ماذا تفعل لو كنت مكاني؟

[Dreamwithme]

السلام عليكم ورحمة الله وبركاته

أكتب لكم هذا الموضوع طلبا للنصيحة بعد ما أعياني تفكيري

أعرف شخص كان صاحب فضل عليا في وقت من الأوقات

أنا كنت حكيت عنه قبل كده في موضوع آخر

هذا الشخص كان للأسف شيخي اللي علمني القرآن ومبادئ الدين

وكان هو المسئول عن دار تعليم القرآن التي كنت أعمل بها

إلي أن اكتشفت أشياء جعلتني لا أقبل الاستمرار في العمل معه

أشياء أخلاقية ودينية تتعارض تماما مع أقواله وعلمه المفترض

المهم مش دي المشكلة دلوقتي

المشكلة إن من ضمن صفات هذا الشخص إنه من المتحولون أو من "الفلول"

هو كان عضو في لجنة السياسات بالحزب الوطني وكان يفتخر بوجوده فيها

وكان دائما الدفاع عن نظام مبارك وأن ليس في الامكان أبدع مما كان مدعما بحجج شرعية للأسف

الآن هو عاد من جديد ولكن مع حزب المصريين الأحرار في ثوب جديد لانج

وبخطاب ثوري وهو المتحدث الاعلامي تقريبا للحزب لأني بألاقيه في كل برامج التليفزيون

وطبعا مرشح نفسه في مجلس الشعب

مشكلتي إني ها أتنقط ببساطة

إلي جانب أنه عامل صفحة لنفسه علي الفايسبوك بيكتب فيها أراؤه وبيهاجم فيها السلفيين والأخوان

وكل من هو متشدد في الفكر .....الله أعلم إذا كان لوجه الله أم لحساب ساويرس

لكن الآن الكثير من أصدقائي مشتركين في الصفحة جزء منهم لازالوا يعملوا معه في "شركته الجديدة لتنمية المجتمع"

وجزء آخر مثلي كان معاه وتركه من قبل الثورة بزمن

الآن هناك حرب ضروس علي صفحات الفايسبوك بين الفريقين من هجوم ودفاع

أنا ساكتة خالص ولا أتدخل ولم أشترك في الصفحة من أساسه

لأسباب كثيرة أهمها إني لست علي العلم والثقافة الكافية لمحاربة شخص مثله

فلن أضيف جديد علي كلام من يهاجمونه إلي جانب نفسيا غير قادرة أهاجم الشخص اللي علمني القرآن

قولوا عليا عبيطة لكن كان صعب عليا أكتب الموضوع ده وبأدعو له بالهداية

لكن مش قادرة هأطق وعايز أعمل حاجة مش عارفة المفروض أعمل أيه

أنا لما بأقابل أي شخص لا يعرف تاريخه بأقول علي إنه فلول وبأقول علي الأشياء اللي ممكن تتقال

لكن حرب الفايسبوك دي مش مرتاحة لها خالص

بس كل ما يكتب تعليقات أو أراء علي الفايسبوك ببقي عايزه أصرخ و أقول " الله يرحم أيام زمان"

سؤالي ليكم ماذا تفعل لوكنت مكاني؟

وسؤال آخر علي المستوي الشخصي كيف تحارب فل من الفلول لو كنت تعرفه؟ هتعمل أيه؟

[se_ Elsyed]

سؤالي ليكم ماذا تفعل لوكنت مكاني؟

وسؤال آخر علي المستوي الشخصي كيف تحارب فل من الفلول لو كنت تعرفه؟ هتعمل أيه؟

لو دخلتي نفسك في تلك الحرب الدائرة هاتخسري نفسياً كتير ..

خليكي في حالك وإبعدي .... ومالكيش دعوة بتاريخه أو فضائحة .... وصدقيني هايتكشفت أجلاً ام عاجلاً ... ما حدش عبيط ومعظم الناس عارفه الغث من السمين

[ابراهيم عبد العزيز]

وسؤال آخر علي المستوي الشخصي كيف تحارب فل من الفلول لو كنت تعرفه؟ هتعمل أيه؟

سأعمل على كشف حقيقته قدر إستطاعتي سواء بين الأهل أو الأقرباء أو الأصدقاء أو الزملاء فى العمل أو الدراسة

كل مكان لي فيه كلمة مسموعة سأكشفه فيه دون تردد , وبذلك أكون قد قمت بما أستطيع ولا يكلف الله نفسا إلا وسعها

[عبير يونس]

كثير من الناس يغيرون جلودهم و أقنعتهم

و دوافعهم تختلف من شخص لآخر

فهناك من يعتقد أنه يفعل ذلك لأنه اكتشف أن ذلك هو الأفضل

و هناك من يفعل لك انتقاما من مبادئه التي يعتقد انها سبب فشله

و هناك من لا يعرف معنى كلمة مبدأ من الأساس و يتصرف حسب كل موقف بشكل مختلف حسب الظروف و ما تقتضيه مصلحته

في مسألة شيخك اللي علمك القرآن

و بما أنني لا أعرفه

فلا أجزم من أي الأصناف هو ؟!

و عليه لا يمكنني الجزم بكيفية التصرف معه؟

و لم أفهم قصدك؟

هل تريدين مواجهته؟

أم فقط تحذير الآخرين منه؟

[جويرية]

بس اتمني لو ممكن تعدلي الموضوع ، و تخفى تفاصيل عن الشخص ده ، لأن انتي مش عندك دليل علي كلامك

و رأيي نفس رأي الاستاذ سي السيد

ما حدش عبيط ومعظم الناس عارفه الغث من السمين

[Dreamwithme]

أستاذ سي السيد شكرا جدا لردك لأني كنت خايفة أكون سلبية

أستاذ ابراهيم أنا فعلا بأعمل كده علي نطاق المعارف والأصدقاء لكن مش علي نطاق الفايسبوك لأني بصراحة شايفاها معركة مالهاش لزمة شكرا ليك

جويرية شكرا ليكي علي مرورك وردك

عبير: أنا مش عايزة أواجهه لأنه هو فعلا عارف هو بيعمل ايه ولما حد بيواجهه بيغير منطق الأشياء وبيلوي الحقائق ببراعة

أنا كل خوفي علي الناس وخوفي من إنه ينجح ويدخل البرلمان فعلا

بس ربنا يقدر الخير لمصر يارب

وعلي فكرة أنا معنديش اعتراض إن حد يغير أرائه ومبادئه

لكن ده مش الموقف هنا ....الموقف هنا أنه بيعمل الشئ وبعدين لما حد يواجهه يكدب ويقول لأ محصلش

[الســـاري]

لو انتي خايفة تبقي سلبية .. وخايفة ناس تنخدع منه يبقى دا احساس جيد يا دريم اشجعك عليه

بس ما تدخليش اي جولة من دون ادلة

يعني لو عندك دليل واضح على تلونه .. وعلى نفاقه وكذبه .. وحاسة انك هتنفعي الناس لو عرضتي الدليل دا يبقى ما تتأخريش

لو ماكنش عندك دليل يثبت كلامك .. يبقى بلاش تقولي كلام ممكن يضرك ولا ينفعك

وهيبقى السكوت افضل .. ومش دليل سلبية ابدا ...

استخيري الله اولا واخيرا .. وشوفي القرار الافضل

تحياتي دريم

[رضوي]

دريمي حبيبتي الغالية

بصي ياقمراية بصراحة انا لو مكانك مش هسكت لأني اصلا مابعرفش اسكت ولأني هفضل قلقانة لحد مااتكلم واقول كل اللي في نفسي وافضحه او علي الاقل مايكونش فيه شخص انا اعرفه مايعرفش حقيقة الشخصية دي

والله بقى علمني القرآن بس له وش تاني انا ماليش دعوة ........ بس بصراحة مش هعرف اسكت

بس لازم اكون عارفة ان كلامي دة هيسببلي مشاكل اكيد مليون في المية لأن شخص زي دة عمره ماهيسكت ويسبني في حالي ويقول ربنا يسامحها ........... فلازم بقي اكون اقدر اتحمل اي مصادمات وعواقب لكلامي

لو هتقدري تواجهي اوك

لو مش هتقدري ولسة بتقدري الراجل دة لأنه علمك القرآن خلاص انسحبي بهدوء

والناس في مصر النهاردة قسمين ....... قسم عارف هو عايز ايه ومين وليه وعارف ايدولوجيته كويس وعارف طريقه سواء بقي علماني ليبرالي اخواني سلفي ..... الخ بس هو عارف

والقسم التاني شغال نقد في كل جانب بينقد الاخوان والعلمانين والاسلاميين والليبراليين والديموقراطيين والمعتدلين وكل الناس ....... ودة القسم اللي مش عارف هو عايز ايه وعمره ماهيعرف وعمره ماهيكون ليه دور اصلا في اي حاجة يعني م الاخر مش هيأثر ولا هيكون له صوت اصلا في يوم من الايام الا لما يشارك بجدية

يعني الناس الواعية اللي اصواتها مؤثرة فعلاً فاهمين وواعين كويس اوي ومايتخافش عليهم

بس خلاص شوفي انتي هتقدري تعملي ايه ........... ولو مش هتقدري تواجهي ع الفيس كفاية بس انك تحكي للناس اللي تعرفيهم معرفة مباشرة انه كان عضو فاعل في الحزب الوطني وخلصت

احد اقاربي كان عضو مجلس شورى وكان حزب وطني ....... عادي يعني فلول يعني .......... صحيح هو شخص محبوب جدا من اهالي دايرته ولو رشح نفسه مستقل او ضمن اي حزب تاني مكن ينجح مع ان كل الناس عارفة انه فلول ............ بس لو رشح نفسه انا عمري ماهديله صوتي اصلاً وهقول لأي حد مايعرفش انه حزب وطني على الحقيقة

مش لازم تحاربيه ع الفيس ........ ممكن بس تكشفي للناس اللي بتتعاملي معاهم معاملة مباشرة حقيقته وكل واحد عنده عقل واراده وصوت

[elzahraa]

موقفك صعب فعلا و مش عارفة الحل ايه بس غالبا الشخص دا بيبقى كلامه متناقض و بيكشف نفسه بنفسه و لو شخص قريب منك ممكن تحذريه منه لكن بالنسبة للاغراب عنك وضحلهم بس التناقض في كلامه و اهدافه

و ربنا معاك