الكتيبة الحمراء ..

130 ينادي 506 .. هل تسمعني ؟ ...

تعرفوا يا ولاد .. بإذن الله لو سكعنا المصري النهاردة ونفخنا البلدية يوم 31/10 وحلقنا للزمالك يوم 4/11 ... يبقى كده نقدر نقول إن بفضلك يا رب الدوري بقى في جيبنا وممكن باقي المباريات ننزل بالناشئين تحت 14 سنة .. ونفضى بقى لبطولة أفريقيا وللدورات الرمضانية ;)

[se_ Elsyed]

وعملها الأهلي يا ولاد ..

ففي مبارة جيدة إستطاع الأهلي ان يهزم المصري البورسعيدي في عقر داره بهدفين دون مقابل .. وصال وجال لاعبو فريق الأحلام :blink: وظهر لاعبو المصري أمامهم قليلو الحيلة لا يستطيعون فعل أي شيء وقد عبر عن ذلك حارس مرماهم الخلوق نادر السيد الذي قال بعد المبارة بإن فرق الإمكانيات المهارية واضح جداً وإذا كنا احنا عندنا لاعب او اتنين أصحاب مهارات ففريق الأهلي كله أصحاب مهارات عالية وبالتالي لم نستطع مجاراتهم ...

وقد انقذ نادر السيد مرماه من العديد من الاهداف المحققة .. ووقف الدير الفني للمصري فاروق جعفر " روقه خارج الخط يشد في شعره نظراً للتفوق الواضح للاعبي الأهلي .. الذين فازوا بالمبارة بأقل مجهود .. وصراحةً امتعونا في الشوط الثاني خاصة بعد نزول احمد بلال مُحرز الهدف الأول والداهية الكولومبي القصير " كاستيللو " ، هذا وقد أحرز الهدف الثاني اللاعب عماد النحاس من كرة مرفوعة ببراعة من كاستيللو حولها النحاس برأسه بطريقة جميلة وشاهدها نادر السيد وهي تحتضن الشباك .

شد حيلكوا يا رجالة وعقبال مباراتكم مع القبيلة البيضاء ..

ملاحظات :

1- صعبان علي قوي 6 أو 7 لاعبيين في الاهلي مش هايلمسوا الكورة تاني نظراً لتألق المجموعة التي تلعب بالفعل وهم " هادي خشبة ، وائل رياض ، احمد السيد ، محمود شيكو ، أحمد ابو مسلم ، رامي عادل ، محمد عبد الوهاب ، احمد رضوان .. وإن كان الأخير أقترح على إدارة الاهلي الإستغناء عنه مقابل كورتين وفردة شراب لإن مش عارف هما أشتروه من القناة ليه أساساً .

2- قام مانويل جوزية بإشراك إسلام الشاطر كظهير أيمن ومن أمامه محمد بركات كجناح .. ولكن لم يظهر التفاهم بينهما لأنها المرة الاولى التي يتم وضعهما بتشكيلة الفريق معاً وبالتالي فهم في حاجة إلى وقت للتفاهم .

3- حراس مرمى الفرق المنافسة تتألق بطريقة غير عادية امام النادي الاهلي ، فالمتتبع للخمس مباريات السابق يلاحظ التألق غير العادي لحراس تلك الاندية .. وهو شيء جيد ومفيد للإرتقاء بمستوى كرة القدم المصرية .. ولكن نتمنى إستمرار تلك الظاهرة .

4- جماهير النادي المصري كانت مشفقة على فريقها بالأمس من مقابلة الغول الأهلاوي .. ويكفي ان نعلم بإنه طوال التسعين دقيقة لعب لم يكن هناك أي فرصة حقيقية على مرمى الأهلي ولم يلعب لاعبو المصري كرة واحدة على الثلاث خشبات الاهلاوية .

5- إستطاع جوزية معالجة اخطاء الإستهتار الدفاعية في النادي الأهلي .. وبالتالي كانت المبارة أفضل بكثير من مبارة الإتحاد السكندري.

6- زي ما كنت بأقطع في فروة مجلس إدارة الاهلي قبل ذلك على الصفقات المضروبة اللي كانوا بيشتروها .. لابد ان أُشيد الآن بالنجاح الكبير الذي حققته الصفقات الجديدة وخاصة عماد النحاس ومحمد بركات والداهية الكولومبي كاستيللو .. وعلى فكرة أول مرة في حياتي أشوف لاعب ناجح من امريكا الجنوبية ييجي يحترف عندنا .. بل في الوطن العربي كله .. لأن إيه اللي هايخليه يسيب أوروبا والدول المتقدمة وييجي عندنا ... ده بالإضافة إلى إن الاندية الاوروبية بتقطفهم وهم صغيرين وما بيسيبوش الا اللعيبة المفعصة .

