إلى كل صاحب شركة إلحاق عمالة بالخارج : إتقي الله في أبناء بلدك

[se_ Elsyed]

مش هالوم هنا وزارة العمل إلا لما تستقر الأمور ويبقى في حكومة محترمة نكلمها - اللهي لا يوفقك يا عيشة دنيا ولا أخرة -

لكن بأوجه كلامي لمكاتب النخاسة اللي بتخدع الناس وخصوصاً الشباب الصغير.. وبالأخص الشباب اللي من الأرياف والقرى اللي كتير منهم تجاربهم قليلة .. وكتير منهم همه السفر وبس ... وكتير منهم ما لفش ولا حتى أتمرمط في النت وعرف الدنيا فيها إيه ... ومجرد ما يقرا إعلان أو يسمع خبر إن المكتب الفلاني بيسفر فيجري وهو فرحان وبعدين يسافر إلى الخليج وتحديداً إلى السعودية لانها أكبر سوق عمل .. ثم يفوق على المصيبة السودا اللي منتظراه .. والسبب مكتب النخاسة اللي لا يقل عن أي شبكة دعارة بتكسب من وراء بيع الناس .. وكله اللي يهمه في الدنيا عمولته .. عمولته اللي بياخدها من خداع الناس ... عمولته الحرام مليون في المية واللي بإذن الله هاتبقى وقود له في نار جهنم ... لإن واعي وعارف الدنيا فيها إيه .. ومع ذلك يخدع نفسه ويقول : والله الموضوع عرض وطلب وإحنا مش بنضرب حد على إيده عشان يسافر

- باكتب الكلام ده ويعلم ربنا بقى لي ييجي 4 أيام عندي صداع قاتل من ساعة ما عرفت الموضوع التالي : جالس مع أحد الأصدقاء من كام يوم فبيقول لي إني كنت باتعشى في أحد المطاعم ... ولقيت في الترابيزة اللي جنبي شباب مصريين قاعدين .. بس يبدو إنهم جداد في السعودية وماسكين قائمة الطعام ومحتارين فيها .. لإنه كان مطعم بيتزا ومعجنات شامية ... وكتير مننا ما يعرفش في مصر معاني الأكلات دي زي ( المناقيش .. وصفائح اللحم و عش البلبل ...... إلخ ) وهي مسميات خاصة ببلدهم لم يعرفها إلا اللي سافر كتير وأكل في مثل هذه المطاعم ... فبيقول لي إتعرفت عليهم وكانوا 5 شباب ... والكلام جاب بعضه وقالوا له إحنا لسه واصلين من اسبوع للعمل باحدى الشركات .. 4 مهندسين وواحد محاسب .. فتجرا وسألهم إننتوا جايين على مرتب كام ؟

تخيلوا يا مؤمنين حتى ياللي ما سافرتوش ولا عارفين المصاريف والحياة هنا إزاي ..... كلهم على بعض كده جايين على مرتب واحد فقط وهو

1000 ريال للراس

!!!!!!!!!!!!!!!!

يرضي ربنا ده ؟

طب يرض أي حد عنده عقل وقلب ؟

لما شباب زي دول ينضحك عليهم تحت أي حجة .. بحجة إن ظروف البلد دلوقت مش مستقرة ... وتعالى يا عم جرب ... وبكره احوالك تنصلح ومرتبك يزيك - هيزيد 50 ريال طبعاً وحاجه زي الفل -

وإمعاناً في الخداع وأكل الحرام المكتب يقول لهم - ده على لسانهم --خلي بالك ده الشركة موفره لك كمان السكن والمواصلات يا عم .... يا سلام على الكرم يا ولاد

- حتى لو إتكلمنا على الكواليتي بتاعت الناس دي .... وإن اللي يقبل بحاجة زي دي بالتأكيد إنسان لن يفيد المكان اللي هو فيه وهايفضل طول عمره كده سد خانه وخلاص ....

طب نفسي أعرف إحساسه إيه لما ييجي الشركة ويلاقي عامل النظافة بياخد 1500 ريال .. ده لو لقيته ..

أقسم بالله لسه أمبارح سامع برنامج في الراديو وأنا في العربية عن أزمة الخادمات في السعودية وإن مرتب الخدامة وصل في بعض الأحيان إلى 3000 ريال ... ده لو كنت محظوظ ولقيتها لأن إستقدام شغالة بقى درب من دروب الخيال .. وبالتالي كتير بيلجأوا للشغالات من السوق المحلي اللي بيشتغلوا بالساعة ... والساعة هنا زي ورقة البوسطة والأجرة 20 ريال في الساعة على الاقل ... يعني إحسبوها إنتوا بقى لو جت البيت واشتغلت 5 ساعات فقط في اليوم = 100 ريال * 30 = 3000 ريال .... حاجه أخر جمال غير أكلها وشربها والمواصلات اللي كل ده عليك يا حلو

وأحساس الواحد إيه وهو لو مسك ورقة وقلم وقال أنا هاخد الـ 1000 ريال وأحوشها كلها ومش هاكل ولا أشرب وهاصوم لمدة سنتين وبرضوا ما يلاقيش نفسه جاب ثمن عمولة المكتب اللي دفعها ولا التذكرة اللي بالتأكيد بيتحملها ولا مصاريف إنهاء الورق بتاعه ... إلخ ؟

وإحساسه إيه لو رجع بالزمن كده شويه لورا وشاف نفسه وهو في الثانوية العامة وأهله عمالين يدفعوا في دروس خصوصية .. وهو بيسهر الليل عشان يدخل كلية قمة .. ويوم النتيجة الدنيا تبقى مش سايعاه لإنه بقى من الأوائل ودخل كلية القمة .. الهندسة يا باشمهندس ... وإتهبد 5 سنين .. والباشمهندس راح والباشمهندس جه ... وبعد ده كله يمرمط نفسه في بلاد الله لخلق الله وفي الأخر مرتبه ما يحصلش مرتب الزبال لا مؤخذه ؟

أه حد هايقول وهي بلدي قدرتني وأنا قولت لأ؟

لأ يا حبيبي ما هي الدنيا عاوزه تعب .... وهي يعني عشان حتى بلدك ما قدرتكش تقوم ترمي نفسك في النار ويبقى هو ده التقدير من وجهة نظرك ؟

- والله يا جماعة ما فيش بعدها بيوم أحد زملائي بيقول لي إن إبن أخوه أتصل به من مصر وعاوز ياخد رأيه في فرصة عمل جت له في السعودية وتحديداً في منطقة تبوك .. الولد لسه صغير ومعاه معهد مساحة ... يعني مجال المقاولات وكده ... والشركة السعودية عرضت عليه 1800 ريال مرتب شامل كل حاجه .. وهاتوفر السكن والمواصلات .... فعمه اللي هو صديقي قال له قليل جداً مقارنة بالتعب والمُر اللي هاتدوقه هنا لأن كل شغلك بيبقى في المواقع يا حلو وهاتتشوي لك ييجي 6 شهور بتوع الصيف وده مش شغل مكتبي عشان نقول ممكن ترتاح .... وسالة إنت شغال فين دلوقت وبتاخد كام ؟

قال له إنه شغال في شركة مقاولات وبينفذوا مشاريع في مدينتي ... وبياخد على صغر سنة 2000 ج شهرياً

!!!!!!!!!

شوفتوا الغلب اللي إحنا فيه ؟

يعني سايب 2000 ج وهو قاعد مع أهله في بلده وبيزيد وبيتعلم وبيكتسب خبرات كل يوم ... وبيجري بالمشوار ورا فرصة عبيطة بـ 2500 ج ومرمطة مالهاش حل وما تتوصفش إلا اللي أنكوى بنارها.... واللي مجرب شغل المواقع عارف يعني إيه الجحيم بعينه .. وبعد ده كله ييجي يتفحت سننين عشان بس يجيب المصاريف اللي صرفها عشان يسافر ...

نفسي والله الواحد يعرف أسامي المكاتب اللي بتتاجر في أجساد الناس دي وبترميهم في التهلكة .. وبيبيع ولاد بلده لكفيل ولا لشخص . وبيعمل نفسه ناصح أمين ويفهمه ويفطمه إزاي يا عالم يا هو شركة تبقى هي اللي محتاجه الناس لكن الأية تتقلب وياخدوا منهم أضعاف مضاعفة تحت بند " ثمن الفيزا " يعني الشركة تبقى محتاجه مهندس وتخرج تأشيرة عمل بـ 2000 ريال رسوم ... وينزل مصر عشان يجيب بها شخص محتاجه للعمل .. يقوم يقابل مثل هؤلاء النخاسين ويقول له : خلينا نبيعها لك على 20000 ج يا معلم والكل يسترزق ...

وحكيت لكم قبل ذلك على موقف شوفته بعيني ومسكت الورق بإيدي ... عميد من القوات المسلحة السعودية نازل يعمل إختبار ومقابلات شخصية مع عدد كبير من المهندسين والفنيين للعمل بوزارة الدفاع .. اللي هي جهة حكومية عُليا وبتحصل على تأشيرات العمل مجاناً من الدولة ... ومع ذلك يتفق مع المكتب عيني عينك وبمنتهى البجاحة على بيع التأشيرة لراغبي العمل بـ 15 الف جنية ... يعني أقل حاجه لو معاه 1000 تأشيرة يبقى 15 مليون جنية يقتسمها مع مكتب النخاسة حسب النسبة اللي يتفقوا عليها

كل ده والمرتب - قولت لكم شوفت العقد بعيني وموقع من وزارة الدفاع - المرتبب 800 ريال شهرياً للفني ..... مع نص في العقد على تحمل الموظف لقيمة إستخراج الأقامة ... كمان ؟

شيء لا يصدقه العقل البشري أبداً ... أبقى صارف ما لا يقل عن 25 الف جنيه تأشيرة وإنهاء أوراق وثمن تذكرة و و و و و و

وأجي عل مرتب 800 ريال .. منهم 200 تخصم إجباري كل شهر نتيجة الإشتراك في مطبخ السكن اللي قاعد فيه .. وكلت ما اكلتش مخصومه عليك .. يعني كده صفصفوا على 900 ج مصري .... وإحسب يا معلم هاتسترد مصاريفك فقط على كام سنة ...

نفسي نعرف ونتأكد من المكاتب دي ونفضحهم فضيحة اللحمه في السوق ونحذر الناس منهم بأي شكل ...

وحسبي الله ونعم الوكيل على كل ظالم

[الغريب]

الموضوع ده أتكلمنا فيه كتييير قوي هنا بالمحاورات

بس بصراحة 1000 ريال لمهندس ومحاسب دي حاجة جديدة ، ومش مصدق نفسي !!!!

أولا وأخيرا ألوم الشباب ولا ألوم المكتب

والله لما كنت لسه خريج كنت أشترط راتب لا يقل عن 4000 ريال للسفر للسعودية

من فترة ركبت مع سائق تاكسي سوري ، قالي سامحني في الكلمة ، قولتله قول ، قالي "المصريين هما اللي رخصوا العمالة العربية في الخليج بقبولهم لعروض هزيلة"

طبعا أنا أعترضت على الكلمة ، ولكنه أقسملي بالله أنه كان راكب معاه من أسبوع شاب مصري قبل عرض براتب 40 دينار (850 جنيه مصري) بحجة أن الكفيل هيعمله الاقامة ببلاش !!!

الراجل قالي لما سمعت منه الراتب وقفت التاكسي ونزلته !!!

الموضوع تم التحدث فيه كتيير ، وأفتكر كلمة حلوة قالها أحد الأعضاء في موضوع مشابه "كل فولة وليها كيال"

تحياتي...

[se_ Elsyed]

بس بصراحة 1000 ريال لمهندس ومحاسب دي حاجة جديدة ، ومش مصدق نفسي !!!!

للأسف موجود منهم كتير وخصوصاً من الأرياف ... محاسبين بالكوريوسات تجارة وبييجوا على 800 ريال !!!!!!!!!!

[غريب الخبر]

علشان كده المفروض كل واحد بره مصر وحتى جوه .يبدا يكتب تجربته هنا علشان الكل يستفيد.

وكمان يكتب اسم المكتب اللى سفره .

الموضوع زاد عن حده والكل بدا يقبل باقل الاسعار بحجة ان الاوضاع الغير مستقرة فى مصر . وده طبعا كله كلام تافه وبيجى هنا يضرب نفسه ميت جزمة ويندم على الفلوس اللى صرفها.

ارجو ممن لهم تجربة سابقة المشاركة حتى تعم الفائدة على الجميع

[أسد]

مش كل حاجة نسمعها نصدقها

مش كل الكلام اللي الناس بتقوله بيكون صح

فيه ناس كتير بتكذب

مين اللي قال ان الشباب دول كلامهم صحيح

أو هم فعلاً مهندسين

ده لو كانوا فعلاً جايين من الكهف بعد غيبوبة استمرت 50 سنة ... ماكانش الكلام ده حيكون منطقي

أعتقد أن راتب المهندس لم يكن يوماً 1000 ريال .. حتى أيام الريال الخشب بتاع زمان

صحيح مكاتب النخاسة بيعملوا حاجات مجرمة ...

لكن مش للدرجة دي ...

أنا شخصياً مش مصدق

[غريب الخبر]

بدأت الحكومة المصرية، ممثلة في وزارة القوى العاملة والخارجية المصرية، اتخاذ قرارات حاسمة ضد عدد من شركات العمالة التي أساءت للعمالة المصرية، والتي تمثلت في حظر التعامل مع ثلاث شركات من كبرى شركات العمالة، بل وصل الأمر لإصدار قرار ترقب وصول بعض أصحاب الشركات للقبض عليهم والتحقيق معهم لإساءتهم للمصريين، وتأتي هذه الإجراءات بسبب تكرار شكاوى العمالة المصرية فى الخارج، من سوء معاملة أصحاب الشركات والمؤسسات المصدرة للعمالة للخارج، وهو الأمر الذى فسره بعض العاملين في الخارج بأن مصر بدأت تتغير بعد الثورة.

وأكد الدكتور أحمد البرعي، وزير القوى العاملة والهجرة، إنه لن يتهاون مع شركة تسيء للعمالة المصرية بالخارج، والتي لا تتجاوب مع المكاتب العمالية في حل مشاكل هذه العمالة، وسيتم فرض حظر التعامل معها فوراً حفاظاً على أوضاع المصريين في الخارج وكرامتهم، مضيفاً أن هناك تنسيقاً كاملاً بين الوزارتين لعدم المساس بحقوق المصريين، وحل أي مشاكل تواجههم في البلاد المتواجدين بها، من خلال السفارات والمكاتب العمالية في هذه الدول.

حيث أصدر البرعي، قراراً بحظر التعامل مع أكاديمية الجزيرة العالمية بالسعودية، لصاحبها ومديرها عبد العزيز محمد بن أحمد العواد، ونائبه وشريكه رجل الأعمال المصري المستثمر بالسعودية خالد حماد على إبراهيم الحلاق، وذلك لإساءتها إلى العمالة المصرية في الرياض، بالإضافة إلى شركتين أخريين خلال شهر يوليو الماضي.

وفي الوقت نفسه، أرسل السفير حسام عيسى، القنصل العام المصري بالسعودية، خطاباً إلى مساعد وزير الخارجية السفير محمود الديب، يطالبه بوضع صاحب الأكاديمية خالد حماد على إبراهيم الحلاق على قوائم ترقب الوصول للبلاد، واتخاذ الإجراءات القانونية ضده، وذلك لقيامه باحتجاز وتشريد عشرات الأسر من المواطنين المصريين العاملين بالأكاديمية.

وأضاف القنصل العام بالسعودية في خطابه، أن مالك الأكاديمية تسبب في وضع العديد من العراقيل، حالت دون الوصول لحلول ودية مع الكفيل لحل أزمة العمال المصريين، مضيفاً أنهم أقنعوه بتبنى مواقف لحل أزمة عدد من المصرين استمرت لأكثر من سبع سنوات، على حد وصف الخطاب.

وتشن وزارتا الخارجية والقوى العاملة حملة مشتركة ضد أصحاب شركات إلحاق العمالة المصرية بالخارج المخالفة للقوانين، التي تتسبب في العديد من المشاكل والعراقيل للمصريين الذين يعملون في عدد من الدول العربية، بالإضافة إلى عدم تجاوبهم مع المكاتب العمالية والمستشارين العماليين في هذه الدول.

وكان البرعى قد أكد في تصريحات سابقة لـ"اليوم السابع" أن هناك مشروعاً مشتركاً بين الوزارة ووزارة الخارجية لإنشاء هيئة لرعاية المصريين في الخارج، سواء العاملين في الدول العربية أو الأجنبية.

ومن جانب آخر، أبدى عدد من العمالة المصرية التي تعرضت، حسب قولها، للاضطهاد بسبب شركات العمالة، وناشد بعضهم وزير الخارجية المصرية، التدخل لرفع الظلم الواقع عليهم، نظراً لعدم تحرك القنصل العام وتفاعله مع قضياهم .

من جانبه، أكد مصدر مسئول عن إحدى الشركات التي تم حظر التعامل معها قائلة، إن لديهم المستندات الدالة على عدم صحة الاتهامات الموجهة للأكاديمية ، مع العلم بأن الأكاديمية لها فروع في جميع مناطق المملكة العربية السعودية وجميع الفروع بها موظفون مصريون يتمتعون بكامل حقوقهم، وهم من أفضل الجنسيات التي تتعامل معها الشركة، وإن خرج أحدهم عن النص فهذا لا يقلل مستواها العالي في العمل.

وأوضح قائلاً: "نحن على أتم استعداد لاستقبال وفد من وزارة القوى العاملة المصرية لزيارة الأكاديمية وأي فروعها أو كلها للاطلاع على وضع العمالة المصرية على الطبيعة، ونحن نقدر الشعب المصري العظيم ونرحب بكل المصريين بجميع شركاتنا بالمملكةالعربية السعودية"

[الدكتور ياسر]

في الحقيقة ..المسئولية مشتركة بين العامل المغترب و شركة العمالة..

فالعامل و خصوصا المسافر لأول مرة يجب أن يختار مكاتب العمالة المعروفة بحسن السمعة .. كما لا يجب أن يقبل بأول عرض يحصل عليه ..

بل يفاضل بين العروض و يسأل من سبقه من زملائه في تجربة السفر .. ومفيش حاجة اسمها إن ظروف البلد مش مستقرة يبقى أقبل بأى عرض ..

هذا الكلام غير صحيح .. العمالة المصرية مطلوبة و بشدة في السعودية بالذات نظرا لأنها أرخص عمالة في جميع التخصصات للأسف .. فالطبيب

الذى مرتبه في مصر لا يتجاوز في الحكومة 500ج من السهل طبعا أن يقبل براتب 4000 إلى 6000 في السعودية في حين أن نظيره السوري أو الأردنى

لا يقل عن 11000 إلى 12000

بالنسبة لشركة العمالة .. يجب على من يرغب في السفر أن يعلم جيدا أن الهدف الأساسي لمكتب العمالة هو أخذ العمولة و إلقائه إلى الأرض

السعودية و كثير من هذه المكاتب تعتمد على خداع المغتربين بمعسول الكلام دون كتابة الكثير من البنود في العقد .. فإذا سافر اكتشف

أنه كان ضحية لعملية نصب كبيرة .. لذا فيجت على العامل أن يؤكد على كتابة كل صغيرة و كبيرة في عقده .. فالراتب يكون واضحا و عدد ساعات

العمل ..و السكن أو بدل السكن يكون واضحا .. و الأجازات السنوية و المرضية و الطارئة و أجازات الحج و تصريح الحج.. و التأمين الصحى .. كل

شيئ يجب أن يكتب لأن هذا العقد هو الضمان الوحيد لحقوق العمل .. فإذا وجد عدم التزام من الكفيل ببنود العقد يلجأ إلى مكتب العمل و سيعيد

له حقه بإذن الله.

تم تعديل 19 أكتوبر 2011 بواسطة الدكتور ياسر

[ابراهيم عبد العزيز]

الموضوع ده أتكلمنا فيه كتييير قوي هنا بالمحاورات

بس بصراحة 1000 ريال لمهندس ومحاسب دي حاجة جديدة ، ومش مصدق نفسي !!!!

أولا وأخيرا ألوم الشباب ولا ألوم المكتب

طبعا شىء محزن جدا هذا الخبر , وهناك ثلاثة أطراف تتحمل المسئولية في ذلك , وهم العامل والمكتب والحكومة المصرية :

أولا العامل : ملام لأنه قبل بمثل هذا العرض ولم يلجأ لمن هم خاضوا التجرية لكي يسألهم ويتعلم منهم بدلا من أن يخوض التجربة المريرة ثم يعلم بعدها أنه كان على خطأ عندما إعتقد أن أي وضع في الخارج سيكون أفضل من الوضع فى مصر , وإن كنت أرى أن العامل هو أقل الأطراف الثلاثة في حجم اللوم الملقى عليه , فالظروف الإقتصادية الصعبة والقاسية هي التي تجعله يقدم على ذلك ولو وجد البديل في مصر ما كان ليخوض التجربة , الاخ سي السيد كان رده على هذه النقطة بالتحديد :

لأ يا حبيبي ما هي الدنيا عاوزه تعب .... وهي يعني عشان حتى بلدك ما قدرتكش تقوم ترمي نفسك في النار ويبقى هو ده التقدير من وجهة نظرك ؟

هناك شباب يا أخ سي السيد تتعب وتعبت كثيرا في مصر ولكن لم تجد المقابل ولم تستطيع حتى الحصول على وظيفة مناسبة , لذلك من الظلم أن نتهمهم بأنهم كسلاء مثلا .

ثانيا المكتب : طبعا هذا الطرف لا يحتاج لكثير من الكلام , فوصفه بالنخاسة هو وصف كافي جدا لمن ينتهج نهج التجارة فى البشر من هذه المكاتب , وهذا الطرف ياتي فى المرتبة الثانية من حيث درجة اللوم الملقاه عليه بعد الحكومة التي تأتي فى المرتبة الأولى .

ثالثا الحكومة : هذا هو الطرف الذي يتحمل اللوم الأكبر عن مثل هذه الأحداث :

• هذه المكاتب تعمل فى الأراضي المصرية وبالتأكيد السلطات المصرية وصل لها أكثر من شكاوي ضد هذه المكاتب , والسلطات على علم بممارستها القذرة , فلما السكوت عنها وتركها تتاجر فى المصرين من داخل الأراضي المصرية ؟؟؟
  
• عدم إتخاذ الحكومة لإجراءات على الأرض لحماية العمالة المصرية , وترك هذه العمالة هائمة على وجهها دون أي سند من حكومتها , مما جعلها مطمع لكل إنسان دنىء وبلا اخلاق سواء من الجانب المصري ( شركات العمالة ) أو من جانب الدول المستقبلة لهذه العمالة , وكلنا نرى العامل المصري عندما يتعرض لمظالم فى الدولة التي يعمل بها لا يجد له نصيرا من دون الله , ويذهب للسفارة وللمستشار العمالي ولا يهتم به أحد , فيضطر المسكين أن يقبل بالأمر الواقع مما يشجع أصحاب النفوس الضعيفة فى هذه الدول للتمادي والتجرأ على العمالة المصرية دون خوف من أي رادع , ويحضرني هنا خبرا قرأته أن دولة إندونيسيا إتخذت قرارا بحظر تصدير الخادمات لأحد الدول الخليجية بسبب تعرض حقوقهم للإنتهاكات سواء الحقوق المادية او المعنوية , ودولة مثل تلك إذا رجعت عن قرارها فستجد عمالتها كل التقدير والإحترام ولن يجرؤ أحد على ظلمهم , كذلك قرات خبرا عن دولة الفلبين إتخذت قرارا بحظر سفر عمالتها إلا فى حالة وجود عقد عمل موثق ويحتوي على كل البنود التي تكفل حقوق عمالتها وتطلع الحكومة عليه للتتاكد من ذلك ثم بعد ذلك تعطي للعامل الموافقة على السفر مع إعلامه أنه فى حالة وجود أي خلاف لما هو مكتوب فى العقد فعليه اللجوء فورا لسفارة بلده فى الدولة المضيفة لكي تأخذ له الحق إستنادا على العقد الموثق والمعتمد من قبل الحكومة .
  

حكومتنا بالإسلوب الذي تنتهجه والمتمثل في عدم الإهتمام بعمالتها وشكواهم وموافقتها على سفرهم دون التأكد من وجود عقد يضمن ادميتهم تعطي إنطباعا للدول المستقبلة للعمالة أن هؤلاء العمال ( هم وإنزاح من على قلبي ) فيصبحون بلا قيمة فى نظر هذه الدول , بل وتشعر هذه الدول أنها صاحبة الفضل مع أن الأمر هو علاقة تكاملية مبنية على الأجر مقابل العمل دون فضل ولا منة من طرفا على الأخر .

ولك الله أيها العامل المصري .

تم تعديل 19 أكتوبر 2011 بواسطة ابراهيم عبد العزيز

[احمد رضوان]

أولا السلام عليكم جميعا زملائي الإعزاء

موضوع العمالة والمتاجرة بيها وإنخفاض كفاءة العمالة الناتج عن إنخفاض مستوى التعليم وتدني طموح الشباب المتجه ناحية الخليج مع مصاعب العيش في مصر حالياً ومعاملة المغترب على إنه بقرة بتتحلب ومش مهم عايش إزاي ومعاملة القوى البشرية على إنها عالة وضعف دور السفارات والقنصليات كل دي عوامل بتأثر بالسلب على سوق العمالة المصرية وبتنقل القوة لطرف صاحب العمل يتحكم في العمالة زي ما هو عايز وطبعاً بيدعمه نظام الكفيل وجهل العمالة لحقوقها وعدم قدرتها على المطالبة بيها.

نلخص المشكلة

--------------

عمالة منخفضة الجودة

أصحاب شركات تدعمهم أدوات للتحكم في العمالة

ضغوط داخلية مختلفة على العمالة

أصحاب شركات توظيف يبحثون عن الربح بأي شكل

عمالة مغيبة لا تعرف حقوقها ولا تعرف كيفية المطالبة بها

سفارات مصر بالخارج لا امل فيها بشكل كبير لصعوبة المشكلة وتعقدها وايضا لغياب الهدف الإستراتيجي للدولة

الحلول من وجهة نظري تبدأ من إعتبار العمالة مورد أساسي ونتعامل معاها بالشكل ده من عمل تخطيط طويل الأجل لنوعية العمالة المطلوبة للأسواق الخارج خلال فترات طويلة من خلال إتفاقيات دولية بعد كده يتم تأهيل العدد ده من خلال نظام تعليم خاص موجه للسوق الخارجي من خلاله يبقى عندنا مخزون إستراتيجي من المهارات المطلوبة بكده نقدر نفرض شروطنا واللى يجب ان تتحول لإتفاقيات دولية ملزمة بكده نقدر نستخدم اهم مصدر طبيعي في مصر ... البشر

غير كده الحلول الفردية وإستنهاض ضمير أصحاب شركات العمالة او تخويفهم بالقوانين مش حيحل المشكلة وخصوصاً مع زيادة عدد الشباب العاطل وإنخفاض جودتهم ... مش ممكن نلومهم على محاولة إنهم يعيشوا بحجة إنهم بوظوا سوق العمالة في الخليج

يعنى من الآخر الحكومة لازم تهتم شوية بالعنصر البشري بشكل علمي وعلى رأي اللمبي يوفرلهم سندوتشات الحلاوة الطحينية ، ليوفرلهم الكله يشوموها تحت الكوبري

[se_ Elsyed]

مش كل حاجة نسمعها نصدقها

مش كل الكلام اللي الناس بتقوله بيكون صح

فيه ناس كتير بتكذب

مين اللي قال ان الشباب دول كلامهم صحيح

أو هم فعلاً مهندسين

ده لو كانوا فعلاً جايين من الكهف بعد غيبوبة استمرت 50 سنة ... ماكانش الكلام ده حيكون منطقي

أعتقد أن راتب المهندس لم يكن يوماً 1000 ريال .. حتى أيام الريال الخشب بتاع زمان

صحيح مكاتب النخاسة بيعملوا حاجات مجرمة ...

لكن مش للدرجة دي ...

أنا شخصياً مش مصدق

وهل برضوا مش كل حاجه نشوفها بعنينها نصدقها ؟

يا ابو ادهم بيه بأقول لحضرتك شوفت بعض العقود أم 800 ريال بتاعت وزارة الدفاع

وبأقول لحضرتك شوفت بعيني وحتى الأن - هاعدي عليك بكره اخدك من إيدك أوريك كوووووم محاسبين بكالوريوسات تجارة على 800 ريال برضوا ..... وجنبنا أنا وإنت في الملز مش بعيد

وبأقول لحضرتك لسه مقابل واحد معرفة أشترى من أسبوعين تاشيرة من اللي بيسموها حُره بـ 27 الف جنيه مدفوعة للمكتب فقط ... وبعد واسطه كمان لإن ثمنها 30 الف . يعني لحد ما وصل هنا صرف له على القليل قوي 10 الاف أخرى ما بين إنهاء ورق وتذكرة وتأمين صحي ورسوم إقامة ..... إلخ .. دي كمان مش هاصدقها ؟

وبعدين الواحد يتفاخر ويكذب ويعلي في مرتبه ؟ ولا عشان الحسد إذا كان مهندس ولا عفريت وبياخد 5 الاف يقول 1000 ريال ؟

[MohamedAli]

مش عارف اقول ايه

نفرض ان هذا المهندس مش هربان من ظروف صعبة هربان من مجاعة

الالف ريال برضوا هتخليه عايش في مجاعة ده غير تسديد فلوس للمكتب يعني الموضوع هيصفى على خسارة كمان

حسبنا الله ونعم الوكيل على امثال هذا المهندس الذين شوهوا صورة المصرى في كل مكان ورخصوا ثمنه

[Alattar]

بل يفاضل بين العروض و يسأل من سبقه من زملائه في تجربة السفر

الحتة دي بالذات أنا اتعقدت منها..عارف لما حد بيسألني وأقولله علي عرض معين انه مش تمام..وانه هييجي و يتبهدل..بيقول اني مش عاوزله الخير..أو خايف انه يبقي أحسن مني..وللأسف ما حدش بيستمع للنصيحة..صدقني..لو هو عقد العزم خلاص..وقرر انه ييجي..ولا مليون نصيحة هتخليه يرجع في كلامه

من فترة واحد صاحبي من مصر بعتلي و بيسألني علي انه هيشتري فيزا اللي بيسموها حرة..يعني ييجي علي كفيل معاه سجل تجاري عامله بس عشان شتري كام فيزا من الحكومة..ويبيعها ولما الراجل ييجي من مصر يبقي ينقل كفالة..المهم..قلتله الوضع دلوقتي مش مستقر..استني شوية..لحد حتي ما القانون بتاع النطاقات ده ما نعرف ظروفه ايه..و مكان لو جيتمش هتعرف تنقل كفالة قبل سنتين..وده القانون اللي المملكة هنا عملته عشان تحارب ظاهرة بيع التأشيرات..

طبعا الراجل ما اتقنعش بكلامي..و سأل أكتر من واحد تاني غيري..و من يومين كنت مع واحد صاحبي و بيكلمني عليه..وبيقوللي انه جاي بعد كام يوم أهه..و هيدور ان شاء الله علي شغل لما ييجي..

[se_ Elsyed]

بل يفاضل بين العروض و يسأل من سبقه من زملائه في تجربة السفر

الحتة دي بالذات أنا اتعقدت منها..عارف لما حد بيسألني وأقولله علي عرض معين انه مش تمام..وانه هييجي و يتبهدل..بيقول اني مش عاوزله الخير..أو خايف انه يبقي أحسن مني..وللأسف ما حدش بيستمع للنصيحة..صدقني..لو هو عقد العزم خلاص..وقرر انه ييجي..ولا مليون نصيحة هتخليه يرجع في كلامه

من فترة واحد صاحبي من مصر بعتلي و بيسألني علي انه هيشتري فيزا اللي بيسموها حرة..يعني ييجي علي كفيل معاه سجل تجاري عامله بس عشان شتري كام فيزا من الحكومة..ويبيعها ولما الراجل ييجي من مصر يبقي ينقل كفالة..المهم..قلتله الوضع دلوقتي مش مستقر..استني شوية..لحد حتي ما القانون بتاع النطاقات ده ما نعرف ظروفه ايه..و مكان لو جيتمش هتعرف تنقل كفالة قبل سنتين..وده القانون اللي المملكة هنا عملته عشان تحارب ظاهرة بيع التأشيرات..

طبعا الراجل ما اتقنعش بكلامي..و سأل أكتر من واحد تاني غيري..و من يومين كنت مع واحد صاحبي و بيكلمني عليه..وبيقوللي انه جاي بعد كام يوم أهه..و هيدور ان شاء الله علي شغل لما ييجي..

إنت تعمل اللي يرضي ضميرك يا عطار باشا وتنصح بإخلاص .. وكل واحد حر بقى وعقله في راسه يعرف خلاصه

[الدكتور ياسر]

بل يفاضل بين العروض و يسأل من سبقه من زملائه في تجربة السفر

الحتة دي بالذات أنا اتعقدت منها..عارف لما حد بيسألني وأقولله علي عرض معين انه مش تمام..وانه هييجي و يتبهدل..بيقول اني مش عاوزله الخير..أو خايف انه يبقي أحسن مني..وللأسف ما حدش بيستمع للنصيحة..صدقني..لو هو عقد العزم خلاص..وقرر انه ييجي..ولا مليون نصيحة هتخليه يرجع في كلامه

مش كل الناس كدة يا أستاذ عطار .. أنا شخصيا دى أول تجربة لية في السفر .. و انبهرت بأول عقد جالى لمستوصف في الطائف و لكن لما

ابتديت ألف و أسأل اكتشفت أنى كنت سأكون ضحية لصاحب المستوصف الذى فاوضنى بنفسه و كان طبيبا سعوديا .. فعلم منذ اللحظة الأولى أنى لسة خام

فأخبرنى أنه لن يكون هناك أجازة سنوية في مدة العقد!! وان ليس هناك سكن بل سيعطينى بدل سكن 1000ريال شهريا !!! بل وطالبي بأن آخذ

دورة تدريبية في أشعة الموجات فوق الصوتية رغم أنى لست متخصصا في الأشعة أصلا ..و ذلك بهدف ابتزاز المريض السعودى .. وقال لى بالحرف

الواحد : المريض السعودي مو بيقتنع بيك إلا لو دفع على الأقل 200 ريال في الزيارة .. شايفين النصب ..ده طبعا غير المرتب البخس ..

و لما لفيت على مكاتب كثيرة و سألت زملائى في الخارج و الداخل عرفت الدنيا ماشية الزاى .. ومع ذلك بالرغم إنى جيت على مكان كويس

إلا أني اكتشفت برضه أنه تم خداعى في بعض النقاط التى اتفقت عليها في مصر و لم تكتب في العقد للأسف ..

[طارق مصرى]

أنا شايف إن أساس المشكلة فى الحكومة اللى رخصت المصرى جوه بلده فأصبح رخيصا خارجها

مكتب الحاق العمالة مش هو الاساس صحيح ان فى مكاتب عاوزين الحرق بجاز بيكونوا عارفين ان الكفيل ده ظالم ومفترى وبرضه بيتعاملوا معاه لكن الاتفاق فى العادة بيكون بين الراغب فى السفر و الكفيل اللى بيوعده بوعود لما يجى يسافر يلاقيها اضغاث احلام , و انتوا عارفين ظروف البلد و المرتبات المتدنية فى مصر و المسؤليات اللى على ظهر الشاب لو عاوز يتجوز او بيساعد اهله يعنى الغريق بيتعلق بقشاية و دى النقطة اللى بيستغلها الكفيل كويس و يساعده فيها بعض اصحاب المكاتب اللى معندهمش دين

بس ارجع و اقول لو المكتب كويس و ميعرفش حاجة عن الكفيل ده و واحد سافر بره و وقع مع كفيل ابن حرام المكتب هيعمله ايه ؟

طيب دلوقتى الواقع بيقول ان المسافر الى المملكة سيكون واقع تحت نظام شبيه بنظام الرق و هو نظام الكفالة

ميعرفش تهرش فى دماغك الا بورقة من الكفيل يعنى هنا الحكومة حافظة حق الكفيل سواء كان سعودى او مستثمر اجنبى تالت و متلت وبزيادة كمان و دى مشكلة حتى لو هو انسان عادى و فى اديه السلطة دى ممكن تفرعنه , فى حين الموظف لما يتظلم يحاول ودى لو منفعش و راح مكتب العمل و بعد ما يشتكى يبعتوا لكفيله مره مجاش يبعتوا مرة تانية مجاش يبعتوا مرة تالته يبعت مندوب عنه يقولوا لا هات الكفيل و كلام وحديت و بعدين الكفيل يعترض يروحوا رافعين القضية للجنة اعلى و تبدا قصة اخرى و عند الحكم يطعن الكفيل و ترفع للجنة اعلى و كلام وحديت تقعد القصة بقى 3-4-5-7 سنين هوه وحظه و متعرفش ممكن يدوه ورقة يشتغل بيها ولا لأ و هو مش عارف ينزل مصر و هياكل منين و ممكن يستلف من طوب الارض و امه تموت بحسرتها و ممكن كفيله يسبقه و يبلغ عليه هروب قبل ما يشتكيه فى مكتب العمل

الكلام ده كله سمعناه مش من وحى خيالى

يبقى الحل فى حكومة قوية تعمل اتفاقيات او ضغوط على الحكومة السعودية لحفظ حقوق المصريين

انا مش هكلمكم على دول اوروبا و امريكا دول بيكونوا أقوى من الكفيل انا اكلمكم على دول زى حالتنا بس عاملة اعتبار لابنائها زى الفلبين فى العادة محدش يقدر يأخر راتب فلبينى هنا فى السعودية الباشا ما يسافرش الا بعقد مظبوط ساعات عمل 8 س و اوفر تايم الساعة بساعة و نص و لو الرتاب اتاخر عن اسبوع بيوقف شغل و يكلم السفارة التى تتواصل مع كفيلة او مع صاحب مكتب السفريات اللى عارف كويس انه لو ارسلهم على كفيل مش كويس و اكل حقوقهم بيتبهدل فى الفلبين وبيقفلوا مكتبه و بيتغرم .

و فى نهاية كلامى هديكوا مثال بسيط على ان اساس القضية مع الحكومة

فى مؤسسة اسمها اكاديمية الجزيرة و كان فيها مدرسين مصريين كافلهم او مديرهم مصرى للاسف اكل حقوقهم و بهدلهم اشتكوا فى مكتب العمل القضية اخددت كام سنة ؟ 7 سنين و اتحلت ازاى راحو السفارة هناك الملحق العمالى او السفير كلم المدير المصرى و هدده بمنع الاستقدام من مصر نهائى يعنى يحطوا على البلاك ليست للشركات و وضعة على قائمة الانتظار للقبض عليه حين وصولة مصر .. تعرفوا المدير ده خلص حقوق المدرسين دول فى اد ايه ؟ 4 ايام فقط !!!

[طارق مصرى]

و دى نمرة الملحق العمالى فى السفارة المصرية بالرياض أ- فتحى إسماعيل حسنين

0567774191

شخص فى غاية الإحترام و اللطف بيشتغل بجد بس برضه فى حدود الإمكانيات لو فى حد عنده استفسار او مشكلة يعرضها عليه و ربنا ميجبش مشاكل

[غريب الخبر]

الهند تفرض شروطًا على الكفيل السعودي لتشغيل عمالتها في المملكة

وضعت الحكومة الهندية إجراءات شروطًا جديدة على الكفيل السعودي الراغب بتشغيل عمالتها في المملكة العربية السعودية، كما منعت سفر مواطنيها بمهنة سائق خاص إلى السعودية ما لم يكن راتبه 1200 ريال، مع ثلاث وجبات مجانية، أو يمنح 200 ريال إضافية كبدل مأكل. ولم يتبين بعد ما إذا كان الإجراء الجديد يخص فئة السائق...

[capitshino]

بعد الثورة مباشرة لقيت اعلان لمكتب سفريات .. طالبين محاسبين خبرة للعمل بالسعودية بمرتب 1200 ريال

قلت اعمل اللى على وابعت للمكتب ايميل .. وفعلا بعت له ايميل وقلت له كلام فيما معناه

ان المعيشة هنا غالية جدا و ان 1200 ريال مش هيكفى اللى جاى معيشة وان البلد بتتغير واحنا لازم نساعد ولاد بلدنا وكلام زى كده

بعت المحترم وقالى حضرتك احنا عاملين اعلان وكاتبين فيه الوضع بالظبط ومابنجبش حد من بيته ونسفره بالعافية

احنا مش بننصب ولا بنضحك عليهم وماحدش اشتكى !

[Ahmed Anwer]

أنا ماليش خبرة في سوق المغتربين غير من كلام أصحابي و اقاربي

بس ايه اللي يجبرهم علي كده إذا كان ده أقل من أسعار سوق العمل المصري

أو علي الأقل القاهرة ؟؟

ده مفيش عامل دلوقتي بيرضي بمرتب 850 جنية

[AbkaReno]

انا كنت احد الاشخاص الي ادحك عليهم من 4 سنوات براتب 1500 ريال وفضلت سنة ونص بالراتب ده

لحد بفضل الله وبفض دعواة الاوالد والوالده اصبح الراتب 5500 ريال شهريا لما اتنقلت الرياض وفرص العمل اصبحت اكثر

لو حد عايز اسم الشركة انا تحت امره لانها شركة نصب عالميه مقرها السيده زينب