لا تفوتك اليوم حلقة العاشرة مساءً .. وغداً الحياة اليوم

[se_ Elsyed]

أتوقع اليوم حلقة ساخنة .... جداً

اعضاء من المجلس العسكري ..... وعلى التليفون إبراهيم عيسى .... وهايتكلموا في كل حاجه من تسليم السلطة والتباطؤ والفتنة الطائفية و و و و و

مش عارف ليه مستضيفين إبراهيم عيسى على التليفون ؟؟؟؟

وبكره الحياة اليوم قائد القوات البحرية لأول مره في حديث تليفزيوني بس دده لقاء مسجل -

نفسي أسمع جملة مفيدة ووعود حقيقية مش مراوغة تعالي كالمعتاد

[Simba]

المشكلة ان اعضاء المجلس لما بيطلعوا علي التلفزيون بيخسروا جزء كبير من رصيدهم عند الناس

يجعل علي ايدك الشفا يا مني :happy:

[Abu Reem]

وبكره الحياة اليوم قائد القوات البحرية لأول مره في حديث تليفزيوني بس دده لقاء مسجل -

كويس انك ذكرتنا بهذه الحلقة

يا ريت بس تكون حلقة النهارده مع ابراهيم عيسى حلقة مواجهة حقيقية لكي نسمع اجابات على كل الاسئلة التي تدور في ذهننا. وما تكونش حلقة بغرض لم الشمل ولازم كلنا نكون ايد واحدة في المرحلة دي ومثل هذا الكلام ،

اليوم ابراهيم عيسى على المحك

- وبخصوص الاقتباس اعلاه مع قائد القوات البحرية فهو علي اي قناة وفي اي برنامج

[engmido]

افلحوا ان صدقوا

وافلح ابراهيم عيسى ان صدق

المشكلة فى 99% من الصحفيين فى مصر قبل وبعد الثورة انه ليس لهم قبلة معاهم معاهم ..عليهم عليهم

وهم فعلا مجموعة من المنتفعين كل بطريقته

ربنا يطلعنا منهم على خير ..... وفى تقديرى ان المجلس وان كان مراوغا افضل لنا 1000 مرة من مجموعة مثيرى ضجيج واخبار مكذوبة

[Abu Reem]

حوالي 45 دقيقة من الحوار ، وحتى الان. كلام اللواء محمود كلام دبلوماسي انشاءي

- المشكلة انه هوه قطعا عارف بعض المعلومات عن حادث ماسبيرو ولكن طبعا هناك معلومات لا ينغع ان تقال وتذكر

- اتمنى ان نخرج بفائدة في الجزء المتبقي من الحوار

[capitshino]

مقدمة حلقة المجلس العسكري علي دريم 2

http://www.youtube.com/watch?v=hEGcnG9UPkA

[Dreamwithme]

انا ناطق من مني الشاذلي حد يموتها

حلقة لغاية هذه اللحظة سخيفة ومحبطة

ورجعنا تاني للكلام عن الأيادي الخفية ورجعنا تاني للهجة معندناش فلوس وهنجبلكم منين

هم بيستعبطونا يعني هو وضع حد اقصي للأجور مش حل لوضع حد ادني للأجور

وبعدين اي علاقة أقالة القيادات الجامعية بالميزانية وأي علاقة قانون الغدر بالميزانية والمطالب الفئوية

ترجمتي يارب هاطق خلاص

من تويتي كتب بلال فضل تعليق عجبني : مش مهم الوقيعة بين الجيش والشعب المهم دلوقتي الوقيعة بين مني الشاذلي وإبراهيم عبسي

تم تعديل 19 أكتوبر 2011 بواسطة Dreamwithme

[shawshank]

كلام عام لا قيمة له ... يعني تقدر تقول "كلام مصاطب" زي مبارك بالظبط. للأسف منتهى السطحية والاستخفاف بالشعب.

حزين من كلام سيادة اللواء. يعني ايه القوات المسلحة ماكانش معاها ذخيرة في واقعة ماسبيرو، واندس ناس وضربوا نار وقتلوا وأصابوا العشرات؟ لو الكلام ده صحيح، تبقى دي مسئولية مين يا سيادة اللواء؟ مين اللي قرر إن القوات مايكونش معاها ذخيرة؟ صاحب هذا القرار والمجلس العسكري كله (اللي معاه كل السلطات في البلد) ببساطة هو المسئول. ومش فاهم يعني ايه مسئولية المجلس العسكري تنحصر في القبض على الجناة. وصاحب قرار عدم تسليح القوات المسلحة ده ايه؟ مش أخطأ؟ يبقى يتحاسب. لكن المشلكة إن المجلس العسكري هو نفسه الحكم، فمش هيحاسب نفسه. ويعني ايه الجندي بيهرب بمدرعته عشان شايف مدرعات حواليه بتتحرق؟ بيهرب وهو في مصر؟ أمال قدام العدو هيعمل ايه؟ وبعدين هي الجنود بتتصرف في الجيش من نفسها واللا فيه أوامر؟ واللا الأوامر للجنود: اتصرفوا كما يمليه عليكم الموقف؟ لو فيه أوامر، يبقى اللي أعطى الأوامر يتحاسب. ولو مفيش أوامر، تبقى الجنود تتحاسب. أنا الحقيقة مندهش ومتعجب. وبعدين جندي داخل مدرعة، مش سيارة، هيخاف من ايه ده؟ يعني مدرعات الجيش المصري الناس العزل قادرين يدمروها؟ أمال في الحرب هتعمل ايه؟ ويعني ايه "القاعدة إن القوات المسلحة معهاش سلاح"؟ تبقى دي دعوة لأي مجرم مسلح إنه يدخل بين قوات الجيش ويقتلهم ويقتل المدنيين. لا حول ولا قوة إلا بالله العلي العظيم

[Abu Reem]

ملحوظة كده بصرف النظر عن اللعثمة الواضحة في كلام اللواء محمود

- هناك جملة قالها ابراهيم عيسى كشفته اكثر ما هو مكشوف ومفضوح

قالها عندما كان يرد علي كلام اللواء عن اهمية التزام الناس باعمالهم بحماس لكي نعبر هذه المرحلة وبالتالي ستحقق معظم مطالبهم

فقال ابراهيم عيسي ، ان الحماس كان موجود بقوة عند الناس بعد الثورة ولكن الذي تسبب في فتور الحماس واحساسهم بان الامور لا تسير كما ينبغي

هو: .................... ساترك لكم ملأ الفراغ ، لارى قوة ملاحظتكم

وايضا لاني لما سمعت هذه الجملة فاجأتتي بصراحة ،

[capitshino]

حلقة على غير المتوقع وكلام مُحبط .

[capitshino]

سيادة اللواز حجازى بيعمل الواجب بتاع الواد اينه :closedeyes:

[Ahmed Anwer]

التعليق الوحيد

((( يسقط يسقط حكم العسكر )))

انتخابات رئاسة أيه اللي في صيف 2013 !!!!

لأ معلهشي ده أنا المتفائل المتفهم جبتولي إحباط !!!

ده أنتم وش لابدين في الكرسي و متبتين فيه و مستموتين عليه كمان

[Simba]

الوحيد اللي كان عنده افكار للثورة والحفاظ عليها البرادعي

الوحيد اللي طالب بتشكيل حكومة انقاذ وطني تمثل الثورة

الجيش مع كل التقدير له المفروض يحمي ولا يحكم

فيه حاجة غلط فيه حاجة مش مفهومة

[se_ Elsyed]

التعليق الوحيد

((( يسقط يسقط حكم العسكر )))

ده ملخص التعليق على كلامهم الفاضي

كوكتيل من السذاجة السياسية على الخبث والاستعباط

والاخ العصار كان قاعد نايم على نفسه يا عيني ..... وناس ودت البلد في داهيه .. وبالمنظر ده وبالتحالف مع حكومة شرف اللي أتحدى لو كان إتفرج على الحلقة لإنه بينام أساساً من المغرب ... يبقى كده ممكون يسلموا البلد على الجتط للحكومة الجاية ...

لازم بإذن الله نعدي مرحلة إنتخابات مجلس الشعب على خير .. ثم نتخلص من الناس دي بالذوق عشان البلد تفوق

[se_ Elsyed]

إعتذار رسمي عام

أنا اسف يا جماعة لأني كنت السبب في التنوية عن حلقة الكارتون بتاعت إمبارح دي واللي سهرتكم لما بعد منتصف الليل ..

بجد بعد كده لا هاسمع مؤتمرات صححفية عسكرية ... ولا هاشوف لهم برامج ... حتى البرومو بتاع حلقة برنامج الحياة اليوم على قناة الحياة مع قائد القوات البحرية وعضو المجلس العسكري اللي صمم إنها تتسجل في سفينة في البحر ... كلها بتدل على إن المجلس العسكري بيشتغل 24 ساعة في اليوم عشان مصر فخلاص لحلقة باينه من عنوانها

نفسي يا مصر قبل ما أموت الاقي حد بيشتغل ساعتين بس فيهم نتايج وشيء ملموس .. أحسن ما حد يتشغل 24 ساعة في اليوم وفي الاخر نلاقية مرمي في السجن زي المخلوع اللي كان بيقول إنه خلال 25 سنة لم يأخذ يوم اجازة .. يعني حتى كان بيحكم جمعه وسبت وفي الاعياد الرسمية ...

[se_ Elsyed]

بعد حلقة إمبارح ... . إتأكدت فعلاً إن المجلس العسكري قاصد إنه يخلي عصام شرف

كده

بعد ما كان

كده

( دي صورة عصام شرف بالمناسبة مع أعضاء وزارته اللي هو ما أختارهمش )

أنا اتفق مع سؤال إبراهيم عيسى التهكمي لهما بالامس لما قال لهم : ما فكرتوش تستعينوا بخبرا اجانب الفترة دي ؟

طب والله العظيم أنا شايف سؤال وجيه ومش تريقه

[se_ Elsyed]

بس بامانة ... الحلقة بتاعت إمبارح دي كانت محتاجة علاء الأسواني ... بجد كنت متخيل سيادة اللوا وهو بيطلع طبنجتة الميري وبيفرغها فيه على الهوا بعد اول سؤالين ..

لكن عفواً .. كنت حاسس إن منى الشاذلي وإبراهيم عيسى زي اللي متجوز بنت عمه ومكسوف منها وبالتالي مستحيل يجيب منها خضار ...

[se_ Elsyed]

أنا عاوز أعترف بحاجه بس ما حدش يضرب ..

إمبارح أنا أرتكبت خطيئة في حق نفسي وفي حق قرايبي وفي حق المجتمع والناس ... اه والله

من ساعة ما سمعت عن حلقة المصارحة ولا مش عارف كانوا مسميينها " من وراء القضبان " ... كنت متفائل كعادتي .. المهم إتصلت باخويا ومراته وحماته ... ونسيبي وعياله ... وحمايا الراجل المسكين اللي لسه واصل من مصر أول إمبارح وجاي يحج ويتطهر من ذنوبة .. مع لفيف من العائلة الكريمة الموجودة بالسعودية ... وقولت اعزمهم على العشا في حفل شواء في الهواء الطلق فوق سطح بيتنا وبالمرة نضرب الحلق النار دي .. وطلعت التليفزيون والعدة وقعدنا نشوي إنتظاراً للحلقة الشيقة ....

وباحمد ربنا إننا كنا أكلنا قبل الحقة ما تبدأ عشان نفسنا ما تتسدش او على الاكل نرجع

بالمناسبة - حمايا ضابط سابق بالقوات المسلحة - وقال لي تلقائياً إن السادة اللواءت بيكذبوا بخصوص موضوع الأسلحة اللي ما فيهاش رصاص حي .. وقال كذب طبعاً إن عسكري يبقى واقف حراسة على مكان حيوي زي الإذاعة والتليفزيون وواقف زي الومعاه شومه .. لإن السلاح الألي اللي من غير رصاص حي هايبقى زي الشومه ... فقال لي إن خزنة السلاح الألي بتاخد 36 طلقة ... ومن قوانين الجيش إن السلاح ما يبقاش متعبي على الاخر عشان ما يهنجش خصوصاً لو كان قديم ... عشان كده كل عسكري بيتصرف له 29 طلقة فقط ... اول 4 طلقات لازم بيبقوا فشنك لتحذير أي معتدي وكمان عشان السلاح في أول ضرب له يشوفوا شغال ولا الطلقة ممكن تتحشر ... والـ 25 الباقين بيبقو رصاص حي ... دي معلومة نقلتها على لسان الراجل وأنا أساساً شوفت الجيش فيديو وما دخلتوش .

ويادوب قبل نص الحلقة لقيت الضيوف بيتسرسبوا واحد ورا التاني ... وحمايا فيص مني ودخل ينام .... والسهرة باظت وكانت ليلة ليلاء ....

وإلى اللقاء في حلقات أخرى

[احمد رضوان]

غريبة ... هو أنا عيان ولا إيه ... أنا شايف الحلقة دي ليها فوايد ... شكلى سخن

أولا علشان نتفق .. لازمن نتكلم ... الحلقة كانت وجهتين نظر بغض النظر عن كون الموضوع اقل من ما كنا متوقعين بس فيه قاعدة تم إرسائها إمبارح في الحلقة ... المسئول عن الحكم قاعد قدام المعارضة بيدافع عن نفسه ودي كفاية في حد ذاتها انها تكفل مسائلة الحاكم امام الشعب مستقبلاً.

ثانيا أعضاء المجلس قالوا إن فيه لجنه محايدة بتحقق في أحداث ماسبيرو وده برضه شيء جيد

ثالثا الحلقة كانت بين طرفين واثبتت ضعف إبراهيم عيسى ومحاولة الربط الساذج بين احداث مختلفة علشان يزنقهم في خانة انتم موتوهم علشان اقباط ، وأعضاء المجلس بصراحة طلعوا اجدع منه وقالوا ان عدد القتلى غير مرتبط بالدين لأنهم مصريين كانوا مسلمين او مسيحيين او ملهمش دين اصلا ... كلام بصراحة وطني جداً ... وكمان فكر المجلس أرقى من فكر إبراهيم عيسى احداث ماسبيرو قالوا انهم بيحققوا لهدف عدم تكرارها ... إبراهيم عيسى عايز لأ نمسك المسئول عشان نوقعكم في الغلط ... بصراحة تفكيرهم إستراتيجي اكبر بكتر من عيسى ... والخوف ليكونوا من اجتماعتهم مع الشباب والمعارضة وصلوا لقناعة بكده وقلبوا الناس دي ... وبكده يبقوا ارتكبوا خطأ لا يغتفر

أخيراً الحلقة اكدتلى إن المجلس لايص وإن مبارك كان ماسك مافيا مربطه مع بعضها بشكل متين ، والمجلس عارف الحقيقة دي وبيحاول إنه يكسب وقت لإنه مش عارف الموضوع ممكن يوصل لحد فين وفيه إشاعات بتقول إن عمر سليمان هو المستشار غير الرسمي للمجلس وعلشان كده حركات المجلس مشابهه لحركات مبارك وسياسته

الخلاصة المجلس العسكري الموضوع اكبر من خبراتهم السياسية لأنهم ناس بتوع مبادئ قتالية مش بتوع سياسة قذرة وده اللى بيخليهم يقدموا رجل ويأخروا رجل وبرضة التردد ده كان السبب في مشاكل كتير وهو كان السبب الواضح في أحداث ماسبيرو، كان الله في عونهم وفي عونا معاهم لحد ما نعدي المرحلة الصعبة دي

تم تعديل 20 أكتوبر 2011 بواسطة Radws

[se_ Elsyed]

كان الله في عونهم وفي عونا معاهم لحد ما نعدي المرحلة الصعبة دي

أسف يا رادوس

ربنا بيكون في عون الواحد لما يعرف قدراته ويعمل بإخلاص

مش يبقى عفواً جاهل ومع ذلك يكابر ويوهم نفسه والأخرين إنه بيشغل 24 ساعة وإنه بيعمل لمصلحة البلد ... وفي الأخر نفوق زي ما فوقنا بعد 30 سنة لقيناها غرقت واستقرت في القاع

الله يرحمه قبطان العبارة السلام عمل كده برضوا .... ولو تلاحظ من التسجيلات ومن الشواهد والشهود إن اللي حواليه كان بيحاولوا ينصحوه وهو رافض تماماً لإن رأيه هو بس اللي صح .. وهو بس اللي بيفهم ... وهو بس اللي قلبه على البلد والباقي متأمرين

ده فكر للأسف موجود يا عزيزي ...

وسيبك بقى من كلام : يعني كان مين ينفع في المرحلة دي ؟

نفس الكلام اللي كان بيتقال في عهد المخلوع إن هو بس الواد المعجباني واللي ينفع حاكم

اما المجلس العسكري .. فزي ما يكون الكتالوج بتاع الثورة صفحة 135 بيقول إن الثورة لما يقوم بها الشباب يا ولاد ثم يلتحم معهم الشعب كله . يبقى لازم العسكر هما اللي يحكموا .. مش عشان حاجة لأ لأ . ده عشان يحموا الثورة أه أومال إيه

كلام فارغ طبعاً

وكل الإشكال ده كان ممكن يتحل في جُملة واحده وهي " إحمي يا عم زي ما أنت عاوز .. لكن دع الامر لاهله وأوكلوا الامانة لمن يتحملها ولمن يستطيع ... يعني بالبلدي ... خليك في الفترة الإنتقالية .. لكن شكل حكومة ثورية محترمة لها سلطات مطلقة لكي تستطيع أن تعبر الفترة الإنتقالية بأقل خساير "

مش النزيف اللي على جيع المستويات اللي بيحصل ده .. والشهور عماله تجر بعضها لحد ما كملنا 8 شهور اهو وتحس إن عندك شوية ناس بيعجنوا مسمين نفسهم مجلس عسكري ... وجايبين ناس على الفرازة يتسموا بالضعف والوهن وقلة الحيلة وضعف الشخصية .. ويقولوا إحنا بنعمل لصالح البلد ....

يا راجل ده اللي يقرا الجرايد ... ويرى القرارات التي تتخذ والتي لا تتخذ .... أقسم بالله يبصم بالعشرة إن مبارك لسه موجود وبيحكم ومافيش فتله إتحركت من مكانها

اللي انا متأكد منه ولا مكان للشك فيه عندي إن الناس دي كلها سواء المجلس أو السادة الموظفين الوزراء كلهم متأففين ومش عاجبهم اللي حصل وبيقولوا بينهم وبين نفسهم " ثورة إيه وقرف إيه . يا راجل بلا لعب عيال "