7- لأول مرة من يمكن عشر سنوات أرى فريق مصري يهاجم طوال المبارة من جميع الجبهات يمين وشمال ومن النص ... ومع الاهلي الحالي نكاد نقول حقيقةً بإن الفرق الآخرى ما بقتش عارفه الضربه هاتجيلها منين .. لأن كل جبهة أصبحت تحتوي على نجوم كبار يجيدون إستغلال مراكزهم .. ولكن مازال مسلسل إهدار الفرص السهلة مستمر .. مما يعني مزيد من المجهود لابد ان يبذله جوزية مع اللاعبين .. واعتقد إن المكشلة دي في طريها للحل بعد ان يقوم الاهلي بشراء رأس حربه برازيلي هداف في الدوري هناك وذلك في شهر يناير المُقبل .. ليحل محل اللاعب ماكي النيجيري :lol: ( لايلا هايبقى عندنا إتنين برازيليانو واحد بن فاتح والتاني غامق .. عشان مزاجنا يبقى عال العال :P ;) )

7- فاروق جعفر بقى شكله وحش بعد ما مجلس إدارة المصري أنفق الملايين لتدعيم الفريق بلاعبين جدد ( عواجيز ) ولم يحصد إلا 5 نقاط فقط من خمس مباريات ، يعني 5/15 .

8- ناي الإسماعيل إبتعد تماماً عن المنافسة وذلك بعد تعادله بالأمس مع نادي بلدية المحلة ( على فكرة الترسانة والبلدية عاملين زي العقده أم شنيطة للإسماعيلي .. على طول يكعبلوه وهو ماشي ) .. الإسماعيلي كده 8/15.

9- معليش يا Yasovinas الإتحاد السكندري خسر على أرضه وامام جمهورة بالأمس امام أسمنت السويس بهدفين مقابل هدف .. وهي الخسارة الخامسة على التوالي مما يدل على أن هناك شيء خطير يحدث داخل النادي واعتقد بإنه متعلق بالإنتخابات .. بس تغور الإنتخابات دي اللي تخلي نادي كبير وجماهيره غفيرة ينزل درجة ثانية بدري بدري .. فكل الفرق حققت نقاط إلا هو واخد كحكه كبيرة .

10 - تحية حب وأحترام للمدرب طه بصري مدرب فريق إنبي الذي يحقق النصر تلو الأخر ويعمل في صمت وهو من انجح المدربين المصريين .. ولكن للأسف عشان هو مش بتاع تربيطات ومحلسه ولا حد بيفكر فيه عشان يدرب المنتخب .

11- أعتقد إن حلمي طولان أيامه بقت معضوضه في حرس الحدود وهايسمعنا قريب اغنية " بودعك "

[disappointed]

إلاّ أخبار أبو تريكه إيه يا سى السيّد؟؟

:) :)

أنا بأسمع إنه بينزل فى التشكيل بس عمرى ما لقيته فى الملعب الموسم ده

:P ;)

وياريت تدلى بدلوك فى هدف الأهلى الأوّل فى مرمى المصرى...أصله لا مؤاخذه كاستيللو كان أوفسايد بييجى 50 يارده كده ys):

والله الأهلواية دول عالم غريبه....... بيتعاملوا مع الأهلى و كأنه حيقابل منافسه حقيقية السنه دى....... نادى إشترى لعيبة بــ15 مليون جنيه فى خلال 9 شهور...و كوّش على أفضل لعيبة البلد من غير ما يحسب حساب للفلوس....ماسورة تمويل و إنفجرت... و تركيزه كلّه منصب على الدورى (لا فيه بقى لا بطولة أفريقيا ولا دورى أبطال العرب... ومنتهى التفرّغ)... ده بقى غير إتحاد الكورة الملاّكى بتاع عصام عبد المنعم و الراجل الى عنده شيزوفرينيا الى إسمه عدلى القيعى (اللى بيبعث جواب من نفسه فى مكتبه كمدير تسويق بالنادى الأهلى لنفسه كسكرتير بالإتحاد فيقوم موافق لنفسه على أى طلبات طلبها من نفسه )... ناهيك عن الإعلام اللى بيآزر الأهلى السنة دى و كأنه فى مهمّة قوميّة لإسترداد درع الدورى الذى إحتلّه الأعداء الذين يجب سحلهم فى الشوارع

