سجل حضورك بإسم كتاب أعجبك

[abobakr]

انا مش عارف لو الموضوع اتعمل قبل كده ولا لا

الفكرة كنت امبارح في معرض الكتاب بعد مام سوزان ما خلاص بقت باي باي

وكنت محتار أجيب ايه ولا ايه

فيه كتب يشدك عنوانها وبعدين تلاقيها فاضية من الداخل

وفيه كتب على قد قيمتها الكبيرة على قد انها ممكن مش تشدك انك تقتنيها

كل واحد يدخل يقول اسم كتاب قرأه وعجبه وياريت لو يقول نبذة عن الكتاب

[ozoozo]

دع القلق وابدا الحياه لكارنيجي

والنسخه الاسلاميه منه لا تحزن للقرني

لكن نسخه كارنيجي اكثر عمقا

[لماضة مصرية جدا]

السلام عليكم و رحمة الله و بركاته

أما الحق احط المداخلة ديت قبل ما يضموا الموضوع علي الاوضة اللي جنبه...(ده صوت عقلي الجواني اصلي حاسة التوبيك دوت اتعمل قبل كدهوت)

هختار 3 كتب

الولاني اسمه

The Knowing Heart

القلب العارف

انا روحت علي الكتاب علشان افتكرته كتاب مشاعير و حركات و كدهوت و بعدين بعد ما فتحت الجلدة لقيته بيتكلم عن حياة متعبد صوفي و بيوصف رحلته للترقي في العبادة علشان "يعرف" ربنا....و طريقه للوصول كان عن طريق قلبه

اللي لفت نظري في الكتاب ان لغتة بسيطة و سهلة و تحس انه حوار انساني

فيه كتير من المواقف اللي جت في الكتاب ممكن كل حد فينا يكون مر بيها

بس الجديد بالنسبة ليا علي الأقل ان الكاتب و هو بيحكي رحلته...كأنه "جراح" بيلمس وتر في القلب و يعيد ضخ الدماء فيه بس علي مراد الله و طاعته

عجبني الكتاب....موجود بمكتبة الجامعة الامريكية اللي في باب اللوق

--------------------------------------

تأملات في دنيا الله

دكتور مصطفي محمود

ده بيكون معايا منين ما أكون...مسافرة....رايحة اشتري طلبات....هنام....هقابل ناس اول مرة اشوفهم

الكتاب برضه من عنوانه...و مضمونه...انه تأملات بيضعها دكتور مصطفي الله يرحمه عن الكون بحاله

شخصيا كل مرة بقرأ فيها الكتاب بحس اني محتاجة ارجع اقراه تاني

و بحس آد ايه تقديري للأمور و تضخيمي لبعض المواقف مش مستاهل لو الواحد ابحر في الكون الي ربنا خلقه بابداع متناهي

------------------

آخر كتاب

متضحكشي عليا لو سمحت

اسمه

شاب كوشك

بتاع عمرو سلامة

ده لسه نازل جديد و للاسف نسيته في مصر في العربية قبل ما اسافر

كتاب لغتة بسيطة اوي و بيعتمد انه بيخليك تتخيل انك واقف علي الكوشك اللي علي اول ناصية بيتكم و بتتكلموا في كل حاجة بداية من البنت ريهام اللي اتحجبت و نهاية من راح يحكم مصر...(هو اللي بيقول مش انا ع فكرة)

ده بقي بتقطع عليه

اكسب فيا ثواب

و اشتريهولي

و تعالي غظني

اتمني الاقي الرابط بتاعه ع النت

طولت علي حضرتك

مساك......كتاب...مش بس انت بتقراه بعينيك...لا هو كمان بينكش حاجات كتير جواك

[لماضة مصرية جدا]

وفيه كتب على قد قيمتها الكبيرة على قد انها ممكن مش تشدك انك تقتنيها

[/

لو تسمحلي بس اقول لحضرتك فكرة انا بعملها انا و اخويا في البيت بخصوص المكتبة

احنا بنحاول نحط فيها كل التيارات و كل الاتجاهات...يعني هتلاقي جزء خاص بحاجة بنسميها أمهات الكتب...يعني كتب اساسية كده لازم تكون في مكتبتك...احنا ابتدينا بالمذاهب الاربعة...(كل ما اتزنق في حاجة الاقي اخويا بيقولي انتي بتعرفي تقري و لا بصمجية...و يخليني اطلعها من الاربع كتب ديت)

اقتني كتب سياسة

كتب خفيفة

كتب صحة نفسية

كتب تطوير الذات

كتب عن الخيال

مجلدات شعر لمختلف الشعراء

كتب عن المدونات اللي كانت انترنت و اتحولت كتب

ده احنا عندنا كتب عن غسيل الاموال يا استاذي....(و اموت و اعرف احنا بنجيبها ليه مع ان اصلا مافيش اموال علشان تتغسل ...الحمد لله)

حقيقي المكتبة بشكل كبير بتعبر عن شخصيتك و اتجاهاتك انت...بس كل ما بتدي قماشة لنفسك اوسع في الاختيارات....بتستمتع في القراية اكتر

و هتلاقي كتب بسعر هايل جدا بس خلي حضرتك متابع كل شوية

احنا بنعمل كده

و اتمني ده يعجب حضرتك

و تيجي مرة و تفتحلنا توبيك عن مكتبتك الخاصة

تحياتي استاذي

[التونسى]

رباعيات صلاح جاهين .. اعتقد انها غنيه عن التعريف .. أزعم اننى تعلمت منها الكثير .. فلسفيا وشعريا

[abobakr]

منورين يا جماعة

وبالنسبة للكتاب التالت يا لماضة انا كنت فاكر اسمه متضحكشي عليا لو سمحت

[ViralMind]

المتلاعبون بالعقول.. لكاتب المانى مش فاكر اسمه.

[abobakr]

أحب اضيف كتاب

100 طريقة لتحفيز نفسك

ساعات بجد الدنيا بتكون خلاص متقفلة في وش الواحد

ومحتاج طريقة يشوف ان نص الكوباية لسه مليان

[م تيمور المراغي]

الرحيق المختوم

عن سيرة النبي عليه الصلاة والسلام

[لماضة مصرية جدا]

منورين يا جماعة

وبالنسبة للكتاب التالت يا لماضة انا كنت فاكر اسمه متضحكشي عليا لو سمحت

طب اقول لحضرتك علي حاجة...(و متضحكشي عليا لو سمحت...مع اني متأكدة انك بتضحك دلوقتي)

المفروض اني دلوقتي بحاول اركز علشان اطلع حاجة كده زي الكتاب..و كنت محتارة في الاسم بتاعه جدا اسميه

لمضاويات...

خواطر لمضمض...

مضمضمة الروح smk:

....و بعدين اخيرا كده شكلي هسميه

"متضحكشي عليا لو سمحت"

و بتكلم بجد

لاني لما بتكلم...

بحس ان اللي قدامي بيضحك...

مش عارفة عليا

و لا علي الافكار اللي بقولها :blink:

بس برضه

هكتب

و اعبر

و افضل ماسكة الماكرفون :P

شكرا لحضرتك

لو نجحت و الكتاب كسر الدنيا و فوق السطوح و كدهوت هيبقي لحضرتك طبعا نسبة من الارباح...(ربع جنيه مخروم علي كل جلدة كتاب :P )

[abobakr]

منور تيمووور

انا المفروض ليا نص الارباح ده انا اللي مختار الاسم

بصي اول ما تنزله قولي عشان اجي اقعد على باب المطبعة واشوف كام نسخة واحسب الارباح

بالتوفيق وبإذن الله يكون كتاب جميل

[Dreamwithme]

كتب كثيرة ما أقدرش أقول واحد بس

هأقول علي مجموعة من الكتب

كتاب لا تحزن لعائض القرني وكتاب جدد حياتك للشيخ محمد الغزالي

وعموما أي كتاب لمحمد الغزالي بيبقي تحفة

وأي كتاب لد/أحمد خالد توفيق

كتاب تاكسي لخالد الخميسي

أي كتاب لبلال فضل وأحمد رجب

كتاب الرجال من المريخ والنساء من الزهرة من مكتبة جرير

وكتاب عقل مثل الماء برضه من جرير

أما الروايات فعزازيل

وسفينة نوح وأي رواية لتوفيق الحكيم

[التونسى]

محمد على واولاده .. بناة مصر الحديثه .. لجمال بدوى

اخر كتاب قرأته .. من اجمل الكتب التاريخيه التى قرأتها .. به زخم من المعلومات التاريخيه عن مصر فى فترة حكم عائلة محمد على لمصر .. وقفت امام تلك المعلومات مشدوها .. يخجلنى جهلى بفتره مهمه جدا من تاريخ مصر الحديث .. واهم تلك المعلومات هى كيف تم تكوين جيش مصر الحديث ((من ابناء البلد الاصليين وليس الاجانب)) .. وكيف ان التاريخ يعيد نفسه .. ورغم ذلك قلما يتعظ الحكام او الشعوب ويلتمسون العبرة من الماضى .. الذى يعود ولكن باشكال وشخوص مختلفة

انصح بقراءة ذلك الكتاب الماتع

[Om Zayd]

السلام عليكم و رحمة الله و بركاته

زمان .. كنت اللي بيقع تحت ايدي بقراه

كتب ..مقالات.. قصاقيص حتى

لسة عندي العادة دي.. بس الوقت المتاح اقل

لما آجي اشتري كتب.. احب اكتشف كاتب جديد

موضوع جديد .. ثقافة جديدة

و طبعا فيه كتّاب بيجبروك تتبع كل ما كتبوا

المسيري و يوسف إدريس مثلا

الفكرة كنت امبارح في معرض الكتاب

على جنب ... هوا المعرض لسة شغال؟؟؟

[نوران]

كتاب صور من حياة الصحابه

كتاب أكثر من رائع

يعرفنا بمدي عظمة صحابة النبي الكريم صلي الله عليه وسلم

ويقص مواقفم الرائعه

ما يحزنني عند قرائته ، هو احساسي بعظم الفارق بيننا وبينهم

[طارق مصرى]

المنهج الحركى فى السيرة ... د/محمد الغضبان- جزاه الله خيرا ...جعلنى أرى السيرة النبوية الشريفة برؤية أشمل و بفهم أعمق

أين نحن من أخلاق السلف ... كتاب صغير يندرج تحت مسمى كتب الرقاق يذكرنا فيها بأخلاق متعددة (صدق- اخلاص - اخوة -زهد .....الخ )عن طريق سرد قصص صغيرة للسلف الصالح من الصحابة رضى الله عنهم مرورا بالتابعين و الصالحين .

أوربا و التخلف فى أفريقيا ... لكاتب من أمريكا اللاتينية (للاسف الكتاب فى منزلى فى مصر ) و كان من سلسلة عالم المعرفة التى تصدرها وزارة الثقافة الكويتية التى تصدر أيضا مجلة العربى الكويتية الشهيرة ...الحقيقة كتاب أكثر من رائع عن الجرائم العظمى التى ارتكبتها أوربا فى حق أفريقيا خلال الثلاثة قرون الماضية .

[abobakr]

منورين كلكم

أم زايد حاليا في المنصورة فيه معرضين شغالين :)

القاهرة متهيالي يناير او فبراير

[abobakr]

رواية

حول العالم في ثمانين يوما

قريتها في إعدادي بس كانت شيقة ومش بعيدة عن الواقع

[الســـاري]

بما ان الكثير من الاخوان ركزوا على الكتب الدينية والتاريخية وكتب التأملات والفلسفة

باحب اقترح كتاب راااائع جدا لا امل من قرائته

هي رواية شيقة جدا .. للكاتب السعودي الدكتور غازي القصيبي

الرواية اسمها شقة الحرية

تحكي عن قصة اربعة شباب بحرينيين وفدوا الى القاهرة للدراسة في عز الفترة الناصرية

تلك الفترة التي كانت تموج بالصراعات السياسية والفكرية وتنشأ تيارات مختلفة ومدارس متعددة

وسط هذا الخضم من التيارات الفكرية نجد تباين في مواقف الشبان الاربعة .. ما بين منبهر بالناصرية .. وآخر بالقومية .. وثالث بالرأسمالية .. والرابع وهو بطل القصة يموج بين كل التيارات المختلفة

وتقع احداث شيقة للغاية ومفاجآت لا تنتهي وكل هذا باسلوب سلس وبسيط و جميل

استفدت من هذا الكتاب المعرفة التامة بكل اوجه التيارات العربية المختلفة من اقصى اليمين لاقصى اليسار .. ومزايا وعيوب كل فكرة او تيار معين

ومباديء كل تيار و حزب .. الاجمل ان كل هذا الكم الهائل من المعلومات تجد نفسك تتلقاه وتعرفه وتفهمه دون ان تشعر وسط الخضم المثير من الاحداث

شقة الحرية .. هو الاسم الذي اطلقه اولئك الشبان على شقتهم .. كل منهم كان يبحث عن الحرية و كل منهم يبحث عنها

تعيش اجواء تلك الشخوص ببراعة الكاتب دون ان تشعر .. يجيد الكاتب ويبرع في ان يجعل قارئه يعيش الحدث .. تجد نفسك في بعض الصفحات اخوانيا .. وتجد نفسك تقدميا في الاخر

ثم تجد نفسك بعثيا .. وتارة قوميا .. و اخرى تؤمن ان الحل بالماركسية .. و تجد نفسك فجأة ناصريا حتى النخاع

اجاد الكاتب وصف قاهرة عبد الناصر وصفا مبدعا .. ولا عجب فقد عاش غازي القصيبي في القاهرة ودرس بجامعاتها ابان الفترة الناصرية واحتك وتأثر بنشاطاتها الطلابية

تجد نفسك تتنقل بين جلسات نجيب محفوظ .. وصالون العقاد .. مرورا بانيس منصور .. الى ان يصافحك عبد الناصر .. كل هؤلاء الاشخاص هم ابطال ايضا في هذه القصة في لقطات معينة

اسلوب الكاتب شيق منذ اول صفحة .. انا اؤكد انك لن تستطيع بسهولة ان تضع الكاتب جانبا ما ان تبدأ بقراءة اول صفحاته

قال احد النقاد عن هذه الرواية انها هدية الخليج للوطن العربي .. وانا اراها فعلا كذلك

من الممكن تنزيل هذه الرواية عن طريق النت .. قراءة ممتعة ارجوها لكم

شقة الحرية من ويكيبيديا

شقة الحرية رواية للدكتور غازي القصيبي، منعت لفترة من التداول في السعودية، تحكي قصة مجموعة من الشبان مختلفي التوجهات والأفكار يسكنون معاً في القاهرة أثناء دراستهم الجامعية هناك. وتفصّل الرواية حالة التيارات الفكرية لدى الشباب العرب في الفترة الملتهبة من التاريخ العربي 1948 - 1967. حققت الرواية انتشارا كبيرا وتعددت طبعاتها، وتم السماح ببيعها بالسعودية بعد أن كانت ممنوعة.

[abobakr]

الرواية شكلها رائعة يا اخ ساري

اضيف كتاب سر قوة الهرم الاكبر

بحس انه كتاب خسال علمي اكتر منها معلومات