من بركة السبع الى شبرا النملة

[yasovinas]

الزقازيق عاصمة الشرقية

كانت عبارة عن بركة وعندما نشفت ظهرت الضفادع وصرصور الغيط فقالوا نشفت البركه وبانت زقازيقها

على فكرة حد يعرف حكاية ان الشراقوه عزموا القطار ؟؟؟؟

[فــيــروز]

الزقازيق عاصمة الشرقية

كانت عبارة عن بركة وعندما نشفت ظهرت الضفادع وصرصور الغيط فقالوا نشفت البركه وبانت زقازيقها

الله !! :P

و زقازيقها يعنى ايه اصلا f((:

[se_ Elsyed]

الزقازيق عاصمة الشرقية

كانت عبارة عن بركة وعندما نشفت ظهرت الضفادع وصرصور الغيط فقالوا نشفت البركه وبانت زقازيقها

على فكرة حد يعرف حكاية ان الشراقوه عزموا القطار ؟؟؟؟

لأ معليش يا Yaso إنت كده دخلت في المحظور .. لأن أخوك س س زقازيقي أساساً والمنطقة دي منطقتي ..

فالزفازيق لم يتم تسميتها هكذا عشان لا ضفادع ولا أبو فصاد ... فأساس تسميتها يرجع إلى وجود إحدى العائلات الكبرى هم أول من سكنوا تلك المنطقة وكانت تسمى عائلة " زقزوق " فمن هنا جاءت التسمية .

أما لما بيقولوا إننا عزمنا القطر ... فعلى حسب الروايات اللي سمعتها من أشخاص مختلفين ترجع إلى إن الشراقوة مشهورين بالكرم يمكن عشان أصولنا العربية نظراً لان معظم الهجرات من الجزيرة العربية كانت بتمر عبر تلك المنطقة ... فبيقولك مرة القطار زمـــــــــان إتعطل في محطة الزقازيق وكان الوقت رمضان وساعة الفطار .فأهالي المنطقة الكرام عزموا كل اللي موجودين في القطار على الإفطار لحد ما القطر يتصلح ... فعشان كده بيقولك دول عزموا القطر .

[فــيــروز]

أما لما بيقولوا إننا عزمنا القطر ... فعلى حسب الروايات اللي سمعتها من أشخاص مختلفين ترجع إلى إن الشراقوة مشهورين بالكرم يمكن عشان أصولنا العربية نظراً لان معظم الهجرات من الجزيرة العربية كانت بتمر عبر تلك المنطقة ... فبيقولك مرة القطار زمـــــــــان إتعطل في محطة الزقازيق وكان الوقت رمضان وساعة الفطار .فأهالي المنطقة الكرام عزموا كل اللي موجودين في القطار على الإفطار لحد ما القطر يتصلح ... فعشان كده بيقولك دول عزموا القطر .

بس انا سمعت ان هذه قصه يروجها شعب الشرقيه الشقيق :P وهى مبالغه وليست حقيقه .. فما رأيك فى هذا الادعاء يا سيادة العقيد س.س.؟

[yasovinas]

طيب يا س س باشا

ايه حكاية انكم سديتم البحر بالتبن :P f((:

تم تعديل 24 أكتوبر 2004 بواسطة yasovinas

[yasovinas]

لأ معليش يا Yaso إنت كده دخلت في المحظور .. لأن أخوك س س زقازيقي أساساً والمنطقة دي منطقتي ..

من الزقازيق ولا من جوارها

يعني منين بالضبط

على فكرة انا درست سنتين في جامعة الزقازيق

[se_ Elsyed]

بس انا سمعت ان هذه قصه يروجها شعب الشرقيه الشقيق  وهى مبالغه وليست حقيقه .. فما رأيك فى هذا الادعاء يا سيادة العقيد س.س.؟

طيب يا س س باشا

ايه حكاية انكم سديتم البحر بالتبن

يا سلاممممممممم ... وأنا إيش عرفني بقى .. هو انا هاحارب لواحدي ولا إيه ؟ ما عندكوا كذا مليون شرقاوي روحوا إسألوهم .

[yasovinas]

ابو السيد

تيجي نقلبها بيقولوا ايه على المحافظات

بس من غير ما حد يزعل

انا هبذا باسكندرية بلدي

بيقولوا (ميه مالحه و وشوش كالحه )

القاهرة (ميه نيلي و......

[homer]

كتب الاستاذ كفاية فى زيرة اسكندرية

اقتباس

"ووصلنا لزنقة الستات .. و صمموا لازم ندخل زنقة الستات و ليه سموها كدا ؟؟ عشان كانت الدنيا عيد و الشوارع فاضية تمكنا من المرور أمام زنقة الستات ...و قلت لهم هى دى الزنقة ... الستات جوه , عايزين تشوفوهم .... كلهم قالوا لأ .."

