مهزلة شيء يُسمى مجلس الشورى في إنتخابات 2011

[se_ Elsyed]

يعلم الله إن ما نقوله هنا أو في أي مكان لا نبتغي فيه إلا وجه الله ثم مصلحة الوطن ...

وأننا عندما قولنا مثلاً يا ناس يا هو حرام عليكم .. أجلوا مجلس الشورى شوية وأعملوا بدلاً منه مجالس محلية تُدير البلد من الشارع ومن أرض الواقع وتكون حلقة وصل بين الشارع المصري وبين المحليات والمحافظات و و و

لكن لا حياة لمن تنادي لإن مدرسة مبارك مازالت قائمة ومازلت تحكم

أنا عارف إنهم مُحرجين مما جاء في الأستفتاء على الـ 8 مواد بتوع الدستور اللي ضحكوا علينا فيه ولبسونا السلطانية .. لإن اللجنة التاسيسية للدستور ستتكون من أعضاء مجلسي الشعب والشورى ... وليكن ... إيه هو التعديل ده قرآن لا يمكن تعديلة ؟؟؟؟؟

ما يتلغى في الوقت الحالي أو يتأجل شويتين تلاتة لإنه بجد مصاريف على الفاضي وبصراحة ومن الأخر مجلس مالوش أي تلاتين لازمه

على فكرة .. من يستعرض التجربة الماليزية والتركية سيكتشف أنها بدأت بإصلاح المحليات أولاً .. تخيلوا ؟

أما نحن فنعيش الأن من غير أي محليات وبالتالي .. أستشرى وأنتشر سرطان العشوائيات أكثر وأكثر .. والشوارع بقت عبارة عن مزبلة كبيرة يعيش حولها وفيها البشر

فلما نعرف إن بعد مرور 5 أيام من التقدم للترشح بمجلسي الشعب والشورى تقدم

2721 شخص لمجلس الشعب

و

187 فقط لمجلس الشورى في 5 أيام واخدين بالكم ده على مستوى الجمهورية ... خدوا المفاجأة .. منهم 76 النهاردة مرة واحده ... يعني أقل من النصف بشوية

وباقي يومان فقط وسيغلق باب الترشح

ولما نعرف إن مجلس الشورى الجديد سيتكون من 270 عضواً على أن يكون انتخاب ثلثي أعضاء المجلس بالقوائم الحزبية المغلقة والثلث الأخير بنظام الانتخاب الفردي.

يبقى شكلنا كده داخلين على ناس كتيرة هاتفوز بالتزكية زي ما كان بيحصل أيام الديكتاتورية العظمى لمبارك

يبقى ما يحدث أمام أعيننا الان هو إستفتاء شعبي حقيقي على عدم اهمية هذا المجلس اللي لا مؤخذه " هفأ " ومالوش معنى في هذه المرحة

بالمناسبة .. لو جمعتوا كل تصريحات المستشار محمد عطيه وزير التنمية المحلية هاتموتوا من الضحك على وزراء الثورة ... أكثر من 100 تصريح أيها السادة يوعد إن خلاص كلها كام يوم ... كام يوم بس ونُعلن عن اعضاء المحليات المؤقتين لحد ما نجيب أساتذة فرنساوي .. قصدي لحد ما نعمل إنتخابات محلية ودي بعد إنتخابات مجلس الشورى ... وهوووووووووب إتأجلت لاجل غير مسمى وإحتمال كبير تبقى بعد الإنتخابات الرئاسية وعليكم خير واللي مش عارفين هاتتم إمتى .. والكام يوم دول بيجروا وراهم شهور وكأنه بيختار رواد فضاء نادرين بالمجتمع

حاجه تشل ... مش كده ؟

[سكر]

ياعم بلاش يتلغى على الاقل ليه لا يتم تاجيله لبعد انتخابات الرئاسه

[Alshiekh]

يعني نتجاهل رأي 73% صوتوا بنعم؟

نتجاهل الناس اللى راحت وصوتت ونصرت المجلس والمجلسين وناخد برأي الأقلية؟

هي دي الديمقراطية يعني؟

الناس لما تبني بيت أو عشة بيبدأوا ينظفوا الأرض الأول ( قانون العزل )، وبعدين يحفروا ويصبوا الأساسات ( يعملوا الدستور ) ، وبعدين يعملوا القواعد ( المحليات ) وبعدين يبنوا الحوائط ويوقفوا المبنى على أرضية ثابتة ( مجلس الشعب أو النواب ومجلس الشورى أو الشيوخ ) ، وبعدين يعملوا السقف والقبة ( انتخابات الرئاسة ).

أحنا بقى دخلنا من نص الكتاب وبدأنا نزرع عمدان من فوق لتحت ( نظرية جديدة )

ربنا يعديها على خير

[سكر]

اتحدى حد يقولى انه صوت فى الاستفتاء على ان مجلس الشعب و الشورى بالوضع الحالى

ازاى كان قانون الانتخاب نفسه لسه معمول اول امبارح ويمكن كمان يتغير