ما بين مبارك والمشير . يا مصري لا تحزن

[se_ Elsyed]

نحن الأن أمام درس قاسي من دروس التاريخ ...

درس بيقول لنا إن الشعب اللي يضحي بالغالي والرخيض عشان يقاوم الظلم ... ثم ياتي الفجر بعد ظلام دامس دام عقود ..... وبعد هذا كله يُسلم مكتسباتة لمن لا يستحق ....

يبقى يستاهل اللي يجرى له

شوفوا معايا الخبر ده كده .. وكل واحد يستبدل كلمة المشير بـــ المجحوم مبارك ... ويقول لي هل شعر بفرق ؟

في زيارة غير معلنة تسببت فى حدوث ارتباكات فى طرق محافظة المنيا فاجأ اليوم الاثنين المشير رئيس المجلس العسكري محمد حسين طنطاوي، محافظة المنيا يرافقه د. عصام شرف رئيس مجلس الوزراء وعدد من قيادات الجيش والوزراء بزيارة لتفقد عدد من المشروعات الحيوية بالمحافظة وكذلك عدد من المشروعات المتوقفة والتى تحتاج إلى دعم لاستمرارها وزيارة عدد من المرافق الحيوية لدفع عجلة الإنتاج بها مثل مرفق المياة ومحطات الرى والصرف الصحي وعدد من المشروعات بمدينة المنيا الجديدة والمنطقة الصناعية.

وسادت المحافظة حالة شديدة من الارتباك المرورى والانتشار الملحوظ لرجال الشرطة الغائبين عن الشارع المنياوي حيث شهدت الشوارع عمليات تفتيش وتمشيط للمارة والسيارات، وتم تنفيذ حملة إشغالات كبيرة، وتوقفت حملات الإزالة غير المبررة للمساكن المأهولة والتى أسفرت عن مصرع مزارع وإصابة العشرات وتكسير عدد من أجهزة الحكم المحلى

أه صحيح .. هو المشير ما نلزش ليه المنيا من غير حراسة وكدهوت ؟

اقرأ المقال الأصلي علي بوابة الوفد الاليكترونية الوفد - زيارة سرية للمشير لمحافظة المنيا

[dongol]

أنا أنقد اذاً انا موجود

هو ده شعار الشعب المصري في هذه المرحلة السودا اللي ربنا يعديها علي خير

[se_ Elsyed]

إنت قريت الخبر كويس يا دنجل .. ولا داخل عارف إنت هاتكتب إيه وفين ؟

وهل حلمنا بوجود رئيس بسيط يقوم بزيارات لكافة مدن مصر في هدوء ومن غير بطش كلاب الشرطة ... هل هذا حلماً رومانسياً ؟

وهل لو مسئول عرف إنه بسبب الزيارة المشئومة بتاعته في إنسان بريء مات .... هل ده بالنسبة له وبالنسبة لك حدث عادي ؟

وهل قرات هذه الجُملة أيضاً ؟

والانتشار الملحوظ لرجال الشرطة الغائبين عن الشارع المنياوي

[dongol]

و الله يا ابو السيد قريت الخبر كويس و تمعنت فيه كمان

و اول حاجة لاحظتها انه مكتوب في الوفد اللي كل همها اسقاط اي حكومة و السلام حتي لو كانت حكومة سيدنا عمر بن الخطاب رضي الله عنه و طبعا الهدف معروف

يعني الخبر من مصدر ليس له مصداقيه ولا داعي للتسرع في نقله

الحاجة الثانية اللي عايز افكر حضرتك بيها اننا في مصر اللي فيها ثمانين مليون بني ادم و كل واحد بيشوف الزيارة من الناحية اللي عايزها

يعني واحد هيشوفها ان طنطاوي شايف شغله كويس و مش سايب البلد تضرب تقلب

واحد هيشوفها انه بيعمل كده علشان عايز يرشح نفسه في الانتخابات

حضرتك شايفه ان الشرطة زي الاول و طنطاوي زي مبارك ده حقك

بس اللي مش حقك خالص انك تحكم علي حاجة ما شوفتهاش بعنيك الاثنين و الدليل قالوله

[ابراهيم عبد العزيز]

و الله يا ابو السيد قريت الخبر كويس و تمعنت فيه كمان

و اول حاجة لاحظتها انه مكتوب في الوفد اللي كل همها اسقاط اي حكومة و السلام حتي لو كانت حكومة سيدنا عمر بن الخطاب رضي الله عنه و طبعا الهدف معروف

يعني الخبر من مصدر ليس له مصداقيه ولا داعي للتسرع في نقله

الحاجة الثانية اللي عايز افكر حضرتك بيها اننا في مصر اللي فيها ثمانين مليون بني ادم و كل واحد بيشوف الزيارة من الناحية اللي عايزها

يعني واحد هيشوفها ان طنطاوي شايف شغله كويس و مش سايب البلد تضرب تقلب

واحد هيشوفها انه بيعمل كده علشان عايز يرشح نفسه في الانتخابات

حضرتك شايفه ان الشرطة زي الاول و طنطاوي زي مبارك ده حقك

بس اللي مش حقك خالص انك تحكم علي حاجة ما شوفتهاش بعنيك الاثنين و الدليل قالوله

طيب يا اخ دنجل لا داعي للانتقاد كما قلت

أسالك سؤالا فقط : الخبر يقول (( والانتشار الملحوظ لرجال الشرطة الغائبين عن الشارع المنياوي )) , طيب طالما ان رجال الشرطة عندهم القدرة ان ينتشروا بهذه الكثافة فى الشارع المنياوي فلما لم ينتشروا ويوفروا الامن والامان للناس طوال الفترة الماضية ؟

[masrawy bgad]

اكبر غلطة اننا سيبنا الميدان بعد ما مبارك اتنحى على طول ... كان لازم الثوار هم اللى يمسكوا الحكم ... بس تتعوض فى ثورة تانية ان شاء الله :D

[Ahmed Anwer]

أنا أنقد اذاً انا موجود

هو ده شعار الشعب المصري في هذه المرحلة السودا اللي ربنا يعديها علي خير

الحقيقة يا أخ دنجل أنا بتخنق أكثر منك من النقد عمال علي بطال

كأننا كنا عايشين في السويد مثلا و مش واخدين بالنا

و كأن المفترض إن الثورة تقوم النهارة تاني يوم الصبح الشوارع تبقي حرير و الخضرة تزدهر و الفقراء يزهقوا من اللحمة و الحكم الرشيد يكون في كل مجال

بس علي الجانب الآخر ده من مكاسب الثورة خلي الناس تتعلم اللماضة و مترضاش بالحال المايل و يبقي بقها آد كده ،،، ده من مكاسب الثورة

أحسن من صناعة الفراعين و التسبيح و التمجي و التبرير و التهليل مهما كان

و لنسعي للكمال حتي لو إحنا متأكدين بنسبة 100% إنه مش هيحصل

[المطحون]

اليومين دول كل اناس معتبره ان طنطاوى الوجه الاخر لمبارك وده صعب حرام المقارنه كفايه الارف اللى شايفينه مع شعب كل الناس عاوزه تاكل تورته اساسا مش موجوده والكل عاوز يقسم ويدمر مصر حاجه مزعجه ايه كميه الفتاوى اللى احنا فيها والله كلنا بنجرى لتدمير مصر بلا طائل

[MZohairy]

يسقط يسقط حكم العسكر

[Alshiekh]

طيب حد شاف المصرية؟

حد شاف إفتتاح سيادة الرئيس طنطاوي ، قصدي سيادة المشير مبارك ، يوووووووووووه ، قصدي المشير طنطاوي وهو بيفتح 3 مصانع مرة واحدة بضربة مقص واحدة؟

طيب حد شاف صفحة المجلس العسكري وهي بتعرض فيديو المشير اللي وفر مياه الشرب للغلابة العطشانين؟

مش عارف هو عصام شرف هو اللي قاعد في آخر الصف؟

لو ماحدش شاف يبقى،

طوف وشوف

وقرب وشوف

تليفزيون المشير

http://www.youtube.com/watch?v=KjvFZPqqwE0

[طارق مصرى]

" من وضع نفسه موضع التهمة فلا يلومن من أساء الظن به "

الناس عندها خوف من ان العسكر يفضلوا كابسين على مراوح البلد و مثقفين و رموز بتتكلم فى الموضوع ده يروح المشير عمال يمشيلى فى الشوارع يسلم على الناس و يفتتح مصانع ! محدش يزعل لما نخاف من انهم بيمهدوا ليكون هو الرئيس ,

و بعدين أنا شايف من وجهه نظرى ان المجلس برئاسة المشير مهمتهم أمنية و استراتيجية فى المقام الاول فى المرحلة دى يوفروا الامن جوه البلد وحماية حدود الوطن توفير السلع الاساسية و ماشابه و ده يكون دور تكميلى مع دور عصام شرف اللى مهمته افتتاح المشاريع و مقابلة المستثمرين و باقى المهام المدنية لحد الانتخابات .