بالذمة يعنى.... بعد كل ده...أنا كزملكاوى....مش لو فكّرت فى أى حاجه ثانية غير إن الأهلى يأخذ الدورى مش يبقى أنا راجل بأفكّر بأسلوب الخيال العلمى؟؟

طب ده حتى يبقى حرااااام لو الأهلى ما أخذش الدورى السنه دى... على الأقل علشان الملايين الـــ15 اللى كعّهم من دم قلبه... والاّ هوّه ماله و لا يهنى له يعنى؟؟؟

المهم بس بعد الأهلى ما يأخذ الدورى ما نلاقيش كل واحد أهلاوى بيقول لينا زى محمد صبحى فى مسرحية تخاريف :

بفلوسى يا كلاب

:blink: :lol:

[se_ Elsyed]

فلفل وشطه ... ( ما فيش وش بيعمل كوبه ياخوانا )

موتوا بغيظكم يا زملكاوية يا مخططين :lol: :P

أبو تريكه ..... مانتوا جبتوا أجله في المنتخب والراجل نفساويته تعبانه من ساعة ماتش ليبيا... لكن سيظل عازف المزيكا الأول برضوا .

وياريت تدلى بدلوك فى هدف الأهلى الأوّل فى مرمى المصرى...أصله لا مؤاخذه كاستيللو كان أوفسايد بييجى 50 يارده كده 

هات يا بني الجردل أما ندلدله عشان نرد على محبط ...

ماهو إنت يا دكتور محبط لو فكيت الكيس وإشتركت بـ 140 ج في قناة النيل للرياضه كنت شوفت تحليل ما بعد المبارة وإعادة الهدف ده بالذات واللي شرحه الراجل بتاعكم " طارق يحي " .. وانا كنت فاكر إن كاستيللو أوفسايد بالثُلث كمان ..

اتاري في أشوس من أشاوس لاعبي المصري عامل نفسه مصاب وواقع داخل الصندوق ( خط الـ 18 ) من الناحية الشمال ناحية خط المرمى .. والباشمهندس لما لقى الكره راحت لكاستيللو عمل منظر قلما تشاهده في الملاعب ... راح زاحف على إيده ورجله وعامل مرش دير وطالع بره الخط قال إيه عشان ما يبقاش متداخل ( فاهم الدنيا غلط ) بس مش عارف إزاي عصام عبد الفتاح مادلوش إنذار .. لدرجة طارق يحي وعبد العزيز عبد الشافي ضحكوا على الموقف ده لما إتعاد بكاميرا تانية وصاحبنا عمال يزحف قال عشان يكشف مهاجم الاهلي .

طب إيه رأيك في ضربة الجزاء اللي ما تحسبتش إمبارح واللي أي واحد في جمعية النور والامل شاف عماد متعب والواد التاني بياخد فانلتة ... مش عيب كده و100 مرة نقول ماحدش ياخد فانلة حد . ;) ... ولا هي حلال للزمالك وحرام على الأهلي ؟ على العموم مش محتاجين إحنا بنكسب بمجهودنا وعرق جبيننا ( عن إذنك أروح أجيب منديل محلاوي أنشف به العرق )

بص يا محبط من الآخر كده .. إنت من المعسكر التاني ومالكش كلام معايا إلا يوم 5 نوفمبر بعد ماتشنا معاكم ... :blink: s-: ax: s-:

خلوا روحكوا رياضية بقى وقولوا الله على اللعبة الحلوه .. وما تحاولوش تفسدوا فرحة الآخرين ..

إتعلموها بقى دي كوره يا بشر ..

بص شوف الأهلي بيعمل إيه :)

[masr_watany]

معلش يا زمالكاوية بقي الموسم دة كدة باين علية موسم بيبو وبير smk:

[hamo90]

والله الأهلواية دول عالم غريبه....... بيتعاملوا مع الأهلى و كأنه حيقابل منافسه حقيقية السنه دى....... نادى إشترى لعيبة بــ15 مليون جنيه فى خلال 9 شهور...و كوّش على أفضل لعيبة البلد من غير ما يحسب حساب للفلوس....ماسورة تمويل و إنفجرت...

