شيء فى صدورنا

[joo]

لماذا اصبحنا حساسين جدا . انا بتكلم عننا كمسيحيين

كل حاجة بتحصل بنزعل منها

من بعد 25 يناير قلنا الصدور والعقول والافكار الجديدة هتظهر وهنعيش زمن تانى

لكن للاسف الموضوع انقلب علينا والكل بيلطش فينا ولو اتكلمنا بنلاقى مليون كلمة نازلة علينا

زى ميكون مش منحقنا نتكلم ولا ندافع ولا نقول اللى فى خاطرنا

لية دائما كلامنا ثقيل على الكل

نفسى اعرف احنا بنعامل بعض عن حب ولا غصبانية هل نفوسنا سودة من ناحية بعض ولا بنحب بعض

انا عن نفسى تاية ومش عارف حبيبى من عدوى

الواحد بيمشى فى الشارع حاسس انة تاية . هل الناس دى هى بتاعة زمان ولا دى ناس غريبة مش عارفها

ايام المدرسة والجامعة مفتكرش حد جاب سيرة الدين وقال مسيحى ومسلم

اصحابى كلهم كانو مسلمين واكلين نايمين عندى ليل نهار عمرنا ماتكلمنا فى حاجة تعصبية ليل نهار مع بعض

ومازلنا بنكلم بعض

بس بردو بسأل نفسى هل جواهم شيء من التعصب فى الوقت دة

ببص فى عيون الناس فى الشارع نفسى المح لحظة حب او ود مش لاقى

حد يجاوبى لو سمحت هل دة احساسى لوحدى ؟

[ابراهيم عبد العزيز]

لا اعتقد ان الصورة كما رسمتها يا اخ جو مطلقا

فمعدن الشعب المصري ظهر فى ايام الثورة عندما تكاتف المسيحين والمسلمين مع بعضهم البعض ووقتها لم يكن هناك وجود لقوى امنية وهذا دليل أن هذا شيئا كان نابعا باقتناع وليس بدافع الخوف من القوى الامنية او ما شابه

بعض المناوشات البسيطة التي نراها هى إلا ترسبات من العهد القديم واسلوب معالجاته الخاطئة لكثير من الامور البسيطة والتي كان يتركها دون حسم مما يجعلها تكبر دون داعي

يجوز يا أخ جو أنك تعرضت لموقف ما فترة قريبة , وكلامك هذا ياتي تحت وطاة تأثرك بالموقف

تحياتي لك

تم تعديل 27 سبتمبر 2011 بواسطة ابراهيم عبد العزيز

[abobakr]

استاذي الفاضل جووو

الكلام ده مش مظبوط طبعا

وممكن حضرتك لاحظت الاختلاف بين الاعضاء المسلمين هنا

المشكلة ان في مصر الكل يعلم ومفيش حد لا يعلم

في مصر الكل صح ومفيش حد خطأ

وعشان كده اي واحد هتلاقيه بيدافع عن رأيه حتى لو كفر اللي قدامه

اي واحد هتلاقيه متمسك برأيه حتى لو سب اللي قدامه

على فكرة اغلب المواقف اللي حصلت ليك بدوافع سياسية اكتر ما تكون اسلامية

والدليل انها سياسية انها مظهرتش الا بعد الثورة يبقى اكيد لهدف سياسي

[عبير يونس]

أستاذ جو

أحب أقول لحضرتك اني مسلمة

و حاسة نفس الاحساس

من بعض المسلمين اللي بيحاولوا يقسموا الناس لفرق و أحزاب و بيعتبروا نفسهم همة بس الصح

لا تحزن

خد دي

و عاش الهلال مع الصليب

و مصر لكل المصريين

رغم أنف الحاقدين

[hOuSsAm]

يا استاذ جو كلنا هذا الرجل من كل شئ

مش موضوع مسيحية واسلام

الكل مترقب ومتخوف

والكل قرفان ومحدش عارف هى رايحة على فين

عمر مكانت المشكلة بين مسلم ومسيحى

المشكلة بين شعب وطالبى السلطة

روق كدة وبكره هتحلو :)

[ViralMind]

المشكلة فعلا مشكلة احساس بالاضطهاد.. لكن الاضطهاد فى حد ذاته غير موجود.

انا هضرب مثال و لا اقصد به شخصنة الحوار..

و لكن لما نتلكم فى مناقشة على العام, و توصل ان حضرتك تبعت لى شتيمة مرتين على الرسايل الخاصة.. و تبدأ بالسب.. فده معناه حاجة واحدة.. ان من كتر ما انتا حاسس انك مضطهد و مظلوم, بتبدأ بالهجوم حتى من قبل ما يكون فيه حاجة ضدك.. لانك دايما حاسس بالظلم, حتى و ان كان الاحساس ده ليس له اساس من الصحة.

اندهشت جدا من ردة فعلك و اصرارك على العداء الغير مبرر.

و علشان اريحك.. احنا كلنا فى مصر مضطهدين.. مضطهدين من الفاسدين و الحرامية اللى ماسكين البلد.

من سنتين كده, طلعت نكتة بتقول: مفيش مسيحى هيبقى رئيس مصر.. و الرد: ولا مسلم و حياتك!

انصحك بجد انك ماتسبقش الاحداث, و ماتفترضش نظرية المؤامرة ان اللى قدامك بيضطهدك علشان انتا مسيحى.. و اكيد اكيد.. حاجات كتير هتتغير..

لكن لما انتا تبدأ بالهجوم بمبرر ان اللى قدامك بيضطهدك, ممكن لا قدر الله تقع مع واحد غبى, يقوم يضطهدك بجد و يخليك تكره العيشة و اللى عايشينها.

ربنا يوفقك باذن الله.

[abaomar]

السلام عليكم

الزميل العزيز جو اهلا بك

متفهم تماما لشعورك و ادعوك قبل ان افضفض معك إذا أذنت لى بقرأه هذا الموضوع الرائع

الذى تم فتحه منذ اربع سنوات تقريبا و يتحدث عن ما تشعر به

كل ما ارجوه بصدق ان تستعد نفسيا بوضع نفسك فى حاله حياد تام و برأس بارد اقرأ الموضوع من اوله

و ستجد إجابات كثيره لما يدور فى رأسك

http://www.egyptiantalks.org/invb/index.php?showtopic=46679&st=0

تحياتى

[نوران]

أستاذ جو ، إسمحلي أقول لحضرتك إن ظن حضرتك ده غير صحيح بالمره

كلنا مصريين وإخوة مسلمين ومسيحيين

يجمعنا الوطن والحلم الواحد والإحترام المتبادل

ودي القاعده وطبعا فيه حاجات بسيطه ممكن تشذ عن القاعده ولكنها أبدا لا تلغيها

تقبل مروري

تحياتي لحضرتك

تم تعديل 27 سبتمبر 2011 بواسطة نوران

[spain]

احنا اللي استغربنا من انكم صدقتوا ان تفجير كنيسة الاسكندرية في راس السنة من مسلمين

واي تفجير جه بعده من مسلمين

وكأن ان انتوا اول مرة تعيشوا في مصر وما شفتوش بعينكم سياسات سابقة من 60 سنة فاتت للانظمة ال (مش نضيفة ) اللي لعبهم كان مكشوف للكل وسياسة التفرقة كانت واضحة للكل وانتوا صدقتوها

لأ..وبرامج التليفزيون اللي سخنت ده

منظر في التليفزيون باستهجنة جدا (واحد مسلم وواحد مسيحي قاعدين مع بعض ) والمذيع يسالهم هاه مش زعلانين من بعض ...صافيا لبن ...حليب يا قشطة

وكإن فعلا كان فيه خلاف وحد اعتدي علي حد ,....و....

كانت خايلة عليهم...ازاي انا باستغرب اخواتنا المسيحين .

بس سبحان الله

الثورة دي مش جات علشان زي ما انت ما بتقول

دي جات علشان كلنا نعرف ونفهم ونعقل من اخوك ومن عدوك

من مشاهد الميدان ...ومن مشاهد الكنايس اللي قدامها شباب ايا كانت ديانته ما تفرقش

ومن مواقف لسه جاية

والحمد لله ان مصر مش ارض خصبة للفتنة والتقسيم

نتحد بقي ضد تقسيم

النوبة

والاسلاميين ....هاه يا جو

وبتوع سيناء

و

تم تعديل 27 سبتمبر 2011 بواسطة spain

[لماضة مصرية جدا]

مسا الرضا يا استاذي جو

انا عجبني السؤال

احنا ليه بقينا حساسين؟؟

بس مش هتكون اجابته علشان حضرتك مختلف ف الدين

استاذي جو

احنا فعلا بقينا حساسين

بس مش بس مع اللي مختلف معانا في الدين

لا ده الل مختلف معانا في التيار السياسي....(طب شفت العركة بين الليبرالين و السلفية)

و اللي مختلف معانا في مرشحي السياسة...(حضرت بقي العركة التانية بين شااااافيق يا رااااجل و البرادعي)

و اللي مختلف معانا في تفسيرنا لامور الحياة

و اللي مختلف معانا في تفسيرنا للنكتة

و اللي مختلف معانا في مداخلة اللي عبارة عن شوية حروف بنحطها و بنفش فيهم غلبنا نمن الغربة اللي حاسينها جوه الوطن او براه