[dongol]

يا جماعة المشير اللي بتتكلموا عليه ده عنده سبعة و سبعين سنة و امراض الدنيا ماسكة فيه

يعني حتي لو هو اراد انه يكون رئيس فقوانين الطبيعة لن تعطية هذه الفرصة

اغلب الظن ان الجيش لا يريد الحكم الظاهر ولكنه يريد ان يأتي برئيس لا يتدخل في شئون الجيش الداخلية

و علي فكرة كل مرشحي الرئاسة اعلنوا بالفم المليان انهم لن يتدخلوا في شئون الجيش

الحاجة الاخيرة

كما قال احد الاخوة احنا مش عايشين في السويد و المفروض ان كل حاجة تتغير بين يوم و ليلة

و هفكركم لو لينا عمر ان شاء الله

حتي بعد عشر سنين من دلوقتي هيكون في سلبيات في اي حكومة تكون موجودة لاننا ببساطة مصريين

و المصري المعروف عنه انه بيفهم في كل حاجة وحاطط مناخيرة في كل حاجة

يعني مش ممكن ثمانين مليون بني ادم يتفقوا علي اي حاجة

بطلوا النقد و اعملوا لمصر يرحمكم الله

[se_ Elsyed]

والله العظيم أنا باسأل نفسي بجد : إحنا بهدلنا الراجل الكُبارة ليه ورميناه هو وعياله وعصابته في السجن ...؟

ما كنا خليناه وكل حاجه خليتها زي ما هي ؟

طالما كل التصرفات بتاعت زمان لسه زي ما هي

مين فاكر عزام عزام ؟؟؟؟؟

إخص على قلة الكرامة

إخص على الخسيسة اللي تاكل عيشها بثدييها

إخص على الناس اللي بتنكر إننا في ثورة وتغيير

إخص على اللي بيبيع نفسه بالرخيص ...

تفتكروا بعد ده كله وبعد وزير الدفاع الامريكي هاياخد الجاسوس معاه في طيارته الخاصة .... من بكره هانلعب بالفلوس لعب والثورة هاتنجح والأضرابات هاتنتهي ؟

الإفراج عن الجاسوس إيلان خلال ساعات

الجاسوس الإسرائيلي ايلان جرابيلبوابة الوفد: متابعات منذ 4 ساعة 51 دقيقة

من المقرر أن يتم الإفراج عن الجاسوس الإسرائيلي ايلان جرابيل بعد قليل، عقب لقاء يجمع المشير محمد حسين طنطاوي بوزير الدفاع الأمريكي ليون بانيتا، الذي يزور القاهرة اليوم الثلاثاء.

ومن المقرر أن يجتمع بانيتا مع رئيس المجلس الأعلي للقوات المسلحة المشير محمد حسين طنطاوي, ورئيس مجلس الوزراء الدكتور عصام شرف.

وقال الوزير الأمريكي في تصريحات للصحفيين علي متن الطائرة التي أقلته إلي الشرق الأوسط إن تلك اللقاءات تهدف إلي تأكيد العلاقات القوية لوزارة الدفاع الأمريكية البنتاجون مع الجانب المصري.

ومن المنتظر أن يناقش بانيتا مع المسئولين المصريين عددا من الموضوعات تشمل جهود المجلس الأعلي للقوات المسلحة المصرية للإشراف علي عملية انتقال السلطة بصورة تتسم بالمصداقية والشفافية, والالتزام بعلاقات عسكرية قوية وطويلة الأجل بين البلدين, وتأكيد التزام واشنطن المتواصل بمساعدة القوات المسلحة.

وقال بانيتا: أريد أن أشكر المشير طنطاوي للمساعدة التي قدمها في سبتمبر لتلبية طلب السفارة الاسرائيلية عندما كانت تحت الحصار, وأوضح أن رد فعل المشير طنطاوي كان سريعا في هذا الموقف, وأنا أقدر ذلك بعمق.

