عيد ميلاد بيجة الواحد و التسعون ربى هبها الصحة و السعادة

[عادل أبوزيد]

اليوم عيد ميلاد بيجة الواحد و التسعون "عقبال الجميع" و بالنسبة للأسرة و العائلة فهو بمثابة العيد القومي

ما سبق كان إستهلالا لابد منه

منذ الصباح الباكر بل ربما قبل الصباح الباكر بقليل و التليفونات لا تنقطع تهنئة بعيد ميلاد بيجة و كنت أسمعها و هى ترد على التليفونات .... سبحان الله أيا كان المهنئ أو المهنئة فلها معه قصة و رواية و تسأله عن كافة أحواله التى تذكرها جيدا و تذكر أبنائه و بناته و مين فى سنة كام و مين خلف و مين سافر و مين جه فعلا بيجة إدارة علاقات عامة على أحسن مستوى.

و لا تنسى أن تعرض خدماتها على من يتحدث فى التليفون "مش عاوز حاجة نعملهالك ..... بصحيح أؤمر"

سيدة من الزمن الجميل و اليوم ننتظر الأبناء و البنات و الأحفاد و الحفيدات و بنات العم و الأخوات و سيكون فى بيتنا مهرجان قومي للإحتفال بعيد ميلاد "بيجة" و الإسم لمن لا يذكر هو تصغير أو "دلع" للإسم الحقيقي "بهيجة هانم" فعلا "بهيجة هانم" فى شهادة الميلاد .... كان والدها هو العمدة و الذى أملى بيانات الميلاد هو شيخ البلد فلازم يعطيها لقب ... هى بنت العمدة تتكتب زى خلق الله بهيجة حاف فأملى بهيجة هانم أو ربما من كتب إستعيب يكتب بهيجة حاف كدة بدون ألقاب فأضاف "هانم" للإسم

[se_ Elsyed]

ربنا يديها طولة العمر وتملى حياتكم بهجه .... بجد شيء جميل ان يكون هناك أشخاص في حياتنا يدخلوا علينا البهجة .. ويكونوا كالشجرة الوارفة التي تجمع الكل تحت ظلها

[Alshiekh]

تهنئة بعيد ميلاد بهيجة هانم وعقبال المئوية وهي بصحة وعافية

[pink rose]

كل عام و هي بخير

ربنا يعطيها الصحة و العافية

و يبارك في عمرها و صحتها

و يمتعها بيكم و يمتعكم بيها

الجدود بركة كبيرة جدا في البيت

ربنا يسعدكم دايما

[عبير يونس]

كل سنة و بهيجة هانم بخير و سعادة وهنا

ربنا يديها الصحة و العافية

و يباركلكم فيها

آمين

[Salwa]

كل عام وانتم جميعا بخير ويارب دايما تحتفلوا سوا بعيد ميلاد نوارة العيلة بهيجة هانم ( بيجة ) :clappingrose: :clappingrose:

واسمح لى حضرتك استاذ عادل اعلق تعليق بسيط ....سوف انتهز فرصة هذا الأحتفال ( واقول كلمتين عايزة اقولهم ) هما كلمتين بهذه المناسبة الجميلة ..

طبعا كلنا هنا ف المحاورات لاحظنا اد ايه حضرتك بتعتز ببيجة (( بلاش نقول حماتك ( لو ان الحما...معناها حماية ) ولكن نقول الانسانة جميلة الروح التى تحيا معكم ))

طيب..

ياترى أى انسان بيكبر ف السن بيكون كدة ؟؟؟ بيكون طيب وجميل ومبتهج ( كل انسان فعلا دايما له نصيب من اسمه ) ومتفائل و...مجامل الى ابعد حد ؟

بالطبع لأ....مش كل الناس كدة .

اللى كدة بس الناس اللى ربنا بيختارها علشان تكون كدة ..بيكونوا ناس اتولدوا وهم بيحبوا الناس ومستعدين يساعدوا اللى يعرفهم واللى ميعرفهمش...

فيه ناس بتعتبر ( كبر السن فى كثير من الأحيان .لعنة ) ...يقولوا ..الكبر عبر.

وخلاص بقى ده كبر ف السن مطلوب منه ( ينزوى ) ويستنى ....امتى حاينقلوه البر التانى ...صح؟؟

كنا اتكلمنا قبل كدة عن جودة الحياة والاستمتاع بالحياة ..

وفيه نقطة مهمة جدااااااا ...يمكن نسينا او تناسينا نتكلم فيها .

وهى ........

معاملة الانسان الطيبة .....ومودته ورحمته....مع من حوله .

زى ما بيقولوا .بتقعد له ف الكبر .

اد ايه بيكون شئ جميل جدااا ....ان الجد يلاقى اولاده واحفاده بيهتموا بيه ......والأجمل منه ان هو كمان بيهتم بيهم وكان دايما بيهتم بيهم .

كل شئ معدى .

حتى الرحمة والمودة ..والاحترام ......وقبلهم الحب والفرحة والسعادة .

ربنا يخللى بيجة هانم......ويارب دايما ف كل بيت ف مصر يكون فيه ( حد ) له روح جميلة زى روحها الحلوة .

عقبال سنين كتير جايا كلها صحة وفرحة ورضا . :give_rose:

[Om Zayd]

وددت لو استطعت ان اضع تاجا على رأس أمهاتنا و جداتنا

أدام الله علينا نعمة وجودهم بيننا

و أدام عليهم تاج الصحة و العافية

تم تعديل 4 أكتوبر 2011 بواسطة Om Zayd

[الدكتور ياسر]

اليوم عيد ميلاد بيجة الواحد و التسعون "عقبال الجميع" و بالنسبة للأسرة و العائلة فهو بمثابة العيد القومي

ما سبق كان إستهلالا لابد منه

منذ الصباح الباكر بل ربما قبل الصباح الباكر بقليل و التليفونات لا تنقطع تهنئة بعيد ميلاد بيجة و كنت أسمعها و هى ترد على التليفونات .... سبحان الله أيا كان المهنئ أو المهنئة فلها معه قصة و رواية و تسأله عن كافة أحواله التى تذكرها جيدا و تذكر أبنائع و بناته و مين فى سنة كام و مين خلف و مين سافر و مين جه فعلا بيجة إدارة علاقات عامة على أحسن مستوى.

و لا تنسى أن تعرض خدماتها على من يتحدث فى التليفون "مش عاوز حاجة نعملهالك ..... بصحيح أؤمر"

سيدة من الزمن الجميل و اليوم ننتظر الأبناء و البنات و الأحفاد و الحفيدات و بنات العم و الأخوات و سيكون فى بيتنا مهرجان قومي للإحتفال بعيد ميلاد "بيجة" و الإسم لمن لا يذكر هو تصغير أو "دلع" للإسم الحقيقي "بهيجة هانم" فعلا "بهيجة هانم" فى شهادة الميلاد .... كان والدها هو العمدة و الذى أملى بيانات الميلاد هو شيخ البلد فلازم يعطيها لقب ... هى بنت العمدة تتكتب زى خلق الله بهيجة حاف فأملى بهيجة هانم أو ربما من كتب إستعيب يكتب بهيجة حاف كدة بدون ألقاب فأضاف "هانم" للإسم

أسأل الله أن يطيل عمرها في طاعته و يختم لها برضوانه و جنته .. كل عام وأنتم بخير

[Folana]

ما سبق كان إستهلالا لابد منه.....:)

ماما بيجة هانم..كل سنة وأنت طيبة ، وربنا يخليك لأحبابك تسعديهم وتسعدى بهم ...وتنعمى بالصحة وراحة البال ورضا الله ...

[شرف الدين]

كل سنة وبهيجة هانم بخير وصحة وعافية..

[hOuSsAm]

كل سنة وبيجة هانم طيبة

وباحسن صحة ودايما مستمتعة بحياتها وفى حالة عطاء

وقعبال منحتفل بيها بعيدها المئوى باذن الله

وتبقى حفلة كبيرة جدا

[أسد]

مرتين أثناء زيارتي للأستاذ عادل ... تقابلت مع بيجه ..

بالفعل ... أستطيع أن أوقل أن كلام الأستاذ عادل عنها واقعي جداً ...

برغم ظروف العمر .. إلا أنني أجزم بأنها شخص مضياف .. لا تنسى الترحيب بالضيوف ...

وتشعر بالفعل بوجودها في المنزل ...

ربنا يديها العمر والصحة ..

كل عام وهي بألف خير ...

وعيد عائلة سعيد .. ليس عيد ميلاد فقط

[مغتربة]

كل عام و هى بخير و صحه و سلامه

و باذن الله نهنيها هنا بعيد ميلادها المائه

و هى فى اتم عافيه و اسعد حال

من تمام نعمه الرب على العبد ان يطيل عمره دون ان يرى ما يسوؤه فى ماله او اهله او صحته

ادعو الله ان تكون ممن يتم الله نعمته عليهم

[نوران]

ماشاء الله لا قوة إلا بالله

ربنا يبارك لكم فيها ويمن عليها بدوام الصحه والعافيه

وكل عام وهي بخير

ربنا يرضي عنها و يطيل عمرها في طاعته ... آمين

[زهرة الجبل]

ماشاء الله تبارك الله

أدامها الله لكم حنونه رئيفه مبهجه تملأ الحياه بوجودها بينكم طمأنينة و بركه

و أدامكم لها عزاً و عزوة و سنداً تبعثون في نفسها الرضا و الإمتنان

و أدام على جمعكم معاً الترابط و الموده و الدفء و المحبه

و كل عام و هي و أنتم بكل الخير

أم كريـــــم

[لماضة مصرية جدا]

السلام عليكم و رحمة الله و بركاته

الله......بجد يعني يا استاذ عادل شكرا اوي علي اللمة الحلوة ديت و شكرا ان حضرتك شاركتنا بيها

و بما اننا في عيد ميلاد و كدهوت يعني

انا مكنشي عندي تيتة

لا من ناحية بابا و لا من ناحية ماما :blink: (يعني هو انا جيت الدنيا و هما اشتاقوا للجنة قوام و كده)

المهم بس كان عندي تيتة أم لطفي

فاكراها انها الوحيدة اللي خلتها تخرم ليا وداني....(لاني خرمتهم علي كبر الحقيقة يعني)

فاكراها علشان بيتها كان واسع اوي....و كان تحته جنينة فيها مراجيح كتير بس كنا بنحب نقعد عندها اكتر من ان احنا ننزل ع المراجيح

فاكراها علشان كانت دايما سايبانا نلعب و نجري في البيت و نقفل البيبان عادي يعني من غير ما تزعق

فاكراها علشان انا معرفشي ابلة فضيلة بس انا اتربيت علي حواديت تيتة ام لطفي...من اول الاميرة الجميلة اللي كل ما تلمس حاجة تتحول لطاقة نور لغاية امنا الغولة اللي لازم تيجي للي بيكذب

فاكراها علشان كان ليها خلطة كده غريبة في اللسان عصفور

فاركاها علشان حتي بعد ما دخلت المدرسة و بطلت اروح عندها زي الاول....كانت هي اللي بتتصل و تقول لماما ابعتولي البنت اللمضة

فاكراها...و هفضل دايما فاكراها و لسه بعدي علي بيتها اللي ورانا و بفتكر كل حتة جرينا فيها و بفتكر الصالة الواسعة و قعدتها فيها

ع فكرة تيتة ام لطفي...مكنتشي مامة مامتي....خالص و لا مامة بابا

هي كانت بني آدم رائع جدا ربنا خلقه زي ما ماما سلوي قالت علشان يحب الناس كلها

علشان يرسم دايرة سعادة تفضل تكبر و تكبر و تكبر و نفضل فاكرينها مهما كبرنا

هي تيتة ام لطفي

افتكرتها النهاردة لما شفت موضوع حضرتك و قولت في نفسي

ياااااه يا ربي

اتاري فيه "تيتة ام لطفي" و تيتة بيجة هانم" في كل حتة

اكيد القلوب الصافية....ربنا هيمنحها دايرة سعادة بتكتمل بوجود ناس استثنائيين زيهم

كل سنة و تيتة بيجة بكل الصحة و السلامة و تكون هي مركز دايرة دفا و حب و نور لكل اللي حواليها

مساكي يا تيتة...و صباحك و كل ايامك...دفا قلبك