حبي الكبير

[عبير يونس]

كنت شايفاه من ورا الشباك يوماتي

و افضل اقول بيبص لي

بيضحك لي

بيشاور لي

و كنت بارمي على الشباك

رسايل و اشبكها باحلى مناديلي

و اقول من كتر حبه مبيردش

أصله مش لاقي كلام

يوصف لي بيه حاله

و كنت اشوف وقوفه

رد بموافقة

كنت واثقة

و بعد كتير

و بعد ما عشت حب كبير

لمحت الشباك مفتوح

طار قلبي من الفرح

قلت اهو حا يكلمني

حيوريني نفسه

باضرب بعيني

لقيت شغالة

ماسكة مهفة بتنفض

و ست عجوزة طالة من الشباك

و في لحظة كان ورا ضلفة الشباك

قلبي خفق بشدة

و قلت أخيرا حاشوفه

زاحت بايديها الضلفة

لقيت وراها....

شماعة !!!!

[Salwa]

يااااه.

جميلة قوى ياعبير .......جميلة انتى والخاطرة الصادقة .

اوقات كتير بنضيع عمرنا بمزاجنا ......( أقصد اقول فترة من عمرنا ) ...ولا اقصد نهائيا فترة مراهقة او غيره .

اقصد اى فترة او وقت من اوقات عمرنا .

بنتعلق بالوهم........ونصدقه .

بنصدق الوهم والخيال اللى احنا بس تخيلنا انه حقيقة .

ولما بييجى وقت ونكتشف زيف ماتوقعنا انه حقيقة .

مش بنبقى عارفين .نضحك ؟؟ ولالا نحس باحباط؟؟؟ والا بيننا وبين نفسنا نتكسف لأن ببساطة احنا اللى خدعنا نفسنا ومحدش خدعنا..

هل (( الشماعة )) خدعتك؟؟؟

هل عدم الرد على الرسال ..كان دلال ؟؟

هل ظهور المرأة العجوز ....فجأ’..كان توقيت صح؟؟

يارب نور البصائر ويارب كل انسان يقدر يشوف الحقائق بلا أى ستائر تغطيها .

صباح الرضا واليقظة ....والصحوة المبكرة :clappingrose: :clappingrose: