شفيق يعلن ترشحه لإنتخابات الرئاسة

[eslam elmasre]

أعلن الفريق أحمد شفيق، رئيس الوزراء السابق، عن نيته الترشح للانتخابات الرئاسية المقبلة، وقال فى تصريحات خاصة لـ«المصرى اليوم»: «أمتلك من الخبرة والقدرة والكفاءة والنجاح فى كل المناصب التى توليتها، وعلى رأسها إنجازاتى فى وزارة الطيران المدنى، ما يدعم نيتى الترشح، ويؤكد قدرتى على الاستمرار فى خدمة الوطن، لتحقيق ما نتطلع إليه من تقدم ورخاء». وتابع: «قادر على تحمل الأعباء وفق رؤية استراتيجية سليمة ترعى المصلحة العليا للبلاد».

وأكد «شفيق» أن نيته الترشح للرئاسة ترتبط بعدم ظهور من يراه أفضل منه فى الانتخابات الرئاسية. وقال: «سأنسحب فوراً من سباق الرئاسة لو وجدت مرشحاً أفضل، لأن ما أتمناه لهذا البلد أن يعيش مرحلة ديمقراطية حقيقية، يستطيع كل فرد فيه أن يقول كلمته بحرية دون قيود»، لافتاً إلى أنه لم يحدد موعداً محدداً لبدء الحملة الانتخابية.

وأضاف: «خلفيتى العسكرية لا تعنى أنى مرشح عسكرى، فهناك فارق بين الخلفية العسكرية، والحكم العسكرى الذى يخلط بينهما البعض عن تعمد»، موضحاً أن هناك من تولى رئاسة الولايات المتحدة وبعض الدول الأوروبية، ولهم تاريخ عسكرى، دون أن يطلق أحد على حقبتهم أنها عسكرية، لأنهم حكموا بمعايير وأسس الدولة المدنية والديمقراطية، بالعكس دعمت الخلفية العسكرية حملتهم الانتخابية.

ووجه «شفيق» كلمة إلى جميع الأحزاب والقوى السياسية وشباب الثورة، قائلاً: «أدعو الجميع إلى إعلاء المصلحة العليا للبلاد فى الانتخابات البرلمانية المقبلة، حتى يكون البرلمان المقبل، معبراً عن أغلبية ذات شعبية حقيقية، ويؤسس لدستور ينقل الوطن إلى دولة القانون وسيادة الشعب».

ولفت «شفيق» إلى أنه لن يضع برنامجاً نمطياً مثل كل مرشحى الرئاسة، وإنما سيعلن عن برنامج طموح يرقى إلى ما تصبو إليه الجماهير، ويضع مصر على أعتاب الدول المتقدمة.

وأضاف: «من أولويات برنامجى الانتخابى إعادة هيكلة مؤسسات الدولة، ومعيار الكفاءة سيكون الحاسم فى اختيار القيادات التنفيذية».

http://www.almasryalyoum.com/node/509665

[eslam elmasre]

كل ثورة وانتم طيبين

ثورة بللم

بللم ثورة

سلام

[نورالعين]

البداية كانت المشير

ثم شفيق

وكلها من بالونات الاستطلاع

الجيش لا يريد البرادعي ولا الاسلاميين

او لنقل امريكا لا تريدهم

ومازال الامر متروك للغالبية الصامتة ان حصل وتكلمت

[شيدوان]

اعتقد ان الموضوع بروفه او جس نبض لمعرفة رد الفعل اذا صدقت اشاعة .. طنطاوى يعلن ترشحه لانتخابات الرئاسه...

فشفيق يرد على اسباب رفض الشعب قبول المشير كرئيس للجمهوريه فيقول كما جاء بالمقال

«خلفيتى العسكرية لا تعنى أنى مرشح عسكرى، فهناك فارق بين الخلفية العسكرية، والحكم العسكرى الذى يخلط بينهما البعض عن تعمد»

والدليل على ان كلامه تمهيد لدخول المشير الى مسرح الانتخابات قوله

وأكد «شفيق» أن نيته الترشح للرئاسة ترتبط بعدم ظهور من يراه أفضل منه فى الانتخابات الرئاسية. وقال: «سأنسحب فوراً من سباق الرئاسة لو وجدت مرشحاً أفضل، لأن ما أتمناه لهذا البلد أن يعيش مرحلة ديمقراطية حقيقية، يستطيع كل فرد فيه أن يقول كلمته بحرية دون قيود»

فليس هناك شك فى ان المشير فى نظره افضل منه بل هو الافضل فى كل انحاء مصر المحروسه

تحياتى

[وطني حر]

شفيق رجل مصري من حقه الترشخ للانتخابات الرئاسيه القادمه واي مصري من حقه الترشح

اظن هذه هي الديمقراطيـه انك تترشح وبعدد الاصوات توصل لكرسي الرئاسه .

لكن لما حكايه الجيش مش عايز الاسلاميين والمصرييين مش عايزين من العساكر .

اعتقد هذه الحدوثه لا بد ان نتجنبها لاننا بكدا بنهدم ما بنيناه وهو الثوره نحن بنينا الثوره وقمنا عليها فمش معقول نفرط فيها بسهوله

يجب علينا جميعا ان نلتف حول صندوق الاقتراع . ونحترم النتيجه وان لا نحكم عليها مقدما او نفصلها علي مقاس مين من الناس ونستبعد مين من الناس برادعي اخوان سلفيين ..........

انا عني ما عنديش اي حساسيه انو يوصل لكرسي الرئاسه سلفي متشدد او مسيحي متشدد بشرط ان يكون عبر انتخابات حره ونزيهه

[محمد كيبيك]

اة ومالة علشان وثائق امن الدولة اللى متحرقتش وهو رئيس وزراء تتحرق وهو رئيس جمهورية وبالمرة يكرم مبارك فى كل زمان ومكان هو مش قال على مبارك انة استمرارة فى الحكم صمام امان لمصر

[الدكتور ياسر]

عجبا و الله لأمر شفيق الصديق المقرب لمبارك ....المستهزئ بالثورة و الثوار ...

إن تصريحه هذا يستحق مليونية منفردة ...

[Nileman]

من حق أي مواطن مصري ترشيح نفسه

و الفيصل هو صندوق الانتخابات

[عبير يونس]

من حق أي مواطن مصري الترشح

من أجل ذلك قامت الثورة

و صندوق الانتخابات هو الفيصل

[الدكتور ياسر]

وماذا لو برأ القضاء جمال مبارك و رشح نفسه للرئاسة !

هل سنقبل بهذا بدعوى أنه مصري و الفيصل هو صندوق الإنتخابات ؟!

أرى أنه لا يجب أن نسمح بترشيح رموز النظام البائد حتى لو عدنا للتحرير مجددا ..

[عبير يونس]

و حضرتك زعلان ليه يا دكتور

هو انتو مش واثقين ان الشعب حيختار صح

يبقى حتى لو مبارك نفسه اترشح تاني

منخافش

لأن الشعب حيختار الصح

[الدكتور ياسر]

و حضرتك زعلان ليه يا دكتور

هو انتو مش واثقين ان الشعب حيختار صح

يبقى حتى لو مبارك نفسه اترشح تاني

منخافش

لأن الشعب حيختار الصح

كلامك مظبوط يا مدام عبير ..

قامت الثورة لإقامة العدل وإزاحة النظام الفاسد..

لذا فترشيح أحد رموز النظام الفاسد يعد إحباطا للثورة و تحديا لها...

و أخشى ما أخشاه أن يتم الإلتفاف حول اختيار الشعب ..

فرموز النظام البائد لن يعدموا الوسائل التى تثقل صناديق الإنتخابات لحسابهم ..

ووسائلهم معروفة للجميع ...

[عبير يونس]

العدل اللي قامت الثورة عشانه يقتضي ان أي مواطن مصري من حقه

يترشح للحكم

و الحل مش منعه

الحل اننا نشوف شغلنا في اعداد برامجنا

و التعريف بيها للشعب

و نسيبه يختار

مبدأ التلاعب موجود دايما

و التحرير موجود

لازم الشعب يختار

و الشعب فعلا لو اختار

لن يجدي التلاعب

الحل مش في منع حد من الترشح

لو شايفينه مجرم

دوروا على اللي يثبت اجرامه بالأدلة و البراهين

شفيق من بداية الثورة اعلن انه حيترشح

حد اتحرك؟؟؟!!!

محدش

حد حاول يثبت عليه حاجة؟؟؟

محدش

لعبنا لعبة الأرنب و السلحفاة

و اعجبتنا كثرتنا و قوتنا

و اعتبرنا خلاص الثورة نجحت

منجيش دلوقت نبكي على اللبن المسكوب

10 شهور مرت

سنة دراسية باجازة صيفية

لو كل واحد كان علّم عشرة بس من اصحابه و جيرانه و اقاربه يعني ايه ثورة

كنا زماننا عملنا كتير

للأسف تفرغنا للحروب الكلامية

التي لا تغني و تسمن من جوع

اللي حصل اللي حصل

و لا فائدة من الندم

ربنا يلطف بينا جميعا

و لا يؤاخذنا بما فعل السفهاء منا

آمين

[الدكتور ياسر]

انتى زعلانة ليه بس يامدام عبير :)

أنا بس لية وجهة نظر ..

أحمد شفيق بالذات كان ماسك الحكومة أيام الثورة ..

وأثار حفيظة الثوار بتصريحاته الساخرة منهم ومن ثورتهم ..

لدرجة ان مظاهرات خرجت للمطالبة بإقالته هو و حكومته .. هل تذكرين ذلك ؟؟

يعنى أساسا الشعب رفضه و هو عارف كدة ..

يبقى يرشح نفسه ليه ؟؟!!

على العموم أنا أثق في اختيار الشعب و احترم اختياره أيا كان ..

كل ما أتمناه أن تسير الإنتخابات بنزاهة وأن تعبر فعلا عن رأى الأغلبية ..

تحياتى لحضرتك

تم تعديل 29 أكتوبر 2011 بواسطة الدكتور ياسر

[أبو يمنى]

العدل اللي قامت الثورة عشانه يقتضي ان أي مواطن مصري من حقه

يترشح للحكم

و الحل مش منعه

متفق مع هذا الرأي .

:waving:

[eslam elmasre]

لو شفيق رشح نفسه يبقى عليه العوض ومنه العوض في الثورة

شفيق فلول اصلي مش مضروب وياما اتريق على الثورة والثوار ومننساش حكاية البونبوني ونعمل هايد ميدان التحرير هايد بارك للثوار

شفيق كان ومازال اخلاصه لمبارك لانه استاذه واللي وصله لما وصل اليه

ايه اللي بيحصل في الثورة يا ناس

فلول الحزب الوطني بيرشحوا نفسهم في انتخابات مجلس الشعب وهاينجحوا

وفلول بترشح نفسها لرياسة الجمهورية

والله دي ماهي ثورة

دي بأت بللم

[عبير يونس]

لو شفيق رشح نفسه يبقى عليه العوض ومنه العوض في الثورة

شفيق فلول اصلي مش مضروب وياما اتريق على الثورة والثوار ومننساش حكاية البونبوني ونعمل هايد ميدان التحرير هايد بارك للثوار

شفيق كان ومازال اخلاصه لمبارك لانه استاذه واللي وصله لما وصل اليه

ايه اللي بيحصل في الثورة يا ناس

فلول الحزب الوطني بيرشحوا نفسهم في انتخابات مجلس الشعب وهاينجحوا

وفلول بترشح نفسها لرياسة الجمهورية

والله دي ماهي ثورة

دي بأت بللم

طب يا أستاذ اسلام

حنكتفي بهذا القدر؟

التحسر و مصمصة الشفايف؟؟

المخلوع قال علينا : الشعب المصري لا يعرف معنى الديموقراطية

فين اللي عملناه عشان نحافظ على الثورة ؟؟

اذكر ان حضرتك طرحت موضوع مهم جدا عن المرشحين

هو ده الكلام المضبوط

الوقت وقت عمل و مش كلام

خلليه يترشح

و احنا برضه نشتغل

كل اللي يقدر يعمل حاجة للبلد دي يعملها

من غير ما يبص لغيره و يحاول يقيّمه

و اولا و اخيرا

ربنا ما بيضيعش عمل عامل منا

{ إن الله لا يضيع أجر من أحسن عملا }

[متعب]

الحريه والديمقراطيه من حق بتوع الوطنى بس انهم يتكلموا عليها لصالحهم فقط

امال الثورة قامت ليه مش عشان تعطى الحق ليهم فى الانتخابات ونقول حريه وثورة

لكن نهاجم البرادعى والسلفيين والاخوان وكل الطوائف السياسيه انما لما نيجى للوطنى ال افسد الحياه السياسيه على مدار قرون نقول من حقه الترشيح للرياسه وصندوق الاقتراع هو الفيصل

الحق بتاع ربنا بقى

انهم يتقدموا للمحاكمه طالما قامت الثورة

ده اسمه تهريج قزر من العسكر والقائمين على الحكم فى مصر انه يتم ترشيح واحد المفترض الثورة قامت عليه وعلى فساده

وبعدين نتكلم عن الحريه والحق المطلق باعتباره مصرى

خلاص حقى وحق بقى . مش عاوزين حريه وعداله اجتماعيه اوكيه

الراجل ده متقدم فيه اكتر من 29 بلاغ للنائب العام بين فساد واهدار مال عام وملفات قذرة اقل ملف فيهم اعدام او السجن المؤبد

هى دى مش عداله برده وحريه واقامه دوله القانون والغاء دوله القواده ال من النوع ده

انا حزين جدا على توافق الناس بعد الثورة انها تتكلم عن الحريه بالشكل ده بجد

يعنى الثورة قامت عشان شفيق يمسك الحكم

نسقط مبارك ونجيب واحد من اتباعه

هى الثورة قامت عشان كده

يعنى ايه الشعب يطلع يسقط واحد ويتم ترشيحه تانى

خلاص يبقى محدش يتكلم عن ثورة وقامت ومقامتشى

طيب متعطوا الخق كمان بقى لبقيه الشله مهما برده مصريين وليهم حق للترشيح على هذا الاساس ونسلم مصر من جديد ليهم

من الاخر بقى

معنى ان شفيق ينزل الانتخابات بعد قيام ثورة على نظامه ده معناه انه هيتزور الانتخابات رسمى له ومفيش خيار تانى

وساعتها هناخد العزاء رسمى مش فى الثورة لان الثورة مش هيتاخد فيها عزاء استحاله ده يحصل

هناخد العزاء فى سلميه الثورة . لان سلميه دى هتكون ماتت والعصابه دى هتطلع بالسلاح والتصفيه

وساعتها مش هيبقى فى خيار تانى قدام الشعب

تم تعديل 1 نوفمبر 2011 بواسطة الباز افندى

[زهرة الجبل]

و حضرتك زعلان ليه يا دكتور

هو انتو مش واثقين ان الشعب حيختار صح

يبقى حتى لو مبارك نفسه اترشح تاني

منخافش

لأن الشعب حيختار الصح

عارفه يا عبير إيه المشكله ؟

المشكله ليست في السماح لفلان بالترشح و لا عدم السماح لعلان بالنرشح

المشكله إن رموز النظام السابق و أوجه الفساد القبيحه التي إرتبطت بالفتره البائده لازالت للأسف الشديد تمتلك القدره في حال سنحت لها فرصة الترشح على العبث بنزاهة نتائج الإنتخابات

لا يمكننا أن تغض الطرف عن فئات مطحونه من الشعب المصري كانت تأمل من الثوره خيراً و لم تحصل عليه حتى الآن .. سيسهل كثيراً شراء أصوات هذه الفئه

و لا يمكننا غض الطرف عن أن عدداً لا يستهان به من البلطجيه مازالوا للأسف الشديد أحراراً طلقاء يتركون بين الحين و الآخر بصمات تهديديه و ترويعيه هنا و هناك

و ليس صعباً على رمز من هذه الرموز الفاسده إن وجد فرصه للترشح أن يستخدمهم كيفما شاء و بلا تقييم لنزاهة الإنتخابات

كما أن أصغر فــِــل الآن له خبره عريقه بالتزوير في الإنتخابات و التلاعب بنتائجها و المتاجره بصناديقها

و إن كنا نسينا اللي جرى .. هاتوا دفاتر النتائج المعلبه و إخترناااااااااااك و ال 99,9% تنقرى

مهو أيام المخلوع لما كانت النتيجه بتظهر 99% لصالحه .. الشعب مكنش بيسكت لأنه مصدق .. كان بيسكت لأنه مش عارف يقول إيه .. مهو كله بالصناديق .. هي هي نفس الصناديق اللي كل ما حد يتكلم دلوقت يبقى الرد عليه هو سيبوا الصناديق تحكم

مهو لو الصندوق لوحده كفايه علشان يحكم مكنش حد غلب

الخوف ليس على الترشح .. الخوف على الصندوق نفسه من بعض المرشحين

بإختصار :

فــِـل (مفرد فلول ) لديه فرصه ليترشح + قدره ماليه + بلطجيه +نفوس ضعيفه يمكن شراءها + خبره عريقه في تزوير الإنتخابات = كارثه محققه لا يمكن السيطره عليها

بينما

فلول بدون فرص للترشح + أموال + خبره عريقه في تزوير الإنتخابات +بلطجيه + نفوس ضعيفه يائسه يحتمل شراءها = أعمال شغب يائسه و عمليات تخريبيه لا أمل لها أكبر من إفساد الإنتخابات و تصعيب إتمامها بسلاسه

المعادله الثانيه يمكن السيطره عليها إذا وضعنا خطط أمنيه محكمه و حاولنا الإعتماد على عناصر أخرى غير الشرطه المتخاذله و الجيش الذي لم يستطع إحكام قبضة الأمن حتى الآن

أما المعادله الأولى فكارثتها تكمن في أن المسأله ستصبح شكلياً قانونيه لا يمكن الإعتراض عليها

هذه هي وجهة نظري و الطريقه التي أرى بها هذا الأمر

تم تعديل 1 نوفمبر 2011 بواسطة زهرة الجبل

[زهرة الجبل]

ولفت «شفيق» إلى أنه لن يضع برنامجاً نمطياً مثل كل مرشحى الرئاسة، وإنما سيعلن عن برنامج طموح يرقى إلى ما تصبو إليه الجماهير، ويضع مصر على أعتاب الدول المتقدمة.

سبحان الله

حد لاحظ معايا كم الديموقراطيه الذي يقطر من كلامه و هو (( من أولها كده )) يصف كل المرشحين للرئاسه فيما عداه طبعاً بالنمطيه و برامجهم كلهم بلا إستثناء نمطيه غير طموحه ؟؟

الحقيقه لنا عتب على جناب الفريق أحمد شفيق أنه لم يعلن صراحة عن حجم مخزون (( البومبوني )) المتوافر لديه

يا ترى عمل حسابه على كميه تكفي للشعب كله في حال نجح في الإنتخابات و بقى ريسنا ؟؟

و لا هتبقى الحكايه فيها خيار و فقوس ؟؟