وقال بانيتا إنه سيحث المصريين علي المضي قدما في إنجاز العملية الانتخابية, بحيث يمكن لمصر التحرك نحو تشكيل حكومة مدنية تمثل إرادة الشعب ورغباته وآماله, وأكد أن الولايات المتحدة ستقدم أي مساعدة, مهما كانت, لمصر في هذا الصدد قائلا: مهما كانت المساعدة التي يمكننا توفيرها لمساعدتهم في هذه العملية, فنحن بالتأكيد علي استعداد للقيام بذلك.

وكانت قد ترددت أنباء عن مبادلة الجاسوس بسجناء مصريين في السجون الأمريكية والإسرائيلية، بينما طالبت ائتلافات إسلامية بأن يتم إطلاق سراح الجاسوس في صفقة تتضمن الإفراج عن الشيخ عمر عبد الرحمن المعتقل في السجون الأمريكية.

اقرأ المقال الأصلي علي بوابة الوفد الاليكترونية الوفد - الإفراج عن الجاسوس إيلان خلال ساعات

[أم القمر فيصل]

من عنوان مشاركتك ما قدرت امسك نفسى من الضحك ههههههههههه

بس اطمنك الطنطاوى ماراح يرشح للانتخابات

[شرف الدين]

والله العظيم أنا باسأل نفسي بجد : إحنا بهدلنا الراجل الكُبارة ليه ورميناه هو وعياله وعصابته في السجن ...؟

ما كنا خليناه وكل حاجه خليتها زي ما هي ؟

طالما كل التصرفات بتاعت زمان لسه زي ما هي

مين فاكر عزام عزام ؟؟؟؟؟

ممكن تفكرنا بعزام عزام يا سي السيد ؟

[pink rose]

دي مداخلة للفاضل محمد

يمكن النار اللي هاتاكلكم دي تهدى شوية

السلام عليكم

موضوع الجاسوسية هو موضوع معقد وتدخل فيه اعتبارات كثيرة سواء عند الحكم على الجواسيس او ترحيلهم او تبادلهم فى صفقات تتم فى صور وأشكال متعددة.

في شهر يونيو من العام الماضي قامت السلطات الأمريكية بالقبض على عشرة أشخاص روس الجنسية بتهم التجسس لحساب روسيا.

وفي خلال شهر أو أقل عقدت صفقة بين روسيا وأمريكا تم بموجبها إفراج السلطات الروسية عن أربعة مواطنين روس عملوا كجواسيس لصالح الولايات المتحدة داخل روسيا مقابل إبعاد الجواسيس الروس العشرة المعتقلين من الولايات المتحدة. المبعدين والمفرج عنهم كلهم روس وليس بينهم امريكي واحد.

ياريت نثق فيما يقوم به المسئولون وان نتوقف عن التخوين والشك في كل ماتقوم به السلطات .

السئولون هم مصريون في المقام الأول وليسوا عملاء يعملون لصالح دول أخرى

Quote

تبادل الجواسيس بين امريكا وروسيا: صفقة غير متكافئة

فضيحة التجسس انتهت بالسرعة ذاتها التي بدأت بها، الامر الذي وُصف بـ" نجاح السلطات الروسية" التي تمكنت من اقناع الولايات المتحدة بالإقدام على تبادل جواسيسها العشرة بالمساجين الاربعة الذين حُكم عليهم في روسيا بالسجن لمدد مختلفة.

وقد أُتهم ثلاثة في الجانب الروسي وهم العالم ايغور سوتياغين والموظفان السابقان للاستخبارات الخارجية الروسية سيرغي سكريبال والكساندر زابوروجسكي بالخيانة العظمى.

الا ان هذه الجريمة الخطرة لم تمنع الرئيس الروسي دميتري ميدفيديف من اصدار مرسوم عفو عنهم.

وقالت الصحفية ايلينا سوبونينا: "يبدو ان هولاء العشرة لم يُلحقوا ضررا بالغا بالامن الامريكي. و باعتقادي، فان المرحلين الاربعة من روسيا يمثلون اهمية اكثر بالنسة للولايات المتحدة، والصفقة غير متساوية بالتأكيد."

من جهة اخرى، ما زال العديد من المحللين، ومنهم يوري زينين، يُرجعون اسباب السرعة التي تمت بها الصفقة لاعتبارات سياسية تختفي وراءها مخاوف موسكو من احتمال كشف النقاب عن اهداف نشاط شبكتها التجسسية.

