الأهلي هوه هوه بيكسب بره وجوه

[se_ Elsyed]

أرجوك لا تحسبه من الزمالكاوية الشرفاء يا كابتن س س ....

حاضر يا موديست ياخويا ..

والله خسارتك في الزمالك ... ليه يابني تبهدل نفسك البهدلة دي ؟

[afiona]

كلام جد ... ty:)

هناك مشاكل ادارية بنادى الزمالك وهناك فساد ادارى يؤثر سلبا على مسيرة الفريق عبر السنوات المختلفة. الزمالك دائما يمتلك اقوى فريق و هناك tradition للعب الجميل الممتع الذى يفضله جماهير الزمالك على النتائج الباهتة وهو فرق جوهرى بين الاهلى والزمالك.

لكن لا يمكن انكار وجود مشاكل ضخمة فى النادى وهناك من يعمل لمصلحته ضد مصلحة النادى وده ببساطة لان نادى الزمالك جزء من المجتمع المصرى وتظهر به كل مظاهر فساد المؤسسات المصرية.

ولكن الوضع لا يختلف الان فى الاهلى عنه فى الزمالك بعد رحيل المايسترو.

المايسترو -رحمه الله - حالة استثنائية فى الادارة ومن حسن حظ الاهلى انه تواجد فى الادارة بشكل او باخر منذ اعتزاله مما ادى الى انضباط الاهلى .... ولكن فى الاعوام التى تولى بها الوحش الرئاسة كان الاهلى وكالة من غير بواب و انهارت به القيم بشدة ....

والاعوام الماضية بعد رحيل الكابتن صالح سليم اثبتت نفس الشئ ...

الشئ الوحيد الذى يؤخذ على المايسترو هو عدم اعداده لجيل يتحمل المسئولية بعده باسلوبه وهى من مهام اى ادارى ناجح.

لو تولى طاهر ابو زيد الرئاسة يوما ما حنتفرج ...

[afiona]

بالنسبة لمرتضى منصور اللى له مراسل خصوصى فى المنتدى يتابع اخباره و ينقلها لنا كل يوم عشان نتغم اكثر ... فلا داعى للتعليق عليه وعلى شخصه ولن نختلف حوله ..

بالنسبة لمحمود معروف ... يؤخذ عليه بشدة استخدامه لالفاظ غير لائقة فى كتاباته ولكن لا اعلم لماذا لا ينتقد الكتاب الاهلويون لنفس السبب ? فى سبتمبر 1993... بعد مباراة ال3/0 الشهيرة التى اهداها جمال الشريف للاهلى ... خرجت اخبار الرياضة و الاهرام الرياضى بمانشيتات غريبة و كان هناك تشفى واضح و الفاظ وقحة .... يعنى برضه الموضوع على الجانبين بس محمود معروف singled out لانه الزملكاوى الوحيد بين النقاد ...

ولكن يحسب لمحمود معروف ان الجمهورية متزنة فى التحليل وليست كالاخبار او الاهرام او الوفد وهى صحف منحازة للاهلى بشكل وقح و تعمل بشدة على تحطيم الزمالك ...

بالنسبة لاراء محمود معروف الفنية .. وبغض النظر عن الفاظه...

فوليد صلاح فعلا لاعب تعبان وبطئ وانانى سواء هو او جمال حمزة صاحب الالف زحلقة .... وان كان كابرال قد نجح فى توظيفه بشكل جيد ...

برضه مثال للمهارة الغير مستغلة بسبب عوامل اخرى ...

اما عن دراحوسلاف ... فما القول فى مدرب يتسلم فريقا قويا متماسك الخطوط وبالبلدى "تقيل " ويفككه بخطط غريبة و توظيف لاعبين اهوج احمق. بالسلامة يا دراجو بالسلامة ....