أستاذ محبط عميد الزملكوية بالمحاورات سؤال بريء جدا

لماذا دائما يصاب الزملكوية بفقدان الذاكرة ؟

هل نسيت فريق الاحلام 1و2 اما الزمالك أشتري نص لعيبة مصر وبرده معرفتوش تعملوا حاجة مع أن السبب معروف وسهل أحنا عندنا حاجة أسمها ادارة أنما انتو عندكو عزبة مش نادي و الدليل الدفاع خربان من أول الموسم ومع ذلك لاعب كويس زي أمير عزمي مجاهد ما بيلعبش أساسي من أول الموسم ليه عشان أبوه ما يأخدش أصوات في الانتخابات ولاعب تاني يتم شراءه بسبب أن واحد في الادارة عجبوه الولد ونفاجأ أنه معجبش المدرب ورماه في cnst:

يعني بأختصار مشكلة الزمالك في الادارة

وبرده لازم تنسوا الدوري السنة دي

حمو

[afiona]

ردود واجبة على اصحاب الفانلة الحمراء و العيون الحمراء ..

أبو تريكه ..... مانتوا جبتوا أجله في المنتخب والراجل نفساويته تعبانه من ساعة ماتش ليبيا... لكن سيظل عازف المزيكا الأول برضوا .

مزيكا ايه وبيعزف فين سيادته لان اداء الاهلى - من ساعة اعتزال جيل السبعينات الشهير و هو الجيل الوحيد اللى لعب كورة فى الاهلى - عبارة عن نشاز زى عربية جاز وموتورها مفوت كمان ....

وده بقى اخركوا ? ابو تريكة ? لاعب فوق المتوسط .... يالااا ... مش مفروض الواحد يحكم بمقاييس حازم امام امام الموهوبين ... كل واحد و المقاييس بتاعته ...

اتاري في أشوس من أشاوس لاعبي المصري عامل نفسه مصاب وواقع داخل الصندوق ( خط الـ 18 ) من الناحية الشمال ناحية خط المرمى .. والباشمهندس لما لقى الكره راحت لكاستيللو عمل منظر قلما تشاهده في الملاعب

انا خايف بعد كده يطلع لاعب من الاحتياطى غطى على اوفسايد الاهلى اللى حتى حسين مهاود الاهلى كان يحسبها ... او مدرب الفريق المنافس لفريق الهنود الحمر عمل بنالتى ... :P انا متاكد ان الاهلى عين جوبلز مسئول عن الاعلام الاحمر ...

صعبان علي قوي 6 أو 7 لاعبيين في الاهلي مش هايلمسوا الكورة تاني نظراً لتألق المجموعة التي تلعب بالفعل وهم " هادي خشبة ، وائل رياض ، احمد السيد ، محمود شيكو ، أحمد ابو مسلم ، رامي عادل ، محمد عبد الوهاب ، احمد رضوان

mc: brth) wst:: :P

الاسامى الحمرا اللى فوق لاعبى فريق الهنود الحمر اول حالة فى تاريخ الكرة كما نعرفها يلعبوا دولى قبل لما يلعبوا مع ناديهم و لا يوجد ما يؤهلهم للانضمام للمنتخب لان مستواهم متدنى للغاية سوى انهم فى الاهلى فى وقت اتحاد كرة اهلاوى و زمن اغبر عموما ...

وكستونا فى ماتش ليبيا ....

جماهير النادي المصري كانت مشفقة على فريقها بالأمس من مقابلة الغول الأهلاوي

غول ? ha) عنقاء يمكن .... حتى على الوزن ... عنقاء والفانلة الحمراء ...

إستطاع جوزية معالجة اخطاء الإستهتار الدفاعية في النادي الأهلي

محدش يقدر يعالج اخطاء الاهلى الدفاعية ولو جابوا بكنباور نفسه ..

من المسلمات فى دفاع الاهلى ...tradition ... تراث بيحافظوا عليه هو تراث التراجع الى الخلف فى مواجهة الهجوم ... تلاقى الباك راجع بظهره قدام المنافس من خط الوسط ...

وعشان كده بتبقى فضيحة لما بيلعب باك اهلاوى فى المنتخب من ايام مصطفى تونس مرورا بشادى محمد انتهاء بوائل جمعة .... ;) brth)

وعلى فكرة أول مرة في حياتي أشوف لاعب ناجح من امريكا الجنوبية ييجي يحترف عندنا .. بل في الوطن العربي كله .. لأن إيه اللي هايخليه يسيب أوروبا والدول المتقدمة وييجي عندنا ...

طب برضه ... لسه ماردناش على السؤال ... ليه مارحش اوروبا او حتى المكسيك ?

لأول مرة من يمكن عشر سنوات أرى فريق مصري يهاجم طوال المبارة من جميع الجبهات يمين وشمال ومن النص

ماشفتش الزمالك قبل كده ?

[afiona]

طب عيني ف عينك كده .....

يا راجل حرام عليك بقى دى ضربة جزاء .....

و أن شاء الله الأهلي يفضل يكسب من غير ضربات جزاء وهمية و في أوقات قاتله ... الحمد لله، بنكسب بمجهودنا

مابدهاش بقى ... طول عمر الاهلاوية يبتعدوا عن موضوع التحكيم زى مايكون حاجة ابيحة لان تاريخ الاهلى مليان اباحات تحكيمية من عينة محمد حسام و حسين مهاود و النادى و عصام صيام و اهلى عبد العظيم و محمد ضياء: و طبعا عبد السلام الحمامصى ...ايووووووووه يا رجالة ....

يا راجل ده لو الفيفا سمع عن هدف علاء ميهوب نهائى كاس 1984 ضد المصرى اللى كان فيه اوفسايد بخماشر ياردة و وقف الكرة على ايده بمنتهى البجاحة ( فى الدقيقة العاشرة من الوقت بدل الضائع ) وكانه بيقول : " شوفوا ... مش انا موقف الكرة على ايدى و اوفسايد بفدان ... بس الحكم حسين مهاود حيحسبها برضه " .... ده كان الفيفا لغى التحكيم من اساسه ... لزمته ايه ?

ده لو المرحوم صالح سليم بيحكم مبارة الاهلى و الزمالك فى الدورى عام 1982 مش حكمنا الدولى محمد حسام اللى لغى جون حسن شحاتة الشهير - بعد لما حسبه - كان لا يسعه الا احتسابه ....

اوفسايد مضروب من خط النص لان حسن شحاتة انطلق من نص الملعب الزمالك وكمان ماهر همام مغطى الاوفسايد بدشليون ياردة و حتى هو حاول اخراج الكرة قبل دخولها المرمى بس اكملها جوه ..... يعنى اوفسايد فين ?

نكتفى بهذا القدر من تحكيم هزلى اسود - او احمر - ....

لا ... الحتة دى كمان ... اصل التهريج مش مقتصر على ماتشات الاهلى بس ... تؤ ... ده بيمتد ليشمل ماتشات الزمالك و الاسماعيلى احفاد ريتشارد و ابناء هولاكو .... brth)

لاعب متعور بيتعالج على ارض الملعب فى ماتش الاسماعيلى و الترسانة والنتيجة 2/2 ونفاجا بلاعب ترساناوى بيحط جون فى الاسماعيلى ولسه الجهاز الطبى والفنى فى الملعب brth) .... لحد كده و الامر لا يخرج عن حركة قرعة من لاعب - مش فاكر اسمه ... اسعفنا يا د.محبط - بس الاقرع من كده ان عصام صيام حسبها .... والاقرع من ده وده ان الصحف الحمراء شنت حملة قاسية شعواء على الاسماعيلى وجماهيره لانه كان احسن فريق سنتها و تقريبا تم نقل جميع مبارايات الاسماعيلى خارج ملعبه وتقريبا لاستاد محايد زى استاد التتش ....

وحيث اننا بنتكلم عن الاسماعيلى المطحون اعلاميا و تحكيميا ..

يبقى لازم نتكلم عن مباراته الشهيرة مع الاهلى 1/1 اللى حمزة الجمل شاط صاروخ فى المقص الشمال لشوبير من 45 ياردة نفاجا بمحمد ضياء اللى كان الاعلام الاحمر بيلمعه يلغى الهدف ... ليه يابا ? اوفسايد ......فين ... ومين و امتى ? محدش لهذا اليوم عارف ..

بس كان حكم احمر دمه خفيف ... حسام حسن خد انذار تانى فخد طرد ... عادى يعنى ... بس شوبير جرى و قال للحكم : ورحمة امى ده ابراهيم مش حسام اللى خد الانذار الاول ...

طيب ... يعنى الراجل حيحلف برحمة امه كدب ?

طبعا كان كدب و بعدين خلاص الكارت الاحمر طلع ... تشاء الاقدار ان حسام حسن يفضل فى الملعب :P وسط ذهول جماهير الكرة الاهلاوية قبل الاسماعيلية :P ويجيب جون mc: و تصبح من طرائف الكرة التى تندرت بها المجلات و الصحف -العالمية طبعا مش المصرية الحمراء لا سمح الله - تحت عنوان :" لاعب مطرود يحرز هدفا"..... ;) wst::

وبعدين.. وبعد الفضائح دى ... يجيوا يتكلموا عن التحكيم ...

ملحوظة : للمزيد من الفضائح الاهلاوية يرجى الاتصال بمؤرخ الكرة د.محبط ....

[se_ Elsyed]

لأ بجد العملية كده بوخت .. والاهلي شكله كده داخل على ثورة للعبيد تقوم بها الأندية الآخرى وتروح تدغدغ النادي باللي فيه وتفك آسر اللعيبة وترجعهمة لأنديتهم ...

إقرأوا الخبر التالي ( بس ما حدش يجيب سيرة لمحبط عشان ما يحبطش زيادة ) :o

محمد عبد الله لاعب الاسماعيلي يوقع للاهلي

يبدو ان النادي الاهلي في طريقه لجمع لاعبي نادي الاسماعيلي فبعد ان تعاقد مع محمد بركات واسلام الشاطر وعماد النحاس و من قبلهم خالد بيبو وتجري المفاوضات مع محمد حمص نجح المسؤولون في النادي الاهلي في الحصول علي توقيع محمد عبد الله المدافع الايمن للفريق وهو المفاجأة التي يتكتم عليها المسئولون في النادي الاهلي حتي لا يتهم بالسعي خلف اللاعبين قبل انتهاء عقودهم و قبل فترة الانتقالات

محمد عبد الله لن يلعب مع الاهلي قبل الموسم القادم وذلك لارتباطه بتعاقده مع الاسماعيلي الذي ينتهي بنهاية الموسم الحالي.

وكانت المفاوضات مع محمد حمص قد وصلت الي اتفاق بتوقيعه مقابل 450 الف جنيه للاعب والاتفاق مع نادي الاسماعيلي بترك اللاعب في يناير المقبل مقابل 250 الف جنيه و لكن حتي الان لم يتوصل المسؤولون في النادي الاهلي الي اتفاق مع المسئولين في الاسماعيلي حيث يخاف مسئولي الاهلي من فتح قنوات الاتصال مع المسئولون بالاسماعيلي حتي لا يعرقلون الاتفاق مع اللاعب

وبتعاقد الاهلي مع حمص وعبد الله و مفاوضاتهم مع احمد فتحي و حسني عبد ربه يصبح هناك فردا واحدا لم يتعاقدوا معه و هو محسن صالح المدرب الذي حصل علي الدوري بهؤلاء و هزم الاهلي 3 مرات بهذه المجموعة.

يالا كوره .... وعكها يا اهلي

[se_ Elsyed]

أفيونة ؟!!!

إنت خرجت إمتى .. وبعدين واقف في بير السلم ليه ما تطلع يا رجال وإهدى كده وإشرب لك كوباية عناب أحمر وما تعملش في نفسك كده ...

بص روق كده وتعالى لي العيادة - قصدي الملعب - يوم الأحد اللي جاي بعد ماتش الإسماعيلي والزمالك والأهلي والبلدية ... وعندك جلسة تاني يوم 4/11 ... وبعدها أضمن لك إنك هاتبقى عال العال وهاترجع أفيونة المزجانجي بتاع زمان بس إبعد عن محبط يا بني لأنه هايبوظ نفسويتك وهايجيب لك إحباط زيادة .

[disappointed]

لحد كده و الامر لا يخرج عن حركة قرعة من لاعب - مش فاكر اسمه ... اسعفنا يا د.محبط

كان إسمه محمّد كمال

ماهو كان هجوم الترسانة أيّاميها عامل ذعر بالـــ3 محمدات بتوعه... محمد رمضان ( و ده كان بتاع فلوس فطلّعوا ليه الشنطة السامسونايت وراح الاهلى).... و محمد كمال ( و ده كان بتاع ربّنا و مالوش بخت فطلّعوا عينه فى الترسانة بعد إصابته فى وتر أكيليس وراح فى الوبا و إعتزل بدرى)... و محمد فؤاد ( و ده كان بتاع ستّات فراح فى داهية و ركبه باظت)

حسام حسن خد انذار تانى فخد طرد ... عادى يعنى ... بس شوبير جرى و قال للحكم : ورحمة امى ده ابراهيم مش حسام اللى خد الانذار الاول ...

طيب ... يعنى الراجل حيحلف برحمة امه كدب ?

فكّرتنى بمهزلة "إبراهيم حسن يضيف هدف لأخيه حسام فى سباق هدّاف الدورى"

الأهلى كان بيلاعب المقاولين ( هوّه كسب 3/1 عموما) و وكان حسام حسن داخل فى صراع شديد و حامى على لقب الهدّاف مع أحمد سارى بتاع الأوليمبى و أيمن منصور بتاع الزمالك ..... حسام جاب الجون الأول للأهلى و بعدين هادى خشبة جاب الجون الثانى... المهم على آخر 5 دقايق كده كورنر للأهلى ...إبراهيم حسن دخل حطها بدماغه من على القائم البعيد بعد ما عدّت من حسام حسن على القائم القريب... و بعدين راح إبراهيم حسن جارى على جمهور الدرجة الثالثة و أخذ تحيّته عادى جدا.. و بعدين و همّه راجعين على نص الملعب إفتكر هوّه و حسام حكاية سباق الهدّاف...فقال إيه راح إبراهيم على الحكم و بيشاور على حسام على إنه هوّه اللى جاب الجون ....قووووم إيييييه .... الحكم كتب العيّل (قصدى قيّد الجون) على إسم حسام... وكل شويّه و الثانية بقى إبراهيم يشاور لجمهور الأهلى على حسام يقوم جمهور الأهلى يهتف حساااام حساااام...... بس الأنيل من كده إن كل الجرائد و المجلاّت و الإعلام الأحمر كتبوا إن حسام هو صاحب الهدف رغم إن الكل عارف إن إبراهيم هوّه اللى جابه ( أما النقاد الزملكاوية فسكتوا - مش فاهم خوف والاّ يأس والاّ قرف - , وعلى رأى محمود معروف اللى قابلته على بوّابة نادى الزمالك : اكتب أقول إيه يعنى... يعنى عايزين أمى تتشتم فى المدرّجات؟؟ ما خلاص... المزاج العام عايز حسام يأخذ الهدّاف... حيطلّعونى حاقد و عندى تهيّؤات ولازم ألبس نظارة)

المسخرة بجد كانت فى برنامج تليفزيونى (الكاميرا فى الملعب) بعد الماتش مباشرة لما جابوا براهيم و حسام و المذيع سألهم : "بس بجد و بالحق... مين اللى جاب الجون"......و.......خد عندك بقى كوميديا مالهاش حل :wub: ..... و إنتم عارفين بقى حسام و إبراهيم ما بيعرفوش يتكلّموا و ما بيعرفوش يكذبوا و بيتلعثموا لما يكونوا عاملين حاجه غلط... وهات يا هرتلة همّه الجوز

ملحوظة : للمزيد من الفضائح الاهلاوية يرجى الاتصال بمؤرخ الكرة د.محبط ....

آآآآ.....شكراً للزميل أفيونه

:wub:

فى الواقع....

:wub:

وفى الحقيقة....

:wub:

لا يسعنى إلاّ التذكير بمباراة المقاولين و الأهلى الشهيرة التى عبّر فيها المقاولين عن رفضهم للظلم البيّن الواقع عليهم عن طريق إدعاء اللاعبين الإصابة مع تعمّد إستنفاذ التغييرات حتى لا يتبقى فى أرض الملعب سوى 7 لاعبين من المقاولين مما أجبر الحكم على إنهاء المباراة.... والحكم كان هو إبراهيم النادى ( الشهير بإبراهيم النادى الأهلى)... عمل إيه بقى... الأهلى مغلوب 1-0 و المقاولين مسيطر على هجوم الأهلى تماما و مافيش أى خطورة على جون المقاولين.... دخلنا فى آخر 25 دقيقة من الشوط الثانى.... كرة مع حارس المقاولين بيشوطها إيد و رجل حط رجله معاه طارق خليل كان حيكسرها له...بعد ما إتعالج حارس المرمى إكتشفنا إن الحكم حسبها لعبه خطرة و ضربه حرة غير مباشرة عليه هوّه :o و بعد ما كانت الكورة على خط الــ18 بقت بقدرة قادر على نقطة ضربة الجزاء و الحيطة بتاعة المقاولين على خط الجون , و كان أياميها طاهر أبو زيد أى فاول معاه يعنى جون... و طبعا جت جون بعد الحكم ما عمل إرهاب للعيبة المقاولين و إدى الحيطه كلّها تقريبا إنذارات ( الفاول قعد 5 دقايق علشان يتلعب)...... و بعدين حصلت الطامة الكبرى بقى.... أيمن شوقى فى أوفسايد بييجى 12 ألف هكتار و 524 ألف دونم.. أوفسايد غير طبيعى لدرجة صوت مدرّب الأهلى كان باين من برّه و هوّه بيزعّق لأيمن شوقى علشان ركن و ما رجعش من الأوفسايد...قووووم إييييه.....بعد ما أيمن شوقى ساب الكورة و راجع على نصف ملعبه لقى اللاين مان حيتجنن و قاعد بيشاور له وهوّه بيتنطط : روح..رووووووح... ما فيش أوفسايد... رووووح

فــ...راح.... و إنفرد... طلع عليه الجون قفل الزاوية.... إتطرّف أيمن شوقى فحاول يرقصه على واسع....راح الجون ماسك الكورة (واخدين بالكم.... ماسك الكورة)....و بينما أيمن شوقى يندب حظه و يضع يديه على رأسه ندما على ضياع الفرصة..إذا بالحكم إبراهيم النادى يشق طريقه و فاتح سبرينت ولا كارل لويس و حاسب ضربة جزاء وهو قادم يسعى من منتصف الملعب.... و الأنكى من كده إن طاهر أبو زيد شاط البنالتى و ضيّعه (الجون صد الكورة) فراح إبراهيم النادى (الأهلى) عايدها و حطّها طاهر فى المرّة الثانية فى الجون

قال و بيتكلّموا عن التحكيم قال...... ده لو الفيفا عنده خبر بتاريخ التهريج اللى بيعمله التحكيم مع الأهلى أو شافوا شرايط للمهازل التحكيمية دى كانوا لغوا التحكيم بالكورة فى مصر

فالحين بس يعملوا حلقة خاصة من الكورة مع دريم مع أحمد شوبير و الحكم اللى إسمه الشناوى علشان يحلّلوا الــ DNA بتاع ضربة جزاء خالد بيبو فى المقاولين فى نهائى كأس مصر الماضى و يعملوا تحليل ميكروسكوبى و يأخذوا من الشريط عيّنة لمعمل "البرج" لتحليل الأنسجة و الهستوباثولوجى علشان يثتوا إن ضربة الجزاء كانت صحيحة

يا راااجل بقى.... حراااااام... كفااااايه

وبتعاقد الاهلي مع حمص وعبد الله و مفاوضاتهم مع احمد فتحي و حسني عبد ربه يصبح هناك فردا واحدا لم يتعاقدوا معه و هو محسن صالح المدرب الذي حصل علي الدوري بهؤلاء و هزم الاهلي 3 مرات بهذه المجموعة.

طب بأقول إيه يا سى السيّد

ما نظرا لهذه التغيّرات الديموجرافيّه فى نادى القرن... ما تتعاقدوا بالمرّة مع كبير المشجّعين بتاع الإسماعيلى اللى بيلبس برنيطة طويله قوى ده..... و خلّوا شعار الأهلى "شمّامة" بدل الصقر lo::

و ساعتها بقى يوم ماتش الأهلى و الإسماعيلى حتلاقى الجرايد نازلة بتقول : اليوم الأهلى أ يلتقى مع الأهلى ب

lo::

تم تعديل 27 أكتوبر 2004 بواسطة disappointed

[فــيــروز]

وبتعاقد الاهلي مع حمص وعبد الله و مفاوضاتهم مع احمد فتحي و حسني عبد ربه يصبح هناك فردا واحدا لم يتعاقدوا معه و هو محسن صالح المدرب الذي حصل علي الدوري بهؤلاء و هزم الاهلي 3 مرات بهذه المجموعة.

طب بأقول إيه يا سى السيّد

ما نظرا لهذه التغيّرات الديموجرافيّه فى نادى القرن... ما تتعاقدوا بالمرّة مع كبير المشجّعين بتاع الإسماعيلى اللى بيلبس برنيطة طويله قوى ده..... و خلّوا شعار الأهلى "شمّامة" بدل الصقر

شمامه !!

مامه؟ :wub:

:wub: :wub: :wub:

يا محبط .. ما تعمل موضوع ذكريات كرويه وتبقى حسن امام عمر بتاع المنتدى فى الكوره .. مش ده اللى كان بيحكى حواديت عن الفنانين؟ :o