ويقول المحلل السياسي يوري زينين ان "فضيحة التجسس كان يمكن ان تؤدي الى الغاء ما يُسمى بـ "اعادة تشغيل" العلاقات الروسية الاميركية... حيث تم التأكيد على تمسك البلدين بهذا النهج اثناء الزيارة الاخيرة للرئيس ميديفيدف الى واشنطن. ويبدو ان الطرفين وجدا حلا يُرضي كلا منهما، لكن موسكو كانت مهتمة اكثر بسرعة إتمام هذه الصفقة خشية ادلاء بعض المعتقلين العشرة بافادات قد تسلط الاضواء على الاهداف الحقيقية لشبكة التجسس هذه."

ورغم الصمت والسرية المحيطين بمستقبل حياة "العائدين" الى موسكو، الا ان مصادر عليمة افادت باحتمال منحهم مساكن في روسيا ومنحا مالية تشجيعية.

اما المُبعدون من روسيا ومنهم العالم ايغور سوتياغين الذي قضى احدى عشرة سنة سجينا، فنقل اقاربه عنه قوله انه اعترف بالخيانة العظمى رغم ارادته، و انه طُرد من وطنه من دون تلقي اي ضمانات باللقاء مع افراد اسرته والعودة الى روسيا ثانية

.

[pink rose]

يعني الموضوع مش زي عزام عزام اللي خرج معزز مكرم بدون مقابل

اهدوا بقى شوية بجد كده كتير

[se_ Elsyed]

يمكن النار اللي هاتاكلكم دي تهدى شوية

إسلوبك غير مقبول يا ام مريم ومش هاعلق عليه

---------

ممكن تفكرنا بعزام عزام يا سي السيد ؟

يعني ده سؤال إستفهامي ولا إختباري ؟

على العموم اكلمك عنه :

- هو جاسوس إسرائيلي كلب ... درزي الديانة ... يعني مالوش مله ولا مبدأ ... وهو ظابط مخابرات بالمناسبة ... جاء إلى مصر في منتصف التسعينات تحت غطاء إنشاء شركة لتجارة المنسوجات في مدينة نصر .... وتم القبض عليه متلبساً بتلك التهمة وكان إستطاع تجنيد مصريين في شبكته ... وكان صيداً ثميناً بالنسبة لمصر .... وأنقلبت إسرائيل رأساً على عقب خصوصاً إنها لعبة لعبة المستهبلة وانكرت في الأول علاقتها بهذا المجرم .. وتم الحكم عليه سنة 97 بخمسة عشر سنة سجن ... وبشريكة المصري عماد عبد الحليم إسماعيل بخمسة وعشرين سنة ....

وطلع علينا الزعيم المفدى المجحوم وحلف بأيمانات المسلمين إنه لا لو ولن يتدخل في احكام القضاء وإنه لا علاقة له بالموضوع ... والله زي ما يكون الموضوع ده إمبارح وفاكره بالظبط

وكل المجتمع المصري فوجيء سنة 2004 بالإفراج عن الكلب مقابل ماذا ؟

مقابل افراج إسرائيل عن 6 طلبة جامعيين مصريين تسللوا أرضها .. وزعمت إسرائيل إنهم كانوا هاينفذوا عمليات فدائية ... وهما أساساً عيال صغيرة لا ناقة لهم ولا جمل .. وكل اللي كان حيلتهم هي قصافات زي بتاعت الرحلات .. وكشافات صغيرة ..

لكن قلب الزعيم المفدى إللهي ربنا يجحمه .. رق والدمعة فرت من عينية وقال ولادي ولادي ولادي .. لازم أفرج عن ولادي .... وسلم الصهاينة عزام عزام ...بمنتهى السهولة

الغريب بقى إن قلب الزعيم لم يرق لمقتل 3 جنود مصريين على الحدود قبل الأفراج عن عزام عزام بأيام قليلة ... وكالمعتاد الصهاينة كانوا بيتعلموا عليهم النيشان وقتلوهم ... والزعيم المفدى لم يحرك ساكنا وقتها ..

وأستٌقبل عزام عزام إستقبال الفاتحين هناك

اما نحن ... فحملنا العار كالمعتاد على رؤوسنا

---------------

إوعوا تفتكروا إن الواحد ضد مصلحة بلده ... لكن .... لما تيجي تبيع .. ما تبيع بالغالي .... وبيع بشروطك ... مش بضغوط وببلاش كالمعتاد

بالمناسبة .. اقسم بالله تابعت الاخبار خلال عام تقريباً من الأن ... وكلها عن تسللات إسرائيلين إلى داخل الحدود المصرية سواء البرية والبحرية .. وأُفاجأ إننا بنسلمهم لإسرائيل تسليم مفتاح !!!!!!!!! ومنهم ناس بعد الثورة

الغريب بقى ... إن الصهاينة قابضين حتى الان على 3 أطفال مصريين صغار في السن ... بتهمة التسلل غير المشروع إلى أراضيها من 4 أو 5 شهور ... والمحكمة براتهم بعد حملات إعلامية من صحف مصرية .. مش أعوذ بالله من الخارجية المصرية او الرئاسة المصرية ... ومع ذلك تم إلقائ القبض عليهم بعد خروجهم من المحكمة ....

وإسرائيل هاتدخلهم في الصفقة ... تخيلوا ؟

-------

ما حدش لاحظ حاجه بقى ؟

إن وزير الدفاع بنفسة جاي ومكلف نفسة عشان مواطن أمريكي متهم بالتجسس ومثبته عليه التهمة

وإحنا لسه الأسبوع المصي وزير الخاريجة بيامر القنصليات ولاسفارات المصرية حول العالم بحصر المسجونين المصريين في الدول اللي فيها القنصليات دي

شوفتوا الفرق ؟

وشوفتوا كنا بنطالب ليه بثورة في كل حاجه ؟

وبثورة تعمل للإنسان قيمة حتى لو كان قتال قُتله

حد فاهم حاجه ؟

[se_ Elsyed]

بمناسبة الجاسوسية ... القصة دي حصلت معايا والله زي ما بأقول لكم كده بحذافيرها

- في أخر يناير 1992 كنت في سنة تانية كلية ... وكنت هاموت وأزور الأقصر وأسوان .. وكانت الجامعة دايماً بتنظم رحلات مخفضة في هذه التوقيت عشان الشتا هناك تحفه بصراحة .... لكن قولت جامعة وخانقة ونوم بميعاد وصحيان بميعاد وحاجه تقرف ... ففكرت أنا وأحد أصدقائي إننا نطلع مع نفسنا في نفس التوقيت ... وبالفعل روحنا وكانت رحلة ممتعة ... واللي زار الأقصر بالذات هايعرف إن في معالم سياحية هناك بتبقى في البر الغربي من النيل والفنادق كلها في الشرق ... ولازم تروح الاماكن دي بمركب شراعي ... المهم المركب بتبقى بخمسة جنية للفرد المصري طبعاً ... فركبنا أنا وصاحبي ... وجت مجموعة من الأجانب ولدين وبنتين فسألوا المراكبي بكام الاجرة .. فضرب لهم مبلغ عالي ... فلقيت واحد فيهم بيميل عليه ويقول لي إنت ركبت بكام .. فقولت له بصراحة بخمسة جنيه .. فقال لي ما تخليه يركبنا زيكم إحنا طلبة امريكان وشكل السلك ضاربهم وجايين وتلاقي في جبيهم سته جنيه وربع .. وبالفعل أقنعت الراجل وركبوا معانا وأتفسحنا هناك وقضينا يوم ظريف .. وصمموا ياخدوا رقم تليفوني في القاهرة لإنهم هايزوروا القاهرة بعد كام يوم ولازم نتقابل

المهم إتصلوا بي بالفعل وعزمتهم عندي في البيت ... وصارحوني بالحقيقة المُره .. وهو إن معاهم الجنسية الأمريكية والإسرائيلية في نفس الوقت وعندهم منحة للدراسة بإسرائيل .... كمان ؟؟؟؟... لووووووووووووووووووولي

طبعاً قلبي وقع في رجلي ... خصوصاً إنهم سابوا لي عنوانهم في أمريكا وإسرائيل .. أنا فاكر كويس إنهم كانوا من القدس

المهم العيال قالوا لي إننا لازم نرد لك العزومة .. إيه رأيك نخرج نتفسح بعد كام يوم .. فقلت لهم أنا باعز الفسح زي عييني

إلا وكام يوم بعدها لقيتهم بيتصلوا بي وزي ما يكون حد بيجري وراهم وبيقولوا إحنا لازم نسافر دلوقت .. وحالاً !!!!!!!!!1

ليه يا جدعان ؟ ... .. قالوا لي السفارة بتاعتنا قالت لنا كده

كل ده وأنا مش فاهم حاجه

ما فيش كام يوم .. ولان الحظ عارف صحابه .. وقليل البخت يلاقي العضم في الجبنه ... إذ بي في شهر فبراير أقرا الإعلان عن القبض على شبكة تجسس إسرائيلية يتزعمها شخص إسرائيلي من أصول ليبية إسمه " فارس مصراتي " ومعاه بنته ... وكانوا ماجرين شقة في منطقة النزهة .. يعني فركه كعب من عندنا ... وكانوا بيجندوا الشباب المصريين بأساليب قذرة والراجل عامل ببنته أحلى شغل ... وطلع البت كمان عندها إيدز ... ونقلت العدوى لناس كتير من الزباين اللي كانوا بيروحوا الشقة .. يعني جايه كمان وعارفه هي بتعمل إيه .... وكان شخص بجح بجاحه لم أرها في حياتي ... فلما تم إلقاء القبض عليه تخيلوا إنه في قفص الإتهام بالمحكمة في أول جلسات المحاكمة خلع ملابسه تماماً ونزل ضرب في الشرطة وأصاب أحد ضباط الحراسة إصابات بالغة .. بل تحدى القاضي نفسه وتبول أعزكم الله بالمحكمة ... وأتحكم عليه في الفعل ده بس بـ 3 سنوات .. ده غير قضية التجسس .. ونزل هو وبنته - البت دي كانت صاروخ إسرائيلي موجه يخرب بيتها - نزلوا شتيمه في مصر وفي القضاة وكانوا شبيحه بصراحة .. وتحدى المحكمة كلها وقال إنه سيطلق سراحة خلال أيام ( على فكرة .. جت طائرة خاصة من إسرائيل بعدها بأيام .. وبالفعل خدت الزبون وبنته ... والشعب إتقرطس كالمعتاد ولا نعلم إلى الان ماذا تم .. وماذا فعل الزعيم المفدى )

كل ده وأنا أقرا التفاصيل وخلاص بقيت زي البليلة وعندي مغص ليل نهار .... وروحت جايب أفلام زملائي الجواسيس السابقين عشان اشوف كانوا بيتعذبوا إزاي عشان يعترفوا ... وكنت باتدرب طبعاً وأغطس نفسي في اي برميل ميه ... وأحاول أمسك سلك الكهربا عريان والحاجات دي عشان أبقى جاهز إني أتنفخ بسهولة .... ... ومستني طبعاً السادة ظباط قسم الوايلي ... والسادة ظباط قسم الدرب الأحمر ... والسادة ظباط قسم مدينة نصر وكل اللي له دخل واللي مالوش دخل يقتحموا بيتنا ويقبضوا عليه في أي وقت ... وروحت حرقت اي ورقة مكتوب فيها عناوين ولا أسماء العيال دي.. وكنت ناوي أغير دهان الشقة كمان للتمويه ... وكتاب الله فضلت أحفظ في كلام وأعترافات عشان أقولها امام السادة الظباط وكانت أيام سودا على دماغي وحرمت أعمل فيها حركات جدعنه مع أي اجنبي إن شالله لو شوفته بيتعلق في الشارع ...

[pink rose]

ما فهمتش يا س س يعني ايه اسلوبي مش مقبول

هو كلمة النار اللي هاتاكلكم دي كلمة قليلة ادب و لا حاجه و انا ما اعرفش

كل ما ادخل في مكان سواء هنا او الفيس الاقي الناس مولعة و قايدة نار من اي تصرف للمجلس العسكري او المسؤولين

و كل حاجه الكل بينتقدها و باحس ان دا من غير تفكير فيها

و حطيت مداخلة الفاضل محمد توضيحا لان مسألة الجواسيس بيتم التعامل بيها بشكل غير اللي احنا بنفكر فيه

و مشكروا ادى مثال على تبادل الجواسيس بين امريكا و روسيا

و كلمة النار اللي هاتاكلكم دي مقصود بيها الاستعداء الشديد اللي شغال ف البلد على كل من هو في موقع مسؤولية و عاوزاكم تهدوا شوية الدنيا ما تتاخدش كده ابدا بجد

و فعلا مش عارفه حضرتك فهمت ايه من كلمتي عشان تقولي اسلوبي غير مقبول

اظن كلامي اللي فوق دا ترجم مقصدي

هو ليه الكل بقى يقفش كده

مالكم

ما تهدوا شوية يا اخوانا