ليه بقى سموها كده ؟

انا سمعت انها على اسم واحد خواجة اسمه "لستات" وعلى ذلك فالاسم هو زنقة لستات

صح كده يا اسكندرانية واللا دى افتكاسة؟

[Cleo]

أعتقد اسمها كدة لأن شوارعها ضيقة جدا بحيث ماينفعش اتنين بنى أدمين يمشوا فيها جنب بعض... و مليااااااااااانة دكاكين فيها كل لوازم الستات... فالستات لما تروح هناك تشترى طلباتها بتتزنق فى بعض... فسموها زنقة الستات.. :rolleyes:

[amir]

صح كده يا اسكندرانية واللا دى افتكاسة؟

افتكاسة

Cleo

أعتقد اسمها كدة لأن شوارعها ضيقة جدا بحيث ماينفعش اتنين بنى أدمين يمشوا فيها جنب بعض

مثقفه اوى البت دى !

:lol:

[yasovinas]

انا سمعت انها على اسم واحد خواجة اسمه "لستات" وعلى ذلك فالاسم هو زنقة لستات

صح كده يا اسكندرانية واللا دى افتكاسة؟

هومر اهو انا وصلت لموضوع الافتكاسة

لا يا سيدي زنثة الستات ما لهاش دعوة بالخواجه لستات ده وبعدين لو اسمه ليستات الزنقه دي جت له منين

تفسير التخت كليو صح واكبر صح يا ابني خد اي معلومات تاريخية من كليو وانت مغمض بس برضه يا كليو الاسكندرانيه اجدع ناس mc: fsh:: fsh:: clwn: :blink: ty:) f((:

[Cleo]

تفسير التخت كليو صح واكبر صح يا ابني خد اي معلومات تاريخية من كليو وانت مغمض بس برضه يا كليو الاسكندرانيه اجدع ناس  :D  fsh::  fsh::  mfb:    :)  :P  ;)

زنقة الستات دى مش تاريخ يا ياسو... دى جغرافيا... :P

(وش واحد حاطك فى دماغه :P )

[yasovinas]

كليو يا اختى العزيزة معلش انا كان عندي مدرسه تاريخ وجغرافيا مع بعض في ابتدائي اسمها عايده عوض الله ايوة اسمها كده

وفاكرة سمير غانم زمان لما كان مع الثلاثي وعامل دور سوسن لما كان بيقول اسمي سوسن وبيدلعوني يقولو لي يا حنفي

والله بدون مبالغه الخالق الناطق سمير غانم بهذه الهيئة

فتخيلي لما يكون طفل في بداية حياتة العلمية ويفاجأ بهذه النكبه تفتكري بعد كده ممكن يفرق بين التاريخ والجغرافيا ولا حتى البطاطا المشويه الله يرحم الجميع

[homer]

والتمبكشية فى حى الجمالية لا تزال تحتفظ ببقايا من ملامحها القديمة حيث يقال والعهدة على طفشان انه فى عهد التخصص الحرفى للأحياء كحى الفحامين والكحكيين والفوالة آلت الى التمبكشية عملية بيع التبغ ولوازم التدخين. ولعلك تلاحظ وجود العديد من محلات بيع الشيشة وتجهيزاتها فى هذا المكان .

يا ترى ما هو السر وراء اسم الخرنفش - وده الشارع اللى بعد التمبكشية على طول؟

بصراحة انا مش عارف بس ممكن افتكس سبب وجيه

[واحد تاني]

بولاق ...

بولاق الدكرور ...

توجد اكثر من رواية لسبب او معنى الاسم ده

احدى الروايات ان بولاق دي ترجمة لـ بو - لاك اللى بالفرنسي يعنى البحيرة الجميلة ودا لان كان في بحيرة مياه فى هذه المنطقة على زمن الحملة الفرنسية (العهدة هنا على استاذي د. يسري عزام)

بولاق الدكرور قد تكون محرفة من اللغة القبطية وهي كالاتي (لاك) بمعنى حصن (كرور) بمعنى الضفدعة اي انها حصن الضفدعة وانا معنديش معلومة بصراحة اللى هيخلى الضفدعة تروح تعمل حصن ليها فى بولاق ... :ninja:

[hopsan]

طيب و يرجع مرجوعنا تانى لإسكندريه و علشان خاطر الحاجه كليو و اللى لها اليد الطويله فى مشاركات الموضوع ده

