إدخل وقول لنا إنطباعك عن وصف مصر بعد مرور 8 شهور على الثورة المجيدة

[se_ Elsyed]

الواحد عنده كلام كتير وملاحظات اكتر

فبالأمس .. مرت 8 شهور بالتمام والكمال على الثورة المجيدة اللي تعتبر أروع ثورة في تاريخ الشعب المصري ... بل يمكن أبالغ وأقول في التاريخ كله

يا ريت كل واحد يدخل ويقول حاسس بإيه بعد 8 شهور .. وهل يا ترى حاسس فعلاً ان الثورة غيرت حاجات فيه شخصياً .. وفي البلد ... وفي الحياة من حواليه سواء داخل أو خارج مصر ؟

نلقاكم بعد الفاصل

[Alattar]

بالنسبة للإحساس..فأنا حاسس بإحباط شديد جدا..بجد ما حسيتوش أيام ما كان مبارك موجود..لأننا أيام مبارك كنا فقدنا الاحساس تماما..

بالنسبة ليا أنا شخصيا..كان عندي أمل كبير جدا..و كنت متفائل جدا لأقصي حد..وبالطبع ثقتي في الله لم تنقص أو تقل..بس هو شيء في القلب لا يستطيع الانسان مقاومته..وهو الاحساس بالاحباط..

أنا فعلا عندي ثقة في الله كبيرة جدا ان القادم أفضل بإذن الله..بس ربنا سبحانه و تعالي مش هيغير اللي فينا .. الا لما نتغير احنا شخصيا..

للأسف الاحباط اللي انا فيه ده أثر علي كل حاجة عندي..حتي الشغل..الواحد أحيانا بيتخيل انه ممكن يقعد في الغربة طول عمره..لأن بلده عمرها ما هتبقي بيئة صالحة للمعيشة هناك..مش تكبر والله ولا حاجة..بس الواحد مسئول عن أسرة..ما ينفعش اني أخدهم و أنزل و يحصل حاجة وحشة..و أرجع و أقول أنا كان في ايدي فرصة و ضيعتها

العجيب في الموضوع..ان اللي في مصر نفسهم..هما اللي بينصحوني بعدم التفكير في النزول النهائي..

بالنسبة للبلد..للأسف أنا ما نزلتش مصر من قبل الثورة بشهرين تقريبا..بس لو هنعتمد علي الاخبار اللي بنقرأها كل يوم..يبقي أقدر أقوللك..ان البلد تسير علي منحدر خطير..

عجبتني كلمة كنت قرأتها علي الفيس بوك لأحد الأصدقاء..كان ناقل جملة بس مش عارف بصراحة مين اللي قالها أصلا..بس كانت كلمة في الجون..كان بيقول..

إن إجبار مبارك علي التنحي..لم يكن غرضه اسقاط النظام..بل كان للحفاظ علي النظام من السقوط

كلمة مؤلمة أوي..وآسف لو كنت أحبطتكوا معايا..

[joo]

ليه "وزير التربية و التعليم كان " اسمه "زكى" و العيال أغبيا ؟

ليه "وزير الـمالـية كان " اسمه "غالى" و الشعب رخيص ؟

ليه "وزيـر الـداخلية كان " اسمه "العادلى" و الشعب مظلوم ؟

ليه "رئــيــــــس الـــوزراء كان " اسمه "نظيف" والتلوث قاتلنا ؟

ليه رئيس مجلس الشعب كان اسمه "سرور" والغم ركبنا؟

...........................عارفين ليــــــــــــــه ؟

لأن "رئيسنا كان " اسمه "مبارك" وكل حاجة قلـــت بركتــهـــا

منقول للامانة

[joo]

انا حزين على بلدى

ومش متفائل :closedeyes:

[Simba]

لا لوم علي احد

احنا السبب

احنا السبب

المجد ل 22 % اللي قالوا لا في وجه 77% اللي قالوا نعم

ادعي شرعية الاستفتاء

اشربوا بقي

كان المفروض يكون دلوقتي عندنا دستور جديد ومجلس شعب كمان

[م تيمور المراغي]

الشطاره نحول الطاقة السلبيه دي لمواقف ومطالب موحده تتفق عليها كل القوى الفاعله على الساحه

معلش بلاش كلمة مطالب

اسمها اوامر !

[وطني حر]

الثوره المصريه كانت اسرع الثورات العربيــه

والحمد لله كانت اقلها في اعداد الضحايا والمصابين فاعتقد ثوره بلا قائد كمثل فريق كره بدون لاعب مشهور .

تصعب هزيمته الفريق يلعبون بروح واحده . ولكن بسهوله يخسر الفريق المبارات اذا فقد تلك الروح .( يجمع بين المتناقضات )

الثوره المصريه الحديثه لا شك انها اسقطت مبارك ولم تسقط انظمته وحكمه فالولاءات لا تزال لمبارك وقد يكون لها عده اسباب منها

ان الثوره كشفت عن وجهها وروحها الوطنيه قبل ان تتبلور وتكمل نجاحها فسهل اختطافها وهي لا تزال في المهد مثل ..

ايقاف تصدير الغاز لاسرائيل .. ( امريكا هي اسرائيل )

ايضا فتح المعابر بين مصر وغزه .

التقارب بين مصر وايران اثار حفيظه الدول العربيه كثيره وبالتالي اكدت تلك الدولتمسكها بنظام مبارك .

خلق عداوات بين قوي الثوره الاخوان ومحاوله اقصائهم .من قبل قوي اخري والاخوان ومحاوله استقطابهم من المجلس العسكري او كسب ودهم لفتره او تحييدهم لفتره

البردعي ومحاوله تهميشه من قبل قوي اخري ..في حين كان هو احد اقطاب الثوره . بل هومحرك الاساسي لها

[capitshino]

للاسف عندى احباط شديد من وضع البلد

حاليا انا فى مصر وبصراحة مش عارف الناس عايشة ازاى

قلة ادب واضرابات فى كل مكان وغلاء فظيع فى الاسعار

لدرجة ان الواحد بيدعى انه يموت قبل ما يجى يوم واقول

ولا يوم من ايامك يا مبارك .

[Alattar]

لا لوم علي احد

احنا السبب

احنا السبب

المجد ل 22 % اللي قالوا لا في وجه 77% اللي قالوا نعم

ادعي شرعية الاستفتاء

اشربوا بقي

كان المفروض يكون دلوقتي عندنا دستور جديد ومجلس شعب كمان

استفتاء ايه يا عم سيمبا اللي انت لسه بتتكلم عنه؟..

ما هو الاستفتاء كان علي تلات مواد..و المجلس حط ييجي 69 مادة..

و كان المفروض فيه انتخابات في شهر سبتمبر اللي احنا فيه ده..و حتي الآن المجلس لسه نايم في العسل

ياريت الموضوع ما يتحولس في النهاية لصراع علي الاستفتاء..لأن واضح ان المجلس العسكري مش فارق معاه لا انتخابات ولا دستور

طيب الناس كانت بتقول ان موضوع الانتخابات بدري ده هيدي فرصة للفلول و مش عارف ايه..يعني هيعمل حالة فوضي..و المجلس طبعا اللي مستفيد منها..

ورغم كده كمان..المجلس لحد دلوقتي ما عملش أي حاجة في موضوع الانتخابات

بص يا عم حسام..أي حاجة في مصلحة البلد..سواء كانت انتخابات أولا أو دستور أولا..المجلس ما كانش هيعملها..لأن عنده نوايا مهببة ..اتضحت أوي الفترة دي..

فما حدش يلزق الموضوع للاستفتاء..لأن حتي نتيجة الاستفتاء المجلس ما احترمهاش..فما تقنعنيش انه كان هيسيبنا نعمل دستور جديد..فيه مصلحة للشعب

[pink rose]

لا لوم علي احد

احنا السبب

احنا السبب

المجد ل 22 % اللي قالوا لا في وجه 77% اللي قالوا نعم

ادعي شرعية الاستفتاء

اشربوا بقي

كان المفروض يكون دلوقتي عندنا دستور جديد ومجلس شعب كمان

لا يا حسام مش اللي قالوا نعم هما السبب في اللي احنا فيه

اللي احنا فيه بسبب اننا دايما بنكبر الحاجات التافهة و نقعد نضيع و قتنا فيها و نغني عليها ليل نهار في التليفزيونات و المنتديات

احنا السبب عشان ما استمرناش ف الضغط لتحقيق مطالب الثورة الحقيقية

احنا السبب اننا انشغلنا بمحاكمة مبارك و اعوانه و الفاسدين اللي كانوا معاه و اديناهم اكتر من وقتهم

احنا السبب لاننا افقدنا ميدان التحرير هيبته و بقى كل من هب و دب يروح عاملنا مليونية فيها 12 15 طلب مالهش لازمة

احنا السبب لما سيبنا مصر و روحنا نحرر فلسطين انت ناسي يوم الزحف و لا ايه

احنا السبب عشان اتفرقنا و سيبنا الاعلام يشتغلنا بالاشاعات

احنا السبب اننا نفرنا الناس البسيطة من الثورة بدل ما نوصلهم انجازاتها حتى النفسية على الاقل يلاقوا حد يهتم بيهم مش كل شوية يطلع واحد يقول جهلة بيبيعوا صوتهم بازازة زيت شعب جاهل يستاهل اللي يجراله شعب مش وش نعمة شعب ما يستحقش التضحية و كلام كتير استهزاء بالناس اللي لولاهم بعد ربنا ما كانتش الثورة دي نجحت

الحل دلوقتي اننا نتوحد من جديد بس على المطالب اللي توصلنا للي احنا عاوزينه انتقال السلطة للمدنين و تداولها

تنزل كل القوى الوطنية المحترمة تضغط عشان الاعلان عن معاد لتحديد فتح باب الترشح لمجلس الشعب مش شرط النزول للميادين بمليونيات بس لا استخدام كل الطرق القانونية و المحترمة للضغط دا

الناس ترجع تاني تعمل لجان شعبية عشان الامن خصوصا وقت الانتخابات

الناس تفكها بقى دلوقتي من الاضرابات و الاعتصامات اللي مالية البلد دي

[se_ Elsyed]

قلة ادب واضرابات فى كل مكان

أنا كنت بأقول زيك كده

وكنت فعلاً بأفتكرها قلة أدب

لكن قربنا على سنة أهو والناس اللي قامت عشانهم الثورة أزدادوا بؤساً على بؤسهم ...

يرضي ربنا ده ؟

يرضي ربنا ماحدش من المسئولين يطلع يعبر الناس دي أو يعطيهم بصيص أمل ؟

فرقوا إيه عن عصابة مبارك ؟

طب ما هي في إضرابات عمالية كانت بتقوم من 2006 .. ومبارك وحكومتة بيطلعوا لسانهم للناس ويقولوا لهم : إضربوا راسكم في الحيط

------------

بصوا معايا البيان ده كده

رسالة المجلس العسكري يوم 28 مارس

هييييه دنيا .. مافيش حاجه يابني بتفضل على حالها .... واهو كلام إبن عم حديث .. وكلام المجلس مدهون بزبدة .. يطلع عليهه قانون الطواريء يسيح

واهم حاجه تطبيق الشريعة الإسلامية .. وإسلامية إسلامية .. أو نموت بعض عشان كرسي برلمان ... أو عشان نأسس حزب .. أو نكفر بعضنا البعض ونقسم ونعمل فرز وتجنيب .. ده ليبرالي وده علماني وده كنفاني

بس مش ملاحظين إن الناس فقست الموضوع ده وماحدش بقى يصنف غيره أو يكفره ؟

طب مش نستغل الفترة دي بقى في توحيد أهدافنا بعد 8 شهور اهو ونوقف أي حد يتلاعب بالثورة عند حده .. ونثبت للجميع إن مصر هي وعاء طيب وكريم يحتوي كل المصريين بمختلف إنتماؤتهم ؟

أه بالمناسبة .... أنا لا املك إلا التفاؤل تحت اي ظروف ...

وده ببساطة لأني مؤمن إن ربنا معانا في ثورتنا

لكن تفاؤلي ليس عبطاً او سذاجةً ..

لكنه ثقتاً في الله طبعاً ثم في صانعي الثورة

وبإذن الله أنا متأكد إن في حالة توافر البيئة السياسية الصحيحة .. فإن الغلابة دول هايخدوا حقهم ومصر هاترجع لهم

[Simba]

لا لوم علي احد

احنا السبب

احنا السبب

المجد ل 22 % اللي قالوا لا في وجه 77% اللي قالوا نعم

ادعي شرعية الاستفتاء

اشربوا بقي

كان المفروض يكون دلوقتي عندنا دستور جديد ومجلس شعب كمان

استفتاء ايه يا عم سيمبا اللي انت لسه بتتكلم عنه؟..

ما هو الاستفتاء كان علي تلات مواد..و المجلس حط ييجي 69 مادة..

و كان المفروض فيه انتخابات في شهر سبتمبر اللي احنا فيه ده..و حتي الآن المجلس لسه نايم في العسل

ياريت الموضوع ما يتحولس في النهاية لصراع علي الاستفتاء..لأن واضح ان المجلس العسكري مش فارق معاه لا انتخابات ولا دستور

طيب الناس كانت بتقول ان موضوع الانتخابات بدري ده هيدي فرصة للفلول و مش عارف ايه..يعني هيعمل حالة فوضي..و المجلس طبعا اللي مستفيد منها..

ورغم كده كمان..المجلس لحد دلوقتي ما عملش أي حاجة في موضوع الانتخابات

بص يا عم حسام..أي حاجة في مصلحة البلد..سواء كانت انتخابات أولا أو دستور أولا..المجلس ما كانش هيعملها..لأن عنده نوايا مهببة ..اتضحت أوي الفترة دي..

فما حدش يلزق الموضوع للاستفتاء..لأن حتي نتيجة الاستفتاء المجلس ما احترمهاش..فما تقنعنيش انه كان هيسيبنا نعمل دستور جديد..فيه مصلحة للشعب

لا طبعا يا عطار انا مش بقول دستور جديد ولا حاجة ولا هنبدأ من اول السطر انا بقول لو كان حصل غير ان اكبر كلمة كانت مستفزة لي بصراحة ( شرعية الاستفتاء ) واتقالت هنا مئات المرات علي امل ان العسكر هيسلم السلطة يعني علي طبق من دهب للأحبة

انا بتمني في اسرع وقت يكون عندنا مجلس شعب ورئيس مدني

حتي لو كان من الحزب الوطني واهو العسكر تسيب الناس مدنيين تلاعب مدنيين

احسن لو مدينيين وعسكر هيفضلوا يلعبوا مع بعض الله اعلم النتائج هتكون ايه ومحدش هيحبها طبعا

تم تعديل 26 سبتمبر 2011 بواسطة Simba

[capitshino]

قلة ادب واضرابات فى كل مكان

أنا كنت بأقول زيك كده

وكنت فعلاً بأفتكرها قلة أدب

لكن قربنا على سنة أهو والناس اللي قامت عشانهم الثورة أزدادوا بؤساً على بؤسهم ...

يرضي ربنا ده ؟

لا طبعا مايرضيش ربنـا

بس برده الاضرابات اللى فى كل مكان دى ماترضيش ربنا

واعتقد اننا لازم نرجع للميدان تانى .. هو ده الحل

تم تعديل 26 سبتمبر 2011 بواسطة capitshino

[الدكتور ياسر]

في الحقيقة لست أشعر بهذا التشاؤم الذى رأيته في الردود السابقة ..

تلك الثورة المجيدة قتلت أهم عائق في قلوب المصريين ... ألا و هو الخوف ..

هناك مشكلة كبيرة نحياها الآن و لا ننتبه لها .. يا سادة إن عقدنا قد انفرط بعد الثورة .. عودوا الى ميدان التحرير يوم 28 يناير في جمعة الغضب

كيف كان هذا الميدان يومها ؟ المسلم بجوار المسيحى .. السلفي بجوار الليبرالى .. كل يد واحدة أمام عدو واحد ..النظام .. كل مصر تهتف

الشعب يريد إسقاط النظام .. هو مبارك مشى من شوية ؟؟

الآن تعاملت معنا السلطة بمبدأ فرق تسد و حتى الآن نجحت بشكل كبير .. ومنتدانا خير دليل على واقع مصر .. فهو جزء منها..راجعوا الكثير من

الموضوعات تعرفون ما أقصد .. فنحن الآن نسينا كلمة مصري و استبدلناها بسلفى .. ليبرالى .. مسلم ... مسيحى..

إن أردنا استعادة ثورتنا فيجب العودة الى روح الميدان ... ميدان التحرير ..

تحياتى للأستاذ أحمد صاحب الموضوع.

[se_ Elsyed]

بس برده الاضرابات اللى فى كل مكان دى ماترضيش ربنا

يا كابتشينو أفهمني الله يخليك

الناس الموظفين دول شافوا ثورة قامت من 8 شهور .. وناس ماتت وفديتنا بدمها ... وبيوت إتخربت ... وشعارات إترفعت وصدقوها

كرامة

حرية

عدالة إجتماعية

وكانت النتيجة اللي لمسوها هي الانفلات الامني .. وخراب البيوت المستعجل .. وغلاء في الاسعار

شوفت ناس من اللي عاملين إضراب جايبين معاهم كشف المرتبات الرسمي المطبوع لهم ..

موظف بعد 13 سنة ومرتبه لسه 300 جنية

يعيش إزاي قول لي ؟

أيوه عارف إنه صبر ده كله وأستحمل غلب

طب وبعدين هايفضل كده قبل وبعد الثورة ... طب ليه ؟

وفين المسئولين من ده كله ؟

[capitshino]

بس برده الاضرابات اللى فى كل مكان دى ماترضيش ربنا

يا كابتشينو أفهمني الله يخليك

الناس الموظفين دول شافوا ثورة قامت من 8 شهور .. وناس ماتت وفديتنا بدمها ... وبيوت إتخربت ... وشعارات إترفعت وصدقوها

كرامة

حرية

عدالة إجتماعية

وكانت النتيجة اللي لمسوها هي الانفلات الامني .. وخراب البيوت المستعجل .. وغلاء في الاسعار

شوفت ناس من اللي عاملين إضراب جايبين معاهم كشف المرتبات الرسمي المطبوع لهم ..

موظف بعد 13 سنة ومرتبه لسه 300 جنية

يعيش إزاي قول لي ؟

أيوه عارف إنه صبر ده كله وأستحمل غلب

طب وبعدين هايفضل كده قبل وبعد الثورة ... طب ليه ؟

وفين المسئولين من ده كله ؟

فاهمك كويس وزى ما كتبت انا والله مش عارف الناس دى

عايشة ازاى

بس ايه العمل ؟

اضرابات !

يبقى عز الطلب وده اللى المجلس السمكرى عاوزه

علشان البلد تخرب والناس تلعن الثورة واللى عملوها

[م تيمور المراغي]

اضرابات !

يبقى عز الطلب وده اللى المجلس السمكرى عاوزه

علشان البلد تخرب والناس تلعن الثورة واللى عملوها

طب ايه آليات الضغط والتصعيد الفعاله من وجهة نظرك !

والسؤال للجميع بدل ما افتح توبيك جديد

[ozoozo]

هأو أو أو أو:closedeyes:

[أسد]

على قديمه

كل على قديمه

الناس عملوا ثورة

وشالوا الرئيس المزمن

وبعدين ..

جم ناس تانية ...

خطفوا البلد ...

ومشوا كل حاجة على قديمه

نفس العقلية .. ونفس المنطق ...

مفيش مصارحة .. ولا شفافية .. ولا وضوح

وغموض ..

ومش عارفين بكره فيه إيه

زي زمان يعني

[capitshino]

اضرابات !

يبقى عز الطلب وده اللى المجلس السمكرى عاوزه

علشان البلد تخرب والناس تلعن الثورة واللى عملوها

طب ايه آليات الضغط والتصعيد الفعاله من وجهة نظرك !

والسؤال للجميع بدل ما افتح توبيك جديد

هى الية واحدة

اننا نتحد ونرجع تانى نضغط على المجلس السمكرى ونرجع

تانى الميدان .

نتحد كلنا خصوصا قادة الاحزاب وغيرهم من القادة

ونخرج من الورطة دى بفترة انتقالية يحكمها اى من

مرشحى الرئاسة يتفق عليه رؤوساء الاحزاب والقوى الاخرى

انا عارف انها احلام وردية وصعبة بس انا مش شايف حل

تانى .

بس سؤال لك يا تيمور وللزملاء هنا

هل ترضى ان يحكمك حازم صلاح ابو اسماعيل لفترة

انتقالية ؟

وسؤال للمعسكر الاخر .. هل ترضون بالبرادعى كرئيس

لفترة انتقالية ؟