احنا بقينا فعلا حساسين

و اوي كمان

بس مش علشان انت مسيحي يا جو

علشان الجو العام كله بقي مشحون....بقي فيه مشاعر طافية علي السطح....غير المشاعر اللي اتوحدت ساعة من الناس نزلت الميدان وكان عندها هدف واحد....الحلم كان كبير و كلنا حلمناه....كلنا

ساعتها كل الاختلافات اللي كانت بينا عمرنا ما حسيناها....انت مسيحي و لا مسلم

انت ليبرالي و لا اخواني

طب انت اخواني و لا سلفي

طب انت اهلاوي و لا زملكوي

كل ده دااااااااب

داب لما كنا كلنا حاسين ان البلد دب بتاعتنا كلنا...و الليلة كلنا شايلينها

لكن شوية الحلم بقي مجادلات و مهاترات...و كل شوية تقسيمة و كل شيوة لعب في الدماغ

و الحلم اللي كان كبير و ساعنا كلنا

كل واحد دلوقتي فتته في مصلحته هو

كل واحد بقي يدور علي الصوت اللي جوه دماغه و بيحاول يخرس اي حد تاني قدامه....احنا مش بقينا حساسين...احنا بقينا بندهس بعض

طبعا ده لون غامق فحت ردم

بس عارف الحل ايه

الحل ان احنا نرجع نحلم تاني

ايوه يا جو

مش هجاوب علي سؤالك اللي فوق....و هقعد احلل يا تري احنا بنكره و لا بنحب و لا ايه الحكاية

لكن هحاول اصحي حلم بيجمعنا كلنا

حلم بوطن...لسه بيعافر علشان يكمل سكته

حلم....بعمر انت و انا و غيري عايزين نضيه في مكان ليه مساحة في القلب

حلم ان البلد دي حلوة....و الله حلوة....بس هو نقيف الجاكتة علي البنطلون و ربنا البدلة هتسعينا كلنا

احنا محتاجين بدل ما نسال نفسنا احنا شايلينا ايه في صدورنا...لان ده رنبا بس هو اللي عالم بيها

محتاجين...نرجع نحلم تاني

افتح قلبك

و ارجع احلم

صدقني

هتقدر تنسي اي اساءة

و الاساءة مكنتشي علشان انت مسيحي

الاساءة علشان احنا لسه مش عارفين نتعامل....مع اي حاجة و مع كل حد...."مختلف"

تصبح علي حلم.....بحجم قلبك....و تكون فيه مصر العروسة المحروسة اللي بنحلم بيها كلنا

[الدكتور ياسر]

لماذا اصبحنا حساسين جدا . انا بتكلم عننا كمسيحيين

كل حاجة بتحصل بنزعل منها

من بعد 25 يناير قلنا الصدور والعقول والافكار الجديدة هتظهر وهنعيش زمن تانى

لكن للاسف الموضوع انقلب علينا والكل بيلطش فينا ولو اتكلمنا بنلاقى مليون كلمة نازلة علينا

زى ميكون مش منحقنا نتكلم ولا ندافع ولا نقول اللى فى خاطرنا

لية دائما كلامنا ثقيل على الكل

نفسى اعرف احنا بنعامل بعض عن حب ولا غصبانية هل نفوسنا سودة من ناحية بعض ولا بنحب بعض

انا عن نفسى تاية ومش عارف حبيبى من عدوى

الواحد بيمشى فى الشارع حاسس انة تاية . هل الناس دى هى بتاعة زمان ولا دى ناس غريبة مش عارفها

ايام المدرسة والجامعة مفتكرش حد جاب سيرة الدين وقال مسيحى ومسلم

اصحابى كلهم كانو مسلمين واكلين نايمين عندى ليل نهار عمرنا ماتكلمنا فى حاجة تعصبية ليل نهار مع بعض

ومازلنا بنكلم بعض

بس بردو بسأل نفسى هل جواهم شيء من التعصب فى الوقت دة

ببص فى عيون الناس فى الشارع نفسى المح لحظة حب او ود مش لاقى

حد يجاوبى لو سمحت هل دة احساسى لوحدى ؟

أخى الكريم .. مصر لكل المصريين

لست معك في تلك الصورة القاتمة بالرغم من حزنى لما تشعر به..

فالاسلام يقر بحقوقكم كمسيحيين في المواطنة و حرية العبادة و من يقول غير ذلك فالاسلام منه براء.

لم تنجح الثورة إلا بعد أن تكاتفنا جميعا مسلمين و أقباط و لن تصفو الحياة بعد الثورة إلا بعودة هذا التكاتف .

لك منى كل التحية

[ابو محمود]

لماذا اصبحنا حساسين جدا . انا بتكلم عننا كمسيحيين

كل حاجة بتحصل بنزعل منها

من بعد 25 يناير قلنا الصدور والعقول والافكار الجديدة هتظهر وهنعيش زمن تانى

لكن للاسف الموضوع انقلب علينا والكل بيلطش فينا ولو اتكلمنا بنلاقى مليون كلمة نازلة علينا

زى ميكون مش منحقنا نتكلم ولا ندافع ولا نقول اللى فى خاطرنا

لية دائما كلامنا ثقيل على الكل

نفسى اعرف احنا بنعامل بعض عن حب ولا غصبانية هل نفوسنا سودة من ناحية بعض ولا بنحب بعض

انا عن نفسى تاية ومش عارف حبيبى من عدوى

الواحد بيمشى فى الشارع حاسس انة تاية . هل الناس دى هى بتاعة زمان ولا دى ناس غريبة مش عارفها

ايام المدرسة والجامعة مفتكرش حد جاب سيرة الدين وقال مسيحى ومسلم

اصحابى كلهم كانو مسلمين واكلين نايمين عندى ليل نهار عمرنا ماتكلمنا فى حاجة تعصبية ليل نهار مع بعض

ومازلنا بنكلم بعض

بس بردو بسأل نفسى هل جواهم شيء من التعصب فى الوقت دة

ببص فى عيون الناس فى الشارع نفسى المح لحظة حب او ود مش لاقى

حد يجاوبى لو سمحت هل دة احساسى لوحدى ؟

عايز الصراحة يا جو

انا كمان عايش وسط مسيحيين وشغلى 90% منة معاهم واقولك حاجة اكثر من ذلك هناك صديق لى مسيحى صدقتنا دامت 15سنة وما كان منة الا ان سرقنى ونسى اننا اصحاب ووكلين عيش وملح ولم استرد مالى لان وقتها 2006 كان المختصمين من المسلمين والمسيحيين بيذهبو بيهم لامن الدولة وبينازل المسلم عن حقة وارتضيت ب15 % من حقى ودة كان رأس مال مصنعى هل اخسر كل من حولى من المسيحيين هل حكمت على المسيحيين بانهم كلهم هذا الشخص اطلاقآ اشتغلت وساعدنى اصدقائى من المسيحيين وبقيت زى الفل ودة كان من ال2006 الخلاصة يا سيدى انا شخصيتى انا انا من جوايا يا جو عايز اية ومعدنى اية سمعت ان عدوك عدو دينك ولم اكترث لانى امتلك من الاصدقاء مسيحيين زى الفل وكل عيد ومناسبة حلوة مرة بلاقيهم بجوارى فى مرة بهزر مع واحد حبيبى مسيحى وبقولة ابعتلى 10 تلاف جنية علشان عندى مشكلة بعد خمس دقائق لقيت موظف عندة حامل شنطة بها 40 الف جنية شوفت بقى صاحبى دة وصاحبى اللي سرقنى المهم يا جو الاحساس بالهدوء مع من حولى وصدقنى انا عازرك لانك مسيحى والضغط عليكم من الاعلام ومن غيرة شديد لان هناك اصحاب لى مسيحيين متخوفين من الحكم الاسلامى ودة من كثرة التخويف من الاسلاميين يا عم جو قولى انت فين وانا اجيلك ومستعد احميك برقبتى ودة مش كلام ياريت ياجو تحاول تشوف الامور بالأمل وما تخفش الصورة فى مصر صحيح مهزوزة ليكم علشان ما يحدث من اشتباكات بين التيارات السياسية لكن تأكد ان المسلميين ما بيخنوش ولا بيعضو المسلميين يا جو لا يمكن ان يتركو الامانة وانتم امانة وهنتسأل عنها حط فى بطنك بطيخة شلين مصر فى الطريق الى الحرية بس يارب نعرف نعيش حرية وما يجيش ناس غاوية فقر ويقلبوها عسكر اضحك وخليها على الله وعيش حياتك دى رحلة مهما طالت قصيرة

[joo]

انا مش عارف اقولكم اية يا جماعة انتم فعلا اصحاب بجد

وشلتو الصورة السوداء من عقلى وقلبى

انا بحبكم جدا جدا وخصوصا ان فى ناس اول مرة اتعرف عليها

ربنا يديم المحبة دائما

بس بجد نفسى مصر كلها تبأ فى عقليتكم بس الواحد بينزل الشارع بيصتدم بالعقليات اياها

ودى بتوتر يومى كلة

نفسى بجد مصر تبأ احسن بلد فى الدنيا بشبابها الجميل

انا عارف ان مفيش زيها فى العالم كلة

لكن ظروفها الوحشة بتخلينا نتخلى عنها

ربنا معاكم كلكم