كامب شيزار

كامب شيزار او كامب سيزار ..ده المكان اللى رست عليه سفن اخونا يوليوس سيزر لما حب يشوف الحاجه كليو بتاعته ..ووقتها كان المكان يفتقد للحياه و صحراء جرداء اللهم بعض الصخور و اللى خرمت إحدى سفن القيصر و نزل زميل المهنه سواق المركب الشراعى و قال جملته الشهيره انت يا معلم اخترت المكان الصحيح لرسو السفن و العنايه الإلهيه اوقفت السفن فى هذا المكان قبل ما تدخل على شارع الكورنيش و تخرم على الترام الله يخرب بيتك

و فى المنطقه دى امر القيصر العظيم بإقامه معسكره علشان يلبس التوكسيدو بتاعه و يقابل الحاجه كليو و اللى كان فاكرها حتقابله بفستان سهره من لوريل دامون و لكن للأسف خرجت له و ف يدها فصين توم بتقشرهم على التقليه بتاعه الملوخيه على جوزين ( انارب ) على رأى المصاروه و بعد عشره دقائق من لقائهم الحار داخل الخيمه سمع العامه واحده بتصوت ياااااااااااالهووووووى بالصوت الحيانى و لما سألو بعد كده الحاجه كليو بتاعتهم و بعد إحمرار وجهها قالت انا كنت بطش التقليه و كتب التاريخ ذكرت فى روايه اخرى انها كانت شهقه ممزوجه بالرعب لأنه اى القيصر قد احضر لها هديه و عندما اخرج الهديه من جيبه و كانت فأر ( إختلف المؤرخون فى نوع الهديه التى اخرجها القيصر من جيبه و نمشيها فأر ) صغير فأطلقت الشهقه الممزوجه بالرعب الحريمى المصطنع فسقط فصين التوم من يدها فى التقليه ...و من هنا اصبحت التقليه بتاعه الملوخيه لا روح فيها بدون يااااااااالهووووووووى و بالصوت الحيانى

تم تعديل 8 يوليو 2006 بواسطة hopsan

[واحد تاني]

الزمالك ...

احد الاحياء الراقية بقاهرة المعز ... تتبع محافظة الجيزة تبعا لموقعها الجغرافي (وحسب معلوماتي المتواضعة)

واحد الاندية الكبرى :D وقلاع الرياضة الغير محصنة ... :wub:

المهم اصل الكلمة بقى ...

هي جمع كلمة (زملك) والزملك في اللغة التركية هي العشة (آه بتاعت الكتاكيت وكده... او العشة اللى بيسكنوا فيها معدومي الدخل)

اما سبب التسمية فهى لأن المكان قديما كان عبارة مجموعة من العشش على شاطئ النيل ...

كما تذكر الاسطورة الاهلاوية ان سبب تسمية النادي بهذا الاسم يرجع لانه كان النادي المخصص للخدم والحشم والسوائقين بتوع الملك... وقد بناه الخدم الاتراك قريبا من منطقة العشش المخصصة لسكنهم ومن هنا جاءت الكلمة التركية (زملك) و (زمالك)

[hopsan]

اما سبب التسمية فهى لأن المكان قديما كان عبارة مجموعة من العشش على شاطئ النيل ...

كما تذكر الاسطورة الاهلاوية ان سبب تسمية النادي بهذا الاسم يرجع لانه كان النادي المخصص للخدم والحشم والسوائقين بتوع الملك... وقد بناه الخدم الاتراك قريبا من منطقة العشش المخصصة لسكنهم ومن هنا جاءت الكلمة التركية (زملك) و (زمالك)

ايه يا واحد تانى ..ده انت خليتها خل و كمان بالزيت و الليمون

يعنى عايز تقولها كده بالمفتشر أن نادى الزمالك اعضاءه الموقرون الأن هم احفاد و بقايا الخدم و الحشم و السواقين بتوع الملك ؟؟؟؟؟

طيب عايزين واحد تانى غير واحد تانى بتاعنا يفسر و يحلل اسم والمستوى الإجتماعى بتاع النادى الأهلى ..طالما له اسطوره زى ما حضرتك تفضلت و لا عايز تسحب كلامك ؟

[اكياد]

احب اضيف معلومة للاخ(Super Member)

انه بما انني من القرية اللي عزمت القطر ألا وهي اكياد من مركز فاقوس وليس كما انت قلت عند محطة الزقازيق

واريد ان انوه لكل من يكذب هذه الواقعة التي بسببها عرف اهل الشرقية بكرمهم

فأصل الحكاية كانت في رمضان وجاء موعد الافطار والقطار كان واقفا في محطة اكياد لاجراء عملية الاصلاح له فأخذ اهل القرية الناس من القطار لكي يقدموا لهم وجبة الافطار في بيوتهم وفي المضيفات والدواوير حتى اصلح القطار واللي مش مصدق يسئل