الأهلي هوه هوه بيكسب بره وجوه

[se_ Elsyed]

الحقيقه بعد كل المقاوحه دى الفريق اللى هيتهزم هيبقى موقف مشجعيه صعب جدا ..  :blink:

إنتي بتقولي فيها يا تركواز يابنتي .. دي وصلت إن زوجتي قالت لها لي صراحة وفي وشي ومن غير أي خوف .. فقالت لي : بعد القلق ده كله اللي إنت عامله لنا في البيت والمعسكر المغلق اللي حابس نفسك فيه وحارم الواد عمر من سبيس تون وعلي من التلي توبيز وعمال تقلب وتتفرج على البرامج الرياضية إشي تحليل وإشي تقييم . لو الأهلي إتغلب بقى تبقى من سكات كده تاخد الهاند باج بتاعتك وتروح تبات عند زمايلك .. وإبقى خلي الأهلي ينفعك .. :blink: me0: ax: s-:

برضوا ولو الاهلي حديد وإذا خسرنا معركة ده مش معناه إننا خسرنا الحرب... إحنا ما بنتهددش وأنا بأقولها أهو عشان الجميع يسمع ( إلا أم عمر )

[Modest]

(فاكرين الستة)

ماتش الستة خلاص أصبح تاريخ و من يومها أصبح فوز الزمالك على الأهلى شيء طبيعيييييي و لكن لإن الإعلام الأحححححمممممممررررررر مش لاقي من يومها إنجاز يُحسب للأهلي فأعطى صفة الرقم القياسي لهذا الرقم و لكن الحقيقة هي أن الرقم القياسي كان فوز الزمالك على الأهلى 6/0 في نهائي الكأس عام 1943 ... و مش هاقول رجعت للأرشيف و لا سألت جدي الله يرحمه لما جالي في المنام إنما الكلام موجود هنا في أهرام النهاردة

شوية ارقام لن تسمعوها من إعلامنا الـ

من 902 يوم الأهلي ماداقش طعم الفوز على الزمالك (من يوم مباراة الستة .. كانت مباراة نحس :rolleyes: )

52 مباراة للزمالك في الدوري بدون هزيمة حتى الآن باستمراره 727 يوماً بدون هزيمة متفوقاً علي الأرسنال الإنجليزي الذي سقط في المباراة رقم 49 أمام مانشيستر يونايتد بخسارته 2/صفر.

الزمالك أفضل نادي في العالم في فبراير 2003 (الدليل موجود للي عايزه)

حد سمع عن الأرقام القياسية دي من الإعلام الأحححمممممر؟ أدي الأرقام القياسية و لا بلاش

تم تعديل 4 نوفمبر 2004 بواسطة Modest

[Modest]

الشهادة لله و علشان نعطي كل ذي حق حقه... لاعيبة الزمالك دول يتاقلوا بالذهب لإن مستحيل فريق يكسب و لو نقطة في الدوري في وجود مجلس إدارة مثل المجلس الحالي و خصوصاً السيد النائب مرتضى منصور صاحب الفرقعات الإعلامية الشهيرة و اللي كوووووووولللللهااا جت على مفيش.... fsh::

[mohamed]

المبارة هتبتدى كمان دقيقتين

ربنا يكون فى عونكم يا زملكاوية :rolleyes:

:blink: mfb:

[فــيــروز]

الاهلى جاب جون

[kfaya]

هجوم ساحق ماحق من جماهير الزمالك الغاضبة التى خرجت من كل شوارع و حوارى و نواصى ميت عقبة تهتف ضد لاعبى الزمالك و جهازة الفنى و مجلس أدارته ......

الكابتن مرتضى منصور تقدم ببلاغ للنائب العام ضد دولة تركيا التى تواطئت مع الأهلى ضد نادى الزمالك الغلبان .... كما تقدم بطلب لوزارة الخارجية لأستدعاء سفير مصر لدى تركيا للتشاور !!!!

مازالت مدرعات معسكر مبارك للأمن المركزى تطارد فلول مشجعى الزمالك الذين أمطروا النادى بوابل من الطوب و الحجارة و الزلط ..... و تم أغلاق منطقة ميت عقبة و أمبابة بالكامل و تحويل المرور للشوارع الجانبية .

[ragab2]

أهلى حديد

[masr_watany]

:::blink: :P :D :D :lol: mfb:

الأهلي الأهلي الأهلي

مستني اشوف رد اول محاور زمالكاوي :D

[hamo90]

مستني اشوف رد اول محاور زمالكاوي 

أنا شايف واح فيهم بس مش عارف هيقول بصراحة

أحنا انهارده عملنا كل حاجة في الكرة

والزمالك أثبت أنه لا كرة ولا أخلاق ( كنت زمان بعتبر عبدالحليم محترم كنت غلطان للاسف )

وعلي فكرة ضربة الجزاء بتاعت الاهلي غير صحيحة وبتاعت الزمالك التانية برده مش صحيحة عشان محدش يتحجج

حمو

[Tamsite]

ألف مبروك لإخواني من أفراد الكتيبة الحمراء ، الفوز الساحق و المستحق للنادي الأهلي على غريمه اللدود نادي الزمالك

و إن كانت لي بعض الملاحظات :

1- نتيجة 4-2 لا تعبر عن سير المباراة ذات السيناريو الغريب و المجنون

2- لعب لاعبو الأهلي بمستوى ادنى من المتوقع في خضم مباراة كبيرة كمباراة الزمالك، وبدا أن خط الوسط مفتقدا للتركيز المطلوب .

3- عاد إلى قواعده سالما ، الفنان المبدع محمد أبو تريكة مؤكدا أن ما حل به في الفترة الماضية ما هي إلا كبوة ، و قد استفاق منها أخيرا معلنا عودة الجواد الرابح إلى مضماره الأثير ( إيه الكلام الكبير قوي ده )

4- تغييرات مانويل جوزيه لم تكن موفقة بالمرة

5- لاعبو الزمالك امتازوا بالمهارة الفردية العالية و التي كادت تقلب سير الأحداث لأكثر من مرة - حظ اوفر لهولاء اللاعبين مستقبلا

6- طاقم التحكيم لم يكن على مستوى الحدث من الناحية الفنية ، وان بدت أن أعصاب الحكم و مساعديه متماسكة الى حد كبير بالرغم من سخونة المبارة، وقد تجلت عدة أخطاء تحكيمية عدلت من سير النتيجة التي ذكرت أنها لم تعبر عن سير المباراة ومنها:

- عدم احتساب ضربة جزارمستحقة لأحمد حسن ( الأهلي )

- احتساب ضربة جزار مشكوك في صحتها لعماد متعب ( الأهلي )

- احتساب ضربة جزاء ( كوميدية ) لوليد عبد اللطيف ( الزماللك ) بدلا من احتساب الكرة ( لعبة خطرة على نفس الاعب )

7- عبد الحليم علي : لا تعليق على ما بدر منه ، و انما أترقب رد فعل اتحاد الكرة على هذا الاعب

كفاية كده ................

فين باقي أفراد الكتيبة الحمراء ؟؟؟؟؟؟؟؟؟

خلونا نفرح شوية :blink:

[hamo90]

اتحاد الكرة فين .. عبدالحليم أهه

أبدأ الكلام بمقولة "ليس معنى أنك خسرت أن الحكم مرتشي .. فربما فريقك ضعيف جدا!!"

صدمت اليوم عندما شاهدت عبدالحليم على المفترض أن يكون هداف الدوري يشير بيده إلى أن حكم المباراة مرتشي .. من أنت لتتهم نادي القيم و المبادئ في أعز و أغلى و أفضل ما يملك ؟

ما حدث اليوم يا سادة لا يجب أن يمر مرور الكرام .. ما حدث اليوم يعتبر مهزلة بكل المقاييس , فعندما يأتي لاعب -لا طلع و لا نزل- بمجرد أن فريقه الضعيف فشل في تحقيق الفوز أو حتى فشل في الظهور بمظهر يحميه من الفضيحة و يأتي اللاعب ليتهم نادي القرن نادي المبادئ نادئ القيم و الأخلاق بإعطاء الحكم رشوة .. إذن فلابد من وقفة لوضع النقط فوق الحروف .. ما فعله عبدالحليم اليوم ليس مجرد اتهام عادي في لحظة عصبية .. لكن مهما كنت عصبيا فلابد أن تلتزم بحدودك.

أليس هذا العبدالحليم الذي ظهر على شاشات التلفاز مع وليد عبداللطيف؟ نعم يا سادة ظهر مع وليد صلاح عبداللطيف الذي هاجم الإدارة بعنف فنبهه عبدالحليم برفق حتى "لا يخبط في الحلل" و جاء اليوم عبدالحليم و ظهر أنه هو الذي يحتاج من ينبهه بالترفق .. لكنه هذه المرة مجبر على عدم تكرار هذه الواقعة بل و بالإعتذار الرسمي لما صدر منه في حق النادي الأهلي.

و واقعة اليوم شاهدها الجميع على شاشات التلفاز وعلى القنوات الفضائية و على المواقع الرياضية .. شاهدها الجميع في مختلف أنحاء الوطن العربي و بالطبع شاهدها اتحاد الكرة المصري .. و لننتظر لنرى رد فعل الاتحاد المصري!!

شاهد فضيحة عبد الحليم

حمو

[afiona]

تنبيه هام:

المداخلة دى تعليمية لتوضيح كيفية التعامل مع الهزيمة المفاجئة باخلاق الفرسان ..

مبروك .... mfb: :D .... وردة حمرا و قلب احمر عشانكم ...

الأهلي الأهلي الأهلي ...مستني اشوف رد اول محاور زمالكاوي

يا جماعة متخلوناش نفتكر ان احنا كنا بنلاعب اسكو او بنى مزار اللى عمرهم ما كسبوا ماتش قبل كده. ......عيب الحركات دى.

الحقيقه بعد كل المقاوحه دى الفريق اللى هيتهزم هيبقى موقف مشجعيه صعب جدا

ليه ? :blink: :P

الموضوع لا يخرج عن كونه نقاش بين اخوة لتوضيح ثم تثبيت حقائق تتعلق بتاريخ اسود للنادى الاحمر :D ...مش اكتر يعنى :D ... واحنا كمصريين و زملكاوية بوصفنا الشقيقة الكبرى بنتغاضى عن الاساءة .... :lol:

بخصوص الماتش .... انا لن اعلق على شتيبى اينشتاين اللى قرر ازالة ظهيرى الجنب و اللعب بتلات رؤوس حربة و بدون وسط مهاجم فى الشوط التانى .... او الدفاع المفتوح على البحرى ليس لسوء مستوى و لكن لعدم ترتيبه ....حاقول حاجات مش شيك ...

1- بس انا استمتعت بلعب بركات النهاردة. التمريرة التى اسفرت عن الهدف الاول تعكس رؤية رائعة للملعب ... طبعا غير مهاراته الممتازة .. انا متصور ان لو اسلام الشاطر لعب وراه باك يمين تبقى الجبهة اليمنى للاهلى رائعة ...

2- حسن مصطفى و جلبرتو وابو تريكة اديا مباراة ممتازة ...

3- دفاع الاهلى لا يختلف كثيرا عن دفاع الزمالك من سوء تغطية وترتيب و لكن الزمالك لم يستغل ما اتيح له من فرص.....

4- جمال حمزة ووليد عبد اللطيف عقيمان فى الهجوم -بيجبولى ضغط....مهارات لا خلاف عليها لكن مغطاة بغباء وانانية لا حد لها - وما بدر منهما فى مباراة الاسماعيلى كان كفيل بايقافهما و هو مؤشر على ضعف شخصية شتيبى.

5- مدحت شلبى معلق اهلاوى يدعو للغثيان ... فى حاجة اسمها professional attitude.... الرجل كان حينزل الملعب يبوس ابو تريكة بعد الهدف الثانى.... "عملتها يا مجرم انت" .... ده تعليق يتقال حتى ?و اى لمسة لاى لاعب احمر حتى لو كان وائل غشومية تبقى لمسة فنية و لم و رقص الفريق كله رغم انه بيبقى لوحده ....افففف ... ده غير بذاءات انحيازية لا حد لها واللازمة بتاعت الهلا هلا الاه ...احنا قاعدين فين ? بس الحق مش عليه ... الحق على اللى مشغلينه و دافعين فيه .... باين لما الاهلى اشترى لجنة الحكام المصرية خد المعلقين فوق البيعة ... buy a referee get a commentator يعنى ..

6- يا ترى ماسبيرو اذاع فيلم " ايلات " للاحتفال باول نصر من ثلاث سنين على مكابى تل زماليك ?

يبقى الزمالك مدرسة الفن و الهندسة و احسن نادى فى افريقيا و العالم العربى و صاحب الاداء الرائع غصب عن عين التخين.

احنا لسه بصحتنا اهوه ... :P

تم تعديل 5 نوفمبر 2004 بواسطة afiona

[hamo90]

باين لما الاهلى اشترى لجنة الحكام المصرية خد المعلقين فوق البيعة ... buy a referee get a commentator  يعنى ..

6- يا ترى ماسبيرو اذاع فيلم " ايلات " للاحتفال باول نصر من ثلاث سنين على مكابى تل زماليك ?

يبقى الزمالك مدرسة الفن و الهندسة و احسن نادى فى افريقيا و العالم العربى و صاحب الاداء الرائع غصب عن عين التخين.

احنا لسه بصحتنا اهوه ... :blink:

مفيش فايدة

حمو

تم تعديل 5 نوفمبر 2004 بواسطة hamo90

[فــيــروز]

الحقيقه بعد كل المقاوحه دى الفريق اللى هيتهزم هيبقى موقف مشجعيه صعب جدا

ليه ? :P :D

الموضوع لا يخرج عن كونه نقاش بين اخوة لتوضيح ثم تثبيت حقائق تتعلق بتاريخ اسود للنادى الاحمر mfb: ...مش اكتر يعنى :D ... واحنا كمصريين و زملكاوية بوصفنا الشقيقة الكبرى بنتغاضى عن الاساءة .... :D

يا سلام يا كابتن افيونه :P

دى الروح الرياضيه صح الصح :lol:

انما ايه حكاية الشقيقه الكبرى دى !! :D مين فتح صوت العرب !! :blink:

[se_ Elsyed]

واحد ....

إتنين ....

ثلاثة ...

أربعة ...

وكفاية كده وهاروح الموضوع اللي فتح محمد أفضفض فيه براحتي .. تشجيعاً للجيل الجديد اللي هايستلم الراية مننا ..

أنا جيييييييييييييييييييييييييييييييييي

[se_ Elsyed]

مش هاتكلم كتير ولا هالت او أعجن ..

أنا هاسيب الإنجازات هي اللي تتكلم .... 8 مباريات = 24 نقطة بنسبة نجاح 100 % .. المكان :داخل وخارج أرضنا ... يعني بإذن الله هاندخل كلية طب الأسنان مستريحين .. وسمعني يا عم اغنية الناجح يرفع إيده ( وبعدين ينزل بنفس الإيد على مرتضى منصور عشان يفوق )

[البحار الجريح]

الله على الحكايات اللي الاهلاويه مش عاوزين يفتكروها وبينكروها ,, التاريخ الاسود للاهلي

كم بطولة ياترى اخدها الاهلي بدون وجه حق ؟؟؟؟؟؟؟؟

ياااااااهـ

دا الواحد بجد كان جاهل ,,, خصوصاً حكايه الهدف بتاع حسن شحاته اللي اتلغى

ازاي اتغلى وايه رده فعل الاعلام الاحمر ؟؟؟ وايه رده فعل اخواننا الاهلاويه

ولا برضو بدل مايناقشو الموضوع دا ,, يهربو ويقولوا خليكم في الموسم دا والتحكيم الزملكاوي

ولو اتعملت مقارنه بسيطه ,, يلاقو انه اغلب ضربات الجزاء مشكووووووووك فيها ,, يعني ياضربه ,, يا لأ ,,

مش اوفسايد بدشليوووووووووووون يارده

ولا ايه ياجدعان

[se_ Elsyed]

يا عم ما هو ده اللي مودينا كلنا في داهية ... حضارة 7 آلاف سنة ... وقصص عن توت عنخ آمون لما ضرب أحمس مقص حراميه وهما ماشين في الدير البحري ..

خليكوا بس في مصيبة الزمالك القوية اللي ماوردتش على حد اليومين دول وبعدين إبقى تعالى اتكلم ..

مش حكاية إنه أنهزم مباريتين .. أبداً .. كل أندية العالم تتعرض للهزيمة .. ولكن ليس كل اندية العالم يحدث فيها مهازل مث اللي عندكم ...

هايقعدوا يقولولك حسن شحاته .. وأبو حباجة ... والدنيا مولعة من حواليهم ...

[se_ Elsyed]

أنا متأكد من إن كل الزملكاوية اللي بيهاجموا الإعلام ووسائل الإعلام ويتهموها بإنها منحازة للأهلي - أصلها بتقبض هي كمان من الاهلي زي الحكم التركي - عايزين الإعلام يبقى من نوعية كاتب المقال وهو كبير الزملكاوية وكان عضو مجلس إدارة في الزمالك قبل ما يبقى مُذيع ملاكي لهم وهو معروف وإسمه محمود معروف ... شوفوا الإسلوب وشوفوا لا مؤخذه السفالة والإنحطاط في إستخدام الالفاظ اللي المفروض إنها لا تصدر عن راجل كبير في السن وعامل نفسه ناقد وهو عضو مجلس شعب بالمناسبة .. بس كل مؤهلاته إنه بيكتب في جريدة الجمهورة السمورية

بدون مجاملة

دراجوسلاف.. في ستين داهية!!

كل عام وأنتم بخير بمناسبة عيد الفطر الذي جاء عيدا بالفعل علي جماهيرالأهلي والمصري والمحلة.. وعيدا حزينا علي جماهير الزمالك والمنصورة فكلاهما "شال الطين" علي فريقه.. ولقي هزيمة جديدة بعد الهزائم السابقة.

هل يتصور أحد ان فريقين "درجة رابعة" صعدا هذا العام فقط للدوري الممتاز "أسمنت اسيوط" و"أسمنت السويس" ينتزعان خمس نقاط من ست نقاط من الزمالك ولم تكن مفاجأة لمن يفهمون في كرة القدم لان الزمالك فريق مهلهل منهار يتولي تدريبه جهاز فني متواضع اقل من امكانات هذا النادي الكبير.. ومن اليوم الأول حذرنا من ضعف المدرب دراجوسلاف خاصة بعد هزيمة الزمالك 4/2 امام المقاولون العرب في مباراة كأس السوبر في بداية الموسم.

يومها قلنا انه مدرب بلا فكر ومن تعاقد معه ربما يقتسم معه نصف راتبه.. ليس له رأي وليست عنده رؤية وفي كل مرة يختار تشكيلا غربيا ويؤدي بطريقة لعب تسبب الكوارث والزمالك كان يستحق الهزيمة في غالبية المباريات التي لعبها ولم يتعلم الدرس من أخطائه ويصر علي الخطأ في المباراة التالية وكأنه يتعمد ان يخسر الزمالك لتتم اقالته ويطالب بالشرط الجزائي "180 ألف دولار مرتب عام كامل" ثم يرحل ويبحث عن ناد آخر يلهف منه قرشين والشرط الجزائي وهكذا.

هل يصدق أحد ان الزمالك يدخل مرماه "12 هدفا" في 8 مباريات؟ انها كارثة لم تحدث في تاريخه وهجومه عاجز ومشلول وغير قادر علي التسجيل خصوصا بعد رحيل حسام حسن وغياب عبد الحليم علي فاعتمد علي مهاجمين هما جمال حمزة ويلعب لحسابة أكثر مما يلعب للفريق ووليد عبد اللطيف الذي لهف من النادي "3 ملايين جنيه" ولم يسجل إلا 3 أهداف في موسم واحد خلال 5 سنوات يلعبها ولو لم يشتريه الزمالك ما دفع فيه أي ناد آخر الف جنيه لان مهاجما مثل أحمد عبد الغني لاعب حرس الحدود الذي اشتراه النادي بعشرين ألف جنيه يساوي عشرين ألف لاعب مثل وليد عبد اللطيف فهو لاعب "عاجز"..كل ما فعله في عامين انه "نطح" كرة ضالة اخطأها دفاع الاسماعيلي وسجل منها هدفا.. قبلها لم يسجل وبعدها لم يسجل.. كل ما يفعله انه يشتم زميله جمال حمزة في مباراة الاسماعيلي ويحاول ضرب حامل الراية في مباراة الاهلي.. ويعترض علي الحكم ومساعده في مبارة أسمنت السويس.

لابد ان يعود كابرال ليطهر الفريق من العناصر الضالة التي تضر بالفريق اكثر مما تفيده ويبحث عن مهاجم يليق باسم الزمالك علي مستوي عبد الحليم علي وأبوتريكة وعماد متعب ويعطي الفرصة كاملة للاعب محمد عبد الواحد مثلما اعطاها للاعب لا يصلح ابدا لارتداء فانلة نادي الزمالك والمصيبة اعطوه رقم 10 الذي ارتداه من قبل علي محسن وعلي خليل وعلي أبوجريشة ومحمود الخطيب.. تصوروا يرتدي وليد عبد اللطيف رقم 10 والمفروض ان يرتدي بيجامة!!

ولا يفوتني الاشادة بفريق أسمنت السويس الذي لعب مباراة رائعة وكل اللاعبين كانوا نجوما خاصة حمادة السيد وياسر واحمد فوزي وسامي قمصان والحارس الممتاز علي حجازي.. واشيد بالمدرب محمد عامر وجهاز ومجلس الادارة بصفة عامة.

محمود معروف

بالله عليكوا لو هو ناقد رياضي بحق وحقيق وخايف على النادي الزمالك وعارف غن فيه ناس بتقرأ له يقوم يكتب كده ؟ ..

[Modest]

محمود معروف مثال لبعض الصحافيين الذين امتهنوا الصحافة كمهنة للتسول يعني أطعمني تجدني.

من يوم ما إتقلش من انتخابات مجلس إدارة نادي الزمالك و هو بيكتب أي شيء ضد الزمالك (ده إذا كان له في الكتابة)

و اتقلب عيل صغير من يوم ما رد عليه وليد صلاح في قناة النيل للرياضة بعد ماتش الإسماعيلي الأخير و أصبح القلم اللي في إيده موجه أولاً ضد وليد صلاح باعتباره عدوه الرئيسي .. مش مهم يكتب إيه لكن المهم إنه يدخل وليد في الموضوع و يشتمه و من يومها و أنا احترمت اللاعب .. المرة دي مش علشان لعبُه و لكن علشان وضع الرجل ده في حجمه الطبيعي ... قال كلمة حق على الهواء و لم يفعل مثل لاعبين آخرين يقيمون علاقات مع الصحافيين لمجرد إنهم يكتبوا أسمائهم.

محمود معروف عضو غير موقر (أعتقد عن الحزب الوطني) بمجلسنا الغير موقر و يكفي هذا لكي أحكم عليه.

أرجوك لا تحسبه من الزمالكاوية الشرفاء يا كابتن س س ....