استفسار من المهاجرين السابقين

[Ice cafe Mocha]

السلام عليكم

عايز أستفسر يا جماعة من الناس أصحاب الخبرة الكندية

طبعا الحكومة بتنصح ب 10 آلاف دولار + ألفين عن كل مرافق

لكن نسيبنا من كلام الأخت الحكومة :closedeyes: ومن تجربتكم انتم

ايه أقل مبلغ الواحد ميسافرش من غيره؟ :unsure:

يعني عشان مينزلش هناك يشحت أو كدا :blink:

الشغل الثابت اللي يكفي مصاريفك تقريبا بعد كم شهر تقدر تكون اشتغلت واعتمدت على نفسك؟ smk:

أنا على فكرة مسافر لوحدي إن شاء الله يعني مش هيبقى في إعانة أطفال والكلام دا وإعانة البطالة بيتهيألي مقدرش أعتمد عليها

فايه رأيكم؟ كم المبلغ المطلوب؟ وحسب تجربتك الشخصية انت لاقيت الشغل اللي دخله يكفيك بعد قد ايه؟

[ViralMind]

السلام عليكم..

انا مسافر قريب ان شاء الله.

خد على قد ما تقدر. :closedeyes: و فى نفس الوقت امسك ايدك لو حاسس ان الموضوع هيطول علشان ماتتزنقش.

موضوع المصاريف بيختلف من اسرة لاسرة.. على حسب عدد الاطفال و ان كان فيه منهم فى الجامعة او الثانوى.. اكيد مصاريفهم بتبقى اكتر شوية.

كمان بيبقى على حسب المنطقة اللى انتا نازل فيها... و هل هتأجر شقة ولا بيت؟

طبعا ده كلام فى العام.. انا لسه واخد بالى دلوقتى انك مسافر لوحدك.

عموما طالما رايح لوحدك.. يبقى معاك بقى من اول 600 دولار شهريا لغاية زى ما انتا عايز.

ممكن تأجر اوضة فى شقة مع ناس تانيين.. او تاخد شقة مستقلة بيك صغيرة..

لو انتا ناوى تظبط نفسك فى الاكل.. يعنى هتعمل الاكل لنفسك, اكيد هتوفر كتير.. لكن لو هتعتمد عالمطاعم يبقى انتا كده محتاج ميزانية مستقلة.

لو عايز تعيش مستريح بس من غير المطاعم, يعنى هتعمل اكلك فى البيت.. اعتقد مصاريفك هتبقى فى حدود ال800 او 900 دولار.. بما فيها الايجار و الاكل و المواصلات و الموبايل.

بالتوفيق باذن الله.