[البحار الجريح]

حد يكلمنا ياجماعه عن فضائح الاعلام الاحمر والحكام مع الاهلي

عاوزين الجميل الصغير يعرف المعلومات دي

[solimano]

اخر مرة اتفرجت على دورى كنت فى مانشستر سنة 1996 والاهلى غلب الزمالك وبعدين اللعيبة كانوا عايزين يشيلوا العرض ويبوظوا الماتش وشكلنا بقى وحش أوى عند الانجليز - بس ساعتها حسيت ان لعيبة الزمالك وجمهوره معمول لهم حاجة مشحونين بشكل غريب ومستنيين أى هفوة علشان ينفجروا.

فاكر زمااااان الجمهورية كتبت مانشيت عريض يقول "الزمالك صال وضيعه بلال"

فعلا الزمالك ساعتها لعب وصال وجال والحكم أخطأ وألغى هدف مش فاكر لحسن شحاته تقريبا. بس ما أقدرش أقول مرتشى والكلام ده

الحقيقة أنا نسيت التفاصيل لكن المانشيت لسه فاكره وكان يعبر عما يشتكى منه الزمالكاوية.

أذا كان الاهلى بيشترى حسب ما يقول البعض فلماذا لا يشترى الزمالك ايضا واللا الناس دى بتجامل الاهلى ببلاش كده وتضحى بسمعتها عشلن الاهلى ياخد الدورى. وبعدين ايه اللى حصل فى الخمس سنين العجاف اللى فاتو هل الاهلى ما دفعش واللا الناس فجأة ضميرها صحى؟

ساعات باحس ان نتيجة المباراة متحددة من فوق ...سياسة دولة يعنى ... وليه لأ

وأعتقد هذا أوجه من الرشاوى ولجنة الحكام والاهلى بيدفع كام والأغانى أياها

أذا كان ليبيا غلبت الكاميرون ومصر وأعتقد انها هتفوز فى كل المباريات المقامة فى طرابلس مجاملة - مدفوعة الأجر- لنجل القذافى ونفس الشئ يحدث لفريقه فى الدورى الليبى بس ببلاش. ليه ده ما يكونش تفسير اللى بيحصل. هتقوللى مصر مش زى ليبيا أقوللك سبق وقولنا مصر مش زى سوريا

بس برضه الأهلى حديد

[se_ Elsyed]

طول ما دي طريقة تفكير الزملكاوية زي أفيونة والاخ البحار الجريح .. يبقى عليه العوض في الكورة ...

عندهم عقدة معادة الزملكاوية زي معاداة السامية كده ..

الاخبار والاهرام والوفد ومجلة البعكوكة والحكام المصريين والعرب والاترك وحكام بوركينا فاسو كلهم ضد الزمالك وبيقبضوا من الاهلي...

آه ونسيت حاجة .. أصل محبط عد قبل كده كل البرامج الرياضية وقناة النيل للرياضة وقناة MBC FM كلهم برضوا ضد الزمالك وبيقبضوا من الاهلي ..

والزمالك هو بس مدرسة الفن والهندسة الثانوية بنين ...

والاهلي فريق مرتزقة لإنه بيشتري لعيبة من بره ...

أما الزمالك يا عيني عليه بقى له 10 سنين لا يلعب له إلا ناشيئة وأصبح مفرخه للمواهب ...

بصراحة ما فيش فايدة فيكم وإنتوا أخركم موقع الزمالك دوت كوم ... روحوا وشوفوا بيعملوا إيه في بعض هناك وإيه الألفاظ اللي بتستخدم حتى في كلامهم مع بعض مش هاقول مع الاعداء ...

وزي ما قولتها قبل كده إذا كنت ترى الحقائق بعين واحده وبلون واحد يبقى كل اللي إنت عايش فيه سررررررررررررراب ...

يا أخي هل يقلل من شأنك إنك تُشيد بفريق الاهلي او الإسماعيلي أو أي فريق بيلعب كورة كويس ... ده لو كنت بتشجع الكورة أساساً ؟

[afiona]

طب يا عم الكاستن ... اهدى بس وخد كباية عصير قصب روق بها دمك ...

مفيش عقد ولا بتاع ودى فى الاخر كرة يعنى ترفيه وفى الاخر الحديث يغلب عليه الطابع الفكاهى وشوية الدقائق اللى بنقضيها على النت مش حنتعكنن فيها ....

أخي هل يقلل من شأنك إنك تُشيد بفريق الاهلي او الإسماعيلي أو أي فريق بيلعب كورة كويس ... ده لو كنت بتشجع الكورة أساساً ؟

لا طبعا ... الاسماعيلى برازيل مصر ... :)

بس هى طريقة لعب الاهلى بشكل عام لا تعجب الزملكاوية ... اذواق ... لكن هناك مباريات رائعة للاهلى .... لا شك ...

عندهم عقدة معادة الزملكاوية زي معاداة السامية كده ..

همم ...بس التشبيه مش ظريف ... اصل our cousins على راى الراحل الرئيس ابو عمارهم اللى عندهم العقدة دى .... ده كلام برضه ?

:rolleyes:

كل الموضوع ان فى حوادث متكررة تم توضيحها تظهر التحيز للاهلى.

يا اما الحوادث دى لم تحدث على الاطلاق واحنا بيتهيا لنا ...

يعنى مثلا لم يقم محمد حسام بالغاء هدف حسن شحاتة باشارة محمد عبد العزيز وما الى ذلك من حوادث وده تنويم مغناطيسى لجماهير الزمالك خلاهم يتهيا لهم كده .... او تكون هذه الحوادث احنا فاهمينها غلط وده مش تحيز للاهلى..لا.. ده تحيز للزمالك .... يمكن الغاء هدف زملكاوى مثلا ده لمصلحة الزمالك .....

وبعدين يا عم الحكم التركى كتر خيره ... لم يتهمه احد هنا بالتحيز للاهلى ....

بصراحة ما فيش فايدة فيكم وإنتوا أخركم موقع الزمالك دوت كوم ... روحوا وشوفوا بيعملوا إيه في بعض هناك وإيه الألفاظ اللي بتستخدم حتى في كلامهم مع بعض مش هاقول مع الاعداء ...

طب وانا مالى بدوت كوم ولا دوت اورج ?

ولنفرض انه موقع مش على مستوى الحوار اللازم... وانا مش متابعه ... انت رايك ان احنا ده مستوى الحوارالمناسب لنا ?

[هيثم نافع]

مبروك للأهلى الفوز اليوم على إنبي 2/1 بعد مبارة عصيبه

بيب بيب أهلي <_<

[hamo90]

الأهلي يحقق فوزا "قيصريا" على إنبي 2-1

حقق الأهلي فوزا صعبا على مضيفه إنبي بهدفين مقابل هدف واحد يوم الأربعاء في مباراة قوية على ملعب المقاولون العرب في ختام مباريات المرحلة التاسعة للدوري الممتاز ، ليواصل "الشياطين الحمر" تحليقهم المنفرد على قمة الترتيب.

تقدم إنبي عن طريق محمد ثابت "صاروخ" في الدقيقة الثانية ، وتعادل عماد النحاس للأهلي في الدقيقة العاشرة ، وأحرز أسامة حسني هدف الفوز للفريق الأحمر في الدقيقة 83 من ركلة جزاء.

الفوز رفع رصيد الأهلي الى 27 نقطة في صدارة الترتيب ، بفارق عشر نقاط عن أقرب منافسيه ، بينما جمدت الهزيمة رصيد إنبي عند 13 نقطة في المركز السادس.

ومن المقرر أن يلتقي الأهلي مع الجيش يوم الأحد القادم ضمن مباريات المرحلة العاشرة ، بينما يحل إنبي ضيفا على أسمنت السويس في اليوم نفسه.

المباراة في مجملها جاءت مرتفعة المستوى ، سيطر الأهلي "نسبيا" على منتصف الملعب في أغلب فترات اللقاء ، إلا أن الخطورة كانت متبادلة بين الفريقين طوال زمن المباراة.

البداية كانت ساخنة بهدف مبكر من صاروخ تقدم به إنبي "كالعادة" على الأهلي ، عن طريق هجمة منظمة بدأها عمرو زكي الى هاني عبدالله ، الذي هيأها سهلة الى صاروخ ليودعها الأخير مرمى الأهلي دون عناء محرزا هدف السبق لأصحاب الأرض.

رد الأهلي سريعا عن طريق النحاس الذي أحرز هدفا "بالتخصص" بعدما ارتقى برأسه لكرة زميله الأنجولي جيلبرتو من ركلة ركنية وأودعها مرمى مصطفى كمال حارس إنبي ، ولم تفلح محاولات مدافعي أصحاب الأرض في انقاذها.

أجرى إنبي تغييرا اضطراريا بسبب اصابة محمد الزيات ، مدافع الأهلي السابق ، ودخل بدلا منه عمر خطاب ، الذي تميز في ألعاب الهواء ، ونجح في الحد من خطورة مهاجم الأهلي عماد متعب في الشوط الأول.

لم ينجح "الشياطين الحمر" في اختراق دفاع إنبي المحكم في الشوط الأول ، بالرغم من تألق جيلبرتو في الجبهة اليسرى التي شكل فيها خطورة كبيرة على الفريق المنافس ، ولعب طه بصري المدير الفني لإنبي بخطة دفاعية نجح بها في ايقاف جميع مفاتيح لعب الأهلي.

ركلة الجزاء التي حصل عليها متعب

دفع البرتغالي مانويل جوزيه المدير الفني للأهلي بأحمد حسن بدلا من حسن مصطفى مع بداية الشوط الثاني ، إلا أن حسن لم يظهر بمستواه المعهود ، وأثار استياء جماهير الأهلي بسبب بطئه الشديد وعدم دقة تمريراته.

كانت الجماهير المحتشدة في المدرجات على موعد مع أجمل هجمات اللقاء في الدقيقة 55 ، بعد أن مرر "الساحر" محمد أبوتريكة كرة "ماكرة" الى متعب ، الذي انفرد بمرمى كمال وراوغه ، وأودعها بغرابة خارج المرمى مهدرا أخطر فرص الأهلي في المباراة.

أضاع الأهلي عدة فرص سهلة عن طريق وائل جمعة ، وأسامة حسني ، البعيد تماما عن مستواه ، ومتعب ، وأجرى جوزيه تغييرين غير موفقين بدخول الكولومبي رافائيل كاستيللو والنيجيري هنري ماكينواه "ماكي" بدلا من جيلبرتو ، أفضل لاعبي الأهلي ، وأبوتريكة ، وأضاع المهاجم النيجيري فرصة سهلة وهو منفرد تماما بمرمى إنبي.

في المقابل ، شكلت هجمات إنبي العكسية خطورة هائلة على مرمى الأهلي ، وتصدى عصام الحضري حارس "الشياطين الحمر" لفرصتين محققتين ، الأولى من المهاجم الدولي عمرو زكي من انفراد تام ، والأخرى من مجدي عبدالعاطي ، الذي راوغ شادي محمد مدافع الأهلي وسددها قوية ، تصدى لها قائد الأهلي ببراعة.

وفي الدقيقة 83 ، احتسب حكم المباراة "المميز" فهيم عمر ركلة جزاء لمصلحة متعب بعد عرقلته من قبل عمرو عبدالعزيز مدافع إنبي ، انبرى لها حسني بنجاح محرزا هدف الفوز الثمين للأهلي.

وشهدت الدقائق المتبقية اداء عصبيا من الفريقين ، خاصة من جانب إنبي ، بعد طرد مدربه بصري لاعتراضه بشكل غير لائق على حكم المباراة احتجاجا على احتساب ركلة جزاء ضد فريقه.

<_< الاهلي منفردا بالقمة , أطلع يا زمالك لو تقدر

حمو

تم تعديل 17 نوفمبر 2004 بواسطة hamo90

[se_ Elsyed]

على فكرة يا جماعة لاحظت حاجة غريبة جداً جداً في ترتيب مباريات جدول الدوري لهذا العام .. وأرجو ان تلقوا نظرة على موضوعي اللي في باب الرياضة برضوا عن الجدول .

الملاحظة هي إن معظم الفرق اللي بيقابلها الأهلي بتكون لعبت الإسماعيلي في المباراة اللي قبلها على طول ... إبقوا لاحظوا كده وقولوا رأيكم ..

جدول الدوري للفرسان الثلاثة ... ثلاثة إيه ؟!!! ما بقاش غير فارس واحد بس وهو بيب بيب أهلي

بالمناسبة ...

فريق طلائع الجيش لب الإسماعيلي إمبارح 2/1 ... وإستكمالاً للغرابة .. الاهلي هايواجه الجيش يوم الحد الجاي ... وإمبارح لعبنا إنبي .. وكان الإسماعيلي ملاعبه الماتش اللي فات ... والأسبوع اللي فات لعبنا أسمنت أسيوط وغلبناه .. وكان الإسماعيلي ملاعبه الماتش اللي قبله وغلبه 4/0 في أسيوط !!!!

مبروك للأهلي واحبابه فرحة جمهورة وإعجابة :rolleyes:

[Ahmed Mohsen]

عادي يا س س ........

السنة دي كل اللي بيلاعب الإسماعيلي بيطلع علي الأهلي ..... واللي بيلاعب الأهلي بيطلع علي أسمنت السويس ...... ةاللي بيلاعب البلدية بيطلع علي الزمالك ....... واللي بيلاعب الزمالك بيطلع علي أسمنت أسيوط

هو ده نظام الجدول

أحمد محسن

خبير جداول دوري مصر

تم تعديل 18 نوفمبر 2004 بواسطة Ahmed Mohsen

[disappointed]

:rolleyes:

أمّا جمهور الأهلى ده طيّب و نيّته سليمه بشكل

mf)

سى السيّد يا عزيزى....إنت بجد فاكر إن الموضوع صدفة أو ملحوظة على الماشى؟؟؟

:D

الجدول محطوط بحيث إن الأهلى يستلم الفرق اللى حيلاعبها من تحت إيد الإسماعيلى

واضح جدا إن القرعة بتاعة الجدول اللى حطّها إتحاد عصام عبد المنعم الأحمر هى قرعة موجهة تضمن ملاقاة الأهلى للفرق بعد أن تكون منهكة من مباراة صعبة و قوية مع الإسماعيلى و فى ظل الحصول على الأرجح على نسبة إنذارات عالية قد تؤدّى إلى إقصاء عدد من العناصر عن مباراة الأهلى ( لاحظ غياب 3 لاعبين من البلدية عن مباراة الأهلى , و تامر عبد الحميد عن مباراة الزمالك و الأهلى , و قلبى دفاع و صانع ألعاب إنبى عن لقاء الأهلى... و كلّهم بسبب الإنذارات فى مباراة الإسماعيلى.... وعلى فكرة....5 من لاعبى الجيش بالأمس حصلوا على إنذارات منهم 3 لن يلعبوا مباراة الأهلى)

اللى عمله عصام عبد المنعم و الإعلام و إدارة الأهلى السنه دى علشان يتأكّدوا من حصول الأهلى على الدورى عامل زى اللى عاوز يقتل واحد و يتأكّد من إنه قتله فراح حاطط له السم فى الأكل و بعد ما مات فرّغ فى دماغه دفعة رشاش و بعدين شنق الجثّة و بعدين ولّع فيها بالنار و بعدين ربطها بهلب و رماها فى النيل

mf)

لازلت عند رأيى

لابد من عمل تمثال لعصام عبد المنعم فى حديقة النادى الأهلى و توشيحه بوشاح مختار التتش من الدرجة الأولى فى الحفل الساهر الذى ستقيمه ليلى نظمى أو نجاة الصغيرة بمناسبة فوز الأهلى بالدورى

(والله زمااااان..... بقالنا كثييييير ماسمعناش ليلى نظمى و نجاة الصغيرة فى هذه الحفلات....همّه إعتزلوا الغناء و الاّ الأهلى هوّه اللى إعتزل البطولات؟؟؟)

:P :P :P :D ;) ;)

تم تعديل 18 نوفمبر 2004 بواسطة disappointed

[Ahmed Mohsen]

مش عارف يا كابتن محبط أقولك إيه ........

بس صراحة أنا مش متفق معاك في النقطة دي تحديدا .......

ليه ...........

عشان جدول الدوري بيتحط كده كل سنة .... قصدي يعني بالطريقة دي

كل فريق بيلاعب فريق معين يطلع بعديها يلاعب فريق آخر معين ... وهكذا

في السنة بتاعت 6/1 الأهلي والزمالك و4/3 الإسماعيلي والأهلي ........ كان اللي بيلاعب الزمالك يطلع علي الإسماعيلي علي طول

وهكذا كل سنة ...... السنة اللي فاتت مش فاكر كان مين بيلاعب مين بعد مين ..... بس هو ده اللي بيحصل كل سنة

متهيألي الموضوع ده بيتحدد بالقرعة

يعني يتعمل قرعة علي اللي يلاعب الزمالك يطلع علي مين واللي يلاعب الأهلي يطلع علي مين واللي يلاعب أسوان يطلع علي مين وهكذا دواليك دواليك

حلوة دواليك دي ...... بئيت مسقف أخيران يا واد يا حمادة

تم تعديل 18 نوفمبر 2004 بواسطة Ahmed Mohsen

[afiona]

وفي الدقيقة 83 ، احتسب حكم المباراة "المميز" فهيم عمر ركلة جزاء لمصلحة متعب بعد عرقلته من قبل عمرو عبدالعزيز مدافع إنبي ، انبرى لها حسني بنجاح محرزا هدف الفوز الثمين للأهلي.

:rolleyes: :D :D mf)

على راى واحد صاحبنا :" حيكسبوا امتى من غير بينالتى (او بلم عشان الاهلوية يفهموها fsh:: ) ...

[Ahmed Mohsen]

ليه بس كدة يا أفيونة ياخويا .......

هتجيبلنا الكلام كدة .......

بلاش إحنا بالذات في موضوع ضربات الجزاء دي السنة دي .....

يا راجل يا طيب ...... 9 مباريات فيهم 8 أو 9 ضربات جزاء ومافيهمش غير 2 بس اللي صح ؟؟؟؟؟؟؟؟؟

بلاش نجيب لنفسنا الكلام ......

[afiona]

:D :D

احمد بيه محسن ..(مش عارف ليه الاسم ينفع على بيه يمثل دوره احمد مظهر ) ...

سموك.... عدو :rolleyes: ولا حبيب mf) ?

فيه فرق جوهرى بين دوكهما و دولهما ...

[Ahmed Mohsen]

حبيب والله حبيب .........

حبيب ومتعذب كمان ........

متعذب من نار الحب ومتلهلب ......

بس راضي وبقول الحمد لله .......

أنا زمالكاوي من الصميم وبعشق الزمالك من كل قلبي

[R.M.G.]

مع اني لا لي في الكورة ولا في الطحين وحياله مشجع على ما تفرج بس الشهادة لله لا بطيق الأهلى ولا الزمالك لأنهما سبب الوكسة الكروية ويمكن لأنهم م الأكابر أوي وانا م البرجوازيين الغلابة والكادحين بس لي ملاحظات

1- في البلم بتاع عماد متعب مش فام ازاي واح يتشد من ضهره يقوم يقع على وشه إلا إذا كانت كوانين الميكاميكا اتغيرت ولما الونش يسحب لي العربية من بوزها تقوم تمشي لورا

2- لما جماهير الأهلي شتمت عبحليم علي راح الولد - ولأنه مش متربي كويس - عمل كام حركة بصوابعة ماعجابتش اي حد ونال جزاءه وقف 3 متوشه و10000جنية غرامة ماشي يستاهل لكن لما جماهير الزمالك شتمت انور تلامة الشهير بأنور سلامة راح صاحبنا انور مشاور لهم بأربع صوابع بحركات استفزازية فهل ياترى هيتاخد ضده اجراء؟ ماظنش

3- لما العقيد مانويل خوزيه يعترض على حاجه مش عجباه وياماكتر اللي مش بيعجبه وياماكتر اعتراضاته مفيهاش حاجة ...عادي بس لما الولد الأسمر أبو شعر اكرت اللي حياله اسمه طه بصري يعملها وللمرة الأولى يمكن في حياته يتشتم وينطرد ومش بعيد يتعملو ملف في امن الدوله

ويالا كله ماشي

[أسامة الكباريتي]

كل ده ومالكش في الكورة!!!

مساكين ياجمهور الزمالك ..

بدل ما تعلقوا خيبتكم في ناديكم على شماعة الاتحاد والحكام والأهرام والأخبار والوفد ..

ما تشوفوا مرتضى ودرويش بيهببوا إيه !!

حقيقة من يوم ما سبكم حسام حسن وانتوا في النازل ..

كان وشه عليكم يعني ..

بما يحمله من نفحات أهلاوية ..

[R.M.G.]

عزيزي المحترم جدا أسامة

أقسم لك أنني لست زمالكاويا وكل اللي كتبته كان من وحي اللحظه وكلها كانت أمور حديثه جدا يعني تحديدا بعد مباراة الأهلي وأنبي ولكن للأسف الأمر ظهر وكأنه موجه ضد الأهلي وهذا يدعوني للأستمرار في ابداء ملاحظاتي :

1- مسكين الشعب المصري أصابه الملعونان الكبيران بأمراض نفسيه مستعصيه فمابين عقدة اضطهاد يحملها الزمالكاويون ونرجسيه أهلاويه صورت لهم يوما انه لما جلس مبارك بجوار صالح سليم قالو "الناس كانت بتسأل مين اللي جنب صالح سليم ده"

2- ملعونة كل القوانين والأخلاقيات اذا مااصتدمت بهما أقصد الصنمان الكبيران فها هو لاعب ابيض وكابتن شهير يضبط بوكر دعارة ومشجع ابيض يلقى بحجر على رأس حكم فتعاد المباراه بعد الضغط على الحكم ليغير تقريره ولتذهب القيم الى الجحيم

ولا ننسى أن لاعبا احمر شهيرا قتل رجلا بسيارته لجنون السرعة والشهرة وايضا لم يحدث أي شيئ ...حاجات تقرف

3- الأهلي والزمالك ( وأعتذر للأهلاويه عن وضع كلمة زمالك بجوار الأهلي وايش جاب لجاب) هما محرقة النجوم في مصرواسألوا الزمالك عن الدوماني واحمد ساري واحمد صالح مؤخرا واسالوا الأهلي عن سعيد عبد العزيز وخالد بيبو وفي الطريق اسلام الشاطر

وياعزيزي اسامه لا تجعل اهلاويتك الشديدة تنحى بك عن منهجك المتزن في الحكم على الأمور وعلى العبد لله ولا داعي لأن تجعلني أقسم بالله أنني لست زمالكاويا